مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : جب نبی اکرم صلی اللہ علیہ وسلم نے مہاجرین اور انصار سے تعلق رکھنے والے اپنے اصحاب کے درمیان بھائی چارہ قائم کیا ، تو آپ نے سیدنا علی بن ابوطالب رضی اللہ عنہ کو کسی کا بھائی قرار نہیں دیا ، سیدنا علی رضی اللہ عنہ غصے کے عالم میں نکلے ، یہاں تک کہ وہ ندی کے پاس آئے اور وہاں کلائی کو تکیہ بنا کر لیٹ گئے ، ہوا چلنے کی وجہ سے وہ گردوغبار میں اٹ گئے ، نبی اکرم صلی اللہ علیہ وسلم انہیں تلاش کرتے ہوئے آئے ، یہاں تک کہ آپ نے انہیں پایا اور آپ نے انہیں پاؤں مارا اور فرمایا : تم اٹھ جاؤ ! تمہارے لئے موزوں ( نام ) یہی ہے کہ تم ابوتراب ہو ، کیا تم اس بات پر غصے میں ہو کہ میں نے جب مہاجرین اور انصار کے درمیان بھائی چارہ قائم کیا ، تو میں نے تمہارے اور کسی فرد کے درمیان بھائی چارہ قائم نہیں کیا ؟ کیا تم اس بات سے راضی نہیں ہو کہ تمہاری مجھ سے وہی نسبت ہو جو سیدنا ہارون علیہ السلام کی سیدنا موسیٰ علیہ السلام سے تھی ، البتہ یہ ہے کہ میرے بعد کوئی نبی نہیں ہو گا ، جو شخص تم سے محبت رکھے گا ، وہ امن اور ایمان سے بھر دیا جائے گا ، اور جو شخص تم سے بغض رکھے گا اللہ تعالیٰ اسے زمانہ جاہلیت کی موت دے گا ، اور اسلام میں اس نے جو عمل کیا ہے اس سے حساب لیا جائے گا ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی حامد بن آدم مروزی ہے ، اور وہ کذاب ہے ۔

سیدنا جابر بن عبداللہ رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جنت کے دروازے پر یہ لکھا ہوا ہے ، اللہ تعالیٰ کے علاوہ اور کوئی معبود نہیں ہے ، اور سیدنا محمد ( صلی اللہ علیہ وسلم ) اس کے بندے اور اس کے رسول ہیں ، علی ، اللہ کے رسول کا بھائی ہے ، اور یہ بات آسمانوں اور زمین کی تخلیق سے دو ہزار سال پہلے ( طے ہو چکی تھی ) ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی اشعث ہے ، جو حسن بن صالح کا چچازاد ہے ، اور وہ ضعیف ہے ، اور اس میں ایسا راوی بھی ہے ، جس سے میں واقف نہیں ہوں ۔ آگے چل کر صحابہ کرام کے درمیان بھائی چارہ قائم کرنے سے متعلق حدیث آئے گی جو صحابہ کرام کی جماعت کے مناقب سے متعلق باب میں آئے گی ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم نے لوگوں کے درمیان بھائی چارہ قائم کیا ، تو آپ نے اپنے اور سیدنا علی رضی اللہ عنہ کے درمیان بھائی چارہ قائم کیا ۔
یہ روایت امام طبرانی نے بشر بن عون کے حوالے سے نقل کی ہے ، اور وہ ضعیف ہے ۔

سیدنا شراحیل بن مرہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو سیدنا علی رضی اللہ عنہ سے یہ ارشاد فرماتے ہوئے سنا : ” اے علی ! تم یہ خوشخبری حاصل کرو کہ تمہاری زندگی میرے ساتھ ہو گی اور تمہاری موت میرے ساتھ ہو گی ( یعنی تم مرنے کے بعد بھی میرے ساتھ رہو گے ) ۔ “
یہ روایت امام طبرانی نے نقل کی ہے ، اور اس کی سند حسن ہے ۔

سیدنا عبداللہ بن عباس رضی اللہ عنہما بیان کرتے ہیں : جب نبی اکرم صلی اللہ علیہ وسلم نے سیدنا علی رضی اللہ عنہ کی شادی سیدہ فاطمہ رضی اللہ عنہا سے کی ، تو سیدہ فاطمہ رضی اللہ عنہا نے عرض کی : یا رسول اللہ ! آپ نے ایک ایسے شخص سے میری شادی کی ہے ، جو غریب ہے ، اور اس کے پاس کوئی چیز نہیں ہے ، تو نبی اکرم صلی اللہ علیہ وسلم نے ارشاد فرمایا : ” اے فاطمہ ! کیا تم اس بات سے راضی نہیں ہو کہ اللہ تعالیٰ نے اہل زمین میں سے دو افراد کو منتخب کیا ، ان میں سے ایک تمہارا باپ ہے اور دوسرا تمہارا شوہر ہے ۔ “
یہ روایت امام طبرانی نے ابراہیم بن حجاج کے حوالے سے امام عبدالرزاق سے نقل کی ہے ، امام ذہبی کہتے ہیں : ابراہیم نامی یہ راوی معروف نہیں ہے ، اس روایت کے بقیہ رجال ” صحیح“ کے رجال ہیں ۔ انہوں نے اسے ایک اور ضعیف سند کے ساتھ بھی نقل کیا ہے ۔

