مجمع الزوائد ومنبع الفوائد

سیدہ سودہ بنت مسرح رضی اللہ عنہا بیان کرتی ہیں : میں ان خواتین میں شامل تھی جو سیدہ فاطمہ رضی اللہ عنہا کے ہاں بچے کی پیدائش کے وقت ان کے پاس موجود تھیں ، نبی اکرم صلی اللہ علیہ وسلم ہمارے پاس تشریف لائے ، آپ نے دریافت کیا : اس کا کیا حال ہے ، میں نے عرض کی : یا رسول اللہ ا وہ تکلیف کے عالم میں ہیں : نبی اکرم صلی اللہ علیہ وسلم نے فرمایا : جب وہ بچے کو جنم دیدے تو تم نے مجھ سے پہلے اس بچے کے بارے میں کچھ نہیں کرنا راوی بیان کرتے ہیں : جب سیدہ فاطمہ رضی اللہ عنہا نے بچے کو جنم دے دیا تو ان لوگوں نے اس کی نال کاٹ دی اور اسے ایک زرد کپڑے میں لپیٹ دیا ، نبی اکرم صلی اللہ علیہ وسلم تشریف لائے ، آپ نے دریافت کیا : کیا بنا ، تو میں نے عرض کی : انہوں نے بچے کو جنم دیا ہے ، میں نے اس کی نال کاٹ دی ہے اور اسے ایک کپڑے میں لپیٹ دیا ہے ۔ نبی اکرم صلی اللہ علیہ وسلم نے فرمایا : کیا تم نے میری نافرمانی کی ہے ؟ میں نے عرض کی : میں اس نافرمانی سے اللہ کی پناہ مانگتی ہوں اور اس کے رسول کے غضب سے بھی پناہ مانگتی ہوں ۔ نبی اکرم صلی اللہ علیہ وسلم نے فرمایا : اس بچے کو میرے پاس لے کے آؤ ، میں انہیں آپ کے پاس لے کے آئی تو نبی اکرم صلی اللہ علیہ وسلم نے زرد رنگ کا کپڑا اس سے ہٹا دیا اور ایک سفید کپڑے میں اسے لپیٹ دیا ، پھر نبی اکرم صلی اللہ علیہ وسلم نے اس بچے کے منہ میں لعاب دہن ڈالا اور اپنے لعاب کے ذریعے اسے گھٹی دی ، پھر سیدنا علی رضی اللہ عنہ آئے ، نبی اکرم صلی اللہ علیہ وسلم نے دریافت کیا : اے علی ! تم نے اس کا کیا نام رکھا ہے ؟ انہوں نے بتایا : میں نے اس کا نام جعفر رکھا ہے ۔ نبی اکرم صلی اللہ علیہ وسلم نے فرمایا : جی نہیں ! بلکہ یہ حسن ہے ، اور اس کے بعد حسین ہو گا ، اور تم ابوحسن ہو ۔ “

ایک روایت میں یہ الفاظ ہیں : ” تم ابوحسن خیر ہو ۔ “
یہ روایت امام طبرانی نے دو اسناد کے ساتھ نقل کی ہے ان دونوں میں سے ایک میں ایک راوی عروہ بن فیروز اور ایک راوی عمر بن عمیر ہے ، میں ان دونوں سے واقف نہیں ہوں ۔ اس روایت کے بقیہ رجال کی توثیق کی گئی ہے ۔

سیدنا علی بن ابوطالب رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کی صاحبزادی سیدہ فاطمہ رضی اللہ عنہا کے لئے شادی کا پیغام دیا ، راوی کہتے ہیں : سیدنا علی رضی اللہ عنہ نے اپنے پاس موجود زرہ کو فروخت کیا اور اپنے سامان میں سے کچھ سامان فروخت کیا ، تو انہیں چار سو اسی درہم ملے ، نبی اکرم صلی اللہ علیہ وسلم نے انہیں یہ حکم دیا کہ وہ دو تہائی رقم خوشبو میں خرچ کریں اور ایک تہائی رقم کپڑوں کے لیے استعمال کریں ، پھر نبی اکرم صلی اللہ علیہ وسلم نے پانی کے گھڑے میں کلی کی اور ان لوگوں کو یہ حکم دیا کہ وہ اس پانی کے ساتھ غسل کریں ، راوی بیان کرتے ہیں : نبی اکرم صلی اللہ علیہ وسلم نے سیدہ فاطمہ رضی اللہ عنہا کو یہ ہدایت کی کہ انہوں نے نبی اکرم صلی اللہ علیہ وسلم کے آنے سے پہلے نے بچے کو دودھ نہیں پلانا ، راوی بیان کرتے ہیں : لیکن سیدہ فاطمہ رضی اللہ عنہا نے نبی اکرم صلی اللہ علیہ وسلم کے آنے سے پہلے سیدنا حسین رضی اللہ عنہ کو دودھ پلا دیا تھا ۔ سیدنا حسن رضی اللہ عنہ کے ساتھ ایسا نہیں ہوا تھا ۔ نبی اکرم صلی اللہ علیہ وسلم نے ان کے منہ میں کوئی چیز ڈالی تھی ، ہمیں نہیں معلوم کہ وہ کیا چیز تھی ؟ تو وہ ان دونوں حضرات میں زیادہ علم رکھنے والے تھے ۔
یہ روایت امام ابویعلیٰ نے نقل کی ہے اور اس کے رجال ثقہ ہیں ۔

