مجمع الزوائد ومنبع الفوائد

ابوعبیدہ معمر بن مثنیٰ بیان کرتے ہیں : سیدنا عتبہ بن غزوان رضی اللہ عنہ کی کنیت ابوعبداللہ تھی ، اور ایک قول کے مطابق ابوغزوان تھی ، وہ طویل القامت خوبصورت شخص تھے ، ان کا انتقال 17 ہجری میں ہوا تھا ، جب وہ دوسری مرتبہ بصرہ جا رہے تھے ، انہیں کسی پانی کے پاس دفن کیا گیا تھا ، ان کی عمر 55 سال تھی ، وہ بنو نوفل بن عبدمناف کے حلیف تھے ۔
یہ روایت امام طبرانی نے نقل کی ہے اور اس کی سند منقطع ہے اور اس کے رجال ثقہ ہیں ۔

یحیی بن بکیر بیان کرتے ہیں : سیدنا عتبہ بن غزوان رضی اللہ عنہ کا انتقال 17 ہجری میں ، بصرہ کے راستے میں ہوا تھا ، وہ سیدنا عمر بن خطاب رضی اللہ عنہ کے مقرر کردہ اہلکار تھے ، ان کی عمر 57 برس تھی ، ایک قول کے مطابق ان کا انتقال 20 ہجری میں ہوا تھا ، یہ وہ فرد ہیں جنہوں نے ” بصرہ “ شہر بسایا تھا ، وہاں گھروں کی حد بندی کی تھی ، اور وہاں کی مسجد تعمیر کی تھی ، یہ وہ فرد ہیں ، جنہوں نے ” ابلہ “ فتح کیا تھا ، یہ چھ ماہ تک بصرہ کے گورنر رہے تھے ، سیدنا عمر رضی اللہ عنہ نے انہیں وہاں کا گورنر مقرر کیا تھا ۔
یہ روایت امام طبرانی نے نقل کی ہے ۔