مجمع الزوائد ومنبع الفوائد

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” پروردگار کی رضامندی ، والد کی رضامندی میں ، اور پروردگار کی ناراضگی ، والد کی ناراضگی میں ہے ۔ “
یہ روایت امام بزار نے نقل کی ہے اس کی سند میں ایک راوی عصمہ بن محمد ہے اور وہ متروک ہے ۔

سیدنا انس بن مالک رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” جو شخص یہ چاہتا ہو کہ اس کی عمر میں اضافہ ہو جائے اس کے رزق میں اضافہ ہو جائے ، اس کو والدین کے ساتھ اچھا سلوک کرنا چاہیے اور رشتے داروں کے ساتھ اچھا سلوک کرنا چاہیے ۔ ( علامہ ہیثمی فرماتے ہیں : ) میں یہ کہتا ہوں یہ روایت صحیح میں مذکور ہے تاہم اس میں والدین کے ساتھ اچھا سلوک کرنے کا ذکر نہیں ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” اللہ تعالیٰ کی اطاعت ، والد کی اطاعت میں ہے اور اللہ تعالیٰ کی نافرمانی والد کی نافرمانی میں ہے ۔ “
یہ روایت امام طبرانی نے معجم اوسط میں ، اپنے استاد ابراہیم بن عبداللہ بن کیسان کے حوالے سے نقل کی ہے اور وہ کمزور ہے ، اس کے حوالے سے انہوں نے اسے اسماعیل بن عمرو بجلی سے نقل کیا ہے ، جسے ابن حبان اور دیگر حضرات نے ثقہ قرار دیا ہے ، جبکہ ابوحاتم اور دیگر حضرات نے اسے ضعیف کہا: ہے ، اس روایت کے بقیہ رجال صحیح کے رجال ہیں ۔

سیدنا معاذ بن انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اپنے والدین کے ساتھ اچھا سلوک کرتا ہے ، اس کے لئے مبارک باد ہے ، اللہ تعالیٰ اس کی عمر میں اضافہ کر دیتا ہے ۔ “
یہ روایت امام ابویعلیٰ اور امام طبرانی نے نقل کی ہے اس کی سند میں ایک راوی زبان بن فائد ہے جسے ابوحاتم نے ثقہ قرار دیا ہے اور دیگر حضرات نے اسے ضعیف کہا: ہے ، امام ابویعلیٰ کے بقیہ رجال ثقہ ہیں ۔

سیدنا رافع بن مکیث رضی اللہ عنہ ، جنہیں غزوہ حدیبیہ میں شرکت کا شرف حاصل ہے ، وہ نبی اکرم صلی اللہ علیہ وسلم کا یہ فرمان نقل کرتے ہیں : والدین کے ساتھ اچھا سلوک ، عمر میں اضافہ کرتا ہے اور صدقہ ، بری موت کو روک دیتا ہے ۔ “
یہ روایت امام أحمد نے ایک طویل حدیث میں ، سیدنا رافع رضی اللہ عنہ کی اولاد میں سے کسی سے نقل کی ہے ، ان کے علاوہ دیگر نے ان کا نام محمد بن خالد بن رافع بیان کیا ہے ، تو اس روایت کے رجال اُس اعتبار سے ثقہ ہوں گے ، جس نے اُس کا نام بیان کیا ہے ۔

سیدنا بریدہ رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اس نے عرض کی یا رسول اللہ ! میں شدید گرمی کے موسم میں اپنی والدہ کو اپنی گردن پر بٹھا کر دو فرسخ تک چلا ہوں ، ایسی گرمی تھی کہ اگر وہاں گوشت کا ٹکڑا ڈالا جاتا تو وہ پک جاتا ، تو کیا میں نے اپنی والدہ کا شکر ادا کر دیا ہے ؟ نبی اکرم صلی اللہ علیہ وسلم نے ارشاد فرمایا : ” شاید یہ ، کسی ایک تکلیف کا بدل بنتا ہے ۔ “
یہ روایت امام طبرانی نے معجم صغیر میں نقل کی ہے ، اس کی سند میں ایک راوی حسن بن ابوجعفر ہے اور وہ ضعیف ہے لیکن جھوٹا نہیں ہے اور ایک راوی لیث بن ابوسلیم ہے اور وہ مدلس ہے ۔

