مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں : ایک مرتبہ میرے سامنے نبی اکرم صلی اللہ علیہ وسلم اور سیدنا ابوبکر رضی اللہ عنہ اپنی پیدائش کا تذکرہ کر رہے تھے ، تو نبی اکرم صلی اللہ علیہ وسلم کی عمر سیدنا ابوبکر رضی اللہ عنہ سے زیادہ تھی ، جب نبی اکرم صلی اللہ علیہ وسلم کا وصال ہوا تو اس وقت آپ کی عمر شریف تریسٹھ برس تھی جب سیدنا ابوبکر رضی اللہ عنہ کا انتقال ہوا تو وہ بھی تریسٹھ سال کے تھے اور وہ یعنی سیدنا ابوبکر رضی اللہ عنہ نبی اکرم صلی اللہ علیہ وسلم کے بعد اڑھائی برس زندہ رہے تھے ۔ ( علامہ ہیثمی فرماتے ہیں : ) میں یہ کہتا ہوں ” صحیح “ میں اس میں سے صرف یہ حصہ مذکور ہے کہ سیدنا ابوبکر رضی اللہ عنہ کا انتقال تریسٹھ سال کی عمر میں ہوا تھا ۔
یہ روایت امام طبرانی نے نقل کی ہے ، اور اس کی سند حسن ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کا وصال پینسٹھ سال کی عمر میں ہوا تھا اور سیدنا ابوبکر رضی اللہ عنہ کی عمر بھی اتنی ہی تھی ۔ ( علامہ ہیثمی فرماتے ہیں : ) میں یہ کہتا ہوں
یہ روایت صحیح میں مذکور ہے ، تاہم اس میں یہ الفاظ نہیں ہیں : ” سیدنا ابوبکر رضی اللہ عنہ کی عمر بھی اتنی ہی تھی ۔ “
یہ روایت امام طبرانی نے نقل کی ہے ، اور اس کی سند حسن ہے ۔

سعید بن مسیب بیان کرتے ہیں : جب سیدنا ابوبکر صدیق رضی اللہ عنہ کا انتقال ہوا تو ان کی عمر تریسٹھ سال تھی ، انہیں رات کے وقت دفن کیا گیا ، سیدنا عمر رضی اللہ عنہ نے ان کی نماز جنازہ پڑھائی ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں : سیدنا ابوبکر رضی اللہ عنہ کا انتقال منگل کی رات ہوا تھا اور انہیں رات کے وقت دفن کر دیا گیا ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ۔

ہیثم بن عمران بیان کرتے ہیں : میں نے اپنے دادا کو یہ بیان کرتے ہوئے سنا ہے : ” سیدنا ابوبکر صدیق رضی اللہ عنہ کا جب انتقال ہوا تھا ، تو انہیں کسی حد تک ’ سل ، کی بیماری کی شکایت تھی ، وہ اڑھائی سال تک خلیفہ رہے تھے ۔ “
یہ روایت امام طبرانی نے نقل کی ہے ، اور اس کے رجال ثقہ ہیں ۔

زبیر بن بکار بیان کرتے ہیں : سیدنا ابوبکر رضی اللہ عنہ کو اسی دن خلیفہ منتخب کر لیا گیا ، جس دن نبی اکرم صلی اللہ علیہ وسلم کا وصال ہوا تھا اور سیدنا ابوبکر رضی اللہ عنہ بھی ان کا انتقال جمادی الاول کے مہینے میں تیرہ ہجری میں ہوا تھا ۔ اس کے بعد راوی نے پوری روایت ذکر کی ہے ۔
یہ روایت امام طبرانی نے نقل کی ہے اور اس کے رجال ثقہ ہیں ۔