مجمع الزوائد ومنبع الفوائد

رباح بن حارث بیان کرتے ہیں : کچھ لوگ رحبہ کے مقام پر سیدنا علی رضی اللہ عنہ کے پاس آئے اور بولے : آپ پر سلام ہو ، اے ہمارے مولیٰ ، سیدنا علی رضی اللہ عنہ نے فرمایا : میں تمہارا مولیٰ کیسے ہو سکتا ہوں ؟ جبکہ تم لوگ عرب ہو تو ان لوگوں نے بتایا : ہم نے نبی اکرم صلی اللہ علیہ وسلم کو غدیر خم کے دن یہ ارشاد فرماتے ہوئے سنا تھا : ” میں جس کا مولیٰ ہوں یہ ( یعنی سیدنا علی رضی اللہ عنہ ) بھی اس کا مولیٰ ہے ۔ “ رباح کہتے ہیں جب وہ لوگ چلے گئے ، تو میں ان کے پیچھے گیا ۔ میں نے دریافت کیا : یہ لوگ کون ہیں ؟ تو انہوں نے بتایا : یہ انصار سے تعلق رکھنے والے افراد تھے جن میں سیدنا ابوایوب انصاری رضی اللہ عنہ بھی موجود تھے ۔
یہ روایت امام أحمد اور امام طبرانی نے نقل کی ہے ، تاہم انہوں نے یہ الفاظ نقل کیے ہیں : ان لوگوں نے بتایا : ہم نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میں جس کا مولیٰ ہوں تو علی بھی اس کا مولیٰ ہے ، اے اللہ ! جو اس سے محبت رکھتا ہے ، تو اس سے محبت رکھنا اور جو اس سے دشمنی رکھتا ہے ، تو اس سے دشمنی رکھنا ۔ “ ان لوگوں نے بتایا : یہاں سیدنا ابوایوب انصاری رضی اللہ عنہ بھی موجود ہیں ، تو سیدنا ابوایوب رضی اللہ عنہ نے اپنے چہرے سے عمامہ ہٹایا اور پھر انہوں نے یہ بات بیان کی ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میں جس کا مولیٰ ہوں تو علی بھی اس کا مولیٰ ہے ، اے اللہ ! جو شخص اس سے محبت رکھے تو اس سے محبت رکھنا جو شخص اس سے دشمنی رکھے تو اس سے دشمنی رکھنا ۔ “ امام أحمد کے رجال ثقہ ہیں ۔

سیدنا عمروذی مر رضی اللہ عنہ اور سیدنا زید بن ارقم رضی اللہ عنہ ، یہ دونوں بیان کرتے ہیں : غدیر خم کے دن نبی اکرم صلی اللہ علیہ وسلم نے خطبہ دیتے ہوئے ارشاد فرمایا : ” میں جس کا مولیٰ ہوں تو علی بھی اس کا مولیٰ ہے ، اے اللہ ! جو شخص اس سے محبت رکھے ، تو اس سے محبت رکھنا اور جو شخص اس سے دشمنی رکھے ، تو اس سے دشمنی رکھنا ، جو شخص اس کی مدد کرے ، تو اس کی مدد کرنا ، جو شخص اس کی اعانت کرے ، تو اس کی اعانت کرنا ۔ “ ( علامہ ہیثمی فرماتے ہیں : ) میں یہ کہتا ہوں : سیدنا زید بن ارقم کی نقل کردہ حدیث امام ترمذی نے نقل کی ہے ، جس میں صرف یہ الفاظ ہیں : ” میں جس کا مولیٰ ہو ، تو علی بھی اس کا مولیٰ ہے ۔ “
یہ روایت امام طبرانی نے اور امام أحمد نے صرف سیدنا زید رضی اللہ عنہ کے حوالے سے اختصار کے ساتھ نقل کی ہے ، تاہم انہوں نے اس کے آغاز میں یہ الفاظ نقل کیے ہیں : ” ہم نے نبی اکرم صلی اللہ علیہ وسلم کے ساتھ ایک وادی میں پڑاؤ کیا جس کا نام خم تھا ۔ نبی اکرم صلی اللہ علیہ وسلم نے نماز کے بارے میں حکم دیا ، آپ نے نماز جلدی ادا کر لی ، راوی کہتے ہیں : پھر نبی اکرم صلی اللہ علیہ وسلم نے خطبہ دیا ، اس وقت نبی اکرم صلی اللہ علیہ وسلم پر ایک درخت کے ذریعے سایہ موجود تھا جو دھوپ سے بچنے کے لئے تھا ۔ نبی اکرم صلی اللہ علیہ وسلم نے فرمایا : کیا تم لوگ یہ بات نہیں جانتے ہو ( راوی کو شک ہے شاید یہ الفاظ ہیں ) کیا تم لوگ اس بات کی گواہی نہیں دیتے ہو کہ میں ہر مومن کے نزدیک اس کی جان سے زیادہ قریب ہوں ؟ لوگوں نے جواب دیا : جی ہاں ! اس کے بعد راوی نے حسب سابق حدیث ذکر کی ہے ۔ اس روایت کو امام بزار نے بھی نقل کیا ہے اس کی سند میں ایک راوی میمون ابوعبداللہ بصری ہے ، جسے ابن حبان نے ثقہ قرار دیا ہے ، اور ایک جماعت نے اسے ضعیف کہا: ہے ، اس روایت کے بقیہ رجال ثقہ ہیں ۔