اسی صحابی کے حوالے سے یہ بات منقول ہے : ایک شخص نے اپنی والدہ کو اٹھا کر انہیں طواف کروایا ، اس نے نبی اکرم صلی اللہ علیہ وسلم سے دریافت کیا : کیا میں نے ان کا حق ادا کر دیا ہے ؟ تو نبی اکرم صلی اللہ علیہ وسلم نے ارشاد فرمایا : جی نہیں ! یہ ایک تکلیف کا بھی حق نہیں بنتا ہے ، یا جس طرح بھی آپ صلی اللہ علیہ وسلم نے ارشاد فرمایا ۔
یہ روایت امام بزار نے اس سے پہلے والی روایت کی سند کے ساتھ نقل کی ہے ۔

سیدہ عائشہ صدیقہ رضی اللہ عنہا بیان کرتی ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اس کے ساتھ ایک بوڑھا بھی تھا ، نبی اکرم صلی اللہ علیہ وسلم نے اس سے دریافت کیا : اے فلاں شخص ! تمہارے ساتھ کون ہے ؟ اس نے جواب دیا : میرے والد ہیں ، نبی اکرم صلی اللہ علیہ وسلم نے فرمایا : ” تم ان کے آگے نہ چلنا اور ان سے پہلے نہ بیٹھنا اور انہیں ان کے نام سے نہ بلانا اور ان کے ساتھ سختی سے بات نہ کرنا ۔ “
یہ روایت امام طبرانی نے معجم اوسط میں نقل کی ہے ، وہ کہتے ہیں : یہ نبی اکرم صلی اللہ علیہ وسلم کے حوالے سے صرف اسی سند کے ساتھ منقول ہے ، جو انہوں نے اپنے استاد علی بن سعید بن بشیر کے حوالے سے نقل کی ہے اور وہ کمزور ہے ، ابن دقیق العید نے یہ بات نقل کی ہے کہ اس کی توثیق کی گی ہے ، اس روایت کی سند میں ایک راوی محمد بن عرعرہ بن یزید ہے جس سے میں واقف نہیں ہوں ، اس روایت کے بقیہ رجال صحیح کے رجال ہیں ۔

ابوغسان ضبی بیان کرتے ہیں : میں اپنے والد کے ساتھ پتھریلی سرزمین پر چلتا ہوا جا رہا تھا ، سیدنا ابوہریرہ رضی اللہ عنہ کی مجھ سے ملاقات ہوئی ، انہوں نے مجھ سے دریافت کیا : یہ کون ہے ؟ میں نے جواب دیا : یہ میرے والد ہیں ، انہوں نے فرمایا : تم اپنے والد کے آگے نہ چلنا ، بلکہ اُن کے پیچھے چلنا ، یا اُن کے ایک طرف چلنا اور تم کسی شخص کو یہ موقع نہ دینا کہ وہ تمہارے اور ان کے درمیان حائل ہو جائے اور تم کسی ایسی بلند جگہ پر نہ چلنا کہ تمہارے والد نیچے ہو رہے ہوں ، اور تم کوئی ایسی گوشت والی ہڈی نہ کھانا ، جس کی طرف تمہارے والد دیکھ رہے ہوں ، ہو سکتا ہے ، انہیں اس کی خواہش ہو ۔ ( علامہ ہیثمی فرماتے ہیں : ) میں یہ کہتا ہوں : یہ مکمل روایت ، والدین کی نافرمانی سے متعلق باب میں آئے گی ۔
یہ روایت امام طبرانی نے معجم اوسط میں نقل کی ہے ابوغسان نامی راوی اور اس سے روایت نقل کرنے والا شخص ابوغنم ، میں ان دونوں سے واقف نہیں ہوں ، اس روایت کے بقیہ رجال ثقہ ہیں ۔

سیدنا ابوسعید خدری رضی اللہ عنہ بیان کرتے ہیں : یمن سے تعلق رکھنے والا ایک شخص ، ہجرت کر کے نبی اکرم صلی اللہ علیہ وسلم کے پاس آیا ، نبی اکرم صلی اللہ علیہ وسلم نے اس سے دریافت کیا : تم نے شرک سے لاتعلقی اختیار کر لی ہے ؟ لیکن جہاد باقی ہے ، کیا یمن میں تمہارے ماں باپ موجود ہیں ؟ اس نے جواب دیا : جی ہاں ! نبی اکرم صلی اللہ علیہ وسلم نے دریافت کیا : اُن دونوں نے تمہیں اجازت دی تھی ؟ اس نے جواب دیا : جی نہیں ! تو نبی اکرم صلی اللہ علیہ وسلم نے فرمایا : تم اپنے ماں باپ کی طرف واپس چلے جاؤ اور ان دونوں سے اجازت مانگو ، اگر وہ اجازت دیدیتے ہیں تو ٹھیک ہے ، ورنہ ان کے ساتھ اچھا سلوک کرتے رہنا ۔ “
یہ روایت امام أحمد نے نقل کی ہے اور اس کی سند حسن ہے ۔

