مجمع الزوائد ومنبع الفوائد

سیدنا زید بن ثابت رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں تمہارے درمیان دو چیزیں نائب کے طور پر چھوڑے جا رہا ہوں ، اللہ کی کتاب جو زمین اور آسمان کے درمیان لٹکی ہوئی ایک رسی ہے ( راوی کو شک ہے شاید یہ الفاظ ہیں : ) آسمان سے زمین تک لٹکی ہوئی رسی ہے ، اور میری عترت جو میرے اہل بیت ہیں ، یہ دونوں ایک دوسرے سے جدا نہیں ہوں گے ، یہاں تک کہ یہ دونوں حوض پر میرے پاس آ جائیں گے ۔ “
یہ روایت امام أحمد نے نقل کی ہے اور اس کی سند عمدہ ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں اپنے پیچھے تمہارے درمیان دو چیزیں چھوڑ کے جا رہا ہوں تم ان کے بعد کبھی گمراہ نہیں ہو گے ، اللہ کی کتاب اور میرا نسب ( یعنی میری اولاد ) یہ دونوں ایک دوسرے سے جدا نہیں ہوں گے ، یہاں تک کہ یہ دونوں حوض پر میرے پاس آ جائیں گے ۔ “
یہ روایت امام بزار نے نقل کی ہے ۔ اس کی سند میں ایک راوی صالح بن موسیٰ طلحی ہے اور وہ ضعیف ہے ۔

سیدنا علی بن ابوطالب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میرا انتقال ہو جائے گا ، اور میں تمہارے درمیان دو چیزیں چھوڑ کے جا رہا ہوں ، یعنی اللہ کی کتاب اور میرے اہل بیت ، اور ان دونوں کے بعد تم گمراہ نہیں ہو گے ، اور قیامت اس وقت تک قائم نہیں ہو گی جب تک اللہ کے رسول کے اصحاب کو یوں تلاش نہیں کیا جائے گا ، جس طرح کسی گمشدہ چیز کو تلاش کیا جاتا ہے ، اور وہ نہیں ملتی ہے ۔ “
یہ روایت امام بزار نے نقل کی ہے ۔ اس کی سند میں ایک راوی حارث ہے اور وہ ضعیف ہے ۔

سیدنا عبدالرحمن بن عوف رضی اللہ عنہ بیان کرتے ہیں : جب نبی اکرم صلی اللہ علیہ وسلم نے مکہ فتح کیا تو آپ صلی اللہ علیہ وسلم طائف کی طرف تشریف لے گئے ، آپ صلی اللہ علیہ وسلم نے سترہ یا شاید انیس دن تک اس کا محاصرہ کیے رکھا ، پھر آپ صلی اللہ علیہ وسلم خطبہ دینے کے لئے کھڑے ہوئے ، آپ صلی اللہ علیہ وسلم نے اللہ تعالیٰ کی حمد و ثناء بیان کی اور پھر یہ ارشاد فرمایا : ” میں تمہیں اپنی عترت کے بارے میں بھلائی کی تلقین کرتا ہوں ، تم سے ملنے کی جگہ حوض ہے ، اس ذات کی قسم ! جس کے دست قدرت میں میری جان ہے ، تم لوگ نماز ضرور قائم کرو گے ، اور زکوۃ ضرور ادا کرو گے ، ورنہ میں تمہاری طرف اپنے میں سے ایک شخص کو بھیجوں گا ( راوی کو شک ہے شاید یہ الفاظ ہیں ) تمہاری طرف اس شخص کو بھیجوں گا جو میری طرح ہو گا ، اور وہ تمہاری گردنیں اڑائے گا ۔ “ پھر نبی اکرم صلی اللہ علیہ وسلم نے سیدنا علی رضی اللہ عنہ کا ہاتھ پکڑ کر ارشاد فرمایا : اور وہ یہ ہو گا ۔
یہ روایت امام بزار نے نقل کی ہے ۔ اس کی سند میں ایک راوی طلحہ بن جبر ہے اور وہ ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے جو آخری بات ارشاد فرمائی وہ یہ تھی : ” میرے بعد میرے اہل بیت کا خیال رکھنا ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عاصم بن عبیداللہ ہے اور وہ ضعیف ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں تمہارے درمیان دو چیزیں چھوڑ کے جا رہا ہوں ، ان میں سے ایک دوسری سے بڑی ہے اللہ کی کتاب جو آسمان سے زمین تک لٹکی ہوں ایک رسی ہے ، اور میری عترت میرے اہل بیت ، یہ دونوں ایک دوسرے سے جدا نہیں ہوں گے ، یہاں تک کہ حوض پر یہ دونوں میرے پاس آ جائیں گے ۔ “
یہ روایت امام طبرانی نے معجم اوسط میں نقل کی ہے اور اس کی سند میں ایسے رجال ہیں جن کے بارے میں اختلاف پایا جاتا ہے ۔

