مجمع الزوائد ومنبع الفوائد

لیث بن سعد بیان کرتے ہیں : رجب کے جب چار دن باقی رہ گئے تھے ، تو سیدنا معاویہ رضی اللہ عنہ کا انتقال ہو گیا ، اور ساٹھ ہجری میں یزید خلیفہ بن گیا ۔ اکسٹھ ہجری میں امام حسین بن علی رضی اللہ عنہما اور ان کے ساتھیوں کو شہید کر دیا گیا ۔ یہ محرم کے دس دن گزرنے کے بعد عاشورہ کے دن کی بات ہے ۔ سیدنا عباس بن علی بن ابوطالب رضی اللہ عنہما کو شہید کیا گیا ۔ ان کی والدہ سیدہ ام البنین عامریہ رضی اللہ عنہا ہیں ۔ سیدنا جعفر بن علی بن ابوطالب رضی اللہ عنہما کو شہید کیا گیا ، سیدنا عبداللہ بن علی بن ابوطالب رضی اللہ عنہما کو ، سیدنا عثمان بن علی بن ابوطالب رضی اللہ عنہ کو ، سیدنا ابوبکر بن علی بن ابوطالب رضی اللہ عنہ کو شہید کیا گیا ، ان کی والدہ سیدہ لیلیٰ بنت مسعود نہشلیہ رضی اللہ عنہا ہیں میں ، امام حسین بن علی بن ابوطالب رضی اللہ عنہ کے صاحبزادے علی اکبر کو شہید کیا گیا ، ان کی والدہ لیلیٰ ثقفیہ ہیں ، سیدنا عبداللہ بن حسین رضی اللہ عنہ کو شہید کیا گیا ، ان کی والدہ رباب ہیں جو امرء القیس کی صاحبزادی ہیں ، اور بنو کلب سے تعلق رکھتی ہیں ، ابوبکر بن حسین کو شہید کیا گیا جو ایک اُم ولد کے صاحبزادے تھے ، قاسم بن حسین کو شہید کیا گیا جو ایک اُم ولد کے صاحبزادے تھے ، عون بن عبداللہ بن جعفر بن ابوطالب کو شہید کیا گیا ، محمد بن عبداللہ بن جعفر بن ابوطالب کو شہید کیا گیا ، جعفر بن عقیل بن ابوطالب کو شہید کیا گیا ، مسلم بن عقیل بن ابوطالب کو شہید کیا گیا ، امام حسین کے غلام سلیمان کو شہید کیا گیا اور امام حسین کے دودھ پیتے بچے عبداللہ کو شہید کیا گیا ، جب امام حسین رضی اللہ عنہ کو شہید کیا گیا ، اس وقت ان کی عمر اٹھاون سال تھی ۔
یہ روایت امام طبرانی نے نقل کی ہے اور اس قول کے قائل تک اس روایت کے رجال ” صحیح “ کے رجال ہیں ۔

مندر ثوری بیان کرتے ہیں : جب سیدنا حسین رضی اللہ عنہ اور ان کے ساتھ شہید ہونے والوں کا ہم ذکر کرتے تھے ، تو محمد بن حنفیہ کہتے تھے : ان کے ساتھ سترہ ایسے نوجوان شہید ہوئے تھے جو سب سیدہ فاطمہ رضی اللہ عنہا کی اولاد سے تعلق رکھتے تھے اللہ تعالی سیدہ فاطمہ رضی اللہ عنہا سے اور ان لوگوں سے راضی ہو ۔
یہ روایت امام طبرانی نے دو اسناد کے ساتھ نقل کی ہے ، اور ان دونوں میں سے ایک کے رجال ” صحیح “ کے رجال ہیں ۔

امام محمد باقر رحمہ اللہ بیان کرتے ہیں : جب سیدنا امام حسین بن علی رضی اللہ عنہما کو شہید کیا گیا تو ان کی عمر اٹھاون سال تھی ۔
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں ۔

