مجمع الزوائد ومنبع الفوائد

#N/A

محمد بن ضحاک بن عثمان حزامی بیان کرتے ہیں : سیدنا حسین رضی اللہ عنہ کا جسم نبی اکرم صلی اللہ علیہ وسلم کے جسم سے مشابہت رکھتا تھا ۔
یہ روایت امام طبرانی نے نقل کی ہے اور اس کے رجال ثقہ ہیں ۔ اس سے پہلے اس نوعیت کی احادیث گزر چکی ہے ۔

امام جعفر صادق رحمہ اللہ اپنے والد کا یہ بیان نقل کرتے ہیں : ” سیدنا حسن رضی اللہ عنہ اور سیدنا حسین رضی اللہ عنہ کے درمیان صرف ایک طہر کا فرق ہے ۔ “
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ، البتہ امام باقر رحمہ اللہ نے اس واقعہ کا زمانہ نہیں پایا ہے ۔

سیدنا علی بن ابوطالب رضی اللہ عنہ روایت کرتے ہیں : نبی اکرم صلی اللہ علیہ وسلم نے حسین بن علی رضی اللہ عنہما کے بارے میں فرمایا : ” جو شخص اس سے محبت رکھے گا ، وہ مجھ سے محبت رکھے گا ۔ “
یہ روایت امام طبرانی نے نقل کی ہے ۔ اس کی سند میں ایک راوی حارث اعور ہے اور وہ ضعیف ہے ۔

سیدنا ابوہریرہ رضی اللہ عنہ بیان کرتے ہیں : سیدنا امام حسین بن علی رضی اللہ عنہما ، نبی اکرم صلی اللہ علیہ وسلم کے پاس موجود تھے ، ان سے نبی اکرم صلی اللہ علیہ وسلم شدید محبت کرتے تھے ، انہوں نے دریافت کیا : کیا میں اپنی والدہ کے پاس چلا جاؤں ؟ ( راوی کہتے ہیں : ) میں نے عرض کی : میں ان کے ساتھ چلا جاتا ہوں ، راوی کہتے ہیں : تو اسی دوران آسمان سے ایک روشنی آئی اور وہ اس کی روشنی میں چلتے ہوئے اپنی منزل تک پہنچ گئے ۔
یہ روایت امام طبرانی نے نقل کی ہے ۔ اس کی سند میں ایک راوی موسیٰ بن عثمان ہے اور وہ متروک ہے ۔

سیدنا ابوسعید خدری رضی اللہ عنہ بیان کرتے ہیں : سیدنا امام حسین رضی اللہ عنہ دوڑتے ہوئے آئے ، نبی اکرم صلی اللہ علیہ وسلم اس وقت نماز ادا کر رہے تھے ۔ انہوں نے نبی اکرم صلی اللہ علیہ وسلم کی گردن پکڑ لی ، نبی اکرم صلی اللہ علیہ وسلم کھڑے ہوئے ، آپ نے ان کا ہاتھ پکڑا اور آپ نے مسلسل انہیں پکڑے رکھا ، یہاں تک کہ آپ رکوع میں چلے گئے ۔
یہ روایت امام طبرانی نے نقل کی ہے ، اور اس کے رجال سے استدلال کرنے کے بارے میں اختلاف پایا جاتا ہے ۔

سیدنا عبداللہ بن عباس رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو دیکھا کہ آپ نے سیدنا حسین رضی اللہ عنہ کے دونوں زانوں کو کھولا اور ان کے زبیبہ کو بوسہ دیا ۔
یہ روایت امام طبرانی نے نقل کی ہے اور اس کی سند حسن ہے ۔

رجاء بن ربیعہ بیان کرتے ہیں : میں مسجد نبوی میں موجود تھا ، اسی دوران سیدنا امام حسین بن علی رضی اللہ عنہما وہاں سے گزرے ، انہوں نے سلام کیا ، حاضرین نے انہیں سلام کا جواب دیا ، سیدنا عبداللہ بن عمرو رضی اللہ عنہ خاموش رہے ، پھر سیدنا عبداللہ بن عمرو رضی اللہ عنہ نے لوگوں کے خاموش ہونے کے بعد آواز بلند کی اور بولے : آپ پر بھی سلام ہو ، اللہ کی رحمتیں اور اس کی برکتیں نازل ہوں ، پھر وہ حاضرین کی طرف متوجہ ہوئے اور بولے : کیا میں تمہیں یہ بات نہ بتاؤں کہ اہل آسمان کے نزدیک اہل زمین میں سے سب سے زیادہ محبوب کون ہے ؟ لوگوں نے کہا: جی ہاں ، تو انہوں نے فرمایا : یہ والے صاحب جو ابھی چلے گئے ہیں ، اللہ کی قسم ! جنگ صفین کے بعد سے لے کر ابھی تک میں نے ان کے ساتھ کوئی بات نہیں کی اور انہوں نے میرے ساتھ کوئی بات نہیں کی اور اللہ کی قسم ! اگر یہ مجھ سے راضی ہو جائیں تو یہ میرے نزدیک اس سے زیادہ محبوب ہو گا کہ مجھے احد پہاڑ جتنی دولت مل جائے ، سیدنا ابوسعید خدری رضی اللہ عنہ نے کہا: کیا آپ ان کی طرف چلیں گے ، انہوں نے کہا: ٹھیک ہے ، پھر انہوں نے یہ طے کیا کہ اگلے دن وہ سیدنا امام حسین رضی اللہ عنہ کے پاس جائیں گے ، راوی کہتے ہیں : ان دونوں صاحبان کے ساتھ میں بھی گیا ، سیدنا ابوسعید خدری رضی اللہ عنہ نے اندر آنے کی اجازت مانگی ، سیدنا حسین رضی اللہ عنہ نے انہیں اجازت دے دی ، ہم لوگ اندر داخل ہوئے ، سیدنا عبداللہ بن عمرو رضی اللہ عنہ اندر داخل نہیں ہوئے وہ باہر ہی رہے ، یہاں تک کہ سیدنا امام حسین رضی اللہ عنہ نے انہیں بھی اجازت دی تو وہ اندر آئے ، جب سیدنا حسین رضی اللہ عنہ نے انہیں دیکھا تو ان کے لئے جگہ کی اور وہ سیدنا حسین رضی اللہ عنہ کے پہلو میں آ کے بیٹھ گئے ، سیدنا حسین رضی اللہ عنہ نے ان کی طرف نگاہ کی ، سیدنا عبداللہ بن عمرو رضی اللہ عنہ کھڑے ہوئے تھے وہ بیٹھے نہیں تھے ، جب انہوں نے دیکھا تو سیدنا ابوسعید خدری رضی اللہ عنہ نے ہٹ کے ان کے لئے جگہ بنائی اور وہ ان دونوں کے درمیان بیٹھ گئے ۔ سیدنا ابوسعید رضی اللہ عنہ نے پورا واقعہ بیان کیا ، تو سیدنا حسین رضی اللہ عنہ نے دریافت کیا : اے ابن عمرو ! کیا اسی طرح ہے ؟ کیا آپ یہ بات جانتے ہیں کہ میں اہل آسمان کے نزدیک اہل زمین میں سب سے زیادہ محبوب ہوں ؟ سیدنا عبداللہ رضی اللہ عنہ نے جواب دیا : جی ہاں ! رب کعبہ کی قسم ! آپ اہل آسمان کے نزدیک اہل زمین میں سے سب سے زیادہ محبوب ہیں ، سیدنا حسین رضی اللہ عنہ نے دریافت کیا : پھر آپ نے جنگ صفین کے موقع پر میرے والد کے ساتھ جنگ کیوں کی تھی ، اللہ کی قسم ! میرے والد مجھ سے بہتر ہیں ؟ سیدنا عبداللہ رضی اللہ عنہ نے جواب دیا : جی ہاں لیکن سیدنا عمرو رضی اللہ عنہ نے ایک مرتبہ میری شکایت نبی اکرم صلی اللہ علیہ وسلم سے کی اور یہ کہا: عبداللہ دن کے وقت روزہ رکھ لیتا ہے اور رات کو نفل پڑھتا رہتا ہے ، تو نبی اکرم صلی اللہ علیہ وسلم نے فرمایا : تم رات کے وقت نفل پڑھ بھی لیا کرو اور سو بھی جایا کرو ، نفلی روزہ رکھا بھی کرو اور چھوڑ بھی دیا کرو ، اور عمرو کی بات ماننا ۔ جب جنگ صفین کا موقع آیا تو سیدنا عمرو رضی اللہ عنہ نے مجھے قسم دی اللہ کی قسم ! میں نے ان لوگوں کی تعداد میں اضافہ نہیں کیا اور نہ ہی میں نے ان لوگوں کے لئے تلوار کو سونتا ، نہ ہی ان کی خاطر نیزے کے ذریعے حملہ کیا ، نہ ان کی خاطر کوئی تیر پھینکا ، تو سیدنا امام حسین رضی اللہ عنہ نے ان سے کہا: کیا آپ یہ بات نہیں جانتے کہ خالق کی معصیت میں مخلوق کی اطاعت نہیں کی جاتی ، سیدنا عبداللہ رضی اللہ عنہ نے جواب دیا : جی ہاں ! راوی کہتے ہیں : گویا انہوں نے سیدنا حسین رضی اللہ عنہ کی اس بات کو قبول کیا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی علی بن سعید بن بشیر ہے اور اس میں کمزوری پائی جاتی ہے اور وہ حافظ ہے اس روایت کے بقیہ رجال ثقہ ہیں ۔ اس سے پہلے سیدنا امام حسن رضی اللہ عنہ کے حالات میں امام بزار کی نقل کردہ روایت گزر چکی ہے باقی اللہ بہتر جانتا ہے ۔