ابوطفیل بیان کرتے ہیں : سیدنا علی رضی اللہ عنہ نے لوگوں کو رحبہ کے مقام پر ( یا کھلے میدان میں ) جمع کیا اور پھر ان سے فرمایا : میں ہر اس مسلمان شخص کو اللہ کا واسطہ دے کر دریافت کرتا ہوں جس نے نبی اکرم صلی اللہ علیہ وسلم کو غدیر خم کے دن ایک بات ارشاد فرماتے ہوئے سنا تھا ، کہ وہ شخص کھڑا ہو جائے ، راوی کہتے ہیں : تو تیس افراد ان کے سامنے کھڑے ہوئے ، ابونعیم نامی راوی نے یہ بات بیان کی ہے کہ بہت سے لوگ کھڑے ہو گئے اور ان لوگوں نے یہ بات گواہی دے کر بیان کی ، جب انہوں نے ان کا ہاتھ پکڑا تھا ( یعنی نبی اکرم صلی اللہ علیہ وسلم نے سیدنا علی رضی اللہ عنہ کا ہاتھ پکڑ کر ) یہ ارشاد فرمایا تھا : کیا تم لوگ یہ بات جانتے ہو ؟ میں مومنین کے نزدیک ان کی جان سے زیادہ قریب ہوں ؟ لوگوں نے عرض کی : جی ہاں یا رسول اللہ ! نبی اکرم صلی اللہ علیہ وسلم نے ارشاد فرمایا : ” تو میں جس کا مولیٰ ہوں یہ بھی اس کا مولیٰ ہے ، اے اللہ ! جو شخص اس سے محبت رکھتا ہو ، تو اس سے محبت رکھنا اور جو شخص اس سے دشمنی رکھتا ہو ، تو اس سے دشمنی رکھنا ۔ “ راوی کہتے ہیں : میں وہاں سے نکلا میرے من میں کچھ الجھن تھی ، میری ملاقات سیدنا زید بن ارقم رضی اللہ عنہ سے ہوئی ، میں نے ان سے کہا: میں نے سیدنا علی رضی اللہ عنہ کو یہ یہ بات بیان کرتے ہوئے سنا ہے ، تو انہوں نے فرمایا : تمہیں کس بات پر اعتراض ہے ؟ میں نے بھی نبی اکرم صلی اللہ علیہ وسلم کو یہ ارشاد فرماتے ہوئے سنا ہے ۔
یہ روایت امام بزار نے اور امام أحمد نے نقل کی ہے ، اور اس کے رجال ” صحیح “ کے رجال ہیں ، صرف فطر بن خلیفہ کا معاملہ مختلف ہے ، اور وہ ثقہ ہے ۔

سعید بن وہب بیان کرتے ہیں : سیدنا علی رضی اللہ عنہ نے لوگوں کو واسطہ دے کر دریافت کیا ، تو نبی اکرم صلی اللہ علیہ وسلم کے اصحاب سے تعلق رکھنے والے پانچ یا چھ افراد کھڑے ہوئے اور انہوں نے اس بات کی گواہی دی کہ نبی اکرم صلی اللہ علیہ وسلم نے یہ ارشاد فرمایا ہے : ” میں جس کا مولیٰ ہوں تو علی بھی اس کا مولیٰ ہے ۔ “
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

عمرو بن ذی مر اور سعید بن وہب اور زید بن یثیع کے حوالے سے یہ بات منقول ہے ، یہ حضرات بیان کرتے ہیں : ہم نے سیدنا علی رضی اللہ عنہ کو یہ بیان کرتے ہوئے سنا : میں اس شخص کو اللہ کا واسطہ دے کر یہ دریافت کرتا ہوں ، جس نے نبی اکرم صلی اللہ علیہ وسلم کو غدیر خم کے دن یہ ارشاد فرماتے ہوئے سنا تھا : وہ کھڑا ہو جائے تو تیرہ افراد کھڑے ہوئے اور انہوں نے اس بات کی گواہی دی کہ نبی اکرم صلی اللہ علیہ وسلم نے یہ ارشاد فرمایا تھا : کیا میں مومنین کے نزدیک ان کی جان سے زیادہ قریب نہیں ہوں ؟ لوگوں نے عرض کی : جی ہاں رسول اللہ ! راوی کہتے ہیں : تو نبی اکرم صلی اللہ علیہ وسلم نے سیدنا علی رضی اللہ عنہ کا ہاتھ پکڑا اور ارشاد فرمایا : ” جس کا میں مولیٰ ہوں تو یہ بھی اس کا مولیٰ ہے ، اے اللہ ! جو اس سے محبت رکھے تو اس سے محبت رکھنا ، اور جو اس سے دشمنی رکھے ، تو اس سے دشمنی رکھنا ، جو اس سے محبت رکھے ، تو اس سے محبت رکھنا ، جو اس سے بغض رکھے ، تو اس سے بغض رکھنا ، جو اس کی مدد کرے ، تو اس کی مدد کرنا ، جو اسے رسوا کرنے کی کوشش کرے ، تو اسے رسوا کرنا ۔ “
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں ، صرف فطر بن خلیفہ کا معاملہ مختلف ہے ، اور وہ ثقہ ہے ۔

