مجمع الزوائد ومنبع الفوائد

امام طبرانی بیان کرتے ہیں : یہ سیدنا عامر بن فہیرہ رضی اللہ عنہ ہیں ، جو سیدنا ابوبکر رضی اللہ عنہ کے ساتھ نسبت ولاء رکھتے ہیں ، یہ ابتداء میں ہجرت کرنے والے مہاجرین میں سے ایک ہیں ، انہوں نے نبی اکرم صلی اللہ علیہ وسلم اور سیدنا ابوبکر رضی اللہ عنہ کے ہمراہ مکہ سے مدینہ کی طرف ہجرت کی تھی ، انہیں غزوہ بدر میں شرکت کا شرف حاصل ہے اور انہوں نے جنگ ” بئر معونہ “ میں جام شہادت نوش کیا تھا ۔

سیدنا عبدالرحمن بن عوف رضی اللہ عنہ بیان کرتے ہیں : ایک مرتبہ سیدنا طلحہ بن عبیداللہ رضی اللہ عنہ نے سیدنا عامر بن فہیرہ کو کوئی سخت بات کہہ دی ، تو نبی اکرم صلی اللہ علیہ وسلم نے فرمایا : ” اے طلحہ ! تم رک جاؤ ! کیونکہ یہ بھی اسی طرح بدر میں شریک ہوا ہے ، جس طرح تم شریک ہوئے ہو اور تم میں بہتر لوگ وہ ہیں ، جو اپنے موالی کے حق میں بہتر ہوں ۔ “
یہ روایت امام طبرانی نے تینوں کتابوں میں نقل کی ہے ، اس کی سند میں ایک راوی مصعب بن مصعب ہے اور وہ ضعیف ہے ۔