مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مجھے اس لئے مبعوث کیا گیا ، تاکہ میں نیک اخلاق کی تکمیل کروں ۔ “
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا جابر بن عبداللہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے مجھے عمدہ اخلاق کی تکمیل اور بہترین افعال کے کمال کے ہمراہ مبعوث کیا ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عمر بن ابراہیم قرشی ہے ، اور وہ ضعیف ہے ۔

سیدنا انس رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” عمدہ اخلاق ، جنت کے اعمال میں سے ہیں ۔ “ اس روایت کو امام طبرانی نے معجم اوسط میں ، اس حدیث میں نقل کی ہے ، جو اس سے پہلے مہمان نوازی سے متعلق باب میں گزر چکی ہے ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ جمیل ہے ، وہ جمال کو پسند کرتا ہے ، اور وہ بلند اخلاق کو پسند کرتا ہے ، اور وہ برے اخلاق کو ناپسند کرتا ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایسا راوی ہے ، جس سے میں واقف نہیں ہوں ۔

سیدنا سہل بن سعد رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ کریم ہے ، وہ کریم لوگوں کو پسند کرتا ہے ، اور وہ اُمور میں بلند کو پسند کرتا ہے ، اور کمتر کو ناپسند کرتا ہے ۔ “
یہ روایت امام طبرانی نے معجم کبیر میں نقل کی ہے ، اور معجم اوسط میں اس کی مانند نقل کی ہے ، تاہم انہوں نے یہ الفاظ نقل کیے ہیں : ” وہ بلند اخلاق کو پسند کرتا ہے ۔ “ معجم کبیر کے رجال ” صحیح “ کے رجال ہیں ۔

سیدنا امام حسین بن علی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ اُمور میں بلند اور معزز کو پسند کرتا ہے ، اور اُن ( امور ) میں کمتر کو ناپسند کرتا ہے ۔ “
یہ روایت امام طبرانی نے نقل کی ہے اس کی سند میں ایک راوی خالد بن الیاس ہے جسے امام أحمد ، یحیی بن معین ، امام بخاری رحمہ اللہ اور امام نسائی رحمہ اللہ نے ضعیف قرار دیا ہے ، اس روایت کے بقیہ رجال ثقہ ہیں ۔

سیدنا عقبہ بن عامر رضی اللہ عنہ بیان کرتے ہیں : پھر میری ملاقات نبی اکرم صلی اللہ علیہ وسلم سے ہوئی ، میں نے آپ صلی اللہ علیہ وسلم کا ہاتھ پکڑ لیا ، میں نے عرض کی : یا رسول اللہ ! آپ مجھے فضیلت والے اعمال کے بارے میں بتائیے ! تو آپ صلی اللہ علیہ وسلم نے ارشاد فرمایا : ” اے عقبہ ! جو شخص تم سے لاتعلقی اختیار کرے ، تم اس سے تعلق رکھو ، جو شخص تمہیں محروم کرے ، تم اسے دو ، اور جو شخص تمہارے ساتھ زیادتی کرے ، تم اُس سے درگزر کرو ۔ “

ایک روایت میں یہ الفاظ ہیں : ” جو شخص تمہارے ساتھ زیادتی کرے ، تم اُسے معاف کر دو ۔ “
یہ روایت امام أحمد اور امام طبرانی نے نقل کی ہے ، امام أحمد کی دو اسناد میں سے ایک کے رجال ثقہ ہیں ۔

سیدنا علی رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھ سے فرمایا : ” کیا میں دنیا اور آخرت کے سب سے زیادہ معزز اخلاق کے بارے میں تمہاری رہنمائی نہ کروں ؟ وہ یہ ہے کہ تم اس شخص کے ساتھ تعلق رکھو ، جو تم سے لاتعلقی اختیار کرے ، تم اُسے دو ، جو تمہیں محروم رکھے اور تم اسے معاف کر دو ، جو تمہارے ساتھ زیادتی کرے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی حارث ہے اور وہ ضعیف ہے ۔