سیدنا زید بن ارقم رضی اللہ عنہ بیان کرتے ہیں : نبی اکرم صلی اللہ علیہ وسلم نے ” جحفہ “ کے مقام پر پڑاؤ کیا ، پھر آپ لوگوں کی طرف متوجہ ہوئے ، آپ صلی اللہ علیہ وسلم نے اللہ تعالیٰ کی حمد و ثناء بیان کرنے کے بعد ارشاد فرمایا : ” میں نے جس بھی نبی کو پایا اس کی عمر اس سے پہلے والے نبی سے نصف ہوتی تھی اور عنقریب مجھے بلا لیا جائے گا ، تو مجھے جانا ہو گا ، تو تم لوگ کیا کہتے ہو ؟ لوگوں نے عرض کی : آپ نے خیرخواہی کر دی ہے ۔ نبی اکرم صلی اللہ علیہ وسلم نے دریافت کیا : کیا تم لوگ اس بات کی گواہی نہیں دیتے ہو کہ اللہ تعالیٰ کے علاوہ اور کوئی معبود نہیں ہے اور سیدنا محمد ( صلی اللہ علیہ وسلم ) اس کے بندے اور اس کے رسول ہیں ، جنت حق ہے اور جہنم حق ہے ؟ لوگوں نے عرض کی : ہم اس بات کی گواہی دیتے ہیں ۔ راوی بیان کرتے ہیں : نبی اکرم صلی اللہ علیہ وسلم نے اپنا دست مبارک بلند کیا اور اسے اپنے سینے پر رکھا اور ارشاد فرمایا : میں تمہارے ساتھ گواہی دیتا ہوں ، پھر آپ صلی اللہ علیہ وسلم نے دریافت کیا : کیا تم لوگ سنتے نہیں ہو ؟ لوگوں نے عرض کی : جی ہاں ! نبی اکرم صلی اللہ علیہ وسلم نے فرمایا : ” میں حوض پر تمہارا پیشرو ہوؤں گا اور تم حوض پر میرے پاس آؤ گے اس حوض کی چوڑائی اتنی ہے جتنا صنعاء اور بصریٰ کے درمیان فاصلہ ہے ، اس کے پاس آسمان کے ستاروں کی تعداد میں چاندی کے بنے ہوئے پیالے ہیں ، تو تم اس بات کا جائزہ لینا کہ تم میرے بعد دو چیزوں کے بارے میں کیا کرو گے ؟ ایک منادی نے پکار کر یہ کہا: یا رسول اللہ ! دو چیزوں سے مراد کیا ہے ؟ نبی اکرم صلی اللہ علیہ وسلم نے فرمایا : اللہ کی کتاب ، جس کا ایک کنارہ اللہ کے ہاتھ میں ہے اور ایک کنارہ تمہارے ہاتھوں میں ہے ، تم اسے مضبوطی سے تھام کے رکھنا ، تم گمراہ نہیں ہو گے اور دوسرا میری عشیرت ، لطیف اور خبیر ذات نے مجھے یہ بات بتائی ہے کہ یہ دونوں چیزیں ایک دوسرے سے اس وقت تک جدا نہیں ہوں گی یہاں تک کہ یہ دونوں حوض پر میرے پاس آ جائیں گی ، تو میں نے ان دونوں کے لئے اپنے پروردگار سے دعا مانگی ہے ، تو تم ان دونوں سے آگے نکلنے کی کوشش نہ کرنا ورنہ تم ہلاکت کا شکار ہو جاؤ گے ، اور تم ان دونوں کے بارے میں کوتاہی بھی نہ کرنا ورنہ تم ہلاکت کا شکار ہو جاؤ گے ، اور تم ان دونوں کو تعلیم دینے کی کوشش بھی نہ کرنا کیونکہ یہ تم سے زیادہ علم رکھتے ہیں ۔ “ پھر نبی اکرم صلی اللہ علیہ وسلم نے سیدنا علی رضی اللہ عنہ کا ہاتھ پکڑا اور ارشاد فرمایا : ” میں جس کے نزدیک اس کی جان سے زیادہ قریب ہوں ، تو علی بھی اس کا ولی ہے ، اے اللہ ! جو اس سے محبت رکھتا ہو ، تو بھی اس سے محبت رکھنا اور جو اس سے دشمنی رکھتا ہو ، تو اس سے دشمنی رکھنا ۔ “

ایک روایت اس سے زیادہ مختصر ہے ، جس میں یہ الفاظ ہیں : ” اس حوض کے پاس ستاروں کی تعداد میں سونے اور چاندی کے بنے ہوئے پیالے ہوں گے ۔ “ اس روایت میں یہ الفاظ بھی ہیں : ” بڑی چیز اللہ کی کتاب ہے ، اور چھوٹی چیز میری عترت ہے ۔ “

ایک روایت میں یہ الفاظ ہیں : جب نبی اکرم صلی اللہ علیہ وسلم حجتہ الوداع سے واپس تشریف لے گئے تو آپ نے غدیر خم کے مقام پر پڑاؤ کیا ، وہاں آپ کے حکم کے تحت درختوں کے نیچے جھاڑو دی گئی ، پھر آپ کھڑے ہوئے آپ نے ارشاد فرمایا : یوں لگتا ہے جیسے مجھے بلا لیا جائے گا ، اور مجھے جانا ہو گا ۔ اس روایت کے آخر میں یہ الفاظ ہیں : میں نے سیدنا زید رضی اللہ عنہ سے دریافت کیا ، کیا آپ نے خود نبی اکرم صلی اللہ علیہ وسلم کی زبانی یہ بات سنی ہے ، تو انہوں نے فرمایا : اس وقت اس مقام پر جو بھی فرد موجود تھا وہ اپنی دونوں آنکھوں کے ذریعے نبی اکرم صلی اللہ علیہ وسلم کو دیکھ رہا تھا اور اپنے دونوں کانوں کے ذریعے نبی اکرم صلی اللہ علیہ وسلم کی بات کو سن رہا تھا ۔ ( علامہ ہیثمی فرماتے ہیں : ) میں یہ کہتا ہوں صحیح میں اس روایت کا ایک حصہ مذکور ہے اور ترمذی میں اس میں سے
یہ روایت مذکور ہے : ” جس کا میں مولیٰ ہوں تو علی بھی اس کا مولیٰ ہے ۔ “
یہ روایت امام طبرانی نقل کی ہے پہلی اور دوسری سند میں ایک راوی حکیم بن جبیر ہے اور ضعیف ہے ۔

