مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے اپنا دست مبارک میرے کندھے پر رکھا ۔ ( راوی کو شک ہے یا شاید یہ الفاظ ہیں : ) - میرے کندھے پر رکھا ۔ ( یہ شک سعید نامی راوی کو ہے ، یعنی اس میں کندھے کے لئے استعمال ہونے والا لفظ مختلف ہے ) ۔ پھر نبی اکرم صلی اللہ علیہ وسلم نے یہ ارشاد فرمایا : ” اے اللہ ! تو اسے دین کی سمجھ بوجھ عطا کر دے اور اسے تفسیر کا علم عطا کر دے ۔ “
( علامہ ہیثمی فرماتے ہیں : ) میں یہ کہتا ہوں : یہ روایت ” صحیح “ میں مذکور ہے ، تاہم اس میں یہ الفاظ نہیں ہیں : ” اور تو اسے تفسیر کا علم عطا کر دے ! “ . یہ روایت امام أحمد اور امام طبرانی نے مختلف اسانید کے ساتھ نقل کی ہے اور امام بزار اور امام طبرانی نے یہ روایت ان الفاظ میں نقل کی ہے : ” اے اللہ ! تو اسے قرآن کی تفسیر کا علم عطا کر دے ! “ ۔ امام أحمد کی روایت کے دو طریق ہیں اور ان دونوں کے رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں نبی اکرم صلی اللہ علیہ وسلم نے مجھے دعا دی اور ارشاد فرمایا : تم قرآن کے اچھے ترجمان ہو ! سیدنا جبرائیل علیہ السلام نے بھی مجھے دو مرتبہ دعا دی تھی ۔
یہ روایت امام طبرانی نے نقل کی ہے ، اس کی سند میں ایک راوی عبداللہ بن خراش ہے اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے اپنا دست مبارک سیدنا عبداللہ بن عباس رضی اللہ عنہما کے سر پر رکھا اور یہ دعا کی : اے اللہ ! تو اسے حکمت عطا کر دے اور اسے تفسیر کا علم عطا کر دے ، نبی اکرم صلی اللہ علیہ وسلم نے ان کے سینے پر ہاتھ رکھا ، تو نبی اکرم صلی اللہ علیہ وسلم کے دست مبارک کی ٹھنڈک سیدنا عبداللہ رضی اللہ عنہ نے اپنے سینے میں محسوس کی ، پھر نبی اکرم صلی اللہ علیہ وسلم نے یہ دعا کی : اے اللہ ! اس کے پیٹ کو ( یعنی سینے کو ) علم اور بردباری سے بھر دے ! راوی بیان کرتے ہیں : تو سیدنا عبداللہ بن عباس رضی اللہ عنہما نے اپنے دل میں کبھی کسی بھی شخص سے ، کسی چیز کے بارے میں دریافت کرنے کی حاجت محسوس نہیں کی ، اور وہ مسلسل اس اُمت کے بڑے عالم رہے ، یہاں تک کہ اللہ تعالیٰ نے انہیں وفات دیدی ۔
یہ روایت امام طبرانی نے نقل کی ہے اور اس کی سند میں ایسا راوی ہے جس سے میں واقف نہیں ہوں ۔

سیدنا عبداللہ بن عباس رضی اللہ عنہما بیان کرتے ہیں : میں اپنے والد کے ساتھ نبی اکرم صلی اللہ علیہ وسلم کے پاس موجود تھا ، نبی اکرم صلی اللہ علیہ وسلم کے پاس ایک اور شخص موجود تھا ، جو آپ کے ساتھ سرگوشی میں بات چیت کر رہا تھا ، نبی اکرم صلی اللہ علیہ وسلم نے والد کی طرف توجہ نہیں دی ، جب ہم آپ کے پاس سے نکلے ، تو میرے والد نے کہا: اے میرے بیٹے ! کیا تم نے اپنے چچازاد کو دیکھا نہیں ؟ وہ گویا مجھ سے اعراض کر رہے تھے ، میں نے کہا: ابا جان ! ان کے پاس ایک شخص موجود تھا ، جس کے ساتھ وہ سرگوشی میں بات چیت کر رہے تھے ، سیدنا ابن عباس رضی اللہ عنہما بیان کرتے ہیں : پھر بعد میں جب ہم نبی اکرم صلی اللہ علیہ وسلم کے پاس گئے تو میرے والد نے کہا: یا رسول اللہ ! میں نے عبداللہ سے یہ یہ بات کہی تھی ، تو اس نے مجھے بتایا کہ آپ کے پاس ایک فرد موجود تھا ، جو آپ کے ساتھ سرگوشی میں بات چیت کر رہا تھا ، تو کیا واقعی آپ کے پاس کوئی موجود تھا ؟ نبی اکرم صلی اللہ علیہ وسلم نے دریافت کیا : اے عبداللہ ! کیا تم نے اُس کو دیکھا تھا ؟ میں نے عرض کی : جی ہاں ! نبی اکرم صلی اللہ علیہ وسلم نے فرمایا : وہ جبرائیل تھا ، اور اسی کی وجہ سے میں آپ لوگوں کی طرف توجہ نہیں دے سکا ۔
یہ روایت امام أحمد نے اور امام طبرانی نے مختلف اسانید کے ساتھ نقل کی ہے اور اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : میں نبی اکرم صلی اللہ علیہ وسلم کے پاس سے گزرا ، میرے جسم پر سفید لباس تھا ، اُس وقت نبی اکرم صلی اللہ علیہ وسلم سیدنا دحیہ بن خلیفہ کلبی رضی اللہ عنہ کے ساتھ بات چیت کر رہے تھے ، وہ دراصل سیدنا جبرائیل علیہ السلام تھے ، مجھے اس بات کا علم نہیں تھا ، میں نے سلام نہیں کیا ، سیدنا جبرائیل علیہ السلام نے دریافت کیا : اے سیدنا محمد ( صلی اللہ علیہ وسلم ) ! یہ کون ہے ؟ نبی اکرم صلی اللہ علیہ وسلم نے بتایا : یہ میرا چچا زاد ہے ، یہ ابن عباس ہے ، تو سیدنا جبرائیل علیہ السلام نے کہا: اس نے کتنے سفید کپڑے پہنے ہوئے ہیں ، لیکن اس کے بعد اس کی اولاد سیاہ لباس پہنے گی ، اگر یہ ہمیں سلام کرتا ، تو ہم نے اسے جواب دینا تھا ۔ سیدنا ابن عباس رضی اللہ عنہما بیان کرتے ہیں : جب میں واپس نبی اکرم صلی اللہ علیہ وسلم کے پاس آیا تو نبی اکرم صلی اللہ علیہ وسلم نے مجھ سے دریافت کیا : اے ابن عباس ! تم نے سلام کیوں نہیں کیا ؟ میں نے عرض کی : میرے ماں باپ آپ پر قربان ہوں ، میں نے دیکھا کہ آپ سیدنا دحیہ بن خلیفہ رضی اللہ عنہ کے ساتھ سرگوشی میں بات چیت کر رہے ہیں ، تو مجھے یہ اچھا نہیں لگا کہ میں آپ کی بات چیت میں دخل دوں ، تو نبی اکرم صلی اللہ علیہ وسلم نے دریافت کیا : کیا تم نے اُسے دیکھا تھا ؟ میں نے عرض کی : جی ہاں ! نبی اکرم صلی اللہ علیہ وسلم نے فرمایا : تمہاری بینائی رخصت ہو جائے گی اور پھر تمہارے مرنے پر ، وہ تمہیں لوٹائی جائے گی ۔ عکرمہ بیان کرتے ہیں : جب سیدنا عبداللہ بن عباس رضی اللہ عنہما کا انتقال ہو گیا اور ان کی میت تختے پر رکھی ہوئی تھی ، تو ایک انتہائی سفید رنگ کا پرندہ آیا اور ان کے کفن میں داخل ہو گیا ۔ لوگوں نے یہ ارادہ کیا کہ ان کا کفن کھول دیں ، تو عکرمہ نے کہا: تم لوگ کیا کرنے لگے ہو ؟ یہ نبی اکرم صلی اللہ علیہ وسلم کی بیان کردہ خوشخبری ہے ، جو نبی اکرم صلی اللہ علیہ وسلم نے سیدنا ابن عباس رضی اللہ عنہما سے ارشاد فرمائی تھی ، جب سیدنا عبداللہ بن عباس رضی اللہ عنہما کی میت کو لحد میں رکھا گیا ، تو اسی دوران قبر کے کنارے پر موجود افراد نے کسی کو یہ پڑھتے ہوئے سنا : ” اسے مطمئن جان ! تم اپنے پروردگار کی طرف لوٹ جاؤ ، راضی رہتے ہوئے اور پسندیدہ ہوتے ہوئے ، تم میرے بندوں میں داخل ہو جاؤ اور تم میری جنت میں داخل ہو جاؤ“ ۔
یہ روایت امام طبرانی نے نقل کی ہے اور اس کی سند میں ایسا راوی ہے جس سے میں واقف نہیں ہوں ۔

سیدنا عبداللہ بن عباس رضی اللہ عنہما بیان کرتے ہیں : سیدنا عباس رضی اللہ عنہ نے سیدنا عبداللہ رضی اللہ عنہ کو کسی کام کے سلسلے میں نبی اکرم صلی اللہ علیہ وسلم کے پاس بھیجا تو سیدنا عبداللہ رضی اللہ عنہ نے نبی اکرم صلی اللہ علیہ وسلم کے پاس ایک شخص کو موجود پایا ، وہ نبی اکرم صلی اللہ علیہ وسلم کے ساتھ کوئی بات کئے بغیر واپس چلے گئے ، بعد میں نبی اکرم صلی اللہ علیہ وسلم نے اُن سے دریافت کیا : کیا تم نے اس کو دیکھا تھا ؟ انہوں نے عرض کی : جی ہاں ! نبی اکرم صلی اللہ علیہ وسلم نے فرمایا : وہ جبرائیل تھا اور یہ ( یعنی سیدنا عبداللہ بن عباس رضی اللہ عنہما ) اس وقت تک نہیں مرے گا ، جب تک اس کی بینائی رخصت نہیں ہو جاتی ، اور اسے علم دیا جائے گا ۔
یہ روایت امام طبرانی نے معجم اوسط میں مختلف اسانید کے ساتھ نقل کی ہے اور اس کے رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : جب نبی اکرم صلی اللہ علیہ وسلم کا وصال ہو گیا ، تو میں نے ایک شخص سے کہا: آؤ ! تاکہ ہم نبی اکرم صلی اللہ علیہ وسلم کے اصحاب سے علم حاصل کریں ، اُن سے سوالات کریں کیونکہ اس وقت ان کی تعداد کافی زیادہ ہے ، تو اُس شخص نے کہا: اے ابن عباس ! اللہ کی قسم ! تم پر حیرانگی ہوتی ہے ، کیا تم یہ سمجھتے ہو کہ لوگوں کو تم سے رجوع کرنے کی ضرورت پیش آئے گی ؟ جبکہ لوگوں کے درمیان تم دیکھ رہے ہو کہ اللہ کے رسول کے اصحاب موجود ہیں ۔ پھر میں سوار ہو کر گیا اور سوالات کرنے لگا ، میں نبی اکرم صلی اللہ علیہ وسلم کے اصحاب کے پیچھے جانے لگا ، بعض اوقات میں کسی حدیث کے سلسلے میں کسی صحابی کے پیچھے جاتا تھا ، جس کے بارے میں مجھے یہ پتا چلتا تھا کہ انہوں نے وہ حدیث نبی اکرم صلی اللہ علیہ وسلم سے سنی ہوئی ہے ، تو میں انہیں پاتا تھا کہ وہ آرام کر رہے ہوتے تھے ، میں اُن کے گھر کے دروازے پر چادر کا تکیہ بنا کر موجود رہتا تھا ، ہوا میرے اوپر گرد و غبار ڈال دیتی تھی ، یہاں تک کہ وہ صاحب خود نکل کر باہر آتے اور جب مجھے دیکھتے تو یہ کہتے : اے اللہ کے رسول کے چچا زاد ! آپ کو کیا کام ہے ؟ میں جواب دیتا : ایک حدیث کے بارے میں پتہ کرنا تھا ، جس کے بارے میں مجھے یہ پتا چلا تھا کہ آپ اسے نبی اکرم صلی اللہ علیہ وسلم کے حوالے سے روایت کرتے ہیں ، تو میں نے اس بات کو پسند کیا کہ وہ حدیث میں خود آپ سے سن لوں ، تو وہ صاحب کہتے : آپ نے مجھے پیغام کیوں نہیں بھیجا ؟ میں آپ کے پاس خود آ جاتا ، تو میں ان صاحب کو جواب دیتا : میں اس بات کا زیادہ حقدار ہوں کہ میں آپ کے پاس آتا ، پھر جب اللہ کے رسول صلی اللہ علیہ وسلم کے اصحاب رخصت ہو گئے اور لوگوں کو میری ضرورت پیش آئی تو میرے اُس ساتھی نے مجھے ایسی حالت میں دیکھا ، تو وہ یہ بولا: تم مجھ سے زیادہ علم رکھتے تھے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

