مجمع الزوائد ومنبع الفوائد

عروہ بن زبیر بیان کرتے ہیں : مجھے سیدہ خدیجہ بنت خویلد رضی اللہ عنہا کے پڑوسی نے یہ بات بتائی کہ میں نے نبی اکرم صلی اللہ علیہ وسلم کو سیدہ خدیجہ رضی اللہ عنہا سے یہ کہتے ہوئے سنا : ” اے خدیجہ ! اللہ کی قسم ! میں ” لات “ کی کبھی عبادت نہیں کروں گا ، اللہ کی قسم ! میں عزیٰ کی کبھی عبادت نہیں کروں گا“ ۔ راوی بیان کرتے ہیں : تو سیدہ خدیجہ رضی اللہ عنہا نے کہا: آپ عزیٰ کو چھوڑ دیں ، راوی بیان کرتے ہیں : یہ ان لوگوں کے بت تھے ، جن کی وہ عبادت کرتے تھے اور پھر لیٹ جاتے تھے ۔
یہ روایت امام أحمد نے نقل کی ہے اور اس کے رجال ” صحیح “ کے رجال ہیں ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں باطل سے متعلق نہیں ہوں اور نہ ہی باطل مجھ سے متعلق ہے ۔ “ ابومحمد یحیی بن محمد بن قیس بیان کرتے ہیں : اس سے مراد یہ ہے کہ میرا باطل سے کوئی واسطہ نہیں ہے ، اور باطل کا مجھ سے کوئی واسطہ نہیں ہے ۔
یہ روایت امام بزار نے ، امام طبرانی نے معجم اوسط میں نقل کی ہے ، اس کی سند میں ایک راوی یحیی بن محمد بن قیس ہے ، جس کی توثیق کی گئی ہے ، لوگوں نے یہ حدیث اس کی نقل کردہ منکر احادیث میں نقل کی ہے ، باقی اللہ بہتر جانتا ہے ۔ امام ذہبی کہتے ہیں : اس حوالے سے دیگر حضرات نے اس کی متابعت کی ہے ۔

سیدنا معاویہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میں باطل سے متعلق نہیں ہوں اور باطل مجھ سے متعلق نہیں ہے ۔ “
یہ روایت امام طبرانی نے محمد بن أحمد بن نصر ترمذی کے حوالے سے ، محمد بن عبدالوہاب ازہری سے نقل کی ہے ، اور میں ان دونوں سے واقف نہیں ہوں ، اس روایت کے بقیہ رجال ثقہ ہیں ۔

سیدنا علی بن ابوطالب رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” زمانہ جاہلیت میں لوگ جو اعمال کیا کرتے تھے ، میں نے اُن میں سے کسی بھی چیز کا ارادہ نہیں کیا ، البتہ دو مرتبہ کا معاملہ مختلف ہے ، اور ہر مربتہ اللہ تعالیٰ میرے اور میرے ارادے کے درمیان رکاوٹ بن گیا ، پھر اس کے بعد میں نے اس حوالے سے کسی چیز کا ارادہ نہیں کیا ، یہاں تک کہ اللہ تعالیٰ نے اپنی رسالت کے حوالے سے مجھے عزت عطا کی ۔ “
یہ روایت امام بزار نے نقل کی ہے ، اور اس کے رجال ثقہ ہیں ۔

سیدنا عمار بن یاسر رضی اللہ عنہ بیان کرتے ہیں : لوگوں نے نبی اکرم صلی اللہ علیہ وسلم سے دریافت کیا : کیا آپ نے زمانہ جاہلیت میں کبھی کسی حرام فعل کا ارتکاب کیا ؟ نبی اکرم صلی اللہ علیہ وسلم نے فرمایا : جی نہیں ! میں اس حوالے سے دو مرتبہ اس نوعیت کی صورت حال سے دوچار ہوا ، ایک مرتبہ میری آنکھ لگ گئی ، اور دوسری مرتبہ میرے اور اس ارادے کے درمیان میری قوم رکاوٹ بن گئی ۔ “
یہ روایت امام طبرانی نے تینوں کتابوں میں نقل کی ہے ، اور اس کی سند میں ایسے راوی ہیں جن سے میں واقف نہیں ہوں ، انہوں نے ” اوسط “ میں یہ بات نقل کی ہے : یہ سیدنا عمار رضی اللہ عنہ کے حوالے سے منقول ہے : لوگوں نے نبی اکرم صلی اللہ علیہ وسلم سے دریافت کیا : کیا آپ نے خواتین کے حوالے سے بھی حرام کام کا ارتکاب کیا ؟

سیدنا جابر بن عبداللہ رضی اللہ عنہ بیان کرتے ہیں : نبی اکرم صلی اللہ علیہ وسلم مشرکین کے ساتھ ان کی جنگوں میں شریک ہوتے تھے ۔ راوی بیان کرتے ہیں : ایک مرتبہ آپ نے اپنے پیچھے دو فرشتوں کی آواز سنی ، ان میں سے ایک دوسرے سے یہ کہہ رہا تھا ، تم ہمارے ساتھ چلو تاکہ ہم اللہ کے رسول کے پیچھے کھڑے ہو جائیں ، تو دوسرے نے کہا: ہم ان کے پیچھے کیسے کھڑے ہو سکتے ہیں ؟ جبکہ انہوں نے تھوڑی دیر پہلے بتوں کو ہاتھ لگایا تھا ، راوی بیان کرتے ہیں : اس کے بعد نبی اکرم صلی اللہ علیہ وسلم دوبارہ کبھی مشرکین کے ساتھ اُن کی جنگ میں شریک نہیں ہوئے ۔
یہ روایت امام ابویعلیٰ نے نقل کی ہے ، اس کی سند میں ایک راوی عبداللہ بن محمد بن عقیل ہے اور اس طرح کی صورت حال میں اس بات کا احتمال نہیں ہوتا ، صرف یہ ہو سکتا ہے کہ وہ ان جنگوں میں ساتھ رہا ہو ، کیونکہ اس نے اس بات کا انکار کیا ہے ، اس روایت کے بقیہ رجال ” صحیح“ کے رجال ہیں ۔

سیدنا زید بن حارثہ رضی اللہ عنہ بیان کرتے ہیں : ایک دن میں نبی اکرم صلی اللہ علیہ وسلم کے ساتھ طواف کر رہا تھا ، میں نے کسی بت کو چھو لیا ، تو نبی اکرم صلی اللہ علیہ وسلم نے مجھ سے فرمایا : تم اس کو نہ چھوؤ ، راوی بیان کرتے ہیں : اس کے بعد انہوں نے پوری روایت ذکر کی ہے ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں یہ چیز اس بات کی وضاحت کر دیتی ہے جو اس سے پہلے گزری ہے کہ نبی اکرم صلی اللہ علیہ وسلم کا وہاں موجود ہونا ان لوگوں کے خلاف انکار کرنے کے لئے تھا ۔