سیدنا جابر رضی اللہ عنہ فرماتے ہیں : ” جو شخص یہ چاہتا ہو کہ وہ اہل جنت سے تعلق رکھنے والے کسی شخص کو دیکھے تو وہ سیدنا امام حسین بن علی رضی اللہ عنہما کو دیکھ لے ۔ “ ( سیدنا جابر رضی اللہ عنہ نے فرمایا : ) کیونکہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے ۔
یہ روایت امام ابویعلیٰ نے نقل کی ہے ۔ اس کے رجال ” صحیح “ کے رجال ہیں صرف ربیع بن سعد کا معاملہ مختلف ہے اور ایک قول کے مطابق یہ ربیع بن سعید ہے اور وہ ثقہ ہے ۔

سیدنا انس بن مالک رضی اللہ عنہ بیان کرتے ہیں : بارش کے فرشتے نے اپنے پروردگار سے یہ اجازت مانگی کہ وہ نبی اکرم صلی اللہ علیہ وسلم کی خدمت میں آئے ، تو پروردگار نے اسے اجازت دے دی ، نبی اکرم صلی اللہ علیہ وسلم نے سیدہ ام سلمہ رضی اللہ عنہا سے فرمایا : تم دروازے کا دھیان رکھنا ، کوئی ہمارے پاس نہ آئے ، راوی کہتے ہیں : اسی دوران سیدنا حسین بن علی رضی اللہ عنہما آئے انہوں نے اندر آنے کی کوشش کی ، سیدہ ام سلمہ رضی اللہ عنہا نے انہیں روکا ، لیکن وہ اچھل کر اندر آ گئے اور آ کر نبی اکرم صلی اللہ علیہ وسلم کی پشت اور کندھوں اور گردن پر بیٹھنے لگے ، راوی کہتے ہیں : اس فرشتے نے نبی اکرم صلی اللہ علیہ وسلم سے دریافت کیا : آپ اس سے محبت رکھتے ہیں ؟ نبی اکرم صلی اللہ علیہ وسلم نے جواب دیا : جی ہاں ! اس فرشتے نے کہا: لیکن آپ کی امت اسے شہید کر دے گی ، اگر آپ چاہیں ، تو میں آپ کو وہ جگہ دکھا دیتا ہوں جہاں اسے شہید کیا جائے گا ، پھر اس فرشتے نے اپنا ہاتھ بڑھایا اور سرخ رنگ کی مٹی لے آیا ( راوی کہتے ہیں : ) سیدہ ام سلمہ رضی اللہ عنہا نے وہ مٹی لے لی تھی اور اسے اپنی تھیلی میں باندھ لیا تھا ۔ ثابت نامی راوی کہتے ہیں : ہم تک
یہ روایت پہنچی ہے کہ وہ مٹی کربلا کی تھی ۔
یہ روایت امام أحمد ، امام ابویعلیٰ امام بزار اور امام طبرانی نے مختلف اسانید کے ساتھ نقل کی ہے ۔ اس کی سند میں ایک راوی عمارہ بن زاذان ہے ، جسے ایک جماعت نے ثقہ قرار دیا ہے اس میں ضعف پایا جاتا ہے ، ابویعلیٰ کے رجال ” صحیح “ کے رجال ہیں ۔

نجی حضرمی بیان کرتے ہیں : وہ سیدنا علی رضی اللہ عنہ کے ساتھ چلتے ہوئے جا رہے تھے وہ سیدنا علی رضی اللہ عنہ کے طہارت کے پانی کے نگران تھے جب یہ لوگ نینوا کے مقام پر پہنچے یہ لوگ اس وقت صفین کی طرف جا رہے تھے ، تو سیدنا علی رضی اللہ عنہ نے بلند آواز میں کہا: اے ابوعبداللہ صبر سے کام لینا ، اے ابوعبداللہ صبر سے کام لینا ، یہ دریائے فرات کی بات ہے ، میں نے دریافت کیا : اس کی کیا وجہ ہے ؟ سیدنا علی رضی اللہ عنہ کی خدمت میں حاضر ہوا تو آپ کی آنکھوں سے آنسو جاری تھے ، میں نے عرض کی : اے اللہ کے نبی ! کیا کسی نے آپ کو غصہ دلایا ہے ، کیا وجہ ہے کہ آپ کی آنکھوں سے آنسو جاری ہیں ؟ نبی اکرم صلی اللہ علیہ وسلم نے فرمایا : ابھی جبرائیل میرے پاس سے اٹھ کے گیا ہے اس نے مجھے یہ بتایا ہے کہ حسین کو فرات کے کنارے پر قتل کر دیا جائے گا ، اس نے کہا: کیا آپ اس بات میں دلچسپی رکھتے ہیں کہ میں آپ کو وہاں کی مٹی سونگھاؤں ، میں نے جواب دیا : جی ہاں ! تو اس فرشتے نے ہاتھ بڑھایا اور مٹھی بھر مٹی لی اور وہ مجھے دے دی تو مجھے اپنی آنکھوں پر ق ابونہیں رہا اور وہ بہنے لگیں ۔
یہ روایت امام أحمد نے اور امام ابویعلیٰ نے اور امام بزار نے اور امام طبرانی نے نقل کی ہے اور اس کے رجال ثقہ ہیں ، نجی نامی راوی اس روایت کو نقل کرنے میں منفرد نہیں ہے ۔

