مجمع الزوائد ومنبع الفوائد

نبی اکرم صلی اللہ علیہ وسلم کو ایک بکری ( کا گوشت ) اور کچھ روٹیاں تحفے کے طور پر دی گئیں ، تو آپ نے انہیں کھانا شروع کیا اور لوگوں نے بھی انہیں کھانا شروع کیا ۔

اور میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تم پر ( جانور کی ) پشت کا گوشت کھانا لازم ہے ، کیونکہ وہ زیادہ پاکیزہ ہوتا ہے ۔ “

نبی اکرم صلی اللہ علیہ وسلم فجر سے پہلے کی دو رکعت میں اور مغرب کے بعد والی دو رکعت میں سورت کافرون اور سورت اخلاص کی تلاوت کرتے تھے ۔

سیدہ فاطمہ رضی اللہ عنہا کا مہر لوہے کی بنی ہوئی زرہ تھا ۔

میں نے نبی اکرم صلی اللہ علیہ وسلم کو سنا سیدنا عباس بھی آپ کے پاس آئے انہوں نے عرض کی : یا رسول اللہ ! میں کچھ لوگوں کے پاس آیا وہ آپس میں بات چیت کر رہے تھے جب انہوں نے مجھے دیکھا ، تو وہ چپ ہو گئے ۔ انہوں نے یہ صرف اس وجہ سے کیا ہے ، کیونکہ وہ لوگ ہم سے بغض رکھتے ہیں ، تو نبی اکرم صلی اللہ علیہ وسلم نے دریافت کیا : کیا ان لوگوں نے ایسا کیا ہے ، اس ذات کی قسم ! جس کے دست قدرت میں میری جان ہے ، ان میں سے کوئی ایک شخص اس وقت تک مومن نہیں ہو سکتا جب تک وہ آپ لوگوں سے محبت نہیں رکھتا ، کیا وہ لوگ یہ امید رکھتے ہیں کہ میری شفاعت کی وجہ سے وہ جنت میں داخل ہو جائیں گے ، اور کیا بنو عبدالمطلب کو اس کی امید نہیں ہو گی ۔ “ ( علامہ ہیثمی فرماتے ہیں : ) میں یہ کہتا ہوں : ” صحیح“ میں اس میں سے صرف کھجور کے ساتھ ککڑی کھانے والا حصہ مذکور ہے ، اور امام ابن ماجہ نے اس میں سے پشت کے گوشت کے سب سے زیادہ پاکیزہ گوشت ہونے کا حصہ نقل کیا ہے ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی اصرم بن حوشب ہے اور وہ متروک ہے ۔

ایک روایت میں یہ الفاظ ہیں ( نبی اکرم صلی اللہ علیہ وسلم نے ارشاد فرمایا : ) ” تم میں سے کوئی ایک شخص اس وقت تک مومن نہیں ہو سکتا جب تک میری محبت کی وجہ سے وہ آپ لوگوں کے ساتھ محبت نہیں رکھتا ۔ “
یہ روایت امام طبرانی نے معجم صغیر میں بہت زیادہ اختصار کے ساتھ نقل کی ہے ۔

شہر بن حوشب بیان کرتے ہیں : کچھ خطیب لوگ کھڑے ہوئے اور خطبہ کے دوران انہوں نے سیدنا علی رضی اللہ عنہ کو برا کہا: ، ان سب سے آخر میں انصار سے تعلق رکھنے والے ایک صاحب کھڑے ہوئے جن کا نام سیدنا انیس رضی اللہ عنہ تھا ، انہوں نے فرمایا : اللہ کی قسم ! میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میں قیامت کے دن اس سے زیادہ تعداد کے لوگوں کی شفاعت کروں گا جتنے زمین پر درخت اور پتھر ہیں ۔ “ ( پھر سیدنا انیس رضی اللہ عنہ نے فرمایا : ) اللہ کی قسم ! کوئی بھی شخص اللہ کے رسول صلی اللہ علیہ وسلم سے زیادہ صلہ رحمی کرنے والا نہیں ہے ، تو کیا دوسرے لوگوں کو تو شفاعت کی امید ہو گی اور نبی اکرم صلی اللہ علیہ وسلم کے اہل بیت کو وہ شفاعت نہیں ملے گی ۔
یہ روایت امام بزار نے نقل کی ہے ۔ اس کی سند میں ایسا راوی ہے جس سے میں واقف نہیں ہوں ۔

