مجمع الزوائد ومنبع الفوائد

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” مجھے ہر چیز کی کنجیاں عطا کر دی گئی ہیں ، البتہ پانچ چیزوں کا معاملہ مختلف ہے ( جن کا ذکر قرآن میں ان الفاظ میں ہے : ) ” بے شک اللہ تعالیٰ کے پاس ہی قیامت کا علم ہے ، اور وہ بارش نازل کرتا ہے ، اور وہ جانتا ہے جو رحموں میں ہوتا ہے ، اور کوئی شخص یہ نہیں جانتا کہ وہ کل کیا کمائے گا ؟ اور کوئی یہ نہیں جانتا کہ وہ کس سرزمین پر مرے گا ، بے شک اللہ تعالیٰ علم والا خبر والا ہے ۔ “ ( علامہ ہیثمی فرماتے ہیں : ) میں یہ کہتا ہوں : سیدنا عبداللہ بن عمر رضی اللہ عنہما سے منقول حدیث صحیح میں مذکور ہے ، جس میں یہ ذکر ہے کہ غیب کی کنجیاں پانچ ہیں ۔
یہ روایت امام أحمد اور امام طبرانی نے نقل کی ہے ، اور امام أحمد کے رجال ” صحیح “ کے رجال ہیں ۔

سیدنا عبداللہ بن مسعود رضی اللہ عنہ بیان کرتے ہیں : ” تمہارے نبی صلی اللہ علیہ وسلم کو ہر چیز کی کنجیاں عطا کی گئیں ، صرف پانچ چیزوں کا معاملہ مختلف ہے ( جن کا ذکر قرآن میں ان الفاظ میں ہے : ) ” بے شک اللہ تعالیٰ کے پاس قیامت کا علم ہے ، وہ بارش نازل کرتا ہے ، اور جو رحموں میں ہے اسے جانتا ہے ، اور کوئی جان یہ نہیں جانتی کہ وہ کل کیا کمائے گی ؟ اور کوئی یہ نہیں جانتی کہ وہ کون سی سرزمین پر مرے گی ؟ بے شک اللہ تعالیٰ علم رکھنے والا ، خبر رکھنے والا ہے ۔ “
یہ روایت امام أحمد اور امام ابویعلیٰ نے نقل کی ہے ، اور ان دونوں کے رجال ” صحیح “ کے رجال ہیں ۔

سیدنا ابوموسیٰ اشعری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مجھے افتتاحی اور اختتامی کلمات عطا کیے گئے ہیں ، ہم نے عرض کی : یا رسول اللہ ! اللہ تعالیٰ نے آپ صلی اللہ علیہ وسلم کو جو علم عطا کیا ہے ، اس میں سے ہمیں بھی تعلیم دیں ، تو نبی اکرم صلی اللہ علیہ وسلم نے ہمیں تشہد کے کلمات سکھائے ۔ “
یہ روایت امام ابویعلیٰ نے نقل کی ہے ، اس کی سند میں ایک راوی عبدالرحمن بن اسحاق واسطی ہے ، اور وہ ضعیف ہے ۔

سیدنا ابوذر غفاری رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں ایسی حالت میں چھوڑا کہ آسمان میں جو پرندہ اپنے پروں کو حرکت دیتا ہے ، تو نبی اکرم صلی اللہ علیہ وسلم نے اُس کے حوالے سے بھی علم ذکر کر دیا ۔
یہ روایت امام أحمد اور امام طبرانی نے نقل کی ہے ، اور اس میں یہ الفاظ زائد نقل کیے ہیں : نبی اکرم صلی اللہ علیہ وسلم نے ارشاد فرمایا : ” جو بھی چیز جنت کے قریب کر سکتی ہے ، اور جہنم سے دور کر سکتی ہے ، ان میں سے کوئی چیز باقی نہیں رہی ، مگر یہ کہ وہ تمہارے سامنے بیان کر دی گئی ہے ۔ “ طبرانی کے رجال ” صحیح“ کے رجال ہیں ، صرف عبداللہ بن یزید مقری کا معاملہ مختلف ہے ، اور وہ ثقہ ہے ، امام أحمد کی سند میں ایسا راوی ہے ، جس کا نام بیان نہیں کیا گیا ہے ۔

سیدنا مغیرہ بن شعبہ رضی اللہ عنہ بیان کرتے ہیں : نبی اکرم صلی اللہ علیہ وسلم ہمارے درمیان کھڑے ہوئے آپ نے ہمیں ان امور کے بارے میں بتایا ، جو قیامت تک آپ کی اُمت میں رونما ہونا تھے ، جس نے اسے محفوظ رکھنا تھا ، اس نے محفوظ کیا اور جس نے اسے بھولنا تھا ، وہ اسے بھول گیا ۔
یہ روایت امام أحمد اور امام طبرانی نے نقل کی ہے ، امام أحمد کے رجال ” صحیح “ کے رجال ہیں ، صرف عمر بن ابراہیم بن محمد کا معاملہ مختلف ہے ، اور ابن حبان نے اسے ثقہ قرار دیا ہے ۔

سیدنا ابودرداء رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں ایسی حالت میں چھوڑا ، کہ آسمان میں جو بھی پرندہ اپنے پروں کے ذریعے اُڑتا ہے ، تو نبی اکرم صلی اللہ علیہ وسلم نے ہمارے سامنے اُس کے بارے میں علم ذکر کر دیا ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ۔

سیدنا عمرو بن العاص رضی اللہ عنہ بیان کرتے ہیں : میں نے نبی اکرم صلی اللہ علیہ وسلم سے ایک ہزار باتیں ( یا مثالیں ) یاد رکھی ہیں ۔
یہ روایت امام أحمد نے نقل کی ہے ، اور اس کی سند حسن ہے ۔

سیدنا عمران بن حصین رضی اللہ عنہ بیان کرتے ہیں : نبی اکرم صلی اللہ علیہ وسلم ہمیں رات کا زیادہ تر حصہ بنی اسرائیل کے بارے میں بتاتے رہے ، اس دوران آپ صلی اللہ علیہ وسلم صرف فرض نماز ادا کرنے کے لئے اُٹھے تھے ۔

ایک روایت میں یہ الفاظ ہیں : اس سے مراد فرض نماز ہے ۔
یہ روایت امام أحمد نے نقل کی ہے ، اور اس کی سند حسن ہے ۔