سیدہ عائشہ صدیقہ رضی اللہ عنہا یا شاید سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ان سے فرمایا : ” آج میرے پاس ایک ایسا فرشتہ آیا جو اس سے پہلے کبھی میرے پاس نہیں آیا ، اس نے بتایا : آپ کے اس بیٹے حسین کو قتل کر دیا جائے گا اگر آپ چاہیں تو میں آپ کو اس سرزمین کی مٹی دکھا سکتا ہوں جہاں اسے قتل کیا جائے گا ۔ “ نبی اکرم صلی اللہ علیہ وسلم نے فرمایا : پھر اس فرشتے نے سرخ مٹی لا کے دی ۔
یہ روایت امام أحمد نے نقل کی ہے اور اس کے رجال ” صحیح “ کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : سیدنا امام حسین بن علی رضی اللہ عنہما ( جو اس وقت بچے تھے ) وہ نبی اکرم صلی اللہ علیہ وسلم کے پاس آئے ، نبی اکرم صلی اللہ علیہ وسلم پر اس وقت وحی نازل ہو رہی تھی وہ نبی اکرم صلی اللہ علیہ وسلم پر چڑھ گئے ، نبی اکرم صلی اللہ علیہ وسلم نے سر جھکایا ہوا تھا اور وہ نبی اکرم صلی اللہ علیہ وسلم کی پشت پر چڑھ گئے ، سیدنا جبرائیل نے نبی اکرم صلی اللہ علیہ وسلم سے دریافت کیا : اے سیدنا محمد ( صلی اللہ علیہ وسلم ) ! کیا آپ اس سے محبت رکھتے ہیں ؟ نبی اکرم صلی اللہ علیہ وسلم نے فرمایا : اے جبرائیل میں اپنے بیٹے سے کیوں نہ محبت رکھوں ؟ سیدنا جبرائیل نے بتایا : آپ کے بعد آپ کی امت عنقریب اسے شہید کر دے گی پھر سیدنا جبرائیل نے اپنا ہاتھ بڑھایا اور سفید رنگ کی مٹی لے کے آنے ، انہوں نے بتایا : اس سرزمین پر آپ کے بیٹے کو شہید کیا جائے گا ، اور اس جگہ کا نام طف ہے ، جب سیدنا جبرائیل نبی اکرم صلی اللہ علیہ وسلم کے پاس سے چلے گئے ، تو نبی اکرم صلی اللہ علیہ وسلم باہر تشریف لائے آپ نے سیدنا امام حسین رضی اللہ عنہ کو گود میں اٹھا کر ساتھ لپٹایا ہوا تھا اور رو رہے تھے ، آپ نے فرمایا : ” اے عائشہ ! جبرائیل نے مجھے بتایا ہے کہ میرے بیٹے حسین کو طف کی سرزمین پر قتل کر دیا جائے گا ، اور میرے بعد میری امت آزمائش کا شکار ہو جائے گی ۔ “ پھر نبی اکرم صلی اللہ علیہ وسلم اپنے اصحاب کے پاس تشریف لے گئے جن میں سیدنا علی رضی اللہ عنہ سیدنا ابوبکر ، سیدنا عمر ، سیدنا حذیفہ ، سیدنا عمار ، سیدنا ابوذر غفاری رضی اللہ عنہم موجود تھے ، نبی اکرم صلی اللہ علیہ وسلم رو رہے تھے ، لوگوں نے عرض کی : یا رسول اللہ ! آپ کس وجہ سے رو رہے ہیں ؟ نبی اکرم صلی اللہ علیہ وسلم نے فرمایا : جبرائیل نے مجھے بتایا ہے کہ میرے بیٹے حسین کو میرے بعد طف کی سرزمین پر قتل کر دیا جائے گا ، وہ میرے پاس یہ مٹی لے کے آئے تھے ۔ انہوں نے بتایا : اس جگہ پر اس کی شہادت ہو گی ۔
یہ روایت امام طبرانی نے معجم کبیر میں نقل کی ہے اور معجم اوسط میں بہت زیادہ اختصار کے ساتھ نقل کی ہے ۔ اس کے آغاز میں یہ الفاظ ہیں : ” نبی اکرم صلی اللہ علیہ وسلم نے سیدنا حسین رضی اللہ عنہ کو اپنی زانوں پر بٹھایا ہوا تھا اسی دوران سیدنا جبرائیل آپ کے پاس آئے ۔ ۔ ۔ ۔ ۔ ۔ ۔ “ ۔ معجم کبیر کی سند میں ایک راوی ابن لہیعہ ہے اور معجم اوسط کی سند میں ایسے راوی ہیں جن سے میں واقف نہیں ہوں ۔

سیده زینب بنت جحش رضی اللہ عنہا بیان کرتی ہیں : نبی اکرم صلی اللہ علیہ وسلم ان کے ہاں سوئے ہوئے تھے اور سیدنا حسین رضی اللہ عنہ گھر میں گھٹنوں کے بل چل رہے تھے میں ان سے غافل ہوئی ، تو وہ گھٹنوں کے بل چلتے ہوئے نبی اکرم صلی اللہ علیہ وسلم کے پاس آئے آپ کے پیٹ پر چڑھ گئے اور انہوں نے نبی اکرم صلی اللہ علیہ وسلم کے پیٹ پر پیشاب کر دیا ، نبی اکرم صلی اللہ علیہ وسلم بیدار ہو گئے ، میں اٹھ کر آپ کے پاس آئی اور انہیں : نبی اکرم صلی اللہ علیہ وسلم کے پیٹ سے ہٹایا تو نبی اکرم صلی اللہ علیہ وسلم نے فرمایا : میرے بیٹے کو رہنے دو ، جب انہوں نے پیشاب مکمل کر لیا تو نبی اکرم صلی اللہ علیہ وسلم نے پانی کا برتن لے کے اس پر چھڑک دیا ، آپ نے فرمایا : لڑکے کے پیشاب پر پانی چھڑک دیا جائے گا اور لڑکی کے پیشاب کو دھویا جائے گا ۔ “ سیدہ زینب رضی اللہ عنہا بیان کرتی ہیں : پھر نبی اکرم صلی اللہ علیہ وسلم کھڑے ہو کر نماز ادا کرنے لگے ، آپ نے انہیں اٹھایا ہوا تھا جب آپ رکوع یا سجدے میں جاتے تھے تو انہیں زمین پر کھڑا کر دیتے تھے ، جب اٹھتے تھے تو پھر اٹھا لیتے تھے ، جب آپ تشریف فرما ہوئے تو آپ نے دونوں ہاتھ بلند کر کے دعا کرنا شروع کی جب آپ نے نماز مکمل کر لی تو میں نے عرض کی : یا رسول اللہ ! میں نے آج آپ کو ایسا کام کرتے ہوئے دیکھا ہے ، جو میں نے آپ کو پہلے کرتے ہوئے نہیں دیکھا ، تو نبی اکرم صلی اللہ علیہ وسلم نے فرمایا : ” جبرائیل میرے پاس آیا تھا اور اس نے مجھے یہ بتایا ہے کہ میرے بیٹے کو قتل کر دیا جائے گا ، میں نے کہا: تم مجھے وہ جگہ دکھاؤ ! تو وہ میرے پاس سرخ مٹی لے کے آیا ۔ “
یہ روایت امام طبرانی نے دو اسناد کے ساتھ نقل کی ہے ، اور ان دونوں کی سند میں ایسا راوی ہے ، جس سے میں واقف نہیں ہوں ۔