سیدنا ابوسعید خدری رضی اللہ عنہ بیان کرتے ہیں : ایک دن نبی اکرم صلی اللہ علیہ وسلم سیدہ فاطمہ رضی اللہ عنہا کے پاس تشریف لائے ، سیدنا علی رضی اللہ عنہ اس وقت سو رہے تھے ، سیدہ فاطمہ رضی اللہ عنہا لیٹی ہوئی تھیں اور ان کے دونوں بیٹے ان کے پہلو میں لیٹے ہوئے تھے ۔ سیدنا حسن رضی اللہ عنہ نے پینے کے لئے کچھ مانگا تو نبی اکرم صلی اللہ علیہ وسلم ایک بکری کے پاس تشریف لے گئے جس کے ہاں بچہ ہونے والا تھا ۔ نبی اکرم صلی اللہ علیہ وسلم نے اس کا دودھ دوہ لیا اور اسے لے کے آئے ، اسی دوران سیدنا حسین رضی اللہ عنہ بھی بیدار ہو گئے اور انہوں نے یہ ضد کرنا شروع کی کہ وہ سیدنا حسن رضی اللہ عنہ سے پہلے اسے پیئیں گے ، یہاں تک کہ وہ رونے لگے ، تو نبی اکرم صلی اللہ علیہ وسلم نے ارشاد فرمایا : تمہارے بھائی نے تم سے پہلے یہ مانگا تھا ۔ سیدہ فاطمہ رضی اللہ عنہا نے عرض کی : یوں لگتا ہے جیسے حسن کو آپ کے نزدیک ترجیح حاصل ہے ۔ نبی اکرم صلی اللہ علیہ وسلم نے فرمایا : وہ میرے نزدیک اس سے زیادہ ترجیح والا نہیں ہے ، یہ دونوں میرے نزدیک ایک ہی مرتبے کے ہیں ، میں اور تم اور یہ دونوں اور یہ سویا ہوا شخص ( یعنی سیدنا علی رضی اللہ عنہ ) قیامت کے دن ایک ہی جگہ پر ہوں گے ۔ “
یہ روایت امام طبرانی نے نقل کی ہے ۔ اس کی سند میں ایک راوی کثیر بن یحیی ہے اور وہ ضعیف ہے ابن حبان نے اسے ثقہ قرار دیا ہے ۔

