مجمع الزوائد ومنبع الفوائد

( علامہ ہیثمی فرماتے ہیں : ) میں یہ کہتا ہوں : امام طبرانی نے یہ روایت نقل کی ہے ، انہوں نے غزوہ بدر میں شرکت کی ہے ۔

سیدنا ابوحبہ بدری رضی اللہ عنہ بیان کرتے ہیں : جب یہ سورت نازل ہوئی ، تو سیدنا جبرائیل علیہ السلام نے کہا: یا رسول الله ! آپ کا پروردگار آپ کو یہ حکم دیتا ہے کہ آپ اسے سیدنا ابی کے سامنے پڑھیں ، نبی اکرم صلی اللہ علیہ وسلم نے سیدنا ابی رضی اللہ عنہ سے فرمایا : جبرائیل نے مجھے یہ ہدایت کی ہے کہ میں تمہارے سامنے یہ سورت پڑھوں ، سیدنا ابی رضی اللہ عنہ نے دریافت کیا : یا رسول اللہ ! کیا وہاں میرا ذکر ہوا ہے ؟ نبی اکرم صلی اللہ علیہ وسلم نے جواب دیا : جی ہاں ! تو سیدنا ابی رضی اللہ عنہ رونے لگے ۔
یہ روایت امام أحمد اور امام طبرانی نے نقل کی ہے ، اس کی سند میں ایک راوی علی بن زید ہے اور وہ حسن الحدیث ہے اور اس روایت کے بقیہ رجال صحیح کے رجال ہیں ۔

سیدنا ابی بن کعب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے ابوالمنذر ! مجھے یہ حکم دیا گیا ہے ، میں تمہارے سامنے قرآن پڑھوں ، انہوں نے عرض کی : میں اللہ تعالیٰ پر ایمان لایا اور میں نے آپ کے ہاتھ پر اسلام قبول کیا اور میں نے آپ سے علم حاصل کیا ، نبی اکرم صلی اللہ علیہ وسلم نے اپنی بات دہرائی تو انہوں نے عرض کی : یا رسول اللہ ! کیا میرا ذکر وہاں ہوا ہے ؟ نبی اکرم صلی اللہ علیہ وسلم نے فرمایا : جی ہاں ! تمہارے نام اور تمہارے نسب کے ہمراہ ملاء اعلیٰ میں ہوا ہے ، تو انہوں نے عرض کی : یا رسول اللہ ! پھر آپ تلاوت کیجئے ۔

ایک روایت میں یہ الفاظ ہیں : وہ بیان کرتے ہیں : میں نے نبی اکرم صلی اللہ علیہ وسلم کے سامنے قرآن پڑھا تو آپ صلی اللہ علیہ وسلم نے فرمایا : جبرائیل نے مجھے یہ ہدایت کی ہے ، کہ میں تمہارے سامنے قرآن پڑھوں ۔

ایک روایت میں یہ الفاظ ہیں : سیدنا ابی رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھ سے فرمایا : مجھے یہ حکم دیا گیا ہے کہ میں تمہیں قرآن پڑھاؤں ۔
( علامہ ہیثمی فرماتے ہیں : ) میں یہ کہتا ہوں : یہ روایت امام ترمذی نے اختصار کے ساتھ نقل کی ہے ۔ یہ روایت امام طبرانی نے معجم اوسط میں مختلف اسانید کے ساتھ نقل کی ہے اور پہلی روایت کے رجال کی توثیق کی گئی ہے ۔

اس سے پہلے سیدنا معاذ بن جبل رضی اللہ عنہ کی فضیلت سے متعلق یہ روایت گزر چکی ہے ، نبی اکرم صلی اللہ علیہ وسلم نے ارشاد فرمایا : ” قرآن چار افراد سے سیکھو ! ابی بن کعب سے ۔ “

عامر شبعی بیان کرتے ہیں : نبی اکرم صلی اللہ علیہ وسلم کے زمانہ اقدس میں انصار سے تعلق رکھنے والے چھ افراد نے قرآن جمع کیا تھا ( شاید اس سے مراد یہ ہے پورا حفظ کیا تھا ) سیدنا زید بن ثابت رضی اللہ عنہ ، سیدنا ابوزید رضی اللہ عنہ ، سیدنا ابومعاذ بن جبل رضی اللہ عنہ ، سیدنا ابودرداء رضی اللہ عنہ ، سیدنا سعد بن عبادہ رضی اللہ عنہ ، سیدنا ابی بن کعب رضی اللہ عنہ ، جبکہ سیدنا جاریہ بن مجمع رضی اللہ عنہ نے پورا قرآن پڑھا تھا ، صرف ایک یا دو سورتوں کو نہیں پڑھا تھا ۔
یہ روایت امام طبرانی نے مرسل روایت کے طور پر نقل کی ہے ، اس کی سند میں ایک راوی ابراہیم بن محمد بن عثمان حضرمی ہے اور میں اس سے واقف نہیں ہوں ، اس روایت کے بقیہ رجال صحیح کے رجال ہیں ۔

مسروق بیان کرتے ہیں : نبی اکرم صلی اللہ علیہ وسلم کے زمانہ اقدس میں قاضی کے طور پر فیصلہ دینے والے افراد چھ تھے ، سیدنا عمر ، سیدنا علی ، سیدنا عبداللہ ، سیدنا ابی بن کعب ، سیدنا زید اور سیدنا ابوموسی رضی اللہ عنہم ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

عتی سعدی بیان کرتے ہیں : میں نے سیدنا ابی بن کعب رضی اللہ عنہ کو دیکھا ، ان کے سر اور داڑھی کے بال سفید تھے ، وہ خضاب استعمال نہیں کرتے تھے ۔
یہ روایت امام طبرانی نے نقل کی ہے اور اس کی سند حسن ہے ۔

زر بن حبیش بیان کرتے ہیں : سیدنا ابی بن کعب رضی اللہ عنہ کے مزاج میں خوشگواریت تھی ۔
یہ روایت امام طبرانی نے نقل کی ہے اور اس کے رجال صحیح کے رجال ہیں صرف محمد بن کناسہ کا معاملہ مختلف ہے اور وہ ثقہ ہے ۔

محمد بن عبداللہ بن نمیر بیان کرتے ہیں : سیدنا ابی بن کعب رضی اللہ عنہ کا انتقال سیدنا عمر بن خطاب رضی اللہ عنہ کے عہد خلافت میں تیئس ہجری میں ہوا تھا ، بعض حضرات نے یہ بات بیان کی ہے : ان کا انتقال سیدنا عثمان رضی اللہ عنہ کے عہد خلافت میں ہوا تھا ، کسی نے یہ کہا: ہے : سن تیس ہجری میں سیدنا عثمان رضی اللہ عنہ کے عہد خلافت میں ہوا تھا ۔

یحیی بن بکیر بیان کرتے ہیں : سیدنا ابی بن کعب رضی اللہ عنہ کا انتقال مدینہ منورہ میں بائیس ہجری میں ہوا تھا ، ان کی کنیت ابوالمندر تھی ۔
یہ روایت امام طبرانی نے نقل کی ہے اور اس کی سند ابن نمیر سے منقول ہونے کے حوالے سے منقطع ہے ۔