سیدنا ابوبکرہ رضی اللہ عنہ بیان کرتے ہیں : نبی اکرم صلی اللہ علیہ وسلم نماز ادا کر رہے تھے جب آپ سجدے میں گئے تو سیدنا حسن رضی اللہ عنہ آپ کی گردن پر اور آپ کی پشت پر سوار ہو گئے ، نبی اکرم صلی اللہ علیہ وسلم آرام سے اٹھے تاکہ بچہ گر نہ جائے ، لوگوں نے عرض کی : یا رسول اللہ ! ہم نے آپ کو حسن کے حوالے سے ایسا کام کرتے ہوئے دیکھا ہے کہ ہم نے آپ کو کسی کے ساتھ ایسا کرتے ہوئے نہیں دیکھا ، تو نبی اکرم صلی اللہ علیہ وسلم نے ارشاد فرمایا : وہ دنیا میں میرا پھول ہے ، میرا یہ بیٹا سردار ہو گا ، اور اللہ تعالیٰ عنقریب اس کے ذریعے دو بڑے گروہوں کے درمیان صلح کروا دے گا ۔ “

ایک روایت میں یہ الفاظ ہیں : وہ نبی اکرم صلی اللہ علیہ وسلم کی پشت پر چڑھ گئے اور انہوں نے ایک سے زیادہ مرتبہ ایسا کیا ۔
یہ روایت امام أحمد ، امام بزار اور امام طبرانی نے نقل کی ہے ، امام أحمد کے رجال ” صحیح “ کے رجال ہیں ، صرف مبارک بن فضالہ کا معاملہ مختلف ہے اور وہ ثقہ ہے ۔

سیدنا ابوسعید خدری رضی اللہ عنہ بیان کرتے ہیں : سیدنا حسن رضی اللہ عنہ نبی اکرم صلی اللہ علیہ وسلم کے پاس آئے ، نبی اکرم صلی اللہ علیہ وسلم اس وقت سجدے کی حالت میں تھے ۔ سیدنا حسن رضی اللہ عنہ ( جو بچے تھے ) وہ نبی اکرم صلی اللہ علیہ وسلم کی پشت پر سوار ہو گئے ، نبی اکرم صلی اللہ علیہ وسلم نے اپنے ہاتھ کے ذریعے انہیں پکڑا ، یہاں تک کہ وہ کھڑے ہو گئے ، جب آپ رکوع میں گئے ، تو پھر وہ آپ کی پشت پر سوار ہو گئے ، جب نبی اکرم صلی اللہ علیہ وسلم کھڑے ہوئے تو آپ نے انہیں چھوڑ دیا وہ چلے گئے ۔
یہ روایت امام بزار نے نقل کی ہے اور اس کے رجال کے بارے میں اختلاف پایا جاتا ہے ۔

سیدنا زبیر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو سجدے کی حالت میں دیکھا ، اسی دوران سیدنا حسن بن علی رضی اللہ عنہما آئے اور آپ کی پشت پر چڑھ گئے ، نبی اکرم صلی اللہ علیہ وسلم نے انہیں نہیں اتارا ، یہاں تک کہ وہ خود ہی نیچے اتر گئے ؟ نبی اکرم صلی اللہ علیہ وسلم ان کے لئے اپنی دونوں ٹانگیں کشادہ کر دیتے تھے اور وہ ایک طرف سے داخل ہو کے دوسری طرف سے نکل آیا کرتے تھے ۔
یہ روایت امام طبرانی نے نقل کی ہے ۔ اس کی سند میں ایک راوی علی بن عابس ہے اور وہ ضعیف ہے ۔

