مجمع الزوائد ومنبع الفوائد

سیدنا معاذ رضی اللہ عنہ کے بارے میں یہ بات منقول ہے : وہ بیمار ہو گئے ، انہوں نے اپنے دائیں طرف تھوک دیا ، یا انہوں نے اپنے دائیں طرف تھوکنے کا ارادہ کیا ( یعنی انہیں دائیں طرف تھوکنے کی ضرورت پیش آئی ) تو انہوں نے فرمایا : جب سے میں نے اسلام قبول کیا ہے ، کبھی اپنے دائیں طرف نہیں تھوکا ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدنا عبداللہ بن مسعود رضی اللہ عنہ بیان کرتے ہیں : سیدنا معاذ رضی اللہ عنہ ایک امت تھے ، جو اللہ تعالیٰ کے فرمانبردار تھے ، سیدھے راستے پر گامزن تھے ، اور مسلمان تھے ، وہ مشرکین میں سے نہیں تھے ۔ راوی بیان کرتے ہیں : راوی کے ساتھ بیٹھے ہوئے کسی شخص نے یہ بات بیان کی : ابراہیم نخعی نے یہ بات بیان کی ہے : میں یہ بات نہیں بھولا کہ اس کے بعد سیدنا عبداللہ بن مسعود رضی اللہ عنہ نے دریافت کیا : کیا تم لوگ یہ بات جانتے ہو ؟ اُمت سے مراد کیا ہے ؟ لوگوں نے جواب دیا : جی نہیں ! تو سیدنا عبداللہ رضی اللہ عنہ نے فرمایا : اس سے مراد وہ شخص ہے جو لوگوں کو بھلائی کی تعلیم دیتا ہے ، پھر سیدنا عبداللہ رضی اللہ عنہ نے دریافت کیا : کیا تم جانتے ہو قانت سے مراد کیا ہے ؟ لوگوں نے جواب دیا : جی نہیں ! تو سیدنا عبداللہ رضی اللہ عنہ نے فرمایا : اس سے مراد ، اللہ تعالیٰ کا فرمانبردار شخص ہے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف حجاج بن ابراہیم کا معاملہ مختلف ہے اور وہ ثقہ ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قرآن کا علم چار لوگوں سے حاصل کرو ! ابی بن کعب ، عبداللہ بن مسعود ، معاذ بن جبل اور ابوحذیفہ کا غلام سالم ۔ “
یہ روایت امام بزار نے نقل کی ہے اور اس کے رجال ثقہ ہیں ۔

محمد بن کعب قرظی بیان کرتے ہیں : نبی اکرم صلی اللہ علیہ وسلم نے ارشاد فرمایا : ” معاذ بن جبل ، علماء سے ایک قدم آگے ہو گا ۔ “
یہ روایت امام طبرانی نے ” مرسل “ روایت کے طور پر نقل کی ہے ، اس کی سند میں ایک راوی محمد بن عبداللہ بن ازہر انصاری ہے اور میں اُس سے واقف نہیں ہوں ، اس روایت کی بقیہ رجال صحیح کے رجال ہیں ۔

یحیی بن بکیر بیان کرتے ہیں : میں نے سیدنا انس بن مالک رضی اللہ عنہ کو یہ فرماتے ہوئے سنا ہے : ” سیدنا معاذ بن جبل رضی اللہ عنہ کا انتقال 28 سال کی عمر میں ہو گیا تھا ، کسی نے یہ بیان کیا ہے : کہ 32 سال کی عمر میں ہوا تھا اور نبی اکرم صلی اللہ علیہ وسلم نے یہ ارشاد فرمایا ہے : ” معاذ ، علماء سے ایک قدم آگے ہو گا ۔ “ یحیی بن بکیر کہتے ہیں : لفظ ” رتوة“ کا مطلب ” منزلت “ ہے ۔
یہ روایت امام طبرانی نے نقل کی ہے اور یہ سند کے اعتبار سے منقطع ہے ۔

یحیی بن بکیر بیان کرتے ہیں : سیدنا معاذ بن جبل رضی اللہ عنہ کا انتقال ” عمواس “ کے طاعون میں 17 یا شاید 18 ہجری میں ہوا تھا ۔
یہ روایت امام طبرانی نے نقل کی ہے اور اس کی سند منقطع ہے ۔

سعید بن مسیب بیان کرتے ہیں : جب سیدنا معاذ بن جبل رضی اللہ عنہ کا انتقال ہوا ، اس وقت ان کی عمر 35 برس یا شاید 34 برس تھی ۔

یحیی بن سعید بیان کرتے ہیں : جب سیدنا معاذ بن جبل رضی اللہ عنہ کا انتقال ہوا ، اس وقت ان کی عمر 28 برس تھی ، جس نے ان کی عمر زیادہ بیان کی ہے اس کا یہ کہنا ہے : کہ ان کی عمر 32 برس تھی ۔
یہ روایت امام طبرانی نے نقل کی ہے ، یہ سند کے اعتبار سے منقطع ہے اور اس کی سند حسن ہے ۔