مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : جب نبی اکرم صلی اللہ علیہ وسلم نے سیدنا اسامہ بن زید رضی اللہ عنہ کو ایک مہم کا امیر مقرر کیا ، تو کچھ لوگوں نے اس بارے میں بات چیت کی ، نبی اکرم صلی اللہ علیہ وسلم کو اس کی اطلاع ملی ، تو نبی اکرم صلی اللہ علیہ وسلم نے ارشاد فرمایا : ” مجھے یہ اطلاع ملی ہے کہ تم نے اسامہ کے بارے میں بات کی ہے ، اس سے پہلے تم لوگ اس کے باپ کے بارے میں بھی بات کر چکے ہو ، وہ امیر بننے کے لائق ہے ، وہ امیر بننے کے لائق ہے ، وہ امیر بننے کے لائق ہے اور وہ میرے نزدیک سب لوگوں سے زیادہ محبوب ہے ۔ “ راوی بیان کرتے ہیں : بعض حضرات نے سیدہ فاطمہ رضی اللہ عنہا اور دیگر کا استثناء کیا ہے ۔

ایک روایت میں یہ الفاظ ہیں : ” وہ میرے نزدیک سب لوگوں سے زیادہ محبوب ہے ۔ “ سیدنا عبداللہ بن عمر رضی اللہ عنہما یہ فرماتے تھے : البتہ سیدہ فاطمہ رضی اللہ عنہما کا معاملہ مختلف ہے ۔
( علامہ ہیثمی فرماتے ہیں : ) میں یہ کہتا ہوں : یہ روایت ” صحیح “ میں اختصار کے ساتھ منقول ہے ، یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : کسی کے لئے یہ مناسب نہیں ہے کہ وہ سیدنا اسامہ رضی اللہ عنہ سے بغض رکھے ، اس کے بعد کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص اللہ تعالیٰ اور اس کے رسول صلی اللہ علیہ وسلم سے محبت رکھتا ہے ، اُسے اسامہ سے محبت رکھنی چاہیے ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں ۔

ابوبکر بن شعیب بیان کرتے ہیں : میں نے اپنے مشائخ کو یہ بات بیان کرتے ہوئے سنا ہے : سیدنا اسامہ بن زید رضی اللہ عنہ کی انگوٹھی میں یہ نقش تھا : ” اللہ کے رسول کے محبوب ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

زہری بیان کرتے ہیں : سیدنا اسامہ بن زید رضی اللہ عنہ کو ان کے انتقال تک ” امیر “ کہہ کر بلایا جاتا تھا ، لوگ یہ کہتے تھے : کہ اللہ کے رسول صلی اللہ علیہ وسلم نے انہیں ( امیر ) بنا کر بھیجا تھا اور پھر انھیں اُس عہدے سے الگ نہیں کیا ، یہاں تک کہ نبی اکرم صلی اللہ علیہ وسلم کا وصال ہو گیا ۔
یہ روایت امام طبرانی نے مرسل روایت کے طور پر نقل کی ہے اور اس کے رجال صحیح کے رجال ہیں ۔