مجمع الزوائد ومنبع الفوائد

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” مجھ پر قربانی لازم قرار دی گئی ہے ، یہ تم پر لازم قرار نہیں دی گئی ہے ۔ “

ایک روایت میں یہ الفاظ ہیں : ” مجھے چاشت کی دو رکعات ادا کرنے کا حکم دیا گیا ہے ، تمہیں اس کا حکم نہیں دیا گیا اور مجھے قربانی کا حکم دیا گیا ہے ، اور یہ تم پر لازم قرار نہیں دی گئی ہے ۔ “

ایک روایت میں یہ بات منقول ہے : سیدنا عبداللہ بن عباس رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تین چیزیں ہیں ، جو میرے لئے فرض ہیں اور تمہارے لئے نفل ہیں ، وتر ، قربانی اور چاشت کی نماز ۔ “

ایک روایت میں یہ الفاظ ہیں : ” مجھے چاشت کی دو رکعات ادا کرنے کا ، اور وتر ادا کرنے کا حکم دیا گیا ہے ، اور تم پر یہ لازم قرار نہیں دیے گئے ۔ “ یہ تمام روایات امام أحمد نے مختلف اسانید کے ساتھ نقل کی ہیں ، اور امام بزار نے اس کی مانند روایات اختصار کے ساتھ نقل کی ہیں ، امام طبرانی نے معجم کبیر اور معجم اوسط میں نقل کی ہیں ، اور ان کی روایت میں یہ الفاظ ہیں : ” تین چیزیں ہیں ، جو مجھ پر فرض ہیں ۔ ۔ ۔ ۔ ۔ ۔ ۔ “ ۔ ان کی سند میں ایک راوی ابوجناب کلبی ہے ، اور وہ مدلس ہے ، اس روایت کے بقیہ رجال ، جو امام أحمد کے نقل کردہ ہیں ، وہ صحیح کے رجال ہیں اور ان کی بقیہ اسانید میں ایک راوی جابر جعفی ہے ، اور وہ ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” تین چیزیں مجھ پر فرض ہیں ، اور وہ تمہارے لئے سنت ہیں ، وتر ، مسواک کرنا اور رات کو نوافل ادا کرنا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی موسیٰ بن عبدالرحمن صنعانی ہے ، اور وہ کذاب ہے ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے عصر کی نماز ادا کی ، پھر آپ میرے گھر میں داخل ہوئے ، آپ نے دو رکعت ادا کیں ، میں نے عرض کی : یا رسول اللہ ! آپ نے ایک ایسی نماز ادا کی ہے ، جو آپ پہلے ادا نہیں کرتے تھے ، نبی اکرم صلی اللہ علیہ وسلم نے ارشاد فرمایا : ” میرے پاس کچھ مال آیا ہوا تھا ( اس کو تقسیم کرنے کی وجہ سے ) مصروفیت کے باعث ، میں یہ دو رکعات ادا نہیں کر سکا ، جنہیں میں ظہر کے بعد ادا کرتا تھا ، تو میں نے اب وہ دونوں ادا کی ہیں ۔ “ میں نے عرض کی : یا رسول اللہ ! اگر ہماری یہ رہ جائیں ، تو کیا ہم بھی ان کی قضاء کریں ؟ نبی اکرم صلی اللہ علیہ وسلم نے فرمایا : جی نہیں ! “ ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس مضمون کی ایک روایت مذکور ہے ، جس میں یہ الفاظ نہیں ہیں : ” اگر یہ دونوں رہ جائیں ، تو کیا ہم بھی اس کی قضاء کریں ؟ تو نبی اکرم صلی اللہ علیہ وسلم نے فرمایا : جی نہیں ! “ ۔
یہ روایت امام أحمد نے نقل کی ہے ، اور امام ابویعلیٰ نے اس کی مانند نقل کی ہے ، اور ان دونوں کے رجال ” صحیح “ کے رجال ہیں ۔

سیدنا ابوامامہ رضی اللہ عنہ بیان کرتے ہیں ( ارشاد باری تعالیٰ ہے : ) ” تمہارے لئے نفل ہے ۔ ۔ ۔ ۔ ۔ ۔ ۔ “ ۔ سیدنا ابوامامہ رضی اللہ عنہ کہتے ہیں : یہ خاص طور پر نبی اکرم صلی اللہ علیہ وسلم کے لئے نفل تھی ۔
یہ روایت امام أحمد نے نقل کی ہے ، اور امام طبرانی نے معجم کبیر اور معجم اوسط میں اس کی مانند نقل کی ہے ، انہوں نے اپنی روایت میں یہ الفاظ نقل کیے ہیں : ” رات کے وقت تم تہجد پڑھو ! یہ تمہارے لئے نفل ہو گا ۔ “ انہوں نے معجم کبیر میں یہ الفاظ نقل کیے ہیں : ” کہ یہ نماز نبی اکرم صلی اللہ علیہ وسلم کے لئے نفل تھی ، اور تمہارے لئے فضیلت ہے ۔ “ امام أحمد کی بعض اسانید اور دیگر حضرات کی بعض اسانید ” حسن “ ہیں ۔

