مجمع الزوائد ومنبع الفوائد

سیدنا عبداللہ بن حوالہ رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، آپ اس وقت ایک درخت کے سائے میں موجود تھے ، آپ کے پاس ایک کاتب موجود تھا ، جس کو آپ املاء کروا رہے تھے ، نبی اکرم صلی اللہ علیہ وسلم نے فرمایا : اے ابن حوالہ ! کیا میں تمہارے لئے کوئی چیز نہ لکھواؤں ؟ میں نے عرض کی : مجھے نہیں پتہ ، اللہ اور اس کا رسول میرے لئے جو اختیار کریں گے ، وہی میرے لئے بہتر ہو گا ، تو نبی اکرم صلی اللہ علیہ وسلم نے منہ پھیر لیا ، اسماعیل نامی راوی نے ایک مرتبہ یہ الفاظ نقل کیے ہیں : پھر نبی اکرم صلی اللہ علیہ وسلم اس شخص کو املاء کروانے لگے ، پھر آپ نے دریافت کیا : اے ابن حوالہ ! کیا میں تمہارے لئے کوئی چیز تحریر نہ کرواؤں ؟ میں نے عرض کی : مجھے نہیں معلوم ، اللہ اور اس کا رسول میرے لئے جو اختیار کریں گے ، وہی ٹھیک ہو گا ، تو نبی اکرم صلی اللہ علیہ وسلم نے مجھ سے منہ پھیر لیا اور آپ اپنے پاس لکھنے والے فرد کو املاء کرواتے رہے ، راوی کہتے ہیں : میں نے جائزہ لیا تو اس تحریر میں سیدنا عمر رضی اللہ عنہ کا ذکر بھی تھا ، مجھے اندازہ ہو گیا کہ سیدنا عمر رضی اللہ عنہ کا ذکر صرف بھلائی کے حوالے سے ہی ہو گا ، پھر نبی اکرم صلی اللہ علیہ وسلم نے دریافت کیا : اے ابن حوالہ ! کیا میں تمہارے لئے کوئی چیز نہ لکھواؤں ؟ میں نے عرض کی : جی ہاں ، نبی اکرم صلی اللہ علیہ وسلم نے فرمایا : اے ابن حوالہ ! تم فتنوں کے زمانے میں کیا کرو گے کہ جب وہ زمین کے اطراف سے یوں نکلیں گے ، جس طرح گائے کے سینگ ہوتے ہیں ، میں نے عرض کی : مجھے نہیں معلوم ! اللہ اور اس کا رسول میرے لئے جو اختیار کریں گے ( وہی ٹھیک ہو گا ) نبی اکرم صلی اللہ علیہ وسلم نے فرمایا : اس وقت تم کیا کرو گے کہ جب پہلے والے کے بعد ایک اور فتنہ آئے گا ، اور وہ دوسرا فتنہ جو ہو گا ، اس کے مقابلے میں پہلا فتنہ یوں ہو گا جیسے کسی خرگوش نے چھلانگ لگائی ہو ، میں نے عرض کی : مجھے نہیں معلوم ، اللہ اور اس کا رسول میرے لئے جو اختیار کریں گے ( وہی ٹھیک ہو گا ) نبی اکرم صلی اللہ علیہ وسلم نے فرمایا : تم اس شخص کی پیروی کرنا ، اس وقت وہاں سے ایک صاحب گزرے جنہوں نے چہرہ ڈھانپا ہوا تھا ، میں دوڑتا ہوا گیا ۔ میں نے ان صاحب کے کندھے پر ہاتھ رکھا اور ان کا چہرہ نبی اکرم صلی اللہ علیہ وسلم کی طرف کرواتے ہوئے دریافت کیا : ان کے ساتھ ؟ نبی اکرم صلی اللہ علیہ وسلم نے جواب دیا : جی ہاں ! تو وہ فرد سیدنا عثمان غنی رضی اللہ عنہ تھے ۔
یہ روایت امام أحمد اور امام طبرانی نے نقل کی ہے ، اور ان دونوں کے رجال ” صحیح “ کے رجال ہیں ۔

جبیر بن نفیر بیان کرتے ہیں : ایک مرتبہ ہم سیدنا معاویہ رضی اللہ عنہ کے ساتھ معسکرین میں موجود تھے ، یہ سیدنا عثمان رضی اللہ عنہ کی شہادت کے بعد کی بات ہے ، تو سیدنا مرہ بن کعب بہزی رضی اللہ عنہ کھڑے ہوئے اور بولے : اللہ کی قسم ! اگر میں نے نبی اکرم صلی اللہ علیہ وسلم کی زبانی ایک بات نہ سنی ہوئی ہوتی تو میں نے اس جگہ پر کھڑے نہیں ہونا تھا ، جب سیدنا معاویہ رضی اللہ عنہ نے یہ بات سنی کہ وہ اللہ کے رسول صلی اللہ علیہ وسلم کا ذکر کر رہے ہیں ، تو انہوں نے لوگوں کو بٹھایا ، پھر سیدنا مرہ بن کعب رضی اللہ عنہ نے یہ بات بیان کی کہ ایک مرتبہ ہم لوگ نبی اکرم صلی اللہ علیہ وسلم کے پاس بیٹھے ہوئے تھے ، اسی دوران سیدنا عثمان بن عفان رضی اللہ عنہ ہمارے پاس سے گزرے ، انہوں نے کنگھی کی ہوئی تھی اور بالوں کو جمع کیا ہوا تھا ، نبی اکرم صلی اللہ علیہ وسلم نے فرمایا : عنقریب میرے دونوں پاؤں کے نیچے سے ( راوی کو شک ہے شاید یہ الفاظ ہیں ) میرے دونوں قدموں کے نیچے سے ( یعنی اس سرزمین پہ ) ایک فتنہ نکلے گا ، اس وقت یہ شخص اور اس کی پیروی کرنے والے لوگ ہدایت پر ہوں گے ، راوی کہتے ہیں : میں اٹھا ، میں نے اٹھ کر سیدنا عثمان رضی اللہ عنہ کے دونوں کندھے پکڑے اور انہیں نبی اکرم صلی اللہ علیہ وسلم کی طرف پھیر کر میں نے دریافت کیا : یہ صاحب ؟ نبی اکرم صلی اللہ علیہ وسلم نے فرمایا : جی ہاں ! یہ اور جو اس کی پیروی کرے گا ، وہ اس وقت ہدایت پر ہوں گے ۔ “ تو سیدنا عبدالله بن حوالہ ازدی رضی اللہ عنہ منبر کے قریب تھے ، وہ کھڑے ہوئے ، انہوں نے کہا: آپ ان کے ساتھی ہیں ، انہوں نے جواب دیا : جی ہاں ، تو سیدنا عبداللہ بن حوالہ رضی اللہ عنہ نے کہا: اللہ کی قسم ! میں بھی اس محفل میں موجود تھا ، اگر مجھے اس بات کا علم ہوتا کہ اس لشکر میں کوئی میری بات کی تصدیق کرنے والا ہو گا ، تو میں اس بارے میں سب سے پہلے کلام کرتا ۔ ( علامہ ہیثمی فرماتے ہیں : ) میں یہ کہتا ہوں سیدنا مرہ بن کعب رضی اللہ عنہ کی نقل کردہ حدیث کو امام ترمذی نے بھی روایت کیا ہے ۔
یہ روایت امام طبرانی نے نقل کی ہے ، اور اس کے رجال کی توثیق کی گئی ہے ۔

سیدنا عبداللہ بن عمر رضی اللہ عنہما فرماتے ہیں سیدنا ابوبکر رضی اللہ عنہ ” صدیق “ تھے ، تم نے ان کا ٹھیک نام رکھا ہے ۔ سیدنا عمر رضی اللہ عنہ لوہے کا بنا ہوا سینگ تھے ۔ سیدنا عثمان رضی اللہ عنہ ” دو نوروں والے “ تھے ، تم نے ان کا ٹھیک نام رکھا ہے ۔ وہ مظلوم ہونے کے طور پر قتل ہوئے اور انہیں اجر کے دو قفل دیے جائیں گے ۔
یہ روایت امام طبرانی نے دو اسناد کے ساتھ نقل کی ہے جن میں سے ایک کے رجال ” صحیح“ کے رجال ہیں ، صرف عقبہ بن اوس کا معاملہ مختلف ہے ، اور وہ ثقہ ہے ۔

سیدہ حفصہ رضی اللہ عنہا جو نبی اکرم صلی اللہ علیہ وسلم کی زوجہ محترمہ ہیں ، ان کے بارے میں یہ بات منقول ہے : ایک مرتبہ وہ اور سیدہ عائشہ رضی اللہ عنہا نبی اکرم صلی اللہ علیہ وسلم کے ساتھ بیٹھی ہوئی تھیں ، نبی اکرم صلی اللہ علیہ وسلم نے ارشاد فرمایا : میری یہ خواہش ہے کہ میرے ساتھ میرا کوئی صحابی ہوتا ، جس کے ساتھ ہم بات چیت کرتے ، سیدہ عائشہ رضی اللہ عنہا نے عرض کی : میں سیدنا ابوبکر رضی اللہ عنہ کو پیغام بھیج کر بلواتی ہوں ، وہ آپ کے ساتھ بات کر لیں گے ؟ نبی اکرم صلی اللہ علیہ وسلم نے فرمایا : جی نہیں ۔ سیدہ حفصہ رضی اللہ عنہا نے عرض کی : میں سیدنا عمر رضی اللہ عنہ کو پیغام بھیج دیتی ہوں ، وہ آپ کے ساتھ بات چیت کر لیں گے ۔ نبی اکرم صلی اللہ علیہ وسلم نے فرمایا : جی نہیں ، میں عثمان کو پیغام بھیجتا ہوں ، پھر سیدنا عثمان رضی اللہ عنہ آئے وہ اندر آنے لگے ، تو یہ دونوں خواتین اٹھیں اور انہوں نے پردہ گرا دیا ، نبی اکرم صلی اللہ علیہ وسلم نے سیدنا عثمان رضی اللہ عنہ سے فرمایا : تم قتل کیے جاؤ گے ، اور شہید کیے جاؤ گے ، تم صبر سے کام لینا ، اللہ تعالیٰ تمہیں صبر عطا کرے اور تم اس قمیص کو نہ اتارنا جو قمیص اللہ تعالیٰ نے تمہیں پہنائی ہے ، وہ قمیص تمہیں بارہ سال چھ ماہ تک پہنائی رکھی جائے گی ، یہاں تک کہ تم اللہ تعالیٰ کی بارگاہ میں حاضر ہو جاؤ گے ، تو اللہ تعالیٰ تم سے راضی ہو گا ۔ سیدنا عثمان رضی اللہ عنہ کہتے ہیں : اگر اللہ کے نبی میرے لئے صبر کی دعا کریں تو مناسب ہو گا ، نبی اکرم صلی اللہ علیہ وسلم نے فرمایا : اے اللہ ! تو اسے صبر عطا فرمانا ، پھر سیدنا عثمان رضی اللہ عنہ وہاں سے نکلے اور چلے گئے ، تو نبی اکرم صلی اللہ علیہ وسلم یہی کہتے رہے ، اللہ تعالیٰ تمہیں صبر عطا کرے اور تم جام شہادت نوش کر لو گے ، اور تم ایسی حالت میں مرو گے کہ تم نے روزہ رکھا ہوا ہو گا ، اور تم افطار میرے ساتھ کرو گے ۔ “

