مجمع الزوائد ومنبع الفوائد

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنے مسلمان بھائی کے کام کے سلسلے میں چل کے جائے ، تو اللہ تعالیٰ اسے ہر ایک قدم ، جو اس نے اٹھایا ہو ، اس کے عوض میں ، اس کے لئے ایک نیکی نوٹ کرے گا ، جب تک وہ وہاں واپس نہیں آ جاتا ، جہاں وہ اس سے جدا ہو گا ، اور اگر دوسرے شخص کی حاجت پوری ہو جاتی ہے تو وہ شخص اپنے گناہوں سے نکل کر یوں ہو جائے گا ، جیسے اس دن تھا ، جب اس کی والدہ نے اسے جنم دیا تھا اور اگر وہ اس دوران مارا جاتا ہے ، تو ایسے ہلاک ہونے والے کے کیا کہنے ؟ جو کسی حساب کے بغیر جنت میں داخل ہو جائے گا ۔ “
یہ روایت امام ابویعلیٰ نے نقل کی ہے ، اس کی سند میں ایک راوی عبدالرحیم بن زید عمی ہے اور وہ متروک ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنے مسلمان بھائی کے کام کے سلسلے میں چل کے جائے ، تو اللہ تعالیٰ اس کے اُٹھائے ہوئے ہر ایک قدم کے عوض میں ، اس کے لئے ستر نیکیاں نوٹ کرتا ہے ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی عبدالرحیم بن زید عمی ہے ، اور وہ متروک ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص کسی مومن کے ساتھ مہربانی کرے ، یا اس کے لئے کسی کام کے سلسلے میں چل کے جائے ، خواہ وہ ضرورت چھوٹی ہو یا بڑی ہو ، تو اللہ تعالیٰ کے ذمہ یہ بات لازم ہے کہ جنت کے خادموں میں سے اُسے خادم عطا کرے ۔ “
یہ روایت امام بزار نے نقل کی ہے ، اس کی سند میں ایک راوی معلیٰ بن میمون ہے ، اور وہ متروک ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص پریشان حال کی مدد کرتا ہے ، اللہ تعالیٰ اس کے لئے تہتر نیکیاں نوٹ کرتا ہے ، جن میں سے ایک نیکی کے ذریعے ، وہ اس شخص کی دنیا اور آخرت کے معاملے کو ٹھیک کر دیتا ہے ، اور بہتر نیکیاں اُس شخص کے لئے درجات کے اضافے کا باعث ہوتی ہیں ۔ “
یہ روایت امام ابویعلیٰ اور امام بزار نے نقل کی ہے ، ان دونوں کی سند میں ایک راوی زیاد بن ابوحسان ہے ، اور وہ متروک ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مخلوق اللہ تعالیٰ کی عیال ہے ، تو ان میں سے اللہ تعالیٰ کے نزدیک زیادہ محبوب وہ ہے ، جو اُس کے عیال کے لئے زیادہ نفع بخش ہو ۔ “
یہ روایت امام ابویعلیٰ اور امام بزار نے نقل کی ہے ، اور اس کی سند میں ایک راوی یوسف بن عطیہ صفار ہے ، اور وہ متروک ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ساری مخلوق اللہ تعالیٰ کی عیال ہے ، اور اللہ تعالیٰ کے نزدیک مخلوق میں سب سے زیادہ محبوب بندہ وہ ہے ، جو اس کی عیال کے لیے زیادہ نفع بخش ہو ۔ “
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی عمیر ہے ، اور وہ ابوہارون قرشی ہے ، اور وہ متروک ہے ۔