بہی بیان کرتے ہیں : میں نے سیدنا عبداللہ بن زبیر رضی اللہ عنہما سے کہا: آپ مجھے اس شخص کے بارے میں بتائیے جو نبی اکرم صلی اللہ علیہ وسلم کے ساتھ سب سے زیادہ مشابہت رکھتا ہو ، تو انہوں نے جواب دیا : سیدنا امام حسن بن علی رضی اللہ عنہما ، وہ نبی اکرم صلی اللہ علیہ وسلم کے ساتھ سب سے زیادہ مشابہت رکھتے تھے اور نبی اکرم صلی اللہ علیہ وسلم کے نزدیک سب سے زیادہ محبوب تھے ، وہ آتے تھے ، نبی اکرم صلی اللہ علیہ وسلم سجدے کی حالت میں ہوتے تھے ، وہ نبی اکرم صلی اللہ علیہ وسلم کی پشت پر چڑھ جاتے تھے ، تو نبی اکرم صلی اللہ علیہ وسلم اس وقت تک کھڑے نہیں ہوتے تھے جب تک وہ ایک طرف نہیں ہٹ جاتے تھے ، ایک مرتبہ وہ آئے اور نبی اکرم صلی اللہ علیہ وسلم کے پیٹ کے نیچے ( یعنی دونوں ٹانگوں کے درمیان ) داخل ہوئے ، نبی اکرم صلی اللہ علیہ وسلم نے ان کے لئے اپنی دونوں ٹانگیں کشادہ کر دیں تو وہ دوسری طرف سے نکل آئے ۔
یہ روایت امام بزار نے نقل کی ہے ۔ اس کی سند میں ایک راوی علی بن عابس ہے اور وہ ضعیف ہے ۔

ابن ابوملیکہ بیان کرتے ہیں : سیدہ فاطمہ رضی اللہ عنہا سیدنا حسن رضی اللہ عنہ کو اٹھا کر یہ کہہ رہی تھیں : ” یہ میرا بیٹا نبی اکرم صلی اللہ علیہ وسلم کے ساتھ مشابہت رکھتا ہے ، یہ سیدنا علی رضی اللہ عنہ کے ساتھ مشابہت نہیں رکھتا ہے ۔ “
یہ روایت امام أحمد نے نقل کی ہے ، اور
یہ روایت مرسل ہے ، اس کی سند میں ایک راوی زمعہ بن صالح ہے اور وہ کمزور ہے ۔

کلیب بن شہاب بیان کرتے ہیں : سیدنا امام حسن بن علی رضی اللہ عنہما کا ذکر سیدنا عبداللہ بن عباس رضی اللہ عنہما کے پاس کیا گیا ، تو انہوں نے فرمایا : وہ نبی اکرم صلی اللہ علیہ وسلم کے ساتھ مشابہت رکھتے تھے ۔
یہ روایت امام طبرانی نے نقل کی ہے ، اور اس کے رجال ثقہ ہیں البتہ کلیب نامی راوی کے صحابہ کرام میں سے کسی سے سماع کے بارے میں مجھے علم نہیں ہے ۔

سیدنا علی رضی اللہ عنہ فرماتے ہیں : سر سے لے کے گردن تک میں ، لوگوں میں نبی اکرم صلی اللہ علیہ وسلم کے ساتھ سب سے زیادہ مشابہت ” حسن “ رکھتا ہے ۔
یہ روایت امام طبرانی نے نقل کی ہے اور اس کی سند عمدہ ہے ۔

سیدنا زہیر بن حارث رضی اللہ عنہ بیان کرتے ہیں : ایک مرتبہ سیدنا امام حسن بن علی رضی اللہ عنہما خطبہ دے رہے تھے ، یہ سیدنا علی رضی اللہ عنہ کی شہادت کے بعد کی بات ہے ، اسی دوران ازد قبیلے سے تعلق رکھنے والا ایک شخص کھڑا ہوا جو گندمی رنگت کا طویل القامت شخص تھا ، اس نے بتایا میں نے نبی اکرم صلی اللہ علیہ وسلم کو دیکھا کہ نبی اکرم صلی اللہ علیہ وسلم نے ان صاحب کو اپنی گود میں رکھا اور پھر یہ فرمایا : ” جو شخص مجھ سے محبت رکھتا ہے وہ اس سے بھی محبت رکھے اور موجود شخص غیر موجود افراد تک تبلیغ کر دے ۔ “ ( پھر اس شخص نے کہا: ) اگر نبی اکرم صلی اللہ علیہ وسلم کی یہ تاکید نہ ہوتی تو میں نے تمہیں یہ حدیث بیان نہیں کرنی تھی ۔
یہ روایت امام أحمد نے نقل کی ہے ، اور اس کی سند میں ایسا راوی ہے جس سے میں واقف نہیں ہوں ۔

