مجمع الزوائد ومنبع الفوائد

سیدنا سہل بن سعد ساعدی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اہل ایمان میں ، مومن کی مثال یوں ہے جیسے جسم میں سر کی حیثیت ہوتی ہے ، اہل ایمان کے حوالے سے مومن یوں تکلیف محسوس کرتا ہے ، جس طرح جسم سر کی تکلیف کی وجہ سے ، تکلیف محسوس کرتا ہے ۔ “
یہ روایت امام أحمد نے نقل کی ہے ، امام طبرانی نے معجم کبیر اور معجم اوسط میں نقل کی ہے ، امام أحمد کے رجال ” صحیح “ کے رجال ہیں ۔

سیدنا بشیر بن سعد رضی اللہ عنہ ، جو نبی اکرم صلی اللہ علیہ وسلم کے صحابی ہیں ، وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” ایک مومن کے لئے دوسرے مومن کی مثال یوں ہے ، جیسے جسم کے لئے سر کی حیثیت ہوتی ہے ، جب جسم تکلیف کا شکار ہوتا ہے ، تو سر کو بھی اس کی وجہ سے تکلیف ہوتی ہے ، اور جب سر تکلیف کا شکار ہوتا ہے ، تو پورے جسم کو بھی تکلیف محسوس ہوتی ہے ۔ “
یہ روایت امام طبرانی نے نقل کی ہے اس کی سند میں ایک راوی عبداللہ مدینی ہے ، اور وہ متروک ہے ۔

سیدنا ابوہریرہ رضی اللہ عنہ اور سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ایک مومن دوسرے مومن کے لئے عمارت کی مانند ہے ، جس کا ایک حصہ دوسرے کو مضبوط کرتا ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی صالح بن نبہان ہے ، اور وہ ضعیف ہے ۔