سیدنا کعب بن عجرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کیا میں تمہاری رہنمائی دنیا اور آخرت کے بہتر اخلاق کی طرف نہ کروں ؟ وہ شخص کہ جو اس فرد کے ساتھ تعلق رکھے ، جو اس کے ساتھ لاتعلقی اختیار کرے ، اور اس سے درگزر کرے ، جو اس کے ساتھ زیادتی کرے ، اور اُسے دے ، جو اسے محروم رکھے ۔ “
یہ روایت امام طبرانی نے نقل کی ہے ، اس کی سند میں ایک راوی محمد بن جابر سحیمی ہے اور وہ متروک ہے ۔ انہوں نے اسے مرسل روایت کے طور پر بھی نقل کیا ہے ، اور اس کی سند میں ایسا راوی ہے ، جس سے میں واقف نہیں ہوں ۔

سیدنا معاذ بن انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” سب سے زیادہ فضیلت والا عمل یہ ہے کہ تم اس شخص کے ساتھ تعلق رکھو ، جو تم سے لاتعلقی اختیار کرے ، تم اس شخص کو دو ، جو تمہیں محروم رکھے اور تم اس شخص سے درگزر کرو ، جو تمہیں برا کہے ۔ “
یہ روایت امام طبرانی نے نقل کی ہے ، اس کی سند میں ایک راوی زبان بن فائد ہے اور وہ ضعیف ہے ۔

سیدنا عبادہ بن صامت رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کیا میں تم لوگوں کی رہنمائی اس چیز کی طرف نہ کروں ، جس کے ذریعے اللہ تعالیٰ درجات بلند کرتا ہے ؟ لوگوں نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے فرمایا : ” تم اُس شخص کے لئے بردباری کا مظاہرہ کرو ، جو تمہارے خلاف جہالت کا مظاہرہ کرے ، تم اس شخص کو معاف کر دو جو تمہارے ساتھ زیادتی کرے ، تم اس شخص کو دو ، جو تمہیں محروم رکھے اور تم اس شخص کے ساتھ تعلق قائم رکھو ، جو تم سے لاتعلقی اختیار کرے ۔ “
یہ روایت امام بزار نے نقل کی ہے ، اس کی سند میں ایک یوسف بن خالد سمتی ہے ، اور وہ کذاب ہے ۔

سیدنا عبادہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کیا میں تمہیں ان امور کے بارے میں اطلاع نہ دوں ؟ جن کے ذریعے اللہ تعالیٰ بلند عمارت عطا کرتا ہے ، اور ان کے ذریعے درجات بلند کرتا ہے ، لوگوں نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے فرمایا : ” وہ یہ ہیں کہ تم اس شخص کے سامنے بردباری کا مظاہرہ کرو ، جو تمہارے خلاف جہالت کا مظاہرہ کرے ، تم اس شخص کے ساتھ تعلق اختیار کرو ، جو تمہارے ساتھ لاتعلقی اختیار کرے ، تم اس شخص کو دو ، جو تمہیں محروم رکھے ، اور تم اس شخص سے درگزر کرو ، جو تمہارے ساتھ زیادتی کرے ۔ “
یہ روایت امام طبرانی نے نقل کی ہے ، اس کی سند میں ایک راوی ابوامیہ بن یعلیٰ ہے ، اور وہ ضعیف ہے ۔

