مجمع الزوائد ومنبع الفوائد

سیدنا اسامہ بن زید رضی اللہ عنہ بیان کرتے ہیں : جب نبی اکرم صلی اللہ علیہ وسلم غزوہ بنو مصطلق سے واپس تشریف لائے تو عبداللہ بن اُبی کا بیٹا ( ان کا نام بھی سیدنا عبداللہ ہی یہ ہے ) اس نے اپنے باپ کے سامنے تلوار سونت لی اور یہ کہا: اللہ کی قسم ! مجھ پر یہ بات لازم ہے کہ یہ تلوار میں اس وقت تک میان میں نہیں ڈالوں گا ، جب تک آپ یہ نہیں کہتے : کہ سیدنا محمد صلی اللہ علیہ وسلم عزت والے ہیں اور میں ذلیل ہوں ، تو عبداللہ بن اُبی نے کہا: تمہارا ستیاناس ہو ! سیدنا محمد صلی اللہ علیہ وسلم عزت والے ہیں ، اور میں ذلیل ہوں ۔ راوی کہتے ہیں : جب نبی اکرم صلی اللہ علیہ وسلم کو یہ بات بتائی گئی تو آپ کو یہ بات اچھی لگی اور آپ نے سیدنا عبداللہ رضی اللہ عنہ بن عبدالله کا شکریہ ادا کیا ( یا ان کی تعریف کی ) ۔
یہ روایت امام طبرانی نے نقل کی ہے اس کی سند میں ایک راوی محمد بن حسن بن زبالہ ہے اور وہ ضعیف ہے ۔

سیدنا عبدالله رضی اللہ عنہ بن عبداللہ بن اُبی کے بارے میں یہ بات منقول ہے : انہوں نے نبی اکرم صلی اللہ علیہ وسلم سے یہ اجازت مانگی کہ وہ اپنے باپ ( رئیس المنافقین عبداللہ بن ابی ) کو قتل کر دیں ، تو نبی اکرم صلی اللہ علیہ وسلم نے فرمایا : تم اپنے باپ کو قتل نہ کرو ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ، البتہ عروہ بن زبیر نے سیدنا عبداللہ رضی اللہ عنہ بن عبدالله بن ابی کا زمانہ نہیں پایا ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم کا گزر عبداللہ بن اُبی کے پاس سے ہوا ، وہ اس وقت ایک عمارت کے سائے میں موجود تھا ، اس نے کہا: ابن ابوکبشہ نے ہم پر غبار ڈال دیا ہے ، تو اس کے بیٹے سیدنا عبداللہ رضی اللہ عنہ بن عبدالله نے کہا: یا رسول اللہ ! اس ذات کی قسم ! جس نے آپ کو عزت عطا کی ہے ، اگر آپ چاہیں ، تو میں اس کا سر آپ کے پاس لے کر آتا ہوں ، نبی اکرم صلی اللہ علیہ وسلم نے فرمایا : جی نہیں ! بلکہ تم اپنے باپ کے ساتھ اچھا سلوک کرو ، اور اس کے ساتھ اچھے طریقے سے رہو ۔
یہ روایت امام بزار نے نقل کی ہے اور اس کے رجال ثقہ ہیں ۔