مجمع الزوائد ومنبع الفوائد

سیدنا فضل بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم میرے پاس تشریف لائے ، میں نکل کر آپ کے پاس گیا ، تو میں نے آپ کو دیکھا کہ آپ بیمار ہیں اور آپ نے سر پر پٹی باندھی ہوئی ہے ، نبی اکرم صلی اللہ علیہ وسلم نے فرمایا : اے فضل ! میرا ہاتھ پکڑ لو ، میں نے آپ کا ہاتھ پکڑا ، یہاں تک کہ آپ منبر کے پاس تشریف لائے ، آپ اس پر تشریف فرما ہوئے ، پھر آپ نے فرمایا : لوگوں کو میرے پاس آنے کے لئے اعلان کر دو ، میں نے لوگوں میں جا کے اعلان کیا تو لوگ اکٹھے ہو گئے ، نبی اکرم صلی اللہ علیہ وسلم نے اللہ کی حمد و ثنا بیان کرنے کے بعد ارشاد فرمایا : ” اے لوگو ! تم لوگوں کے درمیان کچھ ایسے امور ہو سکتے ہیں ، جو میرے ذمہ لازم ہو چکے ہوں ، تو جس شخص کی پشت پر میں نے کوڑا مارا ہو ، تو یہ میری پشت موجود ہے ، وہ بدلہ لے ، خبردار ! کسی شخص کو میں نے برا بھلا کہا: ہو ، تو یہ میری عزت موجود ہے ، وہ بدلہ لے ، جس شخص سے میں نے مال لیا ہو ، تو یہ مال موجود ہے ، وہ بدلہ لے ، کوئی بھی شخص یہ ہرگز نہ کہے : کہ مجھے نبی اکرم صلی اللہ علیہ وسلم کی طرف سے کسی ناراضگی کا اندیشہ بے ، خبردار ! ناراضگی رکھنا ، میری طبیعت کا حصہ نہیں ہے ، اور نہ ہی میری شان ہے ، خبردار ! تم میں سے میرے نزدیک زیادہ محبوب وہ شخص ہو گا ، جو حق وصول کر لے ، اگر اس کا حق بنتا ہو ، یا پھر یہ ہے کہ وہ مجھے معاف کر دے ، تاکہ جب میں اللہ تعالیٰ کی بارگاہ میں حاضر ہوؤں ، تو میں مطمئن ہوؤں ، خبردار ! میں یہ نہیں سمجھتا کہ یہ چیز میرے لئے کفایت کرے گی ، جب تک میں تمہارے درمیان بار بار کھڑا نہیں ہوتا ۔ پھر نبی اکرم صلی اللہ علیہ وسلم منبر سے نیچے اترے ، پھر آپ نے ظہر کی نماز ادا کی ، پھر آپ منبر پر گئے اور آپ نے وہی بات دہرائی جو ناراضگی کے بارے میں اور دیگر امور کے بارے میں تھی ، پھر آپ نے ارشاد فرمایا : ” اے لوگو ! جس شخص کے پاس کوئی چیز ہو ، وہ اسے واپس کر دے اور یہ نہ کہے کہ یہ دنیا کی رسوائی ہے ، خبردار ! دنیا کی رسوائی آخرت کی رسوائی سے زیادہ آسان ہے ، تو ایک صاحب آپ کے سامنے کھڑے ہوئے ، انہوں نے عرض کی : یا رسول اللہ ! میرے آپ کے ذمہ تیس درہم ہیں ، نبی اکرم صلی اللہ علیہ وسلم نے فرمایا : ہم کسی بات کرنے والے کو جھوٹا قرار نہیں دیں گے ، اور نہ ہی کسی سے حلف لیں گے ، تم یہ بتاؤ وہ میرے پاس کس حوالے سے آئے تھے ؟ تو اس نے کہا: آپ وہ دن یاد کریں ، جب ایک غریب آدمی آپ کے پاس سے گزرا ، تو آپ نے مجھے یہ ہدایت کی تھی کہ میں اس کو یہ رقم دے دوں ، تو نبی اکرم صلی اللہ علیہ وسلم نے فرمایا : اے فضل ! تم اسے وہ رقم دے دو ، پھر ایک اور صاحب آپ کے سامنے کھڑے ہوئے ، انہوں نے عرض کی : میرے پاس تین درہم ہیں ، جو میں نے اللہ کی راہ میں خیانت کے طور پر حاصل کیے تھے ، نبی اکرم صلی اللہ علیہ وسلم نے دریافت کیا : تم نے وہ خیانت کے طور پر کیوں حاصل کیے تھے ؟ اس نے عرض کی : مجھے ان کی ضرورت تھی ، نبی اکرم صلی اللہ علیہ وسلم نے فرمایا : اے فضل ! تم وہ وصول کر لو ، پھر نبی اکرم صلی اللہ علیہ وسلم نے ارشاد فرمایا : ” اے لوگو ! جس شخص کو اپنی ذات کے حوالے سے کوئی اندیشہ ہو ، وہ کھڑا ہو جائے ، تو میں اس کے لئے دعا کر دوں گا ، تو ایک صاحب کھڑے ہوئے ، انہوں نے عرض کی : یا رسول اللہ ! اللہ کی قسم ! میں جھوٹ بہت بولتا ہوں اور میں منافقت بھی کرتا ہوں اور میں سویا بھی رہتا ہوں ، نبی اکرم صلی اللہ علیہ وسلم نے دعا کی : اے اللہ ! تو اسے سچائی اور ایمان عطا کر دے اور اس سے نیند کو لے جا ، جب یہ ارادہ کرے ( یعنی یہ جب چاہے ، بیدار ہو سکے ) ۔ پھر ایک اور صاحب کھڑے ہوئے ، انہوں نے عرض کی : یا رسول اللہ ! میں جھوٹ بولتا ہوں اور منافقت کرتا ہوں اور جتنے بھی امور ہیں ، میں اُن سب کا ارتکاب کرتا ہوں ، تو سیدنا عمر رضی اللہ عنہ نے اس سے کہا: تم نے اپنے آپ کو رسوائی کا شکار کیا ہے ، تو نبی اکرم صلی اللہ علیہ وسلم نے فرمایا : ابن خطاب رک جاؤ ! دنیا کی رسوائی ، آخرت کی رسوائی سے آسان ہے ، پھر آپ نے دعا کی : ” اے اللہ ! تو اس کو سچائی اور ایمان نصیب کر دے اور اس کے معاملے کو بھلائی کی طرف تبدیل کر دے ۔ “ پھر سیدنا عمر رضی اللہ عنہ نے لوگوں کے ساتھ کچھ بات چیت کی ، تو نبی اکرم صلی اللہ علیہ وسلم نے فرمایا : ” عمر میرے ساتھ ہے ، اور میں اس کے ساتھ ہوں اور میرے بعد حق ، عمر کے ساتھ ہو گا ، یہ جہاں بھی ہو گا ۔ “
یہ روایت امام طبرانی نے معجم کبیر اور معجم اوسط میں نقل کی ہے ، اور امام ابویعلیٰ نے اس کی مانند نقل کی ہے ، انہوں نے اس کے آخر میں یہ الفاظ بیان کیے ہیں : ” ایک شخص کھڑا ہوا ، اس نے عرض کی : یا رسول اللہ ! میں ایک بزدل شخص ہوں ، جو زیادہ تر سویا رہتا ہے ، راوی کہتے ہیں : تو نبی اکرم صلی اللہ علیہ وسلم نے اس کے لئے دعا کی ، سیدنا فضل رضی اللہ عنہ بیان کرتے ہیں : بعد میں ، میں نے اس شخص کو دیکھا کہ وہ ہم سب سے زیادہ بہادر تھا اور ہم سب سے کم سوتا تھا ۔ راوی بیان کرتے ہیں : پھر نبی اکرم صلی اللہ علیہ وسلم سیدہ عائشہ رضی اللہ عنہا کے گھر تشریف لے گئے ، آپ نے خواتین سے بھی اسی کی مانند بات ارشاد فرمائی ، جو آپ نے مردوں سے فرمائی تھی اور پھر آپ نے فرمایا : جس پر کوئی چیز غالب ہو ، وہ ہم سے کہے ، ہم اس کے لئے دعا کریں گے ، راوی کہتے ہیں : تو ایک خاتون نے اپنی زبان کی طرف اشارہ کیا ، تو نبی اکرم صلی اللہ علیہ وسلم نے اس خاتون کے لئے دعا کی ، راوی بیان کرتے ہیں : حالانکہ اس عورت نے چند مرتبہ مجھ سے یہ کہا: اے عائشہ ! تم نماز اچھے طریقے سے ادا کیا کرو ۔ امام ابویعلیٰ کی سند میں ایک راوی عطاء بن مسلم ہے ، جسے ابن حبان اور دیگر حضرات نے ثقہ قرار دیا ہے ، اور ایک جماعت نے اسے ضعیف کہا: ہے ، امام ابویعلیٰ کے بقیہ رجال ثقہ ہیں ، امام طبرانی کی سند میں ایسے راوی ہیں ، جن سے میں واقف نہیں ہوں ۔

