مجمع الزوائد ومنبع الفوائد

سیدنا عبداللہ بن مسعود رضی اللہ عنہ بیان کرتے ہیں : ہمیں ہمارے حبیب اور نبی کے وصال کی اطلاع دی گئی ، میرے باپ اور میری جان ، ان کے فدیے میں دیدیے جائیں ، یہ آپ کے وصال سے چھ دن پہلے بتایا گیا ، جب جدائی کا وقت قریب آیا ، تو نبی اکرم صلی اللہ علیہ وسلم نے ہمیں ام المؤمنین سیدہ عائشہ رضی اللہ عنہا کے گھر میں جمع کیا ، آپ کی آنکھوں سے آنسو جاری ہو گئے ، پھر آپ نے ارشاد فرمایا : ” تم لوگوں کو خوش آمدید ہے ! اللہ تعالیٰ تمہیں زندگی دے ، اللہ تعالیٰ تمہاری حفاظت کرے ، اللہ تعالیٰ تمہیں پناہ دے ، اللہ تعالیٰ تمہاری مدد کرے ، اللہ تعالیٰ تمہیں ہدایت پر ثابت رکھے ، اللہ تعالیٰ تمہیں رزق نصیب کرے ، اللہ تعالیٰ تمہیں توفیق عطا کرے ، اللہ تعالیٰ تمہیں سلامت رکھے ، اللہ تعالیٰ تمہارے اعمال قبول کرے ، میں تمہیں اللہ تعالیٰ کا تقویٰ اختیار کرنے کی تلقین کرتا ہوں ، اور اللہ تعالیٰ سے تمہارے لئے دعا کرتا ہوں ، اور اسے تمہارا نگہبان بناتا ہوں ، بے شک میں تمہیں ڈرانے والا تھا ، جو واضح طور پر ڈراتا ہے ، تم اللہ تعالیٰ کے حکم کے خلاف اس کے بندوں یا اس کے شہروں میں کوئی زیادتی نہ کرنا ، کیونکہ اللہ تعالیٰ نے مجھ سے اور تم لوگوں سے یہ فرمایا ہے : ” وہ آخرت کا گھر ہے ، جسے ہم نے ان لوگوں کے لئے بنایا ہے ، جو زمین میں بالادستی ( یعنی تکبر ) اور فساد کا ارادہ نہیں کرتے اور اچھا انجام پرہیزگاروں کے لئے ہے ۔ “ اور اس نے یہ بھی فرمایا ہے : ” کیا جہنم تکبر کرنے والوں کا ٹھکانہ نہیں ہے ۔ “ پھر آپ نے فرمایا : موت کا وقت قریب آ گیا ہے ، اور لوٹ کے اللہ تعالیٰ کی طرف جانا ہے ، اور سدرۃ المنتہیٰ کی طرف اور جنت الماویٰ کی طرف جانا ہے ، اور بھرپور پیالے کی طرف اور رفیق اعلیٰ کی طرف جانا ہے ۔ راوی کہتے ہیں : میرا خیال ہے ، روایت میں یہ الفاظ بھی ہیں : ہم نے عرض کی : یا رسول اللہ ! ایسی صورت میں آپ کو غسل کون دے گا ؟ نبی اکرم صلی اللہ علیہ وسلم نے فرمایا : میرے اہل بیت سے تعلق رکھنے والے افراد ، جو درجہ بدرجہ قریبی ہوں ، ہم نے عرض کی : ہم آپ کو کفن کسی چیز میں دیں ؟ نبی اکرم صلی اللہ علیہ وسلم نے فرمایا : میرے انہی کپڑوں میں ، اگر تم چاہو ، یا پھر یمنی کپڑوں میں ، یا پھر مضر کے سفید لباس میں ۔ راوی بیان کرتے ہیں : ہم نے عرض کی : ہم میں سے کون آپ کی نماز جنازہ ادا کرے گا ؟ ہم رونے لگے ، آپ بھی رونے لگے ، آپ نے فرمایا : ٹھہر جاؤ ! اللہ تعالیٰ تمہاری مغفرت کرے اور تمہیں تمہارے نبی کی طرف سے جزائے خیر دے ، جب تم مجھے غسل دے دو ! اور مجھے میرے پلنگ پر رکھ دو ، اور مجھے اس گھر میں رکھنا اور وہ پلنگ میری قبر کے کنارے رکھ دینا ، پھر تم میرے پاس سے کچھ دیر کے لئے نکل جانا ، کیونکہ سب سے پہلے میری نماز جنازہ میرا ساتھی اور میرا ہمنشین جبرائیل ادا کرے گا ، پھر میکائیل ، پھر اسرافیل ، پھر ملک الموت ، اپنے ساتھیوں کے ہمراہ ادا کرے گا ، پھر تمام فرشتے ادا کریں گے ، پھر تم لوگ گروہوں کی شکل میں میرے پاس آنا ، مجھ پر درود بھیجنا اور سلام بھیجنا اور کسی رونے والے کے ذریعے تم مجھے اذیت نہ پہنچانا ، کوئی عورت چیخے نہیں ، کوئی واویلا نہ کرے ، میرے گھر کے افراد کے مرد مجھ پر درود بھیجنے کا آغاز کریں گے اور اس کے بعد تم لوگ کرنا اور میری طرف سے تم لوگ اپنے اوپر سلام بھیجنا ، میرے جو بھائی یہاں موجود نہیں ہیں ، انہیں سلام پہنچا دینا اور جو شخص تمہارے ساتھ تمہارے دین میں میرے بعد داخل ہو ، تو میں تم لوگوں کو گواہ بنا کر کہہ رہا ہوں کہ میں اسے سلام بھیج رہا ہوں اور ہر اس شخص کو ، جو آج کے اس دن سے لے کر قیامت تک میرے دین کے حوالے سے میری پیروی کرے گا ۔ ہم نے عرض کی : یا رسول اللہ ! آپ کو ہم میں سے کون قبر میں داخل کرے گا ؟ نبی اکرم صلی اللہ علیہ وسلم نے فرمایا : میرے اہل بیت کے مرد کریں گے ، ان کے ساتھ بہت سے فرشتے ہوں گے ، وہ تمہیں دیکھ رہے ہوں گے ، لیکن تم انہیں نہیں دیکھ پا رہے ہو گے ۔
یہ روایت امام بزار نے نقل کی ہے ، وہ یہ کہتے ہیں : یہ روایت مرہ کے حوالے سے سیدنا عبداللہ رضی اللہ عنہ سے ایک اور سند کے ساتھ بھی منقول ہے ، اور مرہ سے منقول اسانید متقارب ہیں ، عبدالرحمن نامی راوی نے یہ روایت مرہ سے نہیں سنی ہے ، انہوں نے اسے مرہ کے حوالے سے بیان کیا ہے ، لیکن ہمارے علم کے مطابق مرہ کے علاوہ اور کسی نے اسے سیدنا عبداللہ رحمہ اللہ سے نقل نہیں کیا ہے ۔ ( علامہ ہیثمی فرماتے ہیں : ) میں یہ کہتا ہوں : اس کے رجال ” صحیح “ کے رجال ہیں ، صرف محمد بن اسماعیل بن سمرہ احمسی کا معاملہ مختلف ہے ، اور وہ ثقہ ہے ۔ یہ روایت امام طبرانی نے معجم اوسط میں اس کی مانند نقل کی ہے ، تاہم انہوں نے یہ الفاظ نقل کیے ہیں : نبی اکرم صلی اللہ علیہ وسلم کے وصال سے ایک ماہ پہلے ایسا ہوا ۔ ۔ ۔ ۔ ۔ ۔ ۔ ۔ ۔ اس کی سند میں ضعیف راویوں کا ذکر کیا ہے ، جن میں سے ایک اشعث بن طابق ہے ، ازدی کہتے ہیں : اس کی نقل کردہ حدیث مستند نہیں ہوتی ، باقی اللہ بہتر جانتا ہے ۔