مجمع الزوائد ومنبع الفوائد

سیدنا سعد رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے بھیجا تاکہ میں دشمن کے بارے میں خبر معلوم کر کے آؤں ، میں دوڑتا ہوا گیا یہاں تک کہ لوگوں کے پاس پہنچ گیا پھر جب میں واپس آیا تو عام رفتار سے چلتا ہوا آیا یہاں تک کہ نبی اکرم صلی اللہ علیہ وسلم کے پاس پہنچ گیا ، نبی اکرم صلی اللہ علیہ وسلم نے مجھ سے صورت حال دریافت کی ، میں نے آپ کو بتایا نبی اکرم صلی اللہ علیہ وسلم نے فرمایا : جب تم گئے تھے ، تو بھاگ کر گئے تھے ، اور جب واپس آئے تو عام رفتار سے آئے ہو ؟ میں نے عرض کی : یا رسول اللہ ! مجھے یہ بات بری لگی کہ میں دوڑ کر آؤں اور دشمن میرے بارے میں یہ گمان کرے کہ شاید یہ بھاگ کر جا رہا ہے ۔ نبی اکرم صلی اللہ علیہ وسلم نے فرمایا : سعد ایک تجربہ کار آدمی ہے ۔
یہ روایت امام بزار نے نقل کی ہے اور اس کی سند حسن ہے ۔

سیدنا جابر بن سمرہ رضی اللہ عنہ بیان کرتے ہیں : اللہ کے رسول کے ساتھ سب سے پہلا تیر سیدنا سعد رضی اللہ عنہ نے پھینکا تھا ۔
یہ روایت امام بزار نے اور امام طبرانی نے نقل کی ہے اور اس کے رجال ” صحیح “ کے رجال ہیں صرف ابوخالد والبی کا معاملہ مختلف ہے اور وہ ثقہ ہے ۔

سیدنا عبداللہ بن مسعود رضی اللہ عنہ فرماتے ہیں : جس شخص نے اللہ کی راہ میں سب سے پہلا تیر پھینکا وہ سیدنا سعد رضی اللہ عنہ ہیں ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی علاء بن عمر حنفی ہے اور وہ متروک ہے ۔

سیدنا سعد رضی اللہ عنہ بیان کرتے ہیں : نبی اکرم صلی اللہ علیہ وسلم نے ان کے لئے اپنے ماں باپ کو جمع کیا تھا ( یعنی یہ فرمایا تھا کہ میرے ماں باپ تم پر قربان ہوں ) مشرکین سے تعلق رکھنے والے ایک شخص نے مسلمانوں کو آگ لگائی تو نبی اکرم صلی اللہ علیہ وسلم نے فرمایا : اے سعد تم تیر پھینکو ، میرے ماں باپ تم پر قربان ہوں ، تو میں نے ایک تیرا الگ کیا جس پر پھل ( لوہے کا ٹکڑا ) نہیں تھا ، وہ میں نے اس شخص کے پہلوؤں پر مارا تو وہ شخص گر گیا اور اس کی شرمگاہ سے کپڑا ہٹ گیا ، تو نبی اکرم صلی اللہ علیہ وسلم ہنس پڑے ، یہاں تک کہ مجھے آپ صلی اللہ علیہ وسلم کے اطراف کے دانت نظر آ گئے ۔ ( علامہ ہیثمی فرماتے ہیں : ) میں یہ کہتا ہوں صحیح میں اس روایت کا کچھ حصہ مذکور ہے ۔
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں صرف اسد بن موسیٰ کا معاملہ مختلف ہے اور وہ ثقہ ہے ۔

سیدنا عبداللہ بن مسعود رضی اللہ عنہ بیان کرتے ہیں : غزوہ بدر کے دن سیدنا رضی اللہ عنہ اللہ نے گھڑ سوار اور پیادہ ( دونوں طرح سے ) جنگ میں حصہ لیا تھا ۔
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں صرف ابراہیم بن یوسف صیرفی کا معاملہ مختلف ہے اور وہ ثقہ ہے ۔