ابراہیم بیان کرتے ہیں : میرے والد نے مجھے عبدالرحمن بن ابوبکر کے حوالے سے سیدہ عائشہ صدیقہ رضی اللہ عنہا سے روایت بیان کی ہے ۔ سیدہ عائشہ رضی اللہ عنہا نے بھی اس کی مانند حدیث نقل کی ہے ۔
یہ روایت امام ابویعلیٰ نے نقل کی ہے ، روایت کے یہ الفاظ ان کے نقل کردہ ہیں ، امام ابویعلیٰ کی سند میں ایک راوی ابراہیم بن عمر بن عثمان عثمانی ہے ، اور وہ ضعیف ہے ۔

ابوعبداللہ جسری بیان کرتے ہیں : میں سیدہ عائشہ رضی اللہ عنہا کی خدمت میں حاضر ہوا ان کے پاس سیدہ حفصہ بنت عمر رضی اللہ عنہما بھی موجود تھیں ، سیدہ عائشہ رضی اللہ عنہا نے مجھ سے فرمایا : یہ نبی اکرم صلی اللہ علیہ وسلم کی زوجہ محترمہ سیدہ حفصہ رضی اللہ عنہا ہیں ، پھر سیدہ عائشہ رضی اللہ عنہا سیدہ حفصہ رضی اللہ عنہا کی طرف متوجہ ہوئیں اور بولیں : میں آپ کو اللہ کا واسطہ دے کر یہ کہتی ہوں کہ اگر میں غلط بیان کروں ، تو آپ یہ بھی بتا دیں اور اگر میں سچ بولوں تو آپ یہ بھی بتا دیں ، پھر سیدہ عائشہ رضی اللہ عنہا نے ان سے کہا: کیا آپ یہ بات جانتی ہیں کہ میں اور آپ نبی اکرم صلی اللہ علیہ وسلم کے پاس موجود تھیں اور نبی اکرم صلی اللہ علیہ وسلم پر بے ہوشی طاری ہوئی ، میں نے آپ سے دریافت کیا : کیا آپ کے خیال میں نبی اکرم صلی اللہ علیہ وسلم کا وصال ہو گیا ہے ، تو آپ نے کہا: مجھے نہیں معلوم ، پھر نبی اکرم صلی اللہ علیہ وسلم کو ہوش آ گیا ، تو نبی اکرم صلی اللہ علیہ وسلم نے فرمایا : تم لوگ اس کے لئے دروازہ کھول دو ، پھر آپ پر بے ہوشی طاری ہوئی ، پھر میں نے تم سے یہ دریافت کیا کہ تم یہ سمجھتی ہو کہ نبی اکرم صلی اللہ علیہ وسلم کا وصال ہو گیا ہے ، تو تم نے کہا: مجھے نہیں معلوم ، پھر نبی اکرم صلی اللہ علیہ وسلم کو ہوش آیا تو نبی اکرم صلی اللہ علیہ وسلم نے فرمایا : اس کے لئے دروازہ کھول دو ، تو میں نے تم سے کہا: نبی اکرم صلی اللہ علیہ وسلم کی مراد میرے والد ہیں یا تمہارے والد ہیں ؟ تو تم نے کہا: مجھے نہیں معلوم ، ہم نے دروازہ کھول دیا ، تو سیدنا عثمان غنی رضی اللہ عنہ موجود تھے ، جب نبی اکرم صلی اللہ علیہ وسلم نے انہیں ملاحظہ فرمایا تو آپ نے فرمایا : قریب آ جاؤ ، وہ نبی اکرم صلی اللہ علیہ وسلم پر جھک گئے ، نبی اکرم صلی اللہ علیہ وسلم نے سرگوشی میں کوئی بات چیت کی ، مجھے نہیں معلوم اور تمہیں بھی نہیں معلوم کہ وہ بات کیا تھی ؟ پھر انہوں نے سر اٹھایا تو نبی اکرم صلی اللہ علیہ وسلم نے دریافت کیا : میں نے جو تمہیں کہا: ہے کیا تمہیں سمجھ آ گئی ہے ؟ انہوں نے جواب دیا : جی ہاں ، پھر نبی اکرم صلی اللہ علیہ وسلم نے ارشاد فرمایا : قریب ہو جاؤ ، پھر سیدنا عثمان رضی اللہ عنہ دوسری مرتبہ اسی طرح نبی اکرم صلی اللہ علیہ وسلم پر جھک گئے ، نبی اکرم صلی اللہ علیہ وسلم نے پھر سرگوشی میں کوئی بات چیت کی ، جس کا ہمیں پتہ نہیں چل سکا کہ وہ کیا ہے ؟ پھر انہوں نے سر اٹھایا تو نبی اکرم صلی اللہ علیہ وسلم نے فرمایا : میں نے جو تمہیں کہا: ہے ، کیا وہ تم سمجھ گے ہو ؟ انہوں نے جواب دیا : جی ہاں ، پھر نبی اکرم صلی اللہ علیہ وسلم نے فرمایا : تم قریب ہو جاؤ ، تو وہ نبی اکرم صلی اللہ علیہ وسلم پر زیادہ جھک گئے ، نبی اکرم صلی اللہ علیہ وسلم نے پھر سرگوشی میں کوئی بات چیت کی ، پھر انہوں نے سر اٹھایا ، تو نبی اکرم صلی اللہ علیہ وسلم نے فرمایا : میں نے جو تم سے کہا: ہے ، کیا تم سمجھ گے ہو ؟ انہوں نے جواب دیا : جی ہاں ، میں نے اپنے کانوں سے اسے سن لیا ہے ، اور میرے دل نے اسے محفوظ کر لیا ہے ، تو نبی اکرم صلی اللہ علیہ وسلم نے ان سے فرمایا : تم چلے جاؤ ! سیدہ حفصہ رضی اللہ عنہا نے جواب دیا : اللہ جانتا ہے ، ایسا ہی ہے ( راوی کو شک ہے شاید یہ الفاظ ہیں ) انہوں نے فرمایا : اے اللہ ! اس نے سچ کہا: ہے ۔ ( علامہ ہیثمی فرماتے ہیں : ) میں یہ کہتا ہوں : سیدہ عائشہ رضی اللہ عنہا سے منقول حدیث امام ابن ماجہ نے نقل کی ہے ، جو اس سیاق کے بغیر ہے ۔ یہ تمام روایات امام أحمد نے نقل کی ہیں ۔ امام طبرانی نے معجم اوسط میں اس کی مانند نقل کی ہے ، اور یہ الفاظ زائد نقل کیے ہیں : نبی اکرم صلی اللہ علیہ وسلم نے ارشاد فرمایا : ” اے عثمان اللہ تعالیٰ تمہیں عنقریب ایک قمیص پہنائے گا ، جب منافقین اسے اتروانے کا ارادہ کریں ، تو تم اسے نہ اتارنا ۔ “ یہ بات نبی اکرم صلی اللہ علیہ وسلم نے تین مرتبہ ارشاد فرمائی ۔ سیدنا نعمان بن بشیر رضی اللہ عنہ نے سیدہ عائشہ رضی اللہ عنہا سے کہا: اے ام المؤمنین ! تو آپ اس حدیث سے کہاں غافل رہیں ؟ تو انہوں نے فرمایا : رب کعبہ کی قسم ! میں اسے بھول گئی تھی ، یہاں تک کہ وہ صاحب قتل ہو گئے ۔

امام طبرانی کی نقل کردہ ایک روایت میں یہ الفاظ ہیں : تو اسی وقت سیدنا عثمان رضی اللہ عنہ گھٹنوں کے بل کھڑے ہو گئے اور وہ یہ کہہ رہے تھے : یا رسول اللہ ! کیا وہ ظلم کے طور پر اور سرکشی کے طور پر ہو گا ؟ سیدہ عائشہ رضی اللہ عنہا کہتی ہیں میرا یہ اندازہ ہے کہ نبی اکرم صلی اللہ علیہ وسلم نے انہیں یہ بات بتائی تھی کہ وہ قتل کر دیے جائیں گے ۔ امام طبرانی کی اسناد میں سے ایک سند حسن ہے ۔