سیدنا عبداللہ بن عمر رضی اللہ عنہما بیان کرتے ہیں : ایک شخص نبی اکرم صلی اللہ علیہ وسلم کے پاس آیا ، اس نے عرض کی : یا رسول اللہ ! اللہ تعالیٰ کے نزدیک لوگوں میں کون زیادہ محبوب ہے ؟ اور اللہ تعالیٰ کے نزدیک اعمال میں کون سا عمل زیادہ محبوب ہے ؟ تو نبی اکرم صلی اللہ علیہ وسلم نے ارشاد فرمایا : ” لوگوں میں ، اللہ تعالیٰ کے نزدیک سب سے زیادہ محبوب وہ شخص ہے ، جو لوگوں کے حق میں سب سے زیادہ نفع بخش ہو ، اور اعمال میں اللہ تعالیٰ کے نزدیک سب سے زیادہ محبوب وہ خوشی ہے ، جسے تم کسی مسلمان پر داخل کرتے ہو ، یا کسی مسلمان سے تم کوئی تکلیف دہ چیز دور کر دیتے ہو ، یا تم اس کا قرض ادا کر دیتے ہو ، یا اس سے بھوک کو پرے کر دیتے ہو ، میں اپنے کسی بھائی کے ساتھ اس کے کسی کام کے سلسلے میں چل کے جاؤں ، یہ میرے نزدیک اس سے زیادہ محبوب ہے کہ میں اس مسجد میں ، یعنی مسجد نبوی میں ایک ماہ تک اعتکاف کروں ، اور جو شخص اپنے غضب کو روک لیتا ہے ، تو اللہ تعالیٰ اس کے پوشیدہ معاملات کی پردہ پوشی کرتا ہے ، جو شخص اپنے غصے کو پی لیتا ہے ، ایسی صورت میں جبکہ اگر وہ چاہے ، تو اسے دکھا سکتا ہو ، تو اللہ تعالیٰ قیامت کے دن اس کے دل کو خوشحالی سے بھر دے گا اور جو شخص اپنے بھائی کے ساتھ اس کے کسی کام کے سلسلے میں چل کے جاتا ہے ، یہاں تک کہ اس کا وہ کام کروا دیتا ہے ، تو اللہ تعالیٰ اس دن اس شخص کے پاؤں کو ثابت قدم رکھے گا ، جب لوگوں کے پاؤں پھسل رہے ہوں گے ۔ “
یہ روایت امام طبرانی نے تینوں کتابوں میں نقل کی ہے ، اس کی سند میں ایک راوی مسکین بن سراج ہے ، اور وہ ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنے مسلمان بھائی کے معاملے کو متعلقہ حاکم تک پہنچاتا ہے ، جس میں ( اس بھائی ) کو کوئی بہتری مل رہی ہو ، یا کوئی مشکل آسان ہو رہی ہو ، تو اللہ تعالیٰ پل صراط سے گزرتے وقت جب لوگوں کے قدم ڈگمگا رہے ہوں گے ، اس شخص کی مدد کرے گا ۔ “
یہ روایت امام طبرانی نے معجم اوسط اور معجم صغیر میں نقل کی ہے ، اور اس کی سند میں ایک راوی ابراہیم بن ہشام نسائی ہے ، جسے ابن حبان اور دیگر حضرات نے ثقہ قرار دیا ہے ، جبکہ ابوحاتم اور دیگر حضرات نے اسے ضعیف کہا: ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ کی کچھ مخلوق ہے ، جنہیں اس نے لوگوں کی ضروریات پوری کرنے کے لئے بھیجا ہے ، لوگ اپنی ضروریات کے سلسلے میں اُن کی طرف رجوع کرتے ہیں ، وہ لوگ اللہ کے عذاب سے محفوظ رہیں گے ۔ “
یہ روایت امام طبرانی نے نقل کی ہے ، اس کی سند میں ایک راوی عبدالرحمن بن ایوب ہے ، جسے جمہور نے ضعیف قرار دیا ہے ، امام ترمذی نے اس کی نقل کردہ حدیث کو حسن قرار دیا ہے ، اس سے روایات نقل کرنے والا شخص أحمد بن طارق ہے ، اور میں اس سے واقف نہیں ہوں ، اس روایت کے بقیہ رجال ” صحیح “ کے رجال ہیں ۔