سیدنا عبداللہ بن عباس رضی اللہ عنہما بیان کرتے ہیں : جب بھی اللہ تعالیٰ نے یہ آیت نازل کی : ” اے ایمان والو ۔ ۔ ۔ ۔ ۔ ۔ ۔ ۔ “ ۔ تو سیدنا علی رضی اللہ عنہ اہل ایمان کے امیر اور ان کے معزز ترین فرد تھے ، اللہ تعالیٰ نے ایک سے زیادہ جگہ پر نبی اکرم صلی اللہ علیہ وسلم کے اصحاب پر عتاب کیا لیکن سیدنا علی رضی اللہ عنہ کا ذکر صرف بھلائی کے حوالے سے ہی کیا ۔
یہ روایت امام طبرانی نے نقل کی ہے ۔ اس کی سند میں ایک راوی عیسیٰ بن راشد ہے ، اور وہ ضعیف ہے ۔

جمیع بن عمیر بیان کرتے ہیں : ان کی والدہ اور ان کی خالہ سیدہ عائشہ رضی اللہ عنہا کی خدمت میں حاضر ہوئیں ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ، جس میں آگے چل کر وہ یہ الفاظ نقل کرتے ہیں : ان دونوں خواتین نے کہا: آپ ہمیں سیدنا علی رضی اللہ عنہ کے بارے میں بتائیں ، تو سیدہ عائشہ رضی اللہ عنہا نے فرمایا : تم کس حوالے سے سوال کر رہی ہو ؟ ایک ایسے شخص کے بارے میں جس نے اپنا ہاتھ نبی اکرم صلی اللہ علیہ وسلم پر یوں رکھا تھا کہ نبی اکرم صلی اللہ علیہ وسلم کا وصال ان کے ہاتھوں میں ہوا ، لوگوں نے نبی اکرم صلی اللہ علیہ وسلم کو دفن کرنے کے بارے میں اختلاف کیا ، تو ان صاحب نے یہ کہا: اللہ کے نزدیک سب سے زیادہ پسندیدہ جگہ وہ ہوتی ہے ، جس میں اس کے نبی کی روح کو قبض کیا گیا ہو ۔ ان دونوں خواتین نے کہا: پھر آپ نے سیدنا علی رضی اللہ عنہ کے خلاف جنگ کیوں کی تھی ؟ تو سیدہ عائشہ رضی اللہ عنہا نے فرمایا : یہ تقدیر کا ایک فیصلہ تھا ، میری یہ خواہش ہے کہ میں اس کے فدیے کے طور پر روئے زمین پر موجود ہر چیز دے دوں ۔
یہ روایت امام ابویعلیٰ نے نقل کی ہے ۔ اس کی سند میں راویوں کی ایک جماعت ایسی ہے جن کے بارے میں اختلاف کیا گیا ہے ، ام جمیع اور جمیع کی خالہ ، میں ان دونوں خواتین سے واقف نہیں ہوں ۔

سیدہ ام سلمہ رضی اللہ عنہا بیان کرتی ہیں : اس ذات کی قسم ! جس کے نام کا میں حلف اٹھاتی ہوں ، سیدنا علی رضی اللہ عنہ نبی اکرم صلی اللہ علیہ وسلم کے سب سے زیادہ قریب رہے ۔ سیدہ ام سلمہ رضی اللہ عنہا بیان کرتی ہیں : ہم روزانہ نبی اکرم صلی اللہ علیہ وسلم کی عیادت کے لئے جایا کرتی تھیں ، آپ نے فرمایا : علی آ گیا ؟ آپ نے چند مرتبہ یہ بات دریافت کی : سیدہ ام سلمہ رضی اللہ عنہا کہتی ہیں مجھے اندازہ ہو گیا کہ نبی اکرم صلی اللہ علیہ وسلم نے انہیں کسی کام کے سلسلے میں بھیجا ہوا ہے ۔ سیدہ ام سلمہ رضی اللہ عنہا بیان کرتی ہیں : بعد میں جب وہ آئے تو مجھے اندازہ ہو گیا کہ شاید نبی اکرم صلی اللہ علیہ وسلم کو ان سے کوئی خاص کام ہے ، تو ہم خواتین گھر سے نکل آئیں اور گھر سے باہر بیٹھ گئیں ( یا کمرے سے باہر بیٹھ گئیں ) تو میں ان خواتین میں دروازے کے سب سے زیادہ قریب تھی ، میں نے دیکھا کہ سیدنا علی رضی اللہ عنہ نبی اکرم صلی اللہ علیہ وسلم پر جھک گئے اور نبی اکرم صلی اللہ علیہ وسلم نے سرگوشی میں ان کے ساتھ کوئی بات چیت کی ، پھر اسی دن نبی اکرم صلی اللہ علیہ وسلم کا وصال ہو گیا ، تو سیدنا علی رضی اللہ عنہ نبی اکرم صلی اللہ علیہ وسلم کے سب سے زیادہ قریب تھے ۔
یہ روایت امام أحمد اور امام ابویعلیٰ نے نقل کی ہے ، تاہم انہوں نے اس میں یہ الفاظ نقل کیے ہیں : جس دن نبی اکرم صلی اللہ علیہ وسلم کا وصال ہوا ، اس دن آپ سیدہ عائشہ رضی اللہ عنہا کے گھر میں تھے ۔
یہ روایت امام طبرانی نے اختصار کے ساتھ نقل کی ہے ۔ اس کے رجال ” صحیح “ کے رجال ہیں ، صرف اُم موسیٰ نامی خاتون کا معاملہ مختلف ہے ، اور وہ خاتون ثقہ ہے ۔