مجمع الزوائد ومنبع الفوائد

سیدنا نافع بن عبدالحارث رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ نکلا ، آپ ایک باغ میں تشریف لائے ، آپ نے فرمایا : تم دروازے کا خیال رکھنا ، نبی اکرم صلی اللہ علیہ وسلم اندر تشریف لے آئے ، آپ کنویں کے منڈیر پر بیٹھ گئے اور آپ نے اپنی دونوں ٹانگیں کنویں میں لٹکا لیں ، دروازے پر دستک ہوئی ، میں نے دریافت کیا : کون ہے ؟ ان صاحب نے بتایا : ابوبکر ، میں نے عرض کی : یا رسول اللہ ! سیدنا ابوبکر رضی اللہ عنہ آئے ہیں : نبی اکرم صلی اللہ علیہ وسلم نے فرمایا : اسے اجازت دو اور اسے خوشخبری دے دو ۔ راوی کہتے ہیں : یعنی جنت کی خوشخبری دے دو ۔ راوی کہتے ہیں : میں نے انہیں اجازت دی اور میں نے انہیں جنت کی خوشخبری دی ، راوی بیان کرتے ہیں : وہ اندر آئے اور نبی اکرم صلی اللہ علیہ وسلم کے ساتھ منڈیر پر بیٹھ گئے ۔ انہوں نے بھی اپنی ٹانگیں کنویں میں لٹکا لیں ، پھر دروازے پر دستک ہوئی ، میں نے دریافت کیا : کون ہے ؟ تو ان صاحب نے کہا: عمر ، میں نے عرض کی : یا رسول اللہ ! سیدنا عمر رضی اللہ عنہ آئے ہیں : نبی اکرم صلی اللہ علیہ وسلم نے فرمایا : تم اُسے اجازت دو اور اسے جنت کی خوشخبری دو ۔ راوی کہتے ہیں : میں نے انہیں اجازت دی اور انہیں جنت کی خوشخبری دی ، راوی بیان کرتے ہیں : وہ بھی اندر آئے اور نبی اکرم صلی اللہ علیہ وسلم کے ساتھ منڈیر پر بیٹھ گئے ۔ انہوں نے بھی اپنی دونوں ٹانگیں کنویں میں لٹکا لیں ، راوی کہتے ہیں : پھر دروازے پر دستک ہوئی ، میں نے دریافت کیا : کون ہے ؟ انہوں نے بتایا : عثمان ، میں نے عرض کی : یا رسول اللہ ! سیدنا عثمان رضی اللہ عنہ آئے ہیں : نبی اکرم صلی اللہ علیہ وسلم نے فرمایا : تم اسے اجازت دو ، اسے جنت کی خوشخبری دے دو اور اسے ایک آزمائش کا سامنا بھی ہو گا ، میں نے انہیں اندر آنے کی اجازت دی ، انہیں جنت کی خوشخبری دی وہ بھی نبی اکرم صلی اللہ علیہ وسلم کے ساتھ منڈیر پر بیٹھ گئے اور انہوں نے بھی دونوں ٹانگیں کنویں میں لٹکا لیں ۔ “ ( علامہ ہیثمی ) فرماتے ہیں : میں یہ کہتا ہوں ، امام ابوداؤد نے اس روایت کا کچھ حصہ نقل کیا ہے ۔
یہ روایت امام أحمد نے نقل کی ہے ، اور امام طبرانی نے معجم اوسط میں اختصار کے ساتھ نقل کی ہے ، امام أحمد کے رجال ” صحیح “ کے رجال ہیں ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم اسواف کے مقام پر ٹھہرے ، آپ کے ساتھ سیدنا بلال رضی اللہ عنہ تھے ، نبی اکرم صلی اللہ علیہ وسلم نے دونوں ٹانگیں کنویں میں لٹکا لیں اور زانوں سے کپڑا ہٹا لیا ، سیدنا ابوبکر رضی اللہ عنہ آئے اور انہوں نے اجازت مانگی ، نبی اکرم صلی اللہ علیہ وسلم نے فرمایا : اے بلال ! تم اسے اجازت دو اور تم اسے جنت کی خوشخبری دو ، سیدنا ابوبکر رضی اللہ عنہ اندر آئے اور وہ نبی اکرم صلی اللہ علیہ وسلم کے دائیں طرف آ کے بیٹھ گئے ۔ انہوں نے بھی ٹانگیں کنویں میں لٹکا لیں اور زانوں سے کپڑا ہٹا لیا ، پھر سیدنا عمر رضی اللہ عنہ آئے ، انہوں نے اجازت مانگی ، تو نبی اکرم صلی اللہ علیہ وسلم نے فرمایا : اے بلال ! اسے اجازت دے دو اور اسے جنت کی خوشخبری دے دو ، وہ اندر آئے اور انہوں نے بھی کنویں میں ٹانگیں لٹکا لیں اور زانوں سے کپڑا ہٹا لیا ، پھر سیدنا عثمان رضی اللہ عنہ آئے اور انہوں نے اجازت مانگی ، نبی اکرم صلی اللہ علیہ وسلم نے فرمایا : اسے اجازت دو اور اسے جنت کی خوشخبری دے دو اور اسے یہ بتانا کہ اُسے ایک آزمائش کا سامنا کرنا ہو گا ۔ سیدنا عثمان رضی اللہ عنہ آئے اور نبی اکرم صلی اللہ علیہ وسلم کے مدمقابل بیٹھ گئے ۔ انہوں نے بھی دونوں ٹانگیں کنویں میں لٹکا لیں اور زانوں سے کپڑا ہٹا لیا ۔ “
یہ روایت امام طبرانی نے معجم اوسط میں نقل کی ہے ، اور اس کے رجال ” صحیح “ کے رجال ہیں ، صرف امام طبرانی کے استاد علی بن سعید کا معاملہ مختلف ہے ، اور وہ حسن الحدیث ہے ۔

