مجمع الزوائد ومنبع الفوائد

سیدنا عمار بن یاسر رضی اللہ عنہ بیان کرتے ہیں : میں اور سیدنا علی رضی اللہ عنہ غزوہ ذات العشیرہ کے موقع پر ایک دوسرے کے ساتھی تھے جب نبی اکرم صلی اللہ علیہ وسلم نے وہاں پڑاؤ کیا اور آپ وہاں مقیم ہوئے تو وہاں ہم نے بنو مدلج سے تعلق رکھنے والے کچھ افراد کو دیکھا جو کھجوروں کے باغ میں اپنے چشمے میں کام کر رہے تھے ۔ سیدنا علی رضی اللہ عنہ نے مجھ سے کہا: اے ابوالیقظان کیا تم اس بات میں دلچسپی رکھتے ہو کہ ہم ان لوگوں کے پاس جائیں اور یہ دیکھیں یہ کیسے کام کر رہے ہیں ، تو ہم ان لوگوں کے پاس آئے ہم کچھ دیر ان لوگوں کا کام دیکھتے رہے پھر ہمیں نیند آنے لگی تو میں اور سیدنا علی رضی اللہ عنہ گئے اور ہم کھجوروں کے درختوں کے درمیان میں موجود مٹی پر لیٹ کر سو گئے ، اللہ کی قسم ! ہم اس وقت بیدار ہوئے جب نبی اکرم صلی اللہ علیہ وسلم ہمیں اپنے پاؤں کے ذریعے حرکت دے رہے تھے ہم اس مٹی میں خاک آلود ہو چکے ہوئے تھے اس دن نبی اکرم صلی اللہ علیہ وسلم نے سیدنا علی رضی اللہ عنہ سے فرمایا : اے ابوتراب ! کیونکہ نبی اکرم صلی اللہ علیہ وسلم نے ان پر مٹی دیکھی تھی ، پھر نبی اکرم صلی اللہ علیہ وسلم نے فرمایا : کیا میں تم دونوں کو ان دو افراد کے بارے میں نہ بتاؤں جو لوگوں میں سب سے زیادہ بدبخت ہیں ؟ ہم نے عرض کی : جی ہاں یا رسول اللہ ! نبی اکرم صلی اللہ علیہ وسلم نے فرمایا : قوم ثمود کا وہ نالائق شخص جس نے اونٹنی کے پاؤں کاٹے تھے اور وہ شخص اے علی جو تمہاری اس جگہ پر ضرب لگائے گا ۔ نبی اکرم صلی اللہ علیہ وسلم کی مراد پیشانی تھی ، یہاں تک کہ اس کی وجہ سے یہ جگہ گیلی ہو جائے گی ، نبی اکرم صلی اللہ علیہ وسلم کی مراد ان کی داڑھی تھی ۔ “
یہ روایت امام أحمد نے اور امام طبرانی نے نقل کی ہے امام بزار نے اختصار کے ساتھ نقل کی ہے ان تمام روایات کے رجال کی توثیق کی گئی ہے البتہ جو اس کا تابعی ہے اس نے سیدنا عمار بن یاسر رضی اللہ عنہ سے سماع نہیں کیا ہے ۔

سیدنا صہیب رضی اللہ عنہ نبی اکرم صلی اللہ علیہ وسلم کے بارے میں یہ بیان نقل کرتے ہیں : ایک دن انہوں نے سیدنا علی رضی اللہ عنہ سے پاؤں کاٹے تھے ، نبی اکرم صلی اللہ علیہ وسلم نے فرمایا : تم نے ٹھیک کہا: ہے پھر آپ نے دریافت کیا : بعد والوں میں سب سے زیادہ بدنصیب کون ہو گا ؟ سیدنا علی رضی اللہ عنہ نے عرض کی : مجھے اس کا علم نہیں ہے یا رسول اللہ ! نبی اکرم صلی اللہ علیہ وسلم نے فرمایا وہ شخص جو تمہیں اس جگہ پر ضرب لگائے گا ، نبی اکرم صلی اللہ علیہ وسلم نے اپنی پیشانی کی طرف اشارہ کر کے یہ بات ارشاد فرمائی ، تو سیدنا علی رضی اللہ عنہ اہل عراق سے یہ کہا: کرتے تھے : میری یہ خواہش ہے کہ تم میں سے سب سے زیادہ بدنصیب شخص آئے اور اس جگہ کو رنگین کر دے ، سیدنا علی رضی اللہ عنہ کی مراد ان کی داڑھی تھی ، یہاں سے لے کر ، انہوں نے اپنا ہاتھ اپنے سر کے آگے والے حصے پر رکھ کر یہ بات ارشاد فرمائی ۔
یہ روایت امام طبرانی نے اور امام ابویعلیٰ نے نقل کی ہے ۔ اس کی سند میں ایک راوی رشدین بن سعد ہے ، جس کی توثیق کی گئی ہے اس روایت کے بقیہ رجال ثقہ ہیں ۔