سیدنا حذیفہ بن اسید غفاری رضی اللہ عنہ بیان کرتے ہیں : جب نبی اکرم صلی اللہ علیہ وسلم حجۃ الوداع سے واپس تشریف لے گئے تو آپ نے اپنے اصحاب کو حکم دیا کہ وہ متفرق درختوں کے نیچے نہ جائیں اور ان کے نیچے جا کے پڑاؤ نہ کریں ، نبی اکرم صلی اللہ علیہ وسلم نے ان لوگوں کو پیغام بھیجا اور حکم دیا کہ تم لوگ اٹھو اور ان درختوں کے نیچے صفائی کرو ، پھر بی اکرم صلی اللہ علیہ وسلم ان درختوں کی طرف گئے ، آپ نے وہاں نماز ادا کی پھر آپ کھڑے ہوئے اور آپ نے ارشاد فرمایا : ” اے لوگو ! لطیف اور خبیر ذات نے مجھے یہ بات بتائی ہے کہ اس نے جس بھی نبی کو دنیا میں بھیجا تو اس کی عمر اس سے پہلے والے نبی کی عمر سے نصف ہوتی تھی ، میرا یہ خیال ہے کہ عنقریب میرا بلاوا آ جائے گا ، اور مجھے جانا ہو گا مجھ سے بھی حساب لیا جائے گا اور تم لوگوں سے بھی حساب لیا جائے گا ، تو تم لوگ کیا کہو گے ؟ لوگوں نے کہا: ہم اس بات کی گواہی دیں گے کہ آپ نے تبلیغ کر دی ، بھرپور کوشش کی ، خیرخواہی کی ، اللہ تعالیٰ آپ کو جزائے خیر عطا کرے ، نبی اکرم صلی اللہ علیہ وسلم نے دریافت کیا : کیا تم لوگ اس بات کی گواہی نہیں دیتے ہو کہ اللہ تعالیٰ کے علاوہ اور کوئی معبود نہیں ہے ، اور سیدنا محمد ( صلی اللہ علیہ وسلم ) اس کے بندے اور اس کے رسول ہیں ، اور جنت حق ہے ، اور جہنم حق ہے ، اور موت حق ہے ، اور مرنے کے بعد دوبارہ زندہ کیا جانا حق ہے ، اور قیامت آنے والی ہے اس میں کوئی شک نہیں ہے ، اور اللہ تعالیٰ قبروں میں موجود لوگوں کو دوبارہ زندہ کر دے گا ؟ لوگوں نے جواب دیا : جی ہاں ہم اس بات کی گواہی دیتے ہیں : نبی اکرم صلی اللہ علیہ وسلم نے کہا: اے اللہ ! تو گواہ ہو جاؤ ! پھر نبی اکرم صلی اللہ علیہ وسلم نے ارشاد فرمایا : اے لوگو ! بے شک اللہ تعالیٰ میرا مولیٰ ہے اور میں مومنین کا مولیٰ ہوں اور میں ان کے نزدیک ان کی جانوں سے زیادہ قریب ہوں ، تو جس کا میں مولیٰ ہوں یہ بھی اس کا مولیٰ ہے ۔ نبی اکرم صلی اللہ علیہ وسلم کی مراد سیدنا علی رضی اللہ عنہ تھے ( نبی اکرم صلی اللہ علیہ وسلم نے دعا کی : ) ” اے اللہ ! جو اس سے محبت رکھتا ہو ، تو اس سے محبت رکھنا اور جو اس سے دشمنی رکھتا ہو ، تو اس سے دشمنی رکھنا ۔ “ پھر نبی اکرم صلی اللہ علیہ وسلم نے ارشاد فرمایا : اے لوگو ! میں تمہارا پیشرو ہوؤں گا ، اور تم حوض پر میرے پاس آؤ گے ، وہ ایسا حوض ہے جو بصریٰ سے لے کر صنعاء تک کے درمیان فاصلے سے زیادہ چوڑا ہے ، اور اس کے پاس ستاروں کی تعداد میں چاندی سے بنے ہوئے پیالے ہیں ، اور جب تم لوگ حوض پر میرے پاس آؤ گے ، تو میں تم سے دو چیزوں کے بارے میں دریافت کروں گا ، تو تم لوگ اس بات کا جائزہ لو گے کہ تم میرے بعد ان دو چیزوں کے بارے میں کیا کرتے ہو ؟ ان میں بڑی چیز اللہ کی کتاب ہے ، جس کا ایک کنارہ اللہ کے ہاتھ میں ہے اور ایک کنارہ تم لوگوں کے ہاتھ میں ہے ، تم اسے مضبوطی سے تھام کے رکھو ، تم گمراہ نہیں ہو گے ، اور تم تبدیلی نہ کرنا ( اور دوسری چیز ) میری عترت میرے اہل بیت ہیں ، لطیف اور خبیر ذات نے مجھے یہ بات بتائی ہے کہ یہ دونوں ایک دوسرے سے جدا نہیں ہوں گے ، یہاں تک کہ یہ دونوں حوض پر میرے پاس آ جائیں گے ۔ “
یہ روایت امام طبرانی نے نقل کی ہے ۔ اس کی سند میں ایک راوی زید بن حسن انماطی ہے ابوحاتم کہتے ہیں : یہ منکر الحدیث ہے ، ابن حبان نے اسے ثقہ قرار دیا ہے اس کی دو اسناد میں سے ایک کے بقیہ رجال ثقہ ہیں ۔

علی بن علی ہلالی اپنے والد کا یہ بیان نقل کرتے ہیں : ” میں نبی اکرم صلی اللہ علیہ وسلم کی اس بیماری کے دوران نبی اکرم صلی اللہ علیہ وسلم کی خدمت میں حاضر ہوا جس بیماری کے آخرت میں آپ کا وصال ہو گیا تھا ۔ سیدہ فاطمہ رضی اللہ عنہا نبی اکرم صلی اللہ علیہ وسلم کے سرہانے موجود تھیں ۔ راوی کہتے ہیں : وہ رونے لگیں ، یہاں تک کہ ان کی آواز بلند ہوئی ، تو نبی اکرم صلی اللہ علیہ وسلم نے نگاہ اٹھا کر ان کی طرف دیکھا اور فرمایا : میری محبوب فاطمہ ! تم کیوں رو رہی ہو ؟ انہوں نے عرض کی : مجھے آپ کے بعد ضائع ہو جانے کا اندیشہ ہے ۔ نبی اکرم صلی اللہ علیہ وسلم نے فرمایا : اے میری محبوب شخصیت ! کیا تم یہ بات نہیں جانتی ہو کہ اللہ تعالیٰ نے زمین کی طرف جھانک کر دیکھا اور ان میں سے تمہارے باپ کو منتخب کر کے اسے اپنی رسالت کے ہمراہ مبعوث کیا پھر اس نے ایک مرتبہ جھانک کر دیکھا اور اہل زمین میں سے تمہارے شوہر کو منتخب کیا اور اس نے میری طرف یہ وحی کی کہ میں تمہاری شادی اس کے ساتھ کروا دوں ۔ اے فاطمہ ! ہم اہل بیت وہ لوگ ہیں کہ اللہ تعالیٰ نے ہمیں سات خصوصیات عطا کی ہیں جو ہم سے پہلے کسی کو نہیں دی گئیں ، اور ہمارے بعد بھی کسی کو نہیں دی جائیں گی ، میں انبیاء کے سلسلے کو ختم کرنے والا ہوں اور اللہ تعالیٰ کے نزدیک انبیاء میں سب سے زیادہ معزز ہوں اور اللہ تعالیٰ کے نزدیک مخلوق میں سب سے زیادہ محبوب ہوں ، میں تمہارا باپ ہوں اور میرا وصی تمام اوصیاء سے بہتر ہے ، اور اللہ تعالیٰ کے نزدیک ان میں سب سے زیادہ محبوب ہے ، اور وہ تمہارا شوہر ہے ، اور ہمارا شہید تمام شہداء سے بہتر ہے ، اور اللہ تعالیٰ کے نزدیک تمام شہداء سے زیادہ محبوب ہے ، اور وہ تمہارا چچا سیدنا حمزہ بن عبدالمطلب رضی اللہ عنہ ہے جو تمہارے شوہر کا بھی چچا ہے ، اور ہم میں سے ایک شخص وہ ہے جس کے دو سبز پر ہیں ۔ وہ جنت میں فرشتوں کے ہمراہ جہاں چاہے اڑ کے چلا جاتا ہے ، اور وہ تمہارے باپ کا چچا زاد ہے ، اور تمہارے شوہر کا بھائی ہے ، اور ہم میں سے اس امت کے دو ” سبط “ ( نواسے ) ہیں ، اور وہ دونوں تمہارے بیٹے حسن اور حسین ہیں ۔ وہ دونوں اہل جنت کے نوجوانوں کے سردار ہیں ، اور ان دونوں کا باپ ان دونوں سے زیادہ بہتر ہے ، اس ذات کی قسم ! جس نے مجھے حق کے ہمراہ مبعوث کیا ہے : اے فاطمہ ! اس ذات کی قسم ! جس نے مجھے حق کے ہمراہ مبعوث کیا ہے ان دونوں کی اولاد میں سے اس امت میں مہدی آئے گا ، جس وقت دنیا میں قتل و غارت گری عام ہو چکی ہو گی ، فتنے ظاہر ہو چکے ہوں گے ، راستے بند ہو چکے ہوں گے ، لوگ ایک دوسرے پر حملہ آور ہو رہے ہوں گے ، اس وقت کوئی بڑا کسی چھوٹے پر رحم نہیں کرے گا ، اور کوئی چھوٹا کسی بڑے کی تعظیم نہیں کرے گا ، اس وقت اللہ تعالیٰ ان کی اولاد میں سے مہدی کو بھیجے گا جو گمراہی کے قلعوں کو فتح کر دے گا ، بند دلوں کو کھول دے گا ، اور آخری زمانے میں دین کو یوں قائم کرے گا ، جس طرح میں نے ابتدائی زمانے میں اس کو قائم کیا تھا ، وہ دنیا کو عدل سے بھر دے گا ، جس طرح وہ پہلے ظلم سے بھری ہوئی تھی ، اے فاطمہ ! تم غمگین نہ ہو اور تم روؤ نہیں ، بے شک اللہ تعالیٰ مجھ سے زیادہ تمہارے بارے میں مہربان اور زیادہ رحم کرنے والا ہے ، اور اس کی وجہ یہ ہے کہ میرے دل میں جو تمہاری جگہ ہے ، اور اللہ تعالیٰ نے تمہاری شادی ایسے شخص کے ساتھ کی ہے ، جو تمہارے گھرانے میں حسب کے اعتبار سے سب سے زیادہ معزز ہے ، اور منصب کے اعتبار سے سب سے زیادہ عزت والا ہے ، رعایا کے لئے سب سے زیادہ رحم کرنے والا ہے ، سب سے بہترین طریقے سے انصاف کرنے والا ہے ، عدالتی فیصلوں کے بارے میں سب سے زیادہ بصیرت رکھتا ہے ، میں نے اپنے پروردگار سے یہ دعا مانگی ہے کہ میرے اہل بیت میں سب سے پہلے تم مجھ سے آ ملو “ ۔ سیدنا علی رضی اللہ عنہ بیان کرتے ہیں : جب نبی اکرم صلی اللہ علیہ وسلم کا وصال ہو گیا ، تو اس کے بعد سیدہ فاطمہ رضی اللہ عنہا صرف پچھتر دن زندہ رہی تھیں ، یہاں تک کہ اللہ تعالیٰ نے انہیں بھی نبی اکرم صلی اللہ علیہ وسلم کے ساتھ ملا دیا ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی ہیثم بن حبیب ہے ابوحاتم کہتے ہیں ۔ یہ منکر الحدیث ہے اور اس حدیث کے حوالے سے اس پر تہمت عائد کی گئی ہے ۔