عمرو بن شعیب بیان کرتے ہیں : وہ سیدہ زینت بنت ابوسلمہ رضی اللہ عنہا کی خدمت میں حاضر ہوئے اس خاتون نے انہیں بتایا : ایک مرتبہ نبی اکرم صلی اللہ علیہ وسلم سیدہ ام سلمہ رضی اللہ عنہا کے ہاں موجود تھے اسی دوران سیدنا حسن رضی اللہ عنہ اور سیدنا حسین رضی اللہ عنہ سیدہ فاطمہ رضی اللہ عنہا سیدہ ام سلمہ رضی اللہ عنہا کے ہاں آئے ، سیدنا حسن رضی اللہ عنہ ایک طرف تھے ۔ سیدنا حسین رضی اللہ عنہ دوسری طرف تھے اور سیدہ فاطمہ رضی اللہ عنہا درمیان میں تھیں ۔ نبی اکرم صلی اللہ علیہ وسلم نے یہ فرمایا : ” اللہ تعالیٰ کی برکتیں اور اس کی رحمتیں تم پر نازل ہوں ۔ اے اہل بیت ! بے شک وہ لائق حمد ہے اور وہ بزرگی کا مالک ہے ۔ “ سیدہ زینب بنت ابوسلمہ رضی اللہ عنہا بیان کرتی ہیں : میں اور سیدہ ام سلمہ رضی اللہ عنہا وہاں بیٹھی ہوئی تھیں ، سیدہ ام سلمہ رضی اللہ عنہا رونے لگیں ، نبی اکرم صلی اللہ علیہ وسلم نے ان کی طرف دیکھا اور دریافت کیا : تم کیوں رو رہی ہو ؟ انہوں نے جواب دیا : یا رسول اللہ ! آپ نے ان لوگوں کو مخصوص کر لیا اور مجھے اور میری بیٹی کو چھوڑ دیا ، تو نبی اکرم صلی اللہ علیہ وسلم نے فرمایا : تم اور تمہاری بیٹی بھی اہل بیت میں سے ہیں ۔ “
یہ روایت امام طبرانی نے معجم کبیر میں نقل کی ہے اور معجم اوسط میں اختصار کے ساتھ نقل کی ہے ۔ اس کی سند میں ایک راوی ابن لہیعہ ہے اور وہ کمزور ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے اولاد عبدالمطلب ! میں نے اللہ تعالیٰ سے آپ لوگوں کے لئے تین چیزیں مانگی ہیں ۔ یہ کہ آپ کے کھڑے ہوئے شخص کو وہ ثابت قدم رکھے اور آپ کے ناواقف شخص کو علم عطا کرے اور آپ کے گمراہ شخص کو ہدایت نصیب کرے اور میں نے اس سے یہ بھی دعا مانگی ہے کہ وہ آپ لوگوں کو بہادر اور رحم کرنے والا بنائے ، اگر کوئی شخص رکن یمانی اور مقام ابراہیم کے درمیان کھڑا ہو کے نماز ادا کرے اور وہ روزہ رکھتا ہو اور پھر وہ ایسی حالت میں مرے کہ وہ سیدنا محمد ( صلی اللہ علیہ وسلم ) کے اہل بیت سے بغض رکھتا ہو تو وہ شخص جہنم میں جائے گا ۔ “
یہ روایت امام طبرانی نے اپنے استاد محمد بن زکریا غلابی کے حوالے سے نقل کی ہے ، اور وہ ضعیف ہے ، ابن حبان نے اس کا ذکر کتاب الثقات میں کیا ہے وہ کہتے ہیں اس کی نقل کردہ حدیث کا اعتبار کیا جائے گا جبکہ اس نے ثقہ راویوں سے روایت نقل کی ہو کیونکہ مجہول راویوں سے اس کی نقل کردہ روایات میں کچھ منکر ہونا پایا جاتا ہے ۔ ( علامہ ہیثمی فرماتے ہیں : ) میں یہ کہتا ہوں ۔ اس نے یہ روایت سفیان ثوری کے حوالے سے نقل کی ہے ۔ اس روایت کے بقیہ رجال ” صحیح “ کے رجال ہیں ۔ اس سے پہلے اس باب میں ایک طویل حدیث گزر چکی ہے جو سیدنا عبداللہ بن جعفر رضی اللہ عنہ سے منقول ہے ۔

سیدنا امام حسن بن علی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ہماری یعنی اہل بیت کی محبت کو لازم پکڑو کیونکہ جو شخص ایسی حالت میں اللہ تعالیٰ کی بارگاہ میں حاضر ہو کہ وہ ہم سے محبت رکھتا ہو ، تو وہ شخص ہماری شفاعت کی وجہ جنت میں داخل ہو گا ، اس ذات کی قسم ! جس کے دست قدرت میں میری جان ہے ! بندے کا عمل اسے اس وقت تک نفع نہیں دے گا جب تک وہ ہمارے حق کی معرفت حاصل نہیں کر لیتا ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی لیث بن ابوسلیم ہے اور دوسرے لوگ بھی ہیں ۔

سیدنا امام حسن بن علی رضی اللہ عنہما کے بارے میں یہ بات منقول ہے کہ انہوں نے فرمایا : اے معاویہ بن خدیج تم ہم سے بغض رکھنے سے بچنا کیونکہ نبی اکرم صلی اللہ علیہ وسلم نے یہ ارشاد فرمایا ہے : ” جو بھی شخص ہم سے بغض رکھے گا یا ہم سے حسد کرے گا اسے قیامت کے دن آگ سے بنے ہوئے کوڑوں کے ذریعے حوض سے پرے کر دیا جائے گا ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبداللہ بن عمرو واقفی ہے اور وہ کذاب ہے ۔