عبدالرحمن بن ابولیلی بیان کرتے ہیں : میں سیدنا علی رضی اللہ عنہ کے پاس موجود تھا جب وہ رحبہ میں تھے ( یہ کسی جگہ کا نام ہے یا شاید اس سے مراد کھلی جگہ ہے ) انہوں نے لوگوں کو واسطہ دے کر دریافت کیا کہ میں اس شخص کو واسطہ دے کر پوچھتا ہوں کہ جس نے نبی اکرم صلی اللہ علیہ وسلم کو غدیر خم کے دن یہ ارشاد فرماتے ہوئے سنا تھا : ” جس کا میں مولیٰ ہوں تو علی بھی اس کا مولیٰ ہے ۔ “ تو ایسا شخص کھڑا ہو اور اس بات کی گواہی دے ، عبدالرحمن نامی راوی کہتے ہیں : تو بارہ بدری صحابہ کرام کھڑے ہو گئے ۔ ان میں سے ایک کا منظر آج بھی میری نگاہ میں ہے کہ انہوں نے شلوار پہنی ہوئی تھی ، ان لوگوں نے یہ بات بیان کی کہ ہم لوگ یہ گواہی دیتے ہیں کہ ہم نے نبی اکرم صلی اللہ علیہ وسلم کو غدیر خم کے دن یہ ارشاد فرماتے ہوئے سنا ہے : کیا میں مومنین کے نزدیک ان کی جان سے زیادہ قریب نہیں ہوں اور میری بیویاں ان کی مائیں نہیں ہیں ؟ ہم نے عرض کی : جی ہاں یا رسول اللہ ! تو نبی اکرم صلی اللہ علیہ وسلم نے ارشاد فرمایا : ” جس کا میں مولیٰ ہوں علی بھی اس کا مولیٰ ہے ، اے اللہ ! جو اس سے محبت رکھے ، تو اس سے محبت رکھنا اور جو اس سے دشمنی رکھے تو اس سے دشمنی رکھنا ۔ “
یہ روایت امام ابویعلیٰ نے نقل کی ہے ، اور اس کے رجال کی توثیق کی گئی ہے ، اور اسے عبداللہ بن أحمد نے بھی نقل کیا ہے ۔

سیدنا زید بن ارقم رضی اللہ عنہ بیان کرتے ہیں : نبی اکرم صلی اللہ علیہ وسلم نے درختوں کے بارے میں حکم دیا ، تو ان کے نیچے جھاڑو دی گئی ، وہاں پانی چھڑکا گیا ، پھر نبی اکرم صلی اللہ علیہ وسلم نے ہمیں خطبہ دیا : اللہ کی قسم ! قیامت قائم ہونے تک جو کچھ بھی ہونا ہے ۔ نبی اکرم صلی اللہ علیہ وسلم نے اس کے بارے میں ہمیں بتا دیا ، پھر آپ نے ارشاد فرمایا : اے لوگو ! کون تمہارے جان سے زیادہ تمہارے قریب ہے ؟ ہم نے عرض کی : اللہ اور اس کا رسول ہماری جان سے زیادہ ہمارے قریب ہیں : نبی اکرم صلی اللہ علیہ وسلم نے ارشاد فرمایا : جس کا میں مولیٰ ہوں ، یہ بھی اس کا مولیٰ ہے ۔ نبی اکرم صلی اللہ علیہ وسلم کی مراد سیدنا علی رضی اللہ عنہ تھے ، پھر نبی اکرم صلی اللہ علیہ وسلم نے ان کا ہاتھ پکڑ کر اسے پھیلایا اور پھر فرمایا : ” اے اللہ ! جو اس سے محبت رکھے ، تو اس سے محبت رکھنا اور جو اس سے دشمنی رکھے تو اس سے دشمنی رکھنا ۔ “ ( علامہ ہیثمی فرماتے ہیں : ) میں یہ کہتا ہوں امام ترمذی نے اس روایت میں سے صرف یہ حصہ نقل کیا ہے : ” میں جس کا مولیٰ ہوں تو علی بھی اس کا مولیٰ ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی حبیب بن خلاد انصاری ہے ، اور میں اس سے واقف نہیں ہوں ۔ اس روایت کے بقیہ رجال ثقہ ہیں ، اسے امام بزار نے اس سے زیادہ مکمل روایت کے طور پر نقل کیا ہے ، اس کی سند میں ایک راوی میمون ابوعبداللہ بصری ہے ، جسے ابن حبان نے ثقہ قرار دیا ہے ، اور ایک جماعت نے اسے ضعیف کہا: ہے ۔