محمد بن سیرین بیان کرتے ہیں : کوفہ میں ایک شخص اس بات کی گواہی دیتا تھا کہ سیدنا عثمان بن عفان رضی اللہ عنہ کو شہید ہونے کے طور پر قتل کیا گیا ہے ، سپاہیوں نے اسے پکڑ لیا اور سیدنا علی رضی اللہ عنہ کے پاس لے آئے ، لوگوں نے کہا: اگر آپ نے ہمیں منع نہ کیا ہوتا ( راوی کو شک ہے شاید یہ الفاظ ہیں ) ہمیں اس بات سے منع نہ کیا گیا ہوتا کہ ہم نے کسی کو قتل نہیں کرنا ، تو ہم نے اس شخص کو قتل کر دینا تھا ، اس کا یہ کہنا ہے کہ میں اس بات کی گواہی دیتا ہوں کہ سیدنا عثمان رضی اللہ عنہ شہید ہونے کے طور پر قتل ہوئے تھے ، تو ایک شخص نے سیدنا علی رضی اللہ عنہ سے کہا: آپ بھی اس بات کی گواہی دیتے ہیں کہ وہ شہید تھے ، کیا آپ کو یہ بات یاد ہے کہ میں نبی اکرم صلی اللہ علیہ وسلم کے پاس آیا میں نے نبی اکرم صلی اللہ علیہ وسلم سے کچھ مانگا ، تو نبی اکرم صلی اللہ علیہ وسلم نے مجھے دے دیا ، پھر میں سیدنا ابوبکر رضی اللہ عنہ کے پاس آیا ، میں نے ان سے مانگا ، تو انہوں نے بھی مجھے دے دیا ، پھر سیدنا عمر رضی اللہ عنہ کے پاس آیا ، ان سے مانگا ، تو انہوں نے بھی مجھے دے دیا ، پھر میں سیدنا عثمان رضی اللہ عنہ کے پاس آیا ، ان سے مانگا ، انہوں نے بھی مجھے دے دیا ، پھر میں نبی اکرم صلی اللہ علیہ وسلم کے پاس آیا ، میں نے عرض کی : یا رسول اللہ ! آپ اللہ تعالیٰ سے دعا کیجئے کہ وہ میرے لئے برکت نصیب کرے ، تو نبی اکرم صلی اللہ علیہ وسلم نے ارشاد فرمایا : ” تمہیں برکت کیسے نصیب نہیں ہو گی جبکہ تمہیں ایک نبی نے ایک صدیق نے اور دو شہیدوں نے دیا ہے ۔ تمہیں ایک نبی ایک صدیق اور دو شہیدوں نے دیا ہے ، تمہیں ایک نبی ایک صدیق اور دو شہیدوں نے دیا ہے ۔ “
یہ روایت امام ابویعلیٰ نے نقل کی ہے ، اور اس کے رجال ” صحیح “ کے رجال ہیں ۔

سیدنا عمر رضی اللہ عنہ کے غلام اسلم بیان کرتے ہیں : میں اس وقت موجود تھا جب جنائز کے مقام پر سیدنا عثمان رضی اللہ عنہ کا محاصرہ کیا گیا تھا ( اور وہاں اتنے لوگ تھے کہ ) اگر کوئی پتھر پھینکا جاتا تو کسی نہ کسی شخص کے سر پر لگتا ، میں نے دیکھا کہ سیدنا عثمان رضی اللہ عنہ نے کھڑکی میں سے جھانک کر دیکھا ، یہ وہ کھڑکی ہے جو سیدنا جبرائیل کے کھڑے ہونے کی جگہ کے ساتھ والی طرف ہے ، سیدنا عثمان رضی اللہ عنہ نے فرمایا : اے لوگو ! کیا تمہارے درمیان طلحہ موجود ہے ، لوگ خاموش رہے ، پھر سیدنا عثمان رضی اللہ عنہ نے فرمایا : اے لوگو ! کیا تمہارے درمیان طلحہ موجود ہے ، تو لوگ خاموش رہے ، پھر انہوں نے فرمایا : اے لوگو ! کیا تمہارے درمیان طلحہ موجود ہے ، تو سیدنا طلحہ بن عبیداللہ رضی اللہ عنہ کھڑے ہو گئے ، تو سیدنا عثمان رضی اللہ عنہ نے فرمایا : کیا میں تمہیں یہاں نہیں دیکھ رہا ہوں ؟ میرا یہ اندازہ نہیں تھا کہ تم اس جماعت میں ہو گے جو میری بات سن رہے ہو گے ، اور تین مرتبہ کہنے کے باوجود تم نے مجھے جواب نہیں دیا ، اے طلحہ میں تمہیں اللہ کا واسطہ دے کر دریافت کرتا ہوں کہ کیا تمہیں یہ بات یاد ہے کہ جب میں اور تم نبی اکرم صلی اللہ علیہ وسلم کے ساتھ فلاں فلاں جگہ پر موجود تھے ، میرے اور تمہارے علاوہ نبی اکرم صلی اللہ علیہ وسلم کے اصحاب میں سے کوئی اور آپ کے ساتھ نہیں تھا ، سیدنا طلحہ رضی اللہ عنہ نے جواب دیا : جی ہاں ( سیدنا عثمان رضی اللہ عنہ نے کہا: ) اس وقت نبی اکرم صلی اللہ علیہ وسلم نے تم سے یہ کہا: تھا کہ اے طلحہ ! ہر نبی کے ساتھ اس کے اصحاب میں سے اس کی امت سے تعلق رکھنے والا ایک رفیق ہوتا ہے ، جو جنت میں اس کے ساتھ ہو گا ، اور یہ عثمان جنت میں میرا رفیق ہے ، تو نبی اکرم صلی اللہ علیہ وسلم نے مجھے مراد لیا تھا ، تو سیدنا طلحہ رضی اللہ عنہ نے کہا: اللہ جانتا ہے ۔ ایسا ہی ہے ۔ ( علامہ ہیثمی فرماتے ہیں : ) میں یہ کہتا ہوں امام نسائی رحمہ اللہ نے اس روایت کا کچھ حصہ منقطع سند کے ساتھ نقل کیا ہے ۔
یہ روایت عبداللہ نے ، ابویعلیٰ نے کبیر میں اور امام بزار نے نقل کی ہے ، عبداللہ اور بزار کی سند میں ایک راوی ابوعبادہ زرقی ہے ، اور وہ متروک ہے ، ابویعلیٰ نے اسے سند سے ساقط کیا ہے ۔ باقی اللہ بہتر جانتا ہے ۔

عبداللہ بن ابورافع اپنی والدہ کا یہ بیان نقل کرتے ہیں : ایک مرتبہ صعبہ بنت حضرمی نکلیں تو ہم نے اس خاتون کو اپنے بیٹے طلحہ بن عبیداللہ سے یہ کہتے ہوئے سنا : سیدنا عثمان رضی اللہ عنہ کا محاصرہ شدید ہو چکا ہے ، تم اس بارے میں بات چیت کرو تاکہ انہیں سہولت مل جائے ، سیدنا طلحہ رضی اللہ عنہ اس وقت اپنے سر کا ایک حصہ دھو چکے تھے ۔ انہوں نے اس خاتون کو کوئی جواب نہیں دیا ، تو اس خاتون نے اپنا ہاتھ اپنی آستین میں داخل کیا اور اپنی چھاتی نکال کر یہ کہا: میں نے تمہارے حمل اور تمہیں دودھ پلانے کا جو کام کیا ہے اس کے حوالے سے میں واسطہ دے کر تمہیں یہ کہتی ہوں کہ تم ایسا ضرور کرو ، تو سیدنا طلحہ رضی اللہ عنہ اسی وقت کھڑے ہوئے ، انہوں نے اپنے سر کے اس طرف والے بالوں کو موڑا اور انہیں گرہ لگا دی ، جو دھلے ہوئے تھے ، پھر وہ وہاں سے نکلے اور سیدنا علی رضی اللہ عنہ کے پاس آئے ، جو اپنے گھر کے باہر بیٹھے ہوئے تھے ۔ سیدنا طلحہ رضی اللہ عنہ تھے ۔ ان کے ساتھ ان کی والدہ تھیں اور ساتھ عبداللہ بن رافع کی والدہ تھیں ، سیدنا طلحہ رضی اللہ عنہ نے کہا: اگر آپ ان صاحب سے لوگوں کو پرے کرنے کی کوشش کریں تو یہ مناسب ہو گا ، کیونکہ ان کا محاصرہ شدید ہو چکا ہے ، تو سیدنا علی رضی اللہ عنہ نے کہا: اللہ کی قسم ! میں اس حوالے سے کسی ایسی چیز کو پسند نہیں کرتا ہے تم ناپسند کرتے ہو ۔
یہ روایت امام طبرانی نے نقل کی ہے ، اور اس کی سند میں راویوں کی ایک جماعت ایسی ہے جن سے میں واقف نہیں ہوں ۔

سیدنا عبداللہ بن سلام رضی اللہ عنہ کے بارے میں یہ بات منقول ہے کہ جب لوگوں نے سیدنا عثمان رضی اللہ عنہ کے معاملے میں شدت کا مظاہرہ کیا ، تو انہوں نے فرمایا : ” اے لوگو ! تم اس بزرگ کو قتل نہ کرنا کیونکہ جس بھی امت نے اپنے نبی کو شہید کیا ، تو ان کا معاملہ اس وقت تک درست نہیں ہوا ، جب تک ان میں سے ستر ہزار افراد کا خون نہیں بہا دیا گیا ، اور جس بھی امت نے اپنے خلیفہ کو شہید کیا ، تو ان کا معاملہ اس وقت تک ٹھیک نہیں ہوا ، جب تک ان میں سے چالیس ہزار لوگوں کا خون نہیں بہا دیا گیا “ لیکن ان لوگوں نے سیدنا عبداللہ بن سلام رضی اللہ عنہ کی بات پر توجہ نہیں کی اور سیدنا عثمان رضی اللہ عنہ کو شہید کر دیا ، ایک مرتبہ سیدنا عبداللہ بن سلام رضی اللہ عنہ سیدنا علی رضی اللہ عنہ سے راستے میں ملے ، انہوں نے دریافت کیا : آپ کہاں جانا چاہتے ہیں ؟ سیدنا علی رضی اللہ عنہ نے جواب دیا : میں عراق کی سرزمین کی طرف جانا چاہتا ہوں ، سیدنا عبداللہ بن سلام رضی اللہ عنہ نے کہا: آپ وہاں نہ جائیں بلکہ آپ اللہ کے رسول کے منبر کے پاس رہیں ، تو سیدنا علی رضی اللہ عنہ کے ساتھیوں میں سے کچھ افراد نے ان پر حملہ کرنا چاہا تو سیدنا علی رضی اللہ عنہ نے فرمایا : اسے چھوڑ دو کیونکہ یہ اہل بیت میں سے ایک ہے ۔ جب سیدنا علی رضی اللہ عنہ شہید ہو گئے ، تو سیدنا عبداللہ بن سلام رضی اللہ عنہ نے ابن معقل سے کہا: یہ چالیس ہجری ہو گئی ہے ، اس کے سرے پر صلح ہو گی ، جو بھی امت اپنے نبی کو شہید کرتی ہے ، تو اس کے بدلے میں ستر ہزار افراد مارے جاتے ہیں ، اور جو بھی امت اپنے خلیفہ کو شہید کرتی ہے ، تو اس کے بدلے میں چالیس ہزار افراد مارے جاتے ہیں ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ۔