سیدنا ابی بن کعب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص یہ چاہتا ہو کہ اس کو ( جنت میں ) بلند عمارت ملے اور اس کے درجات بلند ہوں ، تو وہ اس شخص سے درگزر کرے ، جس نے اس کے ساتھ زیادتی کی ہو ، اور اس شخص کو دے ، جس نے اسے محروم رکھا ہو ، اور اس شخص سے تعلق قائم رکھے ، جو اس سے لاتعلقی اختیار کرے ۔ “
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی ابوامیہ بن یعلیٰ ہے اور وہ ضعیف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تین چیزیں جس شخص میں ہوں گی ، اللہ تعالیٰ اس شخص سے آسان حساب لے گا اور اپنی رحمت کے وسیلے سے اسے جنت میں داخل کر دے گا ، انہوں نے عرض کی : یا رسول اللہ ! میرے ماں باپ آپ پر قربان ہوں ، وہ چیزیں کیا ہیں ؟ نبی اکرم صلی اللہ علیہ وسلم نے ارشاد فرمایا : ” تم اسے دو ، جو تمہیں محروم رکھے ، تم اس سے تعلق قائم کرو ، جو تم سے لاتعلقی اختیار کرے ، تم اس شخص سے درگزر کرو جو تمہارے ساتھ زیادتی کرے ۔ “ سیدنا ابوہریرہ رضی اللہ عنہ نے عرض کی : اے اللہ کے نبی ! جب میں ایسا کر لوں گا ، تو مجھے کیا ملے گا ؟ نبی اکرم صلی اللہ علیہ وسلم نے فرمایا : ” جب تم ایسا کر لو گے ، تو اللہ تعالیٰ تمہیں جنت میں داخل کر دے گا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی داؤد بن سلیمان یمامی ہے ، اور وہ ضعیف ہے ۔

سیدنا ابوہریرہ رضی اللہ عنہ بیان کرتے ہیں : ایک مرتبہ ایک شخص نے سیدنا ابوبکر رضی اللہ عنہ کو برا کہا: ، نبی اکرم صلی اللہ علیہ وسلم تشریف فرما تھے ۔ نبی اکرم صلی اللہ علیہ وسلم حیران ہوئے اور مسکرانے لگے ، جب اس شخص نے سیدنا ابوبکر رضی اللہ عنہ کے بارے میں زیادہ برا کہنا شروع کیا ، تو سیدنا ابوبکر رضی اللہ عنہ نے اسے کسی بات کا جواب دے دیا ، تو نبی اکرم صلی اللہ علیہ وسلم غصے میں آ گئے اور کھڑے ہو گئے ، سیدنا ابوبکر رضی اللہ عنہ آپ کے پاس آئے اور انہوں نے عرض کی : یا رسول اللہ ! وہ شخص مجھے برا کہہ رہا تھا ، آپ تشریف فرما رہے ، جب میں نے اس کی ایک بات کا جواب دیا ، تو آپ غصے میں آ گئے اور اٹھ کھڑے ہوئے ؟ نبی اکرم صلی اللہ علیہ وسلم نے فرمایا : تمہارے ساتھ ایک فرشتہ تھا ، جو تمہاری طرف سے جواب دے رہا تھا ، جب تم نے اس کی بات کا جواب دیدیا ، تو شیطان بیچ میں آ گیا ، تو میں شیطان کے ساتھ نہیں بیٹھ سکتا ، پھر نبی اکرم صلی اللہ علیہ وسلم نے ارشاد فرمایا : ” اے ابوبکر ! تین چیزیں ہیں ، جو حق ہیں ، جس بھی بندے کے ساتھ کوئی زیادتی کی جائے ، اور وہ اسے اللہ کے سپرد کر دے ، تو اللہ تعالیٰ اس کی وجہ سے اپنی مدد کے ذریعے اس شخص کو عزت عطا کرتا ہے ، اور جو بھی شخص عطیہ دینے کا دروازہ کھولتا ہے اور اس کے ذریعے اس کا مقصد صلہ رحمی کرنا ہو ، تو اللہ تعالیٰ اس کی وجہ سے اس کے مال میں اضافہ کر دیتا ہے ، اور جو بھی شخص مانگنے کا دروازہ کھولتا ہے ، اس کا مقصد اس کے ذریعے اپنے مال میں اضافہ کرنا ہو ، تو اللہ تعالیٰ اس وجہ سے اُس کی قلت میں اضافہ کر دیتا ہے ۔ “ ( علامہ ہیثمی فرماتے ہیں : ) میں یہ کہتا ہوں : امام ابوداؤد نے یہ روایت صرف ان الفاظ تک نقل کی ہے : ” میں شیطان کے ساتھ نہیں بیٹھ سکتا ۔ “
یہ روایت امام أحمد نے نقل کی ہے ، اور امام طبرانی نے معجم اوسط میں اس کی مانند نقل کی ہے ، امام أحمد کی روایت کے رجال ” صحیح “ کے رجال ہیں ۔