سیدنا ابوہریرہ رضی اللہ عنہ بیان کرتے ہیں : میرے ان دو کانوں نے اسے سنا اور میری ان دونوں آنکھوں نے اس کو دیکھا ، نبی اکرم صلی اللہ علیہ وسلم نے دونوں ہاتھوں کے ذریعے سیدنا حسن رضی اللہ عنہ یا شاید سیدنا حسین رضی اللہ عنہ کو پکڑا ہوا تھا اور اس بچے کے دونوں پاؤں نبی اکرم صلی اللہ علیہ وسلم کے قدموں پر تھے اور نبی اکرم صلی اللہ علیہ وسلم یہ فرما رہے تھے : ” اے ننھے میاں ، اے ننھے میاں ، اوپر چڑھ جاؤ اے چھوٹی آنکھوں والے ۔ “ تو وہ بچہ اوپر چڑھ گیا یہاں تک کہ اس نے اپنے پاؤں نبی اکرم صلی اللہ علیہ وسلم کے سینے پر رکھے ، پھر نبی اکرم صلی اللہ علیہ وسلم نے فرمایا : اپنا منہ کھولو ، پھر نبی اکرم صلی اللہ علیہ وسلم نے اسے بوسہ دیا اور پھر نبی اکرم صلی اللہ علیہ وسلم نے فرمایا : ” اے اللہ ! جو اس سے محبت رکھتا ہو ، تو میں بھی اس سے محبت رکھوں گا ۔ “
یہ روایت امام طبرانی نے نقل کی ہے ۔ اس کی سند میں ایک راوی ابومزرد ہے ، اور میں نے کسی کو اس کی توثیق کرتے ہوئے نہیں دیکھا ہے ، اس روایت کے بقیہ رجال ” صحیح “ کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے سیدنا حسن رضی اللہ عنہ کو پکڑ کر اپنے ساتھ لگایا اور پھر یہ فرمایا : ” اے اللہ ! بے شک یہ میرا بیٹا ہے ، تو اس سے محبت رکھ اور جو اس سے محبت رکھے ، اس سے بھی محبت رکھ ۔ “
یہ روایت امام طبرانی نے نقل کی ہے ۔ اس کی سند میں ایک راوی عثمان بن ابوکنات ہے اور اس میں ضعف پایا جاتا ہے ۔

سیدنا سعید بن زید بن نفیل رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا حسن رضی اللہ عنہ کو اپنے ساتھ لگایا اور فرمایا : ” اے اللہ ! میں اس سے محبت رکھتا ہوں تو بھی اس سے محبت رکھ ۔ “
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں ، صرف یزید بن یحنس کا معاملہ مختلف ہے اور وہ ثقہ ہے ۔

سیدنا براء بن عازب رضی اللہ عنہ روایت کرتے ہیں : نبی اکرم صلی اللہ علیہ وسلم نے سیدنا امام حسن بن علی رضی اللہ عنہما کے بارے میں یہ فرمایا : ” اے اللہ ! میں اس سے محبت رکھتا ہوں اور تو اس سے محبت رکھ ، اور جو اس سے محبت رکھے ، اس سے بھی محبت رکھ ۔ “ ( علامہ ہیثمی فرماتے ہیں : ) میں یہ کہتا ہوں
یہ روایت صحیح میں مذکور ہے ، تاہم اس میں یہ الفاظ نہیں ہیں : ” تو اس سے بھی محبت رکھ جو اس سے محبت رکھے ۔ “
یہ روایت امام طبرانی نے معجم کبیر اور معجم اوسط میں نقل کی ہے ، امام بزار اور امام ابویعلیٰ نے بھی نقل کی ہے ، اور کبیر کے رجال ” صحیح “ کے رجال ہیں ۔

