مجمع الزوائد ومنبع الفوائد

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم کی ایک کنیز تھیں ، جو سیدنا ابراہیم رضی اللہ عنہ کی والدہ ہیں ، اس خاتون کا ایک بالاخانہ تھا ، ایک قبطی شخص اس خاتون کے پاس آیا کرتا تھا ، وہ ان کے پاس پانی اور لکڑیاں لایا کرتا تھا ، لوگوں نے اس بارے میں بات چیت کی کہ ایک شخص ، ایک عورت کے پاس آتا ہے ، نبی اکرم صلی اللہ علیہ وسلم کو اس بات کی اطلاع ملی تو آپ نے سیدنا علی بن ابوطالب رضی اللہ عنہ کو بلایا اور انہیں یہ حکم دیا کہ وہ اس شخص کو قتل کر دیں ، سیدنا علی رضی اللہ عنہ گئے ۔ انہوں نے اس شخص کو کھجور کے ایک درخت پر پایا ، جب قبطی نے سیدنا علی رضی اللہ عنہ کے ساتھ تلوار دیکھی تو وہ اوپر سے نیچے گرا ، اس کے جسم پر موجود چادر ہٹ گئی تو اس شخص کی شرمگاہ نہیں تھی ۔ سیدنا علی رضی اللہ عنہ نبی اکرم صلی اللہ علیہ وسلم کے پاس واپس آئے ، انہوں نے عرض کی : اس بارے میں آپ کی کیا رائے ہے کہ اگر آپ ہم میں سے کسی ایک کو کوئی حکم دیتے ہیں ، اور پھر وہ شخص مختلف صورت حال پاتا ہے ، تو کیا آپ کی طرف رجوع کر لے ؟ نبی اکرم صلی اللہ علیہ وسلم نے فرمایا : جی ہاں ! تو سیدنا علی رضی اللہ عنہ نے قبطی کا جو معاملہ دیکھا تھا اس کے بارے میں نبی اکرم صلی اللہ علیہ وسلم کو بتایا ۔ راوی بیان کرتے ہیں : سیدنا ابراہیم رضی اللہ عنہ کی والدہ نے جب سیدنا ابراہیم رضی اللہ عنہ کو جنم دیا تو نبی اکرم صلی اللہ علیہ وسلم کو اس حوالے سے کچھ شک تھا ، یہاں تک کہ سیدنا جبرائیل علیہ السلام آئے اور بولے : اے ابوابراہیم ! آپ کو سلام ہو ، تو نبی اکرم صلی اللہ علیہ وسلم کو اس حوالے سے اطمینان ہوا ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابن لہیعہ ہے اور وہ ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم سیدنا ابراہیم رضی اللہ عنہ کی والدہ سیدہ ماریہ قبطیہ رضی اللہ عنہا کے پاس تشریف لائے جو ان کی اُم ولد تھیں اور وہ خاتون نبی اکرم صلی اللہ علیہ وسلم سے سیدنا ابراہیم رضی اللہ عنہ کے حوالے سے حاملہ تھیں ، نبی اکرم صلی اللہ علیہ وسلم نے اس خاتون کے پاس ان کے ایک رشتے دار کو پایا جو مصر سے اس خاتون کے ساتھ آیا تھا ، اس شخص نے اسلام قبول کر لیا تھا ، اس کا اسلام اچھا تھا ، وہ سیدہ ماریہ قبطیہ رضی اللہ عنہا کے پاس جو سیدنا ابراہیم رضی اللہ عنہ کی والدہ ہیں ، اس لئے آیا کرتا تھا کیونکہ وہ نبی اکرم صلی اللہ علیہ وسلم کی اُم ولد تھیں ، اس نے اپنے آپ کو مجبوب کر لیا ( یعنی اپنی شرمگاہ کو کاٹ دیا ) اس نے اپنی دونوں ٹانگوں کے درمیان موجود پوری چیز کو کاٹ دیا اور اپنے لئے تھوڑا یا زیادہ کچھ نہیں رہنے دیا ، ایک دن نبی اکرم صلی اللہ علیہ وسلم سیدنا ابراہیم رضی اللہ عنہ کے پاس آئے تو آپ نے اس شخص کو اس خاتون کے پاس پایا ، آپ کے ذہن میں اس حوالے سے کچھ الجھن پیدا ہوئی ، جس طرح لوگوں کے من میں آ جاتی ہے ، آپ واپس تشریف لے گئے ، آپ کی رنگت تبدیل تھی ( یعنی آپ غصے میں تھے ) آپ کی ملاقات سیدنا عمر رضی اللہ عنہ سے ہوئی ، آپ نے سیدنا عمر رضی اللہ عنہ کو اس چیز کے بارے میں بتایا جو ام ابراہیم کے پاس اس شخص کے ہونے کی وجہ سے آپ کے من میں تھی ، تو سیدنا عمر رضی اللہ عنہ نے تلوار پکڑی اور دوڑتے ہوئے آئے ، یہاں تک کہ سیدہ ماریہ رضی اللہ عنہا کے پاس آئے ، انہوں نے سیدہ ماریہ رضی اللہ عنہا کے پاس اس شخص کو پایا ۔ انہوں نے اس کو قتل کرنے کے لئے اس کی طرف تلوار بڑھائی ، جب اس شخص نے یہ صورت حال دیکھی تو اس نے اپنی شرمگاہ سے کپڑا ہٹایا ، جب سیدنا عمر رضی اللہ عنہ نے یہ صورت حال دیکھی تو وہ نبی اکرم صلی اللہ علیہ وسلم کے پاس واپس گئے اور آپ کو اس بارے میں بتایا تو نبی اکرم صلی اللہ علیہ وسلم نے ارشاد فرمایا : اے عمر ! کیا میں نے تمہیں نہیں بتایا تھا کہ جبرائیل میرے پاس آئے اور انہوں نے مجھے بتایا : اللہ تعالیٰ نے اس خاتون کو اور اس کے رشتے دار کو اس چیز کے حوالے سے بری قرار دیا ہے ، جو میرے من میں آئی تھی اور اس نے مجھے یہ خوشخبری دی ہے کہ اس عورت کے پیٹ میں میرا ایک بیٹا ہے ، جو ظاہری تخلیق کے اعتبار سے مجھ سے سب سے زیادہ مشابہت رکھتا ہے ، اور اس نے مجھے یہ حکم دیا ہے کہ میں اس کا نام ابراہیم رکھوں اور اس نے میری کنیت ابوابراہیم تجویز کی ہے ، اگر میں اس بات کو ناپسند نہ کرتا ہوتا کہ میں جس کنیت کے حوالے سے معروف ہوں ۔ اسے تبدیل کر دوں تو میں نے ابوابراہیم کنیت اختیار کرنی تھی ، جس کنیت سے جبریل نے مجھے مخاطب کیا ہے ۔
یہ روایت امام طبرانی نے نقل کی ہے ۔ اس کی سند میں ایک راوی ہانی بن متوکل ہے اور وہ ضعیف ہے ۔

