مجمع الزوائد ومنبع الفوائد

سیدنا عبدالرحمن بن عثمان قرشی رضی اللہ عنہ بیان کرتے ہیں : نبی اکرم صلی اللہ علیہ وسلم اپنی صاحبزادی کے پاس تشریف لائے جو سیدنا عثمان رضی اللہ عنہ کے سر کو دھو رہی تھیں ، تو نبی اکرم صلی اللہ علیہ وسلم نے فرمایا : اے میری بیٹی ! ابوعبداللہ کے ساتھ اچھا سلوک کرنا ، کیونکہ یہ میرے اصحاب میں اخلاق کے اعتبار سے مجھ سے سب سے زیادہ مشابہت رکھتا ہے ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم اپنی صاحبزادی سیدہ رقیہ رضی اللہ عنہا کے ہاں تشریف لے گئے جو سیدنا عثمان رضی اللہ عنہ کی اہلیہ تھیں ، انہوں نے عرض کی : ابھی سیدنا عثمان رضی اللہ عنہ میرے پاس سے گئے ہیں ، میں نے ان کے سر میں کنگھی کی تھی ، نبی اکرم صلی اللہ علیہ وسلم نے دریافت کیا : تم نے ابوعبداللہ کو کیسا پایا ہے ، اس خاتون نے جواب دیا : وہ بہت اچھے ہیں : نبی اکرم صلی اللہ علیہ وسلم نے فرمایا : تم اس کا احترام کرنا کیونکہ وہ اخلاق کے اعتبار سے میرے اصحاب میں سے مجھ سے سب سے زیادہ مشابہت رکھتا ہے ۔
یہ روایت امام طبرانی نے نقل کی ہے ۔ اس کی سند میں ایک راوی محمد بن عبداللہ ہے ، جس نے مطلب سے روایت نقل کی ہے ، اور میں اس سے واقف نہیں ہوں ۔ اس روایت کے بقیہ رجال ثقہ ہیں ۔