مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : بنو عبس سے تعلق رکھنے والا ایک شخص تھا ، جس کا نام خالد بن سنان تھا ، اس نے اپنی قوم سے کہا: میں تم سے دو پتھریلے علاقوں کی گرمی بجھا دیتا ہوں ، تو اس کی قوم کے ایک فرد عمارہ بن زیاد نے اس سے کہا: اللہ کی قسم ! اے خالد ! تم نے ہمیں جو بھی بات کہی ہے ، وہ حق ہی ثابت ہوئی ہے ، اب تمہارا اور دو پتھریلے علاقوں کی آگ کا کیا معاملہ ہے ؟ تم یہ کہہ رہے ہو کہ تم اسے بجھا دو گے ؟ راوی بیان کرتے ہیں : پھر عمارہ بن زیاد اپنی قوم کے کچھ افراد کے ہمراہ اس کے ساتھ گیا ، یہاں تک کہ وہ لوگ وہاں آئے ، تو وہ ایک پتھریلے علاقے میں پہاڑ کے کونے سے نکل رہی تھی ( یعنی لاوا بہہ رہا تھا ) اسے ” حرہ اشجع“ کہا: جاتا تھا ، تو خالد نے ان لوگوں کے لئے ایک لکیر لگائی ، اور ان لوگوں کو اس لکیر میں بٹھا دیا اور یہ کہا: اگر مجھے تمہارے پاس آنے میں تاخیر ہو جائے ، تو تم نے میرا نام لے کر مجھے نہیں بلانا ، وہ آگ ( یعنی لاوا ) یوں نکل رہی تھی جیسے سرخ رنگ کے گھوڑے ہوتے ہیں ، جو ایک دوسرے کے پیچھے پیچھے ہوں ، پھر خالد نے اس آگ کی طرف رخ کیا اور اپنے عصا کے ذریعے اسے مارنے لگا اور یہ کہا: بَدَا بَدَا كُلُّ مُنْتَهَى مَرَدَا زَعَمَ ابْنُ رَاعِيَةِ الْمِعْزَى أَنِّي لَا أَخْرُجُ مِنْهَا وَثِيَابِي تَنْدَى یہاں تک کہ وہ اس آگ کے ہمراہ اس دراڑ میں داخل ہو گیا ، اسے ان لوگوں کے پاس آنے میں تاخیر ہو گئی ، راوی کہتے ہیں : تو عمارہ بن زیاد نے کہا: اللہ کی قسم ! اگر تمہارا ساتھی زندہ ہوتا ، تو وہ اب تک نکل کر تمہارے پاس آ جاتا ، ان لوگوں نے کہا: اس نے ہمیں اس بات سے منع کیا تھا کہ ہم اس کا نام لے کر اُسے بلائیں ، عمارہ نے کہا: تم اسے اس کا نام لے کر بلاؤ ! اللہ کی قسم ! اگر وہ زندہ ہوتا ، تو وہ نکل کر آ چکا ہوتا ، تو کسی نے کہا: اس نے ہمیں اس بات سے منع کیا تھا کہ ہم اس کا نام لے کر اسے بلائیں ، راوی کہتے ہیں : پھر اُن لوگوں نے اس کا نام لے کر اسے بلایا ، تو وہ نکل کر اُن کے پاس آیا ، اس نے اپنے سر کو پکڑا ہوا تھا ، اس نے کہا: کیا میں نے تمہیں اس بات سے منع نہیں کیا تھا کہ تم میرا نام لے کر مجھے بلاؤ ، اللہ کی قسم ! تم لوگوں نے مجھے قتل کر دیا ہے ، اب تم لوگ مجھے دفن کرو ، جب گدھے تمہارے پاس سے گزریں گے ، جن میں ایک ایسا گدھا ہو گا کہ جس کی دم کٹی ہوئی ہو گی ، تو تم میری قبر کو کھود دینا ، تم مجھے زندہ پا لو گے ، راوی کہتے ہیں : پھر ان لوگوں کے پاس سے گدھے گزرے ، جن میں ایک دم کٹا گدھا موجود تھا ، تو کسی نے کہا: تم اس کی قبر کھود دو ! کیونکہ اس نے ہمیں یہ ہدایت کی تھی کہ ہم اس کی قبر کو کھو دیں ، تو عمارہ بن زیاد نے کہا: کہیں مضر قبیلے کے لوگ ہمارے بارے میں یہ باتیں نہ کریں کہ ہم اپنے مردوں کی قبریں کھود دیتے ہیں ، اللہ کی قسم ! تم اس کی قبر کو کبھی نہ کھودنا ۔ راوی بیان کرتے ہیں : خالد نے ان لوگوں کو یہ بتایا تھا کہ اس کی بیوی کے سامان میں دو ” الواح“ ہیں ، جب تم لوگوں کو کسی معاملے میں مشکل درپیش ہو ، تو تم اُن کو دیکھ لینا ، تم جس چیز کے بارے میں پوچھنا چاہ رہے ہو گے ، تمہیں اس کا حل مل جائے گا ، لیکن کوئی حیض والی عورت اسے نہ چھوئے ، راوی کہتے ہیں : جب وہ لوگ اس کی بیوی کے پاس آئے اور انہوں نے اس خاتون سے وہ الواح مانگیں ، تو اس عورت نے وہ الواح نکال کر دیں ، تو وہ عورت اس وقت حیض کی حالت میں تھی ، تو ان الواح میں جو علم تھا ، وہ ختم ہو گیا ۔ ابویونس کہتے ہیں : سماک نامی راوی نے یہ بات بیان کی ہے : خالد بن سنان کا بیٹا ، نبی اکرم صلی اللہ علیہ وسلم کے پاس آیا تھا ، تو نبی اکرم صلی اللہ علیہ وسلم نے فرمایا تھا : میرے بھتیجے کو خوش آمدید !
یہ روایت امام طبرانی نے ” موقوف “ روایت کے طور پر نقل کی ہے ۔ اس کی سند میں ایک راوی معلیٰ بن مہدی ہے ، جسے ابوحاتم نے ضعیف قرار دیا ہے ، وہ کہتے ہیں : یہ بعض اوقات منکر روایات نقل کر دیتا ہے ، میں کہتا ہوں : یہ ان ( منکر روایات ) میں سے ایک ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کے سامنے خالد بن سنان کا ذکر کیا گیا ، تو آپ صلی اللہ علیہ وسلم نے ارشاد فرمایا : ” وہ نبی تھا ، اُس کی قوم نے اُسے ضائع کر دیا ۔ “
یہ روایت امام بزار نے اور امام طبرانی نے نقل کی ہے ، تاہم انہوں نے یہ الفاظ نقل کیے ہیں : ” خالد بن سنان کی صاحبزادی نبی اکرم صلی اللہ علیہ وسلم کے پاس آئی تھی ، تو نبی اکرم صلی اللہ علیہ وسلم نے اُس خاتون کے لئے اپنا کپڑا بچھا دیا تھا ۔ “ اس روایت کی سند میں ایک راوی قیس بن ربیع ہے ، جسے شعبہ اور ثوری نے ثقہ قرار دیا ہے ، لیکن اس کے پرہیزگار ہونے کے باوجود امام أحمد اور یحیی بن معین نے اسے ضعیف کہا: ہے ۔ یہ والی روایت اُس ” صحیح “ حدیث کے برخلاف ہے ، جس میں نبی اکرم صلی اللہ علیہ وسلم کا یہ فرمان مذکور ہے : ” میں سیدنا عیسیٰ بن مریم علیہ السلام کے سب سے زیادہ قریب ہوں ، تمام انبیاء علاتی بھائی ہیں ، اور میرے اور سیدنا عیسیٰ علیہ السلام کے درمیان کوئی نبی نہیں ہے ۔ “ امام بزار کہتے ہیں :یہ روایت ثوری نے سالم کے حوالے سے سعید بن جبیر سے ” مرسل “ روایت کے طور پر بھی نقل کی ہے ۔