مجمع الزوائد ومنبع الفوائد

سیدنا عمر رضی اللہ عنہ بیان کرتے ہیں : جب نبی اکرم صلی اللہ علیہ وسلم کا وصال ہو گیا ، تو میں اور سیدنا ابوبکر رضی اللہ عنہ ، سیدنا علی رضی اللہ عنہ کے پاس گئے ، ہم نے کہا: اللہ کے رسول نے جو کچھ چھوڑا ہے ، اس کے بارے میں آپ کیا کہتے ہیں ؟ انہوں نے کہا: نبی اکرم صلی اللہ علیہ وسلم کے ساتھ تعلق کی وجہ سے ہم ، لوگوں سے زیادہ حق رکھتے ہیں ، سیدنا عمر رضی اللہ عنہ کہتے ہیں : میں نے کہا: اس چیز کے بارے میں جو خیبر میں ہے ؟ سیدنا علی رضی اللہ عنہ نے کہا: اس کے بارے میں جو خیبر میں ہے ، میں نے کہا: اس کے بارے میں جو فدک میں ہے ؟ انہوں نے کہا: اس کے بارے میں جو فدک میں ہے ۔ تو میں نے کہا: اللہ کی قسم ! آپ ہماری گردن آرے کے ذریعے چیر دیں گے ، تو بھی ایسا نہیں ہو گا ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی موسیٰ بن جعفر بن ابراہیم ہے ، اور وہ ضعیف ہے ۔

سیدہ جویریہ رضی اللہ عنہا بیان کرتی ہیں : جب نبی اکرم صلی اللہ علیہ وسلم کا وصال ہوا ، تو آپ نے ترکہ میں صرف ایک سفید خچر اپنا اسلحہ اور ایک زمین چھوڑی تھی ، جسے آپ نے صدقہ قرار دیا تھا ۔
یہ روایت امام طبرانی نے معجم اوسط میں نقل کی ہے ، اور اس کی سند حسن ہے ۔

سیدنا حذیفہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہماری ( یعنی انبیاء کرام علیہم السلام کی ) وراثت نہیں ہوتی ہے ، ہم جو چھوڑ کے جائیں ، وہ صدقہ ہوتا ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی فیض بن وثیق ہے ، اور وہ کذاب ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہماری ( یعنی انبیاء کرام علیہم السلام کی ) وراثت منتقل نہیں ہوتی ہے ، ہم جو چھوڑ کے جائیں ، وہ صدقہ ہوتا ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی اسماعیل بن عمرو بجلی ہے ، جسے ابن حبان نے ثقہ قرار دیا ہے ، اور دیگر حضرات نے اسے ضعیف کہا: ہے ، اس روایت کے بقیہ رجال ثقہ ہیں ۔