مجمع الزوائد ومنبع الفوائد

سیدنا خباب رضی اللہ عنہ کی صاحبزادی بیان کرتی ہیں : سیدنا خباب رضی اللہ عنہ اس ایک جنگی مہم میں تشریف لے گئے ، نبی اکرم صلی اللہ علیہ وسلم ہماری دیکھ بھال کرتے رہے ، یہاں تک کہ آپ ہماری بکری کا دودھ دوہ دیتے تھے ، آپ اسے ایک برتن میں دوہتے تھے ، جو بھر جاتا تھا ، یہاں تک کہ گرنے کے قریب ہوتا تھا ، وہ خاتون بیان کرتی ہیں : سیدنا خباب رضی اللہ عنہ آئے اور انہوں نے اس بکری کا دودھ دوہا ، تو وہ اتنا ہی تھا ، جتنا پہلے ہوا کرتا تھا ، وہ خاتون کہتی ہیں : ہم نے سیدنا خباب رضی اللہ عنہ سے کہا: نبی اکرم صلی اللہ علیہ وسلم تو جب اُسے دوہتے تھے ، تو اس سے پورے برتن کو بھر دیتے تھے اور جب آپ اس کو دوہتے ہیں ، تو وہ کم ہوتا ہے ۔
یہ روایت امام أحمد نے اور امام طبرانی نے نقل کی ہے ، اور ان دونوں کے رجال ” صحیح “ کے رجال ہیں ، صرف عبدالرحمن بن قائش کا معاملہ مختلف ہے ، اور وہ ثقہ ہے ۔

سیدنا قیس بن نعمان سکونی رضی اللہ عنہ بیان کرتے ہیں : نبی اکرم صلی اللہ علیہ وسلم تشریف لے گئے ، آپ کے ساتھ سیدنا ابوبکر رضی اللہ عنہ بھی تھے ، یہ لوگ قریش سے چھپتے ہوئے جا رہے تھے ، ان کا گزر ایک چرواہے کے پاس سے ہوا ، نبی اکرم صلی اللہ علیہ وسلم نے فرمایا : کیا کوئی ایسی بکری ہے ؟ جس کے ساتھ نر جانور نے جفتی کی ہو ، اس نے جواب دیا : جی نہیں ! یہاں پر ایک ایسی بکری ہے ، جو کمزوری کی وجہ سے چل نہیں پا رہی ، نبی اکرم صلی اللہ علیہ وسلم نے فرمایا : اسی کو میرے پاس لے آؤ ! وہ اس بکری کو آپ کے پاس لے کے آیا ، نبی اکرم صلی اللہ علیہ وسلم نے اس کے تھن پر ہاتھ پھیرا اور برکت کی دعا کی ، پھر آپ نے وہ دودھ دوہ لیا ، آپ نے سیدنا ابوبکر رضی اللہ عنہ کو وہ دودھ پلایا ، پھر آپ نے دودھ دوہ لیا اور چرواہے کو پلایا ، پھر آپ نے دودھ دوہ لیا اور خود پیا ، اس چرواہے نے آپ سے کہا: اللہ کی قسم ! میں نے آپ جیسا فرد نہیں دیکھا ، آپ کون ہیں ؟ نبی اکرم صلی اللہ علیہ وسلم نے فرمایا : اگر میں تمہیں بتا دوں ، تو کیا تم اس بات کو چھپا کے رکھو گے ؟ اس نے کہا: جی ہاں ! نبی اکرم صلی اللہ علیہ وسلم نے فرمایا : محمد ( صلی اللہ علیہ وسلم ) جو اللہ کا رسول ہے ، اس نے کہا: آپ وہی صاحب ہیں ، جن کے بارے میں قریش یہ کہتے ہیں کہ وہ بے دین ہے ، نبی اکرم صلی اللہ علیہ وسلم نے فرمایا : وہ لوگ یہی کہتے ہیں ، اس نے کہا: پھر میں اس بات کی گواہی دیتا ہوں کہ آپ واقعی اللہ کے رسول ہیں ، کیونکہ جو کام آپ نے کیا ہے ، وہ کوئی رسول ہی کر سکتا ہے ، پھر اس نے نبی اکرم صلی اللہ علیہ وسلم سے دریافت کیا : کیا میں آپ کے ساتھ آؤں ؟ نبی اکرم صلی اللہ علیہ وسلم نے فرمایا : ابھی نہیں ، جب تم یہ سنو کہ ہمیں غلبہ حاصل ہو گیا ہے ، تو تم ہمارے پاس آ جانا ۔ راوی کہتے ہیں تو نبی اکرم صلی اللہ علیہ وسلم کے مدینہ منورہ میں غلبہ حاصل کرنے کے بعد وہ شخص نبی اکرم صلی اللہ علیہ وسلم کے پاس آ گیا تھا ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ۔

سیدہ ام معبد رضی اللہ عنہا بیان کرتی ہیں : میں نے نبی اکرم صلی اللہ علیہ وسلم کی خدمت میں ایک حاملہ بکری بھیجی ، تو نبی اکرم صلی اللہ علیہ وسلم نے اسے واپس کر دیا اور فرمایا : ایسی بکری میرے پاس بھیجو ! جو دودھ نہ دیتی ہو ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ، صرف حزام بن ہشام بن حبیش کا ، اور اس کے والد کا معاملہ مختلف ہے ، اور یہ دونوں ثقہ ہیں ۔

سیدنا سعد رضی اللہ عنہ ، جو سیدنا ابوبکر رضی اللہ عنہ کے غلام ہیں ، وہ بیان کرتے ہیں : ہم نبی اکرم صلی اللہ علیہ وسلم کے ساتھ تھے ، راوی کہتے ہیں : میرا خیال ہے روایت میں یہ الفاظ ہیں : ہم سفر کر رہے تھے ، ہم نے ایک جگہ پر پڑاؤ کیا ، تو نبی اکرم صلی اللہ علیہ وسلم نے مجھ سے فرمایا : اے سعد ! تم اس بکری کے پاس جاؤ اور اس کا دودھ دوہ لو ، راوی کہتے ہیں : میں کچھ دیر پہلے اس جگہ سے گزر کے آیا تھا ، وہاں کوئی بکری نہیں تھی ، پھر وہاں آیا تو وہاں ایک بکری موجود تھی ، جو حاملہ تھی ، میں نے اس کا دودھ دوہ لیا ، راوی کہتے ہیں : پھر میں نے یہ کام کسی اور کے سپرد کیا اور خود پالان کی تیاری میں مصروف ہو گیا ، تو اسی دوران بکری چلی گئی ، مجھے نبی اکرم صلی اللہ علیہ وسلم کے پاس جانے میں تاخیر ہو گئی ، تو نبی اکرم صلی اللہ علیہ وسلم نے دریافت کیا : اے سعد ! میں نے عرض کی : یا رسول اللہ ! میں سامان کے حوالے سے مصروف ہو گیا ، تو وہ بکری چلی گئی ، تو نبی اکرم صلی اللہ علیہ وسلم نے فرمایا : بکری کو اس کا پروردگار ( یا اس کا مالک ) لے گیا ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔ اس سے پہلے سیدہ ام معبد رضی اللہ عنہا کی حدیث گزر چکی ہے ، جو آپ کے حلیہ کے بارے میں ہے ، اور آپ کے مدینہ منورہ کی طرف ہجرت کرنے کے بارے میں ہے ، اور یہ مختلف طرق سے منقول ہے ۔