داؤد بن یزید اؤدی اپنے والد کا یہ بیان نقل کرتے ہیں : سیدنا ابوہریرہ رضی اللہ عنہ مسجد میں داخل ہوئے ، لوگ ان کے پاس اکٹھے ہو گئے ، ایک نوجوان اٹھ کر ان کے پاس آیا اور بولا: میں آپ کو اللہ کا واسطہ دے کر یہ دریافت کرتا ہوں کہ کیا آپ نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میں جس کا مولیٰ ہوں ، تو علی بھی اس کا مولیٰ ہے ، اے اللہ ! جو اس سے محبت رکھے ، تو اس سے محبت رکھنا اور جو اس سے دشمنی رکھے ، تو اس سے دشمنی رکھنا ۔ “ راوی بیان کرتے ہیں : تو سیدنا ابوہریرہ رضی اللہ عنہ نے فرمایا : میں اس بات کی گواہی دیتا ہوں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میں جس کا مولیٰ ہوں ، تو علی بھی اس کا مولیٰ ہے ، اے اللہ ! جو اس سے محبت رکھے ، تو اس سے محبت رکھنا ، اور جو اس سے دشمنی رکھے ، تو اس سے دشمنی رکھنا“ ۔
یہ روایت امام ابویعلیٰ نے نقل کی ہے ، امام بزار نے اس کی مانند نقل کی ہے ، امام طبرانی نے معجم اوسط میں نقل کی ہے ، امام بزار کی دو اسناد میں سے ایک سند میں ایک ایسا راوی ہے ، جس کا نام بیان نہیں کیا گیا ، اور دوسری سند کے بقیہ رجال ثقہ ہیں ، امام ابویعلیٰ کی سند میں ایک راوی داؤد بن یزید ہے ، اور وہ ضعیف ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں جس کا مولیٰ ہوں تو علی بھی اس کا مولیٰ ہے ، اے اللہ ! جو اس سے محبت رکھے ، تو اس سے محبت رکھنا اور جو اس سے دشمنی رکھے ، تو اس سے دشمنی رکھنا ۔ “
یہ روایت امام طبرانی نے نقل کی ہے ۔ اس کی سند میں ایک راوی عمر بن شبیب مسلمی ہے ، اور وہ ضعیف ہے ۔

سیدنا زید بن ارقم رضی اللہ عنہ بیان کرتے ہیں : سیدنا علی رضی اللہ عنہ نے لوگوں کو اللہ کا واسطہ دے کر یہ دریافت کیا ، انہوں نے ہر اس شخص کو اللہ کا واسطہ دیا ، جس نے نبی اکرم صلی اللہ علیہ وسلم کو یہ ارشاد فرماتے ہوئے سنا ہو : ” میں جس کا مولیٰ ہوں ، تو علی بھی اس کا مولیٰ ہے ، اے اللہ ! جو اس سے محبت رکھے ، تو اس سے محبت رکھنا اور جو اس سے دشمنی رکھے ، تو اس سے دشمنی رکھنا ۔ “ ( راوی بیان کرتے ہیں : ) تو بارہ بدری صحابہ کرام کھڑے ہوئے اور انہوں نے اس بات کی گواہی دی ( سیدنا زید بن ارقم کہتے ہیں : ) میں ان افراد میں سے ایک تھا جس نے اس بات کو چھپایا تھا ، تو میری بینائی رخصت ہو گئی ۔
یہ روایت امام طبرانی نے معجم کبیر میں نقل کی ہے ، البتہ معجم اوسط میں انہوں نے بینائی رخصت ہونے اور بات کو چھپانے اور سیدنا علی رضی اللہ عنہ کی دعا کا تذکرہ نہیں کیا ۔

ان کی نقل کردہ ایک روایت میں یہ الفاظ ہیں : ” سیدنا علی رضی اللہ عنہ نے اس شخص کے خلاف دعائے ضرر کی تھی جو اس بات کو چھپائے ۔ معجم اوسط کے رجال ثقہ ہیں ۔

سیدنا مالک بن حویرث رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” میں جس کا مولیٰ ہوں ، تو علی بھی اس کا مولیٰ ہے ۔ “
یہ روایت امام طبرانی نے نقل کی ہے ، اور اس کے رجال کی توثیق کی گئی ہے ۔

سیدنا حبشی بن جنادہ رضی اللہ عنہ بیان کرتے ہیں : میں نے غدیر خم کے دن نبی اکرم صلی اللہ علیہ وسلم کو یہ ارشاد فرماتے ہوئے سنا : ” اے اللہ ! جس کا میں مولیٰ ہوں ، تو علی بھی اس کا مولیٰ ہے ، اے اللہ ! جو اس سے محبت رکھے تو اس سے محبت رکھنا اور جو اس سے دشمنی رکھے ، تو اس سے دشمنی رکھنا اور جو اس کی مدد کرے ، تو اس کی مدد کرنا ، اور جو اس کی اعانت کرے ، تو اس کی اعانت کرنا ۔ “
یہ روایت امام طبرانی نے نقل کی ہے ، اور اس کے رجال کی ، توثیق کی گئی ہے ۔