حسن بصری بیان کرتے ہیں : امام حسین بن علی رضی اللہ عنہما کے ساتھ ان کے اہلِ خانہ میں سے سولہ افراد شہید کیے گئے اور اس وقت اللہ کی قسم ! روئے زمین پر کوئی گھرانہ ایسا نہیں تھا ، جو ان لوگوں کی مانند ہو ۔ سفیان کہتے ہیں : اس میں شک بھی کس کو ہو سکتا ہے ؟

ابوبکر بن ابوشیبہ بیان کرتے ہیں : امام حسین بن علی رضی اللہ عنہما کو عاشورہ کے دن اکسٹھ ہجری میں شہید کیا گیا ، اس وقت ان کی عمر اٹھاون سال تھی انہوں نے مہندی اور کتم خضاب کے طور پر لگایا ہوا تھا ۔
یہ روایت امام طبرانی نے نقل کی ہے ۔

امام جعفر صادق رحمہ اللہ اپنے والد ( امام باقر رحمہ اللہ ) کا یہ بیان نقل کرتے ہیں : جب سیدنا علی رضی اللہ عنہ شہید ہوئے تھے اس وقت ان کی عمر اٹھاون سال تھی اور جب امام حسین رضی اللہ عنہ شہید ہوئے تو اس وقت ان کی عمر بھی اتنی ہی تھی اور جب امام زین العابدین رضی اللہ عنہ کا انتقال ہوا تو اس وقت ان کی عمر بھی اتنی ہی تھی ۔

امام زین العابدین رضی اللہ عنہ بیان کرتے ہیں : جب سیدنا امام حسین بن علی رضی اللہ عنہما کو شہید کر دیا گیا ، تو ان کے ذمہ بہت سا قرض تھا ، تو امام زین العابدین رضی اللہ عنہ نے فلاں فلاں جگہ کو فروخت کر کے وہ قرض ادا کیا ۔
یہ روایت امام طبرانی نے نقل کی ہے ۔ اس کی سند میں ایک راوی نوح بن دراج ہے اور وہ ضعیف ہے ۔

محمد بن حسن مخزومی بیان کرتے ہیں : جب امام حسین بن علی رضی اللہ عنہما کے اہل خانہ کو یزید بن معاویہ کے پاس لایا گیا ، اور ان کا سر اس کے سامنے رکھا گیا ، تو یزید رو پڑا اور اس نے یہ شعر پڑھا : ” ہم اپنے نزدیک چند محبوب لوگوں کی وجہ سے سر کٹوا لیتے ہیں ، حالانکہ وہ لوگ زیادہ نافرمان اور زیادہ ظالم ہوتے ہیں ۔ “ پھر اس نے کہا: اللہ کی قسم ! اگر میں آپ کے سامنے ہوتا تو میں آپ کو کبھی شہید نہ کرتا ، تو امام زین العابدین رضی اللہ عنہ نے کہا: ایسا نہیں ہے ، یزید نے کہا: وہ کیسے ؟ امام زین العابدین رضی اللہ عنہ نے یہ آیت پڑھی : ” زمین میں ، یا تمہارے وجودوں میں جو مصیبت لاحق ہوتی ہے ، تو وہ ایک تحریر میں ہے ، اس سے پہلے کہ ہم اس کو پیدا کریں ، اور یہ ( سب پہلے سے تحریر کر دینا ) اللہ تعالیٰ کے لئے آسان ہے ۔ “ اس وقت وہاں عبدالرحمن بن ام حکم موجود تھے ، تو عبدالرحمن بن ام حکم نے یہ اشعار پڑھے : ” طف “ کے مقام پر موجود سر ، زیادہ قریب کی رشتہ داری رکھتا تھا ، ابن زیاد غلام کی بہ نسبت ، جس کا نسب ہی مشکوک ہے ، سمیہ کی اولاد ، تو کنکریوں کی تعداد میں بے شمار ہو گئی ہے ، لیکن اللہ کے رسول کی صاحبزادی کی نسل ( یعنی ) اولاد زندہ نہیں رہی ۔ “ یزید نے ہاتھ اٹھا کر عبدالرحمن کے سینے پر مارا اور بولا: تم خاموش رہو ۔
یہ روایت امام طبرانی نے نقل کی ہے محمد بن حسن نامی راوی سے مراد محمد بن حسن بن زبالہ ہے اور وہ ضعیف ہے ۔

