مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : میں نبی اکرم صلی اللہ علیہ وسلم کے ساتھ تھا اسی دوران ایک شخص نبی اکرم صلی اللہ علیہ وسلم کے پاس آیا ۔ نبی اکرم صلی اللہ علیہ وسلم نے اس کے ساتھ مصافحہ کیا ، نبی اکرم صلی اللہ علیہ وسلم کسی شخص کے ہاتھ سے اپنا ہاتھ خود پیچھے نہیں کرتے تھے ، یہاں تک کہ وہ دوسرا شخص خود ہی اپنا ہاتھ پیچھے کرتا تھا ، پھر اس شخص نے نبی اکرم صلی اللہ علیہ وسلم کی خدمت میں عرض کی : یا رسول اللہ ! سیدنا عثمان رضی اللہ عنہ آئے ہیں : نبی اکرم صلی اللہ علیہ وسلم نے فرمایا : وہ اہل جنت سے تعلق رکھنے والا ایک فرد ہے ۔
یہ روایت امام طبرانی نے معجم اوسط اور معجم کبیر میں نقل کی ہے اور اس کی سند حسن ہے ۔

سیدنا جابر بن عبداللہ رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” عثمان جنت میں جائے گا ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی اسماعیل بن یحیی تیمی ہے ، اور وہ کذاب ہے ۔

سیدنا عبداللہ بن عباس رضی اللہ عنہما بیان کرتے ہیں : سیدہ ام کلثوم رضی اللہ عنہا نبی اکرم صلی اللہ علیہ وسلم کی خدمت میں حاضر ہوئیں ۔ انہوں نے عرض کی : یا رسول اللہ ! فاطمہ کے شوہر میرے شوہر سے بہتر ہیں ، تو نبی اکرم صلی اللہ علیہ وسلم خاموش رہے ، پھر آپ نے ارشاد فرمایا : ” تمہارا شوہر وہ ہے کہ اللہ اور اس کا رسول اس سے محبت رکھتے ہیں ، اور وہ اللہ اور اس کے رسول سے محبت رکھتا ہے ، اور میں تمہیں ایک مزید بات بتاؤں ، اگر تم جنت میں داخل ہو اور اس کی رہائش کو دیکھ لو ، تو تم میرے اصحاب میں سے کسی ایک شخص کو نہیں دیکھو گی ، جس کی رہائش اس کی رہائش سے بلند ہو ۔ “
یہ روایت امام طبرانی نے معجم اوسط میں نقل کی ہے ۔ اس کے رجال کی توثیق کی گئی ہے ، اور اس کے رجال کے بارے میں اختلاف پایا جاتا ہے ۔

عبیداللہ بن عدی بن خیار بیان کرتے ہیں : سیدنا عثمان غنی رضی اللہ عنہ نے ان سے فرمایا : اے میرے بھتیجے ! تم نے نبی اکرم صلی اللہ علیہ وسلم کا زمانہ پایا ہے ؟ انہوں نے جواب دیا : جی نہیں ! تاہم یہ ہے کہ نبی اکرم صلی اللہ علیہ وسلم کا علم اور یقین مجھ تک اسی طرح خالص طور پر پہنچا ہے ، جس طرح وہ کسی پردہ دار خاتون تک پردے میں پہنچے گا ، تو سیدنا عثمان غنی رضی اللہ عنہ نے فرمایا : تم کلمہ شہادت پڑھو ، پھر انہوں نے فرمایا : امابعد ! بے شک اللہ تعالیٰ نے سیدنا محمد ( صلی اللہ علیہ وسلم ) کو حق کے ہمراہ مبعوث کیا اور میں ان افراد میں سے ایک تھا جنہوں نے اللہ اور اس کے رسول کے حکم کو قبول کیا ، نبی اکرم صلی اللہ علیہ وسلم جس چیز کے ہمراہ مبعوث ہوئے تھے ، میں اس پر ایمان لایا ، میں نے دو مرتبہ ہجرت کی ، جس طرح میں نے بیان کیا ہے ، اور مجھے نبی اکرم صلی اللہ علیہ وسلم کی دامادی کا شرف حاصل ہے ، میں نے نبی اکرم صلی اللہ علیہ وسلم کی بیعت حاصل کی ، اللہ کی قسم ! نہ میں نے نبی اکرم صلی اللہ علیہ وسلم کی کبھی نافرمانی کی اور نہ ہی آپ کو کبھی دھوکہ دیا ، یہاں تک کہ اللہ تعالیٰ نے نبی اکرم صلی اللہ علیہ وسلم کو وفات دے دی ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