سیدہ ام سلمہ رضی اللہ عنہا بیان کرتی ہیں : ایک مرتبہ نبی اکرم صلی اللہ علیہ وسلم میرے گھر میں تشریف فرما تھے ، آپ نے فرمایا : کوئی میرے پاس نہ آنے پائے ، سیدہ ام سلمہ رضی اللہ عنہا کہتی ہیں میں انتظار کرتی رہی ، اسی دوران سیدنا حسین رضی اللہ عنہ آ گئے ، میں نے نبی اکرم صلی اللہ علیہ وسلم کے رونے کی آواز سنی ، میں نے جھانک کے دیکھا تو سیدنا حسین رضی اللہ عنہ آپ کی گود میں تھے اور نبی اکرم صلی اللہ علیہ وسلم کی پیشانی پر ہاتھ پھیر رہے تھے اور رو رہے تھے ، میں نے کہا: اللہ کی قسم ! ان کے آنے کا مجھے پتہ نہیں چلا ، پھر نبی اکرم صلی اللہ علیہ وسلم نے بتایا جبرائیل ہمارے ساتھ گھر میں موجود تھے اس نے دریافت کیا : کیا آپ ان سے محبت کرتے ہیں ، میں نے جواب دیا : جہاں تک دنیا کا تعلق ہے تو جی ہاں ! تو جبرائیل نے بتایا : آپ کی امت اسے ایسی سرزمین پر قتل کر دے گی ، جس کا نام کربلا ہے ، پھر جبرائیل نے وہاں کی مٹی لی اور وہ نبی اکرم صلی اللہ علیہ وسلم کو دکھائی ، جب سیدنا حسین رضی اللہ عنہ کو اس جگہ پر گھیر لیا گیا جہاں وہ شہید ہوئے تھے ، تو انہوں نے دریافت کیا : اس جگہ نام کیا ہے ، لوگوں نے بتایا کربلا ، تو انہوں نے فرمایا : اللہ اور اس کے رسول نے سچ فرمایا ہے ، یہ کرب اور بلا کی جگہ ہے ۔

ایک روایت میں یہ الفاظ ہیں : نبی اکرم صلی اللہ علیہ وسلم نے سچ فرمایا ہے یہ کرب و بلا کی جگہ ہے ۔
یہ روایت امام طبرانی نے مختلف اسانید کے ساتھ نقل کی ہے جن میں سے ایک کے رجال ثقہ ہیں ۔

سیدہ ام سلمہ رضی اللہ عنہا بیان کرتی ہیں : سیدنا حسن رضی اللہ عنہ اور سیدنا حسین رضی اللہ عنہ نبی اکرم صلی اللہ علیہ وسلم کے سامنے میرے گھر میں کھیل رہے تھے اسی دوران سیدنا جبرائیل نازل ہوئے ، انہوں نے بتایا : اے سیدنا محمد صلی اللہ علیہ وسلم آپ کی امت آپ کے بعد آپ کے اس بیٹے کو قتل کر دے گی ، انہوں نے حسین کی طرف اشارہ کر کے یہ بات کہی تو نبی اکرم صلی اللہ علیہ وسلم رونے لگے ، آپ نے انہیں اپنے سینے کے ساتھ چمٹا لیا ، پھر نبی اکرم صلی اللہ علیہ وسلم نے ارشاد فرمایا : ” اے ام سلمہ یہ منی تمہارے پاس ودیعت کے طور پر رہے گی ۔ “ نبی اکرم صلی اللہ علیہ وسلم نے اس کو سونگھا تھا اور فرمایا تھا : بربادی اور کرب اور بلا ہے ۔ “ سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے فرمایا : جب یہ مٹی خون میں تبدیل ہو جائے تو تم یہ بات جان لینا کہ میرے بیٹے کو قتل کر دیا گیا ہے ۔ راوی بیان کرتے ہیں : سیدہ ام سلمہ رضی اللہ عنہا نے وہ مٹی ایک شیشی میں رکھ لی تھی اور وہ روزانہ اس کا جائزہ لیا کرتی تھیں اور یہ فرماتی تھیں : جس دن تم خون میں تبدیل ہو گئی وہ بڑا دن ہو گا ۔
یہ روایت امام طبرانی نے نقل کی ہے ۔ اس کی سند میں ایک راوی عمرو بن ثابت نکری ہے اور وہ متروک ہے ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم نے اپنی ازواج سے فرمایا : اس بچے کو رونے نہ دینا ۔ نبی اکرم صلی اللہ علیہ وسلم کی مراد سیدنا حسین رضی اللہ عنہ تھے ۔ راوی کہتے ہیں : یہ سیدہ ام سلمہ رضی اللہ عنہا کی مخصوص باری کا وقت تھا ۔ سیدنا جبرائیل علیہ السلام نازل ہوئے ، نبی اکرم صلی اللہ علیہ وسلم اندر داخل ہوئے اور آپ نے سیدہ ام سلمہ رضی اللہ عنہا سے فرمایا : تم کسی کو میرے پاس اندر نہ آنے دینا ، اسی دوران حسین رضی اللہ عنہ آ گئے ، جب انہوں نے گھر میں نبی اکرم صلی اللہ علیہ وسلم کو دیکھا ، تو اندر داخل ہونے کا ارادہ کیا ۔ سیدہ ام سلمہ رضی اللہ عنہا نے انہیں پکڑ لیا اور گود میں اٹھا لیا وہ انہیں چپ کروانے لگیں ، لیکن جب ان کا رونا زیادہ ہو گیا تو سیدہ ام سلمہ رضی اللہ عنہا نے انہیں چھوڑ دیا ، وہ اندر داخل ہوئے اور نبی اکرم صلی اللہ علیہ وسلم کی گود میں جا کے بیٹھ گئے ، سیدنا جبرائیل علیہ السلام نے نبی اکرم صلی اللہ علیہ وسلم سے کہا: آپ کی امت آپ کے اس بیٹے کو قتل کر دے گی ، نبی اکرم صلی اللہ علیہ وسلم نے دریافت کیا : کیا وہ لوگ مجھ پر ایمان رکھنے کے باوجود اسے قتل کر دیں گے ؟ سیدنا جبرائیل علیہ السلام نے جواب دیا : جی ہاں وہ لوگ اسے قتل کر دیں گے ، پھر سیدنا جبرائیل علیہ السلام نے مٹی لی اور بتایا : فلاں فلاں جگہ پر ایسا ہو گا ۔ نبی اکرم صلی اللہ علیہ وسلم باہر تشریف لائے تو آپ نے سیدنا حسین رضی اللہ عنہ کو گود میں اٹھایا ہوا تھا اور آپ پریشان تھے ، سیدہ ام سلمہ رضی اللہ عنہا سمجھیں کہ شاید وہ بچے کے اپنے پاس آنے کی وجہ سے غصے میں ہیں ، تو انہوں نے عرض کی : اے اللہ کے نبی ! میں آپ پر فدا ہو جاؤں ، آپ نے ہم سے یہ کہا: تھا کہ تم اس بچے کو رونے نہ دینا ، اور پھر آپ نے مجھے یہ بھی حکم دیا تھا کہ میں کسی کو آپ کے پاس نہ آنے دوں ، یہ آیا تو میں نے اسے چھوڑ دیا ، نبی اکرم صلی اللہ علیہ وسلم نے سیدہ ام سلمہ رضی اللہ عنہا کو کوئی جواب نہیں دیا ، آپ اپنے اصحاب کے پاس تشریف لے گئے ، وہ لوگ بیٹھے ہوئے تھے ، نبی اکرم صلی اللہ علیہ وسلم نے فرمایا : میری امت اس کو قتل کر دے گی ، حاضرین میں سیدنا ابوبکر اور سیدنا عمر رضی اللہ عنہما بھی موجود تھے جو نبی اکرم صلی اللہ علیہ وسلم سے سب لوگوں کی بہ نسبت زیادہ بے تکلف تھے ۔ انہوں نے عرض کی : اے اللہ کے نبی ! کیا وہ مومن ہوں گے ؟ نبی اکرم صلی اللہ علیہ وسلم نے فرمایا : جی ہاں ! اور یہ اس کی تربت ہے ، پھر نبی اکرم صلی اللہ علیہ وسلم نے ان لوگوں کو وہ مٹی دکھائی ۔
یہ روایت امام طبرانی نے نقل کی ہے ، اور اس کے رجال کی توثیق کی گئی ہے ، اس کے بعض راویوں میں ضعف پایا جاتا ہے ۔