ابوقبیل بیان کرتے ہیں : جب امام حسین رضی اللہ عنہ کو شہید کیا گیا ، تو لوگوں نے ان کا سر اتار لیا ، وہ لوگ پہلے مرحلے پر بیٹھ کر نبیذ پینے لگے اور امام حسین رضی اللہ عنہ کے سر کے حوالے سے ذکر کرنے لگے ، تو لوہے کا ایک قلم نکل کر ان کے سامنے آیا اور اس نے خون کے ساتھ دیوار پر یہ شعر لکھا : ” وہ امت جس نے حسین کو شہید کیا ہے ، کیا وہ قیامت کے دن ان کے نانا کی شفاعت کی امید رکھے گی ؟ “ تو وہ لوگ بھاگ گئے اور سر کو وہاں چھوڑ دیا پھر وہ لوگ واپس آئے ۔
یہ روایت امام طبرانی نے نقل کی ہے اور اس کی سند میں ایسا راوی ہے جس سے میں واقف نہیں ہوں ۔

بنو سلیمان کے امام اپنے بزرگوں کے حوالے سے یہ بات بیان کرتے ہیں : ہم لوگ روم کی سرزمین پر جنگ میں حصہ لے رہے تھے ۔ ان لوگوں نے ایک گرجے میں رہائش اختیار کی وہاں ایک پتھر پر یہ شعر لکھا ہوا تھا : ” وہ امت جس نے حسین کو شہید کیا ہو ، کیا وہ قیامت کے دن ان کے نانا سے شفاعت کی امید رکھے گی ؟ “ راوی کہتے ہیں : ہم نے ان لوگوں سے دریافت کیا کہ یہ گرجا کب بنا تھا ؟ تو لوگوں نے بتایا : یہ تم لوگوں کے نبی کی بعثت سے تین سو سال کا پہلے کا بنا ہوا ہے ۔
یہ روایت امام طبرانی نے نقل کی ہے اور اس کی سند میں ایسا راوی ہے جس سے میں واقف نہیں ہوں ۔

سیدہ ام سلمہ رضی اللہ عنہا بیان کرتی ہیں : میں نے جنات کو امام حسین بن علی رضی اللہ عنہما پر نوحہ کرتے ہوئے سنا ہے ۔
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں ۔

سیده میمونہ رضی اللہ عنہا بیان کرتی ہیں : میں نے جنات کو امام حسین رضی اللہ عنہ پر نوحہ کرتے ہوئے سنا ہے ۔
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم کے وصال کے بعد میں نے کبھی جنات کا نوحہ نہیں سنا ، ایک رات ایسا ہوا تو مجھے اندازہ ہو گیا کہ میرا بیٹا انتقال کر گیا ہے ۔ سیدہ ام سلمہ رضی اللہ عنہا کی مراد امام حسین رضی اللہ عنہ تھے ، سیدہ ام سلمہ رضی اللہ عنہا نے اپنی کنیز سے کہا: تم جاؤ اور اس بارے میں دریافت کرو ، تو انہیں یہ بات بتائی گئی کہ امام حسین رضی اللہ عنہ کو شہید کر دیا گیا ہے ، وہاں ایک جن نے نوحہ کرتے ہوئے یہ اشعار پڑھے : ” خبردار ! اے آنکھ تم خوب روؤ ! اور میرے بعد شہداء پر کون روئے گا ؟ ان پر جنہیں ایک غلام کی حکومت میں ، تقدیر موت کے منہ میں لے گئی “
یہ روایت امام طبرانی نے نقل کی ہے ۔ اس کی سند میں ایک راوی عمرو بن ثابت بن ہرمز ہے اور وہ ضعیف ہے ۔

