مجمع الزوائد ومنبع الفوائد

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے انصار کے گروہ ! تمہارا سردار کون ہے ؟ ان لوگوں نے عرض کی : جد بن قیس ، ویسے ہم انہیں بخیل سمجھتے ہیں ، نبی اکرم صلی اللہ علیہ وسلم نے فرمایا : وہ تمہارا سردار نہیں ہے ، بلکہ تمہارا سردار عمرو بن جموح ہے ، وہ سخی ہے ۔ “ ( شاید یہ الفاظ راوی کے ہیں : وہ سخی ہے ) ۔
یہ روایت امام طبرانی نے معجم اوسط اور معجم کبیر میں نقل کی ہے اس کی سند میں ایک راوی ابوشیبہ بن ابراہیم بن عثمان ہے اور وہ ضعیف ہے ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے دریافت کیا : اے بنو سلمہ ! تمہارا سردار کون ہے ؟ انہوں نے عرض کی : جد بن قیس ہیں ، ویسے ہم انہیں بخیل شمار کرتے ہیں ، نبی اکرم صلی اللہ علیہ وسلم نے فرمایا : بلکہ تمہارا سردار گھنگھریالے بالوں والا ، گوری رنگت والا ، عمرو بن جموح ہے ۔ راوی بیان کرتے ہیں : نبی اکرم صلی اللہ علیہ وسلم جب بھی شادی کرتے تھے ، تو سیدنا عمرو بن جموح رضی اللہ عنہ نبی اکرم صلی اللہ علیہ وسلم کے ولیمے کا انتظام کرتے تھے ۔
یہ روایت امام بزار نے نقل کی ہے اور اس کے رجال صحیح کے رجال ہیں ، صرف حمید بن ربیع کا معاملہ مختلف ہے ، عثمان بن ابوشیبہ اور ابن حبان نے اور دیگر حضرات نے اسے ثقہ قرار دیا ہے اور ایک جماعت نے اسے ضعیف کہا: ہے ۔

سیدنا کعب بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے دریافت کیا : اے بنو سلمہ ! تمہارا سردار کون ہے ؟ ان لوگوں نے جواب دیا : جد بن قیس ہیں ، ویسے ہم انہیں بخیل شمار کرتے ہیں ، نبی اکرم صلی اللہ علیہ وسلم نے فرمایا : ” بخل سے زیادہ بری بیماری اور کون سی ہے ؟ بلکہ تمہارا سردار گھنگھریالے بالوں والا فرد ، عمرو بن جموح ہے ۔ “
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ، صرف امام طبرانی کے استاد کا معاملہ مختلف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے بنو سلمہ ! آج تمہارا سردار کون ہے ؟ لوگوں نے جواب دیا : جد بن قیس ہیں ، لیکن ہم انہیں بخیل سمجھتے ہیں ، نبی اکرم صلی اللہ علیہ وسلم نے فرمایا : بخل سے زیادہ بری بیماری اور کون سی ہے ؟ بلکہ تمہارا سردار عمرو بن جموح ہے ۔ “
یہ روایت امام طبرانی نے معجم اوسط میں نقل کی ہے اور اس کی سند میں ایک راوی ابراہیم بن یزید مکی ہے اور وہ متروک ہے ۔ ( علامہ ہیثمی فرماتے ہیں : ) میں یہ کہتا ہوں : اس نوعیت کی کچھ احادیث کتاب الزکوۃ میں ، کنجوسی اور سخاوت سے متعلق باب میں گزر چکی ہیں ۔

سیدنا ابوقتادہ رضی اللہ عنہ بیان کرتے ہیں : وہ اُس وقت وہاں موجود تھے جب سیدنا عمرو بن جموح رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے ، انہوں نے عرض کی : یا رسول اللہ ! اس بارے میں آپ کی کیا رائے ہے ؟ کہ اگر میں اللہ کی راہ میں جنگ میں حصہ لیتا ہوں اور قتل ہو جاتا ہوں ، تو کیا میں جنت میں اپنی اس ٹانگ کے ذریعے صحیح طور پر چل پاؤں گا ؟ راوی کہتے ہیں : اُن کی ایک ٹانگ میں لنگڑاہٹ تھی ، نبی اکرم صلی اللہ علیہ وسلم نے فرمایا : جی ہاں ! راوی کہتے ہیں : تو غزوہ احد کے دن ، وہ ان کے ایک بھتیجے اور ان کے ایک غلام شہید ہو گئے ، نبی اکرم صلی اللہ علیہ وسلم کا گزر ان کے پاس سے ہوا ، تو آپ صلی اللہ علیہ وسلم نے ارشاد فرمایا : میں گویا اس وقت بھی اس کی طرف دیکھ رہا ہوں کہ یہ اپنی اس ٹانگ کے ذریعے صحیح طور پر چل رہا تھا ، تو نبی اکرم صلی اللہ علیہ وسلم نے ان دونوں افراد اور ان کے غلام کے بارے میں حکم دیا ، تو انہیں ایک ہی قبر میں اتارا گیا ۔
یہ روایت امام أحمد نے نقل کی ہے اور اس کے رجال صحیح کے رجال ہیں ، صرف یحیی بن نصر انصاری کا معاملہ مختلف ہے اور وہ ثقہ ہے ۔