سیدنا ابوایوب انصاری رضی اللہ عنہ روایت کرتے ہیں : نبی اکرم صلی اللہ علیہ وسلم نے سیدہ فاطمہ رضی اللہ عنہا سے فرمایا : ” ہمارا ( یعنی ہمارے خاندان کا ) نبی تمام انبیاء سے بہتر ہے ، اور وہ تمہارا باپ ہے اور ہمارا شہید تمام شہداء سے بہتر ہے ، اور وہ تمہارے باپ کا چچا حمزہ ہے ، ہم میں سے ایک فرد وہ ہے جس کے دو پر ہیں ۔ وہ ان کے ذریعے جنت میں جہاں چاہے ، وہ اڑ کے چلا جاتا ہے اور وہ تمہارے باپ کا چچا زاد جعفر ہے ، اور ہم میں سے اس امت کے دو ” سبط “ ( یعنی نواسے ) ہیں ، یعنی حسن اور حسین ، وہ دونوں تمہارے بیٹے ہیں ، اور ہم میں سے مہدی ہو گا ۔ “
یہ روایت امام طبرانی نے معجم صغیر میں نقل کی ہے ۔ اس کی سند میں ایک راوی قیس بن ربیع ہے اور وہ ضعیف ہے ، ویسے اس کی توثیق کی گئی ہے ، اس روایت کے بقیہ رجال ثقہ ہیں ۔

سیدہ ام سلمہ رضی اللہ عنہا بیان کرتی ہیں : ایک مرتبہ نبی اکرم صلی اللہ علیہ وسلم میرے گھر میں موجود تھے اسی دوران خادم نے بتایا : سیدنا علی رضی اللہ عنہ اور سیدہ فاطمہ رضی اللہ عنہا دروازے پر موجود ہیں ( یا آ رہے ہیں ) سیدہ ام سلمہ رضی اللہ عنہا کہتی ہیں : نبی اکرم صلی اللہ علیہ وسلم نے فرمایا : تم اٹھ جاؤ ، اور میرے اہل بیت سے ذرا ہٹ جاؤ ! سیدہ ام سلمہ رضی اللہ عنہا کہتی ہیں میں بٹ گئی اور گھر میں ایک طرف ہو کے بیٹھ گئی ، سیدنا علی رضی اللہ عنہ اور سیدہ فاطمہ رضی اللہ عنہا اندر آئے ، ان دونوں کے ساتھ ان کے بچے حسن اور حسین تھے ، یہ دونوں کمسن بچے تھے ، نبی اکرم صلی اللہ علیہ وسلم نے ان دونوں بچوں کو پکڑ کر اپنی گود میں بٹھایا اور ان دونوں کو بوسہ دیا ، آپ نے ایک طرف سے سیدنا علی رضی اللہ عنہ کو ساتھ لگایا دوسرے ہاتھ سے سیدہ فاطمہ رضی اللہ عنہا کو ساتھ لگا کے انہیں بوسہ دیا ، آپ نے سیدنا علی رضی اللہ عنہ کو بھی بوسہ دیا ، پھر آپ نے ان پر ایک سیاہ رنگ کی چادر ڈالی اور پھر یہ کہا: ” اے اللہ ! تیری طرف آئیں گے ، جہنم کی طرف نہیں جائیں گے ، میں اور میرے اہل بیت ۔ “ سیدہ ام سلمہ رضی اللہ عنہا کہتی ہیں میں نے عرض کی : یا رسول اللہ ! میں بھی ؟ نبی اکرم صلی اللہ علیہ وسلم نے فرمایا : تم بھی ۔
یہ روایت امام أحمد نے نقل کی ہے ۔