عبدالملک بن میسرہ نے طاؤس کا یہ بیان نقل کیا ہے : میں 70 ( راوی کو شک ہے ، یا شاید یہ الفاظ ہیں : ) میں 80 بزرگ صحابہ کرام کے پاس بیٹھا ہوں ، ان میں سے کوئی ایک بھی سیدنا عبداللہ بن عباس رضی اللہ عنہما کے برخلاف رائے نہیں دیتا تھا ، جب وہ دونوں ملتے تھے تو وہ دوسرے صاحب یہی کہتے تھے : قول وہی ہے جو آپ نے کہا: ہے ، یا وہ یہ کہتے تھے : آپ نے سچ کہا: ہے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

بکر ہذلی بیان کرتے ہیں : میں حسن کی خدمت میں حاضر ہوا ، میں نے کہا: سیدنا عبداللہ بن عباس رضی اللہ عنہما کو قرآن کے حوالے سے ایک نمایاں حیثیت حاصل ہے ، تو انہوں نے بتایا : سیدنا عمر رضی اللہ عنہ یہ فرمایا کرتے تھے : یہ نوجوان عمر رسیدہ افراد کی مانند ہے ، اس کے پاس ایسی زبان ہے جو سوال کرنے والی ہے ، اور ایسا دل ہے جو سمجھ بوجھ رکھنے والا ہے ، یہ عرفہ کی شام ہمارے اس منبر پر کھڑا ہوتا ، سورہ بقرہ اور سورہ آل عمران کی تلاوت کرتا اور پھر ایک ایک آیت کی تفسیر بیان کرتا چلا جاتا ، وہ ( علم کا ) چھلکتا ہوا ، بھرا ہوا ڈول ہے ۔
یہ روایت امام طبرانی نے نقل کی ہے اور اس میں ابوبکر ہذلی نامی راوی ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : ہرقل نے سیدنا معاویہ رضی اللہ عنہ کو خط لکھا اور یہ کہا: اگر ان لوگوں کے درمیان نبوت میں کوئی باقی ہوا ، تو وہ مجھے اس چیز کے بارے میں جواب دیں گے ، جس کے بارے میں ، میں نے اُن سے سوال کیا ہے ، ہرقل نے انھیں خط لکھ کر اُن سے مجرہ ( شاید کہکشاں مراد ہے ) ، قوس اور زمین کے اس خطے کے بارے میں دریافت کیا ، جسے صرف ایک گھڑی کے لئے دھوپ لگی تھی ، راوی بیان کرتے ہیں : جب وہ مکتوب اور قاصد ، سیدنا معاویہ رضی اللہ عنہ کے پاس آیا تو انہوں نے فرمایا : یہ ایک ایسی چیز ہے جس کے بارے میں میرا یہ گمان نہیں تھا کہ مجھ سے اس بارے میں بھی دریافت کیا جائے گا ، پھر سیدنا معاویہ رضی اللہ عنہ نے ہرقل کا مکتوب لپیٹا اور وہ سیدنا عبداللہ بن عباس رضی اللہ عنہما کو بھجوا دیا ، سیدنا عبداللہ بن عباس رضی اللہ عنہما نے انہیں جوابی خط میں لکھا : ” قوس اہل زمین کے لیے ڈوبنے سے امان ہے ، اور مجرہ آسمان کا دروازہ ہے جس کو کھولا جاتا ہے ، جہاں تک زمین کے اس حصے کا تعلق ہے جسے دن کی ایک گھڑی کے لئے دھوپ لگی تھی ، تو وہ دریا کا وہ حصہ ہے ، جس کو بنی اسرائیل کے لئے کشادہ کیا گیا تھا ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

ضحاک بن مزاحم ہلالی بیان کرتے ہیں : نافع بن ازرق اور نجدہ بن عویمر ، خوارج کے سرکردہ افراد کی ایک جماعت کے ساتھ علم کی کھوج اور اس کی طلب میں نکلے ، یہاں تک کہ وہ مکہ پہنچے ، تو انہوں نے دیکھا کہ سیدنا عبداللہ بن عباس رضی اللہ عنہما زمزم کے قریب تشریف فرما ہیں ، انہوں نے سرخ چادر اور قمیص پہنی ہوئی تھی ، کچھ لوگ کھڑے ہو کر ان سے تفسیر کے بارے میں سوالات کر رہے تھے ، وہ کہتے : اے ابوعباس ! فلاں فلاں چیز کے بارے میں آپ کیا کہتے ہیں ؟ تو وہ جواب دیتے : وہ یہ یہ ہے ، نافع نے ان سے کہا: اے ابن عباس ! آج صبح سے آپ جو باتیں بیان کر رہے ہیں ، ان پر آپ کتنی جرات کر رہے ہیں ! سیدنا عبداللہ بن عباس رضی اللہ عنہما نے اس سے فرمایا : تمہاری ماں تمہیں گم پائے ! کیا میں تمہیں اس شخص کے بارے میں نہ بتاؤں جو مجھ سے زیادہ جرات کرنے والا ہے ؟ اس نے کہا: اے ابن عباس ! وہ کون ہے ؟ انہوں نے فرمایا : وہ شخص جو ایسی بات کہے جس کا اسے علم نہ ہو ، یا وہ شخص جو اپنے پاس موجود علم کو چھپائے ، اس نے کہا: اے ابن عباس ! آپ نے سچ کہا ، میں آپ کے پاس آپ سے سوال کرنے آیا ہوں ، انہوں نے فرمایا : اے ابن ازرق ! لاؤ ، پوچھو ، اس نے کہا: مجھے اللہ عزوجل کے اس فرمان کے بارے میں بتائیے : ” تم دونوں پر آگ کا شعلہ ( شواظ ) اور دھواں چھوڑا جائے گا “ ، شواظ کیا ہے ؟ انہوں نے فرمایا : وہ شعلہ جس میں دھواں نہ ہو ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے امیہ بن ابوصلت کا یہ شعر نہیں سنا : ” کون ہے جو میری طرف سے حسان کو ایسا پیغام پہنچائے جو دور تک جائے اور عکاظ تک پہنچے ، کیا تمہارا باپ ہمارے درمیان لوہار نہیں تھا ، جو گانے والی لونڈیوں کے پاس جاتا تھا ، عزت کی حفاظت میں کمینہ تھا ، یمن کا رہنے والا ، جو بھٹی سلگاتا رہتا تھا اور مسلسل شواظ کے شعلے کو پھونکتا رہتا تھا “ ۔ اس نے کہا: آپ نے سچ کہا ، اب مجھے اس کے اس فرمان کے بارے میں بتائیے : ” اور دھواں ( نحاس ) ، پھر تم دونوں بدلہ نہ لے سکو گے “ ، انہوں نے فرمایا : وہ دھواں جس میں شعلہ نہ ہو ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے بنو ذبیان کے نابغہ کو یہ کہتے ہوئے نہیں سنا : ” وہ تیل والے چراغ کی روشنی کی طرح روشن ہوتا ہے ، جس میں اللہ نے کوئی نحاس نہیں رکھا “ ۔ یعنی دھواں ۔ اس نے کہا: آپ نے سچ کہا ، اب مجھے اللہ کے اس فرمان کے بارے میں بتائیے : ” ملے جلے نطفے ( امشاج ) سے ، ہم اسے آزماتے ہیں “ ، انہوں نے فرمایا : مرد کا پانی اور عورت کا پانی ، جب یہ دونوں رحم میں جمع ہو جاتے ہیں ، تو یہ مشیج ( ملا جلا ) بن جاتا ہے ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے ابوذؤیب ہذلی کا یہ شعر نہیں سنا : ” گویا تیر کا پھل اور اس کے دونوں سوفار ، پروں کے درمیان مشیج کے ساتھ ملا دیے گئے ہیں “ ۔ اس نے کہا: آپ نے سچ کہا ، اب مجھے اللہ تعالیٰ کے اس فرمان کے بارے میں بتائیے : ” اور پنڈلی ، پنڈلی سے لپٹ جائے گی “ ، پنڈلی کا پنڈلی سے لپٹنا کیا ہے ؟ انہوں نے فرمایا : جنگ ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے ابوذؤیب کا یہ شعر نہیں سنا : ” وہ جنگ کا بھائی ہے ، اگر جنگ اسے کاٹے تو وہ بھی اسے کاٹتا ہے ، اور اگر جنگ اپنی پنڈلی سے کپڑا اٹھا لے ، تو وہ بھی کمر کس لیتا ہے “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” بیٹے اور پوتے ( حفدہ ) “ ، بنین اور حفدہ کیا ہیں ؟ انہوں نے فرمایا : جہاں تک تمہارے بیٹوں کا تعلق ہے ، تو وہ تمہاری دیکھ بھال کرتے ہیں ، اور جہاں تک تمہارے حفدہ کا تعلق ہے ، تو وہ تمہارے خادم ہیں ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے امیہ بن ابوصلت کا یہ شعر نہیں سنا : ” لونڈیاں ان کے اردگرد خدمت کے لیے دوڑتی پھرتی ہیں ، اور ان کی ہتھیلیوں میں بوجھ والے اونٹوں کی مہاریں ڈال دی گئی ہیں “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” تم تو بس مسحرین میں سے ہو “ ، مسحرون کون ہیں ؟ انہوں نے فرمایا : مخلوق ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے امیہ بن ابوصلت ثقفی کا یہ شعر نہیں سنا : ” اگر تم ہم سے پوچھو کہ ہم کس چیز سے ہیں ، تو ہم اس مخلوق ( مسحر ) انسانیت کی چڑیاں ہیں “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” تو ہم نے انہیں دریا میں پھینک دیا ، اور وہ ملیم ( قابل ملامت ) تھا “ ، ملیم کیا ہے ؟ انہوں نے فرمایا : گناہ گار ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے امیہ بن ابوصلت کا یہ شعر نہیں سنا : ” تم آفات سے دور ہو ، تم ان کے لائق نہیں ہو ، بلکہ برائی کرنے والا ہی ملیم ( قابل ملامت ) ہے “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” تم فرماؤ ! میں فلق کے پروردگار کی پناہ مانگتا ہوں “ ، فلق کیا ہے ؟ انہوں نے فرمایا : اس سے مراد صبح ہے ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے لبید بن ربیعہ کا یہ شعر نہیں سنا : ” وہ غم کو دور کرنے والا ہے ، اس کے لشکر بے دریغ پیش ہیں ، جس طرح فلق ( صبح ) تاریکی کو روشنی سے چاک کر دیتی ہے “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” تاکہ جو چیز تم سے چھن جائے اس پر تم غم نہ کرو ( تأسوا ) ، اور جو وہ تمہیں عطا کرے اس پر اتراؤ نہیں “ ، اسیٰ کیا ہے ؟ انہوں نے فرمایا : تم غم نہ کرو ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے لبید بن ربیعہ کا یہ شعر نہیں سنا : ” زمانہ اس پر جو کچھ لے آئے ، اس پر وہ کم غم ( اسیٰ ) کرنے والا ہے ، اس کی تعریف معزز ہے ، اس کی عادات شیریں ہیں ، اور وہ پسندیدہ ہے “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” اس نے گمان کیا تھا کہ وہ ہرگز لوٹ کر نہیں آئے گا ( یحور ) “ ، یحور کیا ہے ؟ انہوں نے فرمایا : لوٹنا ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے لبید بن ربیعہ کا یہ شعر نہیں سنا : ” آدمی تو بس ایک شہاب اور اس کی روشنی کی طرح ہے ، جو چمکنے کے بعد راکھ بن کر لوٹ جاتا ہے ( یحور ) “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” وہ اس کے اور کھولتے ہوئے ( آن ) گرم پانی کے درمیان چکر لگائیں گے “ ، آن کیا ہے ؟ انہوں نے فرمایا : جس کی گرمی انتہا کو پہنچ چکی ہو ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے بنو ذبیان کے نابغہ کا یہ شعر نہیں سنا : ” اگر ابوقبیس نے تمہیں پکڑ لیا ، تو موت تمہیں ذلت کے ساتھ گرا دے گی ، اور اس داڑھی کو ، جس نے بے وفائی اور خیانت کی ، پیٹ کے کھولتے ہوئے ( آن ) سرخ خون سے رنگ دے گی “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” تو وہ ( باغ ) صریم کی طرح ہو گیا “ ، صریم کیا ہے ؟ انہوں نے فرمایا : اندھیری رات ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے بنو ذبیان کے نابغہ کا یہ شعر نہیں سنا : ” ایسے تیوری چڑھانے والے کو مت ڈانٹو جس کا کوئی ہمسر نہیں ، جو اس رات کی طرح ہے جو تاریکی کے ٹکڑوں کو تاریکی کے ٹکڑوں سے ملا دیتی ہے “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” رات کے غسق تک “ ، رات کا غسق کیا ہے ؟ انہوں نے فرمایا : جب وہ تاریک ہو جائے ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے نابغہ کا یہ شعر نہیں سنا : ” گویا انہوں نے جو کچھ کہا اور جو وعدے کیے ، ان کی سنجیدگی ایک سراب ( آل ) ہے ، جسے گھپ اندھیرے ( غسق ) نے ڈھانپ لیا ہو “ ۔ ابوخلیفہ کہتے ہیں : آل سے مراد سراب ہے ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” اور اللہ تعالیٰ ہر چیز پر مقیت ہے “ ، مقیت کیا ہے ؟ انہوں نے فرمایا : قدرت رکھنے والا ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے نابغہ کا یہ شعر نہیں سنا : ” اور کتنے ہی کینہ رکھنے والے ہیں ، جن سے میں نے اپنا کینہ روکے رکھا ، حالانکہ میں انہیں تکلیف پہنچانے پر قادر ( مقیت ) ہوں “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” اور رات کی قسم ! جب وہ عسعس ہو “ ، انہوں نے فرمایا : اس کی سیاہی کا آنا ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے امرؤالقیس کا یہ شعر نہیں سنا : ” وہ ( رات ) تاریک ہو کر آئی ( عسعس ) ، یہاں تک کہ اگر وہ چاہتا تو قریب آ جاتا ، گویا اس کے پاس اپنی روشنی کا ایک شعلہ ہو “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” اور میں اس کا زعیم ہوں “ ، انہوں نے فرمایا : زعیم سے مراد ضامن ہے ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے امرؤالقیس کا یہ شعر نہیں سنا : ” اور میں ضامن ( زعیم ) ہوں ، اگر میں بادشاہ بن کر لوٹا ، ایسے سفر کا جس میں تم معزز نوجوانوں کو منہ پھیرتے ہوئے دیکھو گے “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” اور اس کا فوم “ ، فوم کیا ہے ؟ انہوں نے فرمایا : گندم ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے ابوذؤیب ہذلی کا یہ شعر نہیں سنا : ” میں اپنے آپ کو اس سب سے زیادہ مالدار وفد کی طرح سمجھتا تھا جو فوم کی کاشت کر کے شہر آیا ہو “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” اور ازلام “ ، ازلام کیا ہیں ؟ انہوں نے فرمایا : فال کے تیر ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے حطیئہ کا یہ شعر نہیں سنا : ” جب پرندے اس کے دائیں جانب سے گزریں تو وہ ان سے فال نہیں لیتا ، اور نہ ہی اس کے لیے ازلام کے ذریعے کوئی فال کا تیر نکالا جاتا ہے “ ۔ اس نے کہا: آپ نے سچ کہا ، اب مجھے اللہ تعالیٰ کے اس فرمان کے بارے میں بتائیے : ” اور مشأمہ والے ، کیا ہیں مشأمہ والے ؟ “ ، انہوں نے فرمایا : بائیں ہاتھ والے ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے زہیر بن ابوسلمیٰ کا یہ شعر نہیں سنا : ” بڑھاپا قریب ہی بائیں جانب ( شمال ) اتر آیا ، اور مرورات بھی ، جو قریب اور حقیر ہیں “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” اور جب سمندر ( سجرت ) ملا دیے جائیں گے “ ، انہوں نے فرمایا : ان کا پانی زمین کے پانی کے ساتھ مل جائے گا ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے زہیر بن ابوسلمیٰ کا یہ شعر نہیں سنا : ” جذام میں ربیعہ اور اس کا ماموں کعب اور ضرار کے دونوں بیٹے یہ بات جان چکے ہیں ، کہ تم نے ایک قدیم حسب و نسب سے مقابلہ کیا ہے ، اور ان کے سمندر میرے سمندروں میں آ ملے ہیں ( سجرت ) “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” راستوں ( حبک ) والے آسمان کی قسم “ ، حبک کیا ہے ؟ انہوں نے فرمایا : راستے ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے زہیر بن ابوسلمیٰ کا یہ شعر نہیں سنا : ” وہ ستاروں کی جڑوں سے آراستہ ہے ، شمال کی ہوا اسے بنتی ہے ، ایک کھلے میدان پر جس میں راستے ( حبک ) ہیں “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” اور یہ کہ ہمارے پروردگار کی شان ( جد ) بلند ہے ، اس نے کوئی بیوی نہیں بنائی “ ، انہوں نے فرمایا : ہمارے پروردگار کی عظمت بلند ہے ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے طرفہ بن عبد کا وہ شعر جو اس نے نعمان بن منذر سے کہا نہیں سنا : ” ایک ایسے بادشاہ کی طرف جو زرہ پوش جنگجوؤں کو مارتا ہے ، بڑھاپے نے اس میں جوتے کے تسمے برابر بھی کمی نہیں کی ، کیا یہ بات تمہاری شان ( جد ) کو بلند کرتی ہے کہ میں ایک ایسا شخص ہوں جسے دشمنوں نے ڈول پر ڈول پلائے ہیں “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” یہاں تک کہ تم حرض ہو جاؤ “ ، انہوں نے فرمایا : حرض سے مراد بوسیدہ ہے ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے طرفہ بن عبد کا یہ شعر نہیں سنا : ” کیا لیلیٰ کی یاد کی وجہ سے ، جبکہ دوری اسے دور لے گئی ہے ، مجھے گھلنے والا ( حریض ) شمار کیا جاتا ہے ، جس پر نیند حرام ہو چکی ہے “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” اور تم سامدون ہو “ ، انہوں نے فرمایا : غفلت میں کھیلنے والے ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے ہزیلہ بنت بکر کا وہ شعر جو انہوں نے قوم عاد پر روتے ہوئے کہا نہیں سنا : ” میں نے عاد کی موت کی خبر دی ، اور سعد بھٹکتا ہوا آیا ، کہا گیا : اٹھو اور انہیں دیکھو ، پھر اپنی غفلت ( سمود ) چھوڑ دو “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” جب وہ پورا ( اتسق ) ہو جائے “ ، اس کا اتساق کیا ہے ؟ انہوں نے فرمایا : جب وہ جمع ہو جائے ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے ابوصرمہ انصاری کا یہ شعر نہیں سنا : ” ہمارے پاس جوان اور فربہ اونٹنیاں ہیں ، جو جمع ( مستوسقات ) ہیں ، کاش انہیں کوئی ہانکنے والا مل جائے “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” الاحد ، الصمد “ ، جہاں تک احد کا تعلق ہے ، تو اسے ہم جانتے ہیں ، صمد کیا ہے ؟ انہوں نے فرمایا : وہ ذات جس کی طرف تمام معاملات میں رجوع کیا جاتا ہے ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے اسدی خاتون کا یہ شعر نہیں سنا : ” خبردار ! موت کی خبر دینے والا صبح سویرے بنو اسد کی خبر لے کر آیا ، عمرو بن مسعود کی اور سردار صمد کی “ ۔ اس نے کہا: آپ نے سچ کہا ، اب مجھے اللہ تعالیٰ کے اس فرمان کے بارے میں بتائیے : ” وہ اثام سے دوچار ہو گا “ ، اثام کیا ہے ؟ انہوں نے فرمایا : بدلہ ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے بشر بن ابوحازم اسدی کا یہ شعر نہیں سنا : ” ذوالمجاز کی وادی میں ہمارا قیام ان کے خلاف بددعا کرتا ہے ، اس کا ایک بدلہ ( اثام ) ہے “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” اور وہ کظیم تھا “ ، انہوں نے فرمایا : خاموش رہنے والا ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے زہیر بن خزیمہ عبسی کا یہ شعر نہیں سنا : ” اگر تم شاس کی مصیبت پر خاموش ( کاظم ) ہو ، تو آج میں کھل کر بولنے والا ہوں “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” یا تم ان کی کوئی رکز سنتے ہو “ ، رکز کیا ہے ؟ انہوں نے فرمایا : آواز ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے خراش بن زہیر کا یہ شعر نہیں سنا : ” اگر تم کسی بلندی سے اترنے والے سواروں کے بارے میں سنو ، یا کسی سخت زمین کے نشیب میں ، تو آواز ( رکز ) کو چھپا لو اور خاموش رہو “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” جب تم انہیں اس کے حکم سے تحسون کر رہے تھے “ ، انہوں نے فرمایا : جب تم انہیں اس کے حکم سے قتل کر رہے تھے ۔ اس نے کہا: کیا اہل عرب ، سیدنا محمد صلی اللہ علیہ وسلم پر کتاب نازل ہونے سے پہلے یہ بات جانتے تھے ؟ انہوں نے فرمایا : جی ہاں ! کیا تم نے عتبہ لیثی کا یہ شعر نہیں سنا : ” ہم انہیں سفید تلواروں سے قتل کرتے ہیں ، یہاں تک کہ گویا ہم ان کی کھوپڑیوں سے اندرائن ( حنظل ) کے پھل پھاڑ رہے ہیں “ ۔ اس نے کہا: آپ نے سچ کہا ، اب مجھے اللہ عزوجل کے اس فرمان کے بارے میں بتائیے : ” اے نبی ! جب تم عورتوں کو طلاق دو “ ، کیا زمانہ جاہلیت میں طلاق کا تصور موجود تھا ؟ انہوں نے فرمایا : جی ہاں ! تین طلاقیں ، جو بائنہ ہوتی تھیں ، کیا تم نے اعشیٰ بن قیس بن ثعلبہ کا وہ شعر نہیں سنا ، جب اس کے سسرال والوں نے غیرت کی وجہ سے اسے پکڑ لیا تھا اور کہا تھا : تم نے ہماری عزیزہ کو نقصان پہنچایا ہے ، اور ہم اللہ کی قسم اٹھاتے ہیں کہ ہم تم سے لاٹھی نہیں ہٹائیں گے ، جب تک تم اسے طلاق نہیں دے دیتے ، جب اس نے ان کی سنجیدگی دیکھی ، اور یہ دیکھا کہ وہ اس کے ساتھ برا سلوک کرنے والے ہیں ، تو اس نے کہا: ” اے میری بیوی ! جدا ہو جا ، کیونکہ تجھے طلاق ہے ، لوگوں کے معاملات اسی طرح ہوتے ہیں ، کوئی صبح آنے والا ہے اور کوئی رات کو آنے والا “ ، انہوں نے کہا: اللہ کی قسم ! تم اس کے لیے طلاق کو قطعی بناؤ گے ، ورنہ ہم تم سے لاٹھی نہیں ہٹائیں گے ، تو اس نے کہا: ” تو جدا ہو جا ، تو پاک دامن ہے ، بدصورت نہیں ہے ، ہمیں اسی طرح محبوب ہے جس طرح تو محبت کرنے والی ہے “ ، انہوں نے کہا: اللہ کی قسم ! ہم اس کے لیے طلاق کو قطعی بنائیں گے ، ورنہ ہم تم سے لاٹھی نہیں ہٹائیں گے ، تو اس نے کہا: ” تو جدا ہو جا ، کیونکہ جدائی لاٹھی سے بہتر ہے ، اور اس سے بہتر ہے کہ وہ تیرے سر پر مسلسل چمکتی رہے “ ، تو اس نے تین طلاقوں کے ذریعے اسے جدا کر دیا ۔