ابوجناب کلبی بیان کرتے ہیں : مجھے لوگوں نے یہ بات بتائی ہے کہ جب ہم لوگ نکل کر رات کے وقت امام حسین رضی اللہ عنہ کی قتل گاہ کی طرف گئے ، تو ہم نے جنوں کو ان پر نوحہ کرتے ہوئے سنا وہ یہ کہہ رہے تھے : ” نبی اکرم صلی اللہ علیہ وسلم نے ان کی پیشانی پر ہاتھ پھیرا تھا ، تو ان کے رخساروں میں اس کی چمک موجود تھی ، ان کے والدین قریش کے بڑوں میں سے تھے ، اور ان کے نانا ، سب اجداد سے بہتر تھے ۔ “
یہ روایت امام طبرانی نے نقل کی ہے ۔ اس کی سند میں ایسا راوی ہے ، جس سے میں واقف نہیں ہوں اور ابوجناب نامی راوی مدلس ہے ۔

أحمد بن محمد بن حمید جہمی جو سیدنا ابوجہم بن حذیفہ رضی اللہ عنہ کی اولاد میں سے ہیں ، انہوں نے امام حسین رضی اللہ عنہ کی شہادت کے بارے میں یہ اشعار کہے ، اور یہ بتایا : یہ اشعار سیدہ زینب بنت عقیل بن ابوطالب رضی اللہ عنہما کے ہیں : ” اس وقت تم لوگ کیا کہو گے جب نبی اکرم صلی اللہ علیہ وسلم نے تم لوگوں سے پوچھ لیا : تم آخری امت ہو ، تو تم نے میری عترت ، میرے انصار اور میری ذریت کے ساتھ کیا کیا ؟ ان میں سے کچھ کو قیدی بنا لیا گیا اور کچھ قتل ہو کر خون میں لت پت ہو گئے ، میں نے تمہاری جو خیرخواہی کی تھی کیا اس کا یہی بدلہ ہے کہ تم میرے بعد میرے رشتہ داروں کے ساتھ اس طرح کا سلوک کرو ۔ “ تو ابواسود دؤیلی نے کہا: ہم یہ کہتے ہیں ( ارشاد باری تعالیٰ ہے : ) ” اے ہمارے پروردگار ! ہم نے اپنے اوپر ظلم کیا ، اگر تو نے ہماری مغفرت نہ کی اور ہم پر رحم نہ کیا ، تو ہم خسارہ پانے والوں میں سے ہو جائیں گے ۔ “
یہ روایت امام طبرانی نے منقطع سند کے ساتھ نقل کی ہے ۔

انہوں نے اسے ایک اور سند کے ساتھ نقل کیا ہے ، جو زیادہ عمدہ ہے ، اور اس میں یہ الفاظ زائد ہیں کہ ابواسود دؤیلی نے کہا: ” میں یہ کہتا ہوں ، جبکہ میرا غصہ اور فریاد زیادہ ہو گئے ہیں کہ اللہ تعالیٰ زیاد کی اولاد کی حکومت کو ختم کر دے ، اور جس طرح انہوں نے عہد شکنی کی اور خیانت کی تو انہیں یوں برباد کر دے جس طرح قوم ثمود اور قوم عاد برباد ہو گئی تھیں ، اور ان کی سواریاں ، جب وہ ٹھہر جائیں ، تو قیامت کے دن تک ان کی طرف واپس نہ آئیں ۔ “