سیدنا جریر رضی اللہ عنہ بیان کرتے ہیں : حجۃ الوداع کے موقع پر ہم لوگ نبی اکرم صلی اللہ علیہ وسلم کے ساتھ تھے ، ہم ایک جگہ پہنچے جسے غدیر خم کہا: جاتا ہے ، تو نبی اکرم صلی اللہ علیہ وسلم نے اعلان کروایا کہ سب لوگ اکٹھے ہو جائیں ، یعنی ہم مہاجرین اور انصار اکٹھے ہو گئے ، نبی اکرم صلی اللہ علیہ وسلم ہمارے درمیان کھڑے ہوئے ، آپ نے ارشاد فرمایا : اے لوگو ! تم کس بات کی گواہی دیتے ہو ؟ ہم نے عرض کی : ہم اس بات کی گواہی دیتے ہیں کہ اللہ تعالیٰ کے علاوہ اور کوئی معبود نہیں ہے ۔ نبی اکرم صلی اللہ علیہ وسلم نے دریافت کیا : اور کس بات کی گواہی دیتے ہو ؟ انہوں نے عرض کی : اس بات کی کہ سیدنا محمد ( صلی اللہ علیہ وسلم ) اس کے بندے اور اس کے رسول ہیں : نبی اکرم صلی اللہ علیہ وسلم نے دریافت کیا : تمہارا ولی کون ہے ؟ لوگوں نے عرض کی : اللہ اور اس کا رسول ہمارے مولیٰ ہیں : نبی اکرم صلی اللہ علیہ وسلم نے فرمایا : تمہارا ولی کون ہے ؟ پھر نبی اکرم صلی اللہ علیہ وسلم نے اپنا ہاتھ سیدنا علی رضی اللہ عنہ کے بازو پر رکھا ، انہیں کھڑا کیا ، پھر ان کے بازو کو چھوڑا اور ان کی کلائی کو پکڑ لیا اور پھر یہ ارشاد فرمایا : ” اللہ اور اس کا رسول جس کے مولیٰ ہوں ، تو یہ بھی اس کا مولیٰ ہے ، اے اللہ ! جو اس سے محبت رکھے تو اس سے محبت رکھنا اور جو اس سے دشمنی رکھے ، تو اس سے دشمنی رکھنا ، اے اللہ ! لوگوں میں سے جو شخص اس سے محبت رکھے ، تو اس شخص کے لئے محبت کرنے والا ہو جانا ، اور جو شخص اس سے بغض رکھے ، تو اس کے لئے غصہ کرنے والا ہو جانا ، اے اللہ ! دو نیک لوگوں کے بعد مجھے تیرے علاوہ اور کوئی ایسا نہیں ملتا ، زمین میں اس کو میں جس کے سپرد کروں ، تو اس کے بارے میں بھلائی کا فیصلہ دینا ۔ “ بشر نامی راوی کہتے ہیں : میں نے اپنے استاد سے دریافت کیا : وہ دو نیک بندے کون تھے ؟ انہوں نے جواب دیا : مجھے نہیں معلوم ۔
یہ روایت امام طبرانی نے نقل کی ہے ۔ اس کی سند میں ایک راوی بشر بن حرب ہے ، اور وہ کمزور ہے ، اور اس کی سند میں ایسا راوی بھی ہے ، جس سے میں واقف نہیں ہوں ۔

زیاد بن ابوزیاد بیان کرتے ہیں : میں نے سیدنا علی بن ابوطالب رضی اللہ عنہ کو سنا : انہوں نے لوگوں کو واسطہ دے کر فرمایا : میں اس مسلمان شخص کو اللہ تعالیٰ کا واسطہ دے کر دریافت کرتا ہوں ، جس نے نبی اکرم صلی اللہ علیہ وسلم کو غدیر خم کے دن وہ بات ارشاد فرماتے ہوئے سنا تھا ، جو آپ نے کھڑے ہو کر ارشاد فرمائی تھی ، تو بارہ بدری صحابہ کرام کھڑے ہوئے اور انہوں نے اس بات کی گواہی دی ۔
یہ روایت امام أحمد نے نقل کی ہے ، اور اس کے رجال ثقہ ہیں ۔

نذیر بیان کرتے ہیں : میں نے سیدنا علی رضی اللہ عنہ کو جنگ جمل کے دن سیدنا طلحہ رضی اللہ عنہ سے یہ ارشاد فرماتے ہوئے سنا : اے طلحہ ! میں آپ کو اللہ کا واسطہ دے کر یہ دریافت کرتا ہوں کہ کیا آپ نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اے اللہ ! جو اس سے محبت رکھے ، تو اس سے محبت رکھنا ، اور جو اس سے دشمنی رکھے ، تو اس سے دشمنی رکھنا ۔ “ تو سیدنا طلحہ رضی اللہ عنہ نے جواب دیا : جی ہاں ، انہیں یہ بات یاد آئی تو وہ واپس چلے گئے ۔
یہ روایت امام بزار نے نقل کی ہے ، اور نذیر نامی راوی سے روایت نقل کرنے میں اس کا بیٹا منفرد ہے ۔

