مجمع الزوائد ومنبع الفوائد

زبیر بن بکار بیان کرتے ہیں : سیدنا ابراہیم رضی اللہ عنہ کے علاوہ نبی اکرم صلی اللہ علیہ وسلم کے بیٹوں اور آپ کی تمام صاحبزادیوں کی والدہ سیدہ خدیجہ بنت خویلد رضی اللہ عنہا ہیں جو زمانہ جاہلیت میں طاہرہ بنت اسد بن عبدالعزیٰ بن قصی تھیں ان کی والدہ کا نام فاطمہ بنت زائدہ بن جندب ہے ، جندب نامی صاحب اصم بن حجر بن عبدمعیص بن عامر بن لؤی ہیں ۔ سیدہ خدیجہ رضی اللہ عنہا کی والدہ کا نام ہالہ بنت مناف بن حارث بن منقذ بن عمرو بن معيص بن عامر بن لؤی ہے ، اور اس خاتون کی والدہ کا نام عرقہ ہے اس خاتون کا نام اصل میں کلابہ تھا ، وہ سعد بن سہل بن عمرو بن حصیص بن کعب بن لؤی کی صاحبزادی ہیں ، حبان بن عبد بن مناف ہالہ نامی اس خاتون کے سگے بھائی تھے یہ وہی صاحب ہیں جنہوں نے غزوہ خندق کے موقع پر سیدنا سعد بن معاذ رضی اللہ عنہ کو تیر مارا تھا اور یہ کہا: تھا اس کو سنبھالو میں ابن عرقہ ہوں ، تو نبی اکرم صلی اللہ علیہ وسلم نے فرمایا تھا : اللہ تعالیٰ تیرے چہرے کو جہنم میں عرق آلود کرے ، وہ تیر سیدنا سعد رضی اللہ عنہ کے بازو کی رگ پر لگا تھا اور اسی وجہ سے وہ شہید ہوئے تھے ۔ سیدہ خدیجہ بنت خویلد رضی اللہ عنہا نے نبی اکرم صلی اللہ علیہ وسلم سے پہلے عتیق بن عائذ بن عبداللہ بن عمرو بن مخزوم سے شادی کی تھی ، انہوں نے ان صاحب کے بیٹے ہند بن عقیق کو جنم دیا تھا پھر اس کے بعد ان کے ساتھ ابوہالہ مالک بن نباش بن زراه بن وقدان بن حبیب بن سلامہ بن عدی نے شادی کی تھی جن کا تعلق بنو اسد بن عمرو بن تمیم سے تھا اور وہ بن عبدالدار بن قصی کے حلیف تھے ، سیدہ خدیجہ رضی اللہ عنہا نے ان صاحب کے بیٹے ہند بن ابوہالہ کو جنم دیا تھا وہ صاحب ہند بن عتیق بن عائذ ہیں ہند اور ہالہ یہ دونوں ابوہالہ مالک بن نباش بن زرارہ کے بیٹے ہیں اور نبی اکرم صلی اللہ علیہ وسلم کی اولاد کے ، ان کی والدہ سیدہ خدیجہ بنت خویلد رضی اللہ عنہا کے حوالے سے بہن بھائی ہیں ۔

ابن شہاب بیان کرتے ہیں : نبی اکرم صلی اللہ علیہ وسلم نے مکہ میں سیدہ خدیجہ رضی اللہ عنہا کے ساتھ شادی کی تھی یہ وہ پہلی خاتون ہیں جن کے ساتھ نبی اکرم صلی اللہ علیہ وسلم نے شادی کی تھی ، یہ خاتون اس سے پہلے ابوہالہ تمیمی کی اہلیہ تھیں جب نبی اکرم صلی اللہ علیہ وسلم نے اس خاتون کے ساتھ شادی کی تو ان کی عمر اکیس سال تھی اور ان کا انتقال نبی اکرم صلی اللہ علیہ وسلم کی بعثت کے سات سال گزرنے کے بعد ہوا ۔
یہ روایت امام طبرانی نے نقل کی ہے اس کی سند میں ایک راوی محمد بن حسن بن زبالہ ہے اور وہ ضعیف ہے ۔

عمر بن ابوبکر مؤملی بیان کرتے ہیں : عمرو بن اسد نے سیدہ خدیجہ رضی اللہ عنہا کی شادی نبی اکرم صلی اللہ علیہ وسلم سے کروائی تھی جب نبی اکرم صلی اللہ علیہ وسلم نے اس خاتون کے ساتھ شادی کی تھی اس وقت آپ کی عمر پچیس سال تھی اور قریش اس وقت خانہ کعبہ کی تعمیر کر رہے تھے ۔
یہ روایت امام طبرانی نے نقل کی ہے عمر نامی یہ راوی متروک ہے ۔

ابن جریج بیان کرتے ہیں : جب نبی اکرم صلی اللہ علیہ وسلم نے شادی کی تھی اس وقت آپ کی عمر سینتیس سال تھی ۔ اس کی سند میں ایک راوی محمد بن حسن بن زبالہ ہے اور وہ ضعیف ہے ۔

عبدالله بن محمد بن یحیی بن عروہ اپنے والد کا یہ بیان نقل کرتے ہیں : ” عمرو بن اسد نے کہا: محمد بن عبداللہ نے ، خدیجہ بنت خویلد رضی اللہ عنہا کے لئے شادی کا پیغام دیا ہے اور وہ ایک ایسے نوجوان ہیں ، جن کی ناک پر نہیں مارا جا سکتا ۔ “
یہ روایت امام طبرانی نے نقل کی ہے اس کی سند میں ایک راوی ابن زبالہ ہے اور وہ ضعیف ہے ۔