سیدنا معاذ بن جبل رضی اللہ عنہ بیان کرتے ہیں : نبی اکرم صلی اللہ علیہ وسلم ہمارے پاس تشریف لائے آپ کی رنگت تبدیل تھی ، آپ نے فرمایا : ” میں محمد ہوں ، مجھے کام کے فواتح اور اس کے خواتم عطا کیے گئے ہیں ، تو جب تک میں تمہارے درمیان موجود ہوں تم لوگ میری اطاعت کرو اور جب میری رخصتی ہو جائے تو تم پر اللہ کی کتاب کو اختیار کرنا لازم ہے ، تم اس کے حلال کو حلال قرار دو ، اس کے حرام کو حرام قرار دو ۔ تمہارے پاس آرام آئے گا ، تمہارے پاس راحت آئے گی ، یہ اللہ تعالیٰ کی طرف سے پہلے سے طے شدہ ہے ، تمہارے پاس فتنے آئیں گے جو تاریک رات کے ٹکڑوں کی مانند ہوں گے جب ایک قسم کا فتنہ چلا جائے گا ، تو دوسرا آ جائے گا ، نبوت ختم ہو چکی ہے ، بادشاہی آ جائے گی ، اللہ تعالیٰ اس شخص پر رحم کرے جو اس کے حق کے ہمراہ اسے لیتا ہے ، اور اس سے اسی طرح نکلتا ہے جس طرح اس میں داخل ہوا تھا : اے معاذ ! تم پکڑو اور گنتی کرو ( پھر نبی اکرم صلی اللہ علیہ وسلم نے نام گنوانے شروع کیے : ) ۔ راوی بیان کرتے ہیں : جب نبی اکرم صلی اللہ علیہ وسلم پانچویں فرد پر پہنچے تو آپ نے فرمایا : یزید ، اللہ تعالیٰ یزید میں برکت نہ رکھے ، پھر آپ کی آنکھوں میں آنسو آ گئے ، پھر آپ نے فرمایا : مجھے حسین کے قتل ہونے کی اطلاع دی گئی اور وہاں کی مٹی میرے پاس لائی گئی اور اس کے قاتل کے بارے میں مجھے بتایا گیا ، اس ذات کی قسم ! جس کے دست قدرت میں میری جان ہے جن لوگوں کے درمیان اسے قتل کیا جائے گا اللہ تعالیٰ ان لوگوں کے دلوں اور سینوں کے درمیان اختلاف پیدا کر دے گا ، اور ان کے بدترین لوگوں کو ان پر مسلط کر دے گا ، اور انہیں مختلف گروہوں میں تقسیم کر دے گا ، نبی اکرم صلی اللہ علیہ وسلم نے فرمایا : آل محمد کے بچوں کے لیے اس خلیفہ کے حوالے سے افسوس ہے ، جسے زیادتی کرنے والے کے طور پر خلیفہ بنایا جائے گا ، وہ میری اولاد کو اور میری اولاد کی اولاد کو قتل کرے گا ، اے معاذ ! تم گنتی کرو ! پھر جب آپ بارہ پر پہنچے تو آپ نے فرمایا : ولید ہو گا ، یہ فرعون کا نام ہے ، وہ شخص اسلام کے شرعی احکام کو منہدم کرنے والا ہو گا اس کے سامنے اس کے اہل بیت کا ایک فرد ہو گا تاکہ اللہ تعالیٰ اپنی تلوار کو میان سے نکال لے گا ، تو پھر وہ میان میں نہیں جائے گی ، وہ لوگ اسی طرح رہیں گے ۔ پھر نبی اکرم صلی اللہ علیہ وسلم نے اپنی انگلیاں ایک دوسرے میں پیوست کیں اور پھر ارشاد فرمایا : ایک سو بیس کے بعد ایسا وقت ایسا آئے گا کہ جس میں وقت تیزی سے گزرے اور قتل و غارت گری بہت زیادہ ہو گی اس زمانے میں ان لوگوں کی ہلاکت ہو جائے گی اور اس وقت ان لوگوں پر سیدنا عباس رضی اللہ عنہ کی اولاد سے تعلق رکھنے والا ایک شخص حکمران بن جائے گا ۔ “
یہ روایت امام طبرانی نے نقل کی ہے ۔ اس کی سند میں ایک راوی مجاشع بن عمرو ہے ، اور وہ کذاب ہے ۔

سیدنا ابوطفیل رضی اللہ عنہ بیان کرتے ہیں : بارش کے فرشتے نے یہ اجازت مانگی کہ وہ نبی اکرم صلی اللہ علیہ وسلم کو سلام کرے ، اس نے سیدہ ام سلمہ رضی اللہ عنہا کے ہاں اندر آنے کی اجازت مانگی تھی ۔ نبی اکرم صلی اللہ علیہ وسلم نے ( سیدہ ام سلمہ رضی اللہ عنہا سے ) فرمایا : تم کسی کو ہمارے پاس نہ آنے دینا ، اسی دوران سیدنا حسین رضی اللہ عنہ آ گئے اور اندر داخل ہو گئے ، سیدہ ام سلمہ رضی اللہ عنہا نے کہا: یہ حسین ہے ۔ نبی اکرم صلی اللہ علیہ وسلم نے فرمایا : اسے رہنے دو ! وہ نبی اکرم صلی اللہ علیہ وسلم کی گردن پر چڑھ گئے اور آپ کے ساتھ کھیلنے لگے ، فرشتہ یہ چیز دیکھ رہا تھا ، فرشتے نے دریافت کیا : اے سیدنا محمد ( صلی اللہ علیہ وسلم ) ! کیا آپ اس سے محبت رکھتے ہیں ؟ نبی اکرم صلی اللہ علیہ وسلم نے فرمایا : جی ہاں ۔ اللہ کی قسم ! میں اس سے محبت رکھتا ہوں ، فرشتے نے کہا: لیکن آپ کی امت اسے عنقریب قتل کر دے گی ، اگر آپ چاہیں تو میں آپ کو اس کی جگہ دکھا دیتا ہوں ، پھر اس نے ہاتھ بڑھایا اور مٹھی میں کچھ مٹی لی ، وہ مٹی سیدہ ام سلمہ رضی اللہ عنہا نے لے لی تھی اور اسے اپنی چادر میں باندھ لیا تھا ، لوگ یہ سمجھتے تھے وہ مٹی کربلا کی تھی ۔
یہ روایت امام طبرانی نے نقل کی ہے اور اس کی سند حسن ہے ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” حسین بن علی کو میری ہجرت کے ساٹھ سال بعد قتل کر دیا جائے گا ۔ “
یہ روایت امام طبرانی نے نقل کی ہے ۔ اس کی سند میں ایک راوی سعد بن طریف ہے اور وہ متروک ہے ۔

