مجمع الزوائد ومنبع الفوائد

سیدنا تمیم داری رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” یہ معاملہ ضرور وہاں تک پہنچے گا ، جہاں تک رات اور دن پہنچتے ہیں ، اور اللہ تعالیٰ کوئی بھی کچا یا پکا گھر نہیں چھوڑے گا ، مگر یہ کہ اُس میں اس دین کو داخل کر دے گا ، خواہ کسی کو عزت حاصل ہو ، یا کسی کو ذلت حاصل ہو ، عزت والا وہ ہو گا ، جسے اللہ تعالیٰ اسلام کے ذریعے عزت عطا کرے ، اور ذلت والا وہ ہو گا ، جسے اللہ تعالیٰ کفر کے ذریعے ذلیل رکھے گا ۔ “ سیدنا تمیم داری رضی اللہ عنہ بیان کرتے ہیں : میں نے خود اپنے خاندان میں یہ بات جان لی ، اُن میں سے جو لوگ مسلمان ہوئے تھے انہیں بھلائی شرف اور عزت نصیب ہوا ، اور جو کافر رہے تھے ، انہیں ذلت ، ہلکا پن اور جزیہ دینا نصیب ہوا ۔
یہ روایت امام أحمد اور دیگر حضرات نے نقل کی ہے ، اس سے پہلے یہ جہاد اور مغازی سے متعلق کتاب میں گزر چکی ہے ۔

سیدنا ابوثعلبہ خشنی رضی اللہ عنہ بیان کرتے ہیں : نبی اکرم صلی اللہ علیہ وسلم جب سفر سے تشریف لاتے تھے ، تو سب سے پہلے مسجد میں آ کر وہاں دو رکعت ادا کرتے تھے ، پھر آپ سیدہ فاطمہ رضی اللہ عنہا کے پاس جاتے تھے ، پھر اپنی ازواج سے ملاقات کرتے تھے ، ایک مرتبہ آپ سفر سے تشریف لائے ، آپ نے دو رکعت ادا کیں ، پھر آپ سیدہ فاطمہ رضی اللہ عنہا کے پاس آئے ، گھر کے دروازے پر سیدہ فاطمہ رضی اللہ عنہا نے آپ سے ملاقات کی ، تو انہوں نے روتے ہوئے نبی اکرم صلی اللہ علیہ وسلم کے گال اور آنکھوں پر بوسہ دیا ، نبی اکرم صلی اللہ علیہ وسلم نے دریافت کیا : تم کیوں رو رہی ہو ؟ انہوں نے عرض کی : میں نے آپ صلی اللہ علیہ وسلم کو دیکھا ہے کہ آپ کے بال بکھرے ہوئے ہیں اور آپ تھکاوٹ کا شکار ہیں ، آپ کا لباس پرانا ہو رہا ہے ، تو آپ صلی اللہ علیہ وسلم نے فرمایا : تم نہ روؤ ! کیونکہ اللہ تعالیٰ نے تمہارے والد کو ایک ایسی چیز کے ہمراہ مبعوث کیا ہے کہ اللہ تعالیٰ روئے زمین پر کوئی کچا یا پکا گھر یا خیمہ ایسا نہیں رہنے دے گا ، مگر یہ کہ اللہ تعالیٰ اس ( گھر ) میں اس ( دین ) کے ذریعے عزت یا ذلت کو داخل کر دے گا ، یہاں تک کہ یہ دین وہاں تک پہنچ جائے گا ، جہاں تک رات پہنچتی ہے ۔ “
یہ روایت امام طبرانی نے نقل کی ہے ، اس کی سند میں ایک راوی یزید بن سنان ابوفروہ ہے ، اور وہ مقارب الحدیث ہے اگرچہ اس میں بہت زیادہ ضعف پایا جاتا ہے ۔