ابن شہاب بیان کرتے ہیں : سیدہ خدیجہ بنت خویلد رضی اللہ عنہا نبی اکرم صلی اللہ علیہ وسلم پر قرآن نازل ہونے سے پہلے آپ کی اہلیہ تھیں پھر آپ پر قرآن نازل ہوا تو وہ آپ کی اہلیہ رہیں وہ پہلی خاتون ہیں : جس نے نبی اکرم صلی اللہ علیہ وسلم کی تصدیق کی اور آپ پر ایمان لائیں نبی اکرم صلی اللہ علیہ وسلم کے مدینہ منورہ کی طرف تشریف لے جانے سے تین سال پہلے مکہ میں ہی ان کا انتقال ہو گیا تھا ۔
یہ روایت امام طبرانی نے نقل کی ہے اس کی سند میں بھی ایک راوی ابن زبالہ ہے اور وہ ضعیف ہے ۔

مالک بن حویرث بیان کرتے ہیں : مردوں میں سب سے پہلے سیدنا علی رضی اللہ عنہ نے اسلام قبول کیا تھا اور خواتین میں سب سے پہلے سیدہ خدیجہ رضی اللہ عنہا نے اسلام قبول کیا تھا ۔
یہ روایت امام طبرانی نے نقل کی ہے اس کے رجال میں ضعف پایا جاتا ہے ابن حبان نے انہیں ثقہ قرار دیا ہے ۔

سیدنا بریدہ رضی اللہ عنہ بیان کرتے ہیں : نبی اکرم صلی اللہ علیہ وسلم کے ساتھ ( یعنی آپ کے دست اقدس پر ) اسلام قبول کرنے والے پہلے افراد سیدہ خدیجہ رضی اللہ عنہا اور سیدنا علی بن ابوطالب رضی اللہ عنہ ہیں ۔
یہ روایت امام طبرانی نے نقل کی ہے اور اس کے رجال کی توثیق کی گئی ہے اور ان میں ضعف پایا جاتا ہے ۔

سیدنا ابورافع رضی اللہ عنہ بیان کرتے ہیں : مردوں میں سب سے پہلے سیدنا علی رضی اللہ عنہ نے اسلام قبول کیا تھا اور خواتین میں سب سے پہلے سیدہ خدیجہ رضی اللہ عنہا نے اسلام قبول کیا تھا ۔
یہ روایت امام بزار نے نقل کی ہے اور اس کے رجال ” صحیح “ کے رجال ہیں ۔

محمد بن اسحاق بیان کرتے ہیں ( سیدہ خدیجہ رضی اللہ عنہا کا نسب یہ ہے : ) ” سیدہ خدیجہ رضی اللہ عنہا بنت خویلد بن اسد بن عبدالعزیٰ بن قصی ۔ “
یہ روایت امام طبرانی نے نقل کی ہے اور ابن اسحاق تک اس کے رجال ” صحیح “ کے رجال ہیں ۔

امام طبرانی بیان کرتے ہیں : سیدہ خدیجہ رضی اللہ عنہا بنت خویلد بن اسد بن عبدالعزیٰ بن قصی ، یہ وہ پہلی خاتون ہیں جس کے ساتھ نبی اکرم صلی اللہ علیہ وسلم نے شادی کی تھی اور یہ آپ کی تمام مذکر اور مؤنث اولاد کی والدہ ہیں ، صرف سیدنا ابراہیم رضی اللہ عنہ کا معاملہ مختلف ہے وہ آپ صلی اللہ علیہ وسلم کی کنیز سیدہ ماریہ قبطیہ رضی اللہ عنہا کے ہاں پیدا ہوئے تھے ۔

قتادہ بن دعامہ بیان کرتے ہیں : سیدہ خدیجہ بنت خویلد رضی اللہ عنہا کا انتقال ہجرت سے تین سال پہلے ہو گیا تھا ، وہ خاتون ، مردوں اور عورتوں میں سب سے پہلے نبی اکرم صلی اللہ علیہ وسلم پر ایمان لائیں تھیں ، نبی اکرم صلی اللہ علیہ وسلم نے زمانہ جاہلیت میں ( یعنی اعلان نبوت سے پہلے ) ان کے علاوہ اور کسی خاتون کے ساتھ شادی نہیں کی اور ان کے علاوہ اور کسی ( زوجہ محترمہ ) سے نبی اکرم صلی اللہ علیہ وسلم کی اولاد نہیں ہوئی ۔
یہ روایت امام طبرانی نے نقل کی ہے اس کی سند میں ایک راوی زہیر بن العلاء ہے جسے ابن حبان نے ثقہ قرار دیا ہے اور دیگر حضرات نے اسے ضعیف کہا: ہے ۔ امام طبرانی نے اس کی مانند روایت اختصار کے ساتھ عروہ بن زبیر کے حوالے سے نقل کی ہے ، اور اس کے رجال ” صحیح “ کے رجال ہیں ۔