سیدنا سعد بن ابی وقاص رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا علی رضی اللہ عنہ کا ہاتھ پکڑا اور پھر یہ ارشاد فرمایا : ” کیا میں مومنین کے نزدیک ان کی اپنی جانوں سے زیادہ قریب نہیں ہوں ؟ جس شخص کا میں ولی ہوں ، تو علی بھی اس شخص کا ولی ہے ۔ “
یہ روایت امام بزار نے نقل کی ہے ، اور اس کے رجال ثقہ ہیں ۔

سعید بن وہب اور زید بن یثیع بیان کرتے ہیں : سیدنا علی رضی اللہ عنہ نے رحبہ کے مقام پر لوگوں کو اللہ کا واسطہ دے کر دریافت کیا کہ جس شخص نے غدیر خم کے دن نبی اکرم صلی اللہ علیہ وسلم کو ارشاد فرماتے ہوئے سنا تھا ، وہ کھڑا ہو جائے ، راوی کہتے ہیں : سعید بن وہب والی طرف میں چھ افراد کھڑے ہوئے اور زید بن یثیع والی طرف میں سات افراد کھڑے ہوئے اور انہوں نے اس بات کی گواہی دی کہ ان لوگوں نے غدیر خم کے دن نبی اکرم صلی اللہ علیہ وسلم کو سیدنا علی رضی اللہ عنہ کے بارے میں یہ ارشاد فرماتے ہوئے سنا تھا : کیا میں مومنین کے نزدیک زیادہ قریب نہیں ہوں ؟ لوگوں نے عرض کی : جی ہاں ، تو نبی اکرم صلی اللہ علیہ وسلم نے فرمایا : ” اے اللہ ! جس کا میں مولیٰ ہوں ، تو علی بھی اس کا مولیٰ ہے ، اے اللہ ! جو اس سے محبت رکھے ، تو اس سے محبت رکھنا ، اور جو اس سے دشمنی رکھے ، تو اس سے دشمنی رکھنا ۔ “
یہ روایت عبداللہ نے نقل کی ہے ، اور امام بزار نے اس کی مانند روایت نقل کی ہے ، لیکن اس سے زیادہ مکمل طور پر اسے نقل کیا ہے ، وہ کہتے ہیں : یہ سعید بن وہب اور زید بن یثیع کے حوالے سے منقول ہے ، جس طرح یہاں مذکور ہے ، جبکہ عبداللہ کہتے ہیں : یہ سعید بن وہب کے حوالے سے زید بن یثیع سے منقول ہے ، بظاہر یہ لگتا ہے کہ اس میں واؤ رہ گیا ہے ، باقی اللہ بہتر جانتا ہے ، ان دونوں روایات کی سند حسن ہے ۔

سیدنا علی رضی اللہ عنہ بیان کرتے ہیں : غدیر خم کے دن نبی اکرم صلی اللہ علیہ وسلم نے ارشاد فرمایا : ” جس کا میں مولیٰ ہوں ، تو علی بھی اس کا مولیٰ ہے ۔ “ راوی بیان کرتے ہیں : راویوں نے اس کے بعد یہ الفاظ زائد نقل کیے ہیں : ” تو اس سے محبت رکھنا ، جو اس سے محبت رکھے ، اور تو اس سے دشمنی رکھنا ، جو اس سے دشمنی رکھے ۔ “
یہ روایت امام أحمد نے نقل کی ہے ، اور اس کے رجال ثقہ ہیں ۔

سیدنا زید بن ارقم رضی اللہ عنہ بیان کرتے ہیں : سیدنا علی رضی اللہ عنہ لوگوں کے ساتھ موجود تھے ۔ انہوں نے فرمایا : میں اس شخص کو اللہ کا واسطہ دے کر یہ دریافت کرتا ہوں جس نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اے اللہ ! جس کا میں مولیٰ ہوں ، تو علی بھی اس کا مولیٰ ہے ، اے اللہ ! جو اس سے محبت رکھے ، تو اس سے محبت رکھنا ، اور جو اس سے دشمنی رکھے ، تو اس سے دشمنی رکھنا ۔ “ راوی بیان کرتے ہیں : تو سولہ افراد کھڑے ہوئے اور انہوں نے اس بات کی گواہی دی ۔
یہ روایت امام أحمد نے نقل کی ہے ۔ اس کی سند میں ایک راوی ابوسلیمان ہے ، اور میں اس سے واقف نہیں ہوں ، البتہ یہ بشیر بن سلیمان ہو سکتا ہے ، اگر تو یہ وہ ہے ، تو پھر یہ ثقہ ہے ، اس روایت کے بقیہ رجال ثقہ ہیں ۔

