مجمع الزوائد ومنبع الفوائد

سیدنا علی رضی اللہ عنہ بیان کرتے ہیں : عبداللہ بن سلام میرے پاس آئے ، میں اس وقت اپنا پاؤں رکاب میں رکھ چکا تھا ، انہوں نے مجھ سے کہا: آپ عراق نہ جائیں کیونکہ مجھے یہ اندیشہ ہے کہ تلوار کی نوک آپ کو نقصان پہنچا دے گی ، تو سیدنا علی رضی اللہ عنہ نے کہا: اللہ کی قسم ! اس کے بارے میں اللہ کے رسول صلی اللہ علیہ وسلم نے مجھے بتایا ہے ۔ ابواسود کہتے ہیں : میں نے آج جیسا دن نہیں دیکھا ، ایک جنگجو شخص اپنی ذات کے بارے میں اس طرح کی بات بیان کر رہا ہے ۔
یہ روایت امام ابویعلیٰ نے نقل کی ہے اور امام بزار نے اس کی مانند نقل کی ہے ، امام ابویعلیٰ کے رجال ” صحیح “ کے رجال ہیں ، صرف اسحاق بن ابواسرائیل کا معاملہ مختلف ہے اور وہ ثقہ اور مامون ہے ۔

سیدنا عبداللہ بن عباس رضی اللہ عنہما بیان کرتے ہیں : سیدنا علی رضی اللہ عنہ نے عرض کی : یا رسول اللہ ! آپ نے غزوہ احد کے دن جب شہادت کو موخر کیا تھا ، تو آپ نے مجھ سے یہ فرمایا تھا کہ شہادت بعد میں ہو گی ، نبی اکرم صلی اللہ علیہ وسلم نے ارشاد فرمایا : تمہیں کیسے خبر ہو سکتی ہے جبکہ اس کو اس کے ذریعے رنگین کر دیا جائے گا ، نبی اکرم صلی اللہ علیہ وسلم نے اپنا ہاتھ ان کی داڑھی اور ان کے سر کی طرف بڑھایا ، تو سیدنا علی رضی اللہ عنہ نے عرض کی : جب آپ نے میرے سامنے یہ بات بیان کر دی ہے ، تو پھر یہ تو صبر کی صورت میں ہی ہو سکتا ہے ، لیکن یہ تو خوشخبری اور کرامت بھی ہے ۔
یہ روایت امام طبرانی نے نقل کی ہے ۔ اس کی سند میں ایک راوی عبداللہ بن کیسان ہے اور وہ ضعیف ہے ۔

ابوصالح حنفی ، سیدنا علی رضی اللہ عنہ کا یہ بیان نقل کرتے ہیں : میں نے خواب میں نبی اکرم صلی اللہ علیہ وسلم کی زیارت کی ، میں نے آپ کے سامنے اس چیز کی شکایت کی جو مجھے آپ کی امت کی طرف سے سامنا کرنا پڑ رہا تھا ، جس کا تعلق انحراف سے تھا ، شدید دشمنی سے تھا ، میں رونے لگا ، تو نبی اکرم صلی اللہ علیہ وسلم نے فرمایا : اے علی ! تم نہ روؤ ! تم مڑ کے دیکھو ، جب میں نے مڑ کے دیکھا تو وہاں دو آدمی تھے جو اوپر چڑھ رہے تھے اور وہاں ایک پتھر تھا جس کے ذریعے ان دونوں کو کچلا جا رہا تھا یہاں تک کہ وہ دوبارہ پہلے کی طرح ہو جاتے تھے ۔ راوی کہتے ہیں : میں سیدنا علی رضی اللہ عنہ کی طرف گیا جس طرح میں روزانہ ان کے پاس جایا کرتا تھا ، یہاں تک کہ جب میں خرازین کے مقام پر تھا ، تو میری لوگوں سے ملاقات ہوئی ، انہوں نے مجھے بتایا : امیر المؤمنین کو شہید کر دیا گیا ہے ۔
یہ روایت امام ابویعلیٰ نے اسی طرح نقل کی ہے ، تاہم خواب دیکھنے والے شخص شاید ابوصالح ہیں جنہوں نے سیدنا علی رضی اللہ عنہ کے بارے میں یہ خواب دیکھا تھا اور جن دو افراد کو انہوں نے دیکھا تھا ان میں سے ایک ابن ملجم تھا ، جو سیدنا علی رضی اللہ عنہ کا قاتل تھا اور دوسرا اس کا ساتھی تھا ، باقی اللہ بہتر جانتا ہے ، اس روایت کے بقیہ رجال ثقہ ہیں ۔