سیدنا ابودرداء رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنے کسی مسلمان بھائی کا معاملہ کسی حکمران تک پہنچاتا ہے ، جس سے اس کو کوئی بھلائی حاصل ہو ، یا اس کے پاس کوئی خوشی آ جائے ، تو اللہ تعالیٰ جنت کے بلند درجات میں اُس شخص کے درجے بلند کرتا ہے ۔ “
یہ روایت امام طبرانی نے نقل کی ہے ، اس کی سند میں ایسے راوی ہیں ، جن سے میں واقف نہیں ہوں ، انہوں نے اسے ایک اور ضعیف سند کے ساتھ بھی نقل کیا ہے ، انہوں نے اسے معجم اوسط میں بھی نقل کیا ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ نے یہ فرمایا ہے : میں نے خیر اور شر کو پیدا کیا ہے ، تو اس شخص کے لیے مبارک باد ہے ، جس کے ہاتھ پر میں نے ” بھلائی “ مقدر کی ہو ، اور اُس شخص کے لئے بربادی ہے ، جس کے ہاتھ پر میں نے ” شر “ مقدر کیا ہو ۔ “
یہ روایت امام طبرانی نے نقل کی ہے ، اس کی سند میں ایک راوی مالک بن یحیی نکری ہے اور وہ ضعیف ہے ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے کچھ لوگوں کو نعمتیں عطا کی ہیں ، وہ ان لوگوں کے پاس ان نعمتوں کو اس وقت تک برقرار رکھتا ہے ، جب تک وہ لوگ دوسرے لوگوں کی ضروریات پوری کرتے رہتے ہیں اور اکتاہٹ کا شکار نہیں ہوتے ، جب وہ اکتاہٹ کا شکار ہو جائیں ، تو اللہ تعالیٰ ان نعمتوں کو دوسرے لوگوں کی طرف منتقل کر دیتا ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عمرو بن حصین ہے اور وہ متروک ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے کچھ لوگوں کو پیدا کیا ہے ، جنہیں اس نے لوگوں کے نفع کے لئے نعمتوں سے مخصوص کیا ہے ، وہ ان نعمتوں کو ان کے پاس اس وقت تک برقرار رکھتا ہے ، جب تک وہ لوگ ان کو خرچ کرتے رہتے ہیں ، جب وہ ان نعمتوں کو روک لیتے ہیں ، تو اللہ تعالیٰ ان نعمتوں کو ان سے الگ کر دیتا ہے ، اور انہیں دوسرے لوگوں کی طرف منتقل کر دیتا ہے ۔ “
یہ روایت امام طبرانی نے معجم اوسط اور معجم کبیر میں نقل کی ہے ، اس کی سند میں ایک راوی محمد بن حسان سمتی ہے ، ابن معین اور دیگر حضرات نے اسے ثقہ قرار دیا ہے ، اس میں کمزوری پائی جاتی ہے ، تاہم اس کے استاد ابوعثمان عبداللہ بن زید حمصی کو ازدی نے ضعیف قرار دیا ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس بندے کو اللہ تعالیٰ نعمت عطا کرے اور بھرپور نعمت عطا کرے ، اور پھر لوگوں کی ضرورت کو اس کی طرف متوجہ کرے اور وہ شخص اس ضرورت کو پورا نہ کرے ، تو وہ شخص اس نعمت کو زوال کے لئے پیش کر دیتا ہے ۔ “
یہ روایت امام طبرانی نے معجم اوسط میں نقل کی ہے ، اور اس کی سند عمدہ ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اپنے بھائی کی حاجت کے سلسلے میں چل کے جاتا ہے ، یہ اس کے لئے دس اعتکاف کرنے سے زیادہ بہتر ہے ، اور جو شخص اللہ تعالیٰ کی رضا کے حصول کے لئے ایک دن کا اعتکاف کرتا ہے ، تو اللہ تعالیٰ اس شخص اور جہنم کے درمیان تین خندقیں حائل کر دیتا ہے ، جن میں سے ہر خندق اُس سے زیادہ بڑی ہوتی ہے ، جتنا زمین اور آسمان کے درمیان فاصلہ ہے ۔ “
یہ روایت امام طبرانی نے معجم اوسط میں نقل کی ہے ، اور اس کی سند عمدہ ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص کسی مسلمان سے کوئی پریشانی دور کرتا ہے ، قیامت کے دن اللہ تعالیٰ اس کے لئے پل صراط پر نور کے دو شعبے مقرر کر دے گا ، اُن دونوں کی روشنی سے اتنا عالم روشن ہو گا کہ جس کا شمار صرف رب العزت کر سکتا ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی علاء بن سلمہ بن عثمان ہے ، اور وہ ضعیف ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” فرائض کے بعد اللہ تعالیٰ کے نزدیک سب سے زیادہ پسندیدہ عمل کسی مسلمان پر خوشی داخل کرنا ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی اسماعیل بن عمرو بجلی ہے ، جسے ابن حبان نے ثقہ قرار دیا ہے ، اور دیگر حضرات نے اسے ضعیف کہا: ہے ۔