سیدنا جابر بن عبداللہ انصاری رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں خطبہ ارشاد فرمایا : میں نے آپ صلی اللہ علیہ وسلم کو یہ ارشاد فرماتے ہوئے سنا : ” اے لوگو ! جو شخص ہمارے ساتھ یعنی اہل بیت کے ساتھ بغض رکھے گا اللہ تعالیٰ قیامت کے دن اس کا حشر یہودی ہونے کے طور پر کرے گا ۔ “ راوی کہتے ہیں : میں نے عرض کی : یا رسول اللہ ! اگرچہ وہ شخص روزہ رکھتا ہو اور نماز پڑھتا ہو ؟ نبی اکرم صلی اللہ علیہ وسلم نے فرمایا : اگرچہ وہ شخص روزہ رکھتا ہو اور نماز پڑھتا ہو اور یہ سجھتا ہو کہ وہ مسلمان ہے ، وہ اس حوالے سے خون بہانے کی وجہ تلاش کرے ، تو وہ کمتر ہو کر مجبوری کے عالم میں جزیہ ادا کرے گا ، میرے سامنے مٹی میں میری امت کی مثالی صورت پیش کی گئی ، تو جھنڈوں والے لوگ میرے پاس سے گزرے تو میں نے علی اور اس کے ساتھیوں کے لئے دعائے مغفرت کی ۔ “
یہ روایت امام طبرانی نے معجم اوسط میں نقل کی ہے اور اس کی سند میں ایسے راوی ہیں جن سے میں واقف نہیں ہوں ۔

ابوجمیلہ بیان کرتے ہیں : جب سیدنا علی رضی اللہ عنہ کو شہید کر دیا گیا اور سیدنا امام حسن بن علی رضی اللہ عنہما کو خلیفہ منتخب کیا گیا ۔ تو ایک دن وہ لوگوں کو نماز پڑھا رہے تھے ، تو اسی دوران ایک شخص نے ان پر حملہ کر کے ان کے پہلو پر خنجر مار دیا جس کی وجہ سے وہ کئی مہینے تک بیمار رہے ، پھر وہ کھڑے ہوئے انہوں نے منبر پر لوگوں کو خطبہ دیتے ہوئے یہ ارشاد فرمایا : ” اے اہل عراق ! ہمارے بارے میں اللہ تعالیٰ سے ڈرو کیونکہ ہم تمہارے امیر بھی ہیں ، اور تمہارے مہمان بھی ہیں ، اور ہم اہل بیت وہ ہیں جن کے بارے میں اللہ تعالیٰ نے یہ ارشاد فرمایا ہے : ” اے اہل بیت ! اللہ تعالیٰ یہ ارادہ کرتا ہے کہ تم سے گندگی کو دور کر دے اور تمہیں اچھی طرح سے پاک کر دے ۔ “ ( راوی بیان کرتے ہیں : ) اس دن سیدنا امام حسن رضی اللہ عنہ مسلسل گفتگو کرتے رہے یہاں تک کہ مسجد میں ہر شخص روتا ہوا نظر آیا ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” بنو ہاشم اور انصار سے بغض رکھنا کفر ہے اور عربوں سے بغض رکھنا منافقت ہے ۔ “
یہ روایت امام طبرانی نے نقل کی ہے ۔ اس کی سند میں ایسے راوی ہیں جن سے میں واقف نہیں ہوں ۔

سیدنا سلمان فارسی رضی اللہ عنہ فرماتے ہیں : سیدنا محمد صلی اللہ علیہ وسلم کی آل کو اس جگہ پر رکھو جو جسم میں سر کی حیثیت ہوتی ہے ، جو سر میں آنکھوں کی حیثیت ہوتی ہے ، کیونکہ جسم صرف سر کے ذریعے رہنمائی حاصل کرتا ہے ، اور سر صرف آنکھوں کے ذریعے رہنمائی حاصل کرتا ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی زیاد بن منذر ہے اور وہ متروک ہے ۔