عبدالملک بن عمیر بیان کرتے ہیں : محمد بن یوسف بن عبداللہ بن سلام نے حجاج بن یوسف کے ہاں اندر آنے کی اجازت مانگی ، انہیں اجازت دے دی گئی ، وہ اندر آئے ، انہوں نے سلام کیا ، حجاج نے پلنگ کے پاس موجود دو افراد کو یہ حکم دیا کہ وہ ان صاحب کے لئے گنجائش پیدا کریں ، ان دونوں نے اُن صاحب کے لئے گنجائش پیدا کی ، تو وہ صاحب تشریف فرما ہوئے ، حجاج نے ان سے کہا: اللہ تمہارے والد کا بھلا کرے ، کیا تم یہ بات جانتے ہو کہ تمہارے والد نے عبدالملک بن مروان کو تمہارے دادا سیدنا عبداللہ بن سلام رضی اللہ عنہ کے حوالے سے ایک حدیث بیان کی تھی ، ان صاحب نے دریافت کیا : اللہ تعالیٰ آپ پر رحم کرے ، وہ کون سی حدیث تھی ؟ آپ وہ حدیث پیش کیجئے ، تو حجاج نے کہا: وہ اہل مصر کی حدیث تھی کہ جب لوگوں نے سیدنا عثمان رضی اللہ عنہ کا محاصرہ کیا ہوا تھا ، ان صاحب نے کہا: میں وہ حدیث جانتا ہوں ۔ ” سیدنا عبداللہ بن سلام رضی اللہ عنہ تشریف لائے ، سیدنا عثمان رضی اللہ عنہ کو اس وقت محصور کیا جا چکا تھا ، وہ چلتے ہوئے سیدنا عثمان رضی اللہ عنہ کے پاس آئے ، لوگوں نے ان کے لئے گنجائش پیدا کی وہ اندر گئے ۔ انہوں نے کہا: اے امیر المؤمنین ! آپ پر سلام ہو ، سیدنا عثمان رضی اللہ عنہ نے کہا: تم پر بھی سلام ہو ، اے عبداللہ بن سلام ! تم کس وجہ سے آئے ہو ؟ انہوں نے جواب دیا : میں اس لئے آیا ہوں تاکہ میں آپ کا ساتھ دوں ، یہاں تک کہ میں جام شہادت نوش کر لوں یا اللہ تعالیٰ آپ کو فتح نصیب کر دے ، ان لوگوں کے بارے میں میرا یہ خیال ہے کہ یہ آپ کو شہید کر دیں گے ، اگر یہ آپ کو شہید کر دیتے ہیں تو یہ چیز آپ کے حق میں بہتر ہو گی اور ان کے حق میں بری ہو گی ، سیدنا عثمان رضی اللہ عنہ نے فرمایا : تم پر میرا جو حق ہے ، میں اس کا واسطہ دے کر تم سے یہ کہتا ہوں کہ تم نکل کر ان کی طرف نہ جاؤ ، وہ بھلائی جو اللہ تعالیٰ تمہاری وجہ سے لے کے آئے گا یا کوئی شر ہو گا ، جو اللہ تعالیٰ تمہاری وجہ سے دور کر دے گا ، تو تم اطاعت و فرمانبرداری سے کام لو ۔ سیدنا عبداللہ بن سلام رضی اللہ عنہ نکل کر ان کے پاس گئے ، جب ان لوگوں نے سیدنا عبداللہ بن سلام رضی اللہ عنہ کو دیکھا تو وہ لوگ اکٹھے ہو گئے اور انہوں نے یہ گمان کیا کہ شاید وہ کوئی ایسی اطلاع لے کے آئیں ہیں ، جو انہیں خوش کر دے گی ، تو سیدنا عبداللہ بن سلام رضی اللہ عنہ خطبہ دینے کے لئے کھڑے ہوئے ، انہوں نے اللہ تعالیٰ کی حمد و ثناء بیان کرنے بعد ارشاد فرمایا : ” امابعد ! بے شک اللہ تعالیٰ نے سیدنا محمد ( صلی اللہ علیہ وسلم ) کو خوشخبری سنانے والا اور ڈرانے والا بنا کر مبعوث کیا ، وہ اس شخص کو جنت کی خوشخبری دیتے تھے جو ان کی پیروی کرتا تھا اور اس شخص کو عذاب سے ڈراتے تھے ، جو ان کی نافرمانی کرتا تھا ، اور اللہ تعالیٰ نے ان کی پیروی کرنے والوں کو تمام ادیان پر غالب کر دیا ، خواہ یہ بات مشرکین کو بری لگے ، پھر اللہ تعالیٰ نے نبی اکرم صلی اللہ علیہ وسلم کے لئے رہائشی جگہ کا انتخاب کیا ، تو نبی اکرم صلی اللہ علیہ وسلم کے لئے مدینہ منورہ کو منتخب کیا اور اسے ہجرت کا مقام بنایا ، اسے ایمان کا مقام بنایا ، اللہ کی قسم ! فرشتے مسلسل مدینہ منورہ کی حفاظت کرتے رہتے ہیں ، جب سے نبی اکرم صلی اللہ علیہ وسلم یہاں تشریف لائے ہیں ، اور جب سے نبی اکرم صلی اللہ علیہ وسلم یہاں تشریف لائے ہیں اس وقت سے لے کر اب تک اللہ کی تلوار تم لوگوں کے حوالے سے میان میں رہی ہے ، پھر اس کے بعد سیدنا عبداللہ بن سلام رضی اللہ عنہ نے ارشاد فرمایا : بے شک اللہ تعالیٰ نے سیدنا محمد ( صلی اللہ علیہ وسلم ) کو حق کے ہمراہ مبعوث کیا ، تو جو شخص ہدایت حاصل کرنا چاہتا ہو وہ اللہ تعالیٰ کی عطا کردہ ہدایت کو حاصل کرے اور جو شخص گمراہ ہوا تو وہ بیان اور حج کے بعد گمراہ رہ گیا ، پہلے زمانے میں جس بھی نبی کو شہید کیا گیا ، تو اس کے بدلے میں ستر ہزار افراد کو قتل کیا گیا ، ان سب کو اس نبی کے بدلے میں قتل کیا گیا ، اور جس بھی خلیفہ کو شہید کیا گیا ، تو اس کے بدلے میں پینتیس ہزار لوگوں کو قتل کیا گیا ، ان سب کو اس کے بدلے میں قتل کیا گیا ، تو تم اس بزرگ کو قتل کرنے میں جلدی نہ کرو ، اللہ کی قسم ! تم میں سے جو شخص انہیں شہید کرے گا ، قیامت کے دن جب وہ اللہ تعالیٰ کی بارگاہ میں حاضر ہو گا ، تو اس کا ہاتھ کٹا ہوا ہو گا ، اور شل ہو گا ، اور تم یہ بات جان لو کہ اولاد کا والد پر جو حق ہوتا ہے اسی طرح کا حق اس بزرگ کا تم پر ہے ، راوی کہتے ہیں : تو لوگوں نے یہ کہنا شروع کیا ، اس یہودی نے جھوٹ بولا: ہے ، اس یہودی نے جھوٹ بولا: ہے ، تو سیدنا عبداللہ بن سلام رضی اللہ عنہ نے کہا: تم لوگ جھوٹ بول رہے ہو ، اللہ کی قسم ! تم لوگ یہودی ہو ، میں یہودی نہیں ہوں ، میں مسلمانوں میں سے ایک ہوں ، اللہ تعالیٰ ، اس کا رسول اور اہل ایمان یہ بات جانتے ہیں ، اور میرے بارے میں قرآن کی یہ آیت نازل ہوئی ہے : ” تم یہ فرما دو کہ میرے اور تم لوگوں کے درمیان گواہ ہونے کے لئے اللہ تعالیٰ کافی ہے ، اور وہ شخص کافی ہے ، جس کے پاس کتاب کا علم ہے ۔ “ اور اللہ تعالیٰ نے ایک دوسری آیت بھی ( میرے بارے میں ) نازل کی تھی : ” تم یہ فرما دو اس بارے میں تم لوگوں کی کیا رائے ہے کہ اگر یہ چیز اللہ تعالیٰ کی طرف سے ہو اور تم نے اس کا انکار کیا ہو اور بنی اسرائیل سے تعلق رکھنے والے ایک شخص نے اس بارے میں گواہی دے دی ہو ، وہ ایمان لے آیا اور تم نے تکبر کیا ۔ “ راوی کہتے ہیں : تو وہ لوگ اٹھ گئے اور اٹھ کر سیدنا عثمان رضی اللہ عنہ کے پاس گئے اور انہیں یوں ذبح کر دیا جس طرح حلان کو ذبح کیا جاتا ہے ۔ شعیب نامی راوی کہتے ہیں : میں نے عبدالملک بن عمیر سے دریافت کیا : حلان کیا ہوتا ہے ۔ انہوں نے جواب دیا جمل ( ایک مخصوص قسم کا جانور ) ۔ راوی کہتے ہیں : سیدنا عثمان غنی رضی اللہ عنہ نے کثیر بن صلت سے یہ فرمایا تھا ، اسے کثیر ! اللہ کی قسم ! کل مجھے قتل کر دیا جائے گا ، تو کثیر نے جواب دیا : جی نہیں بلکہ اللہ تعالیٰ آپ کو سربلندی عطا کرے گا اور آپ کے دشمن کو رسوا کرے گا ، تین مرتبہ یہ مکالمہ ہوا اور ہر مرتبہ کثیر یہی کہتے رہے ، پھر انہوں نے کہا: اے امیر المؤمنین ، تو سیدنا عثمان رضی اللہ عنہ نے فرمایا : میں نے اللہ کے رسول کو خواب میں دیکھا ہے ، آپ کے ساتھ سیدنا ابوبکر رضی اللہ عنہ اور سیدنا عمر رضی اللہ عنہ تھے ، نبی اکرم صلی اللہ علیہ وسلم نے مجھ سے فرمایا : اے عثمان ! کل تم ہمارے ساتھ ہو گے ، اور کل تم شہید ہو جاؤ گے ، تو اللہ کی قسم ! میں شہید ہو جاؤں گا ، راوی کہتے ہیں : تو سیدنا عثمان رضی اللہ عنہ کو شہید کر دیا گیا ، سیدنا عبداللہ بن سلام رضی اللہ عنہ نکل کر لوگوں کے پاس آئے ، ان کے منتشر ہونے سے پہلے وہ آئے اور بولے : : اے اہل مصر ! اے سیدنا عثمان رضی اللہ عنہ کے قاتلو ! تم نے امیر المؤمنین کو قتل کر دیا ہے ، اللہ کی قسم ! عہد شکنی کر دی گئی ، خون بہا دیا گیا ، مال تقسیم کر دیا گیا ، تم لوگ سیراب نہیں ہو گے ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