سلیمان بن ہیثم بیان کرتے ہیں : امام زین العابدین رضی اللہ عنہ بیت اللہ کا طواف کر رہے تھے جب انہوں نے حجر اسود کا استلام کرنے کا ارادہ کیا ، تو لوگوں نے ان کے لئے جگہ بنا دی ۔ فرزدق نامی شاعر یہ منظر دیکھ رہا تھا کسی شخص نے کہا: اے ابوفراس ! یہ کون صاحب ہیں ؟ تو فرزدق نے یہ اشعار کہے : ” یہ وہ ہیں جن کی چاپ کو بطحاء کی وادی پہچانتی ہے ، بیت اللہ ، حل اور حرم ( کے علاقے ) انہیں پہچانتے ہیں ، یہ اللہ تعالیٰ کے تمام بندوں سے زیادہ بہتر ہستی کے صاحبزادے ہیں ، یہ پرہیزگار ہیں ، صاف ستھرے ہیں ، پاک ہیں ، نمایاں ہیں ، ممکن ہے کہ ان کے استلام کرنے کے وقت ، ان کی ہتھیلی کو پہچان کر ، حطیم کا کونہ ان کو تھام لے ، قریش نے جب ان کو دیکھا تو ان میں سے کسی کہنے والے نے کہا: ان کی کرم نوازی پر آ کر ، کرم ختم ہو جاتا ہے ، یہ حیا کی وجہ سے نگاہیں جھکا کر رکھتے ہیں اور ان کی ہیبت کی وجہ سے دوسروں کی نگاہیں ( ان کے آگے ) جھکی رہتی ہیں ، تو ان کے ساتھ کلام صرف اس وقت کیا جاتا ہے ، جب یہ مسکرا دیتے ہیں ، ان کے ہاتھ میں خیزران ( نامی درخت کی چھڑی ) ہے ، ان کی خوشبو بہترین ہے اور ان کی ہتھیلی کی خوشبو ہر طرف پھیلتی ہے ، انہوں نے نبی اکرم صلی اللہ علیہ وسلم سے اوصاف حاصل کیے ہیں ، ان کے عناصر اور ان کی خوبو پاکیزہ ہے ، کوئی تیز رفتار ، ان کے مقام تک نہیں پہنچ سکتا ، اور کوئی بھی قوم ، خواہ وہ کتنی ہی معزز کیوں نہ ہو ، ان کے قریب نہیں پہنچ سکتی ، کون سا خاندان ایسا ہے ، جس کی گردن میں ان کی اولیت اور ان کے احسان کا پٹہ نہ ہو ۔ “
یہ روایت امام طبرانی نے نقل کی ہے اور اس کی سند میں ایسا راوی ہے جس سے میں واقف نہیں ہوں ۔

سفیان بیان کرتے ہیں : میں نے عبیداللہ بن ابویزید سے دریافت کیا ، تم نے امام حسین رضی اللہ عنہ کی زیارت کی ہے ؟ اس نے بتایا : ان کے سر اور داڑھی کے بال سیاہ تھے صرف یہاں پر داڑھی کے آگے والی طرف کچھ بال سفید تھے ، مجھے نہیں معلوم کہ انہوں نے نبی اکرم صلی اللہ علیہ وسلم کے ساتھ مشابہت اختیار کرتے ہوئے اس جگہ پر خضاب لگایا تھا یا اس کے علاوہ ان کا کوئی اور بال سفید ہی نہیں ہوا تھا ۔ انہوں نے یہ بات بتائی کہ میں نے سیدنا امام حسن رضی اللہ عنہ کو دیکھا نماز کھڑی ہو گئی ، تو وہ امام اور کچھ لوگوں کے درمیان کھڑے ہوئے ان سے کہا: گیا آپ بیٹھ جائیں تو انہوں نے کہا: نماز کھڑی ہو چکی ہے ۔
یہ روایت امام ابویعلیٰ نے نقل کی ہے اور اس کے رجال ” صحیح “ کے رجال ہیں ۔

مصعب بن عبداللہ بیان کرتے ہیں : امام حسین رضی اللہ عنہ نے پیدل پچیس حج کیے تھے ۔
یہ روایت امام طبرانی نے منقطع سند کے ساتھ نقل کی ہے ۔

یزید بن ابوزیاد بیان کرتے ہیں : نبی اکرم صلی اللہ علیہ وسلم سیدہ عائشہ رضی اللہ عنہا کے گھر سے باہر آئے آپ سیدہ فاطمہ رضی اللہ عنہا کے گھر کے پاس سے گزرے آپ نے سیدنا امام حسین رضی اللہ عنہ کو روتے ہوئے سنا تو فرمایا : کیا تم یہ بات نہیں جانتی ہو کہ اس کا رونا مجھے تکلیف دیتا ہے ؟
یہ روایت امام طبرانی نے نقل کی ہے اور اس کی سند منقطع ہے ۔ اس سے پہلے سیدنا ابوامامہ رضی اللہ عنہ کے حوالے سے منقول ایک طویل حدیث گزر چکی ہے ، جس میں انہیں رلانے کی ممانعت کا ذکر ہے ، جس میں امام حسین رضی اللہ عنہ کی شہادت کی اطلاع کا ذکر ہے اور بیعت سے متعلق باب میں ، ان کی بیعت سے متعلق روایت گزر چکی ہے ۔