نبی اکرم صلی اللہ علیہ وسلم کی زوجہ محترمہ سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے سیدہ فاطمہ رضی اللہ عنہا سے فرمایا : تم اپنے شوہر اور اپنے دونوں بیٹوں کو لے کے میرے پاس آؤ ، سیدہ فاطمہ رضی اللہ عنہا انہیں ساتھ لے کے آئیں ، تو نبی اکرم صلی اللہ علیہ وسلم نے ان پر چادر ڈالی جو میرے نیچے موجود تھی ، وہ خیبر سے بنی ہوئی چادر تھی جو ہمیں خیبر سے ملی تھی ، پھر نبی اکرم صلی اللہ علیہ وسلم نے فرمایا : اے اللہ ! یہ آل محمد ہیں ، تو اپنی رحمتیں اور برکتیں محمد کی آل پر نازل فرما ، جس طرح تو نے انہیں سیدنا ابراہیم علیہ السلام کی آل پر نازل کیا تھا ، بے شک تو لائق حمد اور بزرگی کا مالک ہے ۔ “ ( علامہ ہیثمی فرماتے ہیں : ) میں یہ کہتا ہوں : یہ روایت امام ترمذی نے نقل کی ہے ، جس میں اختصار کے ساتھ صرف نماز کا ذکر ہے ۔
یہ روایت امام ابویعلیٰ نے نقل کی ہے ۔ اس کی سند میں ایک راوی عقبہ بن عبداللہ رفاعی ہے اور وہ ضعیف ہے ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم کی صاحبزادی سیدہ فاطمہ رضی اللہ عنہا نبی اکرم صلی اللہ علیہ وسلم کی خدمت میں حاضر ہوئیں ، انہوں نے سیدنا حسن رضی اللہ عنہ اور سیدنا حسین رضی اللہ عنہ کو اٹھایا ہوا تھا ، ان کے ایک ہاتھ میں ہنڈیا بھی تھی جس میں گرم کھانا موجود تھا ، وہ اسے لے کے نبی اکرم صلی اللہ علیہ وسلم کے پاس آئی تھیں اور انہوں نے وہ ہنڈیا نبی اکرم صلی اللہ علیہ وسلم کے سامنے رکھی تو نبی اکرم صلی اللہ علیہ وسلم نے ان سے دریافت کیا : ابوالحسن کہاں ہے ۔ انہوں نے جواب دیا : وہ گھر میں ہیں : نبی اکرم صلی اللہ علیہ وسلم نے انہیں بلوایا ، پھر نبی اکرم صلی اللہ علیہ وسلم سیدنا علی رضی اللہ عنہ سیدہ فاطمہ رضی اللہ عنہا ، حسن و حسین بیٹھے اور کھانے لگے ۔ سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے اس وقت مجھے کھانے کی دعوت نہیں دی حالانکہ اس سے پہلے آپ جب بھی کوئی کھانا کھاتے تھے اور میں آپ کے پاس موجود ہوتی تھی ، تو آپ مجھے کھانے کی دعوت دے دیتے تھے ، لیکن اس دن ایسا نہیں ہوا ، جب نبی اکرم صلی اللہ علیہ وسلم فارغ ہوئے تو آپ نے ان لوگوں پر اپنا کپڑا ڈالا اور پھر یہ فرمایا : ” اے اللہ ! جو ان سے دشمنی رکھے ، تو اس سے دشمنی رکھنا اور جو ان سے محبت رکھے ، تو اس سے محبت رکھنا“ ۔
یہ روایت امام ابویعلیٰ نے نقل کی ہے اور اس کی سند عمدہ ہے ۔

شداد ابوعمار بیان کرتے ہیں : میں سیدنا واثلہ بن اسقع رضی اللہ عنہ کی خدمت میں حاضر ہوا ، ان کے پاس کچھ لوگ موجود تھے ۔ ان لوگوں نے سیدنا علی رضی اللہ عنہ کا ذکر کیا ( اور ان پر تنقید کی ) جب وہ لوگ اٹھ کر چلے گئے تو انہوں نے کہا: کیا میں تمہیں وہ بات بتاؤں جو میں نے نبی اکرم صلی اللہ علیہ وسلم کی طرف سے دیکھی ہے ، میں نے جواب دیا : جی ہاں ، تو انہوں نے بتایا میں سیدہ فاطمہ رضی اللہ عنہا کے پاس آیا میں نے ان سے سیدنا علی رضی اللہ عنہ کے بارے میں دریافت کیا تو انہوں نے بتایا : وہ نبی اکرم صلی اللہ علیہ وسلم کے ساتھ گئے ہیں ، اور ان کے ساتھ حسن اور حسین ہیں ، میں سیدنا علی رضی اللہ عنہ کا انتظار کرنے لگا یہاں تک کہ نبی اکرم صلی اللہ علیہ وسلم تشریف لے آئے ، آپ کے ساتھ سیدنا حسن رضی اللہ عنہ اور سیدنا حسین رضی اللہ عنہ تھے ، آپ نے ان دونوں میں سے ہر ایک کو ایک ہاتھ سے پکڑا ہوا تھا ، آپ گھر کے اندر تشریف لے آئے ، آپ سیدنا علی رضی اللہ عنہ اور سیدہ فاطمہ رضی اللہ عنہا کے قریب آئے ، آپ نے حسن رضی اللہ عنہ اور حسین رضی اللہ عنہ کو ، ان دونوں میں سے ہر ایک کو زانوں پر بٹھایا ، پھر آپ نے ان پر اپنا کپڑا ڈالا ( راوی کو شک ہے شاید یہ الفاظ ہیں ) اپنی چادر ڈالی پھر آپ نے یہ آیت تلاوت کی : ” اے اہل بیت ! اللہ تعالیٰ یہ ارادہ کرتا ہے کہ تم سے گندگی کو دور کر دے اور تمہیں اچھی طرح سے پاک کر دے ۔ “ نبی اکرم صلی اللہ علیہ وسلم نے یہ بھی فرمایا : اے اللہ ! یہ میرے اہل بیت ہیں اور میرے اہل بیت زیادہ حق رکھتے ہیں ۔
یہ روایت امام أحمد نے نقل کی ہے اور امام ابویعلیٰ نے اختصار کے ساتھ نقل کی ہے ، اور انہوں نے یہ الفاظ زائد نقل کیے ہیں : ” تیری طرف ! جہنم کی طرف نہیں ۔ “
یہ روایت امام طبرانی نے بھی نقل کی ہے ۔ اس کی سند میں ایک راوی محمد بن مصعب ہے اور وہ ضعیف الحدیث ہے ، اور خراب حافظے کا مالک ہے ، اپنی ذات کے اعتبار سے وہ ایک نیک شخص ہے ۔

ابوعمار ہی سے منقول ہے وہ بیان کرتے ہیں : میں سیدنا واثلہ بن اسقع رضی اللہ عنہ کے پاس بیٹھا ہوا تھا ، اسی دوران کچھ لوگوں نے سیدنا علی رضی اللہ عنہ کا ذکر کرتے ہوئے انہیں برا کہا: ، جب وہ لوگ اٹھ کر چلے گئے ، تو سیدنا واثلہ رضی اللہ عنہ نے کہا: میں تمہیں اس شخصیت کے بارے میں بتاتا ہوں ، جسے یہ لوگ برا کہہ رہے تھے ، ایک دن میں نبی اکرم صلی اللہ علیہ وسلم کے پاس موجود تھا ، اسی دوران سیدنا علی رضی اللہ عنہ ، سیدہ فاطمہ رضی اللہ عنہا ، سیدنا حسن رضی اللہ عنہ اور سیدنا حسین رضی اللہ عنہ تشریف لائے ، نبی اکرم صلی اللہ علیہ وسلم نے ان پر اپنی چادر ڈالی اور پھر یہ فرمایا : ” اے اللہ ! یہ میرے اہل بیت ہیں ، تو ان سے گندگی کو دور کر دے اور انہیں اچھی طرح سے پاک کر دے ۔ “ میں نے عرض کی : یا رسول اللہ ! میں بھی ان میں شامل ہوں ۔ نبی اکرم صلی اللہ علیہ وسلم نے فرمایا : تم بھی ہو ۔ راوی کہتے ہیں : اللہ کی قسم ! میرے نزدیک میرا سب سے زیادہ قابل وثوق عمل یہی ہے ۔