زاذان ابوعمر بیان کرتے ہیں : میں رحبہ میں سیدنا علی رضی اللہ عنہ کے پاس موجود تھا ، انہوں نے لوگوں کو واسطہ دے کر دریافت کیا کہ کون شخص اس وقت نبی اکرم صلی اللہ علیہ وسلم کے پاس موجود تھا ، جب غدیر خم کے دن نبی اکرم صلی اللہ علیہ وسلم نے یہ بات ارشاد فرمائی تھی ؟ راوی کہتے ہیں : تو تیرہ افراد کھڑے ہوئے اور انہوں نے اس بات کی گواہی دی کہ غدیر خم کے دن نبی اکرم صلی اللہ علیہ وسلم نے یہ ارشاد فرمایا تھا : ” میں جس کا مولیٰ ہوں ، تو علی بھی اس کا مولیٰ ہے ۔ “
یہ روایت امام أحمد نے نقل کی ہے ۔ اس کی سند میں ایسے راوی ہیں ، جن سے میں واقف نہیں ہوں ۔

حمید بن عمارہ بیان کرتے ہیں : میں نے اپنے والد کو یہ بیان کرتے ہوئے سنا ہے : وہ کہتے ہیں میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : آپ نے سیدنا علی رضی اللہ عنہ کا ہاتھ پکڑ کر ارشاد فرمایا : ” میں جس کا مولیٰ ہوں ، تو یہ بھی اس کا مولیٰ ہے ، اے اللہ ! جو اس سے محبت رکھے ، تو اس سے محبت رکھنا ، جو اس سے دشمنی رکھے ، تو اس سے دشمنی رکھنا“ ۔
یہ روایت امام بزار نے نقل کی ہے ، اور حمید نامی راوی سے میں واقف نہیں ہوں ۔ اس روایت کے بقیہ رجال کی توثیق کی گئی ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” میں جس کا مولیٰ ہوں ، تو علی بھی اس کا مولیٰ ہے ۔ “
یہ روایت امام بزار نے ایک حدیث کے ضمن میں نقل کی ہے ، اور اس کے رجال ثقہ ہیں ۔

عمیرہ بن سعد بیان کرتے ہیں : میں سیدنا علی رضی اللہ عنہ کے پاس موجود تھا ، جب انہوں نے منبر پر نبی اکرم صلی اللہ علیہ وسلم کے اصحاب کو واسطہ دے کر دریافت کیا کہ جس نے غدیر خم کے دن نبی اکرم صلی اللہ علیہ وسلم کو یہ ارشاد فرماتے ہوئے سنا ہے ، وہ اس بات کی گواہی دے ، تو بارہ افراد کھڑے ہوئے ، جن میں سیدنا ابوہریرہ ، سیدنا ابوسعید خدری اور سیدنا انس بن مالک رضی اللہ عنہم بھی شامل تھے ، اور انہوں نے اس بات کی گواہی دی کہ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میں جس کا مولیٰ ہوں ، تو علی بھی اس کا مولیٰ ہے ، اے اللہ ! جو اس سے محبت رکھے ، تو اس سے محبت رکھنا ، اور جو اس سے دشمنی رکھے ، تو اس سے دشمنی رکھنا ۔ “
یہ روایت امام طبرانی نے معجم اوسط اور معجم صغیر میں نقل کی ہے ۔ اس کی سند میں کمزوری پائی جاتی ہے ۔

عمیرہ بن سعد بیان کرتے ہیں : سیدنا علی رضی اللہ عنہ نے لوگوں کو رحبہ ( کھلے میدان ) میں جمع کیا ، میں وہاں موجود تھا ، انہوں نے فرمایا : میں اس شخص کو اللہ کا واسطہ دے کر دریافت کرتا ہوں ، جس نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میں جس کا مولیٰ ہوں ، تو علی بھی اس کا مولیٰ ہے “ ( راوی بیان کرتے ہیں : ) تو اٹھارہ افراد کھڑے ہوئے اور انہوں نے اس بات کی گواہی دی کہ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے ۔
یہ روایت امام طبرانی نے معجم اوسط میں نقل کی ہے ، اور اس کی سند حسن ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں جس کا مولیٰ ہوں ، تو علی بھی اس کا مولیٰ ہے ۔ “
یہ روایت امام طبرانی نے معجم اوسط میں نقل کی ہے ، اور اس کی سند میں ایسے راوی ہیں جن کے بارے میں اختلاف پایا جاتا ہے ۔

سیدنا مالک بن حویرث رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں جس کا مولیٰ ہوں ، تو علی بھی اس کا مولیٰ ہے ۔ “
یہ روایت امام طبرانی نے نقل کی ہے ، اور اس کے رجال کی توثیق کی گئی ہے ، اس کے راویوں کے بارے میں اختلاف پایا جاتا ہے ۔

سیدنا عبداللہ بن مسعود رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا کہ آپ نے سیدنا علی رضی اللہ عنہ کا ہاتھ پکڑا اور پھر ارشاد فرمایا : ” یہ میرا ولی ہے ، اور میں اس کا ولی ہوں ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی معلیٰ بن عرفان ہے ، اور وہ متروک ہے ۔