سیدنا جابر بن عبداللہ رضی اللہ عنہما روایت کرتے ہیں نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے ہر نبی کی ذریت کو اس کی پشت میں رکھا ہے اور اللہ تعالیٰ نے میری ذریت کو علی بن ابوطالب کی پشت میں رکھا ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی یحیی بن علاء ہے اور وہ متروک ہے ۔

سیدہ فاطمہ کبریٰ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” ہر ماں کے بچے اپنے عصبہ رشتے داروں کی طرف منسوب ہوتے ہیں صرف فاطمہ کی اولاد کا معاملہ مختلف ہے میں ان کا ولی ہوں اور میں ان کا عصبہ ہوں ۔ “
یہ روایت امام طبرانی نے اور امام ابویعلیٰ نے نقل کی ہے ۔ اس کی سند میں ایک راوی شیبہ بن نعامہ ہے جس سے استدلال کرنا جائز نہیں ہے ۔

سیدنا عبداللہ بن عباس رضی اللہ عنہما بیان کرتے ہیں : سیدنا عباس رضی اللہ عنہ نبی اکرم صلی اللہ علیہ وسلم کی بیماری کے دوران نبی اکرم صلی اللہ علیہ وسلم کی عیادت کرنے کے لئے آئے ، انہوں نے نبی اکرم صلی اللہ علیہ وسلم کو اٹھایا اور آپ کو پلنگ پر بٹھا دیا ، نبی اکرم صلی اللہ علیہ وسلم نے ان سے فرمایا : اے چچا ! اللہ تعالیٰ آپ کو سربلندی عطا کرے ، سیدنا عباس رضی اللہ عنہ نے آپ کی خدمت میں عرض کی : علی اندر آنے کی اجازت مانگ رہا ہے ، راوی کہتے ہیں سیدنا علی رضی اللہ عنہ اندر آئے ، وہ اندر آئے اور ان کے ساتھ سیدنا حسن رضی اللہ عنہ اور سیدنا حسین رضی اللہ عنہ بھی تھے ۔ سیدنا عباس رضی اللہ عنہ نے نبی اکرم صلی اللہ علیہ وسلم سے فرمایا : یا رسول اللہ ! یہ آپ کی اولاد ہیں : نبی اکرم صلی اللہ علیہ وسلم نے فرمایا : اے چچا جان یہ آپ کی بھی اوالاد ہیں ، انہوں نے دریافت کیا : کیا آپ ان دونوں سے محبت رکھتے ہیں ؟ نبی اکرم صلی اللہ علیہ وسلم نے فرمایا : اللہ تعالیٰ آپ سے بھی اسی طرح محبت رکھے جس طرح ان دونوں سے محبت رکھتا ہوں “ ۔
یہ روایت امام طبرانی نے معجم صغیر اور معجم اوسط میں نقل کی ہے ۔ اس کی سند میں ایک راوی محمد بن یحیی حجری ہے اور وہ ضعیف ہے ۔