رجاء بن ربیعہ بیان کرتے ہیں : میں مدینہ منورہ میں مسجد نبوی میں ایک حلقے میں بیٹھا ہوا تھا جس میں سیدنا ابوسعید خدری رضی اللہ عنہ اور سیدنا عبداللہ بن عمرو رضی اللہ عنہ موجود تھے ، اسی دوران وہاں سے سیدنا امام حسن بن علی رضی اللہ عنہ گزرے ، انہوں نے سلام کیا ، لوگوں نے ان کو جواب دیا ، سیدنا عبداللہ بن عمرو رضی اللہ عنہ خاموش رہے ، جب وہ چلے گئے تو سیدنا عبداللہ بن عمرو رضی اللہ عنہ نے کہا: و علیک السلام و رحمتہ اللہ ، پھر انہوں نے فرمایا : یہ صاحب اہل آسمان کے نزدیک ، اہل زمین میں سے سب سے زیادہ محبوب ہیں ، جنگ صفین کے بعد اللہ کی قسم ! میں نے کبھی ان کے ساتھ بات نہیں کی ، تو سیدنا ابوسعید رضی اللہ عنہ نے فرمایا : آپ ان کے پاس جا کر ان کے سامنے معذرت کیوں نہیں پیش کرتے ؟ سیدنا عبداللہ رضی اللہ عنہ نے کہا: ٹھیک ہے ، راوی کہتے ہیں : پھر وہ اٹھے ، سیدنا ابوسعید خدری رضی اللہ عنہ ، سیدنا امام حسن رضی اللہ عنہ کے گھر میں داخل ہوئے ، انہوں نے اجازت مانگی ، سیدنا امام حسن رضی اللہ عنہ نے انہیں اجازت دے دی ، پھر انہوں نے سیدنا عبداللہ بن عمرو رضی اللہ عنہ کے لئے اجازت مانگی ، وہ بھی اندر آ گئے ، سیدنا ابوسعید خدری رضی اللہ عنہ نے سیدنا عبداللہ بن عمرو رضی اللہ عنہ سے کہا: ، آپ وہ بات بیان کیجئے جو آپ نے ہمیں اس وقت بیان کی تھی جب حسن گزرے تھے ، تو انہوں نے فرمایا : ٹھیک ہے ، میں آپ لوگوں کو بتاتا ہوں کہ یہ اہل آسمان کے نزدیک ، اہل زمین میں سے سب سے زیادہ محبوب ہیں ، تو سیدنا امام حسن رضی اللہ عنہ نے ان سے فرمایا : جب آپ یہ بات جانتے ہیں کہ میں اہل آسمان کے نزدیک ، اہل زمین میں سب سے زیادہ محبوب ہوں تو پھر آپ نے جنگ صفین کے موقع پر ہمارے ساتھ لڑائی کیوں کی ( راوی کو شک ہے شاید یہ الفاظ ہیں ) اس میں شامل ہو کر ( ہمارے مخالفین کی تعداد کو ) زیادہ کیوں کیا ، تو سیدنا عبداللہ رضی اللہ عنہ نے کہا: اللہ کی قسم ! نہ تو میں نے لوگوں کی تعداد کو زیادہ کیا اور نہ ہی میں نے ان کے ساتھ تلوار سے ضرب لگائی ، میں صرف اپنے والد کے ساتھ موجود رہا تھا ، تو سیدنا امام حسن رضی اللہ عنہ نے فرمایا : کیا آپ یہ بات نہیں جانتے ہیں کہ اللہ تعالیٰ کی معصیت کے بارے میں مخلوق کی اطاعت نہیں کی جا سکتی ، سیدنا عبداللہ رضی اللہ عنہ نے جواب دیا : جی ہاں ! نبی اکرم صلی اللہ علیہ وسلم کے زمانہ اقدس میں ، میں مسلسل نفلی روزے رکھا کرتا تھا ، میرے والد نے میری شکایت نبی اکرم صلی اللہ علیہ وسلم سے کی ، انہوں نے عرض کی : یا رسول اللہ ! عبداللہ بن عمرو دن کے وقت روزہ رکھتا ہے اور رات کو نفل پڑھتا رہتا ہے ، تو نبی اکرم صلی اللہ علیہ وسلم نے فرمایا : ” تم نفلی روزہ رکھ بھی لیا کرو اور چھوڑ بھی دیا کرو ( رات کے وقت ) سو بھی جایا کرو اور نفل بھی پڑھ لیا کرو کیونکہ میں نفل بھی پڑھتا ہوں اور سو بھی جاتا ہوں ، نفلی روزہ رکھتا بھی ہوں اور چھوڑ بھی دیتا ہوں ، اور نبی اکرم صلی اللہ علیہ وسلم نے فرمایا : اے عبداللہ ! تم اپنے باپ کی اطاعت کرو ۔ تو میرے والد جنگ صفین کے موقع پر نکلے تھے ، تو میں بھی ان کے ساتھ نکل آیا تھا ۔
یہ روایت امام بزار نے نقل کی ہے ، اور اس کے رجال ” صحیح“ کے رجال ہیں ، صرف ہاشم بن برید کا معاملہ مختلف ہے اور وہ ثقہ ہے ۔ ( علامہ ہیثمی فرماتے ہیں : ) میں یہ کہتا ہوں ۔ اس روایت کا ایک طریق سیدنا امام حسین رضی اللہ عنہ کے فضائل سے متعلق باب میں بھی آئے گا ۔

عمیر بن اسحاق بیان کرتے ہیں : میں نے سیدنا ابوہریرہ رضی اللہ عنہ کو دیکھا ، ان کی ملاقات سیدنا امام حسن بن علی رضی اللہ عنہما سے ہوئی ، تو انہوں نے سیدنا امام حسن رضی اللہ عنہ سے کہا: آپ اپنے پیٹ سے اس جگہ سے کپڑا ہٹائیے ، جس کے بارے میں ، میں نے نبی اکرم صلی اللہ علیہ وسلم کو دیکھا کہ آپ صلی اللہ علیہ وسلم نے وہاں بوسہ لیا تھا ، امام حسن رضی اللہ عنہ نے اپنے پیٹ سے کپڑا ہٹایا تو سیدنا ابوہریرہ رضی اللہ عنہ نے بھی وہاں بوسہ دیا ۔

