مجمع الزوائد ومنبع الفوائد

سیدنا ابوبرزہ رضی اللہ عنہ بیان کرتے ہیں : نبی اکرم صلی اللہ علیہ وسلم نے جب خیبر میں پڑاؤ کیا تو سیدہ صفیہ رضی اللہ عنہا کی نئی نئی شادی ہوئی تھی ، انہوں نے خواب میں دیکھا کہ سورج ان کے سینے پر آ گیا ہے ، انہوں نے یہ خواب اپنے شوہر کو سنایا تو ان کے شوہر نے کہا: اللہ کی قسم تم اس بادشاہ کے ساتھ شادی کرنے کی آرزو مند ہو جو ہمارے علاقے میں آیا ہوا ہے ، پھر نبی اکرم صلی اللہ علیہ وسلم نے خیبر فتح کیا ، تو سیدہ صفیہ رضی اللہ عنہا کے شوہر کو باندھ کر اس کی گردن کو اڑا دیا گیا ، نبی اکرم صلی اللہ علیہ وسلم کے شہسواروں نے سیدہ صفیہ رضی اللہ عنہا کو گرفتار کر لیا ، پھر نبی اکرم صلی اللہ علیہ وسلم نے اس خاتون کے ساتھ شادی کی ، نبی اکرم صلی اللہ علیہ وسلم نے ان کے ولیمے میں کھجوریں دسترخوان پر رکھوائیں اور فرمایا : اللہ کے رسول کی صفیہ کے ساتھ شادی کا ولیمہ کھاؤ ۔
یہ روایت امام طبرانی نے نقل کی ہے اس کی سند میں ایک راوی نہاس بن قہم ہے اور وہ ضعیف ہے ، جس کے ضعیف ہونے پر اتفاق ہے ۔

سیدنا عبداللہ بن عمر رضی اللہ عنہما بیان کرتے ہیں : سیدہ صفیہ رضی اللہ عنہا کی آنکھوں کا رنگ سبز تھا ، نبی اکرم صلی اللہ علیہ وسلم نے ان سے فرمایا : یہ تمہاری آنکھوں کا رنگ سبز کس وجہ سے ہے ، تو سیدہ صفیہ رضی اللہ عنہا نے یہ کہا: کہ میں نے اپنے سابقہ شوہر سے یہ کہا: کہ میں نے خواب میں یہ دیکھا کہ جیسے چاند میری گود میں آ گیا ، تو اس نے مجھے تھپڑ مارا اور بولا: کیا تم یثرب کے بادشاہ سے شادی کرنا چاہتی ہو ، سیدہ صفیہ رضی اللہ عنہا کہتی ہیں اس وقت میرے نزدیک نبی اکرم صلی اللہ علیہ وسلم سے زیادہ ناپسندیدہ اور کوئی نہیں تھا ، جنہوں نے میرے والد اور میرے شوہر کو قتل کروایا تھا ، لیکن نبی اکرم صلی اللہ علیہ وسلم مسلسل میرے سامنے وجہ بیان کرتے رہے ، آپ نے فرمایا : اے صفیہ ! تمہارے والد نے عربوں کو میرے خلاف کرنے کی کوشش کی تھی اور یہ کیا تھا اور وہ کیا تھا ، یہاں تک کہ یہ چیز میرے دل سے رخصت ہو گئی ۔
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں ۔

سیدنا جابر بن عبداللہ رضی اللہ عنہ بیان کرتے ہیں : جب سیدہ صفیہ بنت حیی رضی اللہ عنہا نبی اکرم صلی اللہ علیہ وسلم کے پاس آپ کے خیمے میں آئیں تو وہاں کچھ لوگ موجود تھے ان کے ساتھ میں بھی موجود تھا تاکہ اس بارے میں مجھے بھی حصہ ملے ، نبی اکرم صلی اللہ علیہ وسلم باہر تشریف لائے ، آپ نے فرمایا : اپنی ماں کے پاس سے اٹھ جاؤ ، جب رات کے کھانے کا وقت ہوا تو ہم پھر آ گئے ، نبی اکرم صلی اللہ علیہ وسلم ہمارے پاس تشریف لائے ، آپ نے چادر میں ڈیڑھ مد کے لگ بھگ عجوہ کھجوریں رکھی ہوئی تھیں آپ نے فرمایا : اپنی ماں کا ولیمہ کھاؤ ۔
یہ روایت امام أحمد نے نقل کی ہے اور اس کے رجال ” صحیح “ کے رجال ہیں ۔

سیدہ رزینہ رضی اللہ عنہا بیان کرتی ہیں : جنگ قریظہ اور جنگ نضیر کے دن نبی اکرم صلی اللہ علیہ وسلم سیدہ صفیہ بنت حیی رضی اللہ عنہا کو لے آئے ، ان کی کلائی نبی اکرم صلی اللہ علیہ وسلم کے ہاتھ میں تھی ، جب انہوں نے قیدیوں کو دیکھا تو یہ کہا: میں اس بات کی گواہی دیتی ہوں کہ اللہ تعالیٰ کے علاوہ اور کوئی معبود نہیں ہے ، اور آپ اللہ کے رسول ہیں ، تو نبی اکرم صلی اللہ علیہ وسلم نے اپنے ہاتھ سے ان کی کلائی چھوڑ دی ، نبی اکرم صلی اللہ علیہ وسلم نے انہیں آزاد کر دیا ، انہیں شادی کا پیغام دیا اور پھر ان کے ساتھ شادی کر لی ، نبی اکرم صلی اللہ علیہ وسلم نے انہیں مہر کے طور پر ( ٹیک لگانے والا ) تکیہ دیا ۔
یہ روایت امام طبرانی نے نقل کی ہے امام ابویعلیٰ نے اس کی مانند روایت علیلہ بنت کمیت کے حوالے سے ان کی والدہ امینہ سے نقل کی ہے ، اور ان کے حوالے سے امۃ اللہ بنت رزینہ سے نقل کی ہے ، اور ان تینوں خواتین سے میں واقف نہیں ہوں ۔ اس کی سند کے بقیہ رجال ثقہ ہیں اور
یہ روایت اس روایت کے برخلاف ہے جو صحیح میں مذکور ہے باقی اللہ بہتر جانتا ہے ۔