معاذہ ( نامی خاتون ) بیان کرتی ہیں : ایک خاتون نے سیدہ عائشہ رضی اللہ عنہا سے سوال کیا : میں اس وقت وہاں موجود تھی ، اس خاتون نے نبی اکرم صلی اللہ علیہ وسلم کے صوم وصال کے بارے میں دریافت کیا ، تو سیدہ عائشہ رضی اللہ عنہا نے اُس سے فرمایا : کیا تم نبی اکرم صلی اللہ علیہ وسلم کے عمل کی طرح عمل کرنا چاہتی ہو ؟ اُن کے تو گزشتہ اور آئندہ ذنب کی مغفرت ہو چکی ہے ، اور ان کا عمل ان کے لئے نفل ہوتا تھا ۔ “
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ” صحیح “ میں اس کا کچھ حصہ منقول ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس جب آپ کے گھر والوں کے علاوہ کہیں اور سے کھانا لایا جاتا تھا تو آپ صلی اللہ علیہ وسلم اس کے بارے میں دریافت کر لیتے ، اگر یہ بتایا جاتا کہ یہ تحفہ ہے ، تو آپ اسے کھا لیتے تھے اور اگر یہ کہا: جاتا : کہ یہ صدقہ ہے ، تو آپ صلی اللہ علیہ وسلم فرماتے تھے : ( تم لوگ ) کھا لو ! اور آپ صلی اللہ علیہ وسلم خود اسے نہیں کھاتے تھے ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا جابر بن سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس جب کھانا آتا تھا ، تو آپ کھا لیتے تھے اور جو بچ جاتا تھا ، وہ آپ سیدنا ابوایوب رضی اللہ عنہ کو بھجوا دیتے تھے ، سیدنا ابوایوب رضی اللہ عنہ اپنی انگلیاں وہاں رکھتے تھے ، جہاں انہیں نبی اکرم صلی اللہ علیہ وسلم کی انگلیوں کے نشان نظر آتے تھے ، ایک مرتبہ نبی اکرم صلی اللہ علیہ وسلم کے پاس پیالہ لایا گیا ، آپ نے اس میں لہسن کی بو محسوس کی ، تو اسے چکھا بھی نہیں ، اور وہ سیدنا ابوایوب رضی اللہ عنہ کو بھجوا دیا ، انہوں نے دیکھا کہ اس میں نبی اکرم صلی اللہ علیہ وسلم کی انگلیوں کا نشان نظر نہیں آ رہا ، تو انہوں نے بھی اسے نہیں چکھا ، وہ نبی اکرم صلی اللہ علیہ وسلم کے پاس آئے ، انہوں نے عرض کی : یا رسول اللہ ! میں نے آپ کی انگلیوں کا نشان اس کھانے میں نہیں دیکھا ، تو نبی اکرم صلی اللہ علیہ وسلم نے فرمایا : مجھے اس میں سے لہسن کی بو محسوس ہوئی تھی ، تو سیدنا ابوایوب انصاری رضی اللہ عنہ نے عرض کی : وہ آپ نے مجھے بھجوا دیا ، جو آپ نے خود نہیں کھایا ؟ نبی اکرم صلی اللہ علیہ وسلم نے فرمایا : میرے پاس فرشتہ آتا ہے ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