سیدنا جابر بن عبداللہ رضی اللہ عنہما بیان کرتے ہیں : نبی اکرم صلی اللہ علیہ وسلم سیدنا سعد بن ربیع انصاری رضی اللہ عنہ سے ملنے کے لئے تشریف لے گئے ۔ ان کا گھر اسواف میں تھا ، ان کی اہلیہ نے کھجور کے درختوں کے جھنڈ کے نیچے نبی اکرم صلی اللہ علیہ وسلم کے لئے بچھونا بچھایا ، نبی اکرم صلی اللہ علیہ وسلم تشریف فرما ہوئے ، آپ کے ساتھ ہم بھی بیٹھ گئے ، نبی اکرم صلی اللہ علیہ وسلم نے ارشاد فرمایا : ابھی تمہارے سامنے اہل جنت سے تعلق رکھنے والا ایک شخص آئے گا ، تو سیدنا ابوبکر رضی اللہ عنہ آ گئے ، پھر نبی اکرم صلی اللہ علیہ وسلم نے ارشاد فرمایا : اہل جنت سے تعلق رکھنے والا ایک شخص تمہارے سامنے آئے گا ، تو سیدنا عمر رضی اللہ عنہ آ گئے ، پھر نبی اکرم صلی اللہ علیہ وسلم نے ارشاد فرمایا : اہل جنت سے تعلق رکھنے والا ایک شخص تمہارے سامنے آئے گا ، تو سیدنا عثمان رضی اللہ عنہ آ گئے ۔
یہ روایت امام طبرانی نے معجم اوسط میں نقل کی ہے ۔ اس کے رجال کی توثیق کی گئی ہے اس کے بعض راویوں کے بارے میں اختلاف پایا جاتا ہے ۔

سیدنا جابر بن عبداللہ رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : درختوں کے اس جھنڈ کے نیچے سے ایک شخص تمہارے سامنے آئے گا جو جنتی ہو گا ، راوی کہتے ہیں : تو سیدنا ابوبکر رضی اللہ عنہ سامنے آئے ، ہم نے نبی اکرم صلی اللہ علیہ وسلم کے ارشاد کے مطابق انہیں مبارک باد دی ، پھر کچھ دیر گزری تو نبی اکرم صلی اللہ علیہ وسلم نے ارشاد فرمایا : اس جھنڈ کے نیچے سے ایک شخص تمہارے سامنے آئے گا ، وہ جنتی ہو گا ، تو سیدنا عمر رضی اللہ عنہ سامنے آئے ، نبی اکرم صلی اللہ علیہ وسلم کے ارشاد کے بموجب ہم نے انہیں مبارک باد دی ، پھر نبی اکرم صلی اللہ علیہ وسلم نے ارشاد فرمایا : اس جھنڈ کے نیچے سے ایک شخص تمہارے سامنے آئے گا جو جنتی ہو گا ، اے اللہ ! اگر تو چاہے ، تو اسے علی بنا دے ، یہ بات آپ نے تین مرتبہ ارشاد فرمائی ، راوی کہتے ہیں : تو سیدنا علی رضی اللہ عنہ سامنے آئے ۔