کلثوم خزاعی بیان کرتے ہیں : سیدنا عبداللہ بن مسعود رضی اللہ عنہ نے فرمایا : مجھے یہ بات پسند نہیں ہے کہ میں نے سیدنا عثمان رضی اللہ عنہ کی طرف کوئی تیر پھینکا ہو ، راوی کہتے ہیں : میرا خیال ہے ۔ انہوں نے یہ بھی کہا: تھا ، میرا مقصد انہیں شہید کرنا ہو ( اور اس تیر پھینکنے کے عوض میں ) مجھے احد پہاڑ جتنا سونا مل جائے ، اگرچہ وہ تیر اپنے نشانے پر نہ لگا ہو ۔
یہ روایت امام طبرانی نے نقل کی ہے ۔ اس کی سند میں ایک راوی عمران بن عمیر ہے ، اور میں اس سے واقف نہیں ہوں ۔ اس روایت کے بقیہ رجال ثقہ ہیں ۔

ابواسود دیلی بیان کرتے ہیں : میں نے سیدنا ابوبکرہ رضی اللہ عنہ کو یہ فرماتے ہوئے سنا : ” میں آسمان سے گر کر ٹکڑے ٹکڑے ہو جاؤں ، یہ میرے نزدیک اس سے زیادہ پسندیدہ ہو گا کہ میں نے سیدنا عثمان رضی اللہ عنہ کے قتل میں شرکت کی ہو ۔ “
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ۔

حسن بیان کرتے ہیں : میں نے سیدنا عثمان رضی اللہ عنہ کا زمانہ پایا ہے ، میں ان دنوں قریب البلوغ تھا ، میں نے انہیں خطبہ دیتے ہوئے یہ ارشاد فرماتے ہوئے سنا : میں وہاں موجود تھا ، وہ یہ فرما رہے تھے : اے لوگو ! تمہیں مجھ پر کیا اعتراض ہے ؟ انہوں نے فرمایا : وہ لوگ روزانہ بہت سی بھلائی تقسیم کرتے تھے ( یعنی مال و دولت تقسیم کرتے تھے ) سیدنا عثمان رضی اللہ عنہ نے فرمایا : اے لوگو تم میرے پاس آنا ، میں تمہیں عطیات دوں گا ، وہ لوگ آئے ، انہوں نے ان عطیات کو وصول کیا جو بہت زیادہ تھے ، پھر یہ کہا: گیا : اے لوگو تم لوگ میرے پاس آنا ، میں تمہیں لباس فراہم کروں گا ، پھر حلے لائے گئے ، وہ ان کے درمیان تقسیم کیے گئے ۔ حسن کہتے ہیں : دشمنی ختم ہو گئی ، عطیات گھومنے لگے ، آپس میں تعلقات بہتر ہو گئے ، بھلائی زیادہ ہو گئی ، روئے زمین پر کوئی مومن کسی مومن سے خوف زدہ نہیں تھا ، جو شخص بھی زندوں میں سے جس سے بھی ملتا تھا ، تو وہ اس کا بھائی ہوتا تھا ، اس سے محبت رکھتا تھا ، اس کی مدد کرتا تھا اور فتنہ ایسا تھا کہ اگر اس پر تلوار سونت لی جاتی ۔
یہ روایت امام طبرانی نے نقل کی ہے ، اور اس کی سند حسن ہے ۔

حسن بیان کرتے ہیں : سیدنا عثمان رضی اللہ عنہ کے ایک محافظ نے مجھے یہ بات بتائی کہ انصار سے تعلق رکھنے والا ایک شخص سیدنا عثمان رضی اللہ عنہ کے پاس آیا تو انہوں نے کہا: اے میرے بھتیجے ! تم واپس چلے جاؤ ، تم میرے قاتل نہیں ہو ، اس شخص نے کہا: آپ کو اس بات کا کیسے پتہ چلا ؟ سیدنا عثمان رضی اللہ عنہ نے فرمایا : تمہاری پیدائش کے ساتویں دن تمہیں ، نبی اکرم صلی اللہ علیہ وسلم کے پاس لایا گیا تھا ، اور نبی اکرم صلی اللہ علیہ وسلم نے تمہیں گھٹی دی تھی اور تمہارے لئے برکت کی دعا کی تھی ، راوی کہتے ہیں : پھر انصار سے تعلق رکھنے والا ایک اور شخص سیدنا عثمان رضی اللہ عنہ کے پاس آیا ، تو انہوں نے فرمایا : اے میرے بھتیجے ! تم واپس چلے جاؤ ، تم مجھے قتل نہیں کرو گے ، اس نے دریافت کیا : آپ کو اس بات کا کیسے پتہ چلا ؟ تو سیدنا عثمان رضی اللہ عنہ نے فرمایا : کیونکہ تمہیں پیدائش کے ساتویں دن نبی اکرم صلی اللہ علیہ وسلم کے پاس لایا گیا تھا ۔ نبی اکرم صلی اللہ علیہ وسلم نے تمہیں گھٹی دی تھی اور تمہارے لئے برکت کی دعا کی تھی ، پھر محمد بن ابوبکر اندر آئے ، تو سیدنا عثمان رضی اللہ عنہ نے کہا: تم مجھے قتل کر دو گے ، انہوں نے کہا: آپ کو کیسے پتہ چلا اے نالائق ؟ تو سیدنا عثمان رضی اللہ عنہ نے فرمایا : کیونکہ تمہاری پیدائش کے ساتویں دن تمہیں نبی اکرم صلی اللہ علیہ وسلم کے پاس لایا گیا ، تاکہ نبی اکرم صلی اللہ علیہ وسلم تمہیں گھٹی دیں اور تمہارے لئے برکت کی دعا کر دیں ، تو تم نے نبی اکرم صلی اللہ علیہ وسلم پر پاخانہ کر دیا تھا ۔ راوی کہتے ہیں : تو وہ سیدنا عثمان رضی اللہ عنہ کے سینے پر چڑھ گئے ، انہوں نے سیدنا عثمان رضی اللہ عنہ کی داڑھی مٹھی میں لے لی ، تو سیدنا عثمان رضی اللہ عنہ نے فرمایا : تم ایسا کرنے تو لگے ہو ، لیکن تم یہ یاد رکھنا کہ تمہارے والد کو یہ بات بری لگنی تھی ، تو اس نے اپنے ہاتھ میں موجود چھوٹا تیر سیدنا عثمان رضی اللہ عنہ کے گلے میں گھونپ دیا ۔
یہ روایت امام طبرانی نے نقل کی ہے ۔ اس کی سند میں سیدنا عثمان رضی اللہ عنہ کے ایک محافظ کا ذکر ہے ، جس کا نام بیان نہیں کیا گیا ہے ، اس روایت کے بقیہ رجال کی توثیق کی گئی ہے ۔

ابوسلمہ بن عبدالرحمن بیان کرتے ہیں : جب ایک شخص نے سیدنا عثمان رضی اللہ عنہ کے ہاتھ پر وار کیا ، تو انہوں نے فرمایا : یہ وہ پہلا ہاتھ ہے ، جس نے مفصل سورتیں لکھی تھیں ۔
یہ روایت امام طبرانی نے نقل کی ہے ، اور اس کی سند حسن ہے ۔

یزید بن ابوحبیب بیان کرتے ہیں : جو لوگ سیدنا عثمان رضی اللہ عنہ کی طرف ( انہیں شہید کرنے کے لئے گئے تھے ) ان میں سے زیادہ تر لوگ بعد میں پاگل پن کا شکار ہو گئے تھے ۔
یہ روایت امام طبرانی نے نقل کی ہے ، اور اس کی سند حسن ہے ۔

محمد بن سیرین بیان کرتے ہیں : جب لوگوں نے سیدنا عثمان رضی اللہ عنہ کے گھر کے گرد چکر لگانے شروع کیے تو سیدنا عثمان رضی اللہ عنہ کی اہلیہ نے کہا: کیا تم لوگ انہیں شہید کرنا چاہتے ہو ؟ تم لوگ انہیں شہید کر دو یا انہیں چھوڑ دو ، بہرحال وہ ساری رات عبادت کرتے ہیں اور ایک رکعت میں پورا قرآن پڑھ لیتے ہیں ۔ “
یہ روایت امام طبرانی نے نقل کی ہے ، اور اس کی سند حسن ہے ۔

امام شعبی بیان کرتے ہیں : مسروق کی ملاقات اشتر سے ہوئی ، تو مسروق نے اشتر سے کہا: تم لوگوں نے سیدنا عثمان رضی اللہ عنہ کو شہید کیا تھا ، انہوں نے کہا: جی ہاں ، تو مسروق نے کہا: اللہ کی قسم ! تم نے انہیں ایسی حالت میں شہید کیا کہ وہ روزہ رکھنے والے تھے ، نماز پڑھنے والے تھے ۔ راوی کہتے ہیں : تو اشتر چلے گئے اور سیدنا عمار رضی اللہ عنہ کو اس بارے میں بتایا تو سیدنا عمار رضی اللہ عنہ مسروق کے پاس آئے ، تو انہوں نے کہا: اللہ کی قسم ! انہوں نے عمار کو کوڑے لگوائے ، انہوں نے ابوذر کو باہر نکلوا دیا ، انہوں نے چراگاہ کو اپنے لئے مخصوص کیا اور تم یہ کہتے ہو کہ آپ لوگوں نے انہیں ایسی حالت میں شہید کیا ہے کہ وہ روزہ دار تھے ، اور نفل پڑھنے والے تھے ، تو مسروق نے ان سے کہا: اللہ کی قسم ! آپ نے دو صورتوں میں سے کوئی بھی کام نہیں کیا ، یا تو یہ تھا کہ آپ انہیں اسی طرح سزا دیتے ، جس طرح آپ کو ان کی طرف سے سزا ملی تھی ، یا یہ ہے کہ آپ صبر سے کام لیتے اور صبر کرنا ، صبر کرنے والوں کے لئے زیادہ بہتر ہے ، راوی کہتے ہیں : تو گویا انہوں نے انہیں لاجواب کر دیا ۔ راوی کہتے ہیں : امام شعبی یہ فرماتے تھے : کسی ہمدانی عورت نے مسروق جیسے بچے کو جنم نہیں دیا ۔
یہ روایت امام طبرانی نے نقل کی ہے ۔ اس کی سند میں ایک راوی حسن بن ابوجعفر جفری ہے ، اور وہ اپنی غفلت کے حوالے سے ضعیف ہے ۔