سیدنا انس رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اُس نے عرض کی : مجھے جہاد میں حصہ لینے کا شوق ہے اور میں اس کی قدرت نہیں رکھتا ، نبی اکرم صلی اللہ علیہ وسلم نے دریافت کیا : کیا تمہارے ماں باپ میں سے کوئی باقی ہے ؟ اس نے جواب دیا : میری والدہ ہیں ، نبی اکرم صلی اللہ علیہ وسلم نے فرمایا : تو تم اس خاتون کے ساتھ اچھا سلوک کر کے ، اللہ تعالیٰ کو راضی کرو ! جب تم ایسا کر لو گے ، تو تمہیں حج کرنے والے ، عمرہ کرنے والے اور جہاد کرنے والے شخص کی مانند اجر ملے گا ، جب تمہاری والدہ تم سے راضی ہوں گی ( تو یہ اجر ملے گا ) تو تم اللہ تعالیٰ سے ڈرتے رہو اور ( اس ) خاتون کے ساتھ اچھا سلوک کرو ۔ “
یہ روایت امام ابویعلیٰ نے ، امام طبرانی نے معجم صغیر اور معجم اوسط میں نقل کی ہے ، ان دونوں کے رجال صحیح کے رجال ہیں ، صرف میمون بن نجیح کا معاملہ مختلف ہے اور ابن حبان نے اسے ثقہ قرار دیا ہے ۔

معاویہ بن جاہمہ اپنے والد کا یہ بیان نقل کرتے ہیں : میں جہاد میں حصہ لینے کے لئے مشورہ لینے کی غرض سے نبی اکرم صلی اللہ علیہ وسلم کی خدمت میں حاضر ہوا ، نبی اکرم صلی اللہ علیہ وسلم نے دریافت کیا : کیا تمہارے ماں باپ ہیں ؟ میں نے عرض کی : جی ہاں ! نبی اکرم صلی اللہ علیہ وسلم نے فرمایا : تم اُن دونوں کے ساتھ رہو ! کیونکہ جنت اُن دونوں کے پاؤں کے نیچے ہے ۔ “
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا طلحہ بن معاویہ سلمی رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، میں نے عرض کی : یا رسول اللہ ! میں اللہ کی راہ میں جہاد میں حصہ لینا چاہتا ہوں ، نبی اکرم صلی اللہ علیہ وسلم نے دریافت کیا : تمہاری والدہ زندہ ہیں ؟ میں نے جواب دیا : جی ہاں ! نبی اکرم صلی اللہ علیہ وسلم نے فرمایا : تم اُن کے پاؤں کے پاس رہو ! وہیں جنت ہے ۔
یہ روایت امام طبرانی نے ابن اسحاق کے حوالے سے نقل کی ہے اور وہ مدلس ہے ، اس کے حوالے سے یہ محمد بن طلحہ سے منقول ہے اور میں اس سے واقف نہیں ہوں ، اس روایت کے بقیہ رجال صحیح کے رجال ہیں ۔

