مجمع الزوائد ومنبع الفوائد

ابواسحاق بیان کرتے ہیں : میں اپنے والد کے ساتھ جمعہ کی نماز کے لئے گیا ، میں لڑکا تھا ، جب سیدنا علی رضی اللہ عنہ نکلے اور منبر پر چڑھے تو میرے والد نے مجھ سے کہا: اے عمرو ! تم اٹھو اور امیرالمؤمنین کی زیارت کر لو ۔ راوی کہتے ہیں : میں اٹھا تو میں نے دیکھا کہ سیدنا علی رضی اللہ عنہ منبر پر کھڑے ہوئے تھے ۔ ان کی داڑھی اور سر کے بال سفید تھے ۔ انہوں نے ایک تہبند اور ایک چادر پہنے ہوئے تھے ، ان کے جسم پر قمیص نہیں تھی ۔ راوی کہتے ہیں : پھر میں نے انہیں منبر پر بیٹھے ہوئے نہیں دیکھا ، یہاں تک کہ وہ نیچے اتر آئے ، میں نے ابواسحاق سے دریافت کیا : کیا انہوں نے قنوت کیا تھا ، انہوں نے جواب دیا : جی نہیں ۔

ایک روایت میں یہ الفاظ ہیں : میں نے انہیں نہیں دیکھا کہ انہوں نے داڑھی پر خضاب لگایا ہو ، ان کا سر بڑا تھا ۔
یہ روایت امام طبرانی نے مختلف اسانید کے ساتھ نقل کی ہے ، اور اس کے رجال ” صحیح “ کے رجال ہیں ۔

شعبہ بیان کرتے ہیں : میں نے ابواسحاق سے دریافت کیا : آپ شعبی سے بڑے ہیں ؟ انہوں نے فرمایا : شعبی مجھ سے ایک یا دو سال بڑے ہیں ۔ راوی کہتے ہیں : ابواسحاق نے سیدنا علی رضی اللہ عنہ کی زیارت کی تھی ، وہ ہمارے سامنے ان کا حلیہ یہ بیان کرتے تھے کہ ان کا پیٹ بڑا تھا اور ان کے سر کے اطراف کے بال اڑ گئے تھے ۔ شعبہ بیان کرتے ہیں : ابواسحاق ابوبختری سے بڑے تھے ، ابوسختری نے سیدنا علی رضی اللہ عنہ کا زمانہ نہیں پایا اور ان کی زیارت نہیں کی ہے ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ۔

ابورجاء عطاردی بیان کرتے ہیں : میں نے سیدنا علی رضی اللہ عنہ کو دیکھا وہ باوقار تھے ، اور ان کے آگے کے بال نہیں تھے ، یوں لگتا تھا جیسے ان کے پہلو پر بکری کی کھال ہے ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ۔

امام شعبی بیان کرتے ہیں : میں نے سیدنا علی رضی اللہ عنہ کو منبر پر دیکھا ان کی داڑھی سفید تھی اور اس نے ان کے سینے کو بھرا ہوا تھا ۔ یحیی بن سعید نے اپنی روایت میں یہ الفاظ نقل کیے ہیں : ان کے سر پر تھوڑے سے بال تھے ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ۔

واقدی بیان کرتے ہیں : یہ بات کہی جاتی ہے : سیدنا علی بن ابوطالب رضی اللہ عنہ گندمی رنگت کے درمیانے قد کے آدمی تھے وہ بھاری بھرکم شخص تھے ۔ ان کے کندھے چوڑے تھے ، داڑھی لمبی تھی ، سر کے اگلے حصے پر بال نہیں تھے ، پیٹ بڑھا ہوا تھا ، آنکھیں موٹی تھیں ، سر اور داڑھی کے بال سفید تھے ۔
یہ روایت امام طبرانی نے نقل کی ہے ، اور واقدی تک اس کے رجال ثقہ ہیں ۔

ابوطفیل بیان کرتے ہیں : سیدنا ابومسعود رضی اللہ عنہ کے سامنے سیدنا علی رضی اللہ عنہ کا قول بیان کیا گیا ، تو انہوں نے فرمایا : کیا تم نے ان کے سر کی طرف نہیں دیکھا جو طشت کی مانند تھا اور اس کے اردگرد کا حصہ خفاف کی مانند تھا ( یعنی سر کے درمیانی حصے میں بال نہیں تھے اور اطراف میں بال تھے ) ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ۔