ایک روایت میں یہ الفاظ ہیں : ” اے اللہ ! تو اسے علی بنا دے ۔ “ ( یعنی اللہ کرے کہ وہ علی ہو ) ۔

ایک روایت میں یہ الفاظ ہیں : میں نبی اکرم صلی اللہ علیہ وسلم کے ساتھ چل کر انصار سے تعلق رکھنے والی ایک خاتون کی طرف گیا ، اس نے نبی اکرم صلی اللہ علیہ وسلم کے لئے بکری ذبح کی ۔ ۔ ۔ ۔ ۔ ۔ ۔ اس کے بعد راوی نے حسب سابق حدیث ذکر کی ہے ۔
یہ روایت امام أحمد نے نقل کی ہے ، امام طبرانی نے معجم اوسط میں اس کی مانند نقل کی ہے ، امام بزار نے اسے اختصار کے ساتھ نقل کیا ہے ، امام أحمد کی مختلف اسانید میں سے ایک کے رجال کی توثیق کی گئی ہے ۔

سیدنا ابومسعود رضی اللہ عنہ بیان کرتے ہیں : نبی اکرم صلی اللہ علیہ وسلم ایک دن ایک باغ میں تشریف لے گئے ، پھر آپ نے فرمایا : ابھی تمہارے پاس اہل جنت سے تعلق رکھنے والا ایک شخص آئے گا ، تو سیدنا ابوبکر رضی اللہ عنہ تشریف لے آئے ، پھر نبی اکرم صلی اللہ علیہ وسلم نے ارشاد فرمایا : ابھی تم لوگوں کے پاس اہل جنت سے تعلق رکھنے والا ایک شخص آئے گا ، تو سیدنا عمر بن خطاب رضی اللہ عنہ تشریف لے آئے ، پھر نبی اکرم صلی اللہ علیہ وسلم نے ارشاد فرمایا : ابھی تم لوگوں کے پاس اہل جنت سے تعلق رکھنے والا ایک شخص آئے گا ، اے اللہ ! تو اسے علی بنا دے ، تو سیدنا علی رضی اللہ عنہ تشریف لے آئے ۔
یہ روایت امام طبرانی نے نقل کی ہے ۔ اس کی سند میں ایک راوی سعید بن عبدالکریم ہے ، اور وہ متروک ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جنت میں ایک درخت ہے “ یہاں ابن جمیل نامی راوی کو یہ شک ہے شاید یہ الفاظ ہیں : جنت میں جو بھی درخت موجود ہیں اُن کے ہر پتے پر لکھا ہوا ہے ، اللہ تعالیٰ کے علاوہ اور کوئی معبود نہیں ہے ، سیدنا محمد اللہ کے رسول ہیں ، ابوبکر صدیق عمر فاروق عثمان ذوالنورین ۔ “
یہ روایت امام طبرانی نے نقل کی ہے ۔ اس کی سند میں ایک راوی علی بن جمیل رقی ہے ، اور وہ ضعیف ہے ۔