سیدنا عبداللہ بن عمرو بن العاص رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اس دروازے سے آنے والا پہلا فرد جنتی ہو گا ۔ “ راوی بیان کرتے ہیں : تو سیدنا سعد بن ابی وقاص رضی اللہ عنہ اندر تشریف لے آئے ۔
یہ روایت امام أحمد نے نقل کی ہے اور اس کی سند حسن ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : ” تمہارے سامنے اہل جنت سے تعلق رکھنے والا ایک شخص آئے گا ، تو سیدنا سعد رضی اللہ عنہ اندر آ گئے ، نبی اکرم صلی اللہ علیہ وسلم نے یہ بات تین دن ارشاد فرمائی اور ہر مرتبہ سیدنا سعد رضی اللہ عنہ ہی آئے ۔ “
یہ روایت امام بزار نے نقل کی ہے ۔ اس کی سند میں ایک راوی عبداللہ بن قیس رقاشی ہے جس کو ضعیف قرار دیا گیا ہے ۔

سیدنا سعد رضی اللہ عنہ بیان کرتے ہیں : نبی اکرم صلی اللہ علیہ وسلم کے سامنے کھانا موجود تھا آپ صلی اللہ علیہ وسلم نے دعا کی : ” اے اللہ ! اس کھانے کی طرف تو اس بندے کو لے آ ! جس سے تو محبت کرتا ہو اور وہ تجھ سے محبت کرتا ہو ۔ “ راوی کہتے ہیں : تو وہ آ گئے ، یعنی سیدنا سعد رضی اللہ عنہ خود آ گئے ۔
یہ روایت امام بزار نے نقل کی ہے اور اس کے رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : غزوہ اُحد کے دن نبی اکرم صلی اللہ علیہ وسلم نے سیدنا سعد بن ابی وقاص رضی اللہ عنہ سے فرمایا : تم دشمن کے گوشت سنبھالو ( یعنی ان پر حملہ کرو ) تو سیدنا سعد رضی اللہ عنہ نے اپنی کمان میں تیر رکھا اور یہ کہا: اے اللہ ! یہ تیرا تیر ہے ، اور تیری راہ میں ہے ، اے اللہ ! تو اپنے رسول کی مدد کرنا ، تو نبی اکرم صلی اللہ علیہ وسلم نے فرمایا : اے اللہ ! جب سعد تجھ سے دعا کرے تو اس کی دعا مستجاب فرما ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابوسعد بقال ہے اور وہ مدلس اور ثقہ ہے ، یہ حدیث ان دو حدیثوں کے حوالے سے مضبوط ہو جاتی ہے جو اس سے پہلے سیدنا سعد رضی اللہ عنہ کے مستجاب ہونے سے متعلق باب میں گزر چکی ہے ۔

سیدہ عائشہ صدیقہ رضی اللہ عنہا کا بیان کرتی ہیں : نبی اکرم صلی اللہ علیہ وسلم سفر کر رہے تھے مجھے رات کے وقت وحشت محسوس ہوئی ، نبی اکرم صلی اللہ علیہ وسلم نے دریافت کیا : تمہیں کیا ہوا ہے ؟ میں نے عرض کی : ہم اس جگہ پر ایک تاریک رات میں موجود ہیں ، مجھے آپ کے حوالے سے اندیشہ ہے ۔ نبی اکرم صلی اللہ علیہ وسلم نے ارشاد فرمایا : ایسا ہرگز نہیں ہو گا اللہ تعالیٰ ہمارے لئے ایک شخص کو بھیج دے گا جو اللہ اور اس کے رسول سے محبت رکھتا ہے وہ باقی کی رات ہماری پہریداری کرتا رہے گا ۔ سیدہ عائشہ رضی اللہ عنہا بیان کرتی ہیں : ابھی ہم اسی حالت میں تھے کہ اسی دوران میں نے کسی شخص کو اپنی طرف آتے ہوئے دیکھا ۔ نبی اکرم صلی اللہ علیہ وسلم نے دریافت کیا : کون ہے ؟ تو اس نے کہا: میں سعد بن مالک ہوں ، میں اس لئے آیا ہوں تاکہ باقی کی رات آپ کی پہریداری کرتا رہوں ، تو نبی اکرم صلی اللہ علیہ وسلم نے سر رکھا اور آپ سو گئے ۔ ( علامہ ہیثمی فرماتے ہیں : ) میں یہ کہتا ہوں صحیح میں اس روایت کا ایک حصہ مذکور ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابوجعفر اشجعی ہے میں اس سے واقف نہیں ہوں ۔ اس روایت کے بقیہ رجال ” صحیح “ کے رجال ہیں ۔