زہری بیان کرتے ہیں : نبی اکرم صلی اللہ علیہ وسلم کے سیدہ خدیجہ رضی اللہ عنہا کے ہوتے ہوئے اور کسی خاتون کے ساتھ شادی نہیں کی یہاں تک کہ سیدہ خدیجہ رضی اللہ عنہا کا انتقال ہو گیا ۔
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : نماز کی فرضیت کا حکم نازل ہونے سے پہلے سیدہ خدیجہ رضی اللہ عنہا کا انتقال ہو گیا تھا ۔
یہ روایت امام طبرانی نے نقل کی ہے اس کی سند میں ایک راوی محمد بن حسن بن زبالہ ہے اور وہ ضعیف ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے سیدہ خدیجہ رضی اللہ عنہا کو شادی کا پیغام بھیجا ان کے والد نبی اکرم صلی اللہ علیہ وسلم کے ساتھ ان کی شادی نہیں کرنا چاہتے تھے سیدہ خدیجہ رضی اللہ عنہا نے کھانا اور مشروب تیار کیا انہوں نے اپنے والد اور قریش سے تعلق رکھنے والے کچھ افراد کی دعوت کی ان لوگوں نے کھانا کھایا اور شراب پی لی یہاں تک کہ وہ لوگ مدہوش ہو گئے تو سیدہ خدیجہ رضی اللہ عنہا نے کہا: محمد بن عبداللہ نے مجھے شادی کا پیغام بھیجا ہے میری شادی اس کے ساتھ کروا دیں تو ان کے والد نے ان کی شادی نبی اکرم صلی اللہ علیہ وسلم سے کروا دی پھر سیدہ خدیجہ رضی اللہ عنہا نے انہیں خوشبو لگائی اور حلہ پہنے کے لئے دیا وہ لوگ اپنے آباؤ اجداد کے ساتھ اسی طرح کیا کرتے تھے جب ان صاحب کا نشہ ختم ہوا تو انہوں نے دیکھا کہ انہیں خوشبو بھی لگی ہوئی تھی اور ان کے جسم پر حلہ بھی تھا ، انہوں نے کہا: کیا معاملہ ہے یہ کس وجہ سے ہے ، تو سیدہ خدیجہ رضی اللہ عنہا نے بتایا کہ آپ نے میری شادی محمد بن عبداللہ سے کروا دی ہے ، تو ان کے والد نے کہا: کیا میں ابوطالب کے زیر پرورش یتیم لڑکے سے شادی کراؤں گا ؟ جی نہیں ! میری زندگی کی قسم ( ایسا نہیں ہو سکتا ) سیدہ خدیجہ رضی اللہ عنہا نے کہا: کیا آپ کو حیاء محسوس نہیں ہوتی ؟ کیا آپ یہ چاہتے ہیں کہ قریش کے سامنے اپنے آپ کو بے وقوف قرار دیں اور لوگوں کو بتائیں کہ آپ نشے کے عالم میں تھے سیدہ خدیجہ رضی اللہ عنہا مسلسل انہیں سمجھاتی رہیں یہاں تک کہ وہ شخص راضی ہو گئے ۔
یہ روایت امام أحمد نے اور امام طبرانی نے نقل کی ہے اور امام أحمد اور امام طبرانی کے رجال ” صحیح “ کے رجال ہیں ۔

سیدنا عمار بن یاسر رضی اللہ عنہ کے بارے میں یہ بات منقول ہے کہ جب وہ لوگوں کو نبی اکرم صلی اللہ علیہ وسلم کے سیدہ خدیجہ رضی اللہ عنہا کے ساتھ شادی کرنے کے بارے میں سنتے تھے تو یہ فرمایا کرتے تھے میں اس خاتون کے ساتھ نبی اکرم صلی اللہ علیہ وسلم کی شادی کے بارے میں سب سے زیاہ علم رکھتا ہوں زمانہ جاہلیت میں ، میں نبی اکرم صلی اللہ علیہ وسلم کا قریبی ساتھی تھا ، ایک دن میں نبی اکرم صلی اللہ علیہ وسلم کے ساتھ جا رہا تھا ہمارا گزر سیدہ خدیجہ رضی اللہ عنہا کی بہن کے پاس سے ہوا جو اپنے چمڑے کے ایک خیمے میں موجود تھیں ، انہوں نے مجھے بلایا ، میں ان کے پاس چلا گیا ، نبی اکرم صلی اللہ علیہ وسلم وہاں رک گئے ۔ اس خاتون نے کہا: کیا آپ کے ساتھی ( یعنی نبی اکرم صلی اللہ علیہ وسلم ) خدیجہ رضی اللہ عنہا کے ساتھ شادی کرنے میں دلچسپی رکھتے ہیں ؟ میں نے نبی اکرم صلی اللہ علیہ وسلم کو اس بارے میں بتایا تو آپ نے فرمایا : جی ہاں مجھے اپنی زندگی کی قسم ، میں اس خاتون کے پاس واپس گیا اور نبی اکرم صلی اللہ علیہ وسلم کی کہی ہوئی بات کے بارے میں اسے بتایا تو اس خاتون نے کہا: جب کل صبح ہو تو آپ ہمارے پاس آ جائیں ، ہم اگلے دن ان لوگوں کے پاس گئے تو ہم نے ان لوگوں کو پایا کہ ان لوگوں نے ایک گائے ذبح کی ہوئی تھی اور انہوں نے سیدہ خدیجہ رضی اللہ عنہا کے والد کو حلہ پہنایا ہوا تھا اور وہاں ایک قبہ لگایا ہوا تھا ، سیدہ خدیجہ رضی اللہ عنہا نے اپنے بھائی کے ساتھ بات چیت کی ، ان کے بھائی نے ان کے والد کے ساتھ بات چیت کی اور انہوں نے انہیں اللہ کے رسول اور ان کی حیثیت کے بارے میں بتایا ، نبی اکرم صلی اللہ علیہ وسلم نے ان سے یہ کہا: کہ وہ سیدہ خدیجہ رضی اللہ عنہا کے ساتھ ان کی شادی کر دیں ، تو ان لوگوں نے ان کی شادی کروا دی ، ان لوگوں نے گائے کے گوشت کا کھانا پکوایا ، ہم نے اسے کھایا ، پھر سیدہ خدیجہ رضی اللہ عنہا کے والد سو گئے ، جب وہ بیدار ہوئے تو انہوں نے دریافت کیا : یہ حلہ کہاں سے آیا ہے ، اور یہ خیمہ کس لئے لگا ہے ، اور یہ کھانا کس وجہ سے ہے ؟ تو ان کی اس صاحبزادی نے جس نے سیدنا عمار رضی اللہ عنہ کے ساتھ بات چیت کی تھی ، انہیں بتایا کہ یہ حلہ آپ کو محمد بن عبداللہ نے پہنایا ہے جو آپ کے داماد ہیں اور یہ گائے انہوں نے آپ کو تحفے کے طور پر دی ہے ، جب آپ نے ان کے ساتھ سیدہ خدیجہ رضی اللہ عنہا کی شادی کی تو اس وقت ہم نے انہیں قربان کیا تھا ، تو ان صاحب نے اس بات کا انکار کیا کہ انہوں نے یہ شادی کروائی ہے ، وہ وہاں سے نکل کر حطیم کے پاس آئے ، جب بنو ہاشم آئے تو ان صاحب نے دریافت کیا : تمہارا وہ فرد کہاں ہے جس کے بارے میں تم لوگوں کا یہ کہنا ہے کہ میں نے اس کی شادی کروائی ہے ، جب ان صاحب نے نبی اکرم صلی اللہ علیہ وسلم کو دیکھا اور نبی اکرم صلی اللہ علیہ وسلم نے ان کی طرف دیکھا تو ان صاحب نے کہا: اگر میں ان کی شادی کروا چکا ہوں تو ٹھیک ہے ، ورنہ میں اب ان کی شادی کروا دیتا ہوں ۔
یہ روایت امام طبرانی نے اور امام بزار نے نقل کی ہے اس کی سند میں ایک راوی عمر بن ابوبکر مؤملی ہے اور وہ متروک ہے ۔