سیدنا بریده رضی اللہ عنہ بیان کرتے ہیں : نبی اکرم صلی اللہ علیہ وسلم نے ہم لوگوں کو ایک جنگی مہم پر بھیجا ، آپ نے سیدنا علی رضی اللہ عنہ کو ہمارا امیر مقرر کیا ، جب ہم لوگ واپس آئے ، تو نبی اکرم صلی اللہ علیہ وسلم نے دریافت کیا : تم نے اپنے متعلقہ فرد کو کیسا پایا ؟ راوی کہتے ہیں : تو شاید میں نے ان کی شکایت کی یا میرے علاوہ کسی اور نے ان کی شکایت کی ، تو نبی اکرم صلی اللہ علیہ وسلم نے اپنا سر اٹھایا ، میں ایک ایسا شخص تھا ، جو زیادہ تر زمین کی طرف نظر رکھتا تھا ( جب میں نے نظر اٹھا کر دیکھا ، تو ) نبی اکرم صلی اللہ علیہ وسلم کا چہرہ سرخ ہو چکا تھا ، آپ صلی اللہ علیہ وسلم نے ارشاد فرمایا : ” جس کا میں ولی ہوں ، تو علی بھی اس کا ولی ہے ۔ “ تو میں نے کہا: اب میں اُن کے بارے میں ، میں دوبارہ کبھی بھی ، آپ کو کوئی بات بری نہیں لگنے دوں گا ۔
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں ۔

زیاد بن مطرف نے سیدنا زید بن ارقم رضی اللہ عنہ کے حوالے سے
یہ روایت نقل کی ہے ، اور بعض اوقات وہ اس میں سیدنا زید بن ارقم رضی اللہ عنہ کا ذکر نہیں کرتے ہیں ۔ وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص یہ چاہتا ہو کہ وہ میری حیات کے مطابق زندگی بسر کرے اور میری موت کے مطابق مرے اور اس جنت الخلد میں سکونت اختیار کرے ، جس کا میرے پروردگار نے میرے ساتھ وعدہ کیا ہے ، اور وہ اپنے ہاتھ کے ذریعے وہاں کے پودے بوئے ، تو اسے علی بن ابوطالب سے محبت رکھنی چاہیے ، کیونکہ وہ تمہیں ہدایت سے نکالے گا نہیں ، اور وہ تمہیں گمراہی میں داخل نہیں کرے گا ۔ “
یہ روایت امام طبرانی نے نقل کی ہے ۔ اس کی سند میں ایک راوی یحیی بن یعلیٰ اسلمی ہے ، اور وہ ضعیف ہے ۔

سیدنا عمار بن یاسر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں اس شخص کو یہ تلقین کرتا ہوں ، جو مجھ پر ایمان رکھتا ہے ، اور میری تصدیق کرتا ہے ، وہ علی بن ابوطالب سے ولاء ( یعنی دوستی ) رکھے ، جو شخص اس سے ولاء رکھے گا ، وہ مجھ سے ولاء رکھے گا ، اور جو مجھ سے ولاء رکھے گا ، وہ اللہ تعالیٰ سے ولاء رکھے گا ، جو شخص اُس سے محبت رکھے گا ، وہ مجھ سے محبت رکھے گا ، اور جو مجھ سے محبت رکھے گا ، وہ اللہ تعالیٰ سے محبت رکھے گا ، جو اس سے بغض رکھے گا ، وہ مجھ سے بغض رکھے گا ، اور جو مجھ سے بغض رکھے گا ، وہ اللہ تعالیٰ سے بغض رکھے گا ۔ “
یہ روایت امام طبرانی نے دو اسناد کے ساتھ نقل کی ہے ، جن میں سے زیادہ بہتر سند میں ضعیف راویوں کی ایک جماعت موجود ہے جن کی توثیق بھی کی گئی ہے ۔

وہب بن حمزہ بیان کرتے ہیں : میں مدینہ منورہ سے مکہ تک کے راستے میں سیدنا علی رضی اللہ عنہ کے ساتھ رہا ، میں نے ان کی طرف سے چند ایسی چیزیں دیکھیں جو مجھے اچھی نہیں لگیں ، تو میں نے کہا: جب میں واپس جاؤں گا ، تو میں آپ کی شکایت نبی اکرم صلی اللہ علیہ وسلم کے سامنے کروں گا ، جب میں آیا اور میری ملاقات نبی اکرم صلی اللہ علیہ وسلم سے ہوئی ، تو میں نے عرض کی : میں نے سیدنا علی رضی اللہ عنہ کی طرف سے یہ یہ چیزیں دیکھی ہیں ، تو نبی اکرم صلی اللہ علیہ وسلم نے ارشاد فرمایا : ” تم یہ بات نہ کہو کیونکہ میرے بعد وہ تم لوگوں کے سب سے زیادہ قریب ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی دکین ہے ، جس کا ذکر ابن ابوحاتم نے کیا ہے ، کسی نے اس کو ضعیف قرار نہیں دیا ہے ، اس روایت کے بقیہ رجال کی توثیق کی گئی ہے ۔