مجمع الزوائد ومنبع الفوائد

عروہ بن زبیر نے ، غزوہ بدر میں شرکت کرنے والے افراد کے ناموں میں ، قریش کی شاخ بنو عبدشمس بن عبدمناف سے تعلق رکھنے والے سیدنا حذیفہ رضی اللہ عنہ کے غلام سیدنا سالم رضی اللہ عنہ کا ذکر کیا ہے ۔
یہ روایت امام طبرانی نے ” مرسل “ روایت کے طور پر نقل کی ہے اور اس کی سند حسن ہے ۔

سیدنا عمرو بن العاص رضی اللہ عنہ بیان کرتے ہیں : ایک مرتبہ مدینہ منورہ میں خوف کی صورتحال پیدا ہو گئی ، تو میں سیدنا ابوحذیفہ رضی اللہ عنہ کے غلام ، سالم رضی اللہ عنہ کے پاس آیا ، انہوں نے اپنی تلوار گردن میں لٹکائی ہوئی تھی ، میں نے بھی اپنی تلوار لی اور میں نے بھی وہ گردن میں لٹکا لی ، نبی اکرم صلی اللہ علیہ وسلم نے ارشاد فرمایا : ” اے لوگو ! تم خطرے کی صورتحال میں اللہ اور اس کے رسول صلی اللہ علیہ وسلم کی طرف کیوں نہیں آئے ؟ نبی اکرم صلی اللہ علیہ وسلم نے فرمایا : کیا تم لوگ وہ کام نہیں کر سکتے تھے ؟ جو کام ان دو مؤمن افراد نے کیا ہے ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے سیدنا ابوحذیفہ رضی اللہ عنہ کے غلام سیدنا سالم رضی اللہ عنہ کو رات کے وقت تلاوت کرتے ہوئے سنا ، تو ارشاد فرمایا : ” ہر طرح کی حمد اللہ تعالیٰ کے لئے مخصوص ہے ، جس نے میری اُمت میں اس جیسے افراد بنائے ہیں ۔ “
یہ روایت امام بزار نے نقل کی ہے اور اس کے رجال صحیح کے رجال ہیں ۔

عروہ نے جنگ یمامہ میں شریک ہونے والے افراد میں ان کا ذکر کیا ہے ۔
یہ روایت امام طبرانی نے اسی طرح سیدنا سالم رضی اللہ عنہ کے حالات میں نقل کی ہے اور اس کی سند حسن ہے ۔