سیدنا جابر بن سمرہ رضی اللہ عنہ یا نبی اکرم صلی اللہ علیہ وسلم کے اصحاب سے تعلق رکھنے والے ایک اور صاحب بیان کرتے ہیں : نبی اکرم صلی اللہ علیہ وسلم پہلے بکریاں چرایا کرتے تھے ، پھر آپ نے بکریاں چرانا چھوڑ کر اونٹوں کو چرانا شروع کر دیا ، آپ ایسا کرتے تھے آپ کے ساتھ آپ کا ایک شراکت دار ہوتا تھا ، پھر ان دونوں نے سیدہ خدیجہ رضی اللہ عنہا کی بہن کے لئے کام کرنا شروع کیا جب ان لوگوں نے اپنا تجارتی سفر مکمل کیا تو ان لوگوں کا اس خاتون کے ذمہ کچھ معاوضہ رہ گیا تھا ، نبی اکرم صلی اللہ علیہ وسلم کا شراکت دار ان لوگوں کے پاس جاتا تھا اور ان سے تقاضا کرتا تھا ، وہ نبی اکرم صلی اللہ علیہ وسلم سے کہا: کرتا تھا کہ آ جائیں ، تو نبی اکرم صلی اللہ علیہ وسلم یہ کہتے تھے : تم چلے جاؤ کیونکہ مجھے شرم آتی ہے ، ایک دن جب وہ شخص ان لوگوں کے پاس تقاضا کرنے کے لئے گیا تو اس خاتون نے کہا: محمد کہاں ہیں ، تو اس شخص نے بتایا کہ میں نے ان سے کہا: تھا ( کہ آپ بھی چلیں ) لیکن ان کا یہ کہنا تھا کہ انہیں شرم آتی ہے ، تو اس خاتون نے کہا: میں نے ان سے زیادہ شرم والا شخص کوئی نہیں دیکھا اور ان سے زیادہ بہتر طور پر نگرانی کرنے والا کوئی نہیں دیکھا ، پھر سیدہ خدیجہ رضی اللہ عنہا کی بہن کے دل میں یہ خیال آیا کہ سیدہ خدیجہ رضی اللہ عنہا کی ان کے ساتھ شادی ہونی چاہیے ، انہوں نے نبی اکرم صلی اللہ علیہ وسلم کو پیغام بھیجا اور یہ کہا: کہ آپ میرے والد کے پاس آئیں اور شادی کا پیغام دیں ، تو نبی اکرم صلی اللہ علیہ وسلم نے فرمایا : آپ کے والد ایک ایسے شخص ہیں جن کے پاس مال بہت زیادہ ہے ، وہ ایسا نہیں کریں گے ، تو انہوں نے کہا: آپ جائیں ان سے ملاقات کریں اور ان سے بات چیت کریں ، میں سنبھال لوں گی ، آپ ان کے پاس اس وقت جائیں جب وہ نشے کے عالم میں ہوں ، نبی اکرم صلی اللہ علیہ وسلم نے ایسا ہی کیا ، نبی اکرم صلی اللہ علیہ وسلم ان کے پاس گئے ، ان صاحب نے نبی اکرم صلی اللہ علیہ وسلم کی شادی کروا دی ، جب صبح ہوئی اور وہ محفل میں بیٹھے تو ان سے کہا: گیا آپ نے اچھا کیا جو سیدنا محمد ( صلی اللہ علیہ وسلم ) کے ساتھ شادی کروا دی ، انہوں نے دریافت کیا : کیا میں نے ایسا کیا ہے ؟ لوگوں نے کہا: جی ہاں ، تو وہ صاحب کھڑے ہوئے اور سیدہ خدیجہ رضی اللہ عنہا کے پاس آئے اور کہا: لوگ یہ کہہ رہے ہیں کہ میں نے محمد کے ساتھ شادی کروا دی ہے ۔ انہوں نے جواب دیا : جی ہاں ، اب آپ اپنی رائے کو بے وقوفی ظاہر نہ کیجئے گا کیونکہ سیدنا محمد اس اس طرح کے آدمی ہیں ۔ سیدہ خدیجہ رضی اللہ عنہا مسلسل انہیں سمجھاتی رہیں یہاں تک کہ وہ صاحب راضی ہو گئے ، پھر انہوں نے نبی اکرم صلی اللہ علیہ وسلم کو پیغام بھیجا اور انہیں سونے یا چاندی کے دو اوقیہ بھیجے اور یہ کہا: کہ آپ اس کے ذریعے حلہ خریدیں اور اس حلے کو مجھے تحفے کے طور پر دیں اور ایک دنبہ خریدیں اور اس اس طرح کر لیں ، تو نبی اکرم صلی اللہ علیہ وسلم ہم نے ایسا ہی کیا ۔
یہ روایت امام طبرانی اور امام بزار نے نقل کی ہے امام طبرانی کے رجال ” صحیح “ کے رجال ہیں صرف ابوخالد والبی کا معاملہ مختلف ہے اور وہ ثقہ ہے امام بزار کے رجال بھی اسی طرح ہیں تاہم ان کے استاد أحمد بن یحیی صوفی کا معاملہ مختلف ہے اور وہ ثقہ ہے لیکن وہ صحیح کے رجال میں سے نہیں ہے لیکن انہوں نے اپنی روایت میں یہ الفاظ نقل کیے ہیں : سیدہ خدیجہ رضی اللہ عنہا نے کہا: آپ ان کے پاس ایسے جائیں کہ زبردستی نہ ہو ، انہوں نے لفظ نشے کی جگہ یہ لفظ نقل کیا ہے ، اور حلے کے بارے میں یہ کہا: ہے کہ آپ یہ حلہ انہیں تحفے کے طور پر دیں ۔ یعنی یہ نہیں کہا: کہ مجھے تحفے کے طور پر دیں ۔

