مجمع الزوائد ومنبع الفوائد

عروہ بن زبیر بیان کرتے ہیں : سیدنا ابوبکر بن صدیق رضی اللہ عنہ کا نام : عبداللہ بن عثمان بن عامر بن عمرو بن کعب بن سعد بن تیم بن مرہ بن لؤی تھا ۔ انہوں نے نبی اکرم صلی اللہ علیہ وسلم کے ساتھ غزوہ بدر میں شرکت کی ہے ۔ سیدنا ابوبکر رضی اللہ عنہ کی والدہ ام الخیر سلمہ بنت صخر بن عامر بن عمرو بن کعب بن سعد بن تیم بن مرہ بن لؤی بن غالب بن فہر بن مالک ہیں ، اور ام الخیر کی والدہ ” دلاف“ ہیں ، جن کا نام امیمہ بنت عبید بن ناقد خزاعی ہے ۔ سیدنا ابوبکر رضی اللہ عنہ کی دادی یعنی سیدنا ابوقحافہ رضی اللہ عنہ کی والدہ امینہ بنت عبدالعزیٰ بن حرثان بن عوف بن عبید بن عویج بن عدی بن کعب ہیں ۔
یہ روایت امام طبرانی نے نقل کی ہے ، اور اس کی سند حسن ہے ۔

سیدنا عبداللہ بن زبیر رضی اللہ عنہما بیان کرتے ہیں : نبی اکرم صلی اللہ علیہ وسلم نے سیدنا ابوبکر رضی اللہ عنہ کی طرف دیکھ کر یہ ارشاد فرمایا : ” یہ جہنم سے اللہ تعالیٰ کا آزاد کردہ شخص ہے ۔ “ ( راوی بیان کرتے ہیں : ) تو اس دن سے ان کا نام عتیق پڑ گیا اس سے پہلے ان کا نام عبداللہ بن عثمان تھا ۔
یہ روایت امام بزار نے نقل کی ہے ، اور امام طبرانی نے اس کی مانند نقل کی ہے ، اور ان دونوں کے رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں : اللہ کی قسم ! ایک دن میں اپنے گھر میں موجود تھی ، نبی اکرم صلی اللہ علیہ وسلم اور آپ کے اصحاب صحن میں موجود تھے ، میرے اور ان لوگوں کے درمیان پردہ حائل تھا ، اسی دوران سیدنا ابوبکر رضی اللہ عنہ تشریف لائے ، تو نبی اکرم صلی اللہ علیہ وسلم نے ارشاد فرمایا : ” جو شخص یہ چاہتا ہو کہ وہ جہنم سے آزاد شدہ کسی شخص کو دیکھے تو اسے ابوبکر کو دیکھ لینا چاہیے ۔ “ سیدہ عائشہ رضی اللہ عنہا بیان کرتی ہیں : ) سیدنا ابوبکر رضی اللہ عنہ کا وہ نام جو ان کے گھر والوں نے رکھا تھا وہ عبداللہ بن عثمان تھا ، لیکن پھر بعد میں ان کا نام عتیق مشہور ہو گیا ۔ ( علامہ ہیثمی فرماتے ہیں : ) میں یہ کہتا ہوں ۔ اس روایت کا کچھ حصہ امام ترمذی نے نقل کیا ہے ۔
یہ روایت امام ابویعلیٰ نے نقل کی ہے ۔ اس کی سند میں ایک راوی صالح بن موسیٰ طلحی ہے ، اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : سیدنا ابوبکر رضی اللہ عنہ کی والدہ سیدنا عثمان رضی اللہ عنہ کی والدہ سیدنا طلحہ رضی اللہ عنہ کی والدہ سیدنا زبیر رضی اللہ عنہ کی والدہ سیدنا عبدالرحمن بن عوف رضی اللہ عنہ کی والدہ اور سیدنا عمار بن یاسر رضی اللہ عنہ کی والدہ ( ان سب خواتین نے ) اسلام قبول کیا تھا ، سیدنا ابوبکر رضی اللہ عنہ کا نام عتیق بن عثمان رکھا گیا تھا ، کیونکہ ان کا چہرہ خوبصورت تھا ۔
یہ روایت امام طبرانی نے نقل کی ہے ۔ اس کی سند میں ایک راوی عبداللہ بن شبیب ہے ، اور وہ ضعیف ہے ۔

لیث بن سعد بیان کرتے ہیں : سیدنا ابوبکر رضی اللہ عنہ کا نام عتیق ان کے چہرے کی خوبصورتی کی وجہ سے رکھا گیا تھا ، ویسے ان کا نام عبداللہ بن عثمان تھا ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