ایک روایت میں یہ الفاظ ہیں : سیدنا ابوہریرہ رضی اللہ عنہ نے ان کی ناف پر بوسہ دیا ۔
یہ روایت امام أحمد اور امام طبرانی نے نقل کی ہے ، تاہم انہوں نے یہ الفاظ نقل کیے ہیں : سیدنا امام حسن رضی اللہ عنہ نے اپنے پیٹ سے کپڑا ہٹایا تو سیدنا ابوہریرہ رضی اللہ عنہ نے اپنا ہاتھ ان کی ناف پر رکھا ۔ ان دونوں روایات کے رجال ” صحیح “ کے رجال ہیں صرف عمیر بن اسحاق کا معاملہ مختلف ہے اور وہ ثقہ ہے ۔

سیدنا معاویہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو ان کی زبان ۔ راوی کو شک ہے شاید یہ الفاظ ہیں : ان کے ہونٹ چوستے ہوئے دیکھا ہے ، راوی کہتے ہیں : اس سے مراد سیدنا امام حسن بن علی رضی اللہ عنہ تھے ( سیدنا معاویہ رضی اللہ عنہ نے فرمایا : ) ایسی کسی ہونٹ یا زبان کو عذاب نہیں دیا جائے گا جنہیں : نبی اکرم صلی اللہ علیہ وسلم نے چوسا ہو ۔
یہ روایت امام أحمد نے نقل کی ہے اور عبدالرحمن بن ابوعوف نامی راوی کے علاوہ اس روایت کے تمام رجال ” صحیح “ کے رجال ہیں ، اور وہ راوی بھی ثقہ ہے ۔

عبدالرحمن بن ابوعوف بیان کرتے ہیں : سیدنا عمرو بن العاص رضی اللہ عنہ اور ابواعور سلمی نے سیدنا معاویہ رضی اللہ عنہ تہ سے کہا: حسن بن علی ایک کمزور شخص ہیں ، تو سیدنا معاویہ رضی اللہ عنہ نے کہا: تم دونوں یہ بات نہ کہو ، کیونکہ اللہ کے رسول نے ان کے منہ میں لعاب دہن ڈالا ہے ، اور جس کے منہ میں اللہ کے رسول نے لعاب دہن ڈالا ہو وہ بولنے میں کمزور نہیں ہو سکتا ، سیدنا امام حسن بن علی رضی اللہ عنہما نے فرمایا : اے عمرو ! جہاں تک تمہارا تعلق ہے ، تو تمہارے بارے میں دو آدمیوں نے جھگڑا کیا تھا ، تو تم اس بات کا جائزہ لو کہ تمہارا باپ کون ہے ؟ اور اے ابواعور ! جہاں تک تمہارا تعلق ہے ، تو اللہ کے رسول نے رعل اور ذکوان قبیلے اور عمرو بن سفیان پر لعنت کی ہوئی ہے ۔
یہ روایت امام طبرانی نے اپنے استاد محمد بن عون سیرافی سے نقل کی ہے ، اور میں اس سے واقف نہیں ہوں ۔ اس روایت کے بقیہ رجال ثقہ ہیں ۔

مقبری بیان کرتے ہیں : ہم لوگ سیدنا ابوہریرہ رضی اللہ عنہ کے ساتھ تھے اسی دوران سیدنا امام حسن بن على رضی اللہ عنہما تشریف لے آئے ، انہوں نے سلام کیا ، حاضرین نے انہیں سلام کا جواب دیا اور وہ تشریف لے گئے ، ہمارے ساتھ سیدنا ابوہریرہ رضی اللہ عنہ بھی تھے ۔ انہیں پتہ نہیں چلا ، انہیں بتایا گیا کہ امام حسن بن علی رضی اللہ عنہما نے سلام کیا ہے ، تو سیدنا ابوہریرہ رضی اللہ عنہ پیچھے ان کے پاس گئے اور بولے : اے میرے سردار ! آپ پر بھی سلام ہو ، سیدنا ابوہریرہ رضی اللہ عنہ سے کہا: گیا ، آپ یہ کہہ رہے تھے اے میرے سردار ! تو سیدنا ابوہریرہ رضی اللہ عنہ نے فرمایا : میں اس بات کی گواہی دیتا ہوں کہ نبی اکرم صلی اللہ علیہ وسلم نے یہ ارشاد فرمایا ہے : ” یہ ( یعنی سیدنا امام حسن رضی اللہ عنہ کے بارے میں یہ فرمایا ہے ، یہ ) سردار ہے ۔ “
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے سیدنا امام حسن بن علی رضی اللہ عنہما کے بارے میں یہ فرمایا : ” میرا یہ بیٹا سردار ہے ، اور اللہ تعالیٰ اس کے ذریعے مسلمانوں کے دو بڑے گروہوں کے درمیان صلح کروائے گا ۔ “
یہ روایت امام طبرانی نے معجم اوسط اور معجم کبیر میں نقل کی ہے ع اور امام بزار نے بھی نقل کی ہے ۔ اس کی سند میں ایک راوی عبدالرحمن بن مغراء ہے ، جسے ایک سے زیادہ افراد نے ثقہ قرار دیا ہے ، اس میں ضعف پایا جاتا ہے ، ہزار کے بقیہ رجال ” صحیح “ کے رجال ہیں ۔