سیدنا جابر رضی اللہ عنہ اور سیدنا عبداللہ بن عباس رضی اللہ عنہما اللہ تعالیٰ کے اس فرمان کے بارے میں بیان کرتے ہیں : ( ارشاد باری تعالیٰ ہے : ) ” جب اللہ تعالیٰ کی مدد اور فتح آ گئی اور تم نے لوگوں کو دیکھا کہ وہ اللہ کے دین میں گروہ در گروہ داخل ہو رہے ہیں ، تو تم اپنے پروردگار کی حمد کے ہمراہ پاکی بیان کرو اور اس سے مغفرت طلب کرو ، بے شک وہ بہت زیادہ توبہ قبول کرنے والا ہے ۔ “ راوی بیان کرتے ہیں : جب یہ سورت سیدنا محمد صلی اللہ علیہ وسلم پر نازل ہوئی تو آپ نے فرمایا : اے جبرائیل ! یہ میرے وصال کی اطلاع دی گئی ہے ، سیدنا جبرائیل نے کہا: ” آخرت آپ کے لئے پہلی والی سے زیادہ بہتر ہے ، اور عنقریب آپ کا پروردگار آپ کو اتنا عطا کرے گا کہ آپ راضی ہو جائیں گے ۔ “ پھر نبی اکرم صلی اللہ علیہ وسلم نے سیدنا بلال رضی اللہ عنہ کو حکم دیا کہ وہ اعلان کریں کہ لوگ اکٹھے ہو جائیں ، تو مہاجرین اور انصار نبی اکرم صلی اللہ علیہ وسلم کی مسجد میں اکٹھے ہو گئے ، نبی اکرم صلی اللہ علیہ وسلم نے لوگوں کو نماز پڑھائی ، پھر آپ منبر پر چڑھے ، آپ نے اللہ تعالیٰ کی حمد و ثناء بیان کرنے بعد ، آپ نے خطبہ ارشاد فرمایا ، جس سے دل لرز گئے اور آنکھیں رونے لگیں ، پھر آپ نے ارشاد فرمایا : ” اے لوگو ! میں تمہارے لئے کیسا نبی رہا ؟ لوگوں نے عرض کی : یا رسول اللہ ! اللہ تعالیٰ آپ کو نبی کے طور پر جزائے خیر دے کہ جو نبی آپ ہمارے لئے رہے ہیں ، یوں جیسے ایک مہربان باپ ہوتا ہے ، اور جیسے ایک شفیق خیرخواہ بھائی ہوتا ہے ، آپ نے اللہ تعالیٰ کے پیغام کو ادا کر دیا ، اور اس کی وحی کی ہم تک تبلیغ کر دی ، اور حکمت کے ذریعے اور اچھے وعظ کے ذریعے اپنے پروردگار کے راستے کی طرف دعوت دیدی ، تو اللہ تعالیٰ ہماری طرف سے آپ کو وہ سب سے بہتر جزا عطا کرے ، جو اس نے کسی نبی کو اس کی امت کی طرف سے عطا کی ہو ۔ نبی اکرم صلی اللہ علیہ وسلم نے ان لوگوں سے فرمایا : اے مسلمانوں کے گروہ ! میں تمہیں اللہ کا واسطہ دے کر یہ کہتا ہوں اور میرا تم پر جو حق ہے ، اس کے حوالے سے یہ کہتا ہوں کہ جس شخص کے ساتھ میری طرف سے کوئی زیادتی ہوئی ہو ، تو وہ اُٹھے اور وہ بدلہ لے ، لیکن کوئی آپ کے سامنے کھڑا نہیں ہوا ، نبی اکرم صلی اللہ علیہ وسلم نے دوسری مرتبہ انہیں واسطہ دیا ، تو کوئی آپ کے سامنے نہیں کھڑا ہوا ، نبی اکرم صلی اللہ علیہ وسلم نے تیسری مرتبہ انہیں واسطہ دیتے ہوئے فرمایا : اے مسلمانوں کے گروہ ! میں تمہیں اللہ کا واسطہ دے کر اور تم پر اپنے حق کا واسطہ دے کر یہ کہتا ہوں کہ جس شخص کے ساتھ میری طرف سے کوئی زیادتی ہوئی ہو ، تو وہ اُٹھے اور وہ مجھ سے بدلہ لے ، اس سے پہلے کہ قیامت کے دن بدلہ دینا پڑے ، راوی کہتے ہیں : تو مسلمانوں کے درمیان ایک بوڑھا عمر رسیدہ شخص کھڑا ہوا ، جس کا نام عکاشہ تھا ، وہ مسلمانوں کی گردنیں پھلانگتا ہوا آیا اور نبی اکرم صلی اللہ علیہ وسلم کے سامنے آ کر ٹھہر گیا ، اس نے کہا: میرے ماں باپ آپ پر قربان ہو جائیں ، اگر آپ نے ایک سے زیادہ مرتبہ ہمیں اللہ کا واسطہ نہ دیا ہوتا ، تو میں نے اس حوالے سے آگے نہیں آنا تھا ، میں آپ کے ساتھ ایک جنگ میں موجود تھا ، جب اللہ تعالیٰ نے ہمیں فتح نصیب کر دی اور اپنے نبی کی مدد کر دی ، اور جب ہم لوگ واپس آ رہے تھے تو میری اونٹنی آپ کی اونٹنی کے پاس آئی ، میں اپنی اونٹنی سے نیچے اترا اور آگے بڑھا ، تاکہ آپ کے زانوں کو بوسہ دوں ، تو آپ نے چھڑی اٹھائی اور وہ میرے پہلو پر مار دی ، مجھے نہیں معلوم کہ یہ آپ کی طرف سے جان بوجھ کر ہوا تھا ، یا آپ نے اونٹنی کو مارنے کا ارادہ کیا تھا ، نبی اکرم صلی اللہ علیہ وسلم نے فرمایا : میں اللہ کے جلال کی تمہیں پناہ دیتا ہوں ، اس بات کے حوالے سے کہ اللہ کے رسول نے تمہیں جان بوجھ کر مارا ہو ، اے بلال ! تم فاطمہ کے گھر جاؤ ، اور وہاں سے وہ چھڑی لے آؤ ، جس کے پتے وغیرہ اتارے گئے ہوں ، سیدنا بلال رضی اللہ عنہ مسجد سے گزرے ، ان کا ہاتھ ان کے سر پر تھا اور وہ بلند آواز میں یہ کہہ رہے تھے : یہ اللہ کے رسول اپنی طرف سے قصاص دے رہے ہیں ، انہوں نے سیدہ فاطمہ رضی اللہ عنہا کا دروازہ کھٹکھٹایا اور عرض کی : اے اللہ کے رسول کی صاحبزادی ! آپ وہ چھڑی مجھے پکڑا دیں ، جس کے پتے وغیرہ اتارے گئے ہیں ، سیدہ فاطمہ رضی اللہ عنہا نے ان سے کہا: اے بلال ! میرے والد نے چھڑی کا کیا کرنا ہے ؟ جبکہ یہ کوئی حج کا موقع بھی نہیں ہے ، اور جنگ کا موقع بھی نہیں ہے ، سیدنا بلال رضی اللہ عنہ نے کہا: اے سیدہ فاطمہ رضی اللہ عنہا ! آپ کے والد جس صورت حال کا شکار ہیں ، آپ کو اس کا پتہ نہیں ہے ، نبی اکرم صلی اللہ علیہ وسلم لوگوں سے رخصت ہو رہے ہیں ، اور دنیا سے جدا ہونے والے ہیں ، تو وہ اپنی ذات کی طرف سے بدلہ دے رہے ہیں ، سیدہ فاطمہ رضی اللہ عنہا نے کہا: اے بلال ! وہ کون شخص ہے ؟ جو اللہ کے رسول سے بدلہ لے کر خود کو خوش کرنا چاہتا ہے ، اے بلال ! ایسی صورت میں تم حسن اور حسین سے کہو کہ وہ اس شخص کے سامنے کھڑے ہو جائیں ، اور اس کو بدلہ دیں اور اسے نبی اکرم صلی اللہ علیہ وسلم سے بدلہ نہ لینے دیں ۔ راوی بیان کرتے ہیں : وہ مسجد میں واپس آئے ، انہوں نے وہ چھڑی نبی اکرم صلی اللہ علیہ وسلم کو پکڑائی ، نبی اکرم صلی اللہ علیہ وسلم نے وہ چھڑی سیدنا عکاشہ رضی اللہ عنہ کو دی ، جب سیدنا ابوبکر رضی اللہ عنہ اور سیدنا عمر رضی اللہ عنہ نے یہ صورت حال دیکھی ، تو وہ دونوں کھڑے ہو گئے ، ان دونوں نے کہا: اے عکاشہ ! ہم تمہارے سامنے موجود ہیں ، تم ہم سے بدلہ لے لو ، لیکن تم اللہ کے رسول سے بدلہ نہ لو ، نبی اکرم صلی اللہ علیہ وسلم نے ان دونوں سے فرمایا : اے ابوبکر ! تم بیٹھ جاؤ ، اے عمر ! تم بھی بیٹھ جاؤ ، اللہ تعالیٰ تم دونوں کے مکان اور تم دونوں کے مقام سے واقف ہے ، پھر سیدنا علی بن ابوطالب رضی اللہ عنہ کھڑے ہوئے ، انہوں نے کہا: اے عکاشہ ! میں نبی اکرم صلی اللہ علیہ وسلم کے سامنے زندہ ہوں ، میں اس بات سے مطمئن نہیں ہوؤں گا کہ تم اللہ کے رسول کو ضرب لگاؤ ، یہ میری پشت اور میرا پیٹ حاضر ہے ، تم مجھ سے بدلہ لے لو ، مجھے بھلے ہی ایک سو کوڑے مار دو ، لیکن اللہ کے رسول سے بدلہ نہ لو ، نبی اکرم صلی اللہ علیہ وسلم نے فرمایا : اے علی ! تم بیٹھ جاؤ ، اللہ تعالیٰ تمہارے مقام اور تمہاری نیت سے واقف ہے ، پھر سیدنا امام حسن رضی اللہ عنہ اور سیدنا امام حسین رضی اللہ عنہ کھڑے ہوئے ، ان دونوں نے کہا: اے عکاشہ ! کیا آپ یہ بات نہیں جانتے کہ ہم اللہ کے رسول کے نواسے ہیں ، اور ہم سے بدلہ لینا ، اللہ کے رسول سے بدلہ لینے کی مانند ہے ، نبی اکرم صلی اللہ علیہ وسلم نے ان دونوں سے فرمایا : تم دونوں بیٹھ جاؤ ، تم دونوں میری آنکھوں کی ٹھنڈک ہو ، اللہ تعالیٰ تمہارے اس کھڑے ہونے کو نہیں بھولے گا ، پھر نبی اکرم صلی اللہ علیہ وسلم نے فرمایا : اے عکاشہ ! تم ضرب لگاؤ ، اگر تم نے ضرب لگانی ہے ، انہوں نے عرض کی : یا رسول اللہ ! جب آپ نے مجھے ضرب لگائی تھی ، تو میرے پیٹ پر کپڑا موجود نہیں تھا ، نبی اکرم صلی اللہ علیہ وسلم نے اپنے پیٹ سے کپڑا ہٹایا ، مسلمان چیخ کر رونے لگے ، لوگوں نے کہا: کیا عکاشہ ، اللہ کے رسول پر ضرب لگائے گا ؟ جب سیدنا عکاشہ رضی اللہ عنہ نے نبی اکرم صلی اللہ علیہ وسلم کے پیٹ کی سفیدی دیکھی ، جو چاندی کی طرح چمک رہی تھی ، تو وہ جھک گئے اور انہوں نے نبی اکرم صلی اللہ علیہ وسلم کے پیٹ پر بوسہ دیا اور وہ یہ کہنے لگے : میرے ماں باپ آپ پر قربان ہوں ، کون اس بات سے خوش ہو سکتا ہے کہ وہ آپ سے بدلہ لے ؟ نبی اکرم صلی اللہ علیہ وسلم نے ان سے فرمایا : یا تو تم ضرب لگاؤ ، یا پھر تم معاف کر دو ، تو انہوں نے کہا: یا رسول اللہ ! میں آپ سے درگزر کرتا ہوں ، اس امید پر کہ قیامت کے دن اللہ تعالیٰ مجھ سے درگزر کرے گا ، تو نبی اکرم صلی اللہ علیہ وسلم نے ارشاد فرمایا : ” جو شخص جنت میں میرے رفیق کو دیکھنا چاہتا ہو وہ اس بوڑھے کو دیکھ لے ۔ “ تو مسلمان کھڑے ہو گئے اور وہ سیدنا عکاشہ رضی اللہ عنہ کی آنکھوں کے درمیان بوسہ دینے لگے اور یہ کہنے لگے : آپ کے لئے مبارک باد ہے ، آپ کے لئے مبارک باد ہے کہ آپ بلند درجات تک پہنچ گئے ہیں اور نبی اکرم صلی اللہ علیہ وسلم کا ساتھ نصیب ہو گا ۔ راوی بیان کرتے ہیں : اسی دن نبی اکرم صلی اللہ علیہ وسلم بیمار ہو گئے ، آپ کی بیماری اٹھارہ دن تک جاری رہی ، اسی دوران لوگ آپ کی عیادت کرنے کے لئے آتے رہے ، نبی اکرم صلی اللہ علیہ وسلم پیر کے دن پیدا ہوئے تھے ، پیر کے دن مبعوث ہوئے تھے اور پیر کے دن آپ کا وصال بھی ہوا ( اس سے پہلے ) جب ہفتے کا دن آیا ، تو آپ کی بیماری میں اضافہ ہو گیا ، سیدنا بلال رضی اللہ عنہ نے اذان دی ، پھر وہ دروازے پر آ کر ٹھہرے اور بلند آواز میں پکار کر کہا: یا رسول اللہ ! آپ پر سلام ہو ، اللہ تعالیٰ کی رحمتیں آپ پر نازل ہوں ، میں نماز کے لئے اقامت کہہ دوں ؟ نبی اکرم صلی اللہ علیہ وسلم نے سیدنا بلال رضی اللہ عنہ کی آواز سنی ، سیدہ فاطمہ رضی اللہ عنہا نے کہا: اے بلال ! نبی اکرم صلی اللہ علیہ وسلم کی طبیعت ٹھیک نہیں ہے ، سیدنا بلال رضی اللہ عنہ مسجد میں چلے گئے ، جب صبح روشن ہونے لگی ، تو انہوں نے کہا: اللہ کی قسم ! میں اس وقت تک اقامت نہیں کہوں گا ، جب تک میں اللہ کے رسول سے اجازت نہیں لیتا ، سیدنا بلال رضی اللہ عنہ نکلے ، وہ دروازے کے پاس آ کے کھڑے ہوئے ، انہوں نے بلند آواز میں پکار کے کہا: اے اللہ کے رسول ! آپ پر سلامتی نازل ہو ، اور اللہ تعالیٰ کی برکتیں اور اس کی رحمتیں نازل ہوں ، نماز کا وقت ہو گیا ہے ، اللہ تعالیٰ آپ پر رحم کرے ، نبی اکرم صلی اللہ علیہ وسلم نے سیدنا بلال رضی اللہ عنہ کی آواز سنی اور فرمایا : اے بلال ! اندر آ جاؤ ، آج اللہ کے رسول کی طبعیت بہت خراب ہے ، تم ابوبکر سے یہ کہو کہ وہ لوگوں کو نماز پڑھا دے ، سیدنا بلال رضی اللہ عنہ باہر نکلے تو انہوں نے اپنا ہاتھ اپنے سر پر رکھا ہوا تھا اور وہ یہ کہہ رہے تھے : اللہ کی مدد ہی لی جا سکتی ہے ، اور امید منقطع ہو چکی ہے ، اور پشت ٹوٹ چکی ہے ، اے کاش ! میری ماں نے مجھے پیدا ہی نہ کیا ہوتا ، اور اگر پیدا کیا تھا ، تو آج مجھے اللہ کے رسول کی طرف سے یہ دن دیکھنا نصیب نہ ہوتا ۔ پھر انہوں نے کہا: اے سیدنا ابوبکر ! اللہ تعالیٰ کے رسول صلی اللہ علیہ وسلم نے آپ کو یہ حکم دیا ہے کہ آپ لوگوں کو نماز پڑھائیں ، سیدنا ابوبکر رضی اللہ عنہ آگے بڑھے ، انہوں نے لوگوں کو نماز پڑھانا شروع کی ، وہ ایک نرم دل شخص تھے ، جب انہوں نے یہ دیکھا کہ نبی اکرم صلی اللہ علیہ وسلم کی جگہ خالی ہے ، تو وہ خود پر ق ابونہیں پا سکے اور وہ بے ہوش ہو کر گر گئے ، مسلمان چیخ کر رونے لگے ، نبی اکرم صلی اللہ علیہ وسلم کو ان کی گونج سنائی دی ، تو آپ صلی اللہ علیہ وسلم نے فرمایا : یہ گونج کس وجہ سے ہے ؟ لوگوں نے کہا: یا رسول اللہ ! آپ کی غیر موجودگی کی وجہ سے ، مسلمانوں کے رونے کی وجہ سے ( یہ گونج ) ہے ، نبی اکرم صلی اللہ علیہ وسلم نے سیدنا علی بن ابوطالب رضی اللہ عنہ اور سیدنا عباس رضی اللہ عنہ کے صاحبزادے کو بلایا ، ان دونوں کے ساتھ ٹیک لگائی اور مسجد تشریف لے گئے ، آپ نے لوگوں کو مختصر رکعات پڑھائیں ، پھر آپ مہربان چہرے کے ساتھ ان لوگوں کی طرف متوجہ ہوئے اور ارشاد فرمایا : ” اے مسلمانوں کے گروہ ! میں تمہیں اللہ کے سپرد کرتا ہوں ، تم لوگ اللہ کے فضل اور اس کی امان میں ہو ، میرے بعد اللہ تعالیٰ تم لوگوں کا نگران ہے ، اے مسلمانوں کے گروہ ! تم پر یہ لازم ہے کہ اللہ تعالیٰ سے ڈرتے رہو ، اور میرے بعد اس کی اطاعت باقاعدگی سے کرو ، کیونکہ میں دنیا سے جدا ہونے لگا ہوں ، یہ آخرت کے دنوں میں سے پہلا دن ہے ، اور دنیا کے دنوں میں سے آخری دن ہے ۔ راوی کہتے ہیں : جب پیر کا دن آیا ، تو آپ کی طبیعت زیادہ خراب ہو گئی ، اللہ تعالیٰ نے ملک الموت کی طرف یہ وحی کی کہ تم میرے حبیب کی طرف اتر کے جاؤ ، جو میرے منتخب بندے سیدنا محمد صلی اللہ علیہ وسلم ہیں ، تم خوبصورت ترین شکل میں ان کے پاس جانا اور سب سے زیادہ نرمی سے ان کی روح قبض کرنا ۔ راوی بیان کرتے ہیں : ملک الموت نیچے اترے ، وہ دروازے پر دیہاتی کی شکل میں آ کر کھڑے ہوئے اور پھر یہ بولے : السلام علیکم ، اے نبوت کے گھرانے کے افراد ! رسالت کے معدن والو ! جن کے ہاں فرشتے آتے جاتے رہتے ہیں ، کیا میں اندر آ جاؤں ؟ سیدہ عائشہ رضی اللہ عنہا نے سیدہ فاطمہ رضی اللہ عنہا سے کہا: تم اس شخص کو جواب دو ، سیدہ فاطمہ رضی اللہ عنہا نے کہا: تمہارے آنے کے حوالے سے اللہ تعالیٰ تمہیں اجر نصیب کرے ، اے اللہ کے بندے ! اللہ کے رسول کی طبیعت ٹھیک نہیں ہے ، اس نے دوسری مرتبہ پکارا ، تو سیدہ عائشہ رضی اللہ عنہا نے کہا: اے فاطمہ ! تم اس شخص کو جواب دو ، سیدہ فاطمہ رضی اللہ عنہا نے کہا: اے اللہ کے بندے ! تمہارے آمد کے حوالے سے اللہ تعالیٰ تمہیں اجر نصیب کرے ، اللہ کے رسول کی طبیعت خراب ہے ، پھر تیسری مرتبہ انہوں نے بلند آواز میں پکار کر کہا: اے نبوت کے گھر والو ! رسالت کے معدن والو ! فرشتے جن کے ہاں آتے جاتے رہتے ہیں ، کیا میں اندر آ جاؤں ؟ کیونکہ اندر آنا ضروری ہے ، نبی اکرم صلی اللہ علیہ وسلم نے ملک الموت کی آواز سن لی ، تو آپ نے فرمایا : اے فاطمہ ! دروازے پر کون ہے ؟ انہوں نے عرض کی : یا رسول اللہ ! دروازے پر ایک شخص موجود ہے ، جو اندر آنے کی اجازت مانگ رہا ہے ، میں اسے ایک کے بعد دوسری مرتبہ جواب دے چکی ہوں اور اس نے تیسری مرتبہ ایسی آواز میں پکارا ہے ، جس کی وجہ سے میری جلد پر کپکپی طاری ہو گئی ہے ، اور میرے اعضاء کانپ رہے ہیں : نبی اکرم صلی اللہ علیہ وسلم نے ان سے فرمایا : اے فاطمہ ! کیا تم جانتی ہو ؟ دروازے پر کون ہے ؟ یہ لذتوں کو منہدم کرنے والا ، ملنے والوں کو جدا کرنے والا ، بیویوں کو بیوہ کرنے والا ، اولاد کو یتیم کرنے والا ، آبادیوں کو برباد کرنے والا اور قبرستانوں کو آباد کرنے والا ہے ، یہ ملک الموت ہے ، اے ملک الموت ! اللہ تعالیٰ تم پر رحم کرے ، تم اندر آ جاؤ ! راوی بیان کرتے ہیں : تو ملک الموت نبی اکرم صلی اللہ علیہ وسلم کے پاس اندر آیا ، تو نبی اکرم صلی اللہ علیہ وسلم نے فرمایا : اے ملک الموت ! تم میرے پاس ملنے کے لئے آئے ہو ؟ یا روح قبض کرنے کے لئے آئے ہو ؟ انہوں نے عرض کی : میں آپ کے پاس ملنے کے لئے بھی آیا ہوں ، اور روح قبض کرنے کے لئے بھی آیا ہوں ، اللہ تعالیٰ نے مجھے یہ حکم دیا تھا کہ میں اجازت لیے بغیر آپ کے پاس اندر نہ آؤں ، اور آپ کی اجازت کے بغیر آپ کی روح قبض نہ کروں ، اگر آپ اجازت دیتے ہیں ، تو ٹھیک ہے ، ورنہ میں اپنے پروردگار کی طرف واپس چلا جاؤں گا ، نبی اکرم صلی اللہ علیہ وسلم نے فرمایا : اے ملک الموت ! تم نے میرے دوست جبرائیل کو کہاں چھوڑا ہے ؟ انہوں نے بتایا : میں نے انہیں آسمان دنیا پر چھوڑا ہے ، اور فرشتے آپ کے بارے میں ان کے ساتھ تعزیت کر رہے ہیں ، پھر فوراً سیدنا جبرائیل علیہ السلام نبی اکرم صلی اللہ علیہ وسلم کے پاس آ گئے اور آپ کے سرہانے بیٹھ گئے ، آپ نے فرمایا : یہ دنیا سے روانگی کا وقت ہے ، تو تم مجھے خوشخبری سناؤ کہ اللہ تعالیٰ کی بارگاہ میں میرے لئے کیا ہے ؟ انہوں نے عرض کی : اے اللہ کے حبیب ! میں آپ کو یہ خوشخبری سناتا ہوں کہ میں نے آسمان کے دروازے ایسی حالت میں چھوڑے ہیں کہ انہیں کھول دیا گیا ہے ، اور فرشتے صفیں بنا کے کھڑے ہوئے ہیں ، وہ صفیں بنا کر سلام پیش کرنے کے لئے کھڑے ہوئے ہیں ، اور خوشبو لے کر کھڑے ہیں ، جس کے ذریعے اے سیدنا محمد ( صلی اللہ علیہ وسلم ) ! وہ آپ کی روح کا استقبال کریں گے ، نبی اکرم صلی اللہ علیہ وسلم نے فرمایا : حمد ، میرے پروردگار کی ذات کے لئے مخصوص ہے ، اے جبرائیل ! مجھے خوشخبری سناؤ ، انہوں نے کہا: میں آپ کو یہ خوشخبری سناتا ہوں کہ جنت کے دروازے کھول دیے گئے ہیں ، اس کی نہریں اس کے درخت ہل رہے ہیں ، ان کی حوریں آراستہ ہو چکی ہیں ، کیونکہ اسے سیدنا محمد ( صلی اللہ علیہ وسلم ) آپ کی روح آنے والی ہے ، نبی اکرم صلی اللہ علیہ وسلم نے فرمایا : حمد ، میرے پروردگار کی ذات کے لئے مخصوص ہے ، اے جبرائیل ! مجھے خوشخبری سناؤ ، سیدنا جبرائیل علیہ السلام نے کہا: آپ قیامت کے دن سب سے پہلے شفاعت کرنے والے ہوں گے ، اور پہلے ایسے فرد ہوں گے ، جس کی شفاعت قبول ہو گی ، تو نبی اکرم صلی اللہ علیہ وسلم نے فرمایا : حمد ، میرے پروردگار کے لئے مخصوص ہے ، سیدنا جبرائیل علیہ السلام نے کہا: اے میرے محبوب ! آپ کس چیز کے بارے میں پوچھنا چاہ رہے ہیں ؟ نبی اکرم صلی اللہ علیہ وسلم نے فرمایا : میں تم سے اپنی پریشانی اور اپنی الجھن کے بارے میں پوچھنا چاہ رہا ہوں کہ میرے بعد قرآن کے عالموں کو کیا ملے گا ؟ میرے بعد رمضان کے روزے رکھنے والوں کو کیا ملے گا ؟ میرے بعد بیت اللہ کا حج کرنے والوں کو کیا ملے گا ؟ اور میرے بعد میری منتخب امت کو کیا ملے گا ؟ تو سیدنا جبرائیل علیہ السلام نے کہا: اے اللہ کے حبیب ! آپ یہ خوشخبری حاصل کریں کہ اللہ تعالیٰ یہ فرماتا ہے : میں نے تمام انبیاء اور ان کی امتوں کے لئے جنت کو اس وقت تک حرام قرار دیا ہے ، جب تک اے سیدنا محمد ! آپ اور آپ کی امت اس میں داخل نہیں ہو جاتے ، تو نبی اکرم صلی اللہ علیہ وسلم نے فرمایا : اب میرا دل مطمئن ہے ، اے ملک الموت تم قریب آ جاؤ ! اور وہ کام کرو ، جس کا تمہیں حکم دیا گیا ہے ۔ سیدنا علی رضی اللہ عنہ نے عرض کی : یا رسول اللہ ! جب آپ کا وصال ہو جائے گا ، تو آپ کو غسل کون دے گا ؟ ہم آپ کو کفن کس چیز میں دیں ؟ آپ کی نماز جنازہ کون پڑھائے گا ؟ اور آپ کو قبر میں کون اتارے گا ؟ نبی اکرم صلی اللہ علیہ وسلم نے فرمایا : اے علی ! جہاں تک غسل کا تعلق ہے ، تو تم نے مجھے غسل دینا ہے ، فضل بن عباس تم پر پانی انڈیلے گا ، اور جبرائیل تمہارے ساتھ تیسرا فرد ہو گا ، جب تم مجھے غسل دے کر فارغ ہو جاؤ ، تو تم مجھے تین نئے کپڑوں میں کفن دینا ، جبرائیل میرے پاس جنت سے خوشبو لگا ہوا لباس لے کے آیا ہے ، جب تم لوگ مجھے چارپائی پر رکھ دو ، تو مجھے مسجد میں رکھ دینا ، اور تم لوگ باہر چلے جانا ، سب سے پہلے میرا پروردگار عرش کے اوپر سے مجھ پر رحمت نازل کرے گا ، جبرائیل ، پھر میکائیل ، پھر اسرافیل دعائے رحمت کریں گے ، پھر فرشتے گروہوں کی شکل میں آئیں گے ، پھر تم لوگ اندر داخل ہونا اور صفوں میں کھڑے ہو جانا ، اور کوئی شخص آگے نہ بڑھے ۔ سیدہ فاطمہ رضی اللہ عنہا نے عرض کی : آج جدائی کا دن ہے ، تو میں آپ سے کب ملوں گی ؟ نبی اکرم صلی اللہ علیہ وسلم نے فرمایا : تم مجھ سے قیامت کے دن حوض کے پاس ملنا ، جہاں میں اپنی امت سے تعلق رکھنے والے حوض پر آنے والے افراد کو پانی پلا رہا ہوؤں گا ، انہوں نے عرض کی : یا رسول اللہ ! اگر میں وہاں آپ سے نہ مل سکوں ، نبی اکرم صلی اللہ علیہ وسلم نے فرمایا : پھر تم میزان کے پاس مجھ سے مل لینا ، جہاں میں اپنی امت کی شفاعت کروں گا ، انہوں نے عرض کی : یا رسول اللہ ! اگر میں وہاں آپ سے نہ مل پاؤں ، نبی اکرم صلی اللہ علیہ وسلم نے فرمایا : تم پل صراط پر مجھ سے مل لینا ، جہاں میں یہ پکار کر کہہ رہا ہوؤں گا : اے میرے پروردگار ! میری امت کو جہنم سے بچا کے رکھنا ؟ پھر ملک الموت قریب آیا اور نبی اکرم صلی اللہ علیہ وسلم کی روح قبض کرنے لگا ، جب آپ کی روح گھٹنوں تک پہنچی ، تو نبی اکرم صلی اللہ علیہ وسلم نے فرمایا : اوہ ! جب آپ کی روح ناف تک پہنچی ، تو آپ نے فرمایا : ہائے کتنی تکلیف ہے ، سیدہ فاطمہ رضی اللہ عنہا نے عرض کی : اے ابا جان ! کاش آپ کی جگہ مجھے یہ تکلیف ہوتی ، جب نبی اکرم صلی اللہ علیہ وسلم کی روح سینے تک آئی ، تو نبی اکرم صلی اللہ علیہ وسلم نے فرمایا : اے جبرائیل ! موت کی شدت کتنی سخت ہوتی ہے ، تو سیدنا جبرائیل علیہ السلام نے نبی اکرم صلی اللہ علیہ وسلم سے منہ پھیر لیا ، نبی اکرم صلی اللہ علیہ وسلم نے فرمایا : اے جبرائیل ! تم میری طرف دیکھنے کو ناپسند کر رہے ہو ؟ سیدنا جبرائیل علیہ السلام نے کہا: اے میرے محبوب ! کون اس بات کی طاقت رکھتا ہے کہ وہ آپ کی طرف اس وقت دیکھے ، جب آپ سکرات الموت کا سامنا کر رہے ہوں ۔ پھر جب نبی اکرم صلی اللہ علیہ وسلم کا وصال ہو گیا ، تو سیدنا علی بن ابوطالب رضی اللہ عنہ نے آپ کو غسل دیا ، سیدنا عباس رضی اللہ عنہ کے صاحبزادے پانی ڈال رہے تھے ، سیدنا جبرائیل علیہ السلام ان دونوں کے ساتھ تھے ، آپ کو تین نئے کپڑوں میں کفن دیا گیا ، پھر آپ کو چارپائی پر رکھا گیا ، پھر آپ کو مسجد میں لایا گیا اور آپ کو مسجد میں رکھ دیا گیا ، لوگ مسجد سے نکل گئے ، سب سے پہلے پروردگار نے عرش کے اوپر سے آپ پر رحمت نازل کی ، پھر جبرائیل ، پھر میکائیل ، پھر اسرافیل اور پھر فرشتے گروہ در گروہ آ کر دعائے رحمت کرتے رہے ۔ سیدنا علی رضی اللہ عنہ کہتے ہیں : ہم نے مسجد میں آواز سنی ، لیکن ہمیں کوئی شخص نظر نہیں آیا ، ہم نے کسی ہاتف کو یہ کہتے ہوئے سنا کہ تم لوگ اندر آ جاؤ ! اللہ تعالیٰ تم پر رحم کرے ، اور اپنے نبی کے لئے دعائے رحمت کرو ، تو ہم اندر آئے ، ہم صفوں میں کھڑے ہو گئے ، جس طرح نبی اکرم صلی اللہ علیہ وسلم نے ہمیں حکم دیا تھا ، تو ہم سیدنا جبرائیل علیہ السلام کی تکبیر کے مطابق تکبیر کہتے رہے ، اور ہم نے نبی اکرم صلی اللہ علیہ وسلم کی نماز جنازہ سیدنا جبرائیل علیہ السلام کی اقتداء میں ادا کی ، ہم میں سے کوئی ایک نبی اکرم صلی اللہ علیہ وسلم کی طرف آگے نہیں بڑھا ، پھر آپ کی قبر میں سیدنا ابوبکر صدیق رضی اللہ عنہ ، سیدنا علی بن ابوطالب رضی اللہ عنہ ، سیدنا عباس رضی اللہ عنہ کے صاحبزادے داخل ہوئے اور آپ کو دفن کر دیا گیا ۔ جب لوگ آپ کو دفن کر کے واپس آئے ، تو سیدہ فاطمہ رضی اللہ عنہا نے سیدنا علی رضی اللہ عنہ سے کہا: اے ابوالحسن ! آپ لوگوں نے اللہ کے رسول کو دفن کر دیا ؟ ان لوگوں نے جواب دیا : جی ہاں ! سیدہ فاطمہ رضی اللہ عنہا نے کہا: آپ لوگوں کا دل کیسے ٹھیک رہا کہ آپ نے اللہ کے رسول پر مٹی ڈال دی ؟ کیا آپ کے دلوں میں اللہ کے رسول کے لئے رحمت نہیں تھی ؟ کیا وہ بھلائی کی تعلیم دینے والے نہیں تھے ؟ سیدنا علی رضی اللہ عنہ نے کہا: جی ہاں ! اے فاطمہ ! لیکن اللہ تعالیٰ کے حکم کو واپس نہیں کیا جا سکتا ، تو سیدہ فاطمہ رضی اللہ عنہا رونے لگیں اور یہ کہنے لگیں : ہائے ابا جان ! اب جبرائیل کی آمد کا سلسلہ ختم ہو گیا ، وہ جبرائیل جو آسمان سے ہمارے لئے وحی لے کے آیا کرتے تھے ۔
یہ روایت امام طبرانی نے نقل کی ہے ، اس کی سند میں ایک راوی عبدالمنعم بن ادریس ہے ، اور وہ کذاب ہے ، اور حدیث ایجاد کرنے والا ہے ۔