ایک روایت میں یہ الفاظ ہیں : مجھے جس چیز کے حوالے سے سب سے زیادہ امید ہے وہ یہی ہے ۔
یہ روایت امام طبرانی نے دو اسناد کے ساتھ نقل کی ہے سیاق کے رجال ” صحیح“ کے رجال ہیں ، صرف کلثوم بن زیاد کا معاملہ مختلف ہے ، ابن حبان نے اسے ثقہ قرار دیا ہے ، اور اس میں ضعف پایا جاتا ہے ۔

سیدنا واثلہ بن اسقع رضی اللہ عنہ بیان کرتے ہیں : میں نکلا ، میں سیدنا علی رضی اللہ عنہ سے ملنا چاہ رہا تھا ، مجھے بتایا گیا کہ وہ نبی اکرم صلی اللہ علیہ وسلم کے پاس موجود ہیں ، میں ان لوگوں کی طرف چلا گیا ۔ میں نے ان حضرات کو کانے کے بنے ہوئے ایک چھپر میں پایا ، نبی اکرم صلی اللہ علیہ وسلم تھے ، سیدنا علی رضی اللہ عنہ تھے ، سیدہ فاطمہ رضی اللہ عنہا تھیں ، سیدنا حسن رضی اللہ عنہ تھے ، سیدنا حسین رضی اللہ عنہ تھے ، نبی اکرم صلی اللہ علیہ وسلم نے انہیں کپڑے کے نیچے رکھا اور پھر یہ دعا کی : ” اے اللہ ! تو اپنی برکتیں رحمتیں مغفرت اور رضامندی مجھ پر اور ان لوگوں پر نازل فرما ۔ “
یہ روایت امام طبرانی نے نقل کی ہے ۔ اس کی سند میں ایک راوی یزید بن ربیعہ رحبی ہے اور وہ متروک ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” یہ آیت ان پانچ لوگوں کے بارے میں نازل ہوئی ہے : ” بے شک اللہ تعالیٰ یہ ارادہ کرتا ہے اے اہل بیت ! کہ وہ تم سے گندگی کو دور کر دے اور تمہیں اچھی طرح سے پاک کر دے ۔ “ ( نبی اکرم صلی اللہ علیہ وسلم نے فرمایا : یہ ان پانچ افراد کے بارے میں نازل ہوئی ہے ) میرے بارے میں ، علی فاطمہ حسن اور حسین کے بارے میں ۔ “
یہ روایت امام بزار نے نقل کی ہے ۔ اس کی سند میں ایک راوی بکر بن یحیی بن زبان ہے اور وہ ضعیف ہے ۔

سیدنا ابوسعید خدری رضی اللہ عنہ بیان کرتے ہیں : وہ اہل بیت جن سے اللہ تعالیٰ نے گندگی کو دور کر دیا ہے ، اور انہیں اچھی طرح پاک کر دیا ہے ، تو انہوں نے ان کو ہاتھ پر شمار کرتے ہوئے بتایا : وہ پانچ ہیں ، اللہ کے رسول صلی اللہ علیہ وسلم ، سیدنا علی رضی اللہ عنہ ، سیدہ فاطمہ رضی اللہ عنہا ، سیدنا حسن رضی اللہ عنہ اور سیدنا حسین رضی اللہ عنہ ۔ سیدنا ابوسعید خدری رضی اللہ عنہ کہتے ہیں : یہ آیت سیدہ ام سلمہ رضی اللہ عنہا کے گھر میں نازل ہوئی تھی ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عطیہ ہے اور وہ ضعیف ہے ۔

سیدنا ابوذر غفاری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میرے اہل بیت کی مثال سیدنا نوح علیہ السلام کی کشتی کی مانند ہے ، جو شخص اس میں سوار ہو گیا وہ نجات پا گیا ، اور جو شخص اس سے رہ گیا وہ ڈوب گیا ، جو شخص آخری زمانے میں ہمارے ساتھ جنگ کرے گا ، وہ اس شخص کی مانند ہو گا جو دجال کے ساتھ مل کر جنگ کرے گا ۔ “
یہ روایت امام بزار نے نقل کی ہے اور امام طبرانی نے تینوں کتابوں میں نقل کی ہے ، امام بزار کی سند میں ایک راوی حسن بن ابوجعفر جفری ہے ، اور امام طبرانی کی سند میں ایک راوی عبداللہ بن داہر ہے ، اور یہ دونوں متروک ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میرے اہل بیت کی مثال سیدنا نوح علیہ السلام کی کشتی کی مانند ہے ، جو شخص اس میں سوار ہو گیا وہ نجات پا گیا ، اور جو اس سے پیچھے رہ گیا وہ ڈوب گیا ۔ “
یہ روایت امام بزار اور امام طبرانی نے نقل کی ہے ۔ اس کی سند میں ایک راوی حسن بن ابوجعفر ہے اور وہ متروک ہے ۔

سیدنا عبداللہ بن زبیر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” میرے اہل بیت کی مثال سیدنا نوح علیہ السلام کی کشتی کی مانند ہے ، جو شخص اس پر سوار ہو گیا وہ سلامت رہا اور جس نے اسے چھوڑ دیا وہ ڈوب گیا ۔ “
یہ روایت امام بزار نے نقل کی ہے ۔ اس کی سند میں ایک راوی ابن لہیعہ ہے اور وہ کمزور ہے ۔

سیدنا ابوسعید خدری رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تمہارے درمیان میرے اہل بیت کی مثال سیدنا نوح علیہ السلام کی کشتی کی مانند ہے ، جو شخص اس پر سوار ہو گیا وہ نجات پا گیا ، اور جو شخص اس سے پیچھے رہ گیا وہ ڈوب گیا ، اور تمہارے درمیان میرے اہل بیت کی مثال بنی اسرائیل میں باب حطہ کی مانند ہے ، جو شخص اس میں داخل ہو گیا اس کی مغفرت ہو جائے گی ۔ “
یہ روایت امام طبرانی نے معجم صغیر اور معجم اوسط میں نقل کی ہے ، اور اس کی سند میں راویوں کی ایک جماعت ایسی ہے جن سے میں واقف نہیں ہوں ۔

