مجمع الزوائد ومنبع الفوائد

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مشرکین کے لئے ، ابوطلحہ کی آواز ایک گروہ سے زیادہ سخت ہے ۔ “

ایک روایت میں یہ الفاظ ہیں : ” لشکر میں ابوطلحہ کی آواز ایک گروہ سے زیادہ بہتر ہے ۔ “
یہ روایت امام أحمد اور امام ابویعلیٰ نے نقل کی ہے اور پہلی روایت کے رجال صحیح کے رجال ہیں ۔

سیدنا انس رضی اللہ عنہ بیان کرتے ہیں : سیدنا ابوطلحہ رضی اللہ عنہ نے سورت توبہ کی تلاوت کی ، جب وہ اس مقام پر پہنچے : ” ہلکے یا بوجھل ہونے کے عالم میں نکل کھڑے ہو ۔ “ تو سیدنا ابوطلحہ رضی اللہ عنہ نے فرمایا : میں یہ دیکھ رہا ہوں ، میرے پروردگار نے مجھے یہ حکم دیا ہے ، میں نکل کھڑا ہوؤں ، خواہ میں جوان ہوں یا بوڑھا ہوں ، تو تم لوگ مجھے سامان سفر تیار کر کے دو ! ان کے بیٹوں نے کہا: آپ اللہ کے رسول کے ساتھ جنگ میں حصہ لیتے رہے ہیں ، یہاں تک کہ ان کا وصال ہو گیا ، پھر سیدنا ابوبکر رضی اللہ عنہ کے ساتھ جنگ میں حصہ لیتے رہے ہیں ، یہاں تک کہ ان کا انتقال ہو گیا پھر سیدنا عمر رضی اللہ عنہ کے ساتھ جنگ میں حصہ لیتے رہے ، اور اب ہم آپ کی جگہ جنگ میں حصہ لے لیں گے ، انہوں نے فرمایا : تم لوگ مجھے سامان فراہم کرو ! پھر وہ سمندری سفر پر روانہ ہوئے ، اور اس دوران ان کا انتقال ہو گیا ہے ، لوگوں کو ان کو دفن کرنے کے لئے کوئی جزیرہ نہیں ملا ، ایسا جزیرہ سات دن بعد ملا ، لیکن اس دوران ان کی میت خراب نہیں ہوئی ۔
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ۔

سیدنا انس بن مالک رضی اللہ عنہ بیان کرتے ہیں : سیدنا ابوطلحہ رضی اللہ عنہ سمندری جنگ میں حصہ لینے کے لئے نکلے ان کا کشتی میں انتقال ہو گیا ، ان لوگوں کو انہیں دفن کرنے کے لئے کوئی جگہ نہیں ملی ، تو وہ چھ دن تک انتظار کرتے رہے ، یہاں تک کہ سات دن بعد انہیں ایک جگہ ملی ، جہاں ان لوگوں نے انہیں دفن کیا ، تو اس دوران ان کا جسم خراب نہیں ہوا ، بلکہ ویسے ہی رہا جیسے تھا ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

یحیی بن بکیر بیان کرتے ہیں : سیدنا ابوطلحہ زید بن سہل رضی اللہ عنہ کا انتقال چونتیس ہجری میں ہوا تھا ، سیدنا عثمان غنی رضی اللہ عنہ نے ان کی نماز جنازہ پڑھائی تھی ، اس وقت ان کی عمر ستر سال تھی اور ان کا نام سیدنا زید بن سہل رضی اللہ عنہ ہے ۔
یہ روایت امام طبرانی نے نقل کی ہے اور یہ سند کے اعتبار سے منقطع ہے ۔

محمد بن عبداللہ بن نمیر بیان کرتے ہیں : سیدنا ابوطلحہ زید بن سہل رضی اللہ عنہ کا انتقال چونتیس ہجری میں ہوا تھا ، سیدنا عثمان غنی رضی اللہ عنہ نے ان کی نماز جنازہ پڑھائی تھی ، انتقال کے وقت ان کی عمر ستر برس کے لگ بھگ تھی ، ایک قول کے مطابق سیدنا ابوطلحہ رضی اللہ عنہ کا انتقال بتیس ہجری میں ہوا تھا ۔
یہ روایت امام طبرانی نے نقل کی ہے اور اس کی سند ابن نمیر سے منقول ہونے کے حوالے سے منقطع ہے ۔