یہ روایت امام طبرانی نے نقل کی ہے ، اس کی سند میں جویبر نامی راوی ہے اور وہ ضعیف ہے ۔

سیدنا عبداللہ بن عباس رضی اللہ عنہما کہ بیان کرتے ہیں : میں رات کے آخری حصے میں نبی اکرم صلی اللہ علیہ وسلم کے پاس آیا اور میں نے آپ کی اقتداء میں نماز ادا کی ، نبی اکرم صلی اللہ علیہ وسلم نے میرا ہاتھ پکڑ کر مجھے کھینچا اور مجھے اپنے برابر کھڑا کر لیا ، جب نبی اکرم صلی اللہ علیہ وسلم اپنی نماز کی طرف متوجہ ہوئے ، تو میں ذرا پیچھے ہٹ گیا ، نبی اکرم صلی اللہ علیہ وسلم نماز ادا کرتے رہے ، جب آپ نماز پڑھ کر فارغ ہوئے تو آپ نے فرمایا : تمہارا کیا معاملہ ہے ؟ میں نے تمہیں اپنے برابر کھڑا کیا تھا اور تم پیچھے ہٹ گئے ؟ میں نے عرض کی : یا رسول اللہ ! کیا کسی کے لئے یہ مناسب ہے ؟ کہ وہ آپ کے برابر کھڑا ہو کر نماز ادا کرے ؟ جبکہ آپ اللہ کے رسول ہیں ، اور آپ کو اللہ تعالیٰ نے ( مخصوص شان ) عطا کی ہے ، راوی بیان کرتے ہیں : تو نبی اکرم صلی اللہ علیہ وسلم کو یہ بات اچھی لگی ، آپ نے میرے لئے یہ دعا کی کہ اللہ تعالیٰ مجھے مزید علم اور سمجھ بوجھ عطا کرے ۔
علامہ ہیثمی فرماتے ہیں : میں یہ کہتا ہوں : اس کے بعد راوی نے پوری حدیث ذکر کی ہے ۔ یہ روایت امام أحمد نے نقل کی ہے اور اس کے رجال صحیح کے رجال ہیں ۔

ابن ابوملیکہ بیان کرتے ہیں : میں سیدنا عبداللہ بن زبیر رضی اللہ عنہما اور سیدنا عبداللہ بن عباس رضی اللہ عنہما کے پاس موجود تھا ، جب سیدنا عبداللہ بن زبیر رضی اللہ عنہما نے سیدنا عبداللہ بن عباس رضی اللہ عنہما سے کہا: کیا آپ کو یاد ہے ؟ جب نبی اکرم صلی اللہ علیہ وسلم ایک سفر سے تشریف لائے تھے ، تو ہم نے نبی اکرم صلی اللہ علیہ وسلم کا استقبال کیا تھا ، تو سیدنا عبداللہ بن عباس رضی اللہ عنہما نے جواب دیا : جی ہاں ! نبی اکرم صلی اللہ علیہ وسلم نے مجھے اور بنو ہاشم سے تعلق رکھنے والے لڑکے کو اٹھا لیا تھا اور آپ کو چھوڑ دیا تھا ۔
میں یہ کہتا ہوں : یہ روایت ” صحیح “ میں مذکور ہے ، تاہم اس میں سیدنا عبداللہ بن زبیر رضی اللہ عنہما اور سیدنا عبداللہ بن جعفر رضی اللہ عنہ کا واقعہ ہے اور اس روایت میں سیدنا عبداللہ بن عباس رضی اللہ عنہما کا واقعہ ہے ، یہ روایت امام أحمد نے نقل کی ہے اور اس کے رجال صحیح کے رجال ہیں ۔

ابن بریدہ اسلمی بیان کرتے ہیں : ایک شخص نے سیدنا عبداللہ بن عباس رضی اللہ عنہما کو برا کہا: ، سیدنا عبداللہ بن عباس رضی اللہ عنہما نے فرمایا : تم مجھے برا کہہ رہے ہو ؟ جبکہ میرے اندر تین خصوصیات ہیں ، میں اللہ کی کتاب کی کوئی ایک آیت پڑھتا ہوں ، تو میری یہ خواہش ہوتی ہے کہ سب لوگوں کو اس کے بارے میں وہی علم ہو ، جو علم مجھے ہے ، اور میں مسلمان حکمرانوں میں سے کسی حاکم کے بارے میں سنتا ہوں کہ اس نے فیصلہ دیتے ہوئے عدل سے کام لیا ہے ، تو میں اس بات پر خوش ہوتا ہوں ، حالانکہ میں نے شاید کبھی بھی کسی عدالتی فیصلے کے بارے میں اسے نہیں کہا: ہو گا ، اور جب میں کسی بادل کے بارے میں سنتا ہوں کہ مسلمانوں کے کسی علاقے میں وہ برسا ہے ، تو میں اس پر خوش ہوتا ہوں ، حالانکہ مجھے اس کے بدلے میں کوئی فائدہ نہیں ہوتا ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدنا حسان بن ثابت بھی بیان کرتے ہیں : انصار سے تعلق رکھنے والے ، ہم کچھ افراد کو حاکم وقت سے کوئی کام پڑ گیا ، ہم اس سے جو چیز طلب کر رہے تھے ، وہ ایک مشکل کام تھا ، تو ہم قریش سے تعلق رکھنے والے اور دیگر اقوام سے تعلق رکھنے والے کچھ لوگوں کو ساتھ لے کر حاکم کے پاس گئے ، ان لوگوں نے حاکم کے ساتھ بات چیت کی ، اور حاکم کے سامنے یہ بات ذکر کی کہ نبی اکرم صلی اللہ علیہ وسلم نے ہمارے ساتھ اچھا سلوک کرنے کی تلقین کی تھی ، حاکم نے ان لوگوں کے سامنے یہ بات ذکر کی کہ یہ معاملہ مشکل ہے ، تو ان لوگوں نے حاکم کو معذور قرار دیا ، لیکن سیدنا عبداللہ بن عباس رضی اللہ عنہما مسلسل حاکم کے سامنے اصرار کرتے رہے ، یہاں تک کہ یہ صورتحال ہوئی کہ اللہ کی قسم ! حاکم کے لئے اس کام کو کرنے کے علاوہ اور کوئی چارہ نہیں رہا ، ہم اس کے پاس سے نکلے اور مسجد میں داخل ہوئے ، وہاں لوگوں کی مختلف ٹولیاں بیٹھی ہوئی تھیں ، سیدنا حسان رضی اللہ عنہ کہتے ہیں : میں ہنس پڑا ، میں ان لوگوں کو سن رہا تھا ( وہ کہہ رہے تھے : ) اللہ کی قسم ! وہ ( یعنی سیدنا ابن عباس رضی اللہ عنہما ) اس کام کے لیے سب سے زیادہ موزوں تھے ، اللہ کی قسم وہ نبوت ( یعنی نبی اکرم صلی اللہ علیہ وسلم کے خاندان کے باقی رہ جانے والے فرد ہیں اور سیدنا أحمد صلی اللہ علیہ وسلم کے وارث ہیں ، ان کے ساتھ نسبی تعلق اور فطری قربت رکھتے ہیں ، لوگوں نے کہا: اے سیدنا حسان ! آپ بھی کچھ کہیں ، سیدنا ابن عباس رضی اللہ عنہما نے فرمایا : یہ لوگ ٹھیک کہہ رہے ہیں ، تو سیدنا حسان بن ثابت رضی اللہ عنہ نے سیدنا عبداللہ بن عباس رضی اللہ عنہما کی تعریف کرتے ہوئے یہ اشعار کہے : ” جب سیدنا ابن عباس رضی اللہ عنہما کا چہرہ ، آپ کے سامنے آئے گا ، تو آپ کو ان کی ہر چیز میں فضیلت نظر آئے گی ، جب وہ بات کریں تو ( مقابل فریق کے لیے ) کہنے کو کچھ نہیں رہنے دیتے ، وہ ایسی مربوط ( گفتگو کرتے ہیں ) کہ آپ کو اس گفتگو میں کوئی چیز اضافی ( یعنی غیر ضروری ) نظر نہیں آئے گی ، دلوں میں جو بھی ( سوچ ، خیال ، فکر یا پریشانی ہو ) وہ اس کے لیے کفایت کر جاتے ہیں اور اس کی شفا کا باعث بن جاتے ہیں ، وہ کسی بھی عقلمند کے لیے ، بات کرنے کے لیے سنجیدگی یا مذاق کا کوئی پہلو نہیں رہنے دیتے ( اے سیدنا ابن عباس رضی اللہ عنہما ) آپ کسی مشقت کا شکار ہوئے بغیر ، بلند مرتبے پر فائز ہوئے ہیں ، اور ( بلند مرتبے کی ) کوہان ( یعنی بلند ترین سطح ) تک پہنچے ہیں ، آپ نہ تو کمتر ہیں اور نہ ہی کمزور ( یا کوتاہی والے ) ہیں ، آپ مروت کے حلیف کے طور پر پیدا ہوئے اور آپ کی آواز بلیغ ہے ، اور آپ بزدل یا فاسد پیدا نہیں ہوئے ۔ “ تو حاکم نے کہا: اللہ کی قسم ! بزدل اور فاسد سے ان کی مراد میرے علاوہ اور کوئی نہیں ہے ، اللہ تعالیٰ میرے اور ان کے درمیان ( فیصلہ کرنے والا ) ہے ۔
یہ روایت امام طبرانی نے نقل کی ہے ۔

یحیی بن بکیر بیان کرتے ہیں : سیدنا عبداللہ بن عباس رضی اللہ عنہما کا انتقال 72 سال کی عمر میں 68 ہجری میں ہوا ، وہ داڑھی پر زرد رنگ کا خضاب لگاتے تھے ۔ وہ بیان کرتے ہیں : میں ہجرت سے تین سال پہلے پیدا ہوا تھا ، اس وقت ہم لوگ شعب ابوطالب میں تھے ، اور جب نبی اکرم صلی اللہ علیہ وسلم کا وصال ہوا ، اس وقت میری عمر 13 سال تھی ۔
یہ روایت امام طبرانی نے نقل کی ہے اور اس کی سند منقطع ہے ۔

حبیب بن ابوثابت بیان کرتے ہیں : میں نے سیدنا عبداللہ بن عباس رضی اللہ عنہما کو دیکھا ہے ، اُن کے بال بڑے تھے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

محمد بن اسحاق بیان کرتے ہیں : سیدنا عبداللہ بن عباس رضی اللہ عنہما طویل القامت شخص تھے ، اُن کے رنگ میں زردی مائل سرخی تھی ، وہ وجیہ و شکیل شخص تھے ، ان کا چہرہ خوبصورت تھا ، ان کی زلفیں تھیں ۔

ابواسحاق بیان کرتے ہیں : میں نے منیٰ میں سیدنا عبداللہ بن عباس رضی اللہ عنہما کو دیکھا ، ان کے بال لمبے تھے ، ان کے جسم پر تہبند موجود تھا جو کچھ لٹکا ہوا تھا ، اور انہوں نے زرد چادر اوڑھی ہوئی تھی ۔
یہ روایت امام طبرانی نے نقل کی ہے اور اس کی سند حسن ہے ۔

سیدنا عبداللہ بن عباس رضی اللہ عنہما بیان کرتے ہیں : جب نبی اکرم صلی اللہ علیہ وسلم کا وصال ہوا ، اس وقت میری عمر 15 سال تھی اور میرے ختنے ہو چکے تھے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سعید بن جبیر بیان کرتے ہیں : سیدنا عبداللہ بن عباس رضی اللہ عنہما کا انتقال طائف میں ہوا ، ہم اُن کے جنازے میں شریک ہوئے ، ایک پرندہ آیا ، اس جیسی مخلوق نہیں دیکھی گئی تھی ، یہاں تک کہ وہ اُن کی میت میں داخل ہو گیا ، پھر وہ باہر نکلتا ہوا نظر نہیں آیا ، جب انہیں دفن کیا گیا ، تو ان کی قبر کے کنارے پر اس آیت کی تلاوت سنائی دی ، لیکن یہ پتہ نہیں چلا کہ وہ تلاوت کون کر رہا ہے ؟ ( ارشاد باری تعالیٰ ہے : ) ” اسے مطمئن جان ! تم اپنے پروردگار کی طرف لوٹ آؤ ، راضی رہتے ہوئے اور پسندیدہ ہوتے ہوئے ، تم میرے بندوں میں داخل ہو جاؤ ، تم میری جنت میں داخل ہو جاؤ ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

عبداللہ بن یامین نے اپنے والد کے حوالے سے اس کی مانند روایت نقل کی ہے ، تاہم انہوں نے یہ الفاظ نقل کئے ہیں : ایک سفید رنگ کا پرندہ آیا جسے ” غرنوق “ کہا: جاتا تھا ۔