سیدنا جابر بن سمرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے سیدنا علی رضی اللہ عنہ سے دریافت کیا : قوم ثمود کا سب سے زیادہ بدنصیب شخص کون تھا ؟ سیدنا علی رضی اللہ عنہ نے جواب دیا : جس نے اونٹنی کے پاؤں کاٹے تھے ، نبی اکرم صلی اللہ علیہ وسلم نے دریافت کیا : اس امت میں سب سے زیادہ بدنصیب شخص کون ہو گا ؟ انہوں نے عرض کی : اللہ تعالیٰ زیادہ بہتر جانتا ہے ۔ نبی اکرم صلی اللہ علیہ وسلم نے فرمایا : تمہارا قاتل ۔
یہ روایت امام طبرانی نے نقل کی ہے ۔ اس کی سند میں ایک راوی ناصح بن عبداللہ ہے اور وہ متروک ہے ۔

ان کے حوالے سے یہ بات منقول ہے وہ بیان کرتے ہیں : نبی اکرم صلی اللہ علیہ وسلم نے سیدنا علی رضی اللہ عنہ سے فرمایا : ” تم ایک ایسے شخص ہو جو بعد میں رہ جاؤ گے ، اور تم قتل کر دیے جاؤ گے اور یہ اس سے رنگین ہو جائے گی ۔ “ یعنی ان کی داڑھی ان کے سر ( کے خون کے ذریعے رنگین ہو جائے گی ) ۔
یہ روایت امام طبرانی نے معجم کبیر میں نقل کی ہے اور معجم اوسط میں اس کی مانند نقل کی ہے ۔ اس کی سند میں ایک راوی ناصح بن عبداللہ ہے اور وہ متروک ہے ۔

فضالہ بن ابوفضالہ انصاری بیان کرتے ہیں : میں اپنے والد کے ساتھ سیدنا علی رضی اللہ عنہ کی عیادت کرنے کے لئے گیا ، وہ بیمار تھے ، میرے والد نے ان سے فرمایا : آپ اس جگہ پر کیوں ٹھہرے ہوئے ہیں ، اگر آپ یہاں ہلاکت کا شکار ہو گئے تو صرف جہینہ قبیلے کے دیہاتی لوگ ہی آپ کے کفن دفن کا انتظام کر سکیں گے ، اور اگر آپ شہر میں داخل ہو جائیں گے تو آپ اپنے ساتھیوں کے درمیان موجود رہیں گے ، اگر آپ کو کوئی چیز لاحق ہوئی ، جس کا آپ کو اندیشہ ہے ، یا ہمیں آپ کے حوالے سے کسی چیز کا اندیشہ ہوا تو آپ کے ساتھی آپ کی دیکھ بھال کریں گے ، راوی کہتے ہیں : سیدنا ابوفضالہ انصاری رضی اللہ عنہ اہل بدر میں سے ایک تھے ۔ سیدنا علی رضی اللہ عنہ نے ان سے کہا: میں اپنی اس بیماری کی وجہ سے نہیں مروں گا ( راوی کو شک ہے ، شاید یہ الفاظ ہیں : ) میں اپنی اس تکلیف کی وجہ سے نہیں مروں گا ، کیونکہ نبی اکرم صلی اللہ علیہ وسلم نے مجھے یہ بتایا تھا کہ میں اس وقت تک نہیں مروں گا ۔ راوی کہتے ہیں : میرا خیال ہے روایت میں یہ الفاظ ہیں : جب تک مجھے ضرب نہیں لگائی جائے گی اور یہ اس کے ذریعے رنگین نہیں ہو جائے گی ۔ راوی کہتے ہیں : سیدنا ابوفضالہ رضی اللہ عنہ جنگ صفین میں سیدنا علی رضی اللہ عنہ کے ساتھ شرکت کرتے ہوئے شہید ہوئے تھے ۔
یہ روایت امام بزار نے نقل کی ہے ، اور امام أحمد نے اس کی مانند نقل کی ہے ، اور اس کے رجال کی توثیق کی گئی ہے ۔

