مجمع الزوائد ومنبع الفوائد

سیدنا زید بن ثابت رضی اللہ عنہ بیان کرتے ہیں : جب سیدنا عثمان بن مظعون رضی اللہ عنہ کو دفن کر دیا گیا ، تو سیدہ ام العلاء رضی اللہ عنہا نے یہ کہا: ہے : اے ابوسائب ! آپ کو مبارک ہو ، کہ آپ جنت میں ہیں ، نبی اکرم صلی اللہ علیہ وسلم نے اس خاتون کی یہ بات سن لی ، آپ نے دریافت کیا : یہ کون ہے ؟ اس خاتون نے عرض کی : اے اللہ کے نبی ! میں ہوں ، نبی اکرم صلی اللہ علیہ وسلم نے فرمایا : تمہیں کیا پتا ؟ اس خاتون نے عرض کی : یا رسول اللہ ! یہ سیدنا عثمان بن مظعون رضی اللہ عنہ ہیں ، نبی اکرم صلی اللہ علیہ وسلم نے فرمایا : جی ہاں ! ہمیں صرف بھلائی کا پتا ہے ، میں اللہ کا رسول ہوں ، اللہ کی قسم ! مجھے نہیں معلوم کہ میرے ساتھ کیا ہو گا ؟
یہ روایت امام طبرانی نے نقل کی ہے اور اس کے رجال ثقہ ہیں ، اس کے بعض راویوں کے بارے میں اختلاف پایا جاتا ہے ۔

سیدنا عبداللہ بن عباس رضی اللہ عنہما بیان کرتے ہیں : جب سیدنا عثمان بن مظعون رضی اللہ عنہ کا انتقال ہو گیا ، تو اُن کی اہلیہ نے کہا: آپ کو جنت کی مبارک ہو ، نبی اکرم صلی اللہ علیہ وسلم نے غصے کے عالم میں اُس خاتون کی طرف دیکھا اور دریافت کیا : تمہیں کیسے پتا چلا ؟ اُس خاتون نے عرض کی : یہ آپ کے شہسوار تھے اور آپ کے صحابی تھے ، نبی اکرم صلی اللہ علیہ وسلم نے ارشاد فرمایا : اللہ کی قسم ! مجھے نہیں معلوم کہ میرے ساتھ کیا کیا جائے گا ؟ راوی بیان کرتے ہیں : یہ بات آپ کے اصحاب کے لئے پریشانی کا باعث بنی ، جو بات نبی اکرم صلی اللہ علیہ وسلم نے سیدنا عثمان رضی اللہ عنہ کے لئے ارشاد فرمائی تھی ، کیونکہ سیدنا عثمان رضی اللہ عنہ کا شمار جلیل القدر صحابہ کرام میں ہوتا تھا ، پھر جب نبی اکرم صلی اللہ علیہ وسلم کی صاحبزادی سیدہ رقیہ رضی اللہ عنہا کا انتقال ہوا ، تو نبی اکرم صلی اللہ علیہ وسلم نے ( یعنی سیدہ رقیہ رضی اللہ عنہا کی میت کو مخاطب کر کے ) ارشاد فرمایا : تم ہمارے پیشرو عثمان بن مظعون کے ساتھ مل جاؤ !
یہ روایت امام طبرانی نے نقل کی ہے اور اس کے رجال ثقہ ہیں ، اس کے بعض رجال کے بارے میں اختلاف پایا جاتا ہے ۔

سیدنا اسود بن سریع رضی اللہ عنہ بیان کرتے ہیں : جب سیدنا عثمان بن مظعون رضی اللہ عنہ کا انتقال ہوا تو مسلمان ان کے حوالے سے پریشانی کا شکار ہوئے ، پھر جب نبی اکرم صلی اللہ علیہ وسلم کے صاحبزادے سیدنا ابراہیم رضی اللہ عنہ کا انتقال ہوا تو نبی اکرم صلی اللہ علیہ وسلم نے فرمایا : ” تم ہمارے نیک پیشرو عثمان بن مظعون سے جا ملو ! “ ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا عبداللہ بن عمر رضی اللہ عنہما بیان کرتے ہیں : جب کوئی فوتگی ہوتی ، تو نبی اکرم صلی اللہ علیہ وسلم یہ ارشاد فرماتے تھے : ” اسے ہمارے پیشرو کی طرف بھجوا دو ! اور میری امت کا بہترین پیشرو عثمان بن مظعون ہے ۔ “
یہ روایت امام طبرانی نے معجم کبیر میں نقل کی ہے اور معجم اوسط میں اس کی مانند نقل کی ہے ، معجم کبیر کی سند ضعیف ہے اور معجم اوسط کی سند میں ایسے راوی ہیں ، جن سے میں واقف نہیں ہوں ۔