عمران بن حصین ضبی کے بارے میں یہ بات منقول ہے : وہ بصرہ آئے ، وہاں سیدنا عبداللہ بن عباس رضی اللہ عنہما گورنر تھے ، وہاں محل کے سائے میں ایک شخص کھڑا ہوا تھا ، اور یہ کہہ رہا تھا : اللہ اور اس کے رسول صلی اللہ علیہ وسلم نے سچ فرمایا ہے ، اللہ اور اس کے رسول صلی اللہ علیہ وسلم نے سچ فرمایا ہے ، وہ اس کے علاوہ کچھ نہیں کہہ رہا تھا ، راوی کہتے ہیں : میں اس کے پاس گیا ، میں نے کہا: تم بکثرت یہ بات کہہ رہے ہو ، اللہ اور اس کے رسول صلی اللہ علیہ وسلم نے سچ فرمایا ہے ( اس کی وجہ کیا ہے ؟ ) اس نے کہا: اللہ کی قسم ! اگر آپ چاہیں ، تو میں آپ کو اس بارے میں بتا دیتا ہوں ، میں نے کہا: ٹھیک ہے ، اس نے کہا: پھر آپ بیٹھ جائیں ، اس نے بتایا : ” ایک مرتبہ میں مدینہ منورہ میں نبی اکرم صلی اللہ علیہ وسلم کی خدمت میں حاضر ہوا ، میں فلاں فلاں جگہ سے آیا تھا ، ہمارے قبیلے کے دو بوڑھوں کا لڑکا گیا اور نبی اکرم صلی اللہ علیہ وسلم سے جا ملا تھا ، ان دونوں نے کہا: تم مدینہ منورہ جاؤ ! ہمارا بیٹا ان صاحب سے جا کے مل گیا ہے ، تم ان صاحب کے پاس جاؤ ، اور ان سے اس لڑکے کا مطالبہ کرو ، اگر وہ فدیہ لینا چاہیں ، تو تم انہیں فدیہ بھی دے دینا ، میں مدینہ منورہ آیا ، میں نبی اکرم صلی اللہ علیہ وسلم کی خدمت میں حاضر ہوا ، میں نے عرض کی : یا رسول اللہ ! ہمارے قبیلے کے دو بوڑھے افراد نے مجھے یہ ہدایت کی ہے کہ میں ان کے بیٹے کو آپ کے ہاں تلاش کروں ، نبی اکرم صلی اللہ علیہ وسلم نے دریافت کیا : کیا تم اسے پہچانتے ہو ؟ راوی نے کہا: میں اس کا نسب پہچانتا ہوں ، پھر نبی اکرم صلی اللہ علیہ وسلم نے اس لڑکے کو بلوایا اور وہ آ گیا ، آپ صلی اللہ علیہ وسلم نے فرمایا : یہ ہے وہ لڑکا ، تم اسے اس کے باپ کے پاس لے جاؤ ، میں نے عرض کی : اے اللہ کے نبی ! اس کا فدیہ کیا ہو گا ؟ تو نبی اکرم صلی اللہ علیہ وسلم نے ارشاد فرمایا : ہمارے لئے یعنی آل محمد کے لئے یہ بات درست نہیں ہے کہ ہم اولاد اسماعیل میں سے کسی کی قیمت کھائیں ، پھر نبی اکرم صلی اللہ علیہ وسلم نے میرے کندھے پر ہاتھ مارا اور فرمایا : مجھے قریش کے بارے میں صرف ان کے اپنے حوالے سے ہی اندیشہ ہے ، میں نے عرض کی : اے اللہ کے نبی ! وہ کیوں ؟ نبی اکرم صلی اللہ علیہ وسلم نے فرمایا : اگر تمہاری عمر طویل ہوئی ، تو تم اُن ( قریش ) کو دیکھو گے کہ وہ یہاں ( حکمران ) ہوں گے اور تم دوسرے لوگوں کو دیکھو گے کہ وہ اُن کے درمیان یوں ہوں گے ، جیسے کوئی بکری ، دو حوضوں کے درمیان ہوتی ہے ، کبھی وہ اِدھر جاتی ہے ، کبھی اُدھر جاتی ہے ۔ راوی بیان کرتے ہیں : میں نے کچھ لوگوں کو دیکھا کہ وہ سیدنا عبداللہ بن عباس رضی اللہ عنہما کے ہاں اندر آنے کی اجازت مانگ رہے تھے ، اور پھر میں نے اُنہی لوگوں کو دیکھا کہ وہ سیدنا معاویہ رضی اللہ عنہ کے ہاں اندر آنے کی اجازت مانگ رہے تھے ، تو مجھے نبی اکرم صلی اللہ علیہ وسلم کا فرمان یاد آ گیا ۔
یہ روایت امام أحمد نے نقل کی ہے ، اور عمران نامی راوی سے میں واقف نہیں ہوں ، اس روایت کے بقیہ رجال ثقہ ہیں ۔

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم چت لیٹ کر سو رہے تھے ، آپ خراٹے لینے لگے ، پھر آپ اُٹھے اور آپ نے نماز ادا کر لی ، اور دوبارہ وضو نہیں کیا ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابن ماجہ نے نقل کی ہے ، تاہم انہوں نے یہ الفاظ نقل نہیں کیے ہیں : ” چت لیٹ کر ۔ ۔ ۔ ۔ ۔ ۔ ۔ “ ۔
یہ روایت امام ابویعلیٰ اور امام بزار نے نقل کی ہے ، اور انہوں نے یہ الفاظ نقل کیے ہیں : ” آپ سجدے کی حالت میں سو گئے ۔ ۔ ۔ ۔ ۔ ۔ ۔ “ ۔ امام ابویعلیٰ کے رجال ” صحیح “ کے رجال ہیں ۔

ایک صاحب بیان کرتے ہیں : میں نے نبی اکرم صلی اللہ علیہ وسلم کو دیکھا کہ آپ صلی اللہ علیہ وسلم سو گئے ، یہاں تک کہ آپ خراٹے لینے لگے ، پھر آپ صلی اللہ علیہ وسلم نے نماز ادا کی ، اور آپ نے دوبارہ وضو نہیں کیا ۔
یہ روایت امام أحمد نے نقل کی ہے ، اور اس کی سند عمدہ ہے ۔

سیدنا عبداللہ بن عمرو رضی اللہ عنہ بیان کرتے ہیں : نبی اکرم صلی اللہ علیہ وسلم بیعت لیتے ہوئے خواتین کے ساتھ مصافحہ نہیں کرتے تھے ۔
یہ روایت امام أحمد نے نقل کی ہے ، اور اس کی سند حسن ہے ۔

سیدہ اسماء بنت یزید رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” میں خواتین کے ساتھ مصافحہ نہیں کرتا ہوں“ ۔
یہ روایت امام أحمد اور طبرانی نے نقل کی ہے ، اور اس کی سند حسن ہے ۔