سدی بیان کرتے ہیں : میں نے سیدنا انس بن مالک رضی اللہ عنہ سے دریافت کیا ، نبی اکرم صلی اللہ علیہ وسلم نے اپنے صاحبزادے سیدنا ابراہیم رضی اللہ عنہ کی نماز جنازہ پڑھائی تھی ؟ انہوں نے جواب دیا : مجھے نہیں معلوم ، اللہ تعالیٰ سیدنا ابراہیم رضی اللہ عنہ پر رحمت نازل کرے ، اگر وہ زندہ رہتے تو وہ صدیق نبی ہوتے ۔
یہ روایت امام أحمد نے نقل کی ہے اور اس کے رجال ” صحیح “ کے رجال ہیں ۔

سیدنا براء رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں کہ آپ صلی اللہ علیہ وسلم نے اپنے صاحبزادے سیدنا ابراہیم رضی اللہ عنہ کے بارے میں یہ فرمایا : ” جنت میں اس کے لئے ایک دودھ پلانے والی عورت ہے ۔ “
یہ روایت امام أحمد نے نقل کی ہے ۔ اس کی سند میں ایک راوی جابر جعفی ہے اور وہ ضعیف ہے ، تاہم شعبہ نے اس سے روایت نقل کی ہے اور شعبہ اس کے حوالے سے جھوٹی روایت نقل نہیں کرتا ، سیدنا براء رضی اللہ عنہ سے منقول حدیث کے علاوہ ہونے کے طور پر
یہ روایت مستند طور پر ثابت ہے ۔