سیدہ ام سلمہ رضی اللہ عنہا کے غلام ، نعیم بیان کرتے ہیں : سیدنا عبداللہ بن عمر رضی اللہ عنہما حج کے لئے روانہ ہوئے ، مکہ اور مدینہ منورہ کے درمیان وہ کسی درخت کے پاس آئے ، انہوں نے اس درخت کو پہچان لیا اور پھر اس کے نیچے بیٹھ گئے ، پھر انہوں نے یہ بات بیان کی کہ میں نے نبی اکرم صلی اللہ علیہ وسلم کو اس درخت کے نیچے بیٹھے ہوئے دیکھا ، اس دوران ایک گھاٹی میں سے ایک نوجوان شخص سامنے آیا اور نبی اکرم صلی اللہ علیہ وسلم کے پاس آ کر ٹھہر گیا اور عرض کی : یا رسول اللہ ! میں اس لئے آیا ہوں ، تاکہ آپ کے ساتھ اللہ کی راہ میں جہاد میں حصہ لوں اور میں اس کے ذریعے اللہ تعالیٰ کی رضا کے حصول اور آخرت کے اجر و ثواب کا حصول چاہتا ہوں ، تو نبی اکرم صلی اللہ علیہ وسلم نے فرمایا : کیا تمہارے ماں باپ دونوں زندہ ہیں ؟ اس نے جواب دیا : جی ہاں ! نبی اکرم صلی اللہ علیہ وسلم نے فرمایا : تم واپس چلے جاؤ اور ان دونوں کے ساتھ اچھا سلوک کرو ، تو وہ شخص واپس اسی طرف چلا گیا جہاں سے وہ آیا تھا ۔
یہ روایت امام ابویعلیٰ نے نقل کی ہے ، اس کی سند میں ایک راوی ابن اسحاق ہے اور وہ مدلس اور ثقہ ہے ، اس روایت کے بقیہ رجال صحیح کے رجال ہیں ، اگر ناعم نامی شخص سیدہ ام سلمہ رضی اللہ عنہا کا غلام ہو اور یہ روایت صحیح ہو گی اور اگر وہ نعیم ہو ، تو پھر میں اس سے واقف نہیں ہوں ۔ ( علامہ ہیثمی فرماتے ہیں : ) میں یہ کہتا ہوں : اس نوعیت کی کچھ احادیث ، جہاد سے متعلق باب میں گزر چکی ہیں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اپنے ماں باپ کے ساتھ اچھا سلوک کرو ! تمہاری اولاد تمہارے ساتھ اچھا سلوک کرے گی ، تم لوگ پاکدامن رہو ، تمہاری عورتیں پاکدامن رہیں گی ۔ “
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ، صرف امام طبرانی کے استاد أحمد کا معاملہ مختلف ہے ، جس کا اسم منسوب بیان نہیں کیا گیا ہے بظاہر یہ لگتا ہے ، یہ ان افراد میں سے ایک ہے جن سے امام طبرانی نے بکثرت روایات نقل کی ہیں اور شاید اسی وجہ سے انہوں نے اس کا اسم منسوب بیان نہیں کیا ، باقی اللہ بہتر جانتا ہے ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” تم لوگ پاک دامن رہو ! تمہاری عورتیں پاک دامن رہیں گی ، تم اپنے آباء و اجداد کے ساتھ اچھا سلوک کرو ، تمہاری اولاد تمہارے ساتھ اچھا سلوک کرے گی ۔ “ اس کے بعد راوی نے پوری حدیث ذکر کی ہے ، مکمل روایت ” کتاب الادب“ میں عذر پیش کرنے سے متعلق باب میں گزر چکی ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی خالد بن یزید عمری ہے اور وہ کذاب ہے ۔

سیدنا ابوامامہ رضی اللہ عنہ بیان کرتے ہیں : وہ حجۃ الوداع کے موقع پر نبی اکرم صلی اللہ علیہ وسلم کے ساتھ موجود تھے ، نبی اکرم صلی اللہ علیہ وسلم نے سب سے پہلے یہ بات ارشاد فرمائی : ” بے شک اللہ تعالیٰ تمہیں تمہاری ماؤں کے بارے میں تلقین کرتا ہے ۔ ۔ ۔ ۔ ۔ ۔ ۔ ۔ “ ۔ اس کے بعد راوی نے پوری حدیث ذکر کی ہے ۔
یہ روایت امام طبرانی نے نقل کی ہے ، اس کی سند میں ایک راوی محمد بن اسماعیل بن عیاش ہے اور وہ ضعیف ہے ۔

سیدنا ابوہریرہ رضی اللہ عنہ بیان کرتے ہیں : ایک خاتون نبی اکرم صلی اللہ علیہ وسلم کی خدمت میں حاضر ہوئی اور عرض کی : یا رسول اللہ ! میں کس کے ساتھ سب سے زیادہ اچھا سلوک کروں ؟ نبی اکرم صلی اللہ علیہ وسلم نے فرمایا : اپنی ماں کے ساتھ ، اس نے دریافت کیا : پھر کس کے ساتھ ؟ نبی اکرم صلی اللہ علیہ وسلم نے فرمایا : اپنی ماں کے ساتھ ، اس نے دریافت کیا : پھر کس کے ساتھ ؟ نبی اکرم صلی اللہ علیہ وسلم نے فرمایا : اپنی ماں کے ساتھ اس نے دریافت کیا : پھر کس کے ساتھ ؟ نبی اکرم صلی اللہ علیہ وسلم نے فرمایا : اپنے باپ کے ساتھ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی سلیمان بن داؤد یمامی ہے اور وہ متروک ہے ۔

