مجمع الزوائد ومنبع الفوائد

عروہ بیان کرتے ہیں بنو حارث بن فہر میں سے غزوہ بدر میں شرکت کرنے والوں میں سے ایک سیدنا ابوعبیدہ بن جراح رضی اللہ عنہ ہیں ۔
یہ روایت امام طبرانی نے نقل کی ہے اور اس کی سند حسن ہے ۔

ابن شوذب بیان کرتے ہیں : غزوہ بدر کے موقع پر سیدنا ابوعبیدہ رضی اللہ عنہ کے والد ان کے سامنے آتے رہے لیکن سیدنا ابوعبیدہ رضی اللہ عنہ ان سے پہلو تہی کرتے رہے جب ان کے والد ان کے سامنے زیادہ آنے لگے تو سیدنا ابوعبیدہ رضی اللہ عنہ نے انہیں قتل کر دیا ، تو اللہ تعالیٰ نے اس بارے میں یہ آیت نازل کی : ” تم اللہ تعالیٰ اور آخرت کے دن پر ایمان رکھنے والی قوم کو نہیں پاؤ گے کہ وہ ان سے دوستی رکھیں جنہوں نے اللہ اور اس کے رسول کی مخالفت کی ہو ، خواہ ( مخالفت کرنے والے ) ان کے باپ یا بیٹے یا بھائی یا ان کے رشتہ دار ہی کیوں نہ ہوں ، یہ ( مؤمنین ) وہ ہیں کہ اللہ تعالیٰ نے ان کے دلوں میں ایمان نقش کر دیا ہے ، اور اپنی طرف کی روح کے ذریعے ان کی تائید کی ہے ، وہ ( اللہ تعالیٰ ) ان ( مؤمن ) لوگوں کو جنتوں میں داخل کرے گا جن میں نہریں بہتی ہوں گی ، اور وہ ان میں ہمیشہ رہیں گے ، اللہ تعالیٰ ان سے راضی اور وہ لوگ اس سے راضی ، یہ لوگ اللہ کا گروہ ہیں اور خبردار ! بیشک اللہ کے گروہ ( کے افراد ) ہی کامیابی پانے والے ہیں“ ۔
یہ روایت امام طبرانی نے نقل کی ہے اور اس کی سند منقطع ہے اور اس کے رجال ثقہ ہیں ۔

ابوالبختری بیان کرتے ہیں : سیدنا ابوبکر رضی اللہ عنہ نے سیدنا ابوعبیدہ رضی اللہ عنہ سے کہا: آپ اپنا ہاتھ بڑھائیں تاکہ میں آپ کی بیعت کر لوں ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تم اس امت کے امین ہو ۔ “ تو سیدنا ابوعبیدہ رضی اللہ عنہ نے کہا: میں ایک ایسے شخص سے آگے نہیں ہو سکتا جسے اللہ کے رسول صلی اللہ علیہ وسلم نے اس کام کے لئے مقرر کیا ہو کہ وہ ہماری امامت کرے اور وہ اللہ کے رسول صلی اللہ علیہ وسلم کے انتقال تک ہماری امامت کرتا رہا ہو ۔
یہ روایت امام أحمد نے نقل کی ہے اور اس کے رجال ثقہ ہیں تاہم ابوبختری نامی راوی نے سیدنا ابوعبیدہ رضی اللہ عنہ اور سیدنا عمر رضی اللہ عنہ کا زمانہ نہیں پایا ہے ۔

سیدنا عبداللہ بن مسعود رضی اللہ عنہ بیان کرتے ہیں : نجران سے تعلق رکھنے والے دو افراد عاقب اور سید آئے ، راوی بیان کرتے ہیں : انہوں نے یہ ارادہ کیا کہ وہ نبی اکرم صلی اللہ علیہ وسلم کے ساتھ مباہلہ کریں گے ، راوی بیان کرتے ہیں : ان دونوں میں سے ایک نے اپنے ساتھی سے کہا: تم مباہلہ ہرگز نہ کرنا ، اللہ کی قسم ! اگر یہ نبی ہوئے اور ہم نے ان کے ساتھ مباہلہ کیا ، تو پھر ہم بھی کامیاب نہیں ہوں گے ، اور نہ ہی ہماری اولاد کبھی کامیاب ہو گی ۔ راوی کہتے ہیں : وہ دونوں نبی اکرم صلی اللہ علیہ وسلم کے پاس آئے اور ان دونوں نے کہا: ہم دونوں آپ کے ساتھ مباہلہ نہیں کریں گے بلکہ ہم آپ کو وہ ادائیگی کر دیں گے جو آپ مانگیں گے آپ ہمارے ساتھ کسی امین شخص کو بھیج دیں ۔ راوی کہتے ہیں : تو نبی اکرم صلی اللہ علیہ وسلم نے ارشاد فرمایا : میں ایک ایسے شخص کو بھیجوں گا جو واقعی امین ہو گا ، واقعی امین ہو گا ۔ راوی بیان کرتے ہیں : نبی اکرم صلی اللہ علیہ وسلم کے اصحاب پوری طرح متوجہ ہو گئے ، تو نبی اکرم صلی اللہ علیہ وسلم نے فرمایا : اے ابوعبیدہ بن جراح تم اٹھ جاؤ ، جب وہ کھڑے ہوئے تو نبی اکرم صلی اللہ علیہ وسلم نے ارشاد فرمایا : یہ اس امت کا امین ہے ۔ ( علامہ ہیثمی فرماتے ہیں : ) میں یہ کہتا ہوں امام بن ماجہ نے اس روایت کا ایک حصہ نقل کیا ہے ۔
یہ روایت امام أحمد نے نقل کی ہے اور امام بزار نے نقل کی ہے ، امام بزار کے رجال ” صحیح “ کے رجال ہیں اسی طرح امام أحمد کے رجال ہیں صرف خلف بن ولید کا معاملہ مختلف ہے اور وہ ثقہ ہے ۔