سیدنا ابن ابواوفیٰ رضی اللہ عنہ کے بارے میں یہ بات منقول ہے : ان سے دریافت کیا گیا : آپ نے نبی اکرم صلی اللہ علیہ وسلم کے صاحبزادے سیدنا ابراہیم رضی اللہ عنہ کو دیکھا ہے ؟ انہوں نے جواب دیا : جی ہاں ! ان کا کمسنی میں انتقال ہو گیا تھا اور وہ نبی اکرم صلی اللہ علیہ وسلم کے ساتھ سب سے زیادہ مشابہت رکھتے تھے ۔ ( علامہ ہیثمی فرماتے ہیں : ) میں یہ کہتا ہوں
یہ روایت صحیح میں مذکور ہے تاہم اس میں مشابہت کا ذکر نہیں ہے ۔
یہ روایت امام طبرانی نے معجم اوسط میں نقل کی ہے اور اس کے رجال ” صحیح “ کے رجال ہیں ، صرف عبید بن جناد حلبی کا معاملہ مختلف ہے اور وہ ثقہ ہے ۔

سیرین نامی خاتون بیان کرتی ہیں : میں نبی اکرم صلی اللہ علیہ وسلم کے صاحبزادے سیدنا ابراہیم رضی اللہ عنہ کے انتقال کے قریب ان کے پاس موجود تھی ، میں چیخ رہی تھی اور میری بہن بھی چیخ کے رو رہی تھی ، خواتین بھی چیخ کے رو رہی تھیں ، نبی اکرم صلی اللہ علیہ وسلم نے ہمیں منع نہیں کیا لیکن جب ان کا انتقال ہو گیا تو نبی اکرم صلی اللہ علیہ وسلم نے ہمیں چیخنے سے منع کر دیا ، بی اکرم صلی اللہ علیہ وسلم انہیں گود میں اٹھا کر قبر کے کنارے پر آئے ، سیدنا عباس رضی اللہ عنہ آپ کے پہلو میں تھے ، قبر میں سیدنا فضل بن عباس اور سیدنا اسامہ بن زید رضی اللہ عنہم اترے میں ان کی قبر کے پاس بیٹھ کر رونے لگی ، تو نبی اکرم صلی اللہ علیہ وسلم نے مجھے منع نہیں کیا ، اسی دوران سورج گرہن ہو گیا تو کچھ لوگوں نے کہا: یہ سیدنا ابراہیم رضی اللہ عنہ کے انتقال کی وجہ سے ہوا ہے ، تو نبی اکرم صلی اللہ علیہ وسلم نے ارشاد فرمایا : ” یہ کسی کے مرنے یا جینے کی وجہ سے گرہن نہیں ہوتا ہے ۔ “ راوی خاتون بیان کرتی ہیں : نبی اکرم صلی اللہ علیہ وسلم نے قبر میں کشادگی دیکھی تو حکم دیا کہ اسے بند کر دیا جائے ، عرض کی گئی : یا رسول اللہ ! کیا اس کا اسے فائدہ ہو گا ؟ نبی اکرم صلی اللہ علیہ وسلم نے فرمایا : اس کا اسے تو فائدہ نہیں ہو گا ، یا نقصان نہیں ہو گا ، لیکن یہ چیز زندہ شخص کی آنکھوں کو ٹھنڈا کر دیتی ہے ۔ “ ان صاحبزادے کا انتقال منگل کے دن دس ربیع الاول دس ہجری میں ہوا ۔
یہ روایت امام طبرانی نے دو استاد کے ساتھ نقل کی ہے ، ان دونوں میں سے ایک سند میں ایک راوی واقدی ہے اور دوسری روایت کی سند میں ایک راوی محمد بن حسن بن زبالہ ہے اور یہ دونوں متروک ہیں ۔