اسی سند کے ساتھ یہ بات منقول ہے : سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” حسین کو اس وقت قتل کر دیا جائے گا جب اس کے بال سفید ہونے لگیں گے ۔ “ طبرانی کہتے ہیں : لفظ قتیر سے مراد سفید بال ہیں ۔

سیدنا علی رضی اللہ عنہ فرماتے ہیں : حسین کو قتل کر دیا جائے گا ، میں اس مٹی سے واقف ہوں جہاں اسے قتل کر دیا جائے گا ، وہ نہرین کے قریب ہے ۔
یہ روایت امام طبرانی نے نقل کی ہے اور اس کے رجال ثقہ ہیں ۔

شیبان بن مخرم ، جو عثمانی تھے ۔ وہ بیان کرتے ہیں : میں سیدنا علی رضی اللہ عنہ کے ساتھ موجود تھا وہ کربلا آئے تو انہوں نے فرمایا : اس مقام پر ایک شخص شہید کیا جائے گا ، اس طرح کا شہید اور کوئی نہیں ہو گا البتہ شہداء بدر کا معاملہ مختلف ہے ، میں نے سوچا شاید یہ کوئی غلط بیانی ہے ، وہاں ایک مردہ گدھے کی ٹانگ پڑی ہوئی تھی ، میں نے اپنے غلام کو کہا: تم اس گدھے کی ٹانگ کو لو اور اسے اس کے مقعد میں گاڑ دو اور اس میں چھپا دو اور پھر اس کی پشت پر ضرب لگانا ، راوی کہتے ہیں : جب سیدنا امام حسین بن علی رضی اللہ عنہما کو شہید کیا گیا ، تو میں اپنے ساتھیوں کے ساتھ جا رہا تھا ، وہاں سیدنا حسین بن علی رضی اللہ عنہما کی لاش اس گدھے کی ٹانگ کے پاس پڑی ہوئی تھی اور ان کے ساتھیوں کی لاشیں ارگرد پڑی ہوئی تھیں ۔
یہ روایت امام طبرانی نے نقل کی ہے ۔ اس کی سند میں ایک راوی عطاء بن سائب ہے ، اور وہ ثقہ ہے لیکن وہ اختلاط کا شکار ہو گیا تھا ، اس روایت کے بقیہ رجال ثقہ ہیں ۔

ابوہرثمہ بیان کرتے ہیں : میں کربلا کی نہر کے پاس سیدنا علی رضی اللہ عنہ کے ساتھ موجود تھا وہ ایک درخت کے پاس سے گزرے جس کے نیچے ہرن کی مینگنیاں پڑی ہوئی تھیں انہوں نے اس مٹی میں سے مٹھی بھر مٹی لے کر اسے سونگھا اور پھر فرمایا : یہاں سے ستر ہزار ایسے لوگوں کو حشر کے دن اٹھایا جائے گا جو کسی حساب کے بغیر جنت میں داخل ہوں گے ۔
یہ روایت امام طبرانی نے نقل کی ہے اور اس کے رجال ثقہ ہیں ۔

ابوہبیرہ بیان کرتے ہیں : میں سیدنا علی رضی اللہ عنہ کے ساتھ موجود تھا وہ کوفہ آئے وہ منبر پر چڑھے انہوں نے اللہ تعالیٰ کی حمد و ثناء بیان کرنے کے بعد یہ ارشاد فرمایا : اس وقت تمہارا کیا عالم ہو گا جب تمہارے نبی کی اولاد تمہارے درمیان آئے گی ؟ لوگوں نے کہا: ایسی صورت میں ہم ان کے ساتھ اچھا سلوک کریں گے ، تو سیدنا علی رضی اللہ عنہ نے فرمایا : اس ذات کی قسم ! جس کے دست قدرت میں میری جان ہے وہ تمہارے درمیان آئے گا ، تو تم لوگ نکل کر ان کی طرف جاؤ گے ، اور انہیں قتل کر دو گے پھر سیدنا علی رضی اللہ عنہ نے یہ شعر پڑھنا شروع کیا : ” وہ اس کو دھوکے کے مقام پر لے آئے اور وہ لوگ اپنا مقصد حاصل نہیں کر سکے تو انہوں نے یہ خواہش کی کہ اس کو نجات دلوا دیں ، لیکن نجات یا معذرت کی کوئی صورت نہیں رہی ۔ “
یہ روایت امام طبرانی نے نقل کی ہے ۔ اس کی سند میں ایک راوی سعد بن وہب ہے ، جو بعد کے زمانے کا ہے ، اور میں اس سے واقف نہیں ہوں ۔ اس روایت کے بقیہ رجال ثقہ ہیں ۔

مسیب بن نجیہ بیان کرتے ہیں : سیدنا علی رضی اللہ عنہ نے فرمایا : ” کیا میں تمہیں بطور خاص اپنے اور اپنے گھر والوں کے بارے میں نہ بتاؤں ، ہم نے کہا: جی ہاں ، انہوں نے فرمایا : جہاں تک حسن کا تعلق ہے ، تو وہ پیالوں اور خوان والا شخص ہے ، وہ مرد آدمی ہے ، لیکن وہ جنگ میں تمہارے کام نہیں آ سکتا ، جہاں تک عبداللہ بن جعفر کا تعلق ہے ، تو وہ لہو کی طرف متوجہ ہونے والا ، صائم رہنے والا ، باطل والا شخص ہے ، اور عباس کے دو بیٹے تمہیں غلط فہمی کا شکار نہ کریں ، جہاں تک میرا اور حسین کا تعلق ہے تو ہم تم لوگوں سے ہیں ، اور تم ہم لوگوں سے ہو ، اللہ کی قسم ! مجھے یہ اندیشہ ہے کہ وہ لوگ اپنی سرزمین پر بھلائی کو گھمائیں گے اور تمہاری سرزمین پر فساد ڈالیں گے ، یوں کہ وہ امانت ادا کریں گے اور تم خیانت کرو گے ، وہ اپنے حکمران کے فرمانبردار ہوں گے اور تم اپنے حکمران کی نافرمانی کرو گے ، وہ اپنے باطل پر اکٹھے ہوں گے اور تم اپنے حق پر اختلاف کا شکار ہو گے ، ان کی حکومت طویل ہو جائے گی ، یہاں تک کہ وہ اللہ تعالیٰ کی حرام قرار دی ہوئی ہر چیز کو حلال قرار دیں گے ، ہر کچے اور پکے گھر میں ان کا ظلم داخل ہو جائے گا ، یہاں تک کہ تم میں سے کوئی ان کا تابع ہو جائے گا ، جس طرح کوئی غلام اپنے آقا کی مدد کرتا ہے ، جب وہ سامنے موجود ہو گا تو اس کی اطاعت کرے گا اور جب وہ سامنے موجود نہیں ہو گا تو اس کو برا کہے گا ، یہاں تک کہ اس صورتحال میں تم میں سے سب سے زیادہ لاتعلق وہ شخص ہو گا جو اللہ تعالیٰ کے بارے میں سب سے زیادہ اچھا گمان رکھتا ہو ، اگر اللہ تعالیٰ تمہیں عافیت نصیب کرے تو تم قبول کر لینا اور اگر تم آزمائش کا شکار ہو جاؤ ، تو تم صبر سے کام لینا ، کیونکہ اچھا انجام پرہیزگاروں کے لیے ہے ۔ “
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : سیدنا حسین رضی اللہ عنہ نبی اکرم صلی اللہ علیہ وسلم کی گود میں بیٹھے ہوئے تھے ۔ سیدنا جبرائیل علیہ السلام نے دریافت کیا : کیا آپ اس سے محبت کرتے ہیں ؟ نبی اکرم صلی اللہ علیہ وسلم نے فرمایا : میں اس سے کیوں محبت نہ کروں ؟ جبکہ یہ میرے دل کا پھل ہے ( یعنی میرے جگر کا ٹکڑا ہے ) تو سیدنا جبرائیل علیہ السلام نے بتایا : آپ کی امت اسے قتل کر دے گی ، کیا میں آپ کو اس کی قبر کی جگہ نہ دکھاؤں ؟ پھر انہوں نے مٹھی بھر مٹی لی تو وہ سرخ رنگ کی مٹی تھی ۔
یہ روایت امام بزار نے نقل کی ہے اور اس کے رجال ثقہ ہیں اس کے بعض راویوں کے بارے میں اختلاف پایا جاتا ہے ۔

