مجمع الزوائد ومنبع الفوائد

سیدنا ذؤیب بیان کرتے ہیں : جب نبی اکرم صلی اللہ علیہ وسلم کا آخری وقت قریب آیا تو سیدہ صفیہ رضی اللہ عنہا نے عرض کی : یا رسول اللہ ! آپ کی ازواج میں سے ہر ایک خاتون کے اہل خانہ موجود ہیں ۔ وہ خاتون ان کی پناہ حاصل کر لے گی اور میرے اہل خانہ نہیں ہیں ، تو اگر کوئی ضرورت پیش آ گئی ، تو میں کس کی طرف رجوع کروں ؟ تو آپ صلی اللہ علیہ وسلم نے فرمایا : علی بن ابوطالب کی طرف ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : ہم لوگ یہ بات چیت کیا کرتے تھے کہ نبی اکرم صلی اللہ علیہ وسلم نے سیدنا علی رضی اللہ عنہ کے ساتھ بطور خاص ستر ایسے عہد کیے تھے جو آپ نے ان کے علاوہ کسی اور کے ساتھ نہیں کیے ۔ ( یہاں عہد کرنے سے مراد مخصوص قسم کی تلقین کرنا بھی ہو سکتا ہے ) ۔
یہ روایت امام طبرانی نے معجم صغیر میں نقل کی ہے ، اور اس کی سند میں ایسے راوی ہیں جن سے میں واقف نہیں ہوں ۔

سیدنا علی رضی اللہ عنہ بیان کرتے ہیں : جب یہ آیت نازل ہوئی : ” اور تم اپنے قریبی رشتے داروں کو ڈراؤ“ ۔ سیدنا علی رضی اللہ عنہ بیان کرتے ہیں : تو نبی اکرم صلی اللہ علیہ وسلم نے اپنے اہل خانہ کو جمع کیا ، تیس افراد آپ کے پاس جمع ہوئے ، ان لوگوں نے کھایا پیا ، راوی کہتے ہیں : پھر نبی اکرم صلی اللہ علیہ وسلم نے ان لوگوں سے فرمایا : کون شخص میرے قرض اور میرے وعدوں کے حوالے سے میرا ساتھ دے گا ، اور وہ جنت میں میرے ساتھ ہو گا ، اور میرے اہل خانہ کے بارے میں میرا خلیفہ ہو گا ، تو ایک شخص نے کہا: شریک نامی راوی نے اس کا نام بیان نہیں کیا ، یا رسول اللہ ! آپ تو سمندر ہیں ، کون ایسا کر سکتا ہے ؟ پھر انہوں نے دوسری مرتبہ یہ کہا: ہے کہ نبی اکرم صلی اللہ علیہ وسلم نے اپنے اہل بیت کے سامنے یہ پیش کش رکھی تو سیدنا علی رضی اللہ عنہ نے عرض کی : میں ایسا کروں گا ۔
یہ روایت امام أحمد نے نقل کی ہے ، اور اس کی سند عمدہ ہے ۔ اس سے پہلے اس حدیث کے مختلف طرق نبوت کی علامات سے متعلق باب میں کھانے کے بارے میں نبی اکرم صلی اللہ علیہ وسلم کے معجزات سے متعلق باب میں گزر چکے ہیں ۔