یزید بن بابنوس بیان کرتے ہیں : میں اور میرا ایک ساتھی سیدہ عائشہ رضی اللہ عنہا کے پاس گئے ، ہم نے ان کے ہاں اندر آنے کی اجازت مانگی ، انہوں نے ہمارے لئے تکیہ رکھوایا اور پردہ ڈال دیا ، میرے ساتھی نے ان سے حیض والی عورت کے ساتھ مباشرت کرنے کے بارے میں دریافت کیا ، تو انہوں نے فرمایا : نبی اکرم صلی اللہ علیہ وسلم جب میرے دروازے کے پاس سے گزرتے تھے تو آپ کوئی بات ارشاد فرما دیتے تھے ، جس کے ذریعے اللہ تعالیٰ انہیں نفع عطا کرے ، ایک دن نبی اکرم صلی اللہ علیہ وسلم گزرے ، تو آپ نے کوئی بات ارشاد نہیں فرمائی ، پھر آپ گزرے آپ نے کوئی بات ارشاد نہیں فرمائی ، ایسا دو یا تین مرتبہ ہوا ۔ میں نے ( کنیز سے ) کہا: اے لڑکی تم میرے لئے دروازے کے پاس تکیہ رکھ دو ، میں نے سر پر پٹی باندھی ہوئی تھی ، نبی اکرم صلی اللہ علیہ وسلم میرے پاس سے گزرے ، آپ نے دریافت کیا : اے عائشہ ! تمہیں کیا ہوا ہے ؟ میں نے عرض کی : میرے سر میں درد کی شکایت ہے ، ہائے سر کا درد ( اس کا بامحاروہ ترجمہ ہو گا ، ہائے میں مر گئی ) نبی اکرم صلی اللہ علیہ وسلم تشریف لے گئے ، تھوڑی دیر بعد آپ تشریف لائے ، تو آپ نے چادر اوڑھی ہوئی تھی ، آپ اندر آئے ، آپ نے اپنی دیگر ازواج کو پیغام بھیج کر بلوایا اور فرمایا : میں بیمار ہو گیا ہوں ، اور اب میں یہ استطاعت نہیں رکھتا کہ تم لوگوں کے ہاں جاؤں ، تو تم مجھے اجازت دو کہ میں عائشہ کے ہاں ٹھہر جاؤں ، تو ان خواتین نے آپ کو اجازت پیش کر دی ، میں آپ کی بیماری کے دوران آپ کی دیکھ بھال کرنے لگی ، حالانکہ اس سے پہلے میں نے کبھی کسی بیمار کی دیکھ بھال نہیں کی تھی ، ایک دن آپ کا سر میرے کندھے پر تھا ، اسی دوران آپ کا سر میرے سر کی طرف ڈھلک گیا ، تو مجھے یہ اندازہ ہوا کہ شاید آپ کو میرے سر میں کچھ کرنا ہے ، آپ کے منہ سے ایک ٹھنڈا نطفہ نکلا اور میرے سینے کے اوپر آ کے گرا ، جس سے میری جلد پر کپکپی طاری ہو گئی ، مجھے یہ گمان ہوا کہ شاید آپ پر بے ہوشی طاری ہو رہی ہے ، میں نے آپ پر کپڑا ڈال دیا ، سیدنا عمر رضی اللہ عنہ اور مغیرہ بن شعبہ آئے ، ان دونوں نے اندر آنے کی اجازت مانگی ، میں نے انہیں اجازت دی ، اور میں نے پردہ کھینچ لیا ، سیدنا عمر رضی اللہ عنہ نے نبی اکرم صلی اللہ علیہ وسلم کی طرف دیکھا اور بولے : یہ تو بے ہوشی ہے ، اللہ کے رسول پر کیسی شدید بے ہوشی طاری ہوئی ہے ، پھر وہ کھڑے ہوئے ، جب وہ دروازے کے پاس پہنچے تو مغیرہ نے کہا: اے عمر ! نبی اکرم صلی اللہ علیہ وسلم کا وصال ہو گیا ہے ، سیدنا عمر رضی اللہ عنہ نے کہا: تم جھوٹ بولتے ہو ، تم ایک ایسے شخص ہو کہ آزمائش تم سے مل گئی ہے ، اللہ کے رسول کا انتقال اس وقت تک نہیں ہو گا ، جب تک اللہ تعالیٰ منافقین کو فنا نہیں کر دیتا ، پھر سیدنا ابوبکر رضی اللہ عنہ آئے ، انہوں نے پردہ ہٹایا اور نبی اکرم صلی اللہ علیہ وسلم کی طرف دیکھا اور پھر کہا: بے شک حمد اللہ تعالیٰ کے لئے مخصوص ہے ، اور بے شک ہم نے اسی کی طرف لوٹ کے جانا ہے ، اللہ کے رسول کا انتقال ہو گیا ہے ، پھر وہ سرہانے کی طرف سے نبی اکرم صلی اللہ علیہ وسلم کے پاس آئے ، انہوں نے نبی اکرم صلی اللہ علیہ وسلم کے چہرے سے کپڑا ہٹایا ، آپ کی پیشانی کو بوسہ دیا اور پھر فرمایا : ہائے افسوس ، پھر انہوں کہا: ہائے نبی پر افسوس ہے ، پھر انہوں نے نبی اکرم صلی اللہ علیہ وسلم کا سر اٹھایا ، آپ کے منہ سے کپڑا ہٹایا ، آپ کی پیشانی کو بوسہ دیا اور پھر یہ فرمایا : منتخب شدہ فرد ، پھر انہوں نے نبی اکرم صلی اللہ علیہ وسلم کا سر اٹھایا ، آپ کے منہ سے کپڑا ہٹایا اور پھر آپ کی پیشانی کو بوسہ دے کر کہا: ہائے خلیل ! اور افسوس ہے ، نبی اکرم صلی اللہ علیہ وسلم کا وصال ہو گیا ہے ، پھر وہ مسجد کی طرف گئے سیدنا عمر رضی اللہ عنہ لوگوں کو خطبہ دے رہے تھے اور بات چیت کر رہے تھے ، وہ یہ کہہ رہے تھے کہ اللہ کے رسول کا انتقال اس وقت تک نہیں ہو گا ، جب تک اللہ تعالیٰ منافقین کو ختم نہیں کر دیتا ، سیدنا ابوبکر رضی اللہ عنہ نے گفتگو شروع کی ، انہوں نے اللہ تعالیٰ کی حمد و ثناء بیان کی اور پھر یہ ارشاد فرمایا : بے شک اللہ تعالیٰ یہ فرماتا ہے : ” بے شک تم میت ہو ، اور وہ لوگ بھی میت ہیں ۔ “ انہوں نے یہ آیت پوری پڑھی ، پھر یہ آیت پڑھی : ” محمد صرف رسول ہیں ، اس سے پہلے بھی رسول گزر چکے ہیں ، اگر وہ مر جائیں یا قتل ہو جائیں ، تو کیا تم ایڑیوں کے بل گھوم جاؤ گے ؟ “ ۔ ( پھر سیدنا ابوبکر رضی اللہ عنہ نے فرمایا : ) جو شخص اللہ تعالیٰ کی عبادت کرتا تھا ، تو اللہ تعالیٰ زندہ ہے ، اسے موت نہیں آئے گی ، اور جو شخص سیدنا محمد صلی اللہ علیہ وسلم کی عبادت کرتا تھا ، تو سیدنا محمد صلی اللہ علیہ وسلم کا انتقال ہو گیا ہے ، سیدنا عمر رضی اللہ عنہ کہتے ہیں : یہ آیت اللہ کی کتاب میں موجود تھی ، لیکن مجھے یہ خیال ہی نہیں آیا کہ یہ اللہ کی کتاب میں موجود ہے ، پھر سیدنا عمر رضی اللہ عنہ نے کہا: اے لوگو ! یہ سیدنا ابوبکر رضی اللہ عنہ ہیں ، یہ مسلمانوں کے بزرگ ہیں ، تم ان کی بیعت کر لو ، تم ان کی بیعت کر لو ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ اور دیگر کتابوں میں اس روایت کا ایک حصہ مذکور ہے ۔
یہ روایت امام أحمد نے نقل کی ہے ، اور امام ابویعلیٰ نے اس کی مانند نقل کی ہے ، انہوں نے یہ الفاظ زائد نقل کیے ہیں : ” سیدنا ابوبکر رضی اللہ عنہ اندر آئے ، انہوں نے دریافت کیا : تمہارا کیا خیال ہے ؟ میں نے کہا: آپ صلی اللہ علیہ وسلم پر بے ہوشی طاری ہے ، سیدنا ابوبکر رضی اللہ عنہ آپ کے قریب آئے ، آپ کے چہرے سے کپڑا ہٹایا اور پھر بولے : ہائے کیسی بے ہوشی ہے ، کاش یہ بے ہوشی مجھ پر طاری ہوتی ، انہوں نے نبی اکرم صلی اللہ علیہ وسلم کے چہرے سے کپڑا ہٹایا اور انہیں آپ کی موت کا اندازہ ہو گیا ، تو انہوں نے کہا: بے شک حمد اللہ تعالیٰ کے لئے مخصوص ہے ، اور بے شک ہم نے اسی کی طرف لوٹ کے جانا ہے ، پھر وہ رونے لگے ، میں نے کہا: اللہ کی راہ میں وحی کا سلسلہ منقطع ہو گیا ، سیدنا جبرائیل علیہ السلام کا میرے گھر آنا منقطع ہو گیا ، پھر انہوں نے اپنا ہاتھ اپنی کنپٹی پر رکھا اور اپنی پیشانی پر رکھا اور رونے لگے ، یہاں تک کہ ان کے آنسو بہتے ہوئے نبی اکرم صلی اللہ علیہ وسلم کے چہرے پر آئے ، پھر انہوں نے نبی اکرم صلی اللہ علیہ وسلم کا چہرہ ڈھانپ دیا ، اور لوگوں کے پاس تشریف لے گئے جبکہ وہ رور ہے تھے ۔ انہوں نے فرمایا : اے مسلمانوں کے گروہ ! کیا تمہیں پتہ ہے کہ اللہ کے رسول کا انتقال ہو گیا ہے ؟ لوگوں نے کہا: جی نہیں ! پھر وہ سیدنا عمر رضی اللہ عنہ کی طرف متوجہ ہوئے ، اور بولے : اے عمر ! کیا نبی اکرم صلی اللہ علیہ وسلم کے وصال کے حوالے سے تمہارے پاس کوئی عہد ہے ؟ انہوں نے جواب دیا : جی نہیں ! پھر وہ سیدنا عمر رضی اللہ عنہ کی طرف متوجہ ہوئے اور بولے : اے عمر ! کیا تمہارے پاس اللہ کے رسول کے حوالے سے کوئی عہد ہے ؟ انہوں نے جواب دیا : جی نہیں ! تو سیدنا ابوبکر رضی اللہ عنہ نے کہا: اس ذات کی قسم ! جس کے علاوہ اور کوئی معبود نہیں ہے ، انہوں نے موت کا ذائقہ چکھ لیا ہے ، اور انہوں نے لوگوں سے کہا: کہ میں مرنے والا ہوں ، اور بیشک تم لوگ بھی مرنے والے ہو ، تو لوگ چیخ و پکار کرنے لگے اور شدید روئے ، پھر لوگوں نے نبی اکرم صلی اللہ علیہ وسلم کو آپ کے گھر والوں کے لئے چھوڑ دیا ۔ سیدنا علی بن ابوطالب رضی اللہ عنہ نے آپ کو غسل دیا ، سیدنا اسامہ بن زید رضی اللہ عنہ پانی ڈال رہے تھے ، یہاں تک کہ جب اس سے فارغ ہوئے ، تو لوگوں نے نبی اکرم صلی اللہ علیہ وسلم کو سرخ یمنی چادر میں کفن دیا اور دو چادروں میں دیا ، جو اس میں سے لی گئیں تھیں ، ان دونوں کو دھویا گیا ، پھر آپ کو پلنگ پر لٹا دیا گیا ، پھر لوگوں کو اندر آنے کی اجازت دی گئی ، لوگ گروہوں کی شکل میں اندر آنے لگے ، اور کسی امام کے بغیر آپ کے لئے دعائے رحمت کرنے لگے ، یہاں تک کہ مدینہ منورہ میں کوئی بھی آزاد یا غلام ایسا نہیں رہا ، جس نے آپ کی نماز جنازہ ادا نہ کی ہو ( یا آپ کے لئے دعائے رحمت نہ کی ہو ) پھر نبی اکرم صلی اللہ علیہ وسلم کو دفن کرنے کے بارے میں لوگوں کے درمیان اختلاف ہوا کہ آپ کو کہاں دفن کیا جائے ؟ کسی نے کہا: اس لکڑی کے پاس ، جس کو آپ اپنے ہاتھ میں پکڑتے تھے یا آپ کے منبر کے نیچے موجود ہے ، کسی نے کہا: آپ کو جنت البقیع میں دفن کیا جائے ، جہاں آپ اپنے مرحومین کو دفن کرتے تھے ، کچھ لوگوں نے کہا: ہم ایسا نہیں کریں گے ، کیونکہ پھر ایسا ہو گا کہ کسی غلام یا کنیز کا آقا اس پر غصے ہو گا ، تو وہ شخص نبی اکرم صلی اللہ علیہ وسلم کی قبر کی پناہ لے گا ، اور یہ چیز معمول بن جائے گی ، پھر ان لوگوں نے اس بات پر اتفاق کیا کہ نبی اکرم صلی اللہ علیہ وسلم کو آپ کے گھر میں ، آپ کے بستر کے نیچے ہی دفن کیا جائے ، جہاں آپ کی روح قبض ہوئی تھی ۔ جب سیدنا ابوبکر رضی اللہ عنہ کا انتقال ہوا ، تو انہیں آپ کے ساتھ دفن کیا گیا ، جب سیدنا عمر رضی اللہ عنہ کا آخری وقت قریب آیا ، تو انہوں نے یہ وصیت کی : کہ جب میں مر جاؤں ، تو میری میت اٹھا کے سیدہ عائشہ رضی اللہ عنہا کے گھر کے دروازے کے پاس لے جانا ، اور ان سے یہ کہنا کہ یہ عمر بن خطاب آپ کو سلام کہہ رہا ہے ، اور یہ کہہ رہا ہے کہ کیا میں اندر آ جاؤں ؟ یا باہر چلا جاؤں ؟ تو سیدہ عائشہ رضی اللہ عنہا کچھ دیر خاموش رہیں ، پھر انہوں نے فرمایا : انہیں اندر داخل کرو اور انہیں ان کے ساتھ دفن کر دو ( راوی بیان کرتے ہیں : ) سیدنا ابوبکر رضی اللہ عنہ نبی اکرم صلی اللہ علیہ وسلم کے دائیں طرف ہیں اور سیدنا عمر رضی اللہ عنہ آپ کے بائیں طرف ہیں ۔ سیدہ عائشہ رضی اللہ عنہا بیان کرتی ہیں : جب سیدنا عمر رضی اللہ عنہ کو وہاں دفن کر دیا گیا ، تو میں ( حجرے میں داخل ہوتے وقت ) چادر اوڑھ لیا کرتی تھی ۔ راوی بیان کرتے ہیں : سیدہ عائشہ رضی اللہ عنہا سے دریافت کیا گیا : آپ چادر کیوں اوڑھتی تھیں ؟ تو انہوں نے فرمایا : پہلے وہاں میرے شوہر تھے ، اور ایک میرے والد تھے ، جب سیدنا عمر رضی اللہ عنہ کو دفن کر دیا گیا ، تو میں نے چادر اوڑھنا شروع کر دی ۔ امام أحمد کے رجال ثقہ ہیں ، امام ابویعلیٰ کی سند میں ایک راوی عوید بن ابوعمران ہے ، جسے ابن حبان نے ثقہ قرار دیا ہے ، اور جمہور نے اسے ضعیف کہا: ہے ، بعض حضرات نے یہ کہا: ہے : یہ متروک ہے ۔