سیدنا امام حسن بن علی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک مغفرت کو واجب کرنے والی چیزوں میں سے ایک ( چیز ) مسلمان بھائی پر خوشی داخل کرنا ہے ۔ “
یہ روایت امام طبرانی نے معجم اوسط اور معجم کبیر میں نقل کی ہے ، اس کی سند میں ایک راوی جہم بن عثمان ہے ، اور وہ ضعیف ہے ۔

سیدہ عائشہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” جو شخص کسی مسلمان گھرانے پر خوشی کو داخل کرتا ہے ، اللہ تعالیٰ اس کے لئے جنت سے کم ثواب پر راضی نہیں ہو گا ۔ “
یہ روایت امام طبرانی نے معجم صغیر اور معجم اوسط میں نقل کی ہے ، اس کی سند میں ایک راوی عمر بن حبیب قاضی ہے ، اور وہ ضعیف ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنے مسلمان بھائی سے اس چیز کے ہمراہ ملتا ہے ، جس سے اللہ تعالیٰ محبت کرتا ہو اور اس کا مقصد یہ ہوتا ہے کہ اس کے ذریعے اس کو خوش کر دے ، تو اللہ تعالیٰ قیامت کے دن اُس شخص کو خوش کر دے گا ۔ “
یہ روایت امام طبرانی نے معجم صغیر میں نقل کی ہے ، اور اس کی سند حسن ہے ۔

سیدنا کعب بن عجرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص کسی مومن سے کوئی تکلیف دور کرتا ہے ، اللہ تعالیٰ قیامت کے دن اس کی تکلیف کو ختم کر دے گا اور جو شخص کسی مومن کی پردہ پوشی کرتا ہے ، اللہ تعالیٰ اس شخص کی پردہ پوشی کرے گا اور جو شخص کسی مومن کو کسی پریشانی سے کشادگی نصیب کرے گا ، اللہ تعالیٰ اس شخص کو اس کی پریشانی سے کشادگی نصیب کرے گا“ ۔
یہ روایت امام طبرانی نے معجم اوسط اور معجم کبیر میں نقل کی ہے ، اس کی سند میں ایک راوی شعیب ہے ، جو چادریں فروخت کرتا تھا اور وہ مجہول ہے ۔