سیدنا انس بن مالک رضی اللہ عنہ بیان کرتے ہیں : جب نبی اکرم صلی اللہ علیہ وسلم کی صاحبزادی سیدہ رقیہ رضی اللہ عنہا کا انتقال ہوا ، تو نبی اکرم صلی اللہ علیہ وسلم نے ارشاد فرمایا : تم ہمارے نیک پیشرو عثمان بن مظعون سے جا ملو !
یہ روایت امام طبرانی نے معجم اوسط میں نقل کی ہے ، اس کی سند میں ایک راوی صالح مری ہے اور وہ ضعیف ہے ۔

سیدہ عائشہ بنت مظعون رضی اللہ عنہا بیان کرتی ہیں : سیدنا عثمان بن مظعون رضی اللہ عنہ کے انتقال کے بعد نبی اکرم صلی اللہ علیہ وسلم نے سیدنا عثمان بن مظعون رضی اللہ عنہ کی ( میت کے ) گال پر بوسہ دیا تھا ، راوی خاتون کہتے ہیں : ہمیں نہیں علم کہ نبی اکرم صلی اللہ علیہ وسلم نے اس سے پہلے ، اُن کے علاوہ کسی اور ( کی میت ) کو بوسہ دیا ہو ۔
یہ روایت امام طبرانی نے نقل کی ہے اس کی سند میں ایک راوی عبدالرحمن بن عفان حاطبی ہے اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : جس دن سیدنا عثمان بن مظعون رضی اللہ عنہ کا انتقال ہوا ، اُس دن نبی اکرم صلی اللہ علیہ وسلم سیدنا عثمان رضی اللہ عنہ کے پاس تشریف لائے ، آپ اُن پر جھک گئے ، یوں جیسے آپ انہیں کوئی تلقین کر رہے ہوں ، پھر آپ نے اپنا سر اٹھایا ، تو لوگوں نے دیکھا کہ آپ کی آنکھوں میں رونے کا نشان موجود ہے ، پھر نبی اکرم صلی اللہ علیہ وسلم دوسری مرتبہ ان پر جھک گئے ، پھر آپ نے اپنا سر مبارک اٹھایا ، تو لوگوں نے آپ کو دیکھا کہ آپ رو رہے ہیں ، پھر نبی اکرم صلی اللہ علیہ وسلم تیسری مرتبہ ان پر جھک گئے ، پھر آپ نے سر اٹھایا تو آپ کے رونے کی آواز آ رہی تھی ، لوگوں کو اندازہ ہو گیا کہ سیدنا عثمان رضی اللہ عنہ کا انتقال ہو گیا ہے ، حاضرین بھی رونے لگے ، نبی اکرم صلی اللہ علیہ وسلم نے ارشاد فرمایا : رُک جاؤ ! بے شک یہ شیطان کی طرف سے ہے ، تو تم لوگ اللہ تعالیٰ سے مغفرت طلب کرو ، پھر نبی اکرم صلی اللہ علیہ وسلم نے ارشاد فرمایا : اے ابوسائب : تم ایسی حالت میں ( یعنی دنیا سے رخصت ہو کہ جب ) تم اس سے نکلے ، تو تم اس کے حوالے سے کسی چیز کے بارے میں التباس کا شکار نہیں ہوئے ۔
یہ روایت امام طبرانی نے عمر بن عبدالعزیز بن مقلاص کے حوالے سے ، ان کے والد سے نقل کی ہے اور میں ان دونوں سے واقف نہیں ہوں ، اس روایت کے بقیہ رجال ثقہ ہیں ۔ ( علامہ ہیثمی فرماتے ہیں : ) میں یہ کہتا ہوں : ان کے اسلام قبول کرنے کا سبب ، تفسیر سے متعلق کتاب میں سورہ نحل سے متعلق باب میں گزر چکا ہے ۔