سیدہ اسماء بنت عمیس رضی اللہ عنہا بیان کرتی ہیں : نبی اکرم صلی اللہ علیہ وسلم کی بیماری کا آغاز سیدہ میمونہ رضی اللہ عنہا کے گھر میں ہوا ، آپ کی بیماری شدید ہو گئی ، تو آپ پر بے ہوشی طاری ہو جاتی تھی ، آپ کی ازواج نے باہمی مشورے سے یہ طے کیا کہ آپ کے منہ میں دوائی ٹپکائی جائے ، انہوں نے آپ کے منہ میں دوا ٹپکائی ، جب آپ کو ہوش آیا تو آپ نے فرمایا : یہ کس نے کیا ہے ؟ ہم نے عرض کی : یہ ان خواتین نے کیا ہے جو اس طرف سے آئی ہیں ، انہوں نے حبشہ کی سرزمین کی طرف اشارہ کیا ، سیدہ اسماء بنت عمیس رضی اللہ عنہا بھی ان خواتین میں شامل تھیں ، لوگوں نے کہا: یا رسول اللہ ! ہمیں آپ کے بارے میں یہ اندیشہ تھا کہ کہیں آپ کو ذات الجنب کی شکایت نہ ہو ، تو نبی اکرم صلی اللہ علیہ وسلم نے ارشاد فرمایا : وہ ایک ایسی بیماری ہے کہ اللہ تعالیٰ مجھے اس میں مبتلا نہیں کرے گا ، اب گھر میں موجود شخص کے منہ میں دوائی ٹپکائی جائے ، البتہ اللہ کے رسول صلی اللہ علیہ وسلم کے چچا کا معاملہ مختلف ہے ، نبی اکرم صلی اللہ علیہ وسلم کی مراد سیدنا عباس رضی اللہ عنہ تھے ۔ راوی خاتون بیان کرتی ہیں : تو سیدہ میمونہ رضی اللہ عنہا نے بھی اس دن اپنے منہ میں دوا ٹپکائی ، حالانکہ وہ روزہ رکھے ہوئے تھیں ، انہوں نے نبی اکرم صلی اللہ علیہ وسلم کی تاکید کی وجہ سے ایسا کیا تھا ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے سیدنا عباس رضی اللہ عنہ کی نقل کردہ حدیث کتاب الخلافہ میں گزر چکی ہے ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے وصال کے قریب ایک صحیفہ منگوایا ، تاکہ اس میں کچھ ایسی چیز لکھ دیں کہ جس کے بعد لوگ کبھی گمراہ نہ ہوں ، راوی کہتے ہیں : سیدنا عمر بن خطاب رضی اللہ عنہ نے اس بارے میں مختلف بات کی ، تو نبی اکرم صلی اللہ علیہ وسلم نے اسے پرے کر دیا ۔
یہ روایت امام أحمد نے نقل کی ہے ، اس کی سند میں ایک راوی ابن لہیعہ ہے ، اور اس میں اختلاف پایا جاتا ہے ۔