حسن بیان کرتے ہیں : راوی کہتے ہیں : میرا خیال ہے ، انہوں نے اسے سیدنا انس رضی اللہ عنہ کے حوالے سے مرفوع روایت کے طور پر نقل کیا ہے ( نبی اکرم صلی اللہ علیہ وسلم نے ارشاد فرمایا : ) ” میرا یہ بیٹا سردار ہے “ یعنی نبی اکرم صلی اللہ علیہ وسلم نے سیدنا امام حسن رضی اللہ عنہ کے بارے میں یہ بات ارشاد فرمائی ۔ راوی بیان کرتے ہیں : وہ ( یعنی سیدنا امام حسن رضی اللہ عنہ ) نبی اکرم صلی اللہ علیہ وسلم کے ساتھ مشابہت رکھتے تھے ، یہ یا اس کی مانند کوئی اور کلمہ انہوں نے ارشاد فرمایا :
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں ۔

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” حسن ، اہل جنت کے نوجوانوں کا سردار ہے ۔ “
یہ روایت امام بزار نے نقل کی ہے ۔ اس کی سند میں ایک راوی جابر جعفی ہے اور وہ ضعیف ہے ۔

رقبہ بن مصقلہ بیان کرتے ہیں : جب سیدنا امام حسن بن علی رضی اللہ عنہما کا آخری وقت آیا تو انہوں نے فرمایا : مجھے نکال کر صحراء کی طرف لے جاؤ تاکہ میں غور و فکر کروں اور آسمانوں میں موجود نشانیوں کا جائزہ لوں ، جب انہیں لے جایا گیا تو انہوں نے یہ کہا: ” اے اللہ ! میں اپنی ذات کے بارے میں تیری بارگاہ سے ثواب کی امید رکھتا ہوں کیونکہ یہ میرے نزدیک سب سے زیادہ معزز ذات ہے “ تو وہ چیز جو اللہ تعالیٰ نے ان کے لئے کی وہ یہ تھی کہ انہوں نے اپنی ذات کا احتساب کیا ۔
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں ، البتہ رقبہ نامی راوی نے سیدنا امام حسن رضی اللہ عنہ سے سماع نہیں کیا ہے ، جو میرے علم کے مطابق ہے ، ایک قول کے مطابق انہوں نے سیدنا انس رضی اللہ عنہ سے سماع کیا ہوا ہے ۔

شرحبیل بیان کرتے ہیں : میں سیدنا امام حسین بن علی رضی اللہ عنہما کے ساتھ تھا ، انہوں نے سیدنا امام حسن بن علی رضی اللہ عنہما کی چارپائی ( یعنی میت کی چارپائی ) کو باہر نکالا ، ان کا یہ ارادہ تھا کہ ان کو نبی اکرم صلی اللہ علیہ وسلم کے ساتھ دفن کروائیں ، لیکن انہیں یہ بھی اندیشہ تھا کہ بنوامیہ انہیں ایسا نہیں کرنے دیں گے ، جب وہ ان کی میت لے کے مسجد تک آئے ، تو بنوامیہ کھڑے ہو گئے ، تو سیدنا عبداللہ بن جعفر رضی اللہ عنہ کھڑے ہوئے اور انہوں نے بتایا : میں نے ان صاحب کو ( یعنی سیدنا امام حسن رضی اللہ عنہ کو ) یہ فرماتے ہوئے سنا ہے : اگر لوگ منع کریں تو تم مجھے میری والدہ کے ساتھ دفن کر دینا ۔
یہ روایت امام طبرانی نے نقل کی ہے ۔ اس کی سند میں ایک راوی شرحبیل بن سعد ہے اور وہ ضعیف ہے ۔