امام شعبی بیان کرتے ہیں : جب سیدنا حسین بن علی رضی اللہ عنہما نے عراق کی سرزمین کی طرف جانے کا ارادہ کیا ، تو انہوں نے یہ ارادہ کیا کہ سیدنا عبداللہ بن عمر رضی اللہ عنہما سے مل لیں اور ان سے مشورہ لے لیں ، انہیں بتایا گیا کہ سیدنا عبداللہ بن عمر رضی اللہ عنہما تو اپنی زمین پر موجود ہیں ۔ وہ ان سے رخصت ہونے کے لئے ان کے پاس گئے اور انہیں بتایا : میں عراق جانا چاہتا ہوں سیدنا عبداللہ بن عمر رضی اللہ عنہما نے کہا: آپ ایسا نہ کریں کیونکہ نبی اکرم صلی اللہ علیہ وسلم نے یہ ارشاد فرمایا ہے : ” مجھے اس بارے میں اختیار دیا گیا کہ میں ایک بادشاہ نبی بنوں یا ایک بندہ نبی بنوں تو مجھ سے کہا: گیا کہ آپ تواضع اختیار کریں تو میں نے اس چیز کو اختیار کیا کہ میں ایک بندہ نبی بنوں ۔ “ اور آپ نبی اکرم صلی اللہ علیہ وسلم کے جان کے ٹکڑے ہیں ، تو آپ نہ جائیں ، راوی کہتے ہیں : لیکن سیدنا امام حسین رضی اللہ عنہ نے ان کی بات نہیں مانی تو سیدنا عبداللہ بن عمر رضی اللہ عنہما نے انہیں رخصت کرتے ہوئے یہ کہا: مقتول ہونے کے حوالے سے میں آپ کو اللہ کے سپرد کرتا ہوں ۔
یہ روایت امام بزار نے نقل کی ہے اور امام طبرانی نے معجم اوسط میں نقل کی ہے ، اور امام بزار کے رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : سیدنا حسین رضی اللہ عنہ نے مجھ سے روانگی کے بارے میں اجازت مانگی تو سیدنا عبداللہ بن عباس رضی اللہ عنہما نے کہا: اگر اس بات کا اندیشہ نہ ہوتا کہ یہ عمل میرے یا آپ کے لیے اعتراض کا نشانہ بننے کا باعث بن جائے گا ، تو میں نے اپنی انگلیاں آپ کے سر میں پیوست کر دینی تھیں ، تو انہوں نے مجھے جواب دیتے ہوئے یہ کہا: اگر میں فلاں فلاں جگہ پر شہید ہو جاؤں تو یہ میرے نزدیک اس سے زیادہ پسندیدہ ہو گا کہ میری وجہ سے اللہ اور اس کے رسول کے حرم کی بے حرمتی کی جائے ، راوی کہتے ہیں : تو اس طرح انہوں نے اپنے طرز عمل کی توجیہ پیش کی ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ۔

عبیداللہ بن حر بیان کرتے ہیں : انہوں نے سیدنا امام حسین بن علی رضی اللہ عنہما سے دریافت کیا : کیا آپ کی اس روانگی کے بارے میں نبی اکرم صلی اللہ علیہ وسلم نے آپ کو کوئی تلقین کی تھی ؟ انہوں نے جواب دیا : جی نہیں ۔
یہ روایت امام طبرانی نے نقل کی ہے ۔ اس کی سند میں ایک راوی جابر جعفی ہے اور وہ ضعیف ہے ۔

مطلب بن عبداللہ بن حنطب بیان کرتے ہیں : جب سیدنا امام حسین بن علی رضی اللہ عنہما کو گھیر لیا گیا ، تو انہوں نے دریافت کیا : اس جگہ کا نام کیا ہے ؟ بتایا گیا کہ کربلا ، تو انہوں نے فرمایا : نبی اکرم صلی اللہ علیہ وسلم نے سچ فرمایا ہے : یہ کرب اور بلا کی جگہ ہے ۔
یہ روایت امام طبرانی نے نقل کی ہے ۔ اس کی سند میں ایک راوی یعقوب بن حمید بن کاسب ہے ، اور وہ ضعیف ہے ویسے اس کی توثیق کی گئی ہے ۔

امام زین العابدین رضی اللہ عنہ بیان کرتے ہیں سیدنا امام حسین رضی اللہ عنہ نے اپنی شہادت سے ایک دن پہلے مجھ سے فرمایا : بنی اسرائیل کے لئے بادشاہی تھی ۔ ۔ ۔ ۔ ۔ ۔ ۔ اس کے بعد راوی نے پوری حدیث نقل کی ہے ۔
یہ روایت امام طبرانی نے نقل کی ہے اور اس کی سند عمدہ ہے ۔

محمد بن حسن بیان کرتے ہیں : جب عمر بن سعد نے امام حسین رضی اللہ عنہ کے مقابلے میں پڑاؤ کیا اور انہیں یہ یقین ہو گیا کہ وہ لوگ انہیں شہید کر دیں گے ، تو وہ اپنے ساتھیوں کے درمیان خطبہ دینے کے لئے کھڑے ہوئے انہوں نے اللہ تعالیٰ کی حمد و ثناء بیان کرتے ہوئے یہ ارشاد فرمایا : ” جس طرح کی صورت حال سامنے آئی ہے وہ تم دیکھ رہے ہو ، دنیا تبدیل ہو گئی ہے ، اور ناشناسا ہو گئی ہے اس کی بھلائی رخصت ہو گئی ہے ، اور اس نے تیزی سے منہ موڑ لیا ، یہاں تک کہ اس میں سے صرف وہ ( گدلا پن ) باقی رہ گیا ہے ، جو برتن میں تلچھٹ ہوتی ہے ، کیا تم لوگ حق کے بارے میں یہ نہیں سمجھتے ہو کہ اس پر عمل نہیں کیا جائے گا ، اور باطل سے نہیں روکا جائے گا تاکہ مومن کو اللہ تعالیٰ کی بارگاہ میں حاضری کی رغبت دلائی جائے ، میں تو موت کو سعادت سمجھتا ہوں اور ظالموں کے ساتھ رہنے کو بربادی سمجھتا ہوں ۔ “ ( راوی بیان کرتے ہیں : ) امام حسین رضی اللہ عنہ کو عاشورہ کے دن ” طف “ کے مقام پر شہید کیا گیا ، ان کے جسم پر اون کا بنا ہوا جبہ تھا ، انہوں نے سیاہ رنگ کا خضاب لگایا ہوا تھا ، اس وقت ان کی عمر چھپن برس تھی ۔
یہ روایت امام طبرانی نے نقل کی ہے محمد بن حسن نامی اس راوی سے مراد ابن زبالہ ہے اور وہ متروک ہے ، اس نے اس واقعہ کا زمانہ نہیں پایا ہے ۔