سیدنا علی رضی اللہ عنہ روایت کرتے ہیں : غزوہ بدر کے دن نبی اکرم صلی اللہ علیہ وسلم نے مجھ سے اور سیدنا ابوبکر رضی اللہ عنہ سے ارشاد فرمایا : ” تم دونوں میں سے ایک کے ساتھ جبرائیل ہے ، اور دوسرے کے ساتھ میکائیل ہے ، اور اسرافیل جو ایک بڑا فرشتہ ہے ، وہ جنگ میں شریک ہے ( راوی کو شک ہے شاید یہ الفاظ ہیں ) وہ صف میں موجود ہے ۔ “
یہ روایت امام ابویعلیٰ اور امام بزار نے نقل کی ہے ، امام أحمد نے اس کی مانند نقل کی ہے امام أحمد اور امام بزار کے رجال ” صحیح “ کے رجال ہیں ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم کی حیات مبارکہ میں ہم لوگ یہ کہا: کرتے تھے کہ اس امت میں نبی اکرم صلی اللہ علیہ وسلم کے بعد سب سے زیادہ فضیلت رکھنے والے فرد سیدنا ابوبکر ، سیدنا عمر اور سیدنا عثمان رضی اللہ عنہم ہیں : نبی اکرم صلی اللہ علیہ وسلم یہ بات سنتے تھے اور آپ اس کا انکار نہیں کرتے تھے ، ہمارے علم کے مطابق سیدنا عثمان رضی اللہ عنہ نے کسی کبیرہ گناہ کا ارتکاب نہیں کیا ، کسی جان کو ناحق طور پر قتل نہیں کیا ، اصل معاملہ صرف اس مال کا ہے کہ اگر وہ یہ مال تمہیں دے دیتے ، تو تم نے راضی ہونا تھا اور اگر وہ قریش کو دے دیں تو تم ناراض ہو جاتے ہو ، تم لوگ یہ چاہتے ہو کہ تم لوگ اہل فارس اور اہل روم کی طرح ہو جاؤ ، کہ جنہوں نے اپنے کسی بھی امیر کو نہیں چھوڑا ، اسے قتل کروا دیا ۔ ( علامہ ہیثمی فرماتے ہیں : ) میں یہ کہتا ہوں صحیح میں اس روایت کا ابتدائی حصہ مذکور ہے ۔
یہ روایت امام طبرانی نے معجم اوسط میں نقل کی ہے ، اور معجم کبیر میں اس کی مانند روایت اختصار کے ساتھ نقل کی ہے ، تاہم انہوں نے یہ الفاظ نقل کیے ہیں : ” سیدنا ابوبکر ، سیدنا عمر اور سیدنا عثمان رضی اللہ عنہم ( اس امت میں افضل ہیں ) اور پھر سب لوگ برابر کی حیثیت رکھتے ہیں : نبی اکرم صلی اللہ علیہ وسلم کو اس بات کی اطلاع ملی تو آپ نے اس حوالے سے ہم پر انکار نہیں کیا ۔ “ امام ابویعلیٰ نے امام طبرانی کی معجم کی نقل کردہ روایت کی مانند روایت نقل کی ہے ۔ اس کے رجال کی توثیق کی گئی ہے اور ان میں اختلاف پایا جاتا ہے ۔

