مجمع الزوائد ومنبع الفوائد

سیدنا عبداللہ بن عمر رضی اللہ عنہما ، سیدنا ابوہریرہ رضی اللہ عنہ اور سیدنا عمار بن یاسر رضی اللہ عنہ کے حوالے سے یہ بات منقول ہے ، وہ بیان کرتے ہیں : سیدہ درّہ رضی اللہ عنہا بنت ابولہب ہجرت کر کے آئیں ، انہوں نے رافع بن معلیٰ زرقی کے محلے ( یا گھر ) میں رہائش اختیار کی ، بنوزریق سے تعلق رکھنے والی کچھ خواتین جو ان کے پاس بیٹھی ہوئی تھیں ، انہوں نے ان سے کہا: آپ اس ابولہب کی صاحبزادی ہیں جس کے بارے میں اللہ تعالیٰ نے یہ فرمایا ہے : ” ابولہب کے دونوں ہاتھ برباد ہو جائیں اس کا مال اور جو کچھ اس نے کمایا تھا وہ اس کے کسی کام نہیں آیا“ ۔ ان کی مراد یہ تھی کہ آپ کا ہجرت کرنا آپ کے کس کام آئے گا ، تو سیدہ درہ رضی اللہ عنہا نبی اکرم صلی اللہ علیہ وسلم کے پاس آئیں اور آپ کے سامنے اس بات کی شکایت کی جو ان خواتین نے کہی تھیں ، تو نبی اکرم صلی اللہ علیہ وسلم نے انہیں پرسکون ہونے کا کہا: اور فرمایا : تم بیٹھ جاؤ ، پھر نبی اکرم صلی اللہ علیہ وسلم نے لوگوں کو ظہر کی نماز پڑھائی ، پھر آپ منبر پر گھڑی بھر کے لئے تشریف فرما ہوئے اور آپ نے ارشاد فرمایا : ” کیا وجہ ہے کہ مجھے میرے اہل خانہ ( یعنی خاندان کے افراد ) کے حوالے سے اذیت پہنچائی جاتی ہے ، اللہ کی قسم ! میری شفاعت حاء اور حکم اور صدا قبیلے کے افراد کو بھی قیامت کے دن نصیب ہو گی ۔ “
یہ روایت امام طبرانی نے نقل کی ہے اس کی سند میں ایک راوی عبدالرحمن بن بشیر دمشقی ہے جسے ابن حبان نے ثقہ قرار دیا ہے ، اور ابوحاتم نے اسے ضعیف کہا: ہے اس روایت کے بقیہ رجال ثقہ ہیں ۔

ابن ابوحسین بیان کرتے ہیں : سیدہ درہ رضی اللہ عنہا بنت ابولہب ، حارث بن عبداللہ بن نوفل کی اہلیہ تھیں ، انہوں نے ان صاحب کے بچوں عقبہ اور ولید اور ابومسلم کو جنم دیا پھر وہ خاتون مدینہ منورہ نبی اکرم صلی اللہ علیہ وسلم کے پاس آ گئیں ، لوگوں نے ان کے ماں باپ کے بارے میں زیادہ باتیں کیں تو انہوں نے عرض کی : یا رسول اللہ ! کیا میرے علاوہ اور کوئی کافروں کی اولاد نہیں ہے ؟ نبی اکرم صلی اللہ علیہ وسلم نے اس خاتون سے دریافت کیا : کیا ہوا ہے ؟ اس خاتون نے بتایا کہ اہل مدینہ نے مجھے میرے ماں باپ کے حوالے سے اذیت پہنچائی ہے ، تو نبی اکرم صلی اللہ علیہ وسلم نے اس خاتون سے فرمایا : جب میں ظہر کی نماز ادا کروں گا ، تو تم نے ایسی جگہ نماز ادا کرنی ہے جہاں میں دیکھ سکوں ، جب نبی اکرم صلی اللہ علیہ وسلم نے ظہر کی نماز ادا کر لی اور مڑ کر ان کی طرف دیکھا تو آپ لوگوں کی طرف متوجہ ہوئے ، آپ نے ارشاد فرمایا : ” اے لوگو ! کیا تم لوگوں کا نسب ہے ، اور میرا نسب نہیں ہے ۔ “ سیدنا عمر بن خطاب رضی اللہ عنہ اٹھے اور انہوں نے عرض کی : اللہ تعالیٰ اس شخص پر غضب ناک ہو جس نے آپ کو غضبناک کیا ہے ، تو نبی اکرم صلی اللہ علیہ وسلم نے فرمایا : ” یہ میری چچازاد ہے ، کوئی بھی شخص اس کے ساتھ صرف بھلائی کی بات ہے ۔ “
یہ روایت امام طبرانی نے نقل کی ہے ابن ابوحسین نامی راوی عبداللہ بن ابوحسین ہے ، اور یہ روایت مرسل ہے ، اور اس کے رجال ” صحیح“ کے رجال ہیں ۔

سیده درّہ رضی اللہ عنہا بنت ابولہب بیان کرتی ہیں : میں سیدہ عائشہ رضی اللہ عنہا کے پاس موجود تھی ، نبی اکرم صلی اللہ علیہ وسلم گھر تشریف لائے آپ نے فرمایا : میرے پاس وضو کا پانی لے کے آؤ ، سیدہ درہ رضی اللہ عنہا کہتی ہیں میں اور عائشہ برتن کی طرف لپکیں اور میں ان سے پہلے برتن تک پہنچ گئی ، میں نے اسے لیا ، نبی اکرم صلی اللہ علیہ وسلم نے وضو کیا ، آپ نے اپنی نگاہ اٹھا کے میری طرف دیکھا اور فرمایا : ” تم مجھ سے ہو اور میں تم سے ہوں ۔ “ وہ خاتون بیان کرتی ہیں : پھر ایک شخص کو لایا گیا تو اس نے کہا: میں نے ایسا نہیں کیا ، مجھے یہ بات کہی گئی تھی ۔ وہ خاتون بیان کرتی ہیں : اس شخص نے نبی اکرم صلی اللہ علیہ وسلم کے منبر پر موجود رہنے کے دوران آپ سے سوال کیا تھا ، لوگوں میں سب سے بہتر کون ہے ؟ تو نبی اکرم صلی اللہ علیہ وسلم نے ارشاد فرمایا : ” جو اللہ کے دین کی سب سے زیادہ سمجھ بوجھ رکھتا ہو اور رشتے داری کے حقوق کا سب سے زیادہ خیال رکھتا ہو ۔ “ اس کے بعد شریک نامی راوی نے دو اور چیزیں بھی ذکر کی تھیں جو مجھے یاد نہیں رہی ہیں ۔
یہ روایت امام أحمد نے نقل کی ہے ، اور اس کے رجال ثقہ ہیں ۔