مجمع الزوائد ومنبع الفوائد

امام طبرانی بیان کرتے ہیں : سیدہ ام ایمن رضی اللہ عنہا جو سیدنا اسامہ بن زید رضی اللہ عنہ کی والدہ ہیں وہ نبی اکرم صلی اللہ علیہ وسلم کی کنیز ہیں ، یہ سیدہ خدیجہ رضی اللہ عنہ کی بہن کی کنیز تھیں اس خاتون نے انہیں نبی اکرم صلی اللہ علیہ وسلم کو ہبہ کر دیا تھا تو نبی اکرم صلی اللہ علیہ وسلم نے ان کی شادی سیدنا زید بن حارثہ رضی اللہ عنہ سے کروا دی تھی ایک قول کے مطابق ان کا اصل نام برکہ ہے ۔

سیدنا عبداللہ بن عباس رضی اللہ عنہما بیان کرتے ہیں : سیدہ ام ایمن رضی اللہ عنہا سیدنا اسامہ بن زید رضی اللہ عنہما کی والدہ ہیں ۔
یہ روایت امام طبرانی نے نقل کی ہے اور اس کی سند حسن ہے ۔

طارق بن شہاب نے سیدہ ام ایمن رضی اللہ عنہا کے حوالے سے یہ بات نقل کی ہے کہ وہ نبی اکرم صلی اللہ علیہ وسلم کے دست اقدس پر اسلام قبول کرنے والی خواتین میں سے ایک ہیں ۔
یہ روایت امام طبرانی نے نقل کی ہے اس کی سند میں ایک راوی محمد بن حسین بن اشکاب ہے اور میں اس سے واقف نہیں ہوں ۔ اس روایت کے بقیہ رجال ” صحیح“ کے رجال ہیں ۔

ابن شہاب بیان کرتے ہیں : سیدہ ام ایمن رضی اللہ عنہا ، سیدنا اسامہ بن زید رضی اللہ عنہما کی والدہ ہیں ان کا تعلق حبشہ سے ہے ، یہ جناب عبدالمطلب کی کنیز تھیں اور انہوں نے کمسنی میں نبی اکرم صلی اللہ علیہ وسلم کی پرورش کی ہے ، نبی اکرم صلی اللہ علیہ وسلم نے انہیں آزاد کر دیا تھا ، پھر آپ نے سیدنا زید بن حارثہ رضی اللہ عنہ کے ساتھ ان کی شادی کروا دی تھی ان کا وصال نبی اکرم صلی اللہ علیہ وسلم کے وصال کے پانچ ماہ بعد ہوا تھا ۔ زہری نے اسی طرح بیان کیا ہے ، اور اس بارے میں ایک روایت یہ منقول ہے کہ وہ سیدنا عمر رضی اللہ عنہ کے انتقال کے بعد بھی زندہ رہی تھیں ۔
یہ روایت امام طبرانی نے نقل کی ہے اور اس کی سند منقطع ہے اور اس کے رجال ثقہ ہیں ۔

طارق بن شہاب بیان کرتے ہیں : سیدہ ام ایمن رضی اللہ عنہا نے سیدنا عمر رضی اللہ عنہ کی شہادت کے دن یہ ارشاد فرمایا : آج اسلام کمزور ہو گیا ۔
یہ روایت امام طبرانی نے اپنے استاد عبدالله بن محمد بن سعید بن ابومریم کے حوالے سے نقل کی ہے اور وہ ضعیف ہے ۔