سیدنا زید بن ثابت رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اللہ تعالیٰ مسلسل بندے کی حاجت روائی کرتا رہتا ہے ، جب تک وہ شخص اپنے بھائی کی حاجت روائی کرتا رہے ۔ “
یہ روایت امام طبرانی نے نقل کی ہے ، اور اس کے رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص دنیا میں کسی مسلمان سے پریشانی کو دور کرتا ہے ، اللہ تعالیٰ اس سے قیامت کے دن کی پریشانیوں میں سے کوئی پریشانی دور کر دے گا ، اور جو شخص کسی مسلمان کی پردہ پوشی کرتا ہے ، قیامت کے دن اللہ تعالیٰ اس شخص کی پردہ پوشی کرے گا ، اور اللہ تعالیٰ بندے کی حاجت روائی کرتا رہتا ہے ، جب تک بندہ اپنے بھائی کی حاجت پوری کرنے میں مشغول رہتا ہے ۔ “
یہ روایت امام طبرانی نے معجم اوسط میں نقل کی ہے ، معجم کبیر میں اس کا آخری حصہ مذکور ہے ، اس کی سند میں ایک راوی عبداللہ بن زحر ہے جسے ایک جماعت نے ثقہ قرار دیا ہے ، اور دیگر حضرات نے اسے ضعیف کہا: ہے ، اس روایت کے بقیہ رجال ثقہ ہیں ۔

سیدنا عبداللہ بن عمرو رضی اللہ عنہ اور سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنے مسلمان بھائی کی حاجت روائی میں چل کے جاتا ہے ، اللہ تعالیٰ اس کے لئے پچھتر ہزار فرشتوں کا سایہ کر دیتا ہے ، جو اس شخص کے لئے دعا کرتے ہیں اور ایسا شخص مسلسل رحمت میں غوطہ زن رہتا ہے ، جب تک وہ فارغ نہیں ہو جاتا ، جب وہ فارغ ہو جائے ، تو اللہ تعالیٰ اس کے لئے حج اور عمرے کا ثواب نوٹ کرتا ہے ۔ ۔ ۔ ۔ ۔ ۔ ۔ “ اس کے بعد راوی نے پوری حدیث ذکر کی ہے ۔ اس سے پہلے یہ روایت بیمار کی عیادت کرنے سے متعلق باب کتاب الجنائز میں گزر چکی ہے ۔

سیدنا معاویہ بن حیدہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” پوشیدہ طور پر صدقہ کرنا ، پروردگار کے غضب کو بجھا دیتا ہے ، اور بھلائی کے کام کرنا ، بری موت سے بچاتے ہیں ، اور صلہ رحمی کرنا ، عمر میں اضافے کا باعث بنتا ہے ، اور غربت کو ختم کر دیتا ہے ، اور تم لا حول ولا قوة الا باللہ زیادہ پڑھا کرو ! کیونکہ یہ جنت کے خزانوں میں سے ایک خزانہ ہے ، اور اس میں ننانوے بیماریوں کی شفاء ہے ، جن میں سب سے ہلکی ( چیز ) پریشانی ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی اصبغ ہے جو غیر معروف ہے ، اس روایت کے بقیہ رجال کی توثیق کی گی ہے ، اور ان راویوں کے بارے میں اختلاف پایا جاتا ہے ۔

سیدنا سمرہ بن جندب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” سب سے زیادہ فضیلت والا صدقہ ، زبان والا ہوتا ہے ، عرض کی گی : یا رسول اللہ ! زبان کا صدقہ کیا ہوتا ہے ؟ نبی اکرم صلی اللہ علیہ وسلم نے فرمایا : ” ایسی سفارش ، جو کسی قیدی کو چھڑا دے ، یا خون کے بدلے کے معاملے کو ختم کر دے ، یا جس کے ذریعے تم کوئی بھلائی ، یا احسان اپنے بھائی کی طرف لے جاؤ ، یا اُس سے ناپسندیدہ صورت حال کو دور کر دو ۔ “
یہ روایت امام طبرانی نے نقل کی ہے ، اس کی سند میں ایک راوی ابوبکر ہذلی ہے اور وہ ضعیف ہے ۔