سیدنا عمر بن خطاب رضی اللہ عنہ بیان کرتے ہیں : جب نبی اکرم صلی اللہ علیہ وسلم بیمار ہوئے ، تو آپ نے فرمایا : میرے پاس ایک صحیفہ اور دوات لے کر آؤ ، تاکہ میں تمہارے لئے ایسی تحریر لکھ دوں ، کہ تم میرے بعد کبھی گمراہ نہیں ہو گے ، راوی کہتے ہیں : تو ہمیں یہ بات بہت گراں گزری ، پھر نبی اکرم صلی اللہ علیہ وسلم نے فرمایا : میرے پاس صحیفہ لے کر آؤ ، تاکہ میں تمہارے لئے ایسی تحریر لکھ دوں جس کے بعد تم کبھی گمراہ نہیں ہو گے ، تو پردے کے پیچھے سے خواتین نے کہا: کیا یہ لوگ وہ بات نہیں سن رہے ؟ جو نبی اکرم صلی اللہ علیہ وسلم ارشاد فرما رہے ہیں ، تو میں نے کہا: تم لوگ سیدنا یوسف علیہ السلام کے زمانے کی خواتین کی طرح ہو ، جب اللہ کے رسول صلی اللہ علیہ وسلم بیمار ہوئے تھے ، تو تم نے اپنی آنکھیں نچوڑ لی تھیں ، تو اب جب وہ تندرست ہو رہے ہیں ، تو تم ان کی گردن پر سوار ہو رہی ہو ، تو نبی اکرم صلی اللہ علیہ وسلم نے فرمایا : ان کو رہنے دو ! کیونکہ یہ تم لوگوں سے بہتر ہیں ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی محمد بن جعفر بن ابراہیم جعفری ہے ، عقیلی کہتے ہیں : اس کی نقل کردہ روایت میں غور و فکر کی گنجائش ہے ، اس روایت کے بقیہ رجال کی توثیق کی گئی ہے ، اس کے بعض راویوں میں اختلاف پایا جاتا ہے ۔