سیدنا عبداللہ بن عباس رضی اللہ عنہما بیان کرتے ہیں : جب یہ آیت نازل ہوئی : ” تم یہ فرما دو کہ میں اس کے حوالے سے تم سے کوئی معاوضہ نہیں مانگتا البتہ رشتے داری کی محبت کا معاملہ مختلف ہے ۔ “ لوگوں نے عرض کی : یا رسول اللہ ! آپ کے رشتے دار کون ہیں ؟ جن کے ساتھ محبت رکھنا ہم پر واجب ہے ۔ نبی اکرم صلی اللہ علیہ وسلم نے فرمایا : علی ، فاطمہ اور ان دونوں کے دونوں بیٹے ۔
یہ روایت امام طبرانی نے نقل کی ہے ۔ اس کی سند میں ضعیف راویوں کی ایک ایسی جماعت ہے جن کی توثیق کی گئی ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ کی تین حرمتیں ہیں جو شخص ان کی حفاظت کرتا ہے اللہ تعالیٰ اس شخص کے دین اور دنیا کے معاملات کی حفاظت کرتا ہے ، اور جو شخص ان کی حفاظت نہیں کرتا اللہ تعالیٰ اس کی کسی چیز کی حفاظت نہیں کرتا ، اسلام کی حرمت ، میری حرمت اور میری رشتے داری کی حرمت ۔ “
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی ابراہیم بن حماد ہے اور وہ ضعیف ہے ۔

عمرو بن شعیب بیان کرتے ہیں : وہ سیدہ زینب بنت ابوسلمہ رضی اللہ عنہا کی خدمت میں حاضر ہوئے تو سیدہ زینب رضی اللہ عنہا نے انہیں بتایا : نبی اکرم صلی اللہ علیہ وسلم سیدہ ام سلمہ رضی اللہ عنہا کے ہاں موجود تھے آپ نے ایک طرف سیدنا حسن رضی اللہ عنہ کو اٹھایا ہوا تھا اور دوسری طرف سیدنا حسین رضی اللہ عنہ کو اٹھایا ہوا تھا اور آپ کے ساتھ سیدہ فاطمہ رضی اللہ عنہا تھیں ، نبی اکرم صلی اللہ علیہ وسلم نے فرمایا : ” اے اہل بیت ! اللہ تعالیٰ کی رحمتیں اور اس کی برکتیں تم پر نازل ہوں ، بے شک وہ لائق حمد اور بزرگی کا مالک ہے ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابن لہیعہ ہے اور وہ ضعیف ہے ۔

سیدنا ابوالحمراء رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا کہ آپ چھ ماہ تک سیدہ فاطمہ رضی اللہ عنہا کے دروازے پر آتے رہے اور یہ پڑھتے رہے : ” اے اہل بیت ! اللہ تعالیٰ یہ ارادہ کرتا ہے کہ تم سے گندگی کو دور کر دے ، اور تمہیں اچھی طرح سے پاک کر دے ۔ “
یہ روایت امام طبرانی نے نقل کی ہے ۔ اس کی سند میں ایک راوی ابوداؤد نابینا ہے اور ضعیف ہے ۔

سیدنا ابوبرزہ رضی اللہ عنہ بیان کرتے ہیں : میں سترہ ماہ تک نبی اکرم صلی اللہ علیہ وسلم کی اقتداء میں نماز ادا کرتا رہا ، آپ اپنے گھر سے نکلتے تھے ، تو سیدہ فاطمہ رضی اللہ عنہا کے دروازے پر آتے تھے اور یہ فرماتے تھے ، نماز کا وقت ہو گیا ہے ، اللہ تعالیٰ تم لوگوں پر رحمت نازل کرے ، اللہ تعالیٰ یہ ارادہ کرتا ہے کہ تم سے گندگی کو دور کر دے ۔
یہ روایت امام طبرانی نے نقل کی ہے ۔ اس کی سند میں ایک راوی عمر بن شعیب مسلی ہے اور وہ ضعیف ہے ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم سیدہ فاطمہ رضی اللہ عنہا کی رخصتی کے بعد چالیس دن تک سیدنا علی رضی اللہ عنہ کے دروازے پر تشریف لاتے رہے ، اور یہ فرماتے رہے : ” تم پر سلام ہو اے اہل بیت ! اور اللہ تعالیٰ کی رحمتیں اور اس کی برکتیں نازل ہوں ۔ اے اہل بیت ! اللہ تعالیٰ یہ ارادہ کرتا ہے کہ تم سے گندگی کو دور کر دے اور تمہیں اچھی طرح سے پاک کر دے ۔ “
یہ روایت امام طبرانی نے معجم اوسط میں نقل کی ہے اور اس کی سند میں ایسے راوی ہیں جن سے میں واقف نہیں ہوں ۔

سیدنا علی رضی اللہ عنہ بیان کرتے ہیں : وہ نبی اکرم صلی اللہ علیہ وسلم کی خدمت میں حاضر ہوئے ، نبی اکرم صلی اللہ علیہ وسلم نے اپنی چادر بچھائی ہوئی تھی ۔ سیدنا علی رضی اللہ عنہ اس پر بیٹھ گئے ، نبی اکرم صلی اللہ علیہ وسلم ، سیدنا علی رضی اللہ عنہ ، سیدہ فاطمہ رضی اللہ عنہ ، سیدنا حسن رضی اللہ عنہ ، اور سیدنا حسین رضی اللہ عنہ اس پر موجود تھے ، پھر نبی اکرم صلی اللہ علیہ وسلم نے اس کے کناروں کو پکڑا اور وہ چادر ان پر ڈال کر ارشاد فرمایا : ” اے اللہ ! ان سے راضی ہو جا جس طرح میں ان سے راضی ہوں“ ۔
یہ روایت امام طبرانی نے معجم اوسط میں نقل کی ہے اور اس کے رجال ” صحیح “ کے رجال ہیں ، صرف عبید بن طفیل کا معاملہ مختلف ہے ، اور وہ ثقہ ہے ، اس کی کنیت ابوسیّدان ہے ۔

