مجمع الزوائد ومنبع الفوائد

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سبقت لے جانے والے افراد چار ہیں ، میں ، عربوں میں سے سبقت لے جانے والا ہوں ، اور صہیب ، رومیوں میں سے سبقت لے جانے والا ہے ، اور سلمان ، فارسیوں میں سے سبقت لے جانے والا ہے ، اور بلال حبشیوں میں سے سبقت لے جانے والا ہے ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف عمارہ بن زاذان کا معاملہ مختلف ہے اور وہ ثقہ ہے ، لیکن اس میں اختلاف پایا جاتا ہے ۔

سیدنا ابوامامہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میں ، عربوں میں سے جنت کی طرف سبقت لے جانے والا ہوں اور رومیوں میں سے ، صہیب ، جنت کی طرف سبقت لے جانے والا ہے اور حبشیوں میں سے بلال جنت کی طرف سبقت لے جانے والا ہے اور فارسیوں میں سے سلمان جنت کی طرف سبقت لے جانے والا ہے ۔ “
یہ روایت امام طبرانی نے نقل کی ہے اور اس کی سند حسن ہے ۔

سیدہ ام ہانی رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” سبقت لے جانے والے افراد چار ہیں ، عربوں میں سے ” میں “ سبقت لے جانے والا ہوں ، فارسیوں میں سے سلمان سبقت لے جانے والا ہے ، رومیوں میں سے صہیب سبقت لے جانے والا ہے اور حبشیوں میں سے بلال سبقت لے جانے والا ہے ۔ “
یہ روایت امام طبرانی نے نقل کی ہے ، اس کی سند میں ایک راوی فائد ہے اور وہ متروک ہے ۔ ( علامہ ہیثمی فرماتے ہیں : ) میں یہ کہتا ہوں : صحابہ کرام کی جماعت کی فضیلت سے متعلق باب میں ، اس روایت کے بعض طرق گزر چکے ہیں ۔

سیدنا صہیب رضی اللہ عنہ بیان کرتے ہیں : میں نبی اکرم صلی اللہ علیہ وسلم کی طرف پہلی مرتبہ وحی نازل ہونے سے پہلے ہی سے آپ کے ساتھ ہوں ۔
یہ روایت امام طبرانی نے نقل کی ہے اور اس کی سند میں ایسا راوی ہے ، جس سے میں واقف نہیں ہوں ۔

سیدنا عبداللہ بن عباس رضی اللہ عنہما کے غلام مکرمہ بیان کرتے ہیں : سیدنا صہیب رضی اللہ عنہ نے اپنے مالکان کو اپنا نصف مال فدیے کے طور پر دیا ، پھر وہ ہجرت کرنے کے لئے نکلے ، راستے میں وہ لوگ اُن کے پاس پہنچ گئے ، تو سیدنا صہیب رضی اللہ عنہ نے باقی بچا ہوا مال بھی انہیں دے دیا اور پھر آگے روانہ ہو گئے ۔
یہ روایت امام طبرانی نے ” مرسل “ روایت کے طور پر نقل کی ہے اور اس کے رجال ثقہ ہیں ۔

سیدنا صہیب رضی اللہ عنہ بیان کرتے ہیں : سیدنا ابوبکر رضی اللہ عنہ اپنے ایک قیدی کے ساتھ گزرے ، وہ نبی اکرم صلی اللہ علیہ وسلم سے اس کے لیے امان لینا چاہتے تھے ، سیدنا صہیب رضی اللہ عنہ اس وقت مسجد میں بیٹھے ہوئے تھے ، انہوں نے سیدنا ابوبکر رضی اللہ عنہ سے دریافت کیا : آپ کے ساتھ کون ہے ؟ سیدنا ابوبکر رضی اللہ عنہ نے جواب دیا : مشرکین سے تعلق رکھنے والا میرا ایک قیدی ہے ، میں اللہ کے رسول صلی اللہ علیہ وسلم سے اس کے لیے امان لینا چاہتا ہوں ، سیدنا صہیب رضی اللہ عنہ نے فرمایا : اس کی گردن میں تلوار کے لیے ایک جگہ ہے ، اس پر سیدنا ابوبکر رضی اللہ عنہ غصے میں آ گئے ، جب نبی اکرم صلی اللہ علیہ وسلم نے انہیں ملاحظہ کیا ، تو دریافت کیا : کیا وجہ ہے ؟ میں تمہیں غصے میں دیکھ رہا ہوں ؟ سیدنا ابوبکر رضی اللہ عنہ نے بتایا : میں اپنے اس قیدی کے ہمراہ صہیب کے پاس سے گزرا ، تو اُس نے کہا: اس کی گردن میں تلوار کے لیے جگہ ہے ، نبی اکرم صلی اللہ علیہ وسلم نے فرمایا : تو شاید تم نے اُسے اذیت پہنچائی ہو گی ، سیدنا ابوبکر رضی اللہ عنہ نے عرض کی : جی نہیں ! اللہ کی قسم ! نبی اکرم صلی اللہ علیہ وسلم نے فرمایا : اگر تم نے اسے اذیت پہنچائی ہوتی ، تو تم نے اللہ اور اس کے رسول صلی اللہ علیہ وسلم کو اذیت پہنچانی تھی ۔
یہ روایت امام طبرانی نے نقل کی ہے اس کی سند میں ایک راوی محمد بن حسن بن زبالہ ہے اور وہ ضعیف ہے ۔

سیدنا صہیب رضی اللہ عنہ بیان کرتے ہیں : نبی اکرم صلی اللہ علیہ وسلم نے جس بھی جنگ میں حصہ لیا ، میں اس میں شریک ہوا ہوں ، اور نبی اکرم صلی اللہ علیہ وسلم نے جو بھی غزوہ کیا ، خواہ وہ آغاز کے زمانے میں ہوا ہو ، یا بعد کے زمانے میں ہوا ہو ، میں اس میں نبی اکرم صلی اللہ علیہ وسلم کے دائیں طرف یا بائیں طرف موجود رہا ہوں ، نبی اکرم صلی اللہ علیہ وسلم نے جب بھی بیعت لی ، تو میں بھی وہاں موجود رہا ہوں ، نبی اکرم صلی اللہ علیہ وسلم نے جو بھی جنگی مہم روانہ کی ، میں اس میں شریک ہوا ہوں ، اگر لوگوں کو آگے کی طرف سے اندیشہ ہوتا تھا ، تو میں ان کے آگے ہوتا تھا ، اگر پیچھے کی طرف سے اندیشہ ہوتا تھا ، تو میں ان کے پیچھے ہوتا تھا ، اور میں نے کبھی نبی اکرم صلی اللہ علیہ وسلم کو اپنے اور دشمن کے درمیان نہیں ہونے دیا ، یہاں تک کہ نبی اکرم صلی اللہ علیہ وسلم کا وصال ہو گیا ۔
یہ روایت امام طبرانی نے نقل کی ہے ، اس کی سند میں ایک راوی محمد بن حسن بن زبالہ ہے اور وہ ضعیف ہے ۔

سیدنا مسور بن مخرمہ رضی اللہ عنہ بیان کرتے ہیں : جب سیدنا عمر رضی اللہ عنہ زخمی ہوئے ، تو انہوں نے سیدنا صہیب رضی اللہ عنہ کو ، جو بنو جدعان کے ساتھ نسبت ولاء رکھتے تھے ، اُن کو یہ ہدایت کی کہ وہ لوگوں کو نماز پڑھائیں ۔
یہ روایت امام طبرانی نے نقل کی ہے اور اس کی سند حسن ہے ۔