سیدنا عبداللہ بن مسعود رضی اللہ عنہ فرماتے ہیں : میں نو مرتبہ یہ قسم اٹھاؤں کہ اللہ کے رسول کو قتل کیا گیا تھا ، یہ میرے نزدیک اس سے زیادہ محبوب ہو گا کہ میں ایک مرتبہ یہ قسم اٹھاؤں کہ آپ کو قتل نہیں گیا ، اس کی وجہ یہ ہے کہ اللہ تعالیٰ نے آپ کو نبی بھی بنایا اور اس نے آپ کو شہید کے مرتبے پر بھی فائز کیا ۔ اعمش کہتے ہیں : میں نے اس بات کا تذکرہ ابراہیم نخعی سے کیا ، تو انہوں نے فرمایا : لوگ یہ سمجھتے تھے کہ یہودیوں نے نبی اکرم صلی اللہ علیہ وسلم کو اور سیدنا ابوبکر رضی اللہ عنہ کو زہر دیا تھا ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم کا وصال ذات الجنب کی بیماری سے ہوا ۔
یہ روایت امام طبرانی نے معجم اوسط میں نقل کی ہے ، اور امام ابویعلیٰ نے اس کی مانند نقل کی ہے ، اس کی سند میں ایک راوی ابن لہیعہ ہے ، اور اس میں ضعف پایا جاتا ہے ، اس روایت کے بقیہ رجال ثقہ ہیں ۔

سیدہ ام فضل بنت حارث رضی اللہ عنہا ، جو سیدنا عباس رضی اللہ عنہ کی اُم ولد ہیں ، اور سیدہ میمونہ رضی اللہ عنہا کی بہن ہیں ، وہ بیان کرتی ہیں : میں نبی اکرم صلی اللہ علیہ وسلم کی بیماری کے دوران آپ کے پاس آئی ، میں رونے لگی ، نبی اکرم صلی اللہ علیہ وسلم نے سر اٹھا کر دیکھا اور دریافت کیا : تم کیوں رو رہی ہو ؟ میں نے عرض کی : ہمیں آپ کے حوالے سے اندیشہ ہے ، ہمیں نہیں پتہ یا رسول اللہ ! آپ کے بعد ہمیں لوگوں کے حوالے سے کس صورت حال کا سامنا کرنا پڑے گا ؟ نبی اکرم صلی اللہ علیہ وسلم نے فرمایا : تم میرے بعد کمزور ہو گے ۔
یہ روایت امام أحمد نے نقل کی ہے ، اس کی سند میں ایک راوی یزید بن ابوزیاد ہے ، جسے ایک جماعت نے ضعیف قرار دیا ہے ۔

سیدنا علی بن حسین رضی اللہ عنہ ( یعنی امام زین العابدین ) بیان کرتے ہیں : میں نے اپنے والد کو یہ بیان کرتے ہوئے سنا ہے : ” نبی اکرم صلی اللہ علیہ وسلم کی وفات سے پہلے سیدنا جبرائیل علیہ السلام آپ کے پاس آئے اور بولے : اے سیدنا محمد ( صلی اللہ علیہ وسلم ) ! اللہ تعالیٰ نے مجھے آپ کی عزت افزائی کے لئے اور آپ کی فضیلت کے اظہار کے لئے اور بطور خاص آپ کے لئے ، آپ کے پاس بھیجا ہے ، تاکہ میں آپ سے اس چیز کے بارے میں دریافت کروں ، جس کے بارے میں پروردگار آپ سے بھی زیادہ بہتر جانتا ہے ، اس نے یہ فرمایا ہے : آپ کیسا محسوس کر رہے ہیں ؟ تو نبی اکرم صلی اللہ علیہ وسلم نے فرمایا : اے جبرائیل ! میں اپنے آپ کو پریشان محسوس کر رہا ہوں ، اے جبرائیل ! میں خود کو مشکل میں محسوس کر رہا ہوں ، جب تیسرا دن آیا ، تو سیدنا جبرائیل نازل ہوئے اور ان کے ساتھ ملک الموت نازل ہوئے ، اور ان دونوں کے ساتھ ایک فرشتہ تھا ، جو ہوا میں تھا ، اس کا نام اسماعیل تھا ، وہ ستر ہزار فرشتوں کے ساتھ تھا ، اس میں سے ہر ایک فرشتے کے ساتھ مزید ستر ہزار فرشتے تھے ، وہ سیدنا جبرائیل علیہ السلام کے ساتھ آئے تھے ، سیدنا جبرائیل علیہ السلام نے کہا: اے سیدنا محمد ( صلی اللہ علیہ وسلم ) ! اللہ تعالیٰ نے آپ کی عزت افزائی کے لئے آپ کی فضیلت کے اظہار کے لئے بطور خاص آپ کی طرف مجھے بھیجا ہے ، تاکہ میں آپ سے اس چیز کے بارے میں دریافت کروں ، جس کے بارے میں پروردگار آپ سے بھی زیادہ بہتر جانتا ہے ، وہ یہ فرما رہا ہے : آپ کیسا محسوس کر رہے ہیں ؟ نبی اکرم صلی اللہ علیہ وسلم نے فرمایا : اے جبرائیل ! میں خود کو غمگین محسوس کر رہا ہوں ، اے جبرائیل ! میں خود کو پریشان محسوس کر رہا ہوں ، راوی بیان کرتے ہیں : پھر ملک الموت نے دروازے پر اندر آنے کی اجازت مانگی ، سیدنا جبرائیل نے کہا: اے سیدنا محمد ( صلی اللہ علیہ وسلم ) یہ ملک الموت ہے ، یہ آپ سے اجازت مانگ رہا ہے ، اس نے آپ سے پہلے کسی شخص سے اجازت نہیں مانگی ، اور یہ آپ کے بعد بھی کبھی کسی سے اجازت نہیں مانگے گا ، نبی اکرم صلی اللہ علیہ وسلم نے فرمایا : اسے اجازت دے دو ! سیدنا جبرائیل علیہ السلام نے اسے اجازت دی وہ آیا اور نبی اکرم صلی اللہ علیہ وسلم کے سامنے آ کے ٹھہر گیا ، اس نے عرض کی : اے سیدنا محمد ( صلی اللہ علیہ وسلم ) ! اللہ تعالیٰ نے مجھے آپ کی طرف بھیجا ہے ، اس نے مجھے یہ حکم دیا ہے کہ آپ مجھے جو حکم دیں گے میں اس کے بارے میں آپ کی اطاعت کروں گا ، اگر آپ مجھے یہ حکم دیتے ہیں کہ میں آپ کی جان قبض کر لوں ، تو میں اسے قبض کر لوں گا ، اور اگر آپ اسے ناپسند کرتے ہیں تو میں اسے چھوڑ دوں گا ، نبی اکرم صلی اللہ علیہ وسلم نے دریافت کیا : اے ملک الموت کیا تم ایسا ہی کرو گے ؟ اس نے کہا: جی ہاں ، مجھے اسی بات کا حکم دیا گیا ہے کہ آپ مجھے جو ہدایت کریں گے اس کے بارے میں ، میں آپ کی اطاعت کروں گا ، سیدنا جبرائیل نے نبی اکرم صلی اللہ علیہ وسلم سے کہا: اللہ تعالیٰ آپ سے ملاقات کا مشتاق ہے ، تو نبی اکرم صلی اللہ علیہ وسلم نے فرمایا : تم اس چیز کو جاری کرو جس کا تمہیں حکم دیا گیا ہے ، تو سیدنا جبرائیل نے ان سے کہا: یہ میرا زمین پر آخری مرتبہ آنا ہے ، دنیا میں مجھے آپ سے ہی کام تھا ۔ جب نبی اکرم صلی اللہ علیہ وسلم کا وصال ہو گیا ، تو ایک تعزیت کرنے والی کوئی چیز آئی تھی ، اس کی آمد کا تو پتہ چلتا تھا ، اس کی آہٹ کا احساس ہوتا تھا ، لیکن اس کا وجود نظر نہیں آتا تھا ، اس نے کہا: آپ پر سلام ہو ، اللہ تعالیٰ کی رحمتیں اور برکتیں نازل ہوں ، ہر جان نے موت کا ذائقہ چکھنا ہے ، بے شک اللہ تعالیٰ کی طرف سے ہی ہر مصیبت کا بدلہ ہو سکتا ہے ، اور اللہ تعالیٰ کی طرف سے ، ہر ہلاک ہونے والے کا بدلہ مل سکتا ہے ، اور ہر فوت ہونے والے کی جگہ بدل مل سکتا ہے ، تو تم لوگ اللہ تعالیٰ پر یقین رکھو ، اور اس سے ثواب کی امید رکھو ، کیونکہ مصیبت زدہ وہ شخص ہوتا ہے ، جو ثواب سے محروم رہے ، تم پر سلام ہو اور اللہ تعالیٰ کی رحمتیں ہوں ۔ “
یہ روایت امام طبرانی نے نقل کی ہے ، اس کی سند میں ایک راوی عبداللہ بن میمون قداح ہے ، اور وہ ذاہب الحدیث ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کا انتقال اس گوشت کو کھانے کی وجہ سے ہوا تھا ، جس میں یہودی عورت نے زہر ملایا تھا ، اس کی وجہ سے ایک سال تک آپ کو گلا کٹتا ہوا محسوس ہوتا تھا ، آپ یہ فرماتے تھے : مجھے مسلسل اس کی تکلیف محسوس ہوتی ہے ۔
یہ روایت امام طبرانی نے نقل کی ہے ، اور اس کی سند حسن ہے ۔

سیدہ عائشہ صدیقہ رضی اللہ عنہا بیان کرتی ہیں : مجھ پر کوئی رات ایسی نہیں گزری ، جو اس رات کی مانند تھی ، جب نبی اکرم صلی اللہ علیہ وسلم نے ارشاد فرمایا : اے عائشہ ! کیا صبح صادق ہو گئی ہے ؟ میں نے جواب دیا : جی نہیں ! یہاں تک کہ بلال رضی اللہ عنہ نے فجر کی اذان دی ، پھر بلال رضی اللہ عنہ آئے نبی اکرم صلی اللہ علیہ وسلم نے دریافت کیا : یہ کون ہے ؟ میں نے عرض کی : یہ بلال ہے ، نبی اکرم صلی اللہ علیہ وسلم نے فرمایا : اے بلال ! ابوبکر سے کہو کہ وہ لوگوں کو نماز پڑھا دے ۔
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : جب نبی اکرم صلی اللہ علیہ وسلم کی وفات کا وقت قریب آیا ، تو آپ نے ہاتھ کو بڑھا کر یہ فرمایا : جبرائیل تم کہاں تھے ؟ پھر آپ نے ہاتھ کو بند کر لیا اور پھر اسے پھیلایا ، ایسا چند مرتبہ کیا اور آپ یہی فرما رہے تھے : اے جبرائیل ! میرے پروردگار کی بارگاہ میں میری سفارش کرو کہ وہ مجھ پر موت کو آسان کر دے ۔ پھر سیدنا ابوہریرہ رضی اللہ عنہ نے یہ بات ذکر کی : کہ انہوں نے سیدہ عائشہ رضی اللہ عنہا کو یہ بیان کرتے ہوئے سنا ہے کہ میں نے وہ بات سنی تھی جو آپ نے نہیں سنی ، سیدنا جبرائیل علیہ السلام نے اس وقت یہ کہا: تھا : میں حاضر ہوں ، میں حاضر ہوں ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی حسین بن عبداللہ بن ضمیرہ ہے ، اور وہ کذاب ہے ۔