سیدنا ابوہریرہ رضی اللہ عنہ بیان کرتے ہیں : سیدنا علی بن ابوطالب رضی اللہ عنہ نے عرض کی : یا رسول اللہ ! آپ کے نزدیک کون زیادہ محبوب ہے ، میں یا فاطمہ ؟ نبی اکرم صلی اللہ علیہ وسلم نے فرمایا : فاطمہ میرے نزدیک تم سے زیادہ محبوب ہے اور تم میرے نزدیک اس سے زیادہ معزز ہو ، یوں ہے کہ جیسے تم میرے حوض پر ہو گے ، اور اس سے لوگوں کو پرے کر رہے ہو گے حالانکہ اس حوض پر آسمان کے ستاروں کی تعداد میں کوزے ہوں گے ، اور میں اور تم اور حسن اور حسین اور فاطمہ اور عقیل اور جعفر جنت میں ہوں گے ۔ ہم بھائی بھائی بن کے پلنگوں پر ایک دوسرے کے مدمقابل بیٹھے ہوئے ہوں گے ، جنت میں تم میرے ساتھ ہو گے ، اور تمہارے ساتھی بھی ہوں گے ۔ “ پھر نبی اکرم صلی اللہ علیہ وسلم نے یہ آیت تلاوت کی : ” وہ بھائی بھائی ہوں گے جو پلنگوں پر ایک دوسرے کے مدمقابل بیٹھے ہوئے ہوں گے ۔ “ ( نبی اکرم صلی اللہ علیہ وسلم نے ارشاد فرمایا : ) ” کوئی شخص اپنے ساتھی کی گدی کی طرف نہیں دیکھے گا ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی سلمیٰ بن عقبہ ہے اور میں اس سے واقف نہیں ہوں ۔ اس روایت کے بقیہ رجال ثقہ ہیں ۔

سیدنا عثمان رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص جناب عبدالمطلب کی اولاد میں سے کسی کے ساتھ کوئی بھلائی کرے اور وہ اس شخص کو دنیا میں اس کا بدلہ نہ دے سکے تو کل جب اس کی مجھ سے ملاقات ہو گی تو اس کو بدلہ دینا میرے ذمہ ہو گا ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبدالرحمن بن ابوزناد ہے اور وہ ضعیف ہے ۔

سیدنا ثوبان رضی اللہ عنہ جو نبی اکرم صلی اللہ علیہ وسلم کے غلام ہیں ، وہ بیان کرتے ہیں : نبی اکرم صلی اللہ علیہ وسلم نے اپنے اہل خانہ کو بلایا ۔ ۔ ۔ ۔ ۔ ۔ پھر راوی نے سیدنا علی رضی اللہ عنہ ، سیدہ فاطمہ رضی اللہ عنہا اور دیگر لوگوں کا ذکر کیا ، راوی کہتے ہیں : میں نے عرض کی : یا رسول اللہ ! میں بھی اہل بیت میں سے ہوں ؟ نبی اکرم صلی اللہ علیہ وسلم نے فرمایا : جی ہاں ! جب تک تم کسی سردار کے دروازے پر کھڑے نہیں ہوتے یا کسی امیر کے پاس جا کے کچھ مانگتے نہیں ہو ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

سیدنا جابر رضی اللہ عنہ بیان کرتے ہیں : انہوں نے سیدنا عمر بن خطاب رضی اللہ عنہ کو لوگوں سے یہ کہتے ہوئے سنا : جب سیدنا عمر رضی اللہ عنہ نے سیدنا علی رضی اللہ عنہ کی صاحبزادی کے ساتھ شادی کی تھی کہ تم لوگ مجھے مبارک باد نہیں دو گے ؟ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” قیامت کے دن ہر سبب اور نسب منقطع ہو جائے گا البتہ میرے سبب اور میرے نسب کا معاملہ مختلف ہے ۔ “
یہ روایت امام طبرانی نے معجم اوسط میں نقل کی ہے اور معجم کبیر میں اختصار کے ساتھ نقل کی ہے اور ان دونوں روایات کے رجال ” صحیح “ کے رجال ہیں صرف حسن بن سہل کا معاملہ مختلف ہے اور وہ ثقہ ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن ہر سبب اور نسب منقطع ہو جائے گا ، البتہ میرے سبب اور میرے نسب کا معاملہ مختلف ہے ۔ “
یہ روایت امام طبرانی نے نقل کی ہے اور اس کے رجال ثقہ ہیں ۔

سیده ام بکر بنت مسور بن مخرمہ رضی اللہ عنہا بیان کرتی ہیں : سیدنا امام حسن بن علی رضی اللہ عنہما نے سیدنا مسور بن مخرمہ رضی اللہ عنہ کو ان کی صاحبزادی کے لئے شادی کا پیغام دیا ، تو سیدنا مسور رضی اللہ عنہ نے ان کی شادی کروا دی اور یہ بات بیان کی : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” قیامت کے دن ہر سبب اور نسب منقطع ہو جائے گا البتہ میرے سبب اور میرے نسب کا معاملہ مختلف ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی ابراہیم بن زکریا عبدسی ہے ، اور میں اس سے واقف نہیں ہوں ۔