سیدنا جابر بن عبداللہ رضی اللہ عنہما بیان کرتے ہیں : نبی اکرم صلی اللہ علیہ وسلم نے سیدنا عباس بن عبدالمطلب رضی اللہ عنہ کو بلایا اور فرمایا : آپ مجھے اس بات کی ضمانت دیں گے کہ میرے قرض کو ادا کر دیں اور میرے کیے ہوئے وعدوں کو پورا کریں ، تو انہوں نے کہا: میں اس کی طاقت نہیں رکھتا ، اُن کے صاحبزادے سیدنا عبداللہ بن عباس رضی اللہ عنہما نے ان پر تنقید کی اور یہ کہا: اللہ تعالیٰ آپ کے ساتھ یہ کرے ، اللہ کے رسول صلی اللہ علیہ وسلم نے آپ کو یہ کہا: ہے کہ آپ ان کی طرف سے قرض کو ادا کر دیں اور ان کے کیے ہوئے وعدوں کو پورا کریں ، تو سیدنا عباس رضی اللہ عنہ نے کہا: تم مجھے چھوڑ دو ! کیونکہ تمہارے چچا زاد ( سخاوت اور نفع رسانی کے حوالے سے ) ہوا کو مات دیتے ہیں ( یعنی ان کی سخاوت کی وجہ سے ان کے وعدے بہت زیادہ ہوں گے ) پھر نبی اکرم صلی اللہ علیہ وسلم نے سیدنا علی بن ابوطالب رضی اللہ عنہ کو بلایا اور فرمایا : تم مجھے ضمانت دو کہ قرض کو ادا کر دو گے اور میرے کیے ہوئے وعدوں کو پورا کر دو گے ، انہوں نے عرض کی : ٹھیک ہے ! یہ میرے ذمہ ہوا ، تو سیدنا علی رضی اللہ عنہ نے اپنی طرف سے اس چیز کی ضمانت دی ۔ جب سیدنا ابوبکر رضی اللہ عنہ ( کے عہد خلافت میں ) ان کے پاس مال آیا تو انہوں نے فرمایا : یہ اللہ کا مال ہے ، اور اللہ تعالیٰ نے مسلمانوں کو مال فئے کے طور پر عطا کیا ہے ، اور یہ بات ضروری ہے کہ نبی اکرم صلی اللہ علیہ وسلم کی طرف سے ادائیگیاں کر دی جائیں ، انہوں نے لوگوں کو بلایا اور فرمایا : جس شخص نے نبی اکرم صلی اللہ علیہ وسلم سے کوئی قرض واپس لینا ہو یا جس کے ساتھ نبی اکرم صلی اللہ علیہ وسلم نے وعدہ کیا ہو ، وہ وصولی کر لے تو آنے والے لوگوں میں سیدنا جابر رضی اللہ عنہ بھی شامل تھے ۔ انہوں نے یہ بات بتائی کہ نبی اکرم صلی اللہ علیہ وسلم نے مجھ سے یہ فرمایا تھا کہ جب ہمارے پاس کوئی مال آئے گا ، تو ہم تمہیں دونوں ہاتھ بھر کے دیں گے ، تو سیدنا ابوبکر رضی اللہ عنہ نے ان سے کہا: نبی اکرم صلی اللہ علیہ وسلم نے تم سے جس طرح ارشاد فرمایا تھا : تم اس طرح وصولی کر لو ، تو انہوں نے تین مرتبہ دونوں ہاتھ بھر کے مال لیا ، جس طرح نبی اکرم صلی اللہ علیہ وسلم نے انہیں حکم دیا تھا ۔ ( علامہ ہیثمی فرماتے ہیں : ) میں یہ کہتا ہوں صحیح میں اس روایت میں سے صرف یہ حصہ منقول ہے کہ سیدنا جابر رضی اللہ عنہ کے ساتھ نبی اکرم صلی اللہ علیہ وسلم کا جو وعدہ تھا ( اور جس طرح سیدنا ابوبکر رضی اللہ عنہ نے اسے پورا کیا ) ۔
یہ روایت امام بزار نے نقل کی ہے ۔ اس کی سند میں ایک راوی اسماعیل بن یحیی بن سلمہ بن کہیل ہے ، اور وہ متروک ہے ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” علی میرا قرض ادا کرے گا ۔ “
یہ روایت امام بزار نے نقل کی ہے ۔ اس کی سند میں ایک راوی ضرار بن صرد ہے ، اور وہ ضعیف ہے ۔

سیدنا سلمان رضی اللہ عنہ بیان کرتے ہیں : میں نے عرض کی : یا رسول اللہ ! ہر نبی کا ایک وصی ہوتا ہے ، تو آپ کا وصی کون ہے ؟ نبی اکرم صلی اللہ علیہ وسلم خاموش رہے ، اس کے بعد جب آپ نے مجھے دیکھا ، تو آپ نے فرمایا : اے سلمان ! میں جلدی سے آپ کے پاس آیا ، میں نے عرض کی : میں حاضر ہوں ۔ نبی اکرم صلی اللہ علیہ وسلم نے فرمایا : کیا تم جانتے ہو کہ سیدنا موسیٰ علیہ السلام کا وصی کون تھا ؟ انہوں نے جواب دیا : جی ہاں ! سیدنا یوشع بن نون علیہ السلام تھے ، نبی اکرم صلی اللہ علیہ وسلم نے دریافت کیا : وہ کیوں تھے ؟ میں نے عرض کی : کیونکہ اس وقت وہ ان لوگوں میں سب سے زیادہ علم رکھتے تھے ، تو نبی اکرم صلی اللہ علیہ وسلم نے ارشاد فرمایا : میرا وصی اور میرے راز کا رازدان اور اپنے بعد میں جن لوگوں کو چھوڑ دوں گا ، ان میں سے سب سے زیادہ بہتر شخص وہ ہے ، جو میرے وعدے کو پورا کرے گا ، میرے قرض کو ادا کرے گا ، اور وہ علی بن ابوطالب ہے ۔ “
یہ روایت امام طبرانی نے نقل کی ہے ، وہ یہ کہتے ہیں : نبی اکرم صلی اللہ علیہ وسلم کا یہ فرمان : ” میرا وصی ۔ “ اس سے مراد یہ ہے کہ نبی اکرم صلی اللہ علیہ وسلم نے انہیں اپنے اہلخانہ کے بارے میں وصی مقرر کیا تھا ، یہ مراد نہیں ہے کہ خلافت کے بارے میں وصی مقرر کیا تھا اور نبی اکرم صلی اللہ علیہ وسلم کا یہ فرمان : ” جسے میں اپنے بعد چھوڑوں گا ان میں سب سے بہتر ۔ “ اس سے مراد یہ ہے کہ آپ کے اہل بیت میں سے ۔ اس کی سند میں ایک راوی ناصح بن عبداللہ ہے ، اور وہ متروک ہے ۔