ابوسنان دؤلی بیان کرتے ہیں : وہ سیدنا علی رضی اللہ عنہ کی بیماری کے دوران ان کی عیادت کرنے کے لئے گئے ، تو انہوں نے سیدنا علی رضی اللہ عنہ سے کہا: ہمیں آپ کی اس بیماری کے حوالے سے آپ کے بارے میں اندیشہ ہے ، تو سیدنا علی رضی اللہ عنہ نے فرمایا : لیکن اللہ کی قسم ! مجھے اس بیماری کے حوالے سے اپنی ذات کے بارے میں کوئی خوف نہیں ہے ، کیونکہ میں نے سیدنا صادق و مصدوق صلی اللہ علیہ وسلم کو یہ ارشاد فرماتے ہوئے سنا ہے : ” تم پر یہاں ضرب لگائی جائے گی اور یہاں ضرب لگائی جائے گی ۔ “ سیدنا علی رضی اللہ عنہ نے اپنی کنپٹی کی طرف اشارہ کیا کہ یہاں سے خون بہے گا اور تمہاری داڑھی کو رنگین کر دے گا ۔ ” اور ایسا کرنے والا شخص سب سے زیادہ بدنصیب ہو گا ، جس طرح اونٹنی کے پاؤں کاٹنے والا شخص قوم ثمود کا سب سے زیادہ بدنصیب شخص تھا ۔ “
یہ روایت امام طبرانی نے نقل کی ہے اور اس کی سند حسن ہے ۔

ابوسنان یزید بن مرہ دیلی بیان کرتے ہیں : سیدنا علی بن ابوطالب رضی اللہ عنہ شدید بیمار ہو گئے ، یہاں تک کہ وہ مستقل بیمار رہے ، تو ہمیں ان کے حوالے سے اندیشہ ہوا پھر وہ تندرست اور صحت یاب ہو گئے ، تو ہم نے کہا: اے ابوالحسن ! آپ کو مبارک باد ہو ، ہر طرح کی حمد اللہ تعالیٰ کے لئے مخصوص ہے ، جس نے آپ کو عافیت عطا کی ہے ، ہمیں تو آپ کے بارے میں اندیشہ ہو چلا تھا ، تو انہوں نے فرمایا : لیکن مجھے اپنی ذات کے بارے میں اندیشہ نہیں تھا ، سیدنا صادق و مصدوق صلی اللہ علیہ وسلم نے مجھے یہ بات بتائی ہے کہ میں اس وقت تک نہیں مروں گا جب تک میرے یہاں ضرب نہیں لگائی جائے گی ، سیدنا علی رضی اللہ عنہ نے اپنے سر کے آگے والے بائیں حصے کی طرف اشارہ کر کے یہ بات بیان کی اور خون کے ذریعے یہ جگہ رنگین نہیں ہو گی ، سیدنا علی رضی اللہ عنہ نے اپنی داڑھی پکڑ کر یہ بات بیان کی ، نبی اکرم صلی اللہ علیہ وسلم نے فرمایا تھا : تمہیں وہ شخص قتل کرے گا جو اس امت کا سب سے زیادہ بدنصیب ہو گا ، جس طرح اللہ کی بھیجی ہوئی اونٹنی کے پاؤں کاٹنے والا شخص قوم ثمود میں سے بنو فلاں کا سب سے زیادہ بدنصیب شخص تھا ، راوی بیان کرتے ہیں : تو نبی اکرم صلی اللہ علیہ وسلم نے اس کی نسبت قوم ثمود کی ذیلی شاخ کی طرف کر کے بیان کی ۔
یہ روایت امام ابویعلیٰ نے نقل کی ہے ۔ اس کی سند میں علی بن مدینی کا والد موجود ہے اور وہ ضعیف ہے ۔