سیدنا ابوموسیٰ اشعری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں اور علی اور فاطمہ اور حسن اور حسین ، قیامت کے دن عرش کے نیچے ایک قبہ ( یعنی خیمے میں ہوں گے ) ۔ “
یہ روایت امام طبرانی نے نقل کی ہے ۔ اس کی سند میں ایک راوی حیان طائی ہے اور میں اس سے واقف نہیں ہوں ۔

سیدنا علی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میں ، علی ، فاطمہ ، حسن اور حسین اکٹھے ہوں گے اور جو شخص ہم سے محبت رکھے گا ، ہم قیامت کے دن ہم کھائیں گے اور پیئں گے ، اس وقت تک جب تک بندوں کے درمیان فرق ( یعنی حساب ) نہیں ہو جاتا ۔ “ لوگوں میں سے ایک شخص کو اس بات کی اطلاع ملی انہوں نے ان سے اس بارے میں دریافت کیا ، تو انہوں اس کو اس بارے میں بتایا ، اس شخص نے کہا: پھر پیش کیا جانا اور حساب لیا جانا کہاں جائے گا ؟ تو میں نے ان سے کہا: اس کے حوالے سے یٰسین کے ساتھی کا کیا معاملہ ہو گا کہ جب اسے اسی وقت جنت میں داخل کر دیا جائے گا ۔
یہ روایت امام طبرانی نے نقل کی ہے ۔ اس کی سند میں راویوں کی ایک جماعت ایسی ہے جن سے میں واقف نہیں ہوں ۔

سیدنا ابورافع رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا علی رضی اللہ عنہ سے ارشاد فرمایا : ” جنت میں سب سے پہلے داخل ہونے والے چار افراد یہ ہیں : میں ، تم ، حسن اور حسین ، ہماری ذریت ہماری پشت کے پیچھے ہو گی اور ہماری بیویاں ہماری ذریت سے پیچھے ہوں گی اور ہمارے ساتھی ہمارے دائیں طرف اور ہمارے بائیں طرف ہوں گے ۔ “
یہ روایت امام طبرانی نے نقل کی ہے ۔ اس کی سند میں ایک راوی یحیی بن یعلیٰ اسلمی ہے اور وہ ضعیف ہے ۔

سیدنا سلمہ بن اکوع رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ستارے اہل آسمان کے لئے امان ہیں اور میرے اہل بیت میری امت کے لئے امان ہیں “ ۔
یہ روایت امام طبرانی نے نقل کی ہے ۔ اس کی سند میں ایک راوی موسیٰ بن عبیدہ ربذی ہے اور وہ متروک ہے ۔

سیدنا عبداللہ بن عباس رضی اللہ عنہما بیان کرتے ہیں : ( ارشاد باری تعالیٰ ہے : ) ” آل یٰسین پر سلام ہو ۔ “ سیدنا عبداللہ بن عباس رضی اللہ عنہما کہتے ہیں : ( اس سے مراد ) ہم آل محمد ہیں ۔
یہ روایت امام طبرانی نے نقل کی ہے ۔ اس کی سند میں ایک راوی موسیٰ بن عمیر قرشی ہے اور وہ کذاب ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم میں زیادہ بہتر وہ ہے جو میرے بعد میرے اہل خانہ کے لئے زیادہ بہتر ہو ۔ “ ابوخیثمہ بیان کرتے ہیں : لوگ یہ کہتے ہیں ” جو اپنے اہل خانہ کے لئے زیادہ بہتر ہو ۔ “ اور یہاں یہ کہا: گیا ہے : ” میرے اہل خانہ کے لئے زیادہ بہتر ہو ۔ “
یہ روایت امام ابویعلیٰ نے نقل کی ہے اور اس کے رجال ثقہ ہیں ۔