سیدنا سائب بن عبداللہ رضی اللہ عنہ بیان کرتے ہیں : فتح مکہ کے دن ، مجھے نبی اکرم صلی اللہ علیہ وسلم کے پاس لے جایا گیا ، سیدنا عثمان غنی رضی اللہ عنہ اور سیدنا زہیر رضی اللہ عنہ مجھے لے کے آئے اور میری تعریفیں نبی اکرم صلی اللہ علیہ وسلم کے سامنے بیان کرنے لگے ، تو نبی اکرم صلی اللہ علیہ وسلم نے ان سے فرمایا : تم لوگ مجھے اس کے بارے میں نہ بتاؤ ! یہ زمانہ جاہلیت میں ، میرا ساتھی رہا ہے ، راوی کہتے ہیں : تو انہوں نے عرض کی : جی ہاں ! یا رسول اللہ ! آپ بہت اچھے ساتھی تھے ، راوی کہتے ہیں : نبی اکرم صلی اللہ علیہ وسلم نے فرمایا : ” اے سائب ! اپنے ان اخلاق کا جائزہ لو ! جو تم زمانہ جاہلیت میں اختیار کرتے تھے ، اور زمانہ اسلام میں بھی انہیں کرتے رہو ، تم مہمان نوازی کرو ، یتیم کا احترام کرو ، اور اپنے پڑوسی کے ساتھ اچھا سلوک کرو ۔ “ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابوداؤد نے اختصار کے ساتھ نقل کی ہے ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” جس شخص میں تین میں سے ایک چیز نہیں ہو گی ، تو وہ اپنے عمل کا تاوان نہیں دے گا ( یعنی اس کو سزا نہیں ملے گی ) ایسا تقویٰ جو اسے اللہ تعالیٰ کی نافرمانی سے روک دے ، یا ایسی بردباری ، جو اسے بے وقوف کے سامنے ( غصے کا ) اظہار کرنے سے روک دے ، اور ایسے اخلاق ، جن کے ہمراہ وہ لوگوں کے ساتھ میل جول رکھے ۔ “ نبی اکرم صلی اللہ علیہ وسلم نے یہ بھی ارشاد فرمایا ہے : ” جس شخص میں ، تین میں سے کوئی ایک چیز ہو گی ، اللہ تعالیٰ حورعین سے تعلق رکھنے والی حور کے ساتھ اُس کی شادی کر دے گا ، جس شخص کے پاس کوئی پوشیدہ دلچسپی والی امانت موجود ہو ، اور وہ اللہ تعالیٰ کے خوف کی وجہ سے اُسے واپس کر دے ، یا جو شخص قاتل ( سے بدلہ لینے ) کو معاف کر دے ، یا جو شخص ہر نماز کے بعد سورت اخلاص کی تلاوت کرے ۔ “
یہ روایت امام طبرانی نے اپنے استاد ابراہیم بن محمد بن عرق کے حوالے سے نقل کی ہے ، اسے امام ذہبی نے ضعیف قرار دیا ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص قدرت ہونے کے باوجود معاف کر دے ، اللہ تعالیٰ تنگی کے دن اس سے درگزر کرے گا ۔ “
یہ روایت امام طبرانی نے نقل کی ہے اس کی سند میں ایک راوی علاء بن سعید ہے ، اور وہ ضعیف ہے ۔