سیدنا عبداللہ بن عباس رضی اللہ عنہما بیان کرتے ہیں : ملک الموت نبی اکرم صلی اللہ علیہ وسلم کے پاس بیماری کے دوران آیا ، جس میں نبی اکرم صلی اللہ علیہ وسلم کا وصال ہوا ، تو اس نے اندر آنے کی اجازت مانگی ، نبی اکرم صلی اللہ علیہ وسلم کا سر سیدنا علی رضی اللہ عنہ کی گود میں تھا ، اس نے کہا: السلام علیکم ورحمۃ اللہ و برکاتہ ، سیدنا علی رضی اللہ عنہ نے اس سے کہا: تم واپس چلے جاؤ ! کیونکہ ہم ابھی تم سے ملنے کے حوالے سے مصروف ہیں ، نبی اکرم صلی اللہ علیہ وسلم نے فرمایا : اے ابوالحسن ! کیا تم جانتے ہو کہ یہ کون ہے ؟ یہ ملک الموت ہے ( پھر آپ صلی اللہ علیہ وسلم نے اس سے فرمایا : ) تم کامیابی کے ساتھ اندر آ جاؤ ، جب وہ اندر آئے ، تو اس نے کہا: آپ کے پروردگار نے آپ کو سلام کہا: ہے ، نبی اکرم صلی اللہ علیہ وسلم نے دریافت کیا : جبرائیل کہاں ہے ؟ انہوں نے کہا: وہ میرے قریب نہیں ہیں ، ابھی وہ آ جاتے ہیں ، پھر ملک الموت باہر چلا گیا ، یہاں تک کہ سیدنا جبرائیل علیہ السلام آپ کے پاس آئے ، سیدنا جبرائیل علیہ السلام نے دروازے پر کھڑے ہو کر ان سے دریافت کیا : اے ملک الموت تم باہر کیوں آ گئے ہو ؟ اس نے کہا: سیدنا محمد صلی اللہ علیہ وسلم تمہیں طلب کر رہے ہیں ، جب وہ دونوں بیٹھ گئے ، تو سیدنا جبرائیل علیہ السلام نے کہا: اے ابوالقاسم ! آپ پر سلام ہو ، یہ میری طرف سے اور آپ کی طرف سے الوداعی ہے ۔ راوی کہتے ہیں : مجھ تک یہ روایت پہنچی ہے کہ ملک الموت نے نبی اکرم صلی اللہ علیہ وسلم سے پہلے کسی کو سلام نہیں کیا ، اور آپ کے بعد بھی وہ کسی کو سلام نہیں کرے گا ۔
یہ روایت امام طبرانی نے نقل کی ہے ، اس کی سند میں ایک راوی مختار بن نافع ہے ، اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کی بیماری شدید ہو گئی ، آپ کے پاس سیدہ عائشہ رضی اللہ عنہا اور سیدہ حفصہ رضی اللہ عنہا موجود تھیں ، اسی دوران سیدنا علی رضی اللہ عنہ اندر آئے ، نبی اکرم صلی اللہ علیہ وسلم نے جب انہیں دیکھا تو آپ نے سر اٹھایا اور فرمایا : میرے قریب آ جاؤ ! میرے قریب آ جاؤ ! انہوں نے نبی اکرم صلی اللہ علیہ وسلم کو ٹیک دی اس کے بعد وہ مسلسل نبی اکرم صلی اللہ علیہ وسلم کے پاس رہے ، یہاں تک کہ آپ کا وصال ہو گیا ، جب ایسا ہو گیا ، تو سیدنا علی رضی اللہ عنہ اُٹھے ، انہوں نے دروازہ بند کیا ، سیدنا عباس رضی اللہ عنہ آئے ، ان کے ساتھ جناب عبدالمطلب کی اولاد کے افراد تھے ، وہ لوگ دروازے پر کھڑے ہو گئے ، سیدنا علی رضی اللہ عنہ نے یہ کہنا شروع کیا : میرے والد آپ پر قربان ہوں ، آپ زندگی میں بھی پاکیزہ تھے ، اور مرنے کے بعد بھی پاکیزہ ہیں ، آپ کی طرف سے پاکیزہ خوشبو اوپر گئی ہے ، ان لوگوں نے اس کی مانند کبھی کوئی چیز نہیں پائی تھی ، پھر انہوں نے کہا: ارے عورتوں کی طرح رونا چھوڑو اور اپنے آقا کی طرف متوجہ ہو جاؤ ، پھر فضل بن عباس کو میرے پاس بھیجو ، انصار نے کہا: ہم آپ کو اللہ کا واسطہ دے کر یہ کہتے ہیں ، اور اللہ کے رسول کی بارگاہ میں ہمیں جو قرب حاصل تھا ، اس کا واسطہ دے کر یہ کہتے ہیں کہ ہم میں سے بھی ایک شخص کو اندر لے جائیں ، ان صاحب کا نام سیدنا اوس بن خولی رضی اللہ عنہ تھا ، انہوں نے مٹکے کو ایک طرف سے اٹھایا ہوا تھا ، انہوں نے گھر میں یہ آواز سنی کہ تم لوگ اللہ کے رسول کے کپڑے نہ اتارو ، اور تم انہیں کپڑوں میں ہی غسل دے دو ، تو سیدنا علی رضی اللہ عنہ نے قمیص کے اندر ہاتھ داخل کر کے آپ کو غسل دیا ، سیدنا فضل رضی اللہ عنہ کپڑے کو تھامے ہوئے تھے ، اور انصاری شخص پانی منتقل کر رہا تھا ، سیدنا علی رضی اللہ عنہ کے ہاتھ پر ایک کپڑا تھا ، جسے وہ قمیص کے نیچے اپنے ہاتھ کے ساتھ داخل کر رہے تھے ۔ علامہ ہیثمی فرماتے ہیں : ) میں یہ کہتا ہوں : امام ابن ماجہ نے اس روایت کا کچھ حصہ نقل کیا ہے ۔
یہ روایت امام طبرانی نے معجم اوسط اور معجم کبیر میں نقل کی ہے ، اس کی سند میں ایک راوی یزید بن ابوزیاد ہے ، اور وہ ضعیف ہونے کے باوجود حسن الحدیث ہے ، اس روایت کے بقیہ رجال ثقہ ہیں ۔

سیدنا علی رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے یہ تلقین کی تھی کہ آپ صلی اللہ علیہ وسلم کو میرے علاوہ اور کوئی غسل نہ دے ، آپ نے فرمایا تھا : جو شخص بھی میری شرمگاہ کو دیکھے گا ، اس کی بینائی ختم ہو جائے گی ۔ سیدنا علی رضی اللہ عنہ بیان کرتے ہیں : تو سیدنا عباس رضی اللہ عنہ اور سیدنا اسامہ رضی اللہ عنہ مجھے پردے کے پیچھے سے پانی پکڑا رہے تھے ۔
یہ روایت امام بزار نے نقل کی ہے ، اس کی سند میں ایک راوی یزید بن بلال ہے ، بخاری کہتے ہیں : اس میں غور و فکر کی گنجائش ہے ، اس روایت کے بقیہ رجال کی توثیق کی گئی ہے ، اس راوی کے بارے میں اختلاف پایا جاتا ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” ہر نبی کی جان قبض ہوتی ہے ، پھر وہ ثواب دیکھتا ہے ، پھر وہ جان اس کی طرف لوٹا دی جاتی ہے ، پھر اسے یہ اختیار دیا جاتا ہے کہ یا تو اس جان کو لوٹا دیا جائے ، یا پھر یہ ہے کہ وہ آگے چلا جائے ۔ “ سیدہ عائشہ رضی اللہ عنہا کہتی ہیں : تو میں نے یہ بات یاد رکھی ہوئی تھی ، ایک مرتبہ نبی اکرم صلی اللہ علیہ وسلم نے میرے سینے کے ساتھ ٹیک لگائی ہوئی تھی ، میں آپ کی طرف دیکھ رہی تھی ، اس دوران آپ کی گردن ڈھلک گئی ، میں نے سوچا شاید آپ کا انتقال ہو گیا ہے ، لیکن پھر مجھے وہ بات یاد آ گئی ، جو آپ نے ارشاد فرمائی تھی ، میں نے نبی اکرم صلی اللہ علیہ وسلم کی طرف دیکھا ، آپ اُٹھے ، آپ نے نظر کی ، میں نے کہا: ایسی صورت میں تو آپ صلی اللہ علیہ وسلم ہمیں اختیار نہیں کریں گے ، تو نبی اکرم صلی اللہ علیہ وسلم نے فرمایا : میں جنت میں رفیق اعلیٰ کا ساتھ چاہتا ہوں ، ان لوگوں کا ساتھ جن پر اللہ تعالیٰ نے انعام کیا ، جن کا تعلق انبیاء اور صدیقین سے ہے ۔ ۔ ۔ ۔ ۔ ۔ ۔ ۔ “ ۔ یہ آیت کے آخر تک تلاوت کیا ۔

ایک روایت میں یہ الفاظ ہیں : ” وہ رفیق اعلیٰ جو سب سے زیادہ سعادت والا ہے ۔ “
یہ روایت امام أحمد نے اور امام طبرانی نے معجم اوسط میں نقل کی ہے ، تاہم انہوں نے یہ الفاظ نقل کیے ہیں : سیدہ عائشہ رضی اللہ عنہا بیان کرتی ہیں : نبی اکرم صلی اللہ علیہ وسلم کا وصال میری گردن اور سینے کے درمیان ہوا تھا ، سیدہ عائشہ رضی اللہ عنہا کہتی ہیں : میرا یہ گمان تھا کہ اللہ تعالیٰ آپ کی روح کو آپ کی طرف واپس کرے گا ، سیدہ عائشہ رضی اللہ عنہا بیان کرتی ہیں : انبیاء کرام کے ساتھ اسی طرح ہوتا ہے ، پھر نبی اکرم صلی اللہ علیہ وسلم نے حرکت کی ، تو میں نے سوچا کہ اگر آج آپ کو اختیار دیا بھی گیا ، تو آپ ہمیں اختیار نہیں کریں گے ۔ امام أحمد کی دو اسناد میں سے ایک کے رجال ” صحیح “ کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : جب نبی اکرم صلی اللہ علیہ وسلم کا وصال ہوا ، اور جب آپ کی جان نکلی ، تو میں نے اس سے زیادہ پاکیزہ خوشبو کبھی نہیں سونگھی ۔
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے اپنی بیماری کے دوران پردہ ہٹایا اور دروازہ کھولا اور لوگوں کی طرف دیکھا ، جو سیدنا ابوبکر رضی اللہ عنہ کے پیچھے نماز ادا کر رہے تھے ، آپ اس بات پر خوش ہوئے اور آپ نے ارشاد فرمایا : ” ہر طرح کی حمد ، اللہ تعالیٰ کے مخصوص ہے ، کسی بھی نبی کا انتقال اس وقت تک نہیں ہوا جب تک اس کی امت کے کسی فرد نے اس کی امامت نہیں کی ۔ “ پھر آپ لوگوں کی طرف متوجہ ہوئے اور آپ صلی اللہ علیہ وسلم نے فرمایا : ” اے لوگو ! میرے بعد جس کسی کو جس مصیبت کا سامنا کرنا پڑے ، تو وہ میری مصیبت کے حوالے سے اپنی اس مصیبت میں خود کو دلاسہ دے ، جو مصیبت اسے لاحق ہو گی ، کیونکہ میرے بعد میری امت کو میری جدائی جیسی مصیبت کبھی لاحق نہیں ہو گی ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبداللہ بن جعفر ہے ، جو علی بن مدینی کا والد ہے ، اور وہ ضعیف ہے ۔

سیدنا ابوموسیٰ اشعری رضی اللہ عنہ بیان کرتے ہیں : نبی اکرم صلی اللہ علیہ وسلم پر بے ہوشی طاری ہوئی ، آپ اس وقت سیدہ عائشتہ رضی اللہ عنہا کی گود میں تھے ، نبی اکرم صلی اللہ علیہ وسلم کو ہوش آیا تو سیدہ عائشہ رضی اللہ عنہا آپ کے سینے پر ہاتھ پھیر رہی تھیں اور آپ کے لئے شفاء کی دعا کر رہی تھیں ، نبی اکرم صلی اللہ علیہ وسلم نے فرمایا : جی نہیں ! بلکہ میں اللہ تعالیٰ سے سب سے زیادہ سعادت مند رفیق اعلیٰ ، جبرائیل ، میکائیل اور اسرافیل کا سوال کرتا ہوں ۔ “
یہ روایت امام طبرانی نے نقل کی ہے ، اس کی سند میں ایک راوی محمد بن سلام جمحی ہے ، اور وہ ثقہ ہے ، اور اس میں ضعف پایا جاتا ہے ، اس روایت کے بقیہ رجال ثقہ ہیں ۔

سیدنا ابوعسیب رضی اللہ عنہ ، یا شاید سیدنا ابوعسیم رضی اللہ عنہ بیان کرتے ہیں : بہز نامی راوی کہتے ہیں : انہیں : نبی اکرم صلی اللہ علیہ وسلم کے جنازے میں شریک ہونے کا شرف حاصل ہے ، لوگوں نے یہ کہا: کہ ہم آپ کی نماز جنازہ کیسے ادا کریں ؟ تو انہوں نے کہا: تم لوگ ٹولیوں کی شکل میں اندر داخل ہو جاؤ ، پھر وہ لوگ اس دروازے سے داخل ہوتے تھے ، آپ کے لئے دعائے رحمت کرتے تھے ، پھر دوسرے دروازے سے نکل جاتے تھے ۔ راوی بیان کرتے ہیں : جب نبی اکرم صلی اللہ علیہ وسلم کو لحد میں رکھا گیا ، تو سیدنا مغیرہ رضی اللہ عنہ نے کہا: آپ کے پاؤں میں سے کوئی چیز باقی رہ گئی ہے ، جس کو انہوں نے ٹھیک نہیں کیا ، لوگوں نے کہا: آپ اندر جائیں اور اسے ٹھیک کر دیں ، وہ اندر گئے ، انہوں نے اپنا ہاتھ داخل کیا ، نبی اکرم صلی اللہ علیہ وسلم کے پاؤں کو چھوا اور بولے : اس پر مٹی ڈالو ! انہوں نے وہاں پر مٹی ڈالی ، یہاں تک کہ وہ آپ کی نصف پنڈلیوں تک پہنچ گئے ، پھر وہ باہر آ گئے اور انہوں نے یہ کہا: کہ تم سب کے مقابلے میں ، نبی اکرم صلی اللہ علیہ وسلم سے سب سے آخری ملاقات میری ہوئی ہے ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : میں اپنے گھر کے اس حصے میں داخل ہوتی تھی ، جس میں نبی اکرم صلی اللہ علیہ وسلم کی قبر مبارک تھی اور میرے والد کی قبر تھی ، تو میں سر پر چادر نہیں لیتی تھی اور یہ کہتی تھی : ایک میرے شوہر ہیں اور ایک میرے والد ہیں ، جب سیدنا عمر رضی اللہ عنہ کو ان کے ساتھ دفن کیا گیا ، تو اللہ کی قسم ! میں جب بھی اس حصے میں داخل ہوتی تھی ، تو سیدنا عمر رضی اللہ عنہ سے حیاء کی وجہ سے چادر اوڑھ کر رکھتی تھی ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کی قبر مبارک میں سیدنا عباس ، سیدنا علی اور سیدنا فضل رضی اللہ عنہم داخل ہوئے تھے ، انصار سے تعلق رکھنے والے ایک شخص نے آپ کی لحد تیار کی تھی ، یہ وہی شخص تھا ، جس نے غزوہ احد کے موقع پر شہداء کی قبریں تیار کی تھیں ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابن ماجہ نے اس سے زیادہ طویل روایت کے طور پر نقل کی ہے ، اور اس میں سیدنا عباس رضی اللہ عنہ کا ذکر نہیں ہے ، اور نہ ہی نبی اکرم صلی اللہ علیہ وسلم کی لحد تیار کرنے والے شخص کا ذکر ہے ۔
یہ روایت امام بزار نے اپنے استاد ایوب بن منصور کے حوالے سے نقل کی ہے ، اسے اس حدیث میں وہم ہوا ہے ، جو روایت امام ابوداؤد نے اس کے حوالے سے نقل کی ہے ، اس روایت کے بقیہ رجال ” صحیح “ کے رجال ہیں ۔