سیدنا صبیح رضی اللہ عنہ بیان کرتے ہیں : میں نبی اکرم صلی اللہ علیہ وسلم کے دروازے پر موجود تھا اسی دوران سیدنا علی رضی اللہ عنہ سیدہ فاطمہ رضی اللہ عنہا سیدنا حسن رضی اللہ عنہ اور سیدنا حسین رضی اللہ عنہ آئے ، یہ لوگ ایک کونے میں بیٹھ گئے ، نبی اکرم صلی اللہ علیہ وسلم تشریف لائے ، آپ نے ارشاد فرمایا : تم لوگ بھلائی پر ہو ۔ راوی کہتے ہیں : اس وقت نبی اکرم صلی اللہ علیہ وسلم کے جسم پر خیبر کی چادر موجود تھی ، آپ نے وہ چادر ان پر ڈال دی اور یہ فرمایا : ” میں اس شخص سے جنگ کروں گا جو تم سے جنگ کرے گا ، اور اس شخص کے ساتھ سلامتی والا رہوں گا جو تمہارے ساتھ سلامتی والا رہے گا ۔ “
یہ روایت امام طبرانی نے معجم اوسط میں نقل کی ہے اور اس کی سند میں ایسے راوی ہیں جن سے میں واقف نہیں ہوں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا علی رضی اللہ عنہ ، سیدنا حسن رضی اللہ عنہ ، سیدنا حسین رضی اللہ عنہ اور سیده فاطمہ رضی اللہ عنہا کی طرف دیکھا اور ارشاد فرمایا : ” میں اس کے ساتھ جنگ کروں گا جو تمہارے ساتھ جنگ رکھے گا ، اور اس کے ساتھ سلامت رہوں گا جو تمہارے ساتھ سلامت رہے گا ۔ “
یہ روایت امام أحمد اور امام طبرانی نے نقل کی ہے ۔ اس کی سند میں ایک راوی تلید بن سلیمان ہے اور اس کے بارے میں اختلاف پایا جاتا ہے ، اس روایت کے بقیہ رجال ” صحیح “ کے رجال ہیں ۔

سیدنا علی رضی اللہ عنہ بیان کرتے ہیں : ایک مرتبہ نبی اکرم صلی اللہ علیہ وسلم ہمارے ہاں تشریف لائے ، میں اس وقت سویا ہوا تھا ، حسن اور حسین نے پینے کے لئے کچھ مانگا ، تو نبی اکرم صلی اللہ علیہ وسلم ہماری بکری کی طرف اٹھ کے گئے ، جس کا دودھ کم آتا تھا ۔ نبی اکرم صلی اللہ علیہ وسلم نے اس کا دودھ دوہ لیا تو وہ زیادہ نکل آیا ، سیدنا حسن رضی اللہ عنہ آئے ، نبی اکرم صلی اللہ علیہ وسلم نے انہیں ایک طرف کیا ، تو سیدہ فاطمہ رضی اللہ عنہا نے عرض کی : یوں لگتا ہے جیسے ان دونوں میں سے یہ آپ کے نزدیک زیادہ محبوب ہے ۔ یا رسول اللہ ! نبی اکرم صلی اللہ علیہ وسلم نے فرمایا : جی نہیں ، بلکہ اس نے اس سے پہلے پینے کے لیے مانگا تھا ، پھر نبی اکرم صلی اللہ علیہ وسلم نے فرمایا : میں اور تم اور یہ دونوں ( بچے ) اور یہ سویا ہوا شخص ( یعنی سیدنا علی رضی اللہ عنہ ) قیامت کے دن ایک ہی جگہ پر ہوں گے ۔ “
یہ روایت امام أحمد اور امام بزار نے نقل کی ہے ، تاہم انہوں نے یہ الفاظ نقل کیے ہیں : سیدنا علی رضی اللہ عنہ فرماتے ہیں : نبی اکرم صلی اللہ علیہ وسلم ہمارے ہاں تشریف لائے ، میں ، حسن اور حسین ایک لحاف میں سو رہے تھے ، حسن نے پینے کے لئے کچھ مانگا ، نبی اکرم صلی اللہ علیہ وسلم اٹھ کر ہمارے برتن کی طرف گئے ، آپ نے اس میں سے پیالے میں پانی انڈیلا اور اسے لے کے آئے ، اسی دوران حسین بھی اٹھ گیا ، اس نے اپنے ہاتھ کے ذریعے اشارہ کیا ( یا نبی اکرم صلی اللہ علیہ وسلم نے اپنے ہاتھ کے ذریعے اشارہ کیا کہ ابھی ٹھہر جاؤ ) سیدہ فاطمہ رضی اللہ عنہا نے کہا: یوں لگتا ہے جیسے یہ ان دونوں میں سے آپ کے نزدیک زیادہ محبوب ہے ، یا رسول اللہ ! نبی اکرم صلی اللہ علیہ وسلم نے فرمایا : اس نے پہلے مانگا تھا ، بے شک میں اور تم اور یہ دونوں ( بچے ) اور یہ سویا ہوا شخص ، قیامت کے دن ایک ہی جگہ پر ہوں گے ۔ “
یہ روایت امام طبرانی نے اس کی مانند نقل کی ہے ، تاہم انہوں نے یہ الفاظ نقل کیے ہیں : نبی اکرم صلی اللہ علیہ وسلم اٹھ کر ہمارے مشکیزے کی طرف گئے ، آپ نے اسے پیالے میں نچوڑنا شروع کیا اور فرمایا : یہ دونوں میرے نزدیک ایک ہی مرتبے کے ہیں ۔
یہ روایت امام ابویعلیٰ نے اختصار کے ساتھ نقل کی ہے ، امام أحمد کی سند میں ایک راوی قیس بن ربیع ہے ، جس کے بارے میں اختلاف پایا جاتا ہے ، امام أحمد کے بقیہ رجال ثقہ ہیں ۔

امام ابوجعفر محمد بن علی ( یعنی امام باقر رحمہ اللہ ) بیان کرتے ہیں : ہم نے سیدنا عبداللہ بن جعفر رضی اللہ عنہ سے کہا: آپ ہمیں ایسی حدیث بیان کیجئے جو آپ نے نبی اکرم صلی اللہ علیہ وسلم کی زبانی سنی ہو یا جو آپ نے نبی اکرم صلی اللہ علیہ وسلم کی طرف سے دیکھی ہو ، آپ ہمیں اپنے علاوہ کسی اور کے حوالے سے کوئی حدیث بیان نہ کیجئے گا ، اگرچہ وہ دوسرا شخص ثقہ ہی کیوں نہ ہو ، تو سیدنا عبداللہ بن جعفر رضی اللہ عنہ نے بتایا میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ناف سے لے کر گھٹنے تک کے درمیان والا حصہ ستر ہوتا ہے ۔ “

اور میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” صدقہ پروردگار کے غضب کو بجھا دیتا ہے ۔ “

اور میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میری امت کے بدترین لوگ وہ ہوں گے جو نعمتوں میں پیدا ہوں گے ، نعمتوں میں ان کی پرورش ہو گی ، انواع و اقسام کے وہ کھانے کھائیں گے ، اور چبا چبا کر باتیں کریں گے ۔ “

اور میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اے بنو ہاشم میں نے تمہارے لئے اللہ تعالیٰ سے یہ دعا مانگی ہے کہ وہ تمہیں نجباء اور رحم کرنے والے بنائے اور میں نے اس سے یہ بھی دعا مانگی ہے کہ وہ تمہارے گمراہ فرد کو ہدایت نصیب کرے تمہارے خوف زدہ شخص کو امان عطا کرے اور تمہارے بھوکے شخص کو سیر کر دے ۔ “

میں نے نبی اکرم صلی اللہ علیہ وسلم کے دائیں ہاتھ میں ککڑی اور بائیں ہاتھ میں کھجوریں دیکھیں ، آپ کبھی یہ کھا رہے تھے اور کبھی وہ کھا رہے تھے ۔