قاسم بن محمد بیان کرتے ہیں : میں نے سیدہ عائشہ صدیقہ رضی اللہ عنہا سے سیدنا ابوبکر صدیق رضی اللہ عنہ کے نام کے بارے میں دریافت کیا ، تو انہوں نے جواب دیا : عبداللہ نے کہا: لوگ تو یہ کہتے ہیں ان کا نام تحقیق تھا ، تو سیدہ عائشہ رضی اللہ عنہا نے فرمایا : سیدنا ابوقحافہ رضی اللہ عنہ کے تین بیٹے تھے ۔ ان میں سے ایک کا نام انہوں نے عتیق رکھا تھا ایک کا معیتق رکھا اور ایک کا معتق رکھا تھا ۔
یہ روایت امام طبرانی نے نقل کی ہے ۔ اس کی سند میں ایک راوی قیس بن ابوقیس بخاری ہے ، اگر تو وہ ثقہ ہو ، تو پھر اس روایت کی سند حسن ہو گی ۔

ابوحفص عمرو بن علی کے بارے میں یہ بات منقول ہے : وہ فرماتے ہیں : سیدنا ابوبکر رضی اللہ عنہ کے چہرے پر گوشت کم تھا ، اور ان کا نام ” عتیق “ ان کے چہرے کی خوبصورتی کی وجہ سے رکھا گیا تھا ، ویسے ان کا نام عبداللہ بن عثمان تھا ۔
یہ روایت بھی نقل کی گئی ہے : نبی اکرم صلی اللہ علیہ وسلم نے ان کا نام ” عتیق “ یعنی جہنم سے آزاد شده شخص رکھا تھا ۔
یہ روایت امام طبرانی نے نقل کی ہے ، اور اس کی سند عمدہ اور حسن ہے ۔

حکیم بن سعد بیان کرتے ہیں : میں نے سیدنا علی رضی اللہ عنہ کو حلف اٹھا کر یہ کہتے ہوئے سنا : ” اللہ تعالیٰ نے آسمان سے سیدنا ابوبکر رضی اللہ عنہ کا نام ” صدیق “ نازل کیا تھا ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مجھے آسمان دنیا کی طرف معراج کروائی گئی ، میں جس بھی آسمان کے پاس سے گزرا وہاں میں نے اپنا نام ” محمد رسول اللہ “ پایا ، اور میرے پیچھے ابوبکر صدیق رضی اللہ عنہ ( کا نام ) تھا ۔ “
یہ روایت امام ابویعلیٰ نے اور امام طبرانی نے معجم اوسط میں نقل کی ہے ۔ اس کی سند میں ایک راوی عبداللہ بن ابراہیم غفاری ہے اور وہ ضعیف ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب مجھے آسمان کی طرف معراج کروائی گئی ، تو میں جس بھی آسمان سے گزرا وہاں میں نے اپنا نام یہ لکھا ہوا پایا ” محمد اللہ کے رسول ہیں “ ( اور ساتھ یہ لکھا ہوا تھا ) ” ابوبکر صدیق ۔ “
یہ روایت امام بزار نے نقل کی ہے ۔ اس کی سند میں ایک راوی عبداللہ بن ابراہیم غفاری ہے ، اور وہ ضعیف ہے ۔

سیدنا ابوہریرہ رضی اللہ عنہ روایت کرتے ہیں جس رات نبی اکرم صلی اللہ علیہ وسلم کو معراج کروائی گئی ، تو آپ نے ارشاد فرمایا : میری قوم میری بات کی تصدیق نہیں کرے گی ، تو سیدنا جبرائیل علیہ السلام نے آپ کی خدمت میں عرض کی : سیدنا ابوبکر رضی اللہ عنہ آپ کی تصدیق کریں گے ، اور وہ صدیق ہیں ۔
یہ روایت امام طبرانی نے معجم اوسط میں نقل کی ہے ۔

ان کی نقل کردہ ایک روایت میں یہ الفاظ ہیں : ” میری قوم مجھ پر تہمت عائد کرے گی ۔ ۔ ۔ ۔ ۔ ۔ ۔ “ ۔ اس کی دو اسناد میں سے ایک سند میں ایک راوی ابووہب ہے ، جس نے اسے سیدنا ابوہریرہ رضی اللہ عنہ سے نقل کیا ہے ، اور میں اس سے واقف نہیں ہوں ۔ اس روایت کے بقیہ رجال ثقہ ہیں ۔

ام ہانی رضی اللہ عنہا بیان کرتی ہیں : جس رات نبی اکرم صلی اللہ علیہ وسلم کو معراج کروائی گئی ، تو آپ نے ارشاد فرمایا : میں نکل کر قریش کی طرف جاتا ہوں اور انہیں اس بارے میں بتاتا ہوں ( جب آپ نے لوگوں کو اس بارے میں بتایا ) تو لوگوں نے آپ کو جھوٹا قرار دیا اور سیدنا ابوبکر رضی اللہ عنہ نے آپ کی تصدیق کی ، تو اس دن ان کا نام صدیق رکھا گیا ۔
یہ روایت امام طبرانی نے نقل کی ہے ۔ اس کی سند میں ایک راوی عبدالاعلی بن ابومساور ہے ، اور وہ متروک ہے ۔