سیدنا عبداللہ بن عمر رضی اللہ عنہما بیان کرتے ہیں : جب نبی اکرم صلی اللہ علیہ وسلم کا وصال ہو گیا ، تو سیدنا ابوبکر رضی اللہ عنہ مدینہ منورہ کے نواحی علاقے میں تھے ، وہ نبی اکرم صلی اللہ علیہ وسلم کے پاس آئے ، انہوں نے اپنے منہ کو نبی اکرم صلی اللہ علیہ وسلم کی پیشانی پر رکھا اور آپ کو بوسہ دینے لگے اور یہ کہنے لگے کہ میرے ماں باپ آپ پر قربان ہوں آپ زندگی اور موت ، ہر حال میں پاکیزہ ہیں ، جب وہ باہر نکلے تو وہ سیدنا عمر رضی اللہ عنہ کے پاس سے گزرے ، جو یہ کہہ رہے تھے : اللہ کی قسم ! اللہ کے رسول کا انتقال نہیں ہوا ، اور آپ کا انتقال اس وقت تک نہیں ہو گا ، جب تک آپ منافقین کو قتل نہیں کر دیتے ، وہ یہ کہہ رہے تھے : منافقین ، تو اللہ کے رسول صلی اللہ علیہ وسلم کے وصال کی وجہ سے خوشخبری حاصل کریں گے ، اور اپنے سر اٹھا لیں گے ، سیدنا ابوبکر رضی اللہ عنہ ان کے پاس سے گزرے اور بولے : اے شخص ! اپنے آپ پر ق ابورکھو ، اللہ کے رسول صلی اللہ علیہ وسلم کا انتقال ہو گیا ہے ، کیا تم نے اللہ تعالیٰ کو یہ ارشاد فرماتے ہوئے نہیں سنا ہے : ” بے شک تم میت ہو اور بے شک وہ لوگ بھی میت ہیں ۔ “ اور ہم نے تم سے پہلے کسی بشر کے لئے ہمیشہ رہنا نہیں رکھا ، اگر تم مر جاؤ ، تو کیا وہ لوگ ہمیشہ رہیں گے ۔ “ راوی بیان کرتے ہیں : پھر سیدنا ابوبکر رضی اللہ عنہ منبر کے پاس آئے ، وہ منبر پر چڑھے ، انہوں نے اللہ تعالیٰ کی حمد و ثناء بیان کی ، اور پھر یہ بات ارشاد فرمائی : ” اے لوگو ! اگر سیدنا محمد تمہارے معبود تھے ، جن کی تم عبادت کرتے تھے ، تو تمہارے معبود کا انتقال ہو گیا ہے ، اور اگر تمہارا معبود وہ ہے ، جو آسمان میں ہے ، تو تمہارا معبود زندہ ہے ، اسے موت نہیں آئے گی “ پھر انہوں نے یہ آیت تلاوت کی : ” محمد صرف رسول ہیں ، ان سے پہلے بھی رسول گزر چکے ہیں ۔ ۔ ۔ ۔ ۔ ۔ ۔ ۔ “ ۔ پھر وہ منبر سے نیچے اتر آئے ، مسلمانوں نے اس بات کے حوالے سے اطمینان حاصل کیا اور ان کی تسلی ہو گئی اور منافقین کی پریشانی میں اضافہ ہو گیا ۔ سیدنا عبداللہ بن عمر رضی اللہ عنہما بیان کرتے ہیں : اس ذات قسم ! جس کے دست قدرت میں میری جان ہے ، یوں لگتا ہے جیسے ہمارے چہروں پر پردہ تھا ، اور وہ ہٹا دیا گیا ۔
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں ، صرف علی بن منذر کا معاملہ مختلف ہے ، اور وہ ثقہ ہے ۔

سیدنا سہل بن سعد رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” عنقریب میرے بعد لوگ ایک دوسرے کے ساتھ ، نبی کے حوالے سے تعزیت کریں گے ۔ “ لوگوں نے یہ کہنا شروع کیا : اس سے مراد کیا ہے ؟ جب نبی اکرم صلی اللہ علیہ وسلم کا وصال ہو گیا ، تو لوگ ایک دوسرے سے ملتے تھے اور ایک دوسرے سے نبی اکرم صلی اللہ علیہ وسلم کے حوالے سے تعزیت کرتے تھے ۔
یہ روایت امام ابویعلیٰ اور امام طبرانی نے نقل کی ہے ، اور ان دونوں کے رجال ” صحیح “ کے رجال ہیں ، صرف موسیٰ بن یعقوب زمعی کا معاملہ مختلف ہے ، ایک جماعت نے اسے ثقہ قرار دیا ہے ۔

سیدنا ابوسعید خدری رضی اللہ عنہ بیان کرتے ہیں : جب ہم نے نبی اکرم صلی اللہ علیہ وسلم کو مٹی میں دفن کر دیا ، تو ہمیں اپنے دلوں کی حالت تبدیل محسوس ہونے لگی ۔
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : میں نے خواب میں دیکھا کہ تین چاند اتر کر میری گود میں آ گئے ہیں ، سیدنا ابوبکر رضی اللہ عنہ نے فرمایا : اگر تمہارا خواب سچ ثابت ہوا ، تو تمہارے گھر میں اہل زمین کے تین بہترین لوگ دفن ہوں گے ، جب نبی اکرم صلی اللہ علیہ وسلم کا وصال ہو گیا ، تو سیدنا ابوبکر رضی اللہ عنہ نے سیدہ عائشہ رضی اللہ عنہا سے کہا: اے عائشہ ! یہ تمہارے چاندوں میں سب سے بہتر ہیں ، ( راوی بیان کرتے ہیں : ) پھر ( بعد میں ) سیدنا ابوبکر رضی اللہ عنہ اور سیدنا عمر رضی اللہ عنہ کو بھی ان کے گھر میں دفن کیا گیا ۔
یہ روایت امام طبرانی نے معجم کبیر میں نقل کی ہے ، روایت کے یہ الفاظ ان کے نقل کردہ ہیں ، یہ انہوں نے معجم اوسط میں بھی نقل کی ہے ، معجم کبیر کے رجال ” صحیح “ کے رجال ہیں ۔ اس سے پہلے یہ مرفوع حدیث گزر چکی ہے : سیدہ عائشہ رضی اللہ عنہا نے یہ خواب نبی اکرم صلی اللہ علیہ وسلم کو سنایا تھا ، اور نبی اکرم صلی اللہ علیہ وسلم نے اس کی تعبیر بیان کی تھی ، یہ خوابوں کی تعبیر سے متعلق باب میں گزری ہے ، اور اس کی سند میں ضعف پایا جاتا ہے ۔

عروہ بیان کرتے ہیں : ( نبی اکرم صلی اللہ علیہ وسلم کی پھوپھی جان ) سیدہ صفیہ بنت عبدالمطلب رضی اللہ عنہا نے نبی اکرم صلی اللہ علیہ وسلم کا مرثیہ کہتے ہوئے یہ اشعار کہے ہیں : ” میری جان غمگین ہے ، اور میں نے یوں رات گزاری ہے ، جیسے کسی کی کوئی چیز چھین لی گئی ہو ، میں رات بھر جاگتی رہی ہوں ، جیسے وہ شخص کام کرتا ہے ، جو جنگ کا شکار ہوا ہو ، پریشانیوں اور حسرت کی وجہ سے میری حالت خراب ہو گئی ، افسوس کہ مجھے یہ پریشانیاں اس وقت ملی ہیں ، جب موت کی اطلاع ملی ، جب لوگوں نے یہ کہا: کل شام تقدیر کے لکھے ہوئے کے مطابق موت ، رسول تک آ گئی ، جب ہم نبی اکرم صلی اللہ علیہ وسلم کے گھر والوں کے پاس آئے ، تو سر کے پچھلے حصے کے بال بھی سفید ہو چکے تھے ، جب ہم نے ان کے گھروں کو دیکھا کہ ان میں وحشت ہے ، اور ان کے بعد ان گھروں میں ایسی زندگی ہے ، جو نامانوس ہے ، تو اس وجہ سے مجھے طویل غم درپیش ہو گیا ، جو دل کے ساتھ یوں گھل مل گیا ، جیسے وہ مرغوب کی مانند ہو “ انہوں نے یہ بھی کہا: ” یا رسول اللہ ! آپ ہماری سہولت تھے اور آپ ہم پر مہربانی کرنے والے تھے ، اور آپ پہلو تہی کرنے والے نہیں تھے ، ہمارے نبی ہم پر مہربان تھے ، رحم کرنے والے تھے ، تو آج کے دن ہر رونے والے کو آپ پر رونا چاہیے ، مجھے اپنی زندگی کی قسم ہے ، میں نبی کی موت پر نہیں رو رہی ہوں ، بلکہ اس پریشانی پر رو رہی ہوں ، جو آپ کے بعد آئے گی ، سیدنا محمد صلی اللہ علیہ وسلم کی غیر موجودگی پر میرا دل یوں ہے کہ ان کی محبت کی وجہ سے وہ داغ لگانے والا گرم آلہ بن گیا ہے ، اے فاطمہ ! سیدنا محمد صلی اللہ علیہ وسلم کا پروردگار ، اللہ تعالیٰ ، ان پر درود نازل کرے ، جنہوں نے یثرب میں ( آخری ) ٹھکانہ بنا لیا ہے ، میں نے حسن کو دیکھا ہے کہ آپ نے اسے یتیم کر کے چھوڑا ہے ، اور وہ رو رہا ہے ، اور اپنے نانا کو بلا رہا ہے ، میری ماں ، میری خالہ ، میری پھوپھی اور میں ، اللہ کے رسول پر فدا ہو جائیں ، آپ نے صبر سے کام لیا اور سچائی کے ساتھ رسالت کی تبلیغ کر دی ، اور آپ کا انتقال ایسی حالت میں ہوا ، کہ دین مضبوط واضح اور صاف ہے ، اگر آپ کا پروردگار ، آپ کو ہمارے درمیان باقی رہنے دیتا ، تو یہ ہماری خوش نصیبی ہوتی ، لیکن اس کا فیصلہ پورا ہو کر رہتا ہے ، اللہ تعالیٰ کی طرف سے آپ پر سلام ہو ، جو تحیت کے طور پر ہو ، اور آپ کو ایسی حالت میں ” جنت عدن “ میں داخل کیا جائے ، کہ آپ راضی ہوں ۔ “
یہ روایت امام طبرانی نے نقل کی ہے ، اور اس کی سند حسن ہے ۔

امام محمد بن علی بن حسین رحمہ اللہ ( یعنی امام باقر رحمہ اللہ ) بیان کرتے ہیں : جب نبی اکرم صلی اللہ علیہ وسلم کا وصال ہوا ، تو سیدہ صفیہ رضی اللہ عنہا اپنی چادر کو اوڑھ کر نکلیں اور وہ یہ کہہ رہی تھیں : ” آپ کے بعد ایسی خبریں اور مشکلات آ گئی ہیں کہ اگر آپ ان کے پاس موجود ہوتے تو زیادہ پریشانی نہیں ہونی تھی ۔ “
یہ روایت امام طبرانی نے نقل کی ہے ، اور اس کے رجال ” صحیح“ کے رجال ہیں ، تاہم امام محمد ( یعنی امام باقر ) نامی راوی نے سیدہ صفیہ رضی اللہ عنہا کا زمانہ نہیں پایا ہے ۔

سیدنا غنیمم بن قیس رضی اللہ عنہ بیان کرتے ہیں : مجھے یاد آتا ہے جب نبی اکرم صلی اللہ علیہ وسلم کا وصال ہوا تھا ، تو اس دن میرے والد نے نبی اکرم صلی اللہ علیہ وسلم کے بارے میں کیا کہا: تھا ( انہوں نے یہ اشعار کہے تھے : ) ” خبردار ! سیدنا محمد صلی اللہ علیہ وسلم کے حوالے سے ، میرے لئے بربادی ہے ، آپ کی زندگی میں ، میں ایک گھات میں تھا اور میں رات بھر صبح ہونے تک سویا رہتا تھا ۔ “
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں ، صرف بشر بن آدم کا معاملہ مختلف ہے ، اور وہ ثقہ ہے ۔