سیدنا ابودرداء رضی اللہ عنہ فرماتے ہیں : سیدنا عثمان رضی اللہ عنہ کے بعد مدینہ نہیں رہا اور سیدنا معاویہ رضی اللہ عنہ کے بعد خوشحالی نہیں رہی ۔ نبی اکرم صلی اللہ علیہ وسلم نے ارشاد فرمایا ہے : ” اللہ تعالیٰ نے میرے ساتھ وعدہ کیا ہے کہ ابودرداء اسلام قبول کر لے گا ۔ “ ( راوی کہتے ہیں : ) تو انہوں نے اسلام قبول کر لیا ۔
یہ روایت امام طبرانی نے نقل کی ہے ، اور اس کی سند حسن ہے ۔

سیدنا عدی بن حاتم رضی اللہ عنہ فرماتے ہیں : جب سیدنا عثمان رضی اللہ عنہ کو شہید کر دیا گیا ، تو ایک شخص نے کہا: ان کے بارے میں دو مینڈھے سینگ نہیں لڑائیں گے ، میں نے کہا: جی ہاں ، اس بارے میں بہت سی آنکھیں پھوڑ دی جائیں گی ۔
یہ روایت امام طبرانی نے نقل کی ہے ، اور اس کی سند حسن ہے ۔

امام مالک بن انس بیان کرتے ہیں : جب سیدنا عثمان رضی اللہ عنہ کو شہید کر دیا گیا ، تو بنو فلاں کے گھر میں تین دن تک ان کی لاش پڑی رہی ، پھر بارہ افراد وہاں آئے ، جن میں میرے دادا مالک بن ابوعامر بھی تھے ۔ ان کے علاوہ حویطب بن عبدالعزیٰ تھے ، حکیم بن حزام تھے ، عبداللہ بن زبیر تھے ، عائشہ بنت عثمان تھیں ، ان کے ساتھ ایک چراغ تھا ، ان لوگوں نے ان کی میت کو اٹھایا اور دروازے پر لائے ۔ وہ لوگ انہیں بقیع میں لے کے آئے ، ان لوگوں کے درمیان ان کی نماز جنازہ کے بارے میں اختلاف ہوا تو حکیم بن حزام یا شاید حويطب بن عبدالعزیٰ نے ان کی نماز جنازہ پڑھائی ، یہ شک عبدالرحمن نامی راوی کو ہے ، پھر ان لوگوں نے انہیں دفن کرنے کا ارادہ کیا ، تو بنو مازن سے تعلق رکھنے والا ایک شخص کھڑا ہوا اور بولا: اگر تم لوگوں نے انہیں مسلمانوں کے ساتھ دفن کیا ، تو میں کل لوگوں کو اس بارے میں بتا دوں گا ، وہ لوگ اس کی میت اٹھا کر اسے حش کوکب کے مقام پر لے کے آئے ، جب وہ انہیں قبر میں اتارنے لگے ، تو سیدنا عثمان رضی اللہ عنہ کی صاحبزادی عائشہ چیخنے لگیں ، تو سیدنا عبداللہ بن زبیر رضی اللہ عنہما نے اس خاتون سے کہا: تم خاموش رہو ، اللہ کی قسم ! اب اگر تم نے دوبارہ کوشش کی تو میں تمہاری آنکھوں کے درمیان ضرب لگاؤں گا ، جب ان لوگوں نے سیدنا عثمان رضی اللہ عنہ کو دفن کر دیا اور ان پر مٹی ڈال دی تو سیدنا عبداللہ بن زبیر رضی اللہ عنہما نے اس خاتون سے کہا: اب تمہیں جتنا مناسب لگتا ہے اتنا چیخو ۔ امام مالک بیان کرتے ہیں : اس سے پہلے ایک مرتبہ سیدنا عثمان رضی اللہ عنہ حش کوکب کے مقام سے گزرے تھے ، تو انہوں نے فرمایا تھا : یہاں ایک نیک شخص دفن ہو گا ۔
یہ روایت امام طبرانی نے نقل کی ہے وہ کہتے ہیں : حش سے مراد بستان ( یعنی باغ ) ہے ۔ اس روایت کے رجال ثقہ ہیں ۔

سہم بن حبیش ، جو سیدنا عثمان رضی اللہ عنہ کو قتل کرنے والوں میں شامل تھے وہ بیان کرتے ہیں : جب شام ہوئی ، تو میں نے کہا: اگر تم نے اپنے متعلقہ فرد کو صبح تک چھوڑ دیا تو ان لوگوں نے صبح ان کا مثلہ کر دینا ہے ، پھر وہ لوگ انہیں لے کے بقیع غرقد کی طرف گئے ، ہم نصف رات کے وقت انہیں لے کے جا سکے تھے ، ہم نے انہیں اٹھایا ، ہمارے پیچھے بہت سے لوگ تھے ، ہم ان سے ڈر گئے ، یہاں تک کہ ہم سیدنا عثمان رضی اللہ عنہ کو چھوڑ کر ادھر ادھر ہو گئے ، تو ایک منادی نے پکار کر کہا: تم لوگ پریشان نہ ہو اور ثابت قدم رہو ، ہم اس لئے آئے ہیں تاکہ تمہارے ساتھ اس میں شریک ہوں ۔ ابن حبیش کہتے ہیں : اللہ کی قسم ! وہ فرشتے ہی تھے ۔
یہ روایت امام طبرانی نے نقل کی ہے ۔ اس کی سند میں ایک راوی عبدالوہاب بن ضحاک ہے ، اور وہ متروک ہے ۔

فلفلہ جعفی بیان کرتے ہیں : میں نے سیدنا امام حسن بن علی رضی اللہ عنہما کو یہ فرماتے ہوئے سنا : ” میں نے خواب میں نبی اکرم صلی اللہ علیہ وسلم کو دیکھا کہ آپ عرش سے لپٹے ہوئے تھے اور میں نے سیدنا ابوبکر رضی اللہ عنہ کو دیکھا کہ انہوں نے نبی اکرم صلی اللہ علیہ وسلم کو پہلو سے پکڑا ہوا تھا ، میں نے سیدنا عمر رضی اللہ عنہ کو دیکھا کہ انہوں نے سیدنا ابوبکر رضی اللہ عنہ کو پہلو سے پکڑا ہوا تھا ، میں نے سیدنا عثمان رضی اللہ عنہ کو دیکھا کہ انہوں نے سیدنا عمر رضی اللہ عنہ کو پہلو سے پکڑا ہوا تھا اور پھر میں نے دیکھا کہ آسمان سے زمین کی طرف خون آ رہا ہے ۔ جب امام حسن رضی اللہ عنہ نے
یہ روایت بیان کی ، تو اس وقت ان کے پاس کچھ شیعہ لوگ موجود تھے ۔ انہوں نے کہا: آپ نے سیدنا علی رضی اللہ عنہ کو نہیں دیکھا ، تو سیدنا امام حسن رضی اللہ عنہ نے فرمایا : مجھے سب سے زیادہ یہ بات پسند ہے کہ میں یہ دیکھتا کہ سیدنا علی رضی اللہ عنہ نے نبی اکرم صلی اللہ علیہ وسلم کو پہلو سے پکڑا ہوا ہے ، لیکن خواب وہی ہے جو میں نے بیان کیا ہے ، تو سیدنا ابومسعود رضی اللہ عنہ نے فرمایا : تم لوگ سیدنا امام حسن رضی اللہ عنہ کے حوالے سے خواب بیان کرتے ہو ، جو انہوں نے دیکھا تھا ، ہم لوگ نبی اکرم صلی اللہ علیہ وسلم کے ساتھ جنگ میں حصہ لے رہے تھے ، لوگوں کو شدید بھوک لاحق ہو گئی ، یہاں تک کہ میں نے مسلمانوں کے چہروں پر پریشانی دیکھی اور منافقین کے چہروں پر خوشی دیکھی ، جب نبی اکرم صلی اللہ علیہ وسلم نے یہ صورت حال ملاحظہ کی ، تو آپ نے ارشاد فرمایا : اللہ کی قسم ! سورج غروب ہونے سے پہلے اللہ تعالیٰ تم لوگوں کو رزق عطا کر دے گا ۔ سیدنا عثمان رضی اللہ عنہ کو اس بات کا پتہ تھا کہ اللہ کے رسول سچ فرماتے ہیں ، تو سیدنا عثمان رضی اللہ عنہ نے چودہ سو اونٹنیاں ، ان پر موجود اناج سمیت خرید لیں اور پھر ان میں سے نو کو نبی اکرم صلی اللہ علیہ وسلم کی طرف بھیجوایا ، جب نبی اکرم صلی اللہ علیہ وسلم نے انہیں ملاحظہ کیا ، تو آپ نے ارشاد فرمایا : یہ کہاں سے آیا ہے ، تو لوگوں نے بتایا یہ سیدنا عثمان رضی اللہ عنہ نے آپ کی طرف تحفے کے طور پر بھیجی ہیں ۔ راوی کہتے ہیں : تو مسلمانوں کے چہروں پر خوشی کے آثار نمایاں ہوئے اور منافقین کے چہروں پر پریشانی کے آثار نمایاں ہوئے ، تو میں نے نبی اکرم صلی اللہ علیہ وسلم کی طرف دیکھا کہ آپ نے اپنے دونوں ہاتھ اتنے بلند کیے کہ آپ کی بغلوں کی سفیدی نظر آ رہی تھی ، آپ سیدنا عثمان رضی اللہ عنہ کے لئے دعا کر رہے تھے ، میں نے آپ کو اس سے پہلے کسی کے لئے اس طرح کی دعا کرتے ہوئے نہیں سنا : ” اے اللہ ! تو عثمان کو عطا کر ، اے اللہ ! تو عثمان کے لئے یہ کر دے ۔ “
یہ روایت امام طبرانی نے معجم اوسط میں نقل کی ہے ، اور معجم کبیر میں اختصار کے ساتھ نقل کی ہے ، اور اس کی سند حسن ہے ۔