میمون بن مہران بیان کرتے ہیں : سیدنا عبداللہ بن عباس رضی اللہ عنہما کی جب بینائی رخصت ہو گئی ، تو وہ اپنے ساتھ لے کر چلنے والے فرد سے یہ کہتے تھے کہ جب تم مجھے سیدنا معاویہ رضی اللہ عنہ کے پاس پہنچاؤ تو مجھے ان کے بچھونے تک پہنچانا اور پھر تم میرا ہاتھ چھوڑ دینا تاکہ میرے حوالے سے سیدنا معاویہ رضی اللہ عنہ کو اعتراض نہ ہو ، ایک دن انہوں نے ایسا ہی کیا ، تو سیدنا معاویہ رضی اللہ عنہ نے اپنے ساتھ بیٹھے ہوئے لوگوں میں سے کسی سے کہا: یہ ابھی غمگین ہو جائیں گے ، جب سیدنا عبداللہ بن عباس رضی اللہ عنہما اُن کے ساتھ ان کے بچھونے پر بیٹھ گئے تو سیدنا معاویہ رضی اللہ عنہ نے کہا: اے ابوعباس ! سیدنا حسن بن علی رضی اللہ عنہ کے حوالے سے اللہ تعالیٰ آپ کو اجر نصیب کرے ! سیدنا عبداللہ بن عباس رضی اللہ عنہما نے دریافت کیا : کیا ان کا انتقال ہو گیا ہے ؟ سیدنا معاویہ رضی اللہ عنہ نے جواب دیا : جی ہاں ! تو سیدنا عبداللہ بن عباس رضی اللہ عنہما نے کہا: اللہ تعالیٰ کی رحمت اور اس کی رضامندی اُن پر نازل ہو اور اللہ تعالیٰ انہیں ان کے نیک اسلاف کے ساتھ ملا دے ، اللہ کی قسم ! اے سیدنا معاویہ رضی اللہ عنہ نہ تو آپ نے ان کا گڑھا بند کیا اور نہ ہی ان کا رزق کھایا اور نہ ہی آپ نے ان کے بعد ہمیشہ رہنا ہے ، اور ہمیں تو اس سے بھی زیادہ بڑی مصیبت کا سامنا کرنا پڑا تھا اور وہ نبی اکرم صلی اللہ علیہ وسلم کا وصال تھا ، لیکن اس کے بعد بھی اللہ تعالیٰ نے ہمیں رسوائی کا شکار نہیں کیا ۔
یہ روایت امام طبرانی نے نقل کی ہے ۔ اس کی سند میں ایک راوی یعقوب بن محمد زہری ہے ، جس کی توثیق کی گئی ہے ، ایک جماعت نے اسے ضعیف قرار دیا ہے اس روایت کے بقیہ رجال ” صحیح “ کے رجال ہیں ۔

ہیثم بن عدی بیان کرتے ہیں : سیدنا امام حسن بن علی رضی اللہ عنہما کا انتقال سن چوالیس ہجری میں ہوا تھا ۔ راوی کہتے ہیں : ہیثم بن عدی نے اسی طرح بیان کیا ہے لیکن اس کے برخلاف بھی نقل کیا گیا ہے ۔

ابونعیم بیان کرتے ہیں : اس سال یعنی اٹھاون ہجری میں سیدنا امام حسن بن علی رضی اللہ عنہما اور سیدنا سعد بن ابی وقاص رضی اللہ عنہ کا انتقال ہوا ۔

ابوبکر بن حفص بیان کرتے ہیں : سیدنا امام حسن بن علی رضی اللہ عنہ کا انتقال اڑتالیس ہجری میں ہوا ۔

ان کے حوالے سے یہ بات منقول ہے : وہ بیان کرتے ہیں : سیدنا امام حسن بن علی رضی اللہ عنہما اور سیدنا سعد بن ابی وقاص رضی اللہ عنہ کا انتقال سیدنا معاویہ رضی اللہ عنہ کی حکومت کے دس سال گزرنے کے بعد ہوا ۔

ابوبکر بن ابوشیبہ بیان کرتے ہیں : سیدنا امام حسن بن علی رضی اللہ عنہما کا انتقال اڑتالیس ہجری میں ہوا ۔

یحیی بن بکیر بیان کرتے ہیں : سیدنا امام حسن بن علی رضی اللہ عنہما کا انتقال انچاس ہجری میں ہوا اور سیدنا سعید بن العاص رضی اللہ عنہ نے ان کی نماز جنازہ پڑھائی ، ان کا انتقال مدینہ منورہ میں ہوا تھا اور ان کی عمر چھیالیس یا سینتالیس سال تھی ان کی کنیت ابومحمد تھی ۔

محمد بن عبداللہ بن نمیر بیان کرتے ہیں : سیدنا امام حسن بن علی رضی اللہ عنہما سینتالیس سال کی عمر میں انتقال کر گئے تھے ۔ ان کی کنیت ابومحمد تھی ۔ ( علامہ ہیثمی فرماتے ہیں : ) میں یہ کہتا ہوں ان کی وفات کے بارے میں منقول تمام روایات کی اسانید ان کے قائلین تک مستند ہیں ۔