سیدنا عبداللہ بن سعید رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اس نے عرض کی : یا رسول اللہ میری بیوی بھی ہے ، ماں بھی ہے اور باپ بھی ہے ، اُن میں سے کون میرے اچھے سلوک کا سب سے زیادہ حق دار ہے ؟ نبی اکرم صلی اللہ علیہ وسلم نے ارشاد فرمایا : ” تمہاری ماں ، تمہارا باپ ، تمہاری بہن ، تمہارا بھائی اور پھر درجہ بدرجہ قریبی عزیز ۔ “
یہ روایت امام طبرانی نے معجم اوسط میں نقل کی ہے اور امام بزار نے نقل کی ہے ، اس کی سند میں ایک راوی سری بن اسماعیل ہے اور وہ متروک ہے ۔ یہ روایت امام بزار نے اس کی مانند نقل کی ہے ، جو حسن سند کے ساتھ منقول ہے اور اس سند کے علاوہ ہے ، جو اس سے پہلے گزری ہے ۔

سیدنا اسامہ بن شریک رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ حجۃ الوداع کے موقع پر موجود تھا ، آپ صلی اللہ علیہ وسلم نے ارشاد فرمایا : ” تمہاری ماں ، تمہارا باپ ، تمہاری بہن ، تمہارا بھائی ، پھر درجہ بدرجہ قریبی رشتے دار ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں البتہ عبداللہ بن أحمد بن حنبل کا معاملہ مختلف ہے اور وہ ثقہ اور ثبت ہے ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے زکوۃ سے متعلق باب میں ، اوپر والے ہاتھ کے ، نیچے والے ہاتھ سے بہتر ہونے سے متعلق باب میں ، اس نوعیت کی کچھ احادیث گزر چکی ہیں ۔

سیدنا جابر بن سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم منبر پر چڑھے اور آپ صلی اللہ علیہ وسلم نے فرمایا : آمین ، آمین ، آمین ، پھر آپ صلی اللہ علیہ وسلم نے بتایا : ” سیدنا جبرائیل علیہ السلام میرے پاس آئے اور بولے : اے سیدنا محمد ! جو اپنے ماں باپ میں سے کسی ایک کو پائے اور وہ ایسی حالت میں مر جائے کہ وہ جہنم میں چلا جائے ، تو اللہ تعالیٰ اسے ( اپنی رحمت سے ) دور کر دے ، آپ آمین کہیں ! تو میں نے آمین کہا: ، جبرائیل نے کہا: اے سیدنا محمد صلی اللہ علیہ وسلم جو شخص رمضان کا مہینہ پائے اور پھر اس کی مغفرت نہ ہوئی ہو ، اور اسے جہنم میں داخل کر دیا جائے ، تو اللہ تعالیٰ اسے ( اپنی رحمت سے ) دور کر دے ، آپ آمین کہیں ، تو میں نے آمین کہا: ، پھر جبرائیل نے کہا: جس شخص کے پاس آپ کا ذکر ہو اور وہ آپ پر درود نہ بھیجے اور پھر مر جائے اور جہنم میں داخل ہو جائے ، تو اللہ تعالیٰ اسے ( اپنی رحمت سے ) دور کر دے ! آپ آمین کہیں ، تو میں نے آمین کہا: ۔ “
یہ روایت امام طبرانی نے مختلف اسانید کے ساتھ نقل کی ہے ، جن میں سے ایک حسن ہے ، اس حدیث کے مختلف طرق ہیں جو دعاؤں سے متعلق کتاب میں ، نبی اکرم صلی اللہ علیہ وسلم پر درود بھیجنے سے متعلق باب میں مذکور ہیں ۔

سیدنا مالک بن عمرو قشیری رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص کسی مسلمان کو آزاد کرے گا ، تو وہ ( آزاد ہونے والا ) جہنم سے بچاؤ کے لئے اس کا فدیہ بن جائے گا اور جو شخص اپنے ماں باپ میں سے کسی ایک کا زمانہ پائے اور پھر اس کی مغفرت نہ ہو ، تو اللہ تعالیٰ اسے ( اپنی رحمت سے ) دور کر دے ۔ “ ایک روایت میں یہ الفاظ ہیں : ” وہ اس کو پرے کر دے ۔ “
یہ روایت امام أحمد نے نقل کی ہے اس کے بعض طرق میں یہ الفاظ ہیں : ” جو مسلمان کسی مسلمان ماں باپ کے یتیم بچے کو اپنے کھانے پینے میں شریک کرتا ہے ، یہاں تک کہ وہ بچہ بڑا ہو جائے ، تو اس شخص کے لیے لازمی طور پر جنت واجب ہو جاتی ہے ۔ “ اس کے بعد راوی نے حسب سابق حدیث ذکر کی ہے اور اس کی سند حسن ہے ۔