سیدنا سعد رضی اللہ عنہ بیان کرتے ہیں : جب میں نے نبی اکرم صلی اللہ علیہ وسلم کے ساتھ غزوہ بدر میں شرکت کی تو اس وقت میرا ( داڑھی کا ) صرف ایک بال تھا پھر بعد میں اللہ تعالیٰ نے میری داڑھی کے بال زیادہ کر دیے ۔
یہ روایت امام بزار نے نقل کی ہے وہ یہ فرماتے ہیں : ان کا یہ کہنا ” میرا صرف ایک بال تھا “ اس سے مراد یہ ہے کہ میری صرف ایک بیٹی تھی اور ان کا یہ کہنا کہ ” پھر بعد میں اللہ تعالیٰ نے میری داڑھی کے بال زیادہ کر دیے “ اس سے مراد یہ ہے کہ میری اولاد زیادہ ہو گئی ۔
یہ روایت امام طبرانی نے معجم اوسط میں نقل کی ہے اور امام بزار کے رجال ” صحیح “ کے رجال ہیں ۔

عامر بن سعد بیان کرتے ہیں : سیدنا سعد رضی اللہ عنہ مہاجرین میں سے انتقال کرنے والے آخری فرد ہیں ۔
یہ روایت امام طبرانی نے نقل کی ہے اور اس کے رجال ” صحیح“ کے رجال ہیں ۔

امام أحمد بن حنبل بیان کرتے ہیں : سیدنا سعد رضی اللہ عنہ کا انتقال تراسی برس کی عمر میں ہوا تھا وہ مدینہ منورہ سے دس میل کے فاصلے پر انتقال کر گئے تھے اور ان کی میت کو کندھوں پر اٹھا کر مدینہ منورہ لایا گیا تھا ان دنوں مروان مدینہ منورہ کا گورنر تھا ۔ سیدنا سعد رضی اللہ عنہ نے سترہ سال کی عمر میں اسلام قبول کیا تھا ۔
یہ روایت امام طبرانی نے نقل کی ہے ۔

ابراہیم بن سعد بیان کرتے ہیں : سیدنا سعد بن ابی وقاص رضی اللہ عنہ کا انتقال سیدنا معاویہ رضی اللہ عنہ کے عہد خلافت میں ان کے پہلے حج کرنے کے بعد ہوا تھا اس وقت سیدنا سعد رضی اللہ عنہ کی عمر تراسی برس تھی ۔
یہ روایت امام طبرانی نے نقل کی ہے اور اس کے رجال ثقہ ہیں انہوں نے اس کی مانند روایت یحیی بن بکیر کے حوالے سے بھی نقل کی ہے ۔

محمد بن عبداللہ بن نمیر بیان کرتے ہیں : سیدنا سعد رضی اللہ عنہ کا انتقال ہوا تو مروان اس وقت مدینہ منورہ کا گورنر تھا اس نے سیدنا سعد رضی اللہ عنہ کی نماز جنازہ پڑھائی ، سیدنا سعد رضی اللہ عنہ کا انتقال پچپن ہجری میں ہوا تھا ۔
یہ روایت امام طبرانی نے نقل کی ہے ۔

زبیر بن بکار بیان کرتے ہیں : سیدنا سعد رضی اللہ عنہ اللہ کا انتقال عقیق کے مقام پر ان کے گھر میں ہوا تھا ، جو مدینہ منورہ سے دس میل کے فاصلے پر تھا اور ان کی میت کو لوگ کندھوں پر اٹھا کر مدینہ منورہ لائے تھے ۔ یہ بات کہی جاتی ہے کہ جس وقت ان کا انتقال ہوا اس وقت ان کی عمر ستر سال سے زیادہ تھی ۔
یہ روایت امام طبرانی نے نقل کی ہے ۔