عبداللہ بن سبیع بیان کرتے ہیں : میں نے سیدنا علی رضی اللہ عنہ کو یہ ارشاد فرماتے ہوئے سنا : یہ اس کے ذریعے رنگین ہو جائے گی اور میرا انتظار صرف بدنصیب ترین شخص کرے گا ، لوگوں نے کہا: اے امیر المؤمنین ! آپ ہمیں اس کے بارے میں بتائیے ، ہم اس کی نسل ہی فنا کر دیں گے ۔ سیدنا علی رضی اللہ عنہ نے فرمایا : ایسی صورت میں تم میرے قاتل کے علاوہ کسی اور کو قتل کرو گے ، لوگوں نے کہا: آپ ہم پر کسی کو اپنا نائب مقرر کر دیں ، سیدنا علی رضی اللہ عنہ نے فرمایا : جی نہیں بلکہ میں تمہیں اسی طرح چھوڑ دوں گا ، جس طرح کی صورت حال میں نبی اکرم صلی اللہ علیہ وسلم نے تم لوگوں کو چھوڑا تھا ، لوگوں نے دریافت کیا : جب آپ اپنے پروردگار کی بارگاہ میں جائیں گے ، تو آپ اپنے پروردگار کی بارگاہ میں کیا کہیں گے ، تو سیدنا علی رضی اللہ عنہ نے فرمایا : میں یہ کہوں گا کہ اے اللہ ! تو نے مجھے ان کے درمیان اس وقت تک رہنے دیا جب تک تو نے مناسب سمجھا ، پھر تو نے مجھے اپنی طرف قبض کر لیا ، لیکن تو ان کے درمیان موجود ہے ، اگر تو چاہے ، تو ان کو ٹھیک رکھ اور اگر تو چاہے تو انہیں خراب کر دے ۔
یہ روایت امام أحمد اور امام ابویعلیٰ نے نقل کی ہے ، اور اس کے رجال ” صحیح “ کے رجال ہیں البتہ عبداللہ بن سبیع کا معاملہ مختلف ہے اور وہ ثقہ ہے ۔
یہ روایت امام بزار نے حسن سند کے ساتھ نقل کی ہے ۔

ثعلبہ بیان کرتے ہیں : سیدنا علی رضی اللہ عنہ نے منبر پر ارشاد فرمایا : اُمی نبی نے مجھے یہ بات بتائی تھی کہ ایک گروہ عنقریب میرے ساتھ غداری کرے گا ۔
یہ روایت امام بزار نے نقل کی ہے ۔ اس کی سند میں ایک راوی علی بن قادم ہے ، جس کی توثیق کی گئی ہے اور اسے ضعیف بھی قرار دیا گیا ہے ۔

سیدہ عائشہ صدیقہ رضی اللہ عنہا بیان کرتی ہیں : میں نے نبی اکرم صلی اللہ علیہ وسلم کو دیکھا کہ آپ نے سیدنا علی رضی اللہ عنہ کو اپنے ساتھ لپٹا لیا ، ان کا بوسہ لیا اور یہ ارشاد فرمایا : میرے باپ کی قسم ! یہ اکیلا ہو گا ، اور شہید ہو گا ، میرے باپ کی قسم ! ایہ اکیلا ہو گا اور شہید ہو گا ۔ “
یہ روایت امام ابویعلیٰ نے نقل کی ہے ، اور اس کی سند میں ایسا راوی ہے ، جس سے میں واقف نہیں ہوں ۔

سیدنا ابورافع رضی اللہ عنہ بیان کرتے ہیں : نبی اکرم صلی اللہ علیہ وسلم نے وصال سے پہلے سیدنا علی رضی اللہ عنہ سے ارشاد فرمایا : ” تم میرے ذمہ کو پورا کرو گے ، اور تمہیں میری سنت پر قتل کیا جائے گا ۔ “
یہ روایت امام بزار نے نقل کی ہے ، اور اس کی سند میں ضعیف راویوں کی ایک جماعت ہے جن کی توثیق کی گئی ہے ۔