سیدنا سہل بن حنیف رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدہ صفیہ بنت حیی بن اخطب رضی اللہ عنہا ، جن کا تعلق بنو نضیر سے تھا ، انہیں قیدی بنا لیا ، یہ خاتون اللہ تعالیٰ نے نبی اکرم صلی اللہ علیہ وسلم کو مال فے کے طور پر عطا کی تھی ۔
یہ روایت امام طبرانی نے اپنے استاد قاسم بن عبداللہ بن مہدی کے حوالے سے نقل کی ہے اور وہ ضعیف ہے ، ابن عدی کہتے ہیں اس میں کوئی حرج نہیں ہے ، اس روایت کے بقیہ رجال ثقہ ہیں ۔

زہری بیان کرتے ہیں : نبی اکرم صلی اللہ علیہ وسلم نے سیدہ صفیہ بنت حیی بن اخطب رضی اللہ عنہا ، جن کا تعلق بنو نضیر سے ہے ، انہیں غزوہ حنین کے موقع پر قیدی بنایا تھا اور وہ خاتون کنانہ بن ابوحقیق کی بیوی تھیں ۔
یہ روایت امام طبرانی نے مرسل روایت کے طور پر نقل کی ہے ۔

سیدنا وحشی بن حرب رضی اللہ عنہ بیان کرتے ہیں : جب اللہ تعالیٰ نے نبی اکرم صلی اللہ علیہ وسلم کو سیدہ صفیہ رضی اللہ عنہا مال فے کے طور پر دے دیں تو آپ نے اپنے اصحاب سے فرمایا : تم لوگ اس کنیز کے بارے میں کیا کہتے ہو ؟ تو لوگوں نے کہا: ہم یہ سمجھتے ہیں کہ آپ اس خاتون کے بارے میں لوگوں سے زیادہ لائق ہیں اور زیادہ حق رکھتے ہیں ، نبی اکرم صلی اللہ علیہ وسلم نے فرمایا : پھر میں اسے آزاد کر کے اس سے شادی کر لیتا ہوں اور اس کی آزادی کو اس کا مہر بنا دیتا ہوں ، ایک صاحب نے عرض کی : یا رسول اللہ ! ولیمہ ؟ نبی اکرم صلی اللہ علیہ وسلم نے فرمایا : ولیمہ حق ہے ، اور دوسرے دن ( کھانا کھلانا ) نیکی ہے اور تیسرے دن فخر ہے ، اور گناہ ہے ۔
یہ روایت امام طبرانی نے نقل کی ہے اور اس کے رجال کو ابن حبان نے ثقہ قرار دیا ہے ۔

سیدہ صفیہ رضی اللہ عنہا بیان کرتی ہیں : جب میں نبی اکرم صلی اللہ علیہ وسلم کے پاس آئی تو لوگوں میں کوئی بھی میرے نزدیک نبی اکرم صلی اللہ علیہ وسلم سے زیادہ ناپسندیدہ نہیں تھا ، نبی اکرم صلی اللہ علیہ وسلم نے فرمایا : تمہاری قوم کے افراد نے یہ کیا اور وہ کیا ۔ سیدہ صفیہ رضی اللہ عنہا بیان کرتی ہیں : تو وہاں اس جگہ سے میرے اٹھنے سے پہلے لوگوں میں کوئی بھی میرے نزدیک نبی اکرم صلی اللہ علیہ وسلم سے زیادہ محبوب نہیں تھا ۔

اس خاتون کے حوالے سے یہ ایک روایت منقول ہے ، وہ بیان کرتی ہیں : میں نے نبی اکرم صلی اللہ علیہ وسلم سے زیادہ اچھے اخلاق کا مالک کبھی کوئی شخص نہیں دیکھا ، میں نے آپ کو دیکھا کہ آپ نے خیبر سے مجھے رات کے وقت اپنی اونٹنی کی پشت پر سوار کروایا ، میں اونگھنے لگتی تھی اور میرا سر پالان کے پچھلے حصے سے ٹکرا جاتا تھا ، تو آپ اپنے ہاتھ کے ذریعے چھو کر یہ فرماتے تھے ، ارے آرام سے اے حیی کی بیٹی ! یہاں تک کہ نبی اکرم صلی اللہ علیہ وسلم صہباء تشریف لے آئے ، تو آپ نے فرمایا : اے صفیہ ! میں تمہارے سامنے اس حوالے سے عذر بیان کرتا ہوں ، جو میں نے تمہاری قوم کے ساتھ کیا ، انہوں نے میرے بارے میں یہ یہ کچھ کہا: تھا ۔
یہ روایت امام ابویعلیٰ نے مختلف اسانید کے ساتھ نقل کی ہے ، پہلے طریق کے رجال ” صحیح“ کے رجال ہیں ، البتہ حمید بن ہلال نامی راوی نے سیدہ صفیہ رضی اللہ عنہا کا زمانہ نہیں پایا ہے ، اور اس روایت کے رجال میں ربیع نامی راوی ہے جو سیدہ صفیہ رضی اللہ عنہا کا بھتیجا ہے ، میں اس سے واقف نہیں ہوں ۔ اس روایت کے بقیہ رجال ثقہ ہیں ۔