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم کے بارے میں جو چیز مجھے سب سے پہلے پتہ چلی وہ یہ ہے کہ میں اپنے چچاؤں کے ساتھ مکہ آیا تو ہماری رہنمائی سیدنا عباس بن عبدالمطلب رضی اللہ عنہ کی طرف کی گئی ، ہم ان کے پاس پہنچے تو وہ زم زم کے پاس بیٹھے ہوئے تھے ، ہم ان کے پاس بیٹھ گئے ، ہم ان کے پاس موجود تھے اسی دوران صفا والے دروازے کی طرف سے ایک شخص آیا جس کا رنگ گورا تھا اس پر سرخی غالب تھی اس کے بال لمبے تھے اور گھنگھریالے تھے اور کانوں کے کونوں تک آ رہے تھے وہ اٹھی ہوئی ناک کا مالک شخص تھا اور اس کے سامنے کے دانت چمک دار تھے اس کی آنکھوں کے سفید اور سیاہ رنگ میں چمک تھی اس کی داڑھی گھنی تھی سینے پر پتلے سے بال تھے ہتھیلی اور پاؤں پُر گوشت تھے اس نے دو سفید کپڑے پہنے ہوئے تھے یوں لگ رہا تھا جیسے وہ چودھویں رات کا چاند ہو اس کے دائیں طرف ایک نوجوان چلتا ہوا آ رہا تھا جس کی داڑھی نہیں نکلی تھی اس کا چہرہ بھی خوبصورت تھا اور وہ قریب البلوغ تھا ان کے پیچھے ایک خاتون آ رہی تھی جس نے اپنی خوبصورتی کو پردے میں رکھا ہوا تھا یہ لوگ حجر اسود کے پاس آئے انہوں نے اس کا استلام کیا پھر اس لڑکے نے استلام کیا پھر اس خاتون نے استلام کیا پھر انہوں نے بیت اللہ کے سات چکر لگائے وہ لڑکا اور خاتون ان صاحب کے ساتھ چکر لگا رہے تھے جب بھی وہ رکن کا استلام کرتے تھے تو دونوں ہاتھ بلند کر کے تکبیر کہتے تھے پھر جب انہوں نے رکن کا استلام کر لیا تو انہوں نے دونوں ہاتھ بلند کر کے تکبیر کہی لڑکا ان کے دائیں طرف کھڑا ہو گیا اس نے دونوں ہاتھ بلند کر کے تکبیر کہی خاتون ان دونوں کے پیچھے کھڑی ہو گئی اس نے بھی دونوں ہاتھ بلند کر کے تکبیر کہی یہ لوگ خاصی دیر کھڑے رہے پھر یہ رکوع میں گئے تو خاصی دیر رکوع میں رہے پھر انہوں نے رکوع سے سر اٹھایا اور کھڑے رہے وہ سیدھے کھڑے رہے پھر وہ سجدے میں چلے گئے لڑکا اور عورت بھی ان کے ساتھ سجدے میں چلے گئے اور وہ اسی طرح کرتے رہے جس طرح وہ صاحب کرتے رہے وہ دونوں ان صاحب کی پیروی کر رہے تھے سیدنا عبداللہ رضی اللہ عنہ کہتے ہیں ہم نے ایک ایسی چیز دیکھی تھی جو ہم نے اُس سے پہلے مکہ میں نہیں دیکھی تھی ، تو ہمیں یہ بڑی حیران کن لگی ہم سیدنا عباس رضی اللہ عنہ کی طرف متوجہ ہوئے ہم نے کہا: اے ابوالفضل اس دین کے پہلے آپ کے درمیان مکہ میں موجود ہونے کے حوالے سے ہم واقف نہیں تھے کیا یہ کوئی نئی چیز آئی ہے تو انہوں نے بتایا اللہ کی قسم ! جی ہاں ! کیا تم انہیں نہیں جانتے ؟ ہم نے جواب دیا : جی نہیں ، انہوں نے کہا: یہ ہمارا بھتیجا محمد بن عبداللہ ہے ، اور وہ لڑکا علی بن ابوطالب ہے ، اور وہ عورت خدیجہ بنت خویلد ہے ، اللہ کی قسم ! اس دین کے مطابق روئے زمین پر اللہ کی عبادت کرنے والا اور کوئی نہیں ہے ، صرف یہی تین افراد ہیں ۔
یہ روایت امام طبرانی نے نقل کی ہے ، اس کی سند میں دو راوی ہیں ، ان میں سے ایک یحیی بن حاتم ہے اور میں اس سے واقف نہیں ہوں اور دوسرا راوی بشر بن مہران ہے جسے ابن حبان نے ثقہ قرار دیا ہے اور ابوحاتم نے اسے ضعیف کہا: ہے اس روایت کے بقیہ رجال ثقہ ہیں ۔ اس سے پہلے عفیف کندی کی نقل کردہ روایت اس بارے میں گزر چکی ہے جسے امام أحمد اور دیگر حضرات نے نقل کیا ہے ، اور اس روایت کے رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے زمین پر چار لکیریں لگائیں ، آپ نے دریافت کیا : کیا تم لوگ جانتے ہو ؟ یہ کیا ہے ، لوگوں نے عرض کی : اللہ اور اس کا رسول زیادہ بہتر جانتے ہیں ، نبی اکرم صلی اللہ علیہ وسلم نے فرمایا : اہل جنت کی خواتین میں سب سے زیادہ فضیلت والی خدیجہ بنت خویلد ، فاطمہ بنت محمد ، مریم بنت عمران اور آسیہ بنت مزاحم رضی اللہ عنہن ہیں جو فرعون کی اہلیہ تھیں ۔
یہ روایت امام أحمد امام ابویعلیٰ اور امام طبرانی نے نقل کی ہے اور اس کے رجال ” صحیح “ کے رجال ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تمام خواتین میں تمہارے لئے چار کافی ہیں ( یعنی یہ چار نمایاں حیثیت رکھتی ہیں ) فاطمہ بنت محمد ، خدیجہ بنت خویلد ، مریم بنت عمران اور آسیہ بنت مزاحم رضی اللہ عنہن ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی سلیمان بن شاذ کونی ہے اور وہ ضعیف ہے ۔