کلبی بیان کرتے ہیں : ایک شخص نے سیدنا حسین رضی اللہ عنہ کو تیر مارا ، وہ اس وقت پی رہے تھے ، تو ان کی باچھیں شل ہو گئیں ، اس نے کہا: اللہ تعالیٰ تمہیں میر نہ کرے ، انہوں نے پیا ، یہاں تک کہ ان کا منہ چر گیا ۔
یہ روایت امام طبرانی نے نقل کی ہے اور اس کے قائل تک اس کے رجال ثقہ ہیں ۔

ضحاک بن عثمان بیان کرتے ہیں : سیدنا امام حسین بن علی رضی اللہ عنہما کوفہ کی طرف جانے کے لئے نکلے وہ یزید بن معاویہ کی حکومت سے اختلاف رکھتے تھے ، یزید بن معاویہ نے عبیداللہ بن زیاد کو خط لکھا ، جو عراق پر اس کا مقرر کردہ گورنر تھا کہ مجھے یہ اطلاع ملی ہے کہ سیدنا حسین رضی اللہ عنہ کوفہ کی طرف روانہ ہوئے ہیں ۔ یہ آزمائش باقی تمام زمانوں کے مقابلے میں تمہارے زمانے میں سامنے آئی ہے ، اور باقی تمام شہروں کے مقابلے میں تمہارے شہر میں سامنے آئی ہے ، اور باقی تمام اہلکاروں کے مقابلے میں تمہیں اس حوالے سے آزمایا گیا ہے ، تو اس آزمائش کے نتیجے میں یا تو تم آزاد ہو جاؤ گے یا پھر پہلے کی طرح بندے بن جاؤ گے جس طرح کسی غلام کو بندہ بنایا جاتا ہے ، تو عبیداللہ بن زیاد نے امام حسین کو شہید کروا دیا ، اس نے امام حسین کا سر یزید کو بھجوایا ، جب امام حسین کا سر اس کے آگے رکھا گیا تو اس نے حصین بن حمام مری کے یہ اشعار مثال کے طور پر پڑھے : ” ہم کچھ محبوب افراد کی خاطر سر کٹوا لیتے ہیں حالانکہ وہ لوگ زیادہ نافرمان اور زیادہ ظالم ہوتے ہیں ۔ “
یہ روایت امام طبرانی نے نقل کی ہے اور اس کے رجال ثقہ ہیں ، البتہ ضحاک نامی راوی نے اس معاملے کا زمانہ نہیں پایا ہے ۔

ابن وائل ، شاید وائل بن علقمہ بیان کرتے ہیں : وہ اس وقت وہاں موجود تھے ۔ راوی بیان کرتے ہیں : ایک شخص کھڑا ہوا اس نے دریافت کیا : کیا تمہارے درمیان حسین ہے ، لوگوں نے بتایا جی ہاں ، اس نے کہا: تم جہنم کی اطلاع حاصل کرو ، تو انہوں نے کہا: تم رحم کرنے والے پروردگار کی اطلاع حاصل کرو اور شفاعت کرنے والی ایسی ہستی کی جن کی اطاعت کی جاتی ہے ، لوگوں نے کہا: تم کون ہو ؟ اس نے کہا: میں این جویرہ ہوں ( راوی کو شک ہے شاید یہ الفاظ ہیں ) ابن حویزہ ہوں ، انہوں نے کہا: اے اللہ ! اسے جہنم کی طرف لے جا ، تو اس کے جانور نے اسے گرا دیا ، اس کا پاؤں رکاب میں پھنس گیا ، راوی کہتے ہیں : اللہ کی قسم ! اس کے جسم میں سے صرف وہ پاؤں ہی بچا ۔
یہ روایت امام طبرانی نے نقل کی ہے ۔ اس کی سند میں ایک راوی عطاء بن سائب ہے اور وہ ثقہ ہے لیکن وہ و اختلاط کا شکار ہو گیا تھا ۔

ابن ابولیلیٰ بیان کرتے ہیں : سیدنا حسین بن علی رضی اللہ عنہ کو یہ اندازہ ہو گیا کہ انہیں شہید کر دیا جائے گا ، تو انہوں نے فرمایا : میرے پاس ایسا کپڑا لے کے آؤ ، جس میں کسی کو دلچسپی نہ ہو ( یعنی جو غیر ضروری ہو ) تاکہ میں اسے اپنے کپڑوں کے نیچے رکھ لوں ، تاکہ مجھے برہنہ نہ کیا جائے ۔ ان سے کہا: گیا ایک لنگوٹ ہے ۔ انہوں نے فرمایا : جی نہیں ۔ یہ تو اس شخص کا لباس ہوتا ہے ، جس پر ذلت مسلط کر دی گئی ہو ، پھر انہوں نے ایک کپڑا لیا اور اسے اپنے کپڑے کے نیچے باندھ لیا ، جب انہیں شہید کر دیا گیا ، تو لوگوں نے ان کے کپڑے اتار لئے ۔
یہ روایت امام طبرانی نے نقل کی ہے اور اس کے قائل تک اس کے رجال ثقہ ہیں ۔

عمار دہنی بیان کرتے ہیں سیدنا علی رضی اللہ عنہ کا گزر کعب احبار کے پاس سے ہوا تو انہوں نے کہا: ان صاحب کی اولاد میں سے ایک شخص کو ساتھیوں سمیت قتل کیا جائے گا ، اور ان کے گھوڑوں کا پسینہ خشک ہونے سے پہلے وہ لوگ سیدنا محمد صلی اللہ علیہ وسلم کے پاس پہنچ جائیں گے ، اس دوران سیدنا حسن رضی اللہ عنہ وہاں سے گزرے تو لوگوں نے کہا: اے ابواسحاق وہ صاحب یہ ہیں ؟ انہوں نے جواب دیا : جی نہیں ! پھر سیدنا حسین رضی اللہ عنہ گزرے ، لوگوں نے دریافت کیا : یہ ہیں ؟ انہوں نے جواب دیا : جی ہاں ۔
یہ روایت امام طبرانی نے نقل کی ہے ، اور اس کے رجال ثقہ ہیں البتہ عمار دہنی نامی راوی نے اس واقعہ کا زمانہ نہیں پایا ہے ۔

سیدنا عبداللہ بن عباس رضی اللہ عنہما بیان کرتے ہیں : میں نے دوپہر کے وقت نبی اکرم صلی اللہ علیہ وسلم کو خواب میں دیکھا ، آپ کے بال بکھرے ہوئے تھے اور غبار آلود تھے آپ کے پاس ایک شیشی تھی جس میں خون موجود تھا اور آپ اس میں سے کچھ تلاش کر رہے تھے ، میں نے دریافت کیا : یہ کیا ہے ؟ آپ نے فرمایا : یہ حسین اور اس کے ساتھیوں کا خون ہے ، آج میں مسلسل اس کا سامنا کر رہا ہوں ۔ عمار کہتے ہیں ۔ ہم نے وہ دن یاد رکھا تو ہمیں یہ بات پتہ چلی کہ سیدنا حسین رضی اللہ عنہ اسی دن شہید ہوئے تھے ۔
یہ روایت امام أحمد اور امام طبرانی نے نقل کی ہے امام أحمد کے رجال ” صحیح“ کے رجال ہیں ۔