مجمع الزوائد ومنبع الفوائد

ابومیسرہ بیان کرتے ہیں : سیدنا ایمن رضی اللہ عنہ نبی اکرم صلی اللہ علیہ وسلم کے طہارت کے برتن کے نگران تھے ، اور ثعلبہ آپ کی ضروریات آپ کو پکڑایا کرتے تھے ( شاید یہاں مراد قضائے حاجت کے وقت پانی یا ڈھیلے فراہم کرنا ہے ) ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف محمد بن عباد بن زکریا کا معاملہ مختلف ہے اور وہ ثقہ ہے ۔

اسی سند کے ساتھ یہ بات منقول ہے : ابومیسرہ بیان کرتے ہیں : سیدنا سعد رضی اللہ عنہ نے عرض کی : یا رسول اللہ ! میں نے ایمن کو دیکھا کہ وہ لڑائی سے بھاگ رہا تھا ، نبی اکرم صلی اللہ علیہ وسلم کے چہرے پر ناگواری کے آثار نمودار ہوئے ، سیدنا سعد رضی اللہ عنہ کہتے ہیں : میں نے کوئی ایسی بات نہیں دیکھی جو ہر بھلائی سے اتنی دور ہو ، اس کے بعد لوگ لڑائی میں شریک ہوئے ، سیدنا سعد رضی اللہ عنہ بیان کرتے ہیں : میں نے ایمن کو دیکھا کہ اس نے دشمن کو عاجز کر دیا اور نبی اکرم صلی اللہ علیہ وسلم کو یہ بات اچھی لگی ۔ راوی بیان کرتے ہیں : سیدنا عمر بن خطاب رضی اللہ عنہ نے سیدنا ایمن رضی اللہ عنہ سے کہا: مجھے یہ بات بتائی گئی تھی کہ بزدلی کی وجہ سے تم دو صفوں کے درمیان کھڑے نہیں ہو سکتے ، تو سیدنا ایمن رضی اللہ عنہ نے عرض کی : مجھے یہ امید ہے کہ میں ایسی جگہ پر کھڑا ہوؤں گا ، جس سے اللہ اور اس کا رسول محبت رکھتے ہیں ، سیدنا عمر رضی اللہ عنہ نے فرمایا : تم اس بات کے لائق ہو کہ تم ایسا کرو ۔
یہ روایت امام طبرانی نے ، اس سے پہلی والی روایت کی سند کے ہمراہ نقل کی ہے ۔