سیدنا عمار بن یاسر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” خدیجہ کو میری امت کی خواتین پر اسی طرح فضیلت دی گئی ہے جس طرح مریم کو تمام جہانوں کی خواتین پر فضیلت دی گئی ہے ۔ “
یہ روایت امام طبرانی اور امام بزار نے نقل کی ہے اس کی سند میں ایک راوی ابویزید حمیری ہے اور میں اس سے واقف نہیں ہوں ۔ اس روایت کے بقیہ رجال کی توثیق کی گئی ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اہل جنت کی خواتین کی سردار مریم بنت عمران ہیں پھر فاطمہ بنت محمد ہیں پھر خدیجہ بنت خویلد ہیں پھر آسیہ ہیں ، جو فرعون کی اہلیہ تھیں ۔ “
یہ روایت امام طبرانی نے نقل کی ہے اس کی سند میں ایک راوی محمد بن حسن بن زبالہ ہے اور وہ متروک ہے ۔

سیدنا عبداللہ بن جعفر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مجھے یہ حکم دیا گیا ہے کہ میں خدیجہ کو کھوکھلے موتی سے بنے ہوئے گھر کی خوشخبری دے دوں جس میں کوئی شور شرابہ اور کوئی پریشانی نہیں ہو گی ۔ “
یہ روایت امام أحمد ، امام ابویعلیٰ اور امام طبرانی نے نقل کی ہے امام أحمد کے رجال ” صحیح “ کے رجال ہیں صرف محمد بن اسحاق کا معاملہ مختلف ہے اور اس نے سماع کی صراحت کی ہے ۔

سیدہ فاطمہ رضی اللہ عنہا بیان کرتی ہیں : انہوں نے نبی اکرم صلی اللہ علیہ وسلم کی خدمت میں عرض کی : ہماری والدہ سیدہ خدیجہ رضی اللہ عنہا کہاں ہیں ؟ نبی اکرم صلی اللہ علیہ وسلم نے فرمایا : موتی سے بنے ہوئے کھوکھلے گھر میں ہے ، جس میں کوئی شور شرابہ اور کوئی پریشانی نہیں ہو گی وہ مریم اور آسیہ کے درمیان ہیں ۔ “ سیدہ فاطمہ رضی اللہ عنہا نے عرض کی : اس موتی سے ؟ نبی اکرم صلی اللہ علیہ وسلم نے فرمایا : جی نہیں بلکہ ایسے موتی سے ، جس میں قیمتی پتھر اور موتی اور یاقوت پروئے ہوئے ہوتے ہیں ۔
یہ روایت امام طبرانی نے معجم اوسط میں مہاجر بن میمون کے حوالے سے خاتون سے نقل کی ہے اور میں مہاجر سے واقف نہیں ہوں ، میرا خیال ہے اس نے اس خاتون سے سماع نہیں کیا ہو گا ۔ باقی اللہ بہتر جانتا ہے اس روایت کے بقیہ رجال ثقہ ہیں ۔