سیدنا عبداللہ بن عمر رضی اللہ عنہما بیان کرتے ہیں : ایک دن سورج نکلنے کے بعد صبح کے وقت نبی اکرم صلی اللہ علیہ وسلم ہمارے پاس تشریف لائے ، آپ صلی اللہ علیہ وسلم نے ارشاد فرمایا : ” صبح صادق سے کچھ پہلے میں نے دیکھا کہ جیسے مجھے مقالید اور موازین عطا کیے گئے ہیں ، جہاں تک مقالید کا سوال ہے ، تو اس سے مراد چابیاں ہیں ، اور جہاں تک موازین کا معاملہ ہے ، تو اس سے مراد وہ چیز ہے ، جس کے ذریعے وزن کیا جاتا ہے ، تو مجھے ایک پلڑے میں رکھا گیا اور میری امت کو دوسرے پلڑے میں رکھا گیا ، تو میں ان سب سے زیادہ وزنی تھا اور میرا پلڑا بھاری ہو گیا ، پھر ابوبکر کو لایا گیا ، اور اس کا وزن ان لوگوں کے ساتھ کیا گیا تو وہ وزنی تھا ، پھر عمر کو لایا گیا اور اس کا وزن ان لوگوں کے ساتھ کیا گیا ، تو وہ وزنی تھا ، پھر عثمان کو لایا گیا ، اس کا وزن ان لوگوں کے ساتھ کیا گیا پھر اس ترازو کو اٹھا لیا گیا ۔ “
یہ روایت امام أحمد اور امام طبرانی نے نقل کی ہے ، تاہم اس میں یہ الفاظ ہیں : ” وہ ان سب سے زیادہ وزنی تھا “ تمام روایت میں یہی الفاظ ہیں ، اور اس میں یہ الفاظ بھی ہیں : ” پھر عثمان کو لایا گیا اسے ایک پلڑے میں رکھا گیا ، اور میری امت کو دوسرے پلڑے میں رکھا گیا ، تو عثمان ان سب سے وزنی تھا پھر وہ پلڑا اٹھا لیا گیا ۔ “ اس روایت کے رجال ثقہ ہیں ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں جنت میں داخل ہوا تو میں نے اپنے آگے کسی کی آہٹ سنی ، میں نے دریافت کیا : کون ہے ؟ لوگوں نے بتایا : یہ بلال ہیں ، میں گیا ، تو اہل جنت میں اکثریت مہاجرین کے غریب لوگوں اور مسلمانوں کے بچوں کی تھی اور میں نے وہاں سب سے زیادہ کم تعداد خوشحال لوگوں اور خواتین کی پائی ، مجھ سے کہا: گیا کہ جہاں تک خوشحال لوگوں کا تعلق ہے ، تو انہیں وہاں روک لیا گیا ہے ، اور ان سے حساب لیا جائے گا ، اور تفتیش کی جائے گی ، اور جہاں تک خواتین کا تعلق ہے تو دو سرخ چیزوں یعنی سونے اور ریشم نے انہیں غافل کر دیا ، نبی اکرم صلی اللہ علیہ وسلم نے ارشاد فرمایا : پھر ہم جنت کے آٹھ دروازوں میں سے ایک دروازے سے نکلے ، جب میں دروازے کے پاس پہنچا تو میرے پاس ایک ترازو لایا گیا ، جس کے ایک پلڑے میں مجھے رکھا گیا ، اور دوسرے پلڑے میں میری امت کو رکھا گیا ، تو میں ان سب سے وزنی تھا ، پھر ابوبکر کو لایا گیا ، اور اسے ایک پلڑے میں رکھا گیا ، اور میری پوری امت کو لا کر دوسرے پلڑے میں رکھا گیا ، تو ابوبکر وزنی تھا ، پھر عمر کو لایا گیا ، اسے ایک پلڑے میں رکھا گیا ، اور میری پوری امت کو لایا گیا ، اور ان لوگوں کو رکھا گیا ، تو عمر والا پلڑا وزنی تھا ، پھر میرے سامنے میری امت کے ایک ایک فرد کو پیش کیا گیا ، وہ لوگ گزرتے رہے ، عبدالرحمن بن عوف رضی اللہ عنہ کے آنے میں تاخیر ہو گئی ، وہ کچھ دیر کے بعد آیا ، میں نے کہا: عبدالرحمن ( کیا ہوا ؟ ) تو اس نے جواب دیا : یا رسول اللہ ! میرے ماں باپ آپ پر قربان ہوں ۔ اس ذات کی قسم ! جس نے آپ کو حق کے ہمراہ مبعوث کیا ہے ، میں آپ کے پاس اس وقت پہنچ پایا ہوں جب میں یہ گمان کر چکا تھا کہ میں کبھی بھی آپ کے پاس نہیں پہنچ سکوں گا ، صرف اس صورت میں پہنچ سکوں گا ، جب بوڑھا ہو جاؤں گا ، نبی اکرم صلی اللہ علیہ وسلم نے دریافت کیا : اس کی وجہ کیا تھی ؟ انہوں نے بتایا : میرے مال کی کثرت ( وجہ تھی ) مجھ سے حساب لیا جا رہا تھا اور تفتیش کی جا رہی تھی ۔ “
یہ روایت امام أحمد نے نقل کی ہے ، امام طبرانی نے اس کی مانند روایت اختصار کے ساتھ نقل کی ہے ، ان دونوں کی روایات کی سند میں ایک راوی مطرح بن زیاد ہے ، اور ایک راوی علی بن یزید الہانی ، ان دونوں کے ضعیف ہونے پر اتفاق پایا جاتا ہے ، اور جو بات اس روایت کے ضعیف ہونے پر دلالت کرتی ہے وہ یہ ہے کہ سیدنا عبدالرحمن بن عوف رضی اللہ عنہ کا شمار غزوہ بدر اور غزوہ حدیبیہ میں شرکت کرنے والے افراد میں ہوتا ہے ، وہ عشرہ مبشرہ میں سے ایک ہیں ، اور فضیلت رکھنے والے صحابہ میں سے ہیں ، باقی ہر طرح کی حمد اللہ تعالیٰ کے لئے مخصوص ہے ۔