سیدنا امام حسن رضی اللہ عنہ کے حوالے سے یہ بات منقول ہے ، وہ فرماتے ہیں : لوگو میں نے گزشتہ رات خواب میں حیران کن چیز دیکھی ، میں نے دیکھا کہ میرا پروردگار اپنے عرش پر ہے ، پھر نبی اکرم صلی اللہ علیہ وسلم تشریف لائے اور عرش کے ایک پائے کے پاس کھڑے ہوئے ، پھر سیدنا ابوبکر رضی اللہ عنہ آئے اور انہوں نے اپنا ہاتھ نبی اکرم صلی اللہ علیہ وسلم کے کندھے پر رکھ لیا ، پھر سیدنا عمر رضی اللہ عنہ آئے ، انہوں نے اپنا ہاتھ سیدنا ابوبکر رضی اللہ عنہ کے کندھے پر رکھ لیا ، پھر سیدنا عثمان رضی اللہ عنہ آئے تو وہ ذرا ایک طرف تھے ۔ انہوں نے کہا: اے میرے پروردگار ! تو اپنے بندوں سے یہ پوچھ کہ انہوں نے مجھے کیوں قتل کیا ؟ سیدنا امام حسن رضی اللہ عنہ فرماتے ہیں : پھر آسمان سے زمین کی طرف خون کے دو پرنالے بہنے لگے ۔ راوی کہتے ہیں : سیدنا علی رضی اللہ عنہ سے یہ کہا: گیا کہ آپ نے یہ چیز ملاحظہ نہیں کی کہ جو سیدنا امام حسن رضی اللہ عنہ بیان کرتے ہیں ؟ سیدنا علی رضی اللہ عنہ نے فرمایا : اس نے وہی چیز بیان کی ہے ، جو اس نے دیکھی ہے ۔

ایک روایت میں یہ الفاظ ہیں : سیدنا امام حسن رضی اللہ عنہ نے فرمایا : میں نے جو خواب دیکھا ہے اس کے بعد میں جنگ نہیں کروں گا ۔ اس کے بعد راوی نے حسب سابق روایت ذکر کی ہے ، جس میں آگے چل کے یہ الفاظ ہیں : میں نے سیدنا عثمان رضی اللہ عنہ کو دیکھا کہ انہوں نے اپنا ہاتھ سیدنا عمر رضی اللہ عنہ پر رکھا ہوا تھا اور ان لوگوں کے بعد میں نے خون دیکھا ، میں نے دریافت کیا : یہ کیا ہے ؟ تو بتایا گیا کہ یہ سیدنا عثمان رضی اللہ عنہ کا خون ہے ، جس کے حوالے سے وہ اللہ تعالیٰ سے ( حساب لینے ) کا مطالبہ ( یعنی دعا ) کر رہے ہیں ۔ یہ تمام روایات ابویعلیٰ نے دو اسناد کے ساتھ نقل کی ہیں ان دونوں میں سے ایک کی سند میں ایسے راوی ہیں جن سے میں واقف نہیں ہوں اور دوسری کی سند میں ایک راوی سفیان بن وکیع ہے ، اور وہ ضعیف ہے ۔

مسلم ابوسعید جو سیدنا عثمان غنی رضی اللہ عنہ کے غلام ہیں ، وہ بیان کرتے ہیں : سیدنا عثمان غنی رضی اللہ عنہ نے بیس غلاموں کو آزاد کر دیا ، پھر انہوں نے شلوار منگوائی اور اسے مضبوطی سے باندھ لیا ، حالانکہ انہوں نے زمانہ جاہلیت میں یا زمانہ اسلام میں کبھی بھی شلوار نہیں پہنی تھی ، پھر انہوں نے بتایا : گزشتہ رات میں نے نبی اکرم صلی اللہ علیہ وسلم کو خواب میں دیکھا ، میں نے خواب میں سیدنا ابوبکر رضی اللہ عنہ اور سیدنا عمر رضی اللہ عنہ کو دیکھا ، ان لوگوں نے مجھ سے یہ کہا: تم صبر سے کام لو ، تم آج افطاری ہمارے ساتھ کرو گے ، پھر سیدنا عثمان رضی اللہ عنہ نے قرآن مجید منگوایا اور اسے اپنے سامنے منگوا لیا ، جب انہیں شہید کیا گیا ، تو وہ قرآن مجید ان کے سامنے موجود تھا ۔
یہ روایت عبداللہ نے اور امام ابویعلیٰ نے کبیر میں نقل کی ہے ، اور ان دونوں کے رجال ثقہ ہیں ۔ اس روایت کے مختلف طرق فتنوں سے متعلق کتاب میں گزر چکے ہیں ۔

قتادہ بیان کرتے ہیں : سیدنا زبیر نے سیدنا عثمان رضی اللہ عنہ کی نماز جنازہ پڑھائی تھی اور انہیں دفن کیا تھا ، سیدنا عثمان رضی اللہ عنہ نے ان کے بارے میں وصیت کی تھی ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ، البتہ قتادہ نامی راوی نے اس واقعہ کا زمانہ نہیں پایا ہے ۔

زہدم جرمی بیان کرتے ہیں : سیدنا عبداللہ بن عباس رضی اللہ عنہما نے ہمیں خطبہ دیتے ہوئے ارشاد فرمایا : ” اگر لوگوں نے سیدنا عثمان رضی اللہ عنہ کے قصاص کا مطالبہ نہ کیا ہوتا تو آسمان سے ان پر پتھر برسائے جاتے ۔ “
یہ روایت امام طبرانی نے معجم کبیر اور معجم اوسط میں نقل کی ہے ، معجم کبیر کے رجال ” صحیح “ کے رجال ہیں ۔

عبداللہ بن سعید اپنے والد کا یہ بیان نقل کرتے ہیں : ہم لوگ سیدنا علی بن ابوطالب رضی اللہ عنہ کے پاس بیٹھے ہوئے تھے ۔ ان کے دائیں طرف سیدنا عمار بن یاسر رضی اللہ عنہ موجود تھے اور بائیں طرف محمد بن ابوبکر موجود تھے ، اسی دوران غراب بن فلاں صدائی نامی شخص آیا اور بولا: اے امیر المؤمنین ! آپ سیدنا عثمان رضی اللہ عنہ کے بارے میں کیا کہتے ہیں ؟ تو دونوں صاحبان نے سیدنا علی رضی اللہ عنہ پر سبقت کرتے ہوئے یہ کہا: تم ایک ایسے شخص کے بارے میں نہ پوچھو کہ جس نے ایمان لانے کے بعد اللہ کا کفر کیا اور منافقت اختیار کی ، اس شخص نے ان دونوں صاحبان سے کہا: میں نے آپ دونوں سے سوال نہیں کیا اور نہ ہی میں آپ دونوں کے پاس آیا ہوں ، سیدنا علی رضی اللہ عنہ نے اس شخص سے کہا: یہ دونوں جو کہہ رہے ہیں ، میں وہ نہیں کہتا ، ان دونوں نے سیدنا علی رضی اللہ عنہ سے کہا: تو پھر ہم نے انہیں قتل کیوں ہونے دیا ، تو سیدنا علی رضی اللہ عنہ نے فرمایا : وہ تمہارے امیر بنے تھے ، اور انہوں نے اپنی حکومت کے آخری دنوں میں کچھ کام ٹھیک نہیں کیے ، تم نے اس کے خلاف احتجاج کیا اور غلط طریقے سے کیا ، اللہ کی قسم ! مجھے یہ توقع ہے کہ میں اور سیدنا عثمان رضی اللہ عنہ اس طرح ہوں گے ، جس طرح اللہ تعالیٰ نے ارشاد فرمایا ہے : ” اور ہم نے ان کے سینوں میں سے کھوٹ الگ کر دیا ، وہ بھائی بھائی بن کر پلنگوں پر ایک دوسرے کے سامنے بیٹھے ہوں گے ۔ “
یہ روایت امام طبرانی نے نقل کی ہے ۔ اس کی سند میں ایک راوی عبدالمنعم بن بشیر ہے ، جس سے استدلال کرنا درست نہیں ہے ۔

ابواسود بیان کرتے ہیں : میں نے طلیق بن خشاف کو یہ بیان کرتے ہوئے سنا : ” ہم لوگ وفد کی شکل میں مدینہ منورہ گئے تاکہ اس بات کا جائزہ لیں کہ سیدنا عثمان رضی اللہ عنہ کو کیوں شہید کیا گیا ، جب ہم وہاں آئے ، تو وہاں ہمارا گزر سیدنا علی رضی اللہ عنہ کے خاندان سے تعلق رکھنے والے ایک فرد کے پاس سے ہوا ، سیدنا حسین رضی اللہ عنہ کے خاندان سے تعلق رکھنے والے ایک فرد کے پاس سے ہوا ، ایک اُم المؤمنین کے پاس سے ہوا ، لیکن میں سیدہ عائشہ رضی اللہ عنہا کی خدمت میں حاضر ہوا ، میں نے انہیں سلام کیا ، انہوں نے سلام کا جواب دیا ، انہوں نے دریافت کیا : تم کون ہو ؟ میں نے بتایا : اہل بصرہ سے تعلق رکھنے والا ایک فرد ہوں ، انہوں نے دریافت کیا : اہل بصرہ میں سے کس سے تعلق رکھتے ہو ؟ میں نے جواب دیا : بکر بن وائل کے خاندان سے ، انہوں نے دریافت کیا : بکر بن وائل کے خاندان میں سے کس سے تعلق رکھتے ہو ؟ میں نے بتایا بنو قیس بن ثعلبہ سے ، انہوں نے فرمایا : آل فلاں سے ، میں نے ان سے کہا: اے ام المؤمنین ! سیدنا عثمان رضی اللہ عنہ جو امیر المؤمنین ہیں ، انہیں کیوں شہید کیا گیا ، تو انہوں نے فرمایا : اللہ کی قسم ! انہیں مظلوم ہونے کے طور پر قتل کیا گیا ، اور جس شخص نے انہیں قتل کیا ہے ، اللہ تعالیٰ اس پر لعنت کرے ۔ سیدنا ابوبکر رضی اللہ عنہ کے بیٹے سے اللہ تعالیٰ ان کا قصاص لے اور بنو تیم کے بڑوں کو ان کے گھر میں اللہ تعالیٰ بے حیثیت کر دے ، اور بنو بدیل کی گمراہی کی وجہ سے اللہ تعالیٰ ان کے خون بہائے اور اشتر کی طرف اللہ تعالیٰ اپنے تیروں میں سے کوئی تیر بھیجے ( راوی کہتے ہیں : ) اللہ کی قسم ! ان سب لوگوں میں سے ہر ایک کو سیدہ عائشہ رضی اللہ عنہا کی دعائے ضرر کا نتیجہ لاحق ہوا ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ، صرف طلق کا معاملہ مختلف ہے ، اور وہ ثقہ ہے ۔