شریح بن عبید اور راشد بن سعد اور دیگر لوگ یہ بیان کرتے ہیں : جب ” سرغ “ کے مقام پر سیدنا عمر رضی اللہ عنہ کو یہ اطلاع ملی کہ شام میں شدید وباء پھیل چکی ہے ، تو سیدنا عمر رضی اللہ عنہ نے یہ فرمایا کہ مجھے یہ بات پتہ چلی ہے کہ شام میں شدید وباء پھیل چکی ہے میں نے یہ سوچا تھا کہ اگر میری موت آ گئی اور اس وقت ابوعبیدہ زندہ ہوئے تو میں انہیں اپنا جانشین مقرر کر دوں گا ، اور اگر اللہ تعالیٰ نے اس بارے میں مجھ سے پوچھا: تم نے اسے سیدنا محمد صلی اللہ علیہ وسلم کی امت پر کیوں خلیفہ مقرر کیا ؟ تو میں جواب دوں گا : میں نے اللہ کے رسول صلی اللہ علیہ وسلم کو یہ ارشاد فرماتے ہوئے سنا ہے : ” ہر نبی کا ایک امین ہوتا ہے ، اور میرا امین ابوعبیدہ بن جراح ہے ۔ “ اس پر لوگوں نے یہ اعتراض کیا اور یہ کہا: قریش کے دور کے خاندان کا کیا معاملہ ہے ؟ راوی کہتے ہیں : اس سے مراد بنو فہر ہونا تھا ۔ پھر سیدنا عمر رضی اللہ عنہ نے یہ بات ارشاد فرمائی کہ اگر میری موت آ گئی اور اس وقت ابوعبیدہ کا انتقال ہو گیا ، تو میں معاذ بن جبل کو اپنا نائب مقرر کر دوں گا ، اگر میرے پروردگار نے مجھ سے پوچھا: کہ تم نے اسے کیوں خلیفہ بنایا ہے ، تو میں یہ کہوں گا کہ میں نے اللہ کے رسول صلی اللہ علیہ وسلم کو یہ ارشاد فرماتے ہوئے سنا ہے : ” اسے قیامت کے دن علماء کے آگے ” نبذہ “ ( یعنی گوشہ یا کنارہ ) کے طور پر ( یعنی الگ نمایاں حیثیت کے ساتھ ) اُٹھایا جائے گا ۔ “
یہ روایت امام أحمد نے نقل کی ہے اور
یہ روایت مرسل ہے راشد اور شریح ان دونوں نے سیدنا عمر رضی اللہ عنہ کا زمانہ نہیں پایا ہے ۔

سیدنا عمر بن خطاب رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” ہر نبی کا ایک امین ہوتا ہے اور اس امت کا امین ابوعبیدہ بن جراح ہے ۔ “
یہ روایت امام طبرانی نے معجم اوسط میں نقل کی ہے اور امام بزار کے رجال ثقہ ہیں ۔

سیدنا ابوبکر صدیق رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ہر امت کا ایک امین ہوتا ہے اور اس امت کا امین ابوعبیدہ بن جراح ہے ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی محمد بن حسن بن زبالہ ہے اور وہ متروک ہے ۔

سیدنا خالد بن ولید رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ہر امت کا ایک امین ہوتا ہے اور اس امت کا امین ابوعبیدہ بن جراح ہے ۔ “
یہ روایت امام طبرانی نے معجم کبیر اور معجم اوسط میں نقل کی ہے اور ان دونوں کے رجال ” صحیح “ کے رجال ہیں ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم کے ہاتھ میں ایک چھڑی تھی ( راوی نے چھڑی کے لئے مختلف لفظ استعمال کیے ہیں ) نبی اکرم صلی اللہ علیہ وسلم نے اس کے ذریعے سیدنا ابوعبیدہ رضی اللہ عنہ کے پہلو کی طرف اشارہ کرتے ہوئے فرمایا : ” یہ ایک مومن پہلو ہے ۔ “ ( یہاں ایک لفظ کے بارے میں راوی کو شک ہے ) ۔
یہ روایت امام بزار نے نقل کی ہے ۔ اس کی سند میں ایک راوی اسماعیل بن مسلم مکی ہے اور وہ ضعیف ہے ۔

یحیی بن بکیر بیان کرتے ہیں : سیدنا ابوعبیدہ رضی اللہ عنہ کا انتقال ” عمواس “ کے طاعون میں سن اٹھارہ ہجری میں اٹھاون سال کی عمر میں ہوا تھا انہیں غزوہ بدر میں شرکت کا شرف حاصل ہے اس وقت ان کی عمر اکتالیس سال تھی ایک روایت کے مطابق سیدنا معاذ بن جبل رضی اللہ عنہ نے اُن کی نماز جنازہ پڑھائی تھی ۔
یہ روایت امام طبرانی نے نقل کی ہے ۔