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں نے خواب میں دیکھا کہ مجھے ایک پلڑے میں رکھا گیا ، اور میری امت کو ایک پلڑے میں رکھا گیا ، تو میرا پلڑا وزنی تھا ، پھر ابوبکر کو ایک پلڑے میں رکھا گیا ، اور میری امت کو دوسرے پلڑے میں رکھا گیا ، تو ابوبکر ان سے وزنی تھا ، پھر عمر کو ایک پلڑے میں رکھا گیا ، اور میری امت کو دوسرے پلڑے میں رکھا گیا ، تو وہ ان سے وزنی تھا ، پھر عثمان کو ایک پلڑے میں رکھا گیا ، اور میری امت کو دوسرے پلڑے میں رکھا گیا ، تو وہ ان سے وزنی تھا ، پھر میزان کو اٹھا لیا گیا ۔ “
یہ روایت امام طبرانی نے نقل کی ہے ۔ اس کی سند میں ایک راوی عمرو بن واقد ہے ، اور وہ متروک ہے ، جسے جمہور نے ضعیف قرار دیا ہے ، محمد بن مبارک صوری بیان کرتے ہیں : وہ صدوق تھا اس روایت کے بقیہ رجال ثقہ ہیں ۔

سیدنا عرفجہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں فجر کی نماز پڑھائی ، پھر آپ نے ارشاد فرمایا : ” گزشتہ رات میرے اصحاب کا وزن کیا گیا ، ابوبکر کا وزن کیا گیا ، تو وہ وزنی تھا ، عمر کا وزن کیا گیا ، تو وہ وزنی تھا پھر عثمان کا وزن کیا گیا ، تو وہ وزنی تھا ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبدالاعلیٰ بن ابومساور ہے ، اور وہ متروک ہے ، ایک روایت کے مطابق یحیی بن معین نے اسے ثقہ قرار دیا ہے ، اور دیگر روایات کے مطابق انہوں نے اسے ضعیف کہا: ہے ۔

سیدنا اسامہ بن شریک رضی اللہ عنہ روایت کرتے ہیں : ایک دن نبی اکرم صلی اللہ علیہ وسلم نے ارشاد فرمایا : ” گزشتہ رات میرے اصحاب کا وزن کیا گیا ، ابوبکر کا وزن کیا گیا پھر عمر کا وزن کیا گیا پھر عثمان کا وزن کیا گیا ۔ “
یہ روایت امام طبرانی نے نقل کی ہے ، وہ کہتے ہیں : یزید بن ہارون نے اسے اس طرح نقل کیا ہے ، اور سدویہ نے اسے عبدالاعلیٰ بن ابومساور کے حوالے سے زیاد بن علاقہ کے حوالے سے قطبہ بن ملک کے حوالے سے سیدنا عرفجہ رضی اللہ عنہ سے نقل کیا ہے ۔ ( علامہ ہیثمی فرماتے ہیں : ) میں یہ کہتا ہوں ۔ اس روایت کی سند میں بھی ایک راوی عبدالاعلی بن ابومساور نامی راوی ہے ، جس کے ضعیف ہونے پر کلام اس حدیث سے پہلے گزر چکا ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کے اصحاب میں سب سے زیادہ عمر رسیدہ سیدنا ابوبکر صدیق رضی اللہ عنہ اور سیدنا سہل بن عمرو رضی اللہ عنہ تھے ۔
یہ روایت امام بزار نے نقل کی ہے ، اور اس کی سند حسن ہے ۔ ( علامہ ہیثمی فرماتے ہیں : ) میں یہ کہتا ہوں سیدنا ابوبکر رضی اللہ عنہ اور دیگر حضرات کی فضیلت کے بارے میں کچھ احادیث صحابہ کرام کی ایک جماعت کے مناقب سے متعلق باب میں آئیں گی ، جو عشرہ مبشرہ کی فضیلت کے بعد آئے گا ، اگر اللہ نے چاہا ۔