حسن فرماتے ہیں : فاسق محمد بن ابوبکر کو مصر کی ایک گھاٹی میں پکڑ لیا گیا ، اسے گدھے کی کھال میں ڈال کر جلا دیا گیا ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

علقمہ بن وقاص بیان کرتے ہیں : ہم لوگ دار مخرمہ میں اکٹھے ہوئے ، یہ سیدنا عثمان رضی اللہ عنہ کی شہادت کے بعد کی بات ہے ، ہمارا ارادہ بیعت کرنے کا تھا ، تو سیدنا ابوجہم بن حذیفہ رضی اللہ عنہ نے کہا: ہم لوگ بیعت اس صورت میں کریں گے کہ جب قصاص کے لئے کوئی رکاوٹ نہ بنے ، سیدنا عمار رضی اللہ عنہ نے کہا: جہاں تک سیدنا عثمان رضی اللہ عنہ کے خون کا تعلق ہے ، تو پھر یہ نہیں ہو گا ، تو سیدنا ابوجہم رضی اللہ عنہ نے کہا: اللہ کا واسطہ ہے ، اے ابن سمیہ ! اللہ کا واسطہ ہے ، تمہیں چند کوڑے لگائے گئے تو تمہیں ان کا بدلہ دیدیا جائے ، اور سیدنا عثمان رضی اللہ عنہ کے خون کا قصاص نہیں لیا جائے گا ۔ راوی کہتے ہیں : تو اس دن ہم بیعت کیے بغیر واپس چلے گئے ۔
یہ روایت امام طبرانی نے نقل کی ہے اور اس کے رجال کی توثیق کی گئی ہے ۔

عمیر رودی بیان کرتے ہیں : سیدنا علی رضی اللہ عنہ نے لوگوں کو خطبہ دیتے ہوئے ارشاد فرمایا : اے لوگو اگر جہنم میں صرف وہ شخص داخل ہو جس نے سیدنا عثمان رضی اللہ عنہ کو شہید کیا ہو ، تو میں جہنم میں داخل نہیں ہوں گا ( یعنی میں انہیں شہید کرنے والوں میں شامل نہیں ہوں ) اور اگر جنت میں صرف وہ شخص داخل ہو جس نے سیدنا عثمان رضی اللہ عنہ کو شہید کیا تھا ، تو میں اس میں داخل نہیں ہوؤں گا ( یعنی میں سیدنا عثمان رضی اللہ عنہ کے قاتلین میں شامل نہیں ہوں ) ۔ راوی بیان کرتے ہیں : جب وہ منبر سے نیچے اترے تو ان سے کہا: گیا آپ نے ایک ایسی بات کہہ دی ہے ، جس کی وجہ سے آپ کے ساتھی آپ کو چھوڑ کے جا سکتے ہیں ، تو سیدنا علی رضی اللہ عنہ نے انہیں خطبہ دیتے ہوئے ارشاد فرمایا : اے لوگو ! خبردار ! اللہ تعالیٰ نے سیدنا عثمان رضی اللہ عنہ کو شہید کروایا ہے ، اور میں ان کے ساتھ ہوں ۔ محمد بن سیرین بیان کرتے ہیں : یہ قریشیوں کا مخصوص انداز خطاب ہے ، جس میں دو پہلو پائے جاتے ہیں ۔ امام طبرانی کہتے ہیں : گویا سیدنا علی رضی اللہ عنہ کی مراد یہ تھی کہ اللہ تعالیٰ نے سیدنا عثمان رضی اللہ عنہ کو قتل کروایا ہے ، میں بھی ان کے ساتھ مارا گیا ہوں ۔
یہ روایت امام طبرانی نے نقل کی ہے ۔ اس کی سند میں ایک راوی مجالد ہے ، زیادہ تر حضرات نے اسے ضعیف قرار دیا ہے ، ایک راوی عمیر ہے ۔ میں اس سے واقف نہیں ہوں ۔ اس روایت کے بقیہ رجال ” صحیح “ کے رجال ہیں ۔

اسی سند کے ساتھ یہ بات منقول ہے : سیدنا علی رضی اللہ عنہ نے لوگوں کو خطبہ دیا ، تو لوگوں نے ان کا خطبہ درمیان میں رکوا دیا ، تو سیدنا علی رضی اللہ عنہ نے فرمایا : سیدنا عثمان رضی اللہ عنہ کی شہادت کے دن میں کمزور ہو گیا تھا ، پھر سیدنا علی رضی اللہ عنہ نے ان لوگوں کے سامنے مثال بیان کی کہ تین بیل ہوتے ہیں ، اور ایک شیر ہوتا ہے وہ ایک جگہ پر اکٹھے ہو جاتے ہیں ، ایک بیل کا رنگ سیاہ ہے ، ایک سرخ ہے اور ایک کا سفید ہے ، شیر جب بھی ان میں سے کسی ایک پر حملہ کرنے کا ارادہ کرتا ہے ، تو وہ تینوں شیر کے خلاف اکٹھے ہو جاتے ہیں ، اور اسے اپنے پاس آنے سے روک دیتے ہیں ، پھر شیر سیاہ اور سرخ بیل سے یہ کہتا ہے کہ ہمارے اس علاقے میں یہ والا سفید بیل ہمیں رسوائی کا شکار کر رہا ہے ، تم مجھے موقع دو میں اسے کھا لیتا ہوں ، کیونکہ میری اور تمہاری رنگت ایک جیسی ہے ، اور تم دونوں کی رنگت میری طرح کی ہے ، پھر وہ شیر اس پر حملہ کر کے اسے مار دیتا ہے اس کو مار دینے کے کچھ عرصہ بعد وہ سیاہ بیل سے کہتا ہے ، یہ سرخ بیل ہمارے اس علاقے میں ہمیں رسوائی اور شرمندگی کا شکار کر رہا ہے ، تم مجھے موقع دو کہ میں اسے کھا لوں کیونکہ میرا رنگ تمہارے رنگ کی مانند ہے ، تمہارا رنگ میرے رنگ کی مانند ہے ، پھر وہ دوسرے بیل پر حملہ کر کے اسے بھی مار دیتا ہے ، پھر وہ سیاہ بیل سے یہ کہتا ہے کہ اب میں تمہیں کھاؤں گا ، تو وہ سیاہ بیل کہتا ہے : تم مجھے موقع دو کہ میں تین مرتبہ بلند آواز میں پکار کر کچھ کہوں ، پھر وہ بیل کہتا ہے : خبردار ! میں اسی دن کھا لیا گیا تھا جس دن سفید بیل کو کھا لیا گیا تھا ، خبردار ! میں اسی دن کھا لیا گیا تھا ، جس دن سفید بیل کو کھا لیا گیا تھا ، خبردار ! میں اسی دن کھا لیا گیا تھا ، جس دن سفید بیل کو کھا لیا گیا تھا ، ( پھر سیدنا علی رضی اللہ عنہ نے فرمایا : ) خبردار ! میں اس دن کمزور ہو گیا تھا جس دن سیدنا عثمان رضی اللہ عنہ کو شہید کر دیا گیا تھا ۔
یہ روایت امام طبرانی نے اس سند کے ساتھ نقل کی ہے ، جو اس سے پہلے والی روایت کی سند ہے ۔

مغیرہ بیان کرتے ہیں : سیدنا جریر رضی اللہ عنہ سیدنا عدی بن حاتم رضی اللہ عنہ اور سیدنا حنظلہ کاتب رضی اللہ عنہ کوفہ سے نکل کر قرقیسیا کی طرف چلے گئے ۔ انہوں نے کہا: ہم ایسے شہر میں مقیم نہیں رہیں گے جہاں سیدنا عثمان رضی اللہ عنہ کو برا کہا: جاتا ہو ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ، البتہ مغیرہ نامی راوی نے صحابہ کرام سے سماع نہیں کیا ہے ۔

یحیی بن بکیر بیان کرتے ہیں : ( سیدنا عمر رضی اللہ عنہ کی شہادت کے بعد ) شوریٰ کے لوگ سیدنا عثمان رضی اللہ عنہ کے انتخاب پر متفق ہوئے تھے ، یہ اس وقت کی بات ہے جب ذوالحج کے تین دن باقی رہ گئے تھے اور یہ سن 23 ہجری کی بات ہے جبکہ سیدنا عثمان غنی رضی اللہ عنہ کو جمعہ کے دن 18 ذوالحج سن 35 ہجری میں 88 برس کی عمر میں شہید کیا گیا ، وہ اپنی داڑھی پر زرد خضاب لگاتے تھے ۔ سیدنا عثمان رضی اللہ عنہ کی خلافت بارہ سال رہی تھی ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

قتادہ بیان کرتے ہیں : سیدنا عثمان غنی رضی اللہ عنہ کو شہید کیا گیا ، اس وقت ان کی عمر نوے سال یا شاید اٹھاسی سال تھی ۔
یہ روایت امام أحمد اور امام طبرانی نے نقل کی ہے ، اور قتادہ تک اس کے رجال ثقہ ہیں ۔

سیدنا مسور بن مخرمہ رضی اللہ عنہ بیان کرتے ہیں : سیدنا عثمان رضی اللہ عنہ کی خلافت بارہ سال تک رہی تھی ۔
یہ روایت امام طبرانی نے نقل کی ہے ، اور اس کی سند حسن ہے ۔