سیدنا جابر بن عبدالله رضی اللہ عنہ بیان کرتے ہیں : نبی اکرم صلی اللہ علیہ وسلم سے سیدہ خدیجہ رضی اللہ عنہا کے بارے میں دریافت کیا گیا کیونکہ ان کا انتقال فرائض اور احکام کا حکم نازل ہونے سے پہلے ہو گیا تھا ، تو نبی اکرم صلی اللہ علیہ وسلم نے فرمایا : ” میں نے اسے نہر کے کنارے جنت میں موجود کھوکھلے موتی سے بنے ہوئے گھر میں دیکھا ہے جس میں کوئی شور شرابہ اور کوئی پریشانی نہیں ہے ۔ “ نبی اکرم صلی اللہ علیہ وسلم سے جناب ابوطالب کے بارے میں دریافت کیا گیا کہ کیا آپ نے انہیں کوئی نفع پہنچایا ہے ؟ تو نبی اکرم صلی اللہ علیہ وسلم نے فرمایا : ” میں انہیں جہنم سے نکال کر اس کے سب سے اوپر والے حصے میں لے کے آیا ہوں ۔ “
یہ روایت امام طبرانی نے معجم اوسط میں نقل کی ہے اور معجم کبیر میں اختصار کے ساتھ نقل کی ہے ان دونوں کے رجال ” صحیح“ کے رجال ہیں صرف سعید بن مجالد کا معاملہ مختلف ہے ، اور اس کی توثیق کی گئی ہے خاص طور پر ان احادیث میں کی گئی ہے جو سیدنا جابر رضی اللہ عنہ سے منقول ہیں ۔

سیدنا ابوہریرہ رضی اللہ عنہ اور سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدہ خدیجہ رضی اللہ عنہا کو جنت میں کھوکھلے موتی سے بنے ہوئے گھر کی خوشخبری دی تھی جس میں کوئی شور شرابہ اور کوئی پریشانی نہیں ہو گی ۔ ( علامہ ہیثمی فرماتے ہیں : ) میں یہ کہتا ہوں سیدنا ابوہریرہ رضی اللہ عنہ کی نقل کردہ حدیث صحیح میں مذکور ہے ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی محمد بن عبداللہ زہری ہے اور میں اس سے واقف نہیں ہوں ، اس روایت کے بقیہ رجال ثقہ ہیں ۔

سیدنا جابر بن رئاب رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدہ خدیجہ رضی اللہ عنہا سے فرمایا : ” جبرائیل میرے پاس آئے اور انہوں نے یہ کہا: کہ آپ خدیجہ کو کھوکھلے موتی سے بنے ہوئے گھر کی خوشخبری سنا دیں جس میں کوئی شور شرابہ اور کوئی پریشانی نہیں ہو گی ۔ “
یہ روایت امام طبرانی نے نقل کی ہے اس کی سند میں ایک راوی وازع بن نافع ہے اور وہ متروک ہے ۔

سیدنا عبداللہ بن عباس رضی اللہ عنہما بیان کرتے ہیں : ایک مرتبہ نبی اکرم صلی اللہ علیہ وسلم سیدہ خدیجہ رضی اللہ عنہا کے ساتھ بیٹھے ہوئے تھے اسی دوران سیدنا جبرائیل علیہ السلام آپ کے پاس آئے اور بولے : اے سیدنا محمد ( صلی اللہ علیہ وسلم ) ! آپ سیدہ خدیجہ رضی اللہ عنہا کو سلام کہہ دیں ، اور جنت میں موجود ایک گھر کی خوشخبری سنا دیں جو کھوکھلے موتی سے بنا ہوا ہو گا اس میں کوئی تکلیف اور کوئی پریشانی نہیں ہو گی ۔
یہ روایت امام طبرانی نے نقل کی ہے اور اس کی سند میں ایسا راوی ہے جس سے میں واقف نہیں ہوں ۔

سیدنا ابن ابواوفیٰ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جبرائیل نے مجھ سے کہا: سیدہ خدیجہ رضی اللہ عنہا کو جنت میں موجود ایک گھر کی خوشخبری دے دیں جو کھوکھلے موتی سے بنا ہوا ہو گا اور اس میں کوئی شور شرابہ اور کوئی پریشانی نہیں ہو گی ۔ “ راوی کہتے ہیں : اس سے مراد کھوکھلا موتی ہے ۔ ( علامہ ہیثمی فرماتے ہیں : ) میں یہ کہتا ہوں صحیح میں اس کا کچھ مذکور ہے ۔
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں صرف محمد بن ابوسمینہ کا معاملہ مختلف ہے ، ایک سے زیادہ افراد نے اس کو ثقہ قرار دیا ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم سیدہ خدیجہ رضی اللہ عنہا کا اکثر ذکر کیا کرتے تھے ، میں نے کہا: کیا وجہ ہے کہ آپ سیدہ خدیجہ رضی اللہ عنہا کا اکثر ذکر کرتے رہتے ہیں جب کہ اللہ تعالیٰ نے اس سرخ ہونٹوں والی بوڑھی عورت کی جگہ آپ کو دوسری بیویاں دے دی ہیں اور اس عورت کو انتقال کیے ہوئے بھی ایک زمانہ گزر گیا ہے ، سیدہ عائشہ رضی اللہ عنہا کہتی ہیں ، تو نبی اکرم صلی اللہ علیہ وسلم غصے میں آ گئے ، میں نے آپ کو اس طرح غصے میں کبھی نہیں دیکھا ، آپ نے ارشاد فرمایا : ” بے شک اللہ تعالیٰ نے اسے مجھ سے وہ چیز عطا کی جو تم میں سے کسی کو عطا نہیں کی ، میں نے عرض کی یا رسول اللہ ! آپ مجھے معاف کر دیں ، اللہ کی قسم ! آج کے دن بعد آپ مجھے سیدہ خدیجہ رضی اللہ عنہا کا اس حوالے سے ذکر کرتے ہوئے نہیں سنیں گے جو آپ کو ناپسند ہو ۔ “

ایک روایت میں یہ الفاظ ہیں : نبی اکرم صلی اللہ علیہ وسلم جب سیدہ خدیجہ رضی اللہ عنہا کا ذکر کرتے تھے تو ہمیشہ ان کی تعریف کیا کرتے تھے اور ان کے لئے دعائے مغفرت کیا کرتے تھے آپ یہ فرماتے تھے : ” اسے مجھ سے اولاد نصیب ہوئی تھی جب کہ تم مجھ سے اولاد سے محروم رہی ہو ۔ “ سیدہ عائشہ رضی اللہ عنہا کہتی ہیں : نبی اکرم صلی اللہ علیہ وسلم اس حوالے سے ایک ماہ تک ذکر کرتے رہے ۔
یہ روایت امام طبرانی نے نقل کی ہے اور اس کی سند حسن ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم جب سیدہ خدیجہ رضی اللہ عنہا کا ذکر کرتے تھے تو ان کی اچھی طرح سے تعریف کرتے تھے ، سیدہ عائشہ رضی اللہ عنہا کہتی ہیں ایک دن مجھے غصہ آ گیا ، میں نے کہا: آپ اس سرخ اونٹوں والی خاتون کا کتنا تذکرہ کرتے ہیں جبکہ اللہ تعالیٰ نے آپ کو ان کے بدلے میں زیادہ بہتر بیویاں عطا کر دی ہیں ، تو نبی اکرم صلی اللہ علیہ وسلم نے فرمایا : کیا اللہ تعالیٰ نے اس سے زیادہ بہتر مجھے عطا کی ہیں ؟ وہ اس وقت مجھ پر ایمان لائی تھی جب لوگوں نے میرا انکار کیا تھا ، اس نے اس وقت میری تصدیق کی تھی جب لوگوں نے مجھے جھٹلایا تھا ، اس نے اپنے مال کے ذریعے میرا اس وقت ساتھ دیا تھا جب لوگوں نے مجھے محروم رکھنا چاہا تھا اور پھر اللہ تعالیٰ نے مجھے اس کے ذریعے اولاد عطا کی اور دوسرے لوگوں کے ذریعے اولاد عطا نہیں کی ۔
یہ روایت امام أحمد نے نقل کی ہے اور اس کی سند حسن ہے ۔

عبدالرحمن بن ابولیلیٰ بیان کرتے ہیں : سیدنا جبرائیل علیہ السلام نبی اکرم صلی اللہ علیہ وسلم کے ساتھ تھے اسی دوران سیدہ خدیجہ رضی اللہ عنہا آ گئیں تو نبی اکرم صلی اللہ علیہ وسلم نے فرمایا : اے جبرائیل ! یہ خدیجہ ہے ۔ سیدنا جبرائیل علیہ السلام نے کہا: آپ انہیں اللہ تعالیٰ کی طرف سے اور میری طرف سے سلام کہہ دیں ۔
یہ روایت امام طبرانی نے مرسل روایت کے طور پر نقل کی ہے اور اس کے رجال ” صحیح “ کے رجال ہیں ۔

سعید بن کثیر بیان کرتے ہیں : سیدنا جبرائیل علیہ السلام نبی اکرم صلی اللہ علیہ وسلم کے پاس آئے ، نبی اکرم صلی اللہ علیہ وسلم اس وقت حرا میں موجود تھے ، انہوں نے کہا: سیدہ خدیجہ رضی اللہ عنہا حیس ( نامی کھانا ) لے کے آ رہی ہیں جو چمڑے کے برتن میں ہے ، آپ ان سے یہ کہیں کہ اللہ تعالیٰ نے آپ کو سلام کہا: ہے ، جب سیدہ خدیجہ رضی اللہ عنہا آئیں تو نبی اکرم صلی اللہ علیہ وسلم نے ان سے فرمایا : جبرائیل نے مجھے بتایا اور اس حیس ( نامی کھانے ) کے بارے میں بتایا جو تمہارے چمڑے کے برتن میں ہے ، ایسا تمہارے آنے سے پہلے ہوا اور جبرائیل نے یہ بھی بتایا کہ اللہ تعالیٰ نے تمہیں سلام کہا: ہے ، تو سیدہ خدیجہ رضی اللہ عنہا نے کہا: وہ سلامتی عطا کرنے والا ہے اسی سے سلامتی عطا ہوتی ہے ، اور سیدنا جبرائیل کو بھی سلام ہو ۔
یہ روایت امام طبرانی نے نقل کی ہے اس کی سند میں ایک راوی محمد بن حسن بن زبالہ ہے اور وہ ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے سیدہ خدیجہ رضی اللہ عنہا کو جنت کا انگور کھلایا تھا ۔
یہ روایت امام طبرانی نے معجم اوسط میں نقل کی ہے اس کی